(1)

Is trí bhíthin Cinneadh 94/800/CE ón gComhairle (1) a rinne an tAontas Comhaontú Marrakech a thabhairt i gcrích, comhaontú lena mbunaítear an Eagraíocht Dhomhanda Trádála (“Comhaontú EDT”) agus tháinig sé i bhfeidhm an 1 Eanáir 1995.

(2)

De bhun Airteagail IV:1 agus IX:1 de Chomhaontú EDT, is féidir le Comhdháil Aireachta na hEagraíochta Domhanda Trádála (EDT) cinntí a ghlacadh de chomhthoil.

(3)

Le linn a 12ú cruinniú, ón 12 go dtí an 17 Meitheamh 2022, d’fhéadfadh Comhdháil Aireachta na hEagraíochta Domhanda Trádála cinntí a ghlacadh maidir leis an dréacht-chomhaontú maidir le fóirdheontais iascaigh, maidir le Comhaontú TRIPS, agus maidir le díolúintí ó thoirmisc nó srianta ar onnmhairí i gcás ceannacháin bia ag an gClár Domhanda Bia.

(4)

Is iomchuí an seasamh atá le glacadh thar ceann an Aontais i gComhdháil Aireachta na hEagraíochta Domhanda Trádála a bhunú, a mhéid a d’fhéadfadh éifeachtaí dlíthiúla a bheith ag aon chinneadh a ghlacfar.

(5)

Tá an chaibidlíocht maidir leis na hiascaigh mar chuid de Chlár Oibre Doha um Fhorbairt (DDA) agus sainaithníodh í mar thosaíocht i Sprioc 6 de Sprioc Forbartha Inbhuanaithe 14 na Náisiún Aontaithe, arna comhaontú ag na Cinn Stáit in 2015, agus ag Cinneadh Aireachta EDT an 13 Nollaig 2017 (WT/MIN(17)/64). I bhfianaise a thábhachtaí atá an tsaincheist sin maidir leis an trádáil agus leis an bhforbairt inbhuanaithe, agus ó tharla go bhfuil an tAontas ar cheann de na tacadóirí, ba cheart don Aontas tacú leis an toradh comhaontaithe.

(6)

An chaibidlíocht maidir le bearta a bhaineann leis an maoin intleachtúil, rud dá bhforáiltear i gComhaontú TRIPS, is cuid den phlé lárnach in EDT í an chaibidlíocht sin maidir le conas is féidir leis an gcóras trádála rochtain ar vacsaíní, ar theiripic agus ar earraí riachtanacha leighis eile i gcoinne COVID-19 a fheabhsú ar fud an domhain. An 21 Bealtaine 2021, chuir roinnt Chomhaltaí EDT teachtaireacht faoi bhráid Chomhairle EDT um TRIPS, teachtaireacht inar moladh togra athbhreithnithe le haghaidh tarscaoileadh ó fhorálacha áirithe Chomhaontú TRIPS maidir le cosc, srianadh agus cóireáil COVID-19 (IP/C/W/669/Rev.1). An 4 Meitheamh 2021, chuir an tAontas teachtaireacht faoi bhráid Chomhairle Ghinearálta EDT, teachtaireacht maidir le freagarthaí beartais trádála práinneacha ar ghéarchéim COVID-19 (WT/GC/231), agus chuir sé teachtaireacht faoi bhráid Chomhairle EDT um TRIPS maidir le freagarthaí beartais trádála práinneacha ar ghéarchéim COVID-19 i ndáil le maoin intleachtúil (IP/C/W/680). An 18 Meitheamh 2021, chuir an tAontas teachtaireacht faoi bhráid Chomhairle EDT um TRIPS, teachtaireacht ina raibh dréacht-dearbhú maidir le Comhaontú TRIPS agus leis an tsláinte phoiblí i gcúinsí paindéime (IP/C/W/681), rud arb é is aidhm dó úsáid an chórais ceadúnaithe riachtanaigh a shoiléiriú nó a éascú, córas dá bhforáiltear i gComhaontú TRIPS, chun go n-oibreoidh sé chomh héifeachtúil agus is féidir i gcúinsí paindéime. Tá cinneadh na n-airí bunaithe ar an obair sin mar chuid de phacáiste níos leithne ina n-áirítear an dearbhú aireachta maidir le freagairt EDT ar phaindéim COVID-19 agus maidir le hullmhacht do phaindéim amach anseo. I bhfianaise a thábhachtaí atá an tsaincheist sin, ba cheart don Aontas tacú leis an toradh comhaontaithe.

(7)

Leis an gcaibidlíocht maidir le díolúine Chlár Domhanda Bia na Náisiún Aontaithe ó shrianta ar onnmhairiú, léiríodh go dtacaíonn a lán Comhaltaí EDT leis an ngealltanas gan srianta den sórt sin a fhorchur ar cheannacháin a dhéantar chun críoch daonnúil. I bhfianaise an togra le haghaidh cinneadh aireachta maidir leis an ábhar sin agus ó tharla gur gné thábhachtach é sin de phacáiste slándála bia atá le glacadh ag an 12ú Comhdháil Aireachta, ba cheart don Aontas tacú leis an toradh comhaontaithe,

(a)

an dréacht-chomhaontú maidir le fóirdheontais iascaigh (WT/MIN (22)/W/22);

(b)

Comhaontú TRIPS (WT/MIN(22)/W/15/Rev.2); agus

(c)

díolúintí ó thoirmisc nó srianta ar onnmhairí i gcás ceannacháin bia ag an gClár Domhanda Bia (WT/MIN(22)/W/18).