L_202402626MT.000101.fmx.xml

DEĊIŻJONI TA’ IMPLIMENTAZZJONI TAL-KUMMISSJONI (UE) 2024/2626

tat-8 ta’ Ottubru 2024

li tirrikonoxxi skont l-Artikolu 31(2) u (4) tad-Direttiva (UE) 2018/2001 li r-rapport fih data akkurata għall-finijiet tal-kejl tal-emissjonijiet ta’ gassijiet serra assoċjati mal-kultivazzjoni tal-qamħ, tal-qamħirrum u taż-żerriegħa tal-lift fil-Litwanja

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva (UE) 2018/2001 tal-Parlament Ewropew u tal-Kunsill tal-11 ta’ Diċembru 2018 dwar il-promozzjoni tal-użu tal-enerġija minn sorsi rinnovabbli (1), u b’mod partikolari l-Artikolu 31(4) tiegħu,

Billi:

(1)

Id-Direttiva (UE) 2018/2001 tirrikjedi li l-bijofjuwils, il-bijolikwidi, u l-fjuwils tal-bijomassa jiffrankaw emissjonijiet sinifikanti ta’ gassijiet serra meta mqabbla mal-fjuwils fossili sabiex ikunu jistgħu jingħaddu lejn il-miri stabbiliti f’dik id-Direttiva. Għal dan il-għan, l-Artikolu 29(10) jistabbilixxi limiti speċifiċi għall-iffrankar tal-emissjonijiet għal dawk il-fjuwils, u l-Artikolu 31 jirregola kif għandu jiġi kkalkulat l-iffrankar tal-emissjonijiet ta’ gassijiet serra mill-użu tagħhom. Meta jsiru dawk il-kalkoli, jistgħu jintużaw il-valuri prestabbiliti stipulati fl-Annessi V u VI tad-Direttiva (UE) 2018/2001. Minflok il-valuri prestabbiliti tal-emissjonijiet ta’ gassijiet serra mill-kultivazzjoni ta’ materja prima agrikola, jistgħu jintużaw valuri tipiċi taħt ċerti kundizzjonijiet. Dawn il-valuri tipiċi, li jirrappreżentaw il-valur medju f’żona speċifika, jistgħu jiġu rrappurtati lill-Kummissjoni mill-Istati Membri jew minn pajjiżi terzi. Il-valuri tipiċi jistgħu jintużaw biss jekk il-Kummissjoni tirrikonoxxihom bħala akkurati.

(2)

Fil-25 ta’ Lulju 2024, il-Litwanja ppreżentat lill-Kummissjoni r-rapport finali bid-data għall-finijiet tal-kejl tal-emissjonijiet ta’ gassijiet serra assoċjati mal-kultivazzjoni tal-qamħ, tal-qamħirrum u taż-żerriegħa tal-lift tipikament prodotti f’żoni fit-territorju tagħha kklassifikati bħala livell 2 fil-klassifikazzjoni komuni ta’ unitajiet territorjali għall-istatistika (NUTS), f’konformità mar-Regolament (KE) Nru 1059/2003 tal-Parlament Ewropew u tal-Kunsill (2). Il-Litwanja talbet li d-data tiġi rikonoxxuta bħala akkurata f’konformità mal-Artikolu 31(4) tad-Direttiva (UE) 2018/2001.

(3)	Il-Kummissjoni vvalutat ir-rapport u sabet li fih data akkurata għall-finijiet tal-kejl tal-emissjonijiet ta’ gassijiet serra assoċjati mal-kultivazzjoni tal-qamħ, tal-qamħirrum u taż-żerriegħa tal-lift tipikament prodotti f’reġjuni NUTS 2 fil-Litwanja.

(4)	Il-miżuri previsti f’din id-Deċiżjoni huma skont l-opinjoni tal-Kumitat dwar is-Sostenibbiltà tal-Bijofjuwils, il-Bijolikwidi u l-Fjuwils tal-Bijomassa,

ADOTTAT DIN ID-DEĊIŻJONI:

Artikolu 1

Ir-rapport li ppreżentat il-Litwanja għar-rikonoxximent tal-Kummissjoni fil-25 ta’ Lulju 2024 fih data akkurata għall-finijiet tal-kejl tal-emissjonijiet ta’ gassijiet serra assoċjati mal-kultivazzjoni tal-qamħ, tal-qamħirrum u taż-żerriegħa tal-lift tipikament prodotti f’reġjuni NUTS 2 fil-Litwanja, skont l-Artikolu 31(4) tad-Direttiva (UE) 2018/2001. Is-sommarju tad-data tar-rapport huwa stabbilit fl-Anness.

Artikolu 2

Jekk id-data li tinsab fir-rapport kif ippreżentat lill-Kummissjoni għar-rikonoxximent fil-25 ta’ Lulju 2024, tinbidel b’mod li jista’ jaffettwa l-akkuratezza tad-data u b’hekk il-bażi għal din id-Deċiżjoni, il-Litwanja għandha tinnotifika lill-Kummissjoni b’tali bidliet minnufih. Il-Kummissjoni għandha tivvaluta l-bidliet innotifikati biex tiddetermina jekk ir-rapport ikunx għadu jipprovdi d-data akkurata li għaliha huwa rikonoxxut.

Artikolu 3

Din id-Deċiżjoni għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Għandha tieqaf tapplika fid-29 ta’ Ottubru 2029.

Magħmul fi Brussell, it-8 ta’ Ottubru 2024.

Għall-Kummissjoni

Il-President

Ursula VON DER LEYEN

(1) ĠU L 328, 21.12.2018, p. 82, ELI: http://data.europa.eu/eli/dir/2018/2001/oj.

(2) Ir-Regolament (KE) Nru 1059/2003 tal-Parlament Ewropew u tal-Kunsill tas-26 ta’ Mejju 2003 dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS) (ĠU L 154, 21.6.2003, p. 1, ELI: http://data.europa.eu/eli/reg/2003/1059/oj).

ANNESS

Emissjonijiet ta’ gassijiet serra mill-kultivazzjoni taż-żerriegħa tal-lift fir-reġjuni NUTS2 tal-Litwanja (tunnellata ta’ ekwivalenti ta’ CO2/tunnellata ta’ żerriegħa tal-lift maħsuda fuq il-bażi ta’ materja niexfa)

Ir-reġjun NUTS 2 skont ir-Regolament (KE) Nru 1059/2003	N2O fil-ħamrija		Inkorporat			Fjuwil użat	Żerriegħa	Totali
Ir-reġjun NUTS 2 skont ir-Regolament (KE) Nru 1059/2003	Dirett	Indirett	Fertilizzant	Newtralizzazzjoni	Pestiċida	Fjuwil użat	Żerriegħa	Totali
Reġjun Kapitali	0,252	0,044	0,151	0,032	0,007	0,096	0,002	0,584
Reġjun Ċentrali u tal-Punent tal-Litwanja	0,226	0,036	0,128	0,027	0,006	0,082	0,002	0,507

Emissjonijiet ta’ gassijiet serra mill-kultivazzjoni tal-qamħ fir-reġjuni NUTS2 tal-Litwanja (tunnellata ta’ ekwivalenti ta’ CO2/tunnellata ta’ qamħ maħsuda fuq il-bażi ta’ materja niexfa)

Ir-reġjun NUTS 2 skont ir-Regolament (KE) Nru 1059/2003	N2O fil-ħamrija		Inkorporat			Fjuwil użat	Żerriegħa	Totali
Ir-reġjun NUTS 2 skont ir-Regolament (KE) Nru 1059/2003	Dirett	Indirett	Fertilizzant	Newtralizzazzjoni	Pestiċida	Fjuwil użat	Żerriegħa	Totali
Reġjuni Kapitali	0,166	0,029	0,103	0,024	0,004	0,083	0,019	0,428
Reġjun Ċentrali u tal-Punent tal-Litwanja	0,126	0,022	0,075	0,017	0,003	0,062	0,013	0,318

Emissjonijiet ta’ gassijiet serra mill-kultivazzjoni tal-qamħirrum fir-reġjuni NUTS2 tal-Litwanja (tunnellata ta’ ekwivalenti ta’ CO2/tunnellata ta’ qamħ maħsuda fuq il-bażi ta’ materja niexfa)

Ir-reġjun NUTS 2 skont ir-Regolament (KE) Nru 1059/2003	N2O fil-ħamrija		Inkorporat			Fjuwil użat	Żerriegħa	Totali
Ir-reġjun NUTS 2 skont ir-Regolament (KE) Nru 1059/2003	Dirett	Indirett	Fertilizzant	Newtralizzazzjoni	Pestiċida	Fjuwil użat	Żerriegħa	Totali
Reġjun Kapitali	0,192	0,036	0,154	0,027	0,001	0,051	0,002	0,462
Reġjun Ċentrali u tal-Punent tal-Litwanja	0,165	0,028	0,129	0,023	0,001	0,043	0,001	0,391