16.6.2021   

MT

Il-Ġurnal Uffiċjali tal-Unjoni Ewropea

L 213/1


REGOLAMENT DELEGAT TAL-KUMMISSJONI (UE) 2021/962

tas-6 ta’ Mejju 2021

li jestendi l-perjodu tranżizzjonali msemmi fl-Artikolu 89(1), fl-ewwel subparagrafu, tar-Regolament (UE) Nru 648/2012 tal-Parlament Ewropew u tal-Kunsill

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 648/2012 tal-Parlament Ewropew u tal-Kunsill tal-4 ta’ Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet (1), u b’mod partikolari l-Artikolu 85(2) tiegħu,

Billi:

(1)

L-Artikolu 89(1) tar-Regolament (UE) Nru 648/2012 jipprevedi li, għal perjodu tranżizzjonali sat-18 ta’ Ġunju 2021, l-obbligu tal-ikklerjar stabbilit fl-Artikolu 4 ta’ dak ir-Regolament ma għandux japplika għall-kuntratti tad-derivattivi OTC li huma oġġettivament miżurabbli li jnaqqsu r-riskji ta’ investiment direttament relatati mas-solvenza finanzjarja tal-arranġamenti tal-iskemi tal-pensjonijiet, u għal entitajiet stabbiliti biex jipprovdu kumpens lill-membri ta’ arranġamenti tal-iskemi tal-pensjonijiet f’każ ta’ inadempjenza. Dak il-perjodu tranżizzjonali ġie introdott biex jiġi evitat l-effett negattiv tal-ikklerjar ċentrali ta’ kuntratti tad-derivattivi fuq il-benefiċċji tal-irtirar tal-pensjonanti futuri, u biex jipprovdi żmien għall-iżvilupp ta’ soluzzjonijiet tekniċi vijabbli għat-trasferiment permezz ta’ arranġamenti tal-iskemi tal-pensjonijiet ta’ kollateral fi flus u mhux fi flus bħala marġnijiet ta’ varjazzjoni.

(2)

It-tielet subparagrafu tal-Artikolu 85(2) tar-Regolament (UE) Nru 648/2012 jagħti s-setgħa lill-Kummissjoni biex testendi dak il-perjodu tranżizzjonali darbtejn, kull darba b’sena, jekk il-Kummissjoni tikkonkludi li għadhom ma ġewx żviluppati soluzzjonijiet tekniċi vijabbli bħal dawn u li l-effett negattiv ta’ kuntratti derivattivi ta’ kklerjar ċentrali fuq il-benefiċċji tal-irtirar ta’ pensjonanti futuri jibqa’ ma jinbidilx. L-ewwel subparagrafu tal-Artikolu 85(2) ta’ dak ir-Regolament jirrikjedi li l-Kummissjoni tħejji rapporti annwali sal-estensjoni finali tal-perjodu tranżizzjonali, filwaqt li tivvaluta jekk ġewx żviluppati tali soluzzjonijiet tekniċi vijabbli u jekk hemmx bżonn li tiġi adottata xi miżura li tiffaċilita dawk is-soluzzjonijiet tekniċi vijabbli.

(3)

Fit-23 ta’ Settembru 2020 il-Kummissjoni adottat l-ewwel rapport tagħha (2). Dak ir-rapport enfasizza li l-parteċipanti fis-suq għamlu sforzi matul is-snin biex jiżviluppaw soluzzjonijiet tekniċi vijabbli bħal dawn u li xi arranġamenti tal-iskemi tal-pensjonijiet bdew jikklerjaw ċentralment porzjon tad-derivattivi tagħhom fuq bażi volontarja. Ir-rapport ikkonkluda li l-isfida ewlenija li fadal għall-arranġamenti tal-iskemi tal-pensjonijiet hija l-ħtieġa li jiġi ddepożitat marġni ta’ varjazzjoni fi flus kontanti f’każ ta’ stress fis-suq, meta dawn jistgħu jkunu meħtieġa mis-CCPs li jiddepożitaw ammonti sinifikanti ta’ marġni ta’ varjazzjoni.

(4)

It-tieni subparagrafu tal-Artikolu 85(2) tar-Regolament (UE) Nru 648/2012 jesiġi wkoll li l-Awtorità Ewropea tat-Titoli u s-Swieq (ESMA), f’kooperazzjoni mal-Awtorità Ewropea tal-Assigurazzjoni u l-Pensjonijiet tax-Xogħol, l-Awtorità Bankarja Ewropea u l-Bord Ewropew dwar ir-Riskju Sistemiku, tippreżenta rapporti annwali lill-Kummissjoni, filwaqt li tivvaluta, fost l-oħrajn, jekk is-CCPs, il-membri tal-ikklerjar u l-arranġamenti tal-iskemi tal-pensjonijiet għamlux sforz xieraq u żviluppawx soluzzjonijiet tekniċi vijabbli li jiffaċilitaw il-parteċipazzjoni ta’ tali arranġamenti fl-ikklerjar ċentrali billi jpoġġu kollateral fi flus kontanti u mhux fi flus kontanti bħala marġnijiet ta’ varjazzjoni, inklużi l-implikazzjonijiet ta’ dawk is-soluzzjonijiet fuq il-likwidità tas-suq u l-klijentela tagħhom. Fir-rapport tagħha tal-17 ta’ Diċembru 2020, l-ESMA kkonkludiet li xi soluzzjonijiet biex jittaffew l-isfidi esperjenzati mill-arranġamenti tal-iskemi tal-pensjonijiet ġew esplorati matul is-snin mill-partijiet ikkonċernati kkonċernati, li flimkien jistgħu jkunu kapaċi jappoġġaw l-arranġamenti tal-iskemi tal-pensjonijiet kemm fi żminijiet normali kif ukoll fi żminijiet ta’ stress. L-ESMA kkonkludiet ukoll, madankollu, li jeħtieġ li dawn is-soluzzjonijiet jiġu żviluppati aktar, jew jistgħu jeħtieġu li jkunu akkumpanjati minn xi bidliet regolatorji f’ċerti każijiet. Għalhekk, l-ESMA esprimiet il-fehma li hija meħtieġa estensjoni tal-perjodu tranżitorju b’sena.

(5)

Il-Kummissjoni, filwaqt li tqis ir-rapport tal-ESMA, hija tal-opinjoni li huwa tabilħaqq meħtieġ li l-perjodu tranżizzjonali jiġi estiż b’sena biex is-soluzzjonijiet previsti jkunu jistgħu jimmaturaw u jiġu rfinati aktar.

(6)

Għalhekk, jenħtieġ li l-perjodu tranżizzjonali imsemmi fl-Artikolu 89(1) tar-Regolament (UE) Nru 648/2012 li jiġi estiż.

(7)

Jenħtieġ li dan ir-Regolament jidħol fis-seħħ b’urġenza sabiex il-perjodu tranżizzjonali eżistenti jiġi estiż qabel l-iskadenza tiegħu jew malajr kemm jista’ jkun warajha. Dħul fis-seħħ iktar tard jista’ wassal għal inċertezza ġuridika għall-arranġamenti tal-iskemi tal-pensjonijiet rigward jekk hemmx bżonn li jibdew iħejju għall-obbligi tal-ikklerjar jew le,

ADOTTAT DAN IR-REGOLAMENT:

Artikolu 1

Il-perjodu tranżizzjonali stabbilit fl-Artikolu 89(1), l-ewwel subparagrafu, tar-Regolament (UE) Nru 648/2012 huwa estiż sat-18 ta’ Ġunju 2022.

Artikolu 2

Dan ir-Regolament għandu jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-6 ta’ Mejju 2021.

Għall-Kummissjoni

Il-President

Ursula VON DER LEYEN


(1)   ĠU L 201, 27.7.2012, p. 1.

(2)  Ir-rapport tal-Kummissjoni lill-Parlament Ewropew u lill-Kunsill skont l-Artikolu 85(2) tar-Regolament (UE) Nru 648/2012 tal-Parlament Ewropew u tal-Kunsill tal-4 ta’ Lulju 2012 dwar derivati OTC, kontropartijiet ċentrali u repożitorji tad-data dwar it-tranżazzjonijiet, kif emendat bir-Regolament (UE) Nru 834/2019, li jivvaluta jekk ġewx żviluppati soluzzjonijiet tekniċi vijabbli għat-trasferiment mill-arranġamenti tal-iskemi tal-pensjonijiet ta’ kollateral fi flus jew mhux fi flus bħala marġni ta’ varjazzjoni u l-ħtieġa għal kwalunkwe miżura biex jiġu ffaċilitati dawk is-soluzzjonijiet tekniċi vijabbli (COM(2020) 574 final tat-23 ta’ Settembru 2020).