(1)

Le Treoir (AE) 2018/2001, leagtar síos ceanglais le haghaidh breoslaí áirithe, mar atá bithbhreoslaí, bithleachtanna, breoslaí bithmhaise, breoslaí in-athnuaite de thionscnamh neamh-bhitheolaíoch agus breoslaí carbóin athchúrsáilte chun a áirithiú nach féidir iad a áireamh mar chuid de na spriocanna a leagtar amach sa Treoir sin ach amháin más rud é gur táirgeadh go hinbhuanaithe iad agus go sábháiltear leo líon mór astaíochtaí gás ceaptha teasa i gcomparáid le breoslaí iontaise. Le hAirteagal 27(6) de Threoir (AE) 2018/2001 mar aon le Rialachán Tarmligthe (AE) 2023/1184 ón gCoimisiún (2) leagtar síos rialacha maidir le táirgeadh breoslaí in-athnuaite de thionscnamh neamhbhitheolaíoch ó leictreachas in-athnuaite. Le hAirteagal 29a(1) agus (2) de Threoir (AE) 2018/2001 leagtar síos critéir maidir le laghdú ar astaíochtaí gás ceaptha teasa do bhreoslaí in-athnuaite de thionscnamh neamhbhitheolaíoch, agus do bhreoslaí carbóin athchúrsáilte. Le Rialachán Tarmligthe (AE) 2023/1185 ón gCoimisiún (3) leagtar síos rialacha lena sonraítear an mhodheolaíocht chun measúnú a dhéanamh ar na laghduithe ar astaíochtaí gás ceaptha teasa ó bhreoslaí in-athnuaite de thionscnamh neamh-bhitheolaíoch agus ó bhreoslaí carbóin athchúrsáilte. Le hAirteagal 31a(2) de Threoir (AE) 2018/2001 ceanglaítear ar oibreoirí eacnamaíocha faisnéis a iontráil i mbunachar sonraí de chuid an Aontais maidir leis na hidirbhearta a rinneadh agus maidir le hairíonna inbhuanaitheachta breoslaí in-athnuaite agus breoslaí carbóin in-athnuaite.

(2)

Tá ról tábhachtach ag na scéimeanna deonacha maidir le fianaise a sholáthar ar chomhlíonadh na gcritéar inbhuanaitheachta agus na gcritéar maidir le hinbhuanaitheacht agus maidir le laghdú ar astaíochtaí gás ceaptha teasa do bhithbhreoslaí, do bhithleachtanna agus do bhreoslaí bithmhaise. Faoi Threoir (AE) 2018/2001, is féidir scéimeanna deonacha a úsáid chun (i) a dheimhniú go gcomhlíonann na breoslaí ar fad a tháirgtear ó bhithmhais na critéir maidir le hinbhuanaitheacht a leagtar síos sa Treoir sin; agus (ii) chun sonraí cruinne a sholáthar faoin laghdú ar astaíochtaí gás ceaptha teasa ó na breoslaí sin; Ina theannta sin, is féidir scéimeanna deonacha a úsáid chun a dheimhniú go gcomhlíonann breoslaí in-athnuaite de thionscnamh neamhbhitheolaíoch agus breoslaí carbóin athchúrsáilte na critéir maidir le laghdú ar astaíochtaí gás ceaptha teasa a leagtar amach in Airteagal 29a den Treoir sin agus an mhodheolaíocht a leagtar amach i Rialachán Tarmligthe (AE) 2023/1185 á cur i bhfeidhm agus chun comhlíontacht le hAirteagal 27(6) de Threoir (AE) 2018/2001 agus le Rialachán Tarmligthe (AE) 2023/1184 a chruthú maidir leis an sciar den leictreachas in-athnuaite a úsáidtear chun breoslaí in-athnuaite de thionscnamh neamhbhitheolaíoch a ríomh. Is féidir scéimeanna deonacha a úsáid freisin chun a chruthú go n-iontrálann oibreoirí eacnamaíocha faisnéis chruinn sa bhunachar sonraí de chuid an Aontais nó sa bhunachar sonraí náisiúnta faoi roinnt breoslaí in-athnuaite agus breoslaí carbóin athchúrsáilte i gcomhréir le hAirteagal 31a(2) agus (5) de Threoir (AE) 2018/2001. Féadfaidh an Coimisiún a chinneadh gur féidir na scéimeanna deonacha náisiúnta nó idirnáisiúnta a úsáid chun na gcríoch sin ar fad nó cuid díobh.

(3)

An 14 Lúnasa 2023 chuir an scéim dheonach ‘CertifHy’ iarraidh faoi bhráid an Choimisiúin chun aitheantas a fháil de bhun Airteagal 30(4) de Threoir (AE) 2018/2001 a mhéid a bhaineann le comhlíontacht leis na rialacha maidir le breoslaí in-athnuaite de thionscnamh neamhbhitheolaíoch, mar a leagtar amach sa Treoir sin agus sna Rialacháin Tharmligthe ábhartha ó gCoimisiún. Rinne an Coimisiún measúnú ar an scéim sin agus shainaithin sé roinnt saincheisteanna a raibh leasú ag teastáil ina leith. San athiarraidh uaithi an 25 Iúil 2024, thug an scéim dheonach ‘CertifHy’ aghaidh mar ba cheart ar na saincheisteanna agus chinn an Coimisiún go gcumhdaítear go leormhaith leis an scéim dheonach ‘CertifHy’ anois na rialacha a leagtar amach in Airteagal 27(6) de Threoir (AE) 2018/2001 agus i Rialachán Tarmligthe (AE) 2023/1184 maidir le táirgeadh breoslaí in-athnuaite de thionscnamh neamhbhitheolaíoch agus go soláthraítear sonraí cruinne léi faoi laghdú ar astaíochtaí gás ceaptha teasa ó bhreoslaí in-athnuaite de thionscnamh neamhbhitheolaíoch chun críoch Airteagal 29a(1) de Threoir (AE) 2018/2001 agus i gcomhréir leis an modheolaíocht a leagtar amach i Rialachán Tarmligthe (AE) 2023/1185.

(4)

Cumhdaíonn an scéim dheonach ‘CertifHy’ gach cineál breosla in-athnuaite de thionscnamh neamhbhitheolaíoch. Tá clúdach geografach domhanda aici agus cuimsítear léi an líne chúraim ar fad.

(5)

Comhlíonann an scéim dheonach ‘CertifHy’ Rialachán Cur Chun Feidhme (AE) 2022/996 ón gCoimisiún (4). Sa mheasúnú ar an scéim dheonach ‘CertifHy’ cinneadh go gcomhlíonann sí caighdeáin leordhóthanacha iontaofachta, trédhearcachta agus iniúchóireachta neamhspleáiche agus na ceanglais mhodheolaíocha a leagtar amach i Rialachán Tarmligthe (AE) 2023/1184 agus Rialachán Tarmligthe (AE) 2023/1185.

(6)

Ba cheart an fhaisnéis gur tugadh aitheantas don scéim dheonach ‘CertifHy’ a chur ar fáil sa roinn ar shuíomh gréasáin EUROPA an Choimisiúin atá dírithe ar scéimeanna deonacha.

(7)

Chun go bhféadfar na bearta dá bhforáiltear sa Chinneadh seo a chur i bhfeidhm go pras, ba cheart an Cinneadh seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

(8)

Na bearta dá bhforáiltear sa Chinneadh seo, tá siad i gcomhréir leis an tuairim ón gCoiste um Inbhuanaitheacht Bithbhreoslaí, Bithleachtanna agus Breoslaí Bithmhaise,