European flag

Il-Ġurnal Uffiċjali
ta'l-Unjoni Ewropea

MT

Is-serje L


2025/2606

19.12.2025

REGOLAMENT TA’ IMPLIMENTAZZJONI TAL-KUMMISSJONI (UE) 2025/2606

tat-18 ta’ Diċembru 2025

li jistabbilixxi l-format tar-rapporti tal-Istati Membri dwar l-implimentazzjoni tad-Direttiva 2009/33/KE tal-Parlament Ewropew u tal-Kunsill

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2009/33/KE tal-Parlament Ewropew u tal-Kunsill tat-23 ta’ April 2009 dwar il-promozzjoni tal-vetturi nodfa tat-trasport bit-triq b’appoġġ għall-mobbiltà b’emissjonijiet baxxi (1), b’mod partikolari l-Artikolu 10(6) tagħha,

Wara li kkonsultat lill-Kumitat dwar l-infrastruttura tal-fjuwils alternattivi,

Billi:

(1)

L-Artikolu 10(2) tad-Direttiva 2009/33/KE dwar il-promozzjoni tal-vetturi nodfa tat-trasport bit-triq jirrikjedi li l-Istati Membri jippreżentaw rapporti dwar l-implimentazzjoni tagħhom ta’ dik id-Direttiva. Dawn ir-rapporti jenħtieġ li jipprovdu informazzjoni dwar: i) l-għadd u l-kategoriji ta’ vetturi koperti mill-kuntratti tal-akkwist pubbliku fil-kamp ta’ applikazzjoni tad-Direttiva; ii) il-miżuri meħuda biex tiġi implimentata d-Direttiva; u iii) l-attivitajiet ta’ implimentazzjoni futuri. Jenħtieġ li jipprovdu wkoll kwalunkwe informazzjoni oħra li l-Istat Membru jqis li tkun rilevanti. L-ewwel rapport ta’ dan it-tip jenħtieġ li jiġi ppreżentat sat-18 ta’ April 2026 u jenħtieġ li jkopri informazzjoni relatata mal-ewwel perjodu ta’ referenza, mit-2 ta’ Awwissu 2021 sal-31 ta’ Diċembru 2025.

(2)

F’konformità mal-Artikolu 10(6) tad-Direttiva 2009/33/KE, jenħtieġ li l-Kummissjoni tadotta atti ta’ implimentazzjoni li jistabbilixxu l-format ta’ dawn ir-rapporti li jridu jiġu ppreżentati mill-Istati Membri.

(3)

F’konformità mal-Artikolu 10(3) tad-Direttiva 2009/33/KE, jenħtieġ li l-Kummissjoni tgħin lill-Istati Membri jissodisfaw l-obbligi ta’ rapportar tagħhom billi twettaq l-estrazzjoni tad-data rilevanti mill-avviżi tal-kuntratti ppubblikati fil-bażi tad-data Tenders Electronic Daily, kif ukoll billi tiġbor u tippubblika l-informazzjoni rilevanti dwar il-kuntratti tal-akkwist pubbliku fil-kamp ta’ applikazzjoni tad-Direttiva.

(4)

Minn Frar 2024, sistema ġdida għall-kodifikazzjoni tal-kuntratti tal-akkwist pubbliku permezz tal-Formoli elettroniċi ssostitwiet is-sistema preċedenti ta’ avviżi fil-qafas tal-bażi tad-data Tenders Electronic Daily. Is-sistema l-ġdida tippermetti l-kodifikazzjoni ddedikata u l-estrazzjoni awtomatika tad-data rilevanti għall-implimentazzjoni tad-Direttiva 2009/33/KE. Il-Kummissjoni wettqet l-estrazzjoni mill-bażi tad-data Tenders Electronic Daily tal-informazzjoni kollha mill-avviżi rilevanti fil-qafas tas-sistema preċedenti ta’ avviżi. Il-Kummissjoni qasmet din l-informazzjoni mal-Istati Membri permezz tal-Kumitat dwar l-infrastruttura tal-fjuwils alternattivi.

(5)

Il-miżuri previsti f’dan ir-Regolament huma f’konformità mal-opinjoni tal-Kumitat dwar l-infrastruttura tal-fjuwils alternattivi,

ADOTTAT DAN IR-REGOLAMENT:

Artikolu 1

Dan ir-Regolament jistabbilixxi l-mudell għar-rapporti dwar l-implimentazzjoni tad-Direttiva 2009/33/KE, li jridu jiġu ppreżentati mill-Istati Membri f’konformità mal-Artikolu 10(2) ta’ dik id-Direttiva.

Il-mudell huwa stabbilit fl-Anness.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-18 ta’ Diċembru 2025.

Għall-Kummissjoni

Il-President

Ursula VON DER LEYEN


(1)   ĠU L 120, 15.5.2009, p. 5, ELI: http://data.europa.eu/eli/dir/2009/33/oj.


ANNESS

MUDELL GĦAR-RAPPORTAR DWAR L-IMPLIMENTAZZJONI TAD-DIRETTIVA 2009/33/KE

1.   Struttura istituzzjonali u traspożizzjoni

Din it-taqsima trid tipprovdi ħarsa ġenerali lejn ir-rwol u l-kompetenzi ta’ korpi pubbliċi differenti fir-rigward tat-traspożizzjoni u l-implimentazzjoni tad-Direttiva 2009/33/KE, u tispjega kif l-isforz ġie kondiviż fl-Istat Membru.

1.1.   Awtorità responsabbli għat-traspożizzjoni u għall-implimentazzjoni tad-Direttiva

L-awtoritajiet pubbliċi ewlenin inkarigati biex jiżguraw li d-Direttiva tiġi implimentata fil-livell nazzjonali (eż. il-Ministeru għat-trasport, il-Ministeru għall-ekonomija) iridu jiġu elenkati f’din it-taqsima. Jekk il-kompetenzi jiġu kondiviżi bejn il-livelli nazzjonali, reġjonali u lokali, dan jista’ jiġi spjegat hawnhekk.

1.2.   Miri minimi għall-akkwist u l-kondiviżjoni tal-isforzi fl-Istat Membru

Din it-taqsima trid tippreżenta kif il-miri minimi għall-akkwist stabbiliti fl-Artikolu 5 u fl-Anness I tad-Direttiva 2009/33/KE jiġu implimentati fl-Istat Membru. B’mod partikolari, l-Istati Membri jridu jindikaw jekk il-miri minimi għall-akkwist ġewx applikati permezz ta’: i) l-użu tal-istess livell ta’ ambizzjoni għall-awtoritajiet kontraenti u għall-entitajiet kontraenti kollha fil-kamp ta’ applikazzjoni tad-Direttiva; jew ii) l-istabbiliment ta’ livelli differenti ta’ ambizzjoni għal diversi awtoritajiet kontraenti u entitajiet kontraenti. Fil-każ tal-aħħar, għandha tiġi pprovduta spjegazzjoni qasira dwar kif ġew stabbiliti l-miri differenti.

1.3.   Eżenzjonijiet nazzjonali

Din it-taqsima se tindika jekk l-Istat Membru użax eżenzjonijiet nazzjonali għal kwalunkwe waħda mill-kategoriji ta’ vetturi elenkati fl-Artikolu 2 tad-Direttiva 2009/33/KE.

2.    Data kwantitattiva mill-bażi tad-data Tender Electronic Daily (TED) u mill-Formoli elettroniċi

Id-data dwar l-għadd u l-kategoriji ta’ vetturi koperti mill-kuntratti msemmija fil-punti (a) u (c) tal-Artikolu 3(1) tad-Direttiva 2009/33/KE — miġbura u ppubblikata mill-Kummissjoni permezz tal-estrazzjoni tad-data rilevanti mill-avviżi tal-għoti tal-kuntratti ppubblikati fuq it-TED — trid tiġi ppreżentata mill-Istati Membri f’din it-taqsima jekk jużaw xi ħaġa minn dik id-data għal dan ir-rapport. L-Istati Membri li jiddependu b’mod esklużiv fuq sistemi nazzjonali ta’ monitoraġġ u ta’ rapportar, mingħajr ma jintegraw id-data mill-bażi tad-data tat-TED, jistgħu jħallu din it-taqsima vojta.

Għall-ewwel perjodu ta’ referenza, il-Kummissjoni twettaq l-estrazzjoni u tippubblika d-data separatament għall-avviżi kkodifikati fit-TED sal-31 ta’ Diċembru 2023 bl-użu tal-format ta’ rapportar preċedenti, u għal dawk ikkodifikati mill-1 ta’ Jannar 2024 bl-użu tal-Formoli elettroniċi attwali. Dik id-data trid tiġi inkluża separatament fit-Tabelli 1a u 1b, rispettivament; fit-Tabella 1b (l-avviżi kkodifikati bejn l-1 ta’ Jannar 2024 u l-31 ta’ Diċembru 2025), l-Istati Membri jistgħu jikkodifikaw id-data estratta mill-Kummissjoni jew jużaw id-data estratta minnhom direttament mill-bażi tad-data. Madankollu, id-data inkluża f’din it-tabella għandha tiġi mill-bażi tad-data tat-TED u mill-Formoli elettroniċi, u mhux minn sistemi nazzjonali separati ta’ monitoraġġ u ta’ rapportar. It-Tabella 1 irid ikun fiha l-għadd totali għall-perjodu kollu, miksub biż-żieda tan-numri fiċ-ċelloli korrispondenti fit-Tabella 1a u 1b.

Għall-perjodi ta’ referenza sussegwenti, trid tintuża biss it-Tabella 1. Il-Kummissjoni se tiġbor id-data għall-perjodu kollu bl-istess format (Formoli elettroniċi), u dik id-data trid tiġi inkluża direttament fit-Tabella 1.

Fit-tielet kolonna tat-Tabelli 1, 1a u 1b, l-Istati Membri jridu jindikaw liema sehem mill-avviżi inklużi fit-tabella rispettiva jipprovdu l-informazzjoni sħiħa meħtieġa għar-rekwiżiti ta’ monitoraġġ u ta’ rapportar tad-Direttiva 2009/33, jiġifieri t-tip ta’ vetturi, il-kategorija tagħhom, u jekk dawn humiex vetturi nodfa f’konformità mal-Artikolu 4(4) tad-Direttiva, diment li tali informazzjoni tkun disponibbli (1).

Tabella 1

Data aggregata mill-bażi tad-data tat-TED u mill-Formoli elettroniċi, li tkopri l-perjodu ta’ referenza kollu

Tip ta’ vettura

Għadd ta’ avviżi

Sehem ta’ avviżi li jipprovdu informazzjoni sħiħa (jekk disponibbli)

Għadd totali ta’ vetturi

Għadd ta’ vetturi nodfa

Sehem ta’ vetturi nodfa

(għall-karozzi tal-linja biss) Għadd ta’ vetturi b’emissjonijiet żero

(għall-karozzi tal-linja biss) Sehem ta’ vetturi b’emissjonijiet żero

Vetturi light-duty

 

 

 

 

 

mhux applikabbli

mhux applikabbli

Trakkijiet

 

 

 

 

 

mhux applikabbli

mhux applikabbli

Karozzi tal-linja

 

 

 

 

 

 

 

Informazzjoni addizzjonali

L-Istati Membri jistgħu jużaw din il-kaxxa tat-test biex jipprovdu kwalunkwe kumment jew informazzjoni oħra li jqisu rilevanti għad-data estratta u ppubblikata mill-Kummissjoni.


Tabella 1a

Data estratta mill-bażi tad-data tat-TED (perjodu mit-2 ta’ Awwissu 2021 sal-31 ta’ Diċembru 2023)

Tip ta’ vettura

Għadd ta’ avviżi

Sehem ta’ avviżi li jipprovdu informazzjoni sħiħa (jekk disponibbli)

Għadd totali ta’ vetturi

Għadd ta’ vetturi nodfa

Sehem ta’ vetturi nodfa

(għall-karozzi tal-linja biss) Għadd ta’ vetturi b’emissjonijiet żero

(għall-karozzi tal-linja biss) Sehem ta’ vetturi b’emissjonijiet żero

Vetturi light-duty

 

 

 

 

 

mhux applikabbli

mhux applikabbli

Trakkijiet

 

 

 

 

 

mhux applikabbli

mhux applikabbli

Karozzi tal-linja

 

 

 

 

 

 

 

Informazzjoni addizzjonali

L-Istati Membri jistgħu jużaw din il-kaxxa tat-test biex jipprovdu kwalunkwe kumment jew informazzjoni oħra li jqisu rilevanti għad-data estratta u ppubblikata mill-Kummissjoni.


Tabella 1b

Data estratta mill-Formoli elettroniċi (perjodu mill-1 ta’ Jannar 2024 sal-31 ta’ Diċembru 2025)

Tip ta’ vettura

Għadd ta’ avviżi

Sehem ta’ avviżi li jipprovdu informazzjoni sħiħa (jekk disponibbli)

Għadd totali ta’ vetturi

Għadd ta’ vetturi nodfa

Sehem ta’ vetturi nodfa

(għall-karozzi tal-linja biss) Għadd ta’ vetturi b’emissjonijiet żero

(għall-karozzi tal-linja biss) Sehem ta’ vetturi b’emissjonijiet żero

Vetturi light-duty

 

 

 

 

 

mhux applikabbli

mhux applikabbli

Trakkijiet

 

 

 

 

 

mhux applikabbli

mhux applikabbli

Karozzi tal-linja

 

 

 

 

 

 

 

Informazzjoni addizzjonali

L-Istati Membri jistgħu jużaw din il-kaxxa tat-test biex jipprovdu kwalunkwe kumment jew informazzjoni oħra li jqisu rilevanti għad-data estratta u ppubblikata mill-Kummissjoni.

3.    Data kwantitattiva minn sorsi nazzjonali

L-Istati Membri li stabbilew skemi nazzjonali ta’ monitoraġġ u ta’ rapportar li ma jiddependux direttament fuq il-bażi tad-data tat-TED iridu jużaw din it-taqsima biex jipprovdu l-informazzjoni kwantitattiva prodotta permezz ta’ skemi bħal dawn. Din l-informazzjoni tista’ tissostitwixxi jew tikkomplementa l-informazzjoni estratta mill-bażi tad-data tat-TED u mill-Formoli elettroniċi kif previst fit-Taqsima 2.

Din it-taqsima tista’ tintuża wkoll biex tipprovdi kwalunkwe data kwantitattiva addizzjonali li l-Istat Membru jiġbor biex jimla l-lakuni identifikati fid-data estratta mill-bażi tad-data tat-TED u ppreżentata fit-Taqsima 2. Jekk l-Istati Membri jużaw kemm id-data estratta mill-bażi tad-data tat-TED u/jew mill-Formoli elettroniċi, kif ukoll id-data miġbura permezz ta’ sorsi nazzjonali, id-data kompluta għandha tiġi aggregata u ppreżentata fit-Tabella 2, u għandha tinkludi kemm id-data diġà ppreżentata fit-Taqsima 2 u fit-Tabella 1, kif ukoll id-data addizzjonali miġbura mill-Istat Membru. It-Tabella 2 għandu jkun fiha wkoll spjegazzjoni dwar ir-relazzjoni bejn id-data pprovduta fit-Taqsima 2 u f’din it-taqsima.

Minbarra l-għadd ta’ vetturi u l-għadd u s-sehem ta’ vetturi nodfa u ta’ karozzi tal-linja b’emissjonijiet żero, l-Istati Membri jistgħu jipprovdu informazzjoni dwar id-daqs kumplessiv tal-akkwist involut. Jistgħu jagħmlu dan billi jinkludu fit-tieni kolonna l-għadd ta’ kuntratti involuti, il-valur monetarju totali tagħhom, jew kwalunkwe miżura oħra li tippermetti li jiġi stmat il-volum kumplessiv involut.

L-Istati Membri li ma stabbilewx skema ddedikata ta’ monitoraġġ u ta’ rapportar u li ma għandhomx sorsi addizzjonali ta’ informazzjoni kwantitattiva li beħsiebhom jikkondividu jistgħu jħallu din it-taqsima vojta.

Tabella 2

Monitoraġġ nazzjonali – data aggregata li tkopri l-perjodu ta’ referenza kollu

Tip ta’ vettura

Għadd ta’ kuntratti, valur monetarju, jew kejl ieħor tad-daqs tal-akkwist (jekk disponibbli)

Għadd totali ta’ vetturi

Għadd ta’ vetturi nodfa (2)

Sehem ta’ vetturi nodfa

(għall-karozzi tal-linja biss) Għadd ta’ vetturi b’emissjonijiet żero

(għall-karozzi tal-linja biss) Perċentwal ta’ vetturi b’emissjonijiet żero

Vetturi light-duty

 

 

 

 

mhux applikabbli

mhux applikabbli

Trakkijiet

 

 

 

 

mhux applikabbli

mhux applikabbli

Karozzi tal-linja

 

 

 

 

 

 

Deskrizzjoni tal-approċċ tal-ġbir tad-data

L-Istati Membri jridu jużaw din il-kaxxa tat-test biex jipprovdu ħarsa ġenerali qasira lejn l-iskema ta’ monitoraġġ u ta’ rapportar li stabbilew, inkluż b’mod partikolari l-kamp ta’ applikazzjoni tagħha, il-kopertura temporali, kwalunkwe differenza possibbli fil-kamp ta’ applikazzjoni tad-Direttiva 2009/33/KE, u l-kompletezza tar-rapportar f’termini ta’ sehem ta’ avviżi li jipprovdu informazzjoni sħiħa dwar l-għadd u t-tip ta’ vetturi akkwistati.

Jekk id-data pprovduta f’din it-tabella tissejjes fuq id-data pprovduta fit-Taqsima 2 u tintegraha (eż. billi timla l-lakuni identifikati), l-interrelazzjoni bejn iż-żewġ settijiet tad-data trid tiġi spjegata hawnhekk.

Informazzjoni addizzjonali

L-Istati Membri jistgħu jużaw din il-kaxxa tat-test biex jipprovdu kwalunkwe kumment jew informazzjoni oħra li jqisu rilevanti għad-data estratta u ppubblikata mill-Kummissjoni.

4.   Informazzjoni kwalitattiva dwar l-implimentazzjoni tad-Direttiva

Dawk ir-rapporti jridu jipprovdu informazzjoni dwar il-miżuri meħuda għall-implimentazzjoni tad-Direttiva 2009/33/KE, dwar attivitajiet ta’ implimentazzjoni futuri, kif ukoll kwalunkwe informazzjoni oħra li l-Istat Membru jqis rilevanti. Meta jkun rilevanti, l-Istati Membri jistgħu jinkludu wkoll informazzjoni reġjonali jew lokali rilevanti f’din it-taqsima, b’mod partikolari dawk l-Istati Membri b’kompetenzi kondiviżi fil-livelli amministrattivi differenti għall-implimentazzjoni tad-Direttiva.

4.1.   Informazzjoni addizzjonali dwar id-data kwantitattiva

L-Istati Membri jistgħu jużaw din it-taqsima biex jipprovdu kwalunkwe informazzjoni addizzjonali li jqisu rilevanti sabiex jintegraw u jikkomplementaw id-data kwantitattiva ppreżentata fit-Taqsima 2 u fit-Taqsima 3. B’mod partikolari, l-Istati Membri jistgħu jipprovdu informazzjoni addizzjonali relatata ma’ kwalunkwe avviż, kuntratt jew proċedura ta’ akkwist li għalihom ma tkunx saret disponibbli d-data kwantitattiva fit-taqsimiet preċedenti.

4.2.   Miżuri meħuda għall-implimentazzjoni tad-Direttiva matul il-perjodu ta’ referenza attwali

L-Istati Membri jistgħu jużaw din it-taqsima biex jippreżentaw kwalunkwe miżura li jkunu ħadu biex jimplimentaw id-Direttiva flimkien mat-traspożizzjoni tal-miri minimi għall-akkwist. Dan jista’ jinkludi eż. attivitajiet ta’ koordinazzjoni, pubblikazzjoni ta’ gwida, korsijiet ta’ taħriġ, skemi ta’ appoġġ finanzjarju, jew miżuri oħra meħuda biex jgħinu jiżguraw li l-miri minimi għall-akkwist ġew issodisfati matul il-perjodu ta’ referenza kopert minn dan ir-rapport.

4.3.   Ostakli identifikati

L-Istati Membri jistgħu jużaw din it-taqsima biex jippreżentaw kwalunkwe ostaklu li ltaqgħu miegħu meta ppruvaw jimplimentaw id-Direttiva u jiksbu l-miri. Jistgħu jippreżentaw ukoll kwalunkwe miżura meħuda biex jindirizzaw dawk l-ostakli f’din it-taqsima.

4.4.   Attivitajiet ta’ implimentazzjoni futuri

L-Istati Membri jistgħu jużaw din it-taqsima biex: i) jipprovdu informazzjoni dwar l-evoluzzjoni mistennija tas-sehem ta’ vetturi nodfa fil-perjodu ta’ referenza li jmiss, f’termini temporali kif ukoll ta’ distribuzzjoni ġeografika fl-Istat Membru; u ii) jippreżentaw kwalunkwe miżura jew azzjoni li jkunu ppjanaw biex jiżguraw li jissodisfaw il-miri minimi għall-akkwist matul dak il-perjodu ta’ referenza.

4.5.   Informazzjoni addizzjonali

L-Istati Membri jistgħu jużaw din it-taqsima biex jipprovdu kwalunkwe informazzjoni oħra li jqisu rilevanti.


(1)  Din l-informazzjoni setgħet ġiet ipprovduta fl-avviżi billi jiġi indikat jekk il-vetturi li qed jiġu akkwistati humiex nodfa, jew billi tiġi inkluża biżżejjed informazzjoni dwar il-vetturi involuti biex dan jiġi vvalutat.

(2)  Dan huwa l-għadd totali ta’ vetturi nodfa (inkluż vetturi b’emissjonijiet żero).


ELI: http://data.europa.eu/eli/reg_impl/2025/2606/oj

ISSN 1977-074X (electronic edition)