(1)

Skont l-Artikolu 8a(1) tar-Regolament (KE) Nru 2533/98, it-trasmissjoni ta’ informazzjoni statistika kunfidenzjali bejn membru tas-Sistema Ewropea ta’ Banek Ċentrali (SEBĊ) li ġabar l-informazzjoni u awtorità tas-Sistema Ewropea tal-Istatistika (ESS) tista’ sseħħ sakemm dik it-trasmissjoni tkun neċessarja għall-iżvilupp, il-produzzjoni jew id-disseminazzjoni effiċjenti, jew għaż-żieda fil-kwalità, tal-istatistika Ewropea fi ħdan l-isferi ta’ kompetenza rispettivi tal-ESS u s-SEBĊ u li din in-neċessità tkun ġiet iġġustifikata.

(2)

L-Artikolu 8a tar-Regolament (KE) Nru 2533/98 jeħtieġ li jiddaħħlu fis-seħħ salvagwardji ulterjuri mal-iskambju ta’ informazzjoni statistika kunfidenzjali bejn is-SEBĊ u l-ESS, jiġifieri li kwalunkwe trasmissjoni ulterjuri lil hinn mill-ewwel trasmissjoni għandha tkun awtorizzata b’mod espliċitu mill-awtorità li tkun ġabret l-informazzjoni u li l-informazzjoni statistika kunfidenzjali ma tistax tintuża għal skopijiet oħra għajr għal skopijiet statistiċi, bħal għal skopijiet amministrattivi jew tat-taxxa jew għal proċedimenti legali.

(3)

Skont l- Artikolu 20(2) tar-Regolament (KE) Nru 223/2009 tal-Parlament Ewropew u tal-Kunsill (2), data kunfidenzjali miġbura esklużivament għall-produzzjoni ta’ statistika Ewropea għandha tintuża mill-Uffiċċju tal-Istatistika tal-Unjoni Ewropea (Eurostat) esklużivament għal skopijiet ta’ statistika ħlief jekk l-unità statistika tkun tat il-kunsens tagħha b’mod inekwivoku għall-użu tagħha għal xi skopijiet oħrajn. Barra minn hekk, skont l-Artikolu 20(4) tar-Regolament (KE) Nru 223/2009, l-Eurostat għandu jieħu l-miżuri kollha regolatorji, amministrattivi, tekniċi u organizzattivi li jkunu meħtieġa sabiex tiġi żgurata l-protezzjoni fiżika u loġika ta’ data kunfidenzjali. Fuq din il-bażi, l-Eurostat ikkonferma lill-Bank Ċentrali Ewropew (BĊE) li se jiżgura l-kunfidenzjalità tal-informazzjoni statistika trażmessa, li għandha tintuża biss għal skopijiet statistiċi u li m’għandhiex tiġi żvelata ulterjorment. Għaldaqstant, il-Kunsill Governattiv tal-BĊE ivvaluta li l-Eurostat għandu l-miżuri meħtieġa fis-seħħ sabiex jissalvagwardja l-kunfidenzjalità tal-informazzjoni statistika kunfidenzjali dwar statistika ekonomika u finanzjarja trażmessa mill-BĊE.

(4)

F’Marzu tal-2003, il-BĊE u l-Eurostat ikkonkludew Memorandum ta’ Qbil dwar l-istatistika ekonomika u finanzjarja (3) (iktar ’il quddiem msejjaħ l-“MtQ dwar l-istatistika ekonomika u finanzjarja”) biex jipprovdi, inter alia, qafas għall-iskambju u r-riproduzzjoni ta’ data. It-Taqsima G ta’ dak l-MtQ tipprovdi li arranġamenti miftiehma għall-iskambju f’waqtu ta’ data ser jiġu stipulati fi Ftehim dwar il-Livell ta’ Servizz li jittratta wkoll dwar l-iskambju ta’ data statistika kunfidenzjali. Għaldaqstant, il-Ftehim dwar il-Livell ta’ Servizz (FLS) dwar Skambji ta’ Data (4), li jinsab fl-Anness 2 tal-MtQ dwar l-istatistika ekonomika u finanzjarja u konkluż fi Frar tal-2008, jiddeskrivi r-responsabbiltajiet, il-modalitajiet u l-mezzi rispettivi għal skambji ta’ data bejn id-Direttorat Ġenerali għall-Istatistika tal-BĊE u l-Eurostat. L-Appendiċi 1 ta’ dak l-FLS jistabbilixxi speċifikament l-informazzjoni statistika li għandha tiġi kondiviża bejn l-Eurostat u l-BĊE. Dik l-informazzjoni statistika tinkludi, iżda mhijiex limitata għal: statistika dwar il-kontijiet finanzjarji trimestrali; statistika dwar partiti tal-karta tal-bilanċ ta’ istituzzjonijiet finanzjarji monetarji (IFM); statistika dwar ir-rati tal-imgħax tal-IFM; u statistika esterna miġbura fuq il-bażi tal-Linja Gwida BĊE/2013/24 (5), ir-Regolament (UE) Nru 1071/2013 tal-Bank Ċentrali Ewropew (BĊE/2013/33) (6), ir-Regolament (UE) Nru 1072/2013 tal-Bank Ċentrali Ewropew (BĊE/2013/34) (7) u l-Linja Gwida BĊE/2011/23 (8), rispettivament.

(5)

Sabiex jiġi ffaċilitat il-proċess ta’ teħid ta’ deċiżjonijiet b’rabta ma’ deċiżjonijiet dwar it-trasmissjoni ta’ informazzjoni statistika ekonomika u finanzjarja kunfidenzjali lill-Eurostat għal-finijiet tal-MtQ dwar l-istatistika ekonomika u finanzjarja, u deċiżjonijiet dwar kwalunkwe emendi għall-FLS dwar Skambji ta’ Data li jistgħu jkunu meħtieġa għat-trażmissjoni lill-Eurostat ta’ informazzjoni statistika kunfidenzjali, jenħtieġ li tiġi permessa d-delegazzjoni ta’ ċerti setgħat ta’ teħid ta’ deċiżjonijiet, kif stipulat f’din id-deċiżjoni ta’ delega. Id-deċiżjoni ddelegata dwar it-trasmissjoni ta’ informazzjoni statistika ekonomika u finanzjarja kunfidenzjali lill-Eurostat tinkludi informazzjoni fil-livell tal-UE, taż-żona tal-euro u dak nazzjonali, kif ukoll kontribuzzjonijiet nazzjonali skont l-atti legali tal-BĊE.

(6)

Skont l-Artikolu 12.1 tal-Istatut tas-Sistema Ewropea tal-Banek Centrali u tal-Bank Ċentrali Ewropew, il-Kunsill Governattiv jista’ jiddeċiedi li jiddelega ċerti setgħat lill-Bord Eżekuttiv.

(7)

Skont il-prinċipji ġenerali dwar id-delegazzjoni kif żviluppati u kkonfermati mill-Qorti tal-Ġustizzja tal-Unjoni Ewropea, id-delegazzjoni ta’ setgħat ta’ teħid ta’ deċiżjonijiet għandha tkun limitata, proporzjonata u bbażata fuq kriterji speċifikati. Fid-dawl tal-kundizzjonijiet stipulati fl-Artikolu 8a tar-Regolament (KE) Nru 2533/98 li japplikaw għal kull trasmissjoni ta’ informazzjoni statistika kunfidenzjali lill-Eurostat u l-limitazzjoni ta’ din id-Deċiżjoni għat-trasmissjonijiet ta’ informazzjoni statistika kunfidenzjali għall-finijiet tal-MtQ dwar l-istatistika ekonomika u finanzjarja, id-deċiżjonijiet delegati li għandhom jittieħdu huma ta’ natura teknika aktar milli politika li jfisser li l-kriterji għad-delegazzjoni għandhom jibqgħu relattivament ġenerali.

(8)

Meta l-kriterji għall-adozzjoni ta’ deċiżjoni ddelegata ma jkunux sodisfatti, deċiżjonijiet dwar it-trasmissjoni ta’ informazzjoni statistika kunfidenzjali lill-Eurostat għandhom jiġu adottati mill-Kunsill Governattiv fuq proposta mill-Bord Eżekuttiv,

1.

“informazzjoni statistika kunfidenzjali” tfisser informazzjoni statistika kunfidenzjali kif iddefinita fil-punt (12) tal-Artikolu 1 tar-Regolament (KE) Nru 2533/98;

2.

“deċiżjoni ddelegata” tfisser deċiżjoni meħuda fuq il-bażi ta’ delegazzjoni ta’ setgħat mill-Kunsill Governattiv skont din id-deċiżjoni.

3.

“MtQ dwar statistika ekonomika u finanzjarja” tfisser il-Memorandum ta’ Qbil dwar statistika ekonomika u finanzjarja bejn id-Direttorat Ġenerali għall-Istatistika tal-Bank Ċentrali Ewropew (DĠ Statistika) u l-Uffiċċju tal-Istatistika tal-Komunitajiet Ewropej (Eurostat), konkluż fl-10 ta’ Marzu 2003;

4.

“FLS dwar Skambji ta’ Data” tfisser il-Ftehim dwar il-Livell tas-Servizz (FLS) dwar Skambji ta’ Data bejn il-Bank Ċentrali Ewropew (DĠ Statistika) u l-Uffiċċju tal-Istatistika tal-Komunitajiet Ewropej (Eurostat), konkluż fi Frar tal-2008, kif emendat minn żmien għal żmien skont it-terimini tiegħu, li jifforma l-Anness 2 tal-MtQ dwar l-istatistika ekonomika u finanzjarja.