European flag

Iris Oifigiúil
an Aontais Eorpaigh

GA

Sraith L


2024/339

19.1.2024

RIALACHÁN CUR CHUN FEIDHME (AE) 2024/339 ÓN gCOIMISIÚN

an 12 Eanáir 2024

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)

Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)

De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí a fhoráil go bhféadfaidh an sealbhóir an fhaisnéis sin a agairt fós, go ceann tréimhse áirithe, i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)

Tá na bearta dá bhforáiltear sa Rialachán seo i gcomhréir leis an tuairim ón gCoiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoin gcód AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 12 Eanáir 2024.

Thar ceann an Choimisiúin,

Ar son an Uachtaráin,

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Chustaim


(1)   IO L 269, 10.10.2013, lch. 1.

(2)  Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).


IARSCRÍBHINN

Tuairisc ar na hearraí

Aicmiú

(Cód AC)

Cúiseanna

(1)

(2)

(3)

Aerbhoinn nua, déanta de rubar, ag a bhfuil na saintréithe uile seo a leanas:

a)

tomhas 155/70R12C

b)

cineál déantúis ‘R’;

c)

leithead boinn 155 mm;

d)

trastomhas fonsa 12 orlach;

e)

innéacs ualaigh 104/102 (is í (kg) 900/850 an uasmhais chomhfhreagrach atá le hiompar);

f)

innéacs luais ‘N’ (140 km/h ar a mhéad).

Tá innéacs ualaigh nach mó ná 104 ag na boinn, bíodh siad marcáilte ar a dtaobh-bhallaí nó ná bíodh leis an inscríbhinn ‘FRT’ (bonn saor-rollta) nó ‘Le haghaidh Úsáid Leantóra Amháin’. Tíolactar iad lena n-úsáid ar leantóirí de ghnáth ach féadfar iad a úsáid freisin ar bhusanna nó ar leoraithe.

4011 20 10

Cinntear an t-aicmiú le rialacha ginearálta 1 agus 6 maidir le léirmhíniú na hAinmníochta Comhcheangailte agus le foclaíocht chóid AC 4011 , 4011 20 agus 4011 20 10 .

Eisiatar iad a aicmiú faoi fho-cheannteideal 4011 90 00 mar aerbhoinn eile toisc go bhfuil siad oiriúnach lena n-úsáid ar bhusanna nó ar leoraithe mar gheall ar a saintréithe. Leis an inscríbhinn ‘FRT’ (bonn saor-rollta) nó ‘Le haghaidh Úsáid Leantóra Amháin’ ar na boinn agus ós rud é go dtíolactar iad lena n-úsáid ar leantóirí, ní athraítear saintréithe na mbonn mar bhoinn de chineál a úsáidtear ar bhusanna nó ar leoraithe.

Dá bhrí sin, tá na boinn le haicmiú faoi chód AC 4011 20 10 mar bhoinn de chineál a úsáidtear ar bhusanna nó ar leoraithe ag a bhfuil innéacs ualaigh nach mó ná 121.


ELI: http://data.europa.eu/eli/reg_impl/2024/339/oj

ISSN 1977-0839 (electronic edition)