(1)

Sabiex jiġu żgurati miżuri ta’ politika makroprudenzjali nazzjonali effettivi u konsistenti, huwa importanti li jiġi kkumplimentat l-għarfien meħtieġ skont id-dritt tal-Unjoni b’reċiproċità volontarja.

(2)

Il-qafas dwar ir-reċiproċità volontarja għal miżuri tal-politika makroprudenzjali stabbilit fir-Rakkomandazzjoni BERS/2015/2 tal-Bord Ewropew dwar ir-Riskju Sistemiku (5) għandu l-għan li jiżgura li l-miżuri kollha tal-politika makroprudenzjali bbażati fuq skopertura attivati fi Stat Membru wieħed ikunu rreċiprokati fl-Istati Membri l-oħrajn.

(3)

Id-Deċiżjoni tal-Kumitat Konġunt taż-ŻEE Nru 79/2019 (6) inkorporat id-Direttiva 2013/36/UE u r-Regolament (UE) Nru 575/2013 fil-Ftehim dwar iż-Żona Ekonomika Ewropea (Ftehim ŻEE) b’effett mill-1 ta’ Jannar 2020. Id-Direttiva (UE) 2021/338 tal-Parlament Ewropew u tal-Kunsill (7) u r-Regolament (UE) 2021/558 tal-Parlament Ewropew u tal-Kunsill (8), li introduċew emendi sinifikanti għad-Direttiva 2013/36/UE u r-Regolament (UE) Nru 575/2013, ġew inkorporati fil-Ftehim ŻEE permezz tad-Deċiżjoni tal-Kumitat Konġunt taż-ŻEE Nru 213/2021 (9) u d-Deċiżjoni tal-Kumitat Konġunt taż-ŻEE Nru 145/2024 (10), rispettivament. Id-Direttiva (UE) 2021/338 u r-Regolament (UE) 2021/558 issa huma applikabbli fin-Norveġja.

(4)

Fid-29 ta’ Awwissu 2024, Finansdepartementet (il-Ministeru tal-Finanzi Norveġiż), li jaġixxi bħala awtorità nominata għall-fini tal-Artikolu 133(2) tad-Direttiva 2013/36/UE, innotifika lill-Bord Ewropew dwar ir-Riskju Sistemiku (BERS) bl-intenzjoni tiegħu li jiffissa mill-ġdid ir-rata ta’ riżerva għal riskju sistemiku (SyRB) imposta preċedentement, fl-istess rata ta’ 4,5 %, fuq l-iskoperturi kollha li jinsabu fin-Norveġja. Il-miżura applikat mill-31 ta’ Diċembru 2020, u attwalment hija rrakkomandata għal reċiproċità skont ir-Rakkomandazzjoni tal-Bord Ewropew dwar ir-Riskju Sistemiku (11). Fl-istess data, Finansdepartementet innotifika lill-BERS bl-intenzjoni tiegħu li jirrikjedi ċerti istituzzjonijiet li jżommu rata ta’ riżerva “‘istituzzjonijiet sistemikament importanti oħrajn’” (O-SII) għal kapital tal-Grad 1 ta’ Ekwità Komuni, skont l-Artikolu 131 tad-Direttiva 2013/36/UE.

(5)

Sussegwentement, fis-26 ta’ Settembru 2024, Finansdepartementet issottometta talba biex il-BERS jirrakkomanda r-reċiproċità tar-rata SyRB fuq bażi konsolidata, subkonsolidata u individwali, skont l-Artikolu 134 (5) tad-Direttiva 2013/36/UE. Il-miżura tal-politika makroprudenzjali nnifisha tibqa’ bla tibdil.

(6)

Fis-7 ta’ Ottubru 2024, il-BERS adotta l-Opinjoni BERS/2024/6 tal-Bord Ewropew dwar ir-Riskju Sistemiku (12), fejn iddikjara li jqis ir-rata kumulattiva ta’ riżerva SyRB u O-SII xierqa u effettiva biex tindirizza r-riskji identifikati għal kull waħda mill-istituzzjonijiet ta’ kreditu li jaqgħu fil-kamp ta’ applikazzjoni ta’ dawn iż-żewġ miżuri.

(7)

Ir-Rakkomandazzjoni BERS/2015/2, kif emendata bir-Rakkomandazzjoni BERS/2017/4 tal-Bord Ewropew dwar ir-Riskju Sistemiku (13), tirrakkomanda li l-awtorità rilevanti li tattiva miżura ta’ politika makroprudenzjali għandha, meta tippreżenta talba għal reċiproċità lill-BERS, tipproponi limitu massimu ta’ materjalità li taħtu l-iskopertura ta’ fornitur individwali ta’ servizzi finanzjarji għar-riskju makroprudenzjali identifikat fil-ġurisdizzjoni fejn il-miżura ta’ politika makroprudenzjali tiġi applikata mill-awtorità ta’ attivazzjoni tista’ titqies bħala mhux materjali. Il-BERS jista’ jirrakkomanda livell limitu differenti jekk jitqies neċessarju. Il-limitu ta’ materjalità għar-reċiproċità tas-SyRB huwa stabbilit għal ammont tal-iskopertura ponderata għar-riskju ta’ NOK 5 biljun, li jikkorrispondi għal madwar 0,16 % tal-ammont tal-iskopertura totali ponderati għar-riskju tal-istituzzjonijiet ta’ kreditu li jirrapportaw fin-Norveġja (14).

(8)

Ir-reċiproċità tar-rekwiżiti kapitali makroprudenzjali attivata mill-awtoritajiet ta’ Stati Membri oħra, fuq bażi konsolidata, subkonsolidata, u individwali, irrispettivament minn jekk l-iskoperturi kkonċernati humiex miżmuma permezz ta’ sussidjarji jew fergħat, jew jirriżultawx minn self transkonfinali dirett, tillimita t-tnixxijiet u l-arbitraġġ regolatorju, tindirizza r-riskji sistemiċi u b’hekk tippromwovi l-effettività ġenerali tal-politika makroprudenzjali billi tiżgura li r-riskji miżjuda jiġu indirizzati mhux biss fl-Istat Membru li introduċa s-SyRB iżda wkoll fi Stati Membri oħra fejn il-gruppi bankarji huma esposti għal dawk ir-riskji miżjuda. Ir-rikonoxximent għandu għalhekk jimmira wkoll li jiżgura li gruppi bankarji esposti għal dawk ir-riskji sistemiċi jkunu reżiljenti biżżejjed. Għalhekk, ir-rekwiżiti kapitali makroprudenzjali li jirriżultaw minn deċiżjoni li jiġu rikonoxxuti l-miżuri makroprudenzjali ta’ Stati Membri oħra għandhom b’mod ġenerali jiġu applikati fuq bażi konsolidata, subkonsolidata, u individwali.

(9)

Biex tiġi rikonoxxuta r-rata SyRB Norveġiża kif mitlub mill-Finansdepartementet, l-awtoritajiet kompetenti u/jew nominati rilevanti ta’ Stat Membru ieħor jistgħu jistabbilixxu rata SyRB f’konformità mal-Artikoli 133(4) u 134(1) tad-Direttiva 2013/36/UE.

(10)

Din l-emenda għar-Rakkomandazzjoni BERS/2015/2 ma taffettwax il-kontinwità li tiġi rrakomandata r-reċiproċità tal-miżuri makroprudenzjali nazzjonali attivata mill-awtoritajiet Norveġiżi fl-31 ta’ Diċembru 2022, kif stabbilit fir-Rakkomandazzjoni BERS/2023/1. L-emendi attwali għar-Rakkomandazzjoni BERS/2015/2, bl-eċċezzjoni għar-reċiproċità tas-SyRB fuq bażi konsolidata, subkonsolidata u individwali, huma ta’ natura editorjali. Għaldaqstant, il-perijodu tranżitorju standard ta’ tliet xhur wara l-publikazzjoni ta’ din ir-Rakkomandazzjoni f’Il-Ġurnal Uffiċjali tal-Unjoni Ewropea huwa applikabbli biss għal miżuri, jew emendi għalihom, li l-awtoritajiet nazzjonali se jadottaw biex jirreċiprokaw s-SyRB fuq bażi konsolidata, subkonsolidata u individwali.

(11)

Għalhekk, ir-Rakkomandazzjoni BERS/2015/2 għandha tiġi emendata kif meħtieġ,