(1)

Il-proċedura għall-approvazzjoni ta’ white paper dwar il-kriptoassi skont l-Artikolu 17(1), il-punt (a), tar-Regolament (UE) 2023/1114 hija marbuta mill-qrib mal-proċedura applikabbli għan-notifika ta’ informazzjoni rilevanti lill-awtorità kompetenti skont l-Artikolu 17(1), il-punt (b), ta’ dak ir-Regolament minħabba li l-awtorità kompetenti ma tistax tapprova l-white paper dwar il-kriptoassi fil-każ ta’ opinjoni negattiva mill-Bank Ċentrali Ewropew (BĊE) jew, fejn applikabbli, mill-bank ċentrali rilevanti skont l-Artikolu 17(5), it-tielet subparagrafu, ta’ dak ir-Regolament. Fl-istess ħin, skont l-Artikolu 17(5) ta’ dak ir-Regolament, l-informazzjoni ppreżentata lill-BĊE u, fejn applikabbli, lill-bank ċentrali rilevanti, li abbażi tagħha għandhom joħorġu opinjoni, hija meħtieġa li tkun kompluta u li tinkludi l-white paper dwar il-kriptoassi ppreżentata mill-emittent lill-awtorità kompetenti f’konformità mal-Artikolu 17(1), il-punt (a), ta’ dak ir-Regolament. Għalhekk, jenħtieġ li d-dispożizzjonijiet li jispeċifikaw aktar il-proċedura għall-approvazzjoni ta’ white paper dwar il-kriptoassi msemmija fl-Artikolu 17(1), il-punt (a), tar-Regolament (UE) 2023/1114 jistabbilixxu proċess simili għal dak stabbilit fl-Artikolu 17(3) ta’ dak ir-Regolament. B’mod partikolari, jenħtieġ li dawk id-dispożizzjonijiet jipprevedu valutazzjoni tal-kompletezza bl-istess regoli u skedi ta’ żmien bħal dawk stabbiliti fl-Artikolu 17(3) tar-Regolament (UE) 2023/1114.

(2)

Sabiex tiġi żgurata t-tlestija rapida u effiċjenti tal-proċess ta’ approvazzjoni tal-white paper dwar il-kriptoassi bl-aktar mod proporzjonat, jenħtieġ li l-preżentazzjoni tal-applikazzjoni għall-approvazzjoni tal-white paper dwar il-kriptoassi kif ukoll il-komunikazzjoni jew l-iskambju ta’ informazzjoni ieħor bejn l-istituzzjoni ta’ kreditu u l-awtorità kompetenti u bejn l-awtorità kompetenti u l-BĊE jew, kif applikabbli, bank ċentrali rilevanti, issir permezz ta’ mezzi elettroniċi, li jippermettu komunikazzjoni u żamma tar-rekords aktar faċli u aktar rapidi. Minħabba l-aspettattivi għoljin ta’ diliġenza kemm fuq l-awtoritajiet pubbliċi kif ukoll fuq l-istituzzjonijiet, għandu jkun mistenni li jinkiseb livell għoli ta’ sigurtà.

(3)

Fejn, matul il-valutazzjoni tal-kompletezza, awtorità kompetenti ssib li l-white paper dwar il-kriptoassi jkollha neqsin xi wħud mill-elementi meħtieġa mill-Artikolu 19(1) tar-Regolament (UE) 2023/1114, u titlob lill-istituzzjonijiet ta’ kreditu jippreżentaw mill-ġdid il-white paper dwar il-kriptoassi b’dawk l-elementi addizzjonali, jenħtieġ li l-istituzzjoni ta’ kreditu tkun tista’ turi lill-awtorità kompetenti kif l-informazzjoni addizzjonali fil-white paper riveduta tindirizza dik it-talba. Għalhekk, huwa meħtieġ li jiġi previst li kull verżjoni riveduta tal-white paper dwar il-kriptoassi ppreżentata lill-awtorità kompetenti jkun fiha tali spjegazzjoni, kif ukoll fajl annotat tal-white paper dwar il-kriptoassi li jenfasizza b’mod ċar il-bidliet kollha li saru meta mqabbla mal-verżjoni ppreżentata ta’ qabel, u fajl finali fejn ma jiġux enfasizzati tali bidliet.

(4)

F’termini tal-ispeċifikazzjoni ulterjuri tal-proċedura li hija komuni għall-approvazzjoni tal-white paper dwar il-kriptoassi u n-notifika lill-awtorità kompetenti, u b’mod partikolari fir-rigward ta’ dik il-parti tal-proċedura li hija relatata mal-komunikazzjoni tal-awtorità kompetenti tal-informazzjoni sħiħa lill-BĊE u, fejn applikabbli, lill-bank ċentrali rilevanti, huwa meħtieġ li jiġu speċifikati l-prattikalitajiet u l-loġistika ta’ dak l-iskambju ta’ informazzjoni sabiex tiġi żgurata t-tmexxija bla xkiel u effiċjenti tiegħu.

(5)

L-Artikolu 17(5) tar-Regolament (UE) 2023/1114 jistabbilixxi skeda ta’ żmien għall-ħruġ tal-opinjoni tal-BĊE u, kif applikabbli, tal-bank ċentrali rilevanti, iżda ma jispeċifikax l-implikazzjonijiet tal-iskadenza tal-iskeda ta’ żmien għall-valutazzjoni tal-white paper dwar il-kriptoassi mill-awtorità kompetenti. Għalhekk, jenħtieġ li jiġi ċċarat li l-awtorità kompetenti tibda valutazzjoni sostantiva tal-white paper dwar il-kriptoassi wara opinjoni pożittiva jew wara li tgħaddi l-iskadenza għall-ħruġ tal-opinjoni. F’każ li l-BĊE jew il-bank ċentrali rilevanti joħroġ opinjoni aktar tard milli mistenni, l-awtorità kompetenti xorta tista’ tikkunsidraha sakemm ma tkunx għaddiet l-iskadenza għall-proċess ta’ approvazzjoni tal-white paper dwar il-kriptoassi.

(6)

Matul il-valutazzjoni sostantiva tal-white paper dwar il-kriptoassi mill-awtorità kompetenti, li għandha l-għan li tiżgura l-konformità tal-white paper dwar il-kriptoassi mar-rekwiżiti tal-Artikolu 19 tar-Regolament (UE) 2023/1114, jenħtieġ li l-awtorità kompetenti tkun tista’ titlob titjib fil-white paper dwar il-kriptoassi ppreżentata mill-istituzzjoni ta’ kreditu lill-awtorità kompetenti. Dan huwa meħtieġ biex jiġi żgurat li l-white paper dwar il-kriptoassi tissodisfa r-rekwiżiti stabbiliti f’dak ir-Regolament bl-aktar mod effiċjenti, jiġifieri mingħajr ma jkollha tibda mill-ġdid il-proċedura kollha għall-approvazzjoni tal-white paper dwar il-kriptoassi, li tista’ ddewwem b’mod sproporzjonat it-tnedija tat-token irreferenzjat ma’ assi. Jagħti wkoll il-possibbiltà lill-awtorità kompetenti titlob lill-istituzzjoni ta’ kreditu biex tindirizza kwalunkwe kumment jew suġġeriment tal-BĊE jew tal-bank ċentrali rilevanti fl-opinjoni pożittiva tagħha. Sabiex ikun hemm approċċ bla xkiel u armonizzat għall-proċedura ta’ approvazzjoni, jenħtieġ li tiġi speċifikata l-iskeda ta’ żmien għad-deċiżjoni finali tal-awtorità kompetenti dwar l-approvazzjoni tal-white paper dwar il-kriptoassi.

(7)

Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea. L-Awtorità Bankarja Ewropea żviluppat dan l-abbozz tal-istandards tekniċi regolatorji f’kooperazzjoni mill-qrib mal-Awtorità Ewropea tat-Titoli u s-Swieq u mal-BĊE.

(8)

L-Awtorità Bankarja Ewropea wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqu huwa bbażat dan ir-Regolament, analizzat il-kostijiet u l-benefiċċji relatati potenzjali u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (2),