(1)

Le Cinneadh (CBES) 2021/509 ón gComhairle (1), bunaíodh Saoráid Eorpach Síochána (SES) chun go maoineodh Ballstáit gníomhaíochtaí an Aontais faoin gcomhbheartas eachtrach agus slándála chun an tsíocháin a chaomhnú, coinbhleachtaí a chosc agus an tslándáil idirnáisiúnta a neartú de bhun Airteagal 21(2), pointe (c), den Chonradh. Go háirithe, i gcomhréir le hAirteagal 1(2), pointe (b)(i), de Chinneadh (CBES) 2021/509, le SES is féidir gníomhaíochtaí a mhaoiniú chun acmhainneachtaí a bhaineann le cúrsaí míleata agus cosanta atá ag tríú Stáit agus eagraíochtaí réigiúnacha agus idirnáisiúnta a neartú.

(2)

Tá an Bhoisnia agus an Heirseagaivéin fós ar cheann de na tíortha is truaillithe le mianaigh ar domhan, de thoradh, go príomha, ar choinbhleacht 1992–1995. Is fadhb mhór fós é do shlándáil na tíre mianaigh agus ordanás neamhphléasctha a bheith i láthair, ar bagairt dhíreach iad ar an bpobal agus ar srian dian iad ar athshlánú iarchoinbhleachta agus ar théarnamh eacnamaíoch. Is bagairt iad freisin ar phearsanra arna n-imscaradh faoin gcomhbheartas slándála agus cosanta (CBSC) agus ar phearsanra AE eile.

(3)

I gComhaontuithe Síochána Dayton, Iarscríbhinn 1-A maidir le Gnéithe Míleata den Chomhaontú Síochána, agus Treoracha do na Páirtithe ó Cheannasaí EUFOR, Change 25 [Athrú 25], Caibidil 5, foráiltear d’oibleagáid ar údaráis na Boisnia agus na Heirseagaivéine maidir le dímhianú. Sa Dlí maidir le Cosaint na Boisnia agus na Heirseagaivéine sainítear go bhfuil gníomhaíochtaí frithmhianaigh ar cheann de na cúig phríomh-mhisin atá ag Fórsaí Armtha na Boisnia agus na Heirseagaivéine (AFBiH). Is é AFBiH an eagraíocht dímhianaithe is mó sa Bhoisnia agus sa Heirseagaivéin; bunaíodh a bhuan-nósanna imeachta oibríochta d’fhonn glanadh mianach agus ordanáis neamhphléasctha (UXO) agus le haghaidh chláir oiliúna um fheasacht riosca UXO. Rinneadh iad a chomhchuibhiú le Caighdeán BiH maidir le Glanadh Mianach agus UXO agus leis na caighdeáin idirnáisiúnta ábhartha araon, lena n-áirítear na Caighdeáin Idirnáisiúnta um Chomhrac Mianach.

(4)

Sna conclúidí ón gCoiste Polaitiúil agus Slándála an 1 Iúil 2021 maidir le treoshuíomhanna straitéiseacha na Saoráide Eorpaí Síochána do mhí Iúil – mí na Nollag 2021, coimeádadh, mar phríomhthosaíocht don tréimhse sin, Beart Cúnaimh chun tacú le AFBiH. Is é is cuspóir don Bheart Cúnaimh ná acmhainneachtaí AFBiH a fheabhsú, d’fhonn na hacmhainneachtaí sin a úsáid i gcomhthéacs rannpháirtíocht na Boisnia agus na Heirseagaivéine i misin mhíleata CBSC agus gan dochar d’aon tacaíocht dímhianaithe eile arna cistiú ag an Aontas Eorpach, agus dímhianú daonnúil i gcoitinne.

(5)

Sa Tuarascáil thráthrialta leathbhliantúil ar Oibríocht Althea ó Ardionadaí an Aontais do Ghnóthaí Eachtracha agus don Bheartas Slándála (“an tArdionadaí”) chuir sé i dtreis tríd síos an gá atá le cúnamh do Chathlán Dímhianaithe AFBiH.

(6)

An 9 Meán Fómhair 2021, tar éis don 36ú tuarascáil leathbhliantúil maidir le hOibríocht EUFOR Althea a bheith curtha faoina bhráid, thug an Coiste Polaitiúil agus Slándála dá aire an géarghá práinneach leanúnach le feabhas a chur ar chumas oibríochtúil Chathlán Dímhianaithe AFBiH. Chuige sin, d’iarr an Coiste Polaitiúil agus Slándála ar an Ardionadaí tograí a thíolacadh lena mbreithniú, lena n-áirítear tograí faoi SES.

(7)

An 18 Deireadh Fómhair 2021, ghlac an Comhairle conclúidí maidir leis an mBoisnia agus an Heirseagaivéin/Oibríocht EUFOR Althea ina dtathantaíonn sí ar údaráis na Boisnia agus na Heirseagaivéine, le tacaíocht ón gcomhphobal idirnáisiúnta, a n-iarrachtaí a neartú maidir le harmlón, airm agus feistí pléascacha breise a dhiúscairt a thuilleadh, mar aon lena n-iarrachtaí i ndáil leis an dímhianú daonnúil.

(8)

I litir uaidh an 8 Eanáir 2020, a seoladh chuig Ceannasaí EUFOR, d’iarr Aire Cosanta na Boisnia agus na Heirseagaivéine go dtabharfaí tacaíocht phráinneach do AFBiH i bhfoirm trealamh tábhachtach dímhianaithe, agus aird á tarraingt aige ar uas-dífheidhmeacht an ábhair atá acu cheana féin agus ar a neamh-indéanta atá sé an cuspóir a leagadh síos an tír a dhímhianú faoi 2027 a chomhlíonadh.

(9)

Sa litir uaithi an 7 Deireadh Fómhair 2021, a seoladh chuig an Ardionadaí, rinne Aireacht Cosanta na Boisnia agus na Heirseagaivéine athnuachan ar an iarraidh uaithi ar an Aontas tacaíocht a thabhairt do AFBiH i bhfoirm trealamh bunriachtanach dímhianaithe a sholáthar agus é d’aidhm aige éifeachtúlacht na ngníomhaíochtaí dímhianaithe a dhéanann AFBiH a fheabhsú.

(10)

Déanfar an Beart Cúnaimh a chur chun feidhme agus na prionsabail agus na ceanglais a leagtar amach i gCinneadh (CBES) 2021/509 á gcur san áireamh, go háirithe maidir le comhlíonadh Chomhsheasamh 2008/944/CBES ón gComhairle (2), agus i gcomhréir leis na rialacha maidir le hioncam agus caiteachas a mhaoinítear faoi SES a chur chun feidhme.

(11)

Athdhearbhaíonn an Chomhairle go bhfuil rún daingean aici cearta an duine, saoirsí bunúsacha agus prionsabail dhaonlathacha a chosaint, a chur chun cinn agus a chomhlíonadh, an smacht reachta agus an dea-rialachas a neartú i gcomhréir le Cairt na Náisiún Aontaithe, le Dearbhú Uilechoiteann Chearta an Duine agus leis an dlí idirnáisiúnta, go háirithe an dlí idirnáisiúnta um chearta an duine agus an dlí daonnúil idirnáisiúnta,