(1)

Le Rialachán (AE) 2018/1240 bunaítear an Córas Eorpach um Fhaisnéis agus Údarú Taistil (“ETIAS”) le haghaidh náisiúnaigh tríú tír atá díolmhaithe ón gceanglas víosa a bheith ina seilbh acu chun teacht isteach i gcríoch na mBallstát agus fanacht ann.

(2)

Chun an t-údarú taistil a fháil, ní mór don iarratasóir féin an t-iarratas a chur isteach, é sin nó ní mór an t-iarratas a chur isteach trí thríú duine nó trí idirghabhálaí tráchtála a mbeidh údarú tugtha ag an iarratasóir dó an t-iarratas a chur isteach thar a cheann.

(3)

I gcomhthéacs córas údaraithe taistil eile atá inchomparáide, is eol go raibh idirghabhálaithe tráchtála i mbun cleachtais mhí-úsáideacha. Is iomaí cineál mí-úsáide is féidir a bheith ann, agus áirítear orthu sin: iarracht a dhéanamh an dallamullóg a chur ar iarratasóirí ionas go sílfidís gurb é atá ina suíomh gréasáin an aip gléis mhóibíligh nó an suíomh gréasáin poiblí oifigiúil saintiomnaithe le haghaidh iarratas a chur isteach, agus ar an gcaoi sin a thabhairt le tuiscint don iarratasóir, go bréagach, gur cuid éigeantach den phróiseas iarratais é an barrachas a ghearrann an t-idirghabhálaí tráchtála seachas táille a ghearrtar i leith seirbhís tráchtála a úsáidtear go deonach; úsáid chalaoiseach a bhaint as na sonraí pearsanta nó airgeadais a sholáthair an t-iarratasóir; praghas ró-ard a ghearradh i leith na seirbhíse a tugadh, nó gan an t-iarratas a dhéanamh, thar ceann an iarratasóra, san am agus san fhormáid is gá agus de réir na cáilíochta is gá.

(4)

Chun cleachtais mhí-úsáideacha a bhrath agus chun na cleachtais sin a chosc ó tharlú athuair, ba cheart foirm ar líne a chur ar fáil ar an suíomh gréasáin poiblí tiomnaithe agus ar an aip le haghaidh gléasanna móibíleacha, arb é a bheadh inti foirm ar líne le haghaidh tuairisciú a dhéanamh ar mhí-úsáidí arna ndéanamh ag idirghabhálaithe tráchtála. Chun a chur i bhfios do dhaoine ar dhóigh is fearr gur féidir dóibh mí-úsáid a thuairisciú agus chun éascaíocht a dhéanamh don tuairisciú sin, ba cheart faisnéis maidir leis an bpróiseas atá le leanúint a thaispeáint go feiceálach ar an suíomh gréasáin poiblí agus ar an aip le haghaidh gléasanna móibíleacha. Ba cheart réimsí caighdeánaithe a bheith san fhoirm agus ba cheart réimsí a bheith inti á iarraidh ar na húsáideoirí mionsonraí an iompair mhí-úsáidigh a iontráil.

(5)

Chun a áirithiú go bhfaighidh na hiarratasóirí eolas leordhóthanach faoi chineál agus faoi chuspóir na saoráide tuairisciúcháin, ba cheart a shoiléiriú san fhoirm gur chun críoch faireacháin an córas tuairisciúcháin, nach mbaileofar aon sonraí pearsanta leis agus nach bealach é chun achomharc a dhéanamh i gcoinne cinntí maidir le hiarratais, agus nach féidir é a úsáid mar ionadach ar nós imeachta i ndáil le héileamh leigheasanna faoin dlí riaracháin, sibhialta nó coiriúil.

(6)

Ba cheart Láraonad ETIAS tuarascálacha den sórt sin a fháil agus ba cheart dó iad a mheasúnú, agus ba cheart dó na cosúlachtaí idir na mí-úsáidí agus atarlú na mí-úsáidí a chur san áireamh sa mheasúnú sin. Ba cheart do Láraonad ETIAS tuairisc a thabhairt go tráthrialta don Choimisiún, de réir mar is gá, maidir leis na mí-úsáidí a tuairiscíodh agus na measúnuithe a rinneadh. Ba cheart na measúnuithe sin a chur san áireamh agus an Coimisiún ag forbairt feachtais faisnéise dá dtagraítear in Airteagal 72 de Rialachán (AE) 2018/1240. Ar bhonn na measúnuithe sin, ba cheart do Láraonad ETIAS an fhaisnéis don phobal i gcoitinne dá dtagraítear in Airteagal 71 de Rialachán (AE) 2018/1240 a mhodhnú, de réir mar is iomchuí, agus go háirithe an fhaisnéis do na hiarratasóirí.

(7)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach (“CAE”) agus leis an gConradh ar Fheidhmiú an Aontais Eorpaigh (‘CFAE’), níl an Danmhairg rannpháirteach i nglacadh Rialachán (AE) 2018/1240 agus níl sí faoi cheangal aige ná faoi réir a chur i bhfeidhm. Ós rud é, áfach, go gcuireann Rialachán (AE) 2018/1240 le acquis Schengen, thug an Danmhairg fógra an 21 Nollaig 2018, i gcomhréir le hAirteagal 4 den Phrótacal sin, maidir lena cinneadh Rialachán (AE) 2018/1240 a chur chun feidhme ina dlí náisiúnta.

(8)

Is é atá sa Rialachán seo forbairt ar fhorálacha acquis Schengen nach bhfuil Éire rannpháirteach iontu, i gcomhréir le Cinneadh 2002/192/CE ón gComhairle (2); dá bhrí sin, níl Éire rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm.

(9)

Maidir leis an Íoslainn agus leis an Iorua, is é atá sa Rialachán seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá thír sin le acquis Schengen a chur chun feidhme, a chur i bhfeidhm agus a fhorbairt (3), ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE ón gComhairle (4).

(10)

Maidir leis an Eilvéis, is é atá sa Rialachán seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt (5), ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE arna léamh i gcomhar le hAirteagal 3 de Chinneadh 2008/146/CE ón gComhairle (6).

(11)

Maidir le Lichtinstéin, is é atá sa Rialachán seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt (7), ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE arna léamh i gcomhar le hAirteagal 3 de Chinneadh 2011/350/AE ón gComhairle (8).

(12)

Maidir leis an gCipir, an Bhulgáir, an Rómáin agus an Chróit, is é atá sa Rialachán seo gníomh atá ag cur le acquis Schengen nó atá gaolmhar leis ar dhóigh eile, de réir bhrí Airteagal 3(1) d’Ionstraim Aontachais 2003, Airteagal 4(1) d’Ionstraim Aontachais 2005 agus Airteagal 4(1) d’Ionstraim Aontachais 2011 faoi seach.

(13)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (9) agus thug sé tuairim uaidh an 4 Meán Fómhair 2020.

(14)

Tá na bearta dá bhforáiltear sa Rialachán seo i gcomhréir le tuairim an Choiste um Theorainneacha Cliste (ETIAS),