(1)

Id-Deċiżjoni tal-Kummissjoni 2000/96/KE tat-22 ta' Diċembru 1999 dwar mard li jittieħed li għandu jiġi kopert b'mod progressiv fin-network tal-Komunità taħt id-Deċiżjoni Nru 2119/98/KE tal-Parlament Ewropew u tal-Kunsill (2), telenka ċertu mard li jittieħed li għandu jiġi kopert minn sorveljanza epidemjoloġika fin-netwerk, inluż “Mard li jista' jiġi evitat b'tilqim”. Din il-kategorija tinkludi mard li hemm diġà tilqim disponibbli għalih, u mard ieħor li għalih it-tagħrif xjentifiku u tekniku huwa disponibbli għall-elaborazzjoni u l-produzzjoni ta' tilqim fi ħdan perjodu relattivament qasir.

(2)

Reċentement ħareġ vajrus patoġeniku ġdid tal-influwenza li t-trażmissjoni minn bniedem għal ieħor ġiet irreġistrata fl-Amerika ta' Fuq, u li diġà infirex ma' diversi Stati Membri. Peress li din is-sitwazzjoni epidemika ġdida toħloq riskju serju għal evoluzzjoni ta' influwenza pandemika, l-Organizzazzjoni Dinjija tas-Saħħa identifikat il-mard ikkawżat minn dak il-vajrus bħala emerġenza tas-saħħa pubblika ta' tħassib internazzjonali skont ir-Regolamenti Internazzjonali tas-Saħħa (2005).

(3)

Din il-marda ġdida għandha tiġi kklassifikata fil-kategorija ta' “Mard li jista’ jiġi evitat bit-tilqim” kif, anki jekk l-ebda tilqim m'hu disponibbli bħalissa għall-prevenzjoni tagħha, it-tagħrif xjentifiku u tekniku huwa disponibbli għall-elaborazzjoni u l-produzzjoni ta' tilqim hekk kif jiġi definittivament identifikat l-oriġini tagħha.

(4)

Dan il-vajrus huwa kopert taħt “Influwenza” diġà msemmija fil-punt 2.1 tal-Anness I għad-Deċiżjoni 2000/96/KE Madankollu, fid-dawl tal-pandemija potenzjali maħluqa minn dan il-vajrus u l-ħtieġa ta' koordinazzjoni immedjata u effiċjenti bejn il-Komunità u l-Istati Membri f'dak ir-rigward, dan il-vajrus għandu jissemmaspeċifikament bħala wieħed mit-tipi possibbli tal-vajrus tal-influwenza. Din l-indikazzjoni speċifika min-naħa tagħha tippermetti l-adozzjoni ta' definizzjoni ta' każ speċifiku skont id-Deċiżjoni tal-Kummissjoni 2002/253/KE tad-19 ta’ Marzu 2002 li tistabbilixxi d-definizzjonijiet ta' każ għar-rappurtaġġ ta' mard li jinxtered fin-netwerk tal-Komunità permezz tad-Deċiżjoni Nru 2119/98/KE tal-Parlament Ewropew u tal-Kunsill (3), u għalhekk komunikazzjoni ta' informazzjoni mmirata aħjar fi ħdan in-netwerk Komunitarju skont l-Artikolu 4 tad-Deċiżjoni 2119/98/KE.

(5)

Deċiżjoni tal-Kummissjoni 2009/363/KE tat-30 ta' April 2009 li temenda d-Deċiżjoni 2002/253/KE li tistabbilixxi d-definizzjonijiet ta' każ għar-rappurtaġġ ta' mard li jinxtered fin-netwerk tal-Komunità permezz tad-Deċiżjoni Nru 2119/98/KE tal-Parlament Ewropew u tal-Kunsill (4) diġà introduċiet definizzjoni tal-każ speċifiku Influwenza A (H1N1) fl-Anness għad-Deċiżjoni 2002/253/KE. Għalhekk jinħtieġ li jingħata effett retroattiv għal din id-Deċiżjoni sabiex ikun żgurat li huwa applikabbli mill-istess data bħad-Deċiżjoni 2009/363/KE.

(6)

Il-miżuri stipulati f'din id-Deċiżjoni huma skont l-opinjoni tal-Kumitat imwaqqaf bl-Artikolu 7 tad-Deċiżjoni Nru 2119/98/KE,