(1)

Fil-31 ta’ Marzu 2020, il-Kunsill adotta d-Deċiżjoni (PESK) 2020/472 (1) li tistabbilixxi u tniedi operazzjoni militari tal-Unjoni Ewropea fil-Mediterran (EUNAVFOR MED IRINI), taħt il-kmand tal-Viċi Ammirall Fabio AGOSTINI bħala Kmandant tal-Operazzjoni tal-UE.

(2)

Fit-30 ta’ April 2020, il-Kmandant tal-Operazzjoni tal-UE rrakkomanda li l-Viċi Ammirall Ettore SOCCI jinħatar Kmandant tal-Forza tal-UE tal-EUNAVFOR MED IRINI għall-ewwel nofs tal-mandat li fadal tal-EUNAVFOR MED IRINI, u li l-Komodor Theodoros MIKROPOULOS jinħatar Kmandant tal-Forza tal-UE tal-EUNAVFOR MED IRINI għat-tieni nofs tal-mandat li fadal.

(3)

Fl-4 ta’ Mejju 2020, il-Kumitat Militari tal-UE appoġġa dik ir-rakkomandazzjoni.

(4)

Fis-6 ta’ Mejju 2020, il-Kumitat Politiku u ta’ Sigurtà qabel dwar dik ir-rakkomandazzjoni.

(5)

Għal raġunijiet operattivi, huwa neċessarju li l-ħatra tal-Kmandant tal-Forza tal-UE tal-EUNAVFOR MED IRINI tapplika mis-6 ta’ Mejju 2020.

(6)

Il-Viċi Ammirall Ettore SOCCI għalhekk jenħtieġ li jinħatar Kmandant tal-Forza tal-UE tal-EUNAVFOR MED IRINI mis-6 ta’ Mejju 2020 sat-18 ta’ Ottubru 2020, u l-Komodor Theodoros MIKROPOULOS mid-19 ta’ Ottubru 2020 sal-31 ta’ Marzu 2021.

(7)

F’konformità mal-Artikolu 5 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka ma tiħux sehem fl-elaborazzjoni u l-implimentazzjoni ta’ deċiżjonijiet u azzjonijiet tal-Unjoni li għandhom implikazzjonijiet ta’ difiża. Konsegwentement, id-Danimarka mhijiex qed tieħu sehem fl-adozzjoni ta’ din id-Deċiżjoni,