21.2.2023   

GA

Iris Oifigiúil an Aontais Eorpaigh

L 53/14


CINNEADH (CBES) 2023/385 ÓN gCOMHAIRLE

an 20 Feabhra 2023

maidir le rannpháirtíocht Cheanada i dtionscadal PESCO “Líonra na Mol Lóistíochta san Eoraip agus na Tacaíochta d’Oibríochtaí”

TÁ COMHAIRLE AN AONTAIS EORPAIGH,

Ag féachaint don Chonradh ar an Aontas Eorpach, go háirithe Airteagal 46(6) de,

Ag féachaint do Chinneadh (CBES) 2017/2315 ón gComhairle an 11 Nollaig 2017 lena mbunaítear buanchomhar struchtúrtha (PESCO) agus lena gcinntear liosta na mBallstát rannpháirteach (1), go háirithe Airteagal 9(2) de,

Ag féachaint do Chinneadh (CBES) 2020/1639 ón gComhairle an 5 Samhain 2020 lena mbunaítear na coinníollacha ginearálta faoina bhféadfaí cuireadh eisceachtúil a thabhairt do thríú Stáit a bheith rannpháirteach i dtionscadail aonair PESCO (2), agus go háirithe Airteagal 2(4) de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)

Foráiltear le hAirteagal 9(2) de Chinneadh (CBES) 2017/2315 go bhfuil an Chomhairle chun a chinneadh, i gcomhréir le hAirteagal 46(6) CAE, cé acu an gcomhlíonann nó nach gcomhlíonann tríú Stát, ar Stát é ar mian leis na Ballstáit rannpháirteacha atá páirteach i dtionscadal buanchomhar struchtúrtha (PESCO) cuireadh a thabhairt dó páirt a ghlacadh sa tionscadal sin, na ceanglais arna mbunú ag an gComhairle.

(2)

An 6 Márta 2018, ghlac an Chomhairle Cinneadh (CBES) 2018/340 (3) lena mbunaítear liosta na dtionscadal atá le forbairt faoi PESCO. Foráiltear le hAirteagal 1 den Chinneadh sin go bhfuil 13 chomhalta tionscadail, lena n-áirítear an Ghearmáin mar chomhordaitheoir tionscadail, le tionscadal dar teideal Líonra na Mol Lóistíochta san Eoraip agus na Tacaíochta d’Oibríochtaí (“NetLogHubs” ) a fhorbairt faoi chuimsiú an liosta sin.

(3)

An 5 Samhain 2020, ghlac an Chomhairle Cinneadh (CBES) 2020/1639 lena mbunaítear na coinníollacha ginearálta faoina bhféadfaí cuireadh eisceachtúil a thabhairt do thríú Stáit a bheith rannpháirteach i dtionscadail aonair PESCO. Foráiltear le hAirteagal 2(4) den Chinneadh sin go bhfuil an Chomhairle chun a chinneadh, bunaithe ar fhógra ó chomhordaitheoir nó ó chomhordaitheoirí thionscadal de chuid PESCO agus tar éis don Choiste Polaitiúil agus Slándála tuairim a thabhairt uaidh, i gcomhréir le hAirteagal 46(6) CAE agus le hAirteagal 9(2) de Chinneadh (CBES) 2017/2315, cé acu an gcomhlíontar nó nach gcomhlíontar, le rannpháirtíocht an tríú Stát sa tionscadal sin, na coinníollacha ginearálta a leagtar amach in Airteagal 3 de Chinneadh (CBES) 2020/1639.

(4)

I mí na Bealtaine 2022, chuir Ceanada a iarraidh ar rannpháirtíocht sa tionscadal sin de chuid PESCO chuig comhordaitheoir NetLogHubs, i gcomhréir le hAirteagal 2(1) de Chinneadh (CBES) 2020/1639. Ar bhonn na faisnéise a chuir Ceanada ar fáil, rinne comhaltaí an tionscadail measúnú ansin, cibé ar chomhlíon sí na coinníollacha ginearálta a leagtar amach in Airteagal 3 den Chinneadh sin.

(5)

An 29 Samhain 2022, tar éis do chomhaltaí an tionscadail teacht ar chomhaontú d’aon toil an 14 Meán Fómhair 2022, thug comhordaitheaoir NetLogHubs fógra don Chomhairle agus d’Ardionadaí an Aontais do Ghnóthaí Eachtracha agus don Bheartas Slándála, i gcomhréir le hAirteagal 2(3) de Chinneadh (CBES) 2020/1639, go raibh sé beartaithe cuireadh a thabhairt do Cheanada a bheith rannpáirteach sa tionscadal sin. Leagtar amach san fhógra raon feidhme, foirm agus méid rannpháirtíocht Cheanada, agus dearbhaíodh go gcomhlíonann Ceanada na coinníollacha ginearálta a leagtar amach in Airteagal 3 de Chinneadh (CBES) 2020/1639.

(6)

An 1 Nollaig 2022, d’aontaigh an Coiste Polaitiúil agus Slándála tuairim faoin bhfógra maidir leis an iarraidh ó Cheanada a bheith rannpháirteach i NetLogHubs. Go háirithe, thug an Coiste Polaitiúil agus Slándála dá aire an tuairisc ar NetLogHubs mar a fhoráiltear san fhógra, lena n-áirítear cuspóirí an tionscadail agus an t-eagrúchán, an chinnteoireacht a bhaineann leis mar aon leis na réimsí oibre a ndírítear orthu. Thug an Coiste dá aire freisin nach gcomhroinntear aon fhaisnéis rúnaicmithe nó íogair de chuid an Aontais Eorpaigh sa tionscadal sin, agus nach bhfuil an tionscadal á chur chun feidhme le tacaíocht ón nGníomhaireacht Eorpach um Chosaint (GEC) de réir bhrí Airteagal 3, pointe (g), de Chinneadh (CBES) 2020/1639. Thairis sin, thug sé dá aire nach bhfuil soláthar armála, taighde nó forbairt cumais, ná úsáid nó onnmhairiú arm, cumas nó teicneolaíochta i gceist le NetLogHubs; agus nach bhfuil baint ag eintitis, infheistíochtaí ná cistiú ó Bhallstáit rannpháirteacha PESCO leis ná ag iarrataí ar chistiú ón Aontas le haghaidh gníomhaíochtaí tionscadail.

(7)

D’aontaigh an Coiste Polaitiúil agus Slándála freisin leis an raon feidhme agus an fhoirm atá beartaithe i dtaca le rannpháirtíochta Cheanada agus a mhéid a bheidh sí rannpháirteach i NetLogHubs, mar a thuairiscítear sa fhógra. D’admhaigh sé go raibh sé curtha in iúl ag Ceanada go dtacaíonn sí go hiomlán le raon feidhme an tionscadail sin mar a shainítear san fhógra é.

(8)

Sa tuairim chéanna, dhearbhaigh an Coiste Polaitiúil agus Slándála an tuairim arna comhaontú d’aon toil ag comhaltaí an tionscadail go gcomhlíonann Ceanada na coinníollacha ginearálta a leagtar amach in Airteagal 3 de Chinneadh (CBES) 2020/1639, mar seo a leanas:

—

comhlíonann Ceanada an coinníoll a leagtar amach in Airteagal 3, pointe (a), lena gceanglaítear an méid seo a leanas: go ndéanfaidh siad a gcuid féin de na luachanna ar a bhfuil an tAontas fothaithe, mar a leagtar síos in Airteagal 2 CAE, agus de na prionsabail dá dtagraítear in Airteagal 21 (1) CAE, mar aon le cuspóirí CBES in Airteagal 21(2) CAE; pointí (a), (b), (c) agus (h), ní sháróidh sé leasanna slándála agus cosanta an Aontais agus a Bhallstát, lena n-áirítear urraim do phrionsabal an dea-chaidrimh chomharsanúil leis na Ballstáit; agus go mbeidh idirphlé polaitiúil ar siúl aici leis an Aontas, lenar cheart gnéithe slándála agus cosanta a chumhdach freisin agus páirt á glacadh aici i NetLogHubs;

—

a mhéid a bhaineann leis an gcoinníoll in Airteagal 3, pointe (b), i ndáil le breisluach substaintiúil Cheanada i dtaca le NetLogHubs, tugtar achoimre mhionsonraithe san fhógra ar rannchuidiú Cheanada, lena n-áirítear maidir le raon feidhme, foirm agus méid a rannpháirtíochta sa tionscadal, lena dtugtar bunús le comhlíonadh an choinníll sin;

—

a mhéid a bhaineann leis an gcoinníoll a leagtar amach in Airteagal 3, pointe (c), rannchuideoidh rannpháirtíocht Cheanada i NetLogHubs leis an gcomhbheartas slándála agus cosanta (CBSC) agus le leibhéal uaillmhéine an Aontais a neartú, lena n-áirítear chun tacú le misin agus oibríochtaí CBSC, mar a shainítear freisin san fhógra;

—

a mhéid a bhaineann leis an gcoinníoll a leagtar amach in Airteagal 3, pointe (d), ní thugann NetLogHubs aghaidh ar sholáthar armála, taighde ná forbairt cumais, ná ar úsáid agus onnmhairiú arm, cumas ná teicneolaíochta ná ní dhéantar aon chumas ná teicneolaíocht a fhorbairt leis an tionscadal. Dá bhrí sin, le rannpháirtíocht Cheanada sa tionscadal, ní bheidh aon spleáchais ar Cheanada ná ní fhorchuirfidh Ceanada aon srianta i gcoinne aon Bhallstáit;

—

ina theannta sin, comhlíontar an chomhsheasmhacht a cheanglaítear, a leagtar amach in Airteagal 3, pointe (e), idir rannpháirtíocht Cheanada agus na gealltanais ábhartha is ceangailtí de chuid PESCO, lena n-áirítear freisin in-imscarthacht agus idir-inoibritheacht fórsaí a bhfuil an tionscadal seo ag cuidiú lena gcomhlíonadh, mar a shonraítear san Iarscríbhinn a ghabhann le Cinneadh (CBES) 2017/2315, de réir mar a mhionsonraítear tuilleadh san fhógra, agus ós rud é nach tionscadal atá dírithe ar chumas é NetLogHubs, níl bheidh feidhm sa chomhthéacs seo ag an gcoinníoll maidir le rannchuidiú rannpháirtíocht Cheanada le comhlíonadh na dtosaíochtaí a eascraíonn as an bPlean Forbartha Cumas agus as an Athbhreithniú Comhordaithe Bliantúil ar Chosaint (CARD) ná ag an gcoinníoll go mbeidh tionchar dearfach aige ar Bhonn Tionsclaíoch agus Teicneolaíoch na Cosanta Eorpaí (EDTIB);

—

comhlíontar an ceanglas a leagtar amach in Airteagal 3, pointe (f), ós rud é go bhfuil an comhaontú idir an tAontas Eorpach agus Ceanada i ndáil le nósanna imeachta slándála maidir le faisnéis rúnaicmithe a mhalartú agus a chosaint (4) i bhfeidhm ón 1 Meitheamh 2018;

—

ní bheidh feidhm ag an gcoinníoll a leagtar amach in Airteagal 3, pointe (g), sa chás seo, ós rud é nach gcuirtear NetLogHubs chun feidhme le tacaíocht ón GEC agus nach gá, dá bhrí sin, socrú riaracháin, ar ghabh éifeacht leis, leis an GEC;

—

a mhéid a bhaineann leis an gcoinníoll a leagtar amach in Airteagal 3, pointe (h), tá gealltanas tugtha ag Ceanada go bhféachfar le socrú riaracháin a bhaineann go sonrach leis an tionscadal a thabhairt i gcrích mar aon le haon doiciméadacht tionscadail eile is gá i gcomhréir le Cinntí (CBES) 2017/2315 agus (CBES) 2018/909 (5);

(9)

Mar chonclúid ar an tuairim uaidh, mhol an Coiste Polaitiúil agus Slándála go ndéanfadh an Chomhairle cinneadh dearfach go gcomhlíontar, le rannpháirtíocht Cheanada i NetLogHubs na coinníollacha ginearálta a leagtar amach in Airteagal 3 de Chinneadh (CBES) 2020/1639.

(10)

Ba cheart don Chomhairle, dá bhrí sin, a chinneadh go gcomhlíontar, le rannpháirtíocht Cheanada i NetLogHubs, na coinníollacha ginearálta a leagtar amach in Airteagal 3 de Chinneadh (CBES) 2020/1639. Dá éis sin, tá comhordaitheoir an tionscadail le cuireadh a thabhairt do Cheanada, thar ceann chomhaltaí an tionscadail, a bheith rannpáirteach i NetLogHubs. Tá Ceanada le bheith rannpháirteach sa tionscadal sin ar an dáta a shonrófar sa socrú riaracháin idir comhaltaí an tionscadail agus Ceanada, i gcomhréir le hAirteagal 2(7) de Chinneadh (CBES) 2020/1639, agus beidh na cearta agus na hoibleagáidí arna gcinneadh sa socrú riaracháin sin ag Ceanada, i gcomhréir le hAirteagal 4(1) den Chinneadh sin. Tá an Chomhairle chun a maoirseacht a fheidhmiú i gcomhréir le hAirteagal 5(2) de Chinneadh (CBES) 2020/1639, agus is féidir léi cinntí breise a dhéanamh i gcomhréir le hAirteagal 6(2) agus (3) de,

TAR ÉIS AN CINNEADH SEO A GHLACADH:

Airteagal 1

Comhlíontar, le rannpháirtíocht Cheanada i dtionscadal NetLogHubs PESCO, na coinníollacha ginearálta a leagtar amach in Airteagal 3 de Chinneadh (CBES) 2020/1639.

Airteagal 2

Tiocfaidh an Cinneadh seo i bhfeidhm ar dháta a ghlactha.

Arna dhéanamh sa Bhruiséil, an 20 Feabhra 2023.

Thar ceann na Comhairle

An tUachtarán

J. BORRELL FONTELLES


(1)   IO L 331, 14.12.2017, lch. 57.

(2)   IO L 371, 6.11.2020, lch. 3.

(3)  Cinneadh (CBES) 2018/340 ón gComhairle an 6 Márta 2018 lena mbunaítear liosta na dtionscadal atá le forbairt faoi PESCO (IO L 65, 8.3.2018, lch. 24).

(4)  Comhaontú idir Ceanada agus an tAontas Eorpach maidir le nósanna imeachta slándála le haghaidh malartú agus cosaint faisnéise rúnaicmithe (IO L 333, 15.12.2017, lch. 2).

(5)  Cinneadh (CBES) 2018/909 ón gComhairle an 25 Meitheamh 2018 lena mbunaítear sraith choiteann rialacha rialachais do thionscadail PESCO (IO L 161, 26.6.2018, lch. 37).