(1)

Le hIarscríbhinn I a ghabhann le Rialachán Cur Chun Feidhme (AE) 2021/2325 ón gCoimisiún (2) leagtar amach an liosta de thríú tíortha a n-aithnítear go bhfuil a gcórais táirgthe agus a mbearta rialaithe chun táirgí talmhaíochta a tháirgeadh go horgánach coibhéiseach leis na córais táirgthe agus bearta rialaithe a leagtar síos i Rialachán (CE) Uimh. 834/2007 ón gComhairle (3).

(2)

Chuir an India in iúl don Choimisiún gur tharraing a húdarás inniúil siar creidiúnú na gcomhlachtaí rialaithe ‘APOF Organic Certification Agency’ (AOCA- IN-ORG-002), ‘Bhumaatha Organic Certification Bureau’ (BOCB-IN-ORG-034), ‘Karnataka State Organic Certification Agency’ (IN-ORG-027), agus gur chuir sí creidiúnú an chomhlachta rialaithe ‘Faircert Certification Services Pvt Ltd’ (IN-ORG-023) ar fionraí.

(3)

Chuir an tSeapáin in iúl don Choimisiún gur tharraing a húdarás inniúil siar creidiúnú na gcomhlachtaí rialaithe ‘Japan Grain Inspection Association’ (JP-BIO-039) agus ‘OCIA Japan’ (JP-BIO-008).

(4)

Chuir an tSeapáin in iúl don Choimisiún gur thug a húdarás inniúil aitheantas don chomhlacht rialaithe ‘Japan Association for Inspection and Investigation of Food Including Fats and Oils’ (JP-BIO-042).

(5)

D’iarr Poblacht na Cóiré ar an gCoimisiún aitheantas a thabhairt don tSeirbhís Náisiúnta Bainistíochta Cáilíochta do Tháirgí Talmhaíochta mar údarás inniúil, sa bhreis ar an Aireacht Talmhaíochta, Bia agus Gnóthaí Tuaithe.

(6)

In Iarscríbhinn II a ghabhann le Rialachán Cur Chun Feidhme (AE) 2021/2325 leagtar amach an liosta de na húdaráis rialaithe agus na comhlachtaí rialaithe a dhéantar a aithint chun críche coibhéise agus atá inniúil chun rialuithe a dhéanamh agus deimhnithe a eisiúint i dtríú tíortha. I bhfianaise faisnéis nua agus iarrataí nua a fuair an Coimisiún ó glacadh Rialachán Cur Chun Feidhme (AE) 2021/2325, ba cheart athruithe áirithe a dhéanamh ar an liosta sin.

(7)

Fuair an Coimisiún iarraidh ó ‘Albinspekt bio.inspecta’ chun a aitheantas maidir leis na tríú tíortha uile a bhfuil sé aitheanta ina leith a tharraingt siar, mar gheall ar a chumasc le ‘Bio.inspecta AG’.

(8)

Tá roinnt coinsíneachtaí táirgí a allmhairítear ón India agus ón Éigipt agus atá deimhnithe a bheith orgánach ag ‘Biocert International Pvt Ltd’ éillithe le táirgí agus substaintí nach gceadaítear i dtáirgeadh orgánach agus/nó i dtáirgeadh traidisiúnta san Aontas, lena n-áirítear ocsaíd eitiléine (ETO), atá carcanaigineach, só-ghineach agus tocsaineach don atáirgeadh. Mar thoradh air sin, rinneadh roinnt fógraí i gCóras Faisnéise na Talmhaíochta Orgánaí. Is iondúil gur sháraigh na leibhéil éillithe a fuarthas sna coinsíneachtaí na huasleibhéil iarmhar le haghaidh ETO a bunaíodh le Rialachán (CE) Uimh. 396/2005 ó Pharlaimint na hEorpa agus ón gComhairle (4).

(9)

Thairis sin, níor léirigh ‘Biocert International Pvt Ltd’ gur táirgeadh táirgí orgánacha a allmhairíodh faoina rialú i gcomhréir leis na rialacha táirgthe ná go raibh siad faoi réir socruithe rialaithe atá coibhéiseach leo sin a leagtar síos i Rialachán (CE) Uimh. 834/2007 agus i Rialacháin (CE) Uimh. 889/2008 ón gCoimisiún (5) agus (CE) Uimh. 1235/2008 ón gCoimisiún (6).

(10)

Níor léirigh Biocert freisin go raibh gach oibreoir arna rialú ag ‘Biocert International Pvt Ltd’ faoi réir bearta rialaithe a raibh éifeachtacht choibhéiseach acu agus gur cuireadh bearta rialaithe den sórt sin i bhfeidhm go buan agus go héifeachtach i gcomhréir le hAirteagal 33(1), pointe (b), de Rialachán (CE) Uimh. 834/2007.

(11)

Ina theannta sin, ní dhearna ‘Biocert International Pvt Ltd’ bearta ceartaitheacha mar fhreagairt ar na neamhrialtachtaí agus ar na sáruithe a tugadh faoi deara.

(12)

Ar deireadh, chuir an comhlacht creidiúnaithe IOAS an Coimisiún ar an eolas faoi tharraingt siar a chreidiúnú ISO/IEC 17065 de ‘Biocert International Pvt Ltd’ do gach catagóir táirgí agus i ngach tríú tír a raibh creidiúnú aige ina leith toisc nár chloígh sé leis na smachtbhannaí roimhe sin, nach ndearna sé na gníomhaíochtaí sonraithe ba ghá agus nár réitigh sé na neamh-chomhréireachtaí.

(13)

Ar gach ceann de na cúiseanna a leagtar amach in aithrisí (8)-(12) thuas, agus i gcomhréir le hAirteagal 4(1), pointí (d)(v) agus (vii) de Rialachán Tarmligthe (AE) 2021/1342 ón gCoimisiún (7), ba cheart ‘Biocert International Pvt Ltd’ a tharraingt siar ón liosta údarás rialaithe agus comhlachtaí rialaithe a leagtar amach in Iarscríbhinn II a ghabhann le Rialachán Cur Chun Feidhme (AE) 2021/2325.

(14)

Chuir ‘Ecogruppo Italia’ an Coimisiún ar an eolas faoin athrú ar a sheoladh.

(15)

Fuair an Coimisiún iarraidh ó ‘Indocert’ chun a aitheantas don Chambóid a tharraingt siar.

(16)

Fuair an Coimisiún iarraidh ó ‘Kiwa BCS Öko-Garantie GmbH ’ a aitheantas don Albáin, don Bhanglaidéis, don Bhealarúis, don Bhútáin, do Chúba, don Aetóip, do Ghuine Bissau, don India, don Iaráin, don Chosaiv, don Mhongóil, do Neipeal agus don Phacastáin a tharraingt siar. Ina theannta sin, chuir ‘Kiwa BCS Öko-Garantie GmbH’ an Coimisiún ar an eolas faoin athrú ar a sheoladh idirlín.

(17)

Chuir ‘Organic Standard’ an Coimisiún ar an eolas faoin athrú ar a sheoladh idirlín.

(18)

Ba cheart Rialachán Cur Chun Feidhme (AE) 2021/2325 a leasú dá réir sin.

(19)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Tháirgeadh Orgánach,

(1)

Leasaítear Iarscríbhinn I i gcomhréir le hIarscríbhinn I a ghabhann leis an Rialachán seo;

(2)

Leasaítear Iarscríbhinn II i gcomhréir le hIarscríbhinn II a ghabhann leis an Rialachán seo.