(1)

L-Artikoli 168 u 168a tad-Direttiva 2006/112/KE jirregolaw id-dritt li persuni taxxabbli tnaqqas it-taxxa fuq il-valur miżjud (VAT) imposta fuq provvisti ta’ merkanzija u servizzi użati minnhom għall-finijiet tat-tranżazzjonijiet intaxxati tagħhom. L-Artikolu 26(1), il-punt (a), ta’ dik id-Direttiva fih rekwiżit biex tiġi ddikjarata l-VAT meta xi assi kummerċjali jintuża għal finijiet privati ta’ persuni taxxabbli jew tal-persunal tagħhom jew, b’mod aktar ġenerali, għal finijiet oħra għajr dawk marbuta man-negozju tagħhom.

(2)

Id-Deċiżjoni ta’ Implimentazzjoni tal-Kunsill (UE) 2015/2429 (2), kif emendata bid-Deċiżjonijiet ta’ Implimentazzjoni tal-Kunsill (UE) 2018/1921 (3) u (UE) 2021/1968 (4), tawtorizza lil-Latvja biex, sal-31 ta’ Diċembru 2024, tillimita għal 50 % id-dritt għal tnaqqis tal-VAT fuq in-nefqa fuq karozzi tal-passiġġieri li ma jintużawx biss għal finijiet kummerċjali, u tawtorizza lil-Latvja biex ma tittrattax bħala provvisti ta’ servizzi bi ħlas l-użu għal finijiet privati ta’ karozza tal-passiġġieri inkluża fl-assi ta’ negozju ta’ persuna taxxabbli, meta dik il-karozza tkun ġiet soġġetta għal limitazzjoni awtorizzata skont l-Artikolu 1 ta’ dik id-Deċiżjoni (il-“miżura speċjali”).

(3)

B’ittra rreġistrata mal-Kummissjoni fil-15 ta’ Mejju 2024, il-Latvja talbet awtoriżazzjoni, f’konformità mal-Artikolu 395(2), l-ewwel subparagrafu, tad-Direttiva 2006/112/KE, biex tkompli tapplika l-miżura speċjali (it-“talba”).

(4)

F’konformità mal-Artikolu 395(2), it-tieni subparagrafu, tad-Direttiva 2006/112/KE, il-Kummissjoni bagħtet it-talba lill-Istati Membri l-oħra permezz ta’ ittra datata l-10 ta’ Settembru 2024. B’ittra datata l-11 ta’ Settembru 2024, il-Kummissjoni nnotifikat lil-Latvja li kellha l-informazzjoni kollha meħtieġa biex tivvaluta t-talba.

(5)

F’konformità mal-Artikolu 6(2) tad-Deċiżjoni ta’ Implimentazzjoni (UE) 2015/2429, il-Latvja ppreżentat, flimkien mat-talba, rapport li jinkludi rieżami tal-perċentwal stabbilit għal-limitazzjoni tad-dritt għal tnaqqis tal-VAT imsemmi fl-Artikolu 1 ta’ dik id-Deċiżjoni ta’ Implimentazzjoni. Abbażi tal-informazzjoni attwalment disponibbli, jiġifieri l-esperjenza miksuba mill-awditi tat-taxxa u d-data statistika b’rabta mal-użu privat tal-karozzi tal-passiġġieri, il-Latvja ssostni li l-limitu ta’ 50 % għadu ġustifikabbli u jibqa’ xieraq.

(6)

Peress illi l-miżura speċjali kellha impatt pożittiv fir-rigward tal-piż amministrattiv għall-kontribwenti u l-awtoritajiet tat-taxxa billi tissimplifika l-ġbir tal-VAT u tipprevjeni l-evażjoni tat-taxxa meta r-rekords ma jinżammux kif suppost, il-Kummissjoni tqis li huwa xierqa li testendi l-miżura speċjali. Għalhekk, jenħtieġ li l-Latvja tkun awtorizzata tkompli tapplika l-miżura speċjali sal-31 ta’ Diċembru 2027.

(7)

Jenħtiġ li l-miżura speċjali tkun limitata għaż-żmien meħtieġ biex tiġi evalwata l-effettività tagħha u l-adegwatezza tar-rata tal-perċentwal applikat.

(8)

Il-miżura speċjali hija proporzjonata għall-objettivi mixtieqa, jiġifieri, s-simplifikazzjoni tal-proċedura għall-ġbir tal-VAT u l-prevenzjoni ta’ ċerti forom ta’ evażjoni jew evitar tat-taxxa, peress li hija limitata fiż-żmien u fl-ambitu. Barra minn hekk, il-miżura speċjali ma tagħtix lok għal riskju li l-frodi titmexxa lejn setturi oħra jew lejn Stati Membri oħra.

(9)

Fil-każ li l-Latvja tikkunsidra li tkun neċessarja estensjoni tal-miżura speċjali lil hinn mill-2027, jenħtieġ li tippreżenta talba għal tali estensjoni lill-Kummissjoni sal-31 ta’ Marzu 2027. Dik it-talba jenħtieġ li tkun akkompanjata minn rapport dwar l-applikazzjoni tal-miżura speċjali, inkluż il-perċentwal applikat.

(10)

Skont informazzjoni provduta mill-Latvja, il-miżura speċjali ser ikollha biss effett negliġibbli fuq l-ammont kumplessiv tad-dħul mit-taxxa miġbur li l-Latvja tiġbor fl-istadju tal-konsum finali, u mhux ser ikollha effett negattiv fuq ir-riżorsi proprji tal-Unjoni akkumulati mill-VAT.

(11)

Għaldaqstant, jenħtieġ li id-Deċiżjoni ta’ Implimentazzjoni (UE) 2015/2429 tiġi emendata skont dan,