(1)

Is acmhainn thábhachtach é an t-imoibritheoir ardfhlosca in Petten le haghaidh thaighde an Chomhphobail ar eolaíochtaí ábhar, ar thástáil ábhar, ar mhíochaine núicléach agus ar shábháilteacht na n-imoibritheoirí i réimse an fhuinnimh núicléach.

(2)

Tá sraith de chláir thaighde fhorlíontacha ann a thacaigh le hoibriú an imoibritheora ardfhlosca. An clár taighde forlíontach deireanach, a bunaíodh faoi Chinneadh (Euratom) 2020/960 ón gComhairle (1) le haghaidh tréimhse 4 bliana, rachaidh sé in éag an 31 Nollaig 2023.

(3)

Ós rud é go bhfuil tábhacht aige i gcónaí mar bhonneagar nach bhfuil a chomhshamhail le fáil le haghaidh thaighde an Chomhphobail i réimsí an fheabhsúcháin ar shábháilteacht na n-imoibritheoirí núicléacha, na sláinte (lena n-áirítear forbairt iseatóp míochaine le haghaidh taighde leighis), an chomhleá núicléach, an taighde bhunúsaigh, na hoiliúna agus an bhainistithe dramhaíola (lena n-áirítear an fhéidearthacht chun staidéar a dhéanamh ar iompraíocht sábháilteachta na mbreoslaí núicléacha le haghaidh córais imoibritheoirí is díol suime don Eoraip), ba cheart leanúint leis an tacaíocht atá á tabhairt ag an gclár taighde forlíontach don imoibritheoir ardfhlosca go dtí deireadh 2027.

(4)

Mar gheall ar an tsainspéis atá acu in acmhainní ionradaíochta an imoibritheora ardfhlosca, tá cinneadh déanta ag an Nuclear Research and consultancy Group V.O.F (‘NRG’), agus an Commissariat à l’énergie atomique et aux énergies alternatives (‘CEA’), ina gcáil mar ghníomhaithe cur chun feidhme le haghaidh na Fraince agus na hÍsiltíre faoi seach, clár taighde forlíontach 2024-2027 an imoibritheora ardfhlosca a mhaoiniú ina iomláine le ranníocaíochtaí le buiséad ginearálta an Aontais trí mheán ioncam sannta seachtrach.

(5)

Ba cheart oibriú an imoibritheora ardfhlosca a mhaoiniú leis na ranníocaíochtaí sin chun tacú le clár taighde agus le hoibriú agus cothabháil rialta an imoibritheora ardfhlosca. Má thugann an t-oibreoir NRG fógra oifigiúil maidir le dúnadh cinntitheach d’údarás náisiúnta rialála na hÍsiltíre sula ndéantar staid chaomhnaithe shábháilte a dhearbhú, ba cheart íocaíochtaí atá fós le déanamh agus aon ghlao ar chistí ón gCoimisiún a chur ar fionraí dá bharr.

(6)

Chun leanúnachas a áirithiú idir na cláir thaighde fhorlíontacha agus oibriú rianúil chlár taighde forlíontach 2024-2027 an imoibritheora ardfhlosca, ba cheart feidhm a bheith ag an gCinneadh seo go cúlghabhálach ón 1 Eanáir 2024.

(7)

Thug Bord Gobharnóirí an Airmheáin Chomhpháirtigh Taighde a thuairim uaidh roimh ré (2) de bhun Airteagal 4(2) de Chinneadh 96/282/Euratom ón gCoimisiún (3),