Iris Oifigiúil
an Aontais Eorpaigh
GA
Sraith L
|
|
Iris Oifigiúil |
GA Sraith L |
|
2024/2893 |
15.11.2024 |
CINNEADH CUR CHUN FEIDHME (AE) 2024/2893 ÓN gCOIMISIÚN
an 12 Samhain 2024
lena bhformheastar leasuithe ar phlean náisiúnta na Gréige um chur chun feidhme an chórais bailíochtaithe i gcomhréir le Rialachán (CE) Uimh. 1224/2009 ón gComhairle
(tugadh fógra faoi leis an doiciméad C(2024) 7905)
(Is é an téacs Gréigise amháin atá barántúil)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (CE) Uimh. 1224/2009 ón gComhairle an 20 Samhain 2009 lena mbunaítear córas rialaithe de chuid an Aontais chun comhlíonadh rialacha an chomhbheartais iascaigh a áirithiú, lena leasaítear Rialacháin (CE) Uimh. 847/96, (CE) Uimh. 2371/2002, (CE) Uimh. 811/2004, (CE) Uimh. 768/2005, (CE) Uimh. 2115/2005, (CE) Uimh. 2166/2005, (CE) Uimh. 388/2006, (CE) Uimh. 509/2007, (CE) Uimh. 676/2007, (CE) Uimh. 1098/2007, (CE) Uimh. 1300/2008, (CE) Uimh. 1342/2008 agus lena n-aisghairtear Rialacháin (CEE) Uimh. 2847/93, (CE) Uimh. 1627/94 agus (CE) Uimh. 1966/2006 (1), agus go háirithe Airteagal 109(8) de,
Ag féachaint do thíolacadh na leasuithe ar an bplean náisiúnta um chur chun feidhme an chórais bailíochtaithe ag an nGréig,
De bharr an mhéid seo a leanas:
|
(1) |
De bhun Airteagal 109(8) de Rialachán (CE) Uimh. 1224/2009, tá na Ballstáit le pleananna náisiúnta um chur chun feidhme na gcóras bailíochtaithe a bhunú i ndáil le sonraí a thaifeadtar i gcomhréir leis an Rialachán sin, ionas gur féidir leis na Ballstáit tosaíochtaí a shocrú i dtaca le bailíochtú agus cros-seiceálacha agus i dtaca le hobair leantach ina dhiaidh sin maidir le neamhréireachtaí bunaithe ar bhainistiú riosca. Leasuithe a dhéanfar ar na pleananna sin, táthar lena gcur faoi bhráid an Choimisiúin lena bhformheas. |
|
(2) |
An 19 Iúil 2024, chuir an Ghréig faoi bhráid an Choimisiúin, lena bhformheas, leasuithe ar a plean náisiúnta a bhí ann cheana féin, plean a formheasadh le Cinneadh Cur Chun Feidhme (AE) 2015/2277 ón gCoimisiún (2). Comhlíonann na leasuithe sin na coinníollacha a leagtar síos in Airteagal 109 de Rialachán (CE) Uimh. 1224/2009 agus in Airteagail 143 go 145 de Rialachán Cur Chun Feidhme (AE) Uimh. 404/2011 ón gCoimisiún (3). Dá bhrí sin, ba cheart iad a fhormheas. |
|
(3) |
Is éard atá sa Chinneadh seo an cinneadh formheasa de réir bhrí Airteagal 109(8) de Rialachán (CE) Uimh. 1224/2009. |
|
(4) |
Déanfaidh an Coimisiún faireachán ar chur i bhfeidhm na bpleananna náisiúnta maidir lena n-oibriú éifeachtach. Má léiríonn torthaí na bhfíoruithe, na n-iniúchtaí agus na gcigireachtaí arna ndéanamh ag an gCoimisiún faoi chuimsiú Theideal X de Rialachán (CE) Uimh. 1224/2009 nach bhfuil sé d’acmhainn ag an bplean a áirithiú, i dtaca le sonraí a thuairiscítear chuig an gCoimisiún i gcomhréir le hAirteagal 33 de Rialachán (CE) Uimh. 1224/2009, go bhfuil na sonraí sin iomlán, cruinn agus go dtuairiscítear iad laistigh de na sprioc-amanna is infheidhme, féadfaidh an Coimisiún a iarraidh ar an mBallstát a phlean a leasú dá réir sin, |
TAR ÉIS AN CINNEADH SEO A GHLACADH:
Airteagal 1
Formheastar na leasuithe ar an bplean náisiúnta um chur chun feidhme an chórais bailíochtaithe a thíolaic an Ghréig an 19 Iúil 2024, i gcomhréir le hAirteagal 109(8) de Rialachán (CE) Uimh. 1224/2009.
Airteagal 2
Más rud é, ar bhonn thorthaí na bhfíoruithe, na n-iniúchtaí agus na gcigireachtaí arna ndéanamh faoi chuimsiú Theideal X de Rialachán (CE) Uimh. 1224/2009, go measfaidh an Coimisiún nach n-áirithítear leis an bplean bailíochtaithe arna fhormheas i gcomhréir le hAirteagal 1 go gcuirfidh an Ballstát chun feidhme go héifeachtach na hoibleagáidí a leagtar síos in Airteagal 109 de Rialachán (CE) Uimh. 1224/2009; féadfaidh sé, tar éis dul i gcomhairle leis an mBallstát lena mbaineann, a iarraidh go leasófar an plean. Leasóidh an Ballstát a phlean bailíochtaithe i gcomhréir leis an iarraidh sin.
Airteagal 3
Is chuig an bPoblacht Heilléanach a dhírítear an Cinneadh seo.
Arna dhéanamh sa Bhruiséil, an 12 Samhain 2024.
Thar ceann an Choimisiúin
Maroš ŠEFČOVIČ
Leas-Uachtarán Feidhmiúcháin
(1) IO L 343, 22.12.2009, lch. 1.
(2) Cinneadh Cur Chun Feidhme 2015/2277/AE ón gCoimisiún an 2 Nollaig 2015 maidir le formheas an Choimisiúin ar phleananna náisiúnta um chur chun feidhme na gcóras bailíochtaithe i gcomhréir le hAirteagal 109(8) de Rialachán (CE) Uimh. 1224/2009 ón gComhairle (IO L 322, 8.12.2015, lch. 53).
(3) Rialachán Cur Chun Feidhme (AE) Uimh. 404/2011 ón gCoimisiún an 8 Aibreán 2011 lena leagtar síos rialacha mionsonraithe maidir le cur chun feidhme Rialachán (CE) Uimh. 1224/2009 ón gComhairle lena mbunaítear córas rialaithe Comhphobail chun comhlíonadh rialacha an Chomhbheartais Iascaigh a áirithiú (IO L 112, 30.4.2011, lch. 1).
ELI: http://data.europa.eu/eli/dec_impl/2024/2893/oj
ISSN 1977-0839 (electronic edition)