SENTENZA TAL-QORTI TAL-ĠUSTIZZJA (Id-Disa’ Awla)

15 ta’ Ottubru 2020 ( *1 )

“Rinviju għal deċiżjoni preliminari – Unjoni doganali – Regolament ta’ implimentazzjoni (UE) Nru 999/2014 – Dazju antidumping definittiv fuq l-importazzjonijiet ta’ fertilizzanti solidi b’kontenut ta’ nitrat tal-ammonju li jeċċedi 80 % tal-piż – Definizzjoni – Regolament (KE) Nru 945/2005 – Determinazzjoni tal-kontenut ta’ nitrat tal-ammonju – Preżunzjoni li skontha prodott b’kontenut ta’ nitroġenu li jeċċedi 28 % tal-piż fih kontenut ta’ nitrat tal-ammonju li jeċċedi 80 % tal-piż”

Fil-Kawża C‑117/19,

li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Mokestinių ginčų komisija prie Lietuvos Respublikos Vyriausybės (il-Kumitat tal-Kawżi Fiskali fi ħdan il-Gvern tar-Repubblika tal-Litwanja), permezz ta’ deċiżjoni tat‑8 ta’ Frar 2019, li waslet fil-Qorti tal-Ġustizzja fil‑15 ta’ Frar 2019, fil-proċedura

“Linas Agro” AB

vs

Muitinės departamentas prie Lietuvos Respublikos finansų ministerijos,

IL-QORTI TAL-ĠUSTIZZJA (Id-Disa’ Awla),

komposta minn N. Piçarra, President tal-Awla, S. Rodin, K. Jürimäe (Relatur) u, Imħallfin,

Avukat Ġenerali: G. Pitruzzella,

Reġistratur: A. Calot Escobar,

wara li rat il-proċedura bil-miktub,

wara li kkunsidrat l-osservazzjonijiet ippreżentati:

–

għal “Linas Agro” AB, minn M. Juozaitis, E. Lenkauskas u V. Mitrauskas, advokatai,

–

għall-Gvern Litwan, minn K. Dieninis, G. Taluntytė u R. Butvydytė, bħala aġenti,

–

għall-Kummissjoni Ewropea, minn S. L. Kalėda u N. Kuplewatzky, bħala aġenti,

wara li rat id-deċiżjoni, meħuda wara li nstema’ l-Avukat Ġenerali, li l-kawża tinqata’ mingħajr konklużjonijiet,

tagħti l-preżenti

Sentenza

1

It-talba għal deċiżjoni preliminari tirrigwarda l-interpretazzjoni tar-Regolament tal-Kunsill (KE) Nru 945/2005 tal-21 ta’ Ġunju 2005 li jemenda r-Regolament (KE) Nru 658/2002 li jimponi dazju anti-dumping definittiv fuq importazzjoni tan-nitrat ta’ l-ammonju li joriġina mir-Russja u r-Regolament (KE) Nru 132/2001 li jimponi dazju anti-dumping definittiv fuq importazzjoni tan-nitrat ta’ l-ammonju li joriġina, inter alia, mill-Ukraina, wara r-reviżjoni interim parzjali skond l-Artikolu 11(3) tar-Regolament (KE) Nru 384/96 (ĠU L 164M, 16.6.2006, p. 195).

2

Din it-talba tressqet fil-kuntest ta’ kawża bejn “Linas Agro” AB u l-Muitinės departamentas prie Lietuvos Respublikos finansų ministerijos (id-Dipartiment tad-Dwana fi ħdan il-Ministeru tal-Finanzi, il-Litwanja) (iktar ’il quddiem l-“amministrazzjoni fiskali ċentrali”) dwar il-ħlas ta’ dazji antidumping definittivi relatati ma’ importazzjonijiet ta’ fertilizzanti abbażi ta’ nitrat tal-ammonju.

Il-kuntest ġuridiku

Ir-Regolament bażiku

3

Peress li l-importazzjonijiet inkwistjoni fil-kawża prinċipali seħħew matul il-perijodu ta’ bejn l-1 ta’ Jannar 2016 u l-31 ta’ Diċembru 2017, dawn ġew suċċessivament suġġetti għar-Regolament tal-Kunsill (KE) Nru 1225/2009, tat-30 ta’ Novembru 2009, dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Komunità Ewropea (ĠU 2009, L 343, p. 51), u sussegwentement għar-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Komunità Ewropea (ĠU 2016, L 176, p. 21) (iktar ’il quddiem ir-“regolamenti bażiċi”). Madankollu, sa fejn id-dispożizzjonijiet rilevanti ta’ dawn ir-regolamenti ma ġewx emendati b’mod sostanzjali, huma biss id-dispożizzjonijiet rilevanti tar-Regolament 2016/1036 li ser jiġu riprodotti.

4

L-Artikolu 11 tar-Regolament 2016/1036, intitolat “Durata, reviżjonijiet u rifużjonijiet”, jipprovdi, fil-paragrafi 1 sa 3 tiegħu:

“1.   Miżura kontra d-dumping għandha tibqa’ fis-seħħ biss sa meta, u sa fejn, ikun meħtieġ li jiġi oppost d-dumping li jkun qiegħed jikkawża dannu.

2.   Miżura anti-dumping definittiva għandha tiskadi ħames snin mill-impożizzjoni tagħha jew ħames snin mid-data tal-konklużjoni tal-iktar reviżjoni riċenti li tkun kopriet kemm id-dumping kif ukoll id-dannu, sakemm ma jiġix determinat f’reviżjoni li tal-iskadenza probabbilment twassal għal kontinwazzjoni jew rikorrenza ta’ dumping u dannu. Tali reviżjoni ta’ skadenza għandha tinbeda fuq l-inizjattiva tal-Kummissjoni, jew fuq talba magħmula minn, jew għan-nom ta’, produtturi tal-Unjoni, u l-miżura għandha tibqa’ fis-seħħ sa meta jibqa’ pendenti r-riżultat ta’ dik ir-reviżjoni.

Reviżjoni ta’ skadenza għandha tinbeda fejn it-talba tinkludi evidenza suffiċjenti li l-iskadenza tal-miżuri probabbilment tirriżulta f’kontinwazzjoni jew rikorrenza ta’ dumping u dannu. Tali probabbiltà tista’, per eżempju, tiġi indikata b’evidenza ta’ dumping u dannu kontinwati jew evidenza li l-eliminazzjoni tad-dannu hija parzjali jew ikkawżata biss mill-eżistenza ta’ miżuri jew evidenza li ċ-ċirkustanzi tal-esportaturi, jew il-kondizzjonijiet tas-suq, huma tali li jindikaw il-probabbilità ta’ aktar dumping b’dannu.

Fit-twettiq tal-investigazzjonijiet taħt dan il-paragrafu, l-esportaturi, l-importaturi, ir-rappreżentanti tal-pajjiż ta’ esportazzjoni u l-produtturi tal-Unjoni għandhom jiġu mogħtija l-opportunità li jamplifikaw, jikkontestaw jew jikkummentaw dwar il-materji stabbiliti fit-talba tar-reviżjoni, u l-konklużjonijiet li jsiru għandhom jieħdu debitament kont tal-evidenza kollha li tkun rilevanti u debitament dokumentata, ippreżentata fir-rigward tal-kwistjoni jekk l-iskadenza tal-miżuri probabbilment twassalx, jew le, għall-kontinwazzjoni jew ir-rikorrenza ta’ dumping u tal-dannu.

Għandha tiġi ppubblikata notifika tal-iskadenza viċina f’Il-Ġurnal Uffiċjali tal-Unjoni Ewropea f’mument adatt fis-sena finali tal-perjodu ta’ applikazzjoni tal-miżuri finali kif definiti f’dan il-paragrafu. Sussegwentement, il-produtturi tal-Unjoni għandhom, mhux iktar tard minn tliet xhur qabel l-aħħar tal-perjodu ta’ ħames snin, ikunu intitolati li jagħmlu talba ta’ reviżjoni skont it-tieni sub-paragrafu. Għandha wkoll tiġi ppublikata notifika li tħabbar l-iskadenza attwali tal-miżuri skont dan il-paragrafu.

3.   Il-ħtieġa tal-kontinwazzjoni tal-impożizzjoni ta’ miżuri tista’ tiġi riveduta wkoll, fejn dan ikun kunsiljabbli, fuq l-inizjattiva tal-Kummissjoni jew fuq it-talba ta’ Stat Membru jew, sakemm ikun għadda perjodu raġonevoli ta’ mill-inqas sena mill-impożizzjoni tal-miżura definittiva, fuq talba minn kwalunkwe esportatur jew importatur jew mill-produtturi tal-Unjoni li tinkludi biżżejjed evidenza li tissostanzja l-ħtieġa ta’ tali reviżjoni interim.

Għandha tinbeda reviżjoni interim fejn it-talba tinkludi evidenza biżżejjed li l-impożizzjoni kontinwata tal-miżura ma għadhiex aktar neċessarja biex tikkumpensa għad-dumping u/jew li d-dannu probabbilment ma jitkompliex jew ma jerġax jokkorri kieku l-miżura kellha titneħħa jew tiġi varjata, jew li l-miżura eżistenti mhijiex, jew ma għadhiex iktar, biżżejjed sabiex tirribatti d-dumping li jkun qiegħed jikkawża dannu.

Fit-twettiq tal-investigazzjonijiet skont dan il-paragrafu, il-Kummissjoni tista’, inter alia, tikkunsidra jekk iċ-ċirkustanzi fir-rigward tad-dumping u d-dannu, tbiddlux b’mod sinifikanti, jew jekk il-miżuri eżistenti ikunux qegħdin jilħqu r-riżultati maħsuba fl-eliminazzjoni tad-dannu preċedentement determinat taħt l-Artikolu 3. F’dak ir-rigward, għandu jittieħed kont, fid-determinazzjoni finali, tal-evidenza kollha li tkun rilevanti u debitament dokumentata.”

5

L-Artikolu 13 ta’ dan ir-regolament, intitolat “Evażjoni”, jipprovdi, fl-ewwel sat-tielet subparagrafu tal-paragrafu 1 tiegħu:

“Id-dazji kontra d-dumping imposti skont dan ir-Regolament jistgħu jiġu estiżi għal importazzjonijiet minn pajjiżi terzi ta’ prodotti simili, kemm jekk ftit modifikati kif ukoll jekk le, jew għal importazzjonijiet tal-prodott simili ftit modifikat mill-pajjiż soġġett għal miżuri, jew għal partijiet minnhom, meta tkun qiegħda ssir evażjoni mill-miżuri fis-seħħ.

Id-dazji kontra d-dumping li ma jeċċedux d-dazju anti-dumping residwu impost skont l-Artikolu 9(5) jistgħu jiġu estiżi għal importazzjonijiet minn kumpanniji li jibbenefikaw minn dazji individwali fil-pajjiżi li huma soġġetti għal miżuri meta tkun qiegħda ssir evażjoni mill-miżuri fis-seħħ.

L-evażjoni hija definita bħala bidla fix-xejra tal-kummerċ bejn pajjiżi terzi u l-Unjoni jew bejn kumpanniji individwali fil-pajjiż soġġett għall-miżuri u l-Unjoni, li tinħoloq minn prattika, proċess jew ħidma li għalihom ma jkunx hemm, kif dovut, raġuni jew ġustifikazzjoni ekonomika suffiċjenti ħlief l-impożizzjoni tad-dazju, u fejn ikun hemm evidenza ta’ dannu jew li l-effetti rimedjali tad-dazju jkunu imminati fir-rigward tal-prezzijiet u/jew il-kwantitajiet tal-prodott simili, u fejn ikun hemm evidenza ta’ dumping relattivament għall-valuri normali stabbiliti preċedentement għall-prodott simili, jekk ikun neċessarju skont id-dispożizzjonijiet tal-Artikolu 2.”

6

L-Artikolu 14 tal-imsemmi Regolament 2016/1036, intitolat “Dispożizzjonijiet ġenerali”, jipprevedi, fl-ewwel sentenza tal-ewwel subparagrafu tal-paragrafu 1 tiegħu:

“Għandhom jiġu imposti dazji anti-dumping provviżorji jew definittivi permezz ta’ regolament, u miġbura mill-Istati Membri, fil-forma, u r-rata speċifikata u skont il-kriterji l-oħrajn stabbiliti fir-regolament li jimponi tali dazji. […]”

Ir-Regolament ta’ Implimentazzjoni (UE) Nru 999/2014

7

Il-premessi 1, 2 u 44 sa 48 tar-Regolament ta’ Implimentazzjoni tal-Kummissjoni (UE) Nru 999/2014 tat-23 ta’ Settembru 2014 li jimponi dazju antidumping definittiv fuq l-importazzjonijiet tan-nitrat tal-ammonju li joriġinaw mir-Russja wara rieżami ta’ skadenza skont l-Artikolu 11(2) tar-Regolament tal-Kunsill (KE) Nru 1225/2009 (ĠU 2014, L 280, p. 19) huma redatti kif ġej:

“(1)

Permezz tar-Regolament (KE) Nru 2022/95 [tal-Kunsill, tas‑16 ta’ Awwissu 1995, li jistabbilixxi dazju antidumping definittiv fuq l-importazzjonijiet ta’ nitrat tal-ammonju li joriġinaw mir-Russja (ĠU 1995, L 198, p. 1)], il-Kunsill impona dazju antidumping definittiv fuq l-importazzjonijiet ta’ nitrat tal-ammonju li attwalment jaqgħu taħt il-kodiċi NM 31023090 u 31024090 u li joriġinaw mir-Russja. Skont investigazzjoni ulterjuri, li stabbilixxiet li d-dazju kien qed jiġi assorbit, il-miżuri kienu emendati bir-Regolament (KE) Nru 663/98 [tal-Kunsill, tat‑23 ta’ Marzu 1998, li jemenda r-Regolament Nru 2022/95 (ĠU 1998, L 93, p. 1)]. Wara l-ewwel rieżami ta’ skadenza u l-ewwel rieżami interim skont l-Artikoli 11(2) u 11(3) tar[-Regolament Nru 1225/2009], il-Kunsill, permezz tar-Regolament (KE) Nru 658/2002 [tal-15 ta’ April 2002 li jimponi dazju definittiv anti-dumping fuq importazzjonijiet ta’ nitrat ta’ ammonju li joriġina fir-Russja (ĠU Edizzjoni Speċjali bil-Malti, Kapitolu 11, Vol. 41, p. 67)], impona dazju definittiv antidumping ta’ EUR 47,07 għal kull tunnellata fuq importazzjonijiet ta’ nitrat tal-ammonju li jaqgħu taħt il-kodiċi NM 31023090 u 31024090 u li joriġinaw mir-Russja. Sussegwentement, sar rieżami interim tal-ambitu tal-prodott skont l-Artikolu 11(3) tar-Regolament [Nru 1225/2009] u, permezz tar-Regolament [Nru 945/2005], dazju definittiv antidumping li jvarja bejn EUR 41,42 għal kull tunnellata u EUR 47,07 għal kull tunellata kien impost fuq l-importazzjonijiet ta’ fertilizzanti solidi li joriġinaw mir-Russja b’kontenut ta’ nitrat tal-ammonju li jeċċedi 80 % tal-piż, li attwalment jaqgħu taħt il-kodiċi NM 31023090, 31024090, ex31022900, ex31026000, ex31029000, ex31051000, ex31052010, ex31055100, ex31055900 u ex31059020.

(2)

Wara t-tieni rieżami ta’ skadenza [tal-miżuri] u t-tieni rieżami interim parzjali skont l-Artikoli 11(2) u (3) tar-Regolament [Nru 1225/2009], il-Kunsill, permezz tar-Regolament (KE) Nru 661/2008 [tat-8 ta’ Lulju 2008 li jimponi dazju definittiv antidumping fuq importazzjonijiet ta’ nitrat ta’ l-ammonju li joriġinaw mir-Russja wara verifika ta’ skadenza skond l-Artikolu 11(2) u reviżjoni interim parzjali skond l-Artikolu 11(3) tar-Regolament tal-Kunsill (KE) Nru 384/96 (ĠU L 185, 12.7.2008, p. 1), żamm il-miżuri fis-seħħ. […]

[…]

(44)

Il-prodott ikkonċernat minn dan ir-rieżami huwa l-istess bħall-prodott definit fir-Regolament [Nru 661/2008], jiġifieri fertilizzanti solidi b’kontenut ta’ nitrat tal-ammonju li jaqbeż it-80 % bil-piż, li attwalment jaqgħu taħt il-kodiċi NM 31023090, 31024090, ex31022900, ex31026000, ex31029000, ex31051000, ex31052010, ex31055100, ex31055900 u ex31059020 u li joriġinaw mir-Russja (minn hawn ’il quddiem “AN” jew “il-prodott ikkonċernat”). […]

(45)

Il-materja prima ewlenija użata fil-produzzjoni tal-AN huwa gass, li jammonta għal 70 % sa 80 % tal-ispejjeż totali tal-produzzjoni. L-estensjoni tal-ambitu tal-prodott fl-2005 kellha l-għan li tkopri wkoll nitrat tal-ammonju li miegħu żdied il-fosforu u/jew nutrijenti tal-potassju, billi nstab li dawn it-taħlitiet kellhom essenzjalment l-istess karatteristiċi fiżiċi u kimiċi bażiċi u l-istess proprjetajiet agronomiċi.

(46)

Għandu jiġi nnutat li l-kodiċi NM 31023090 u 31024090 (rispettivament, “nitrat tal-ammonju għajr f’soluzzjonijiet fl-ilma” u “taħlitiet ta’ nitrat tal-ammonju mal-karbunat tal-kalċju jew sustanzi oħra inorganiċi mhux fertilizzanti, b’kontenut ta’ nitroġenu li jaqbeż it-28 % fil-piż”) jistgħu jinkludu AN użat għal skopijiet industrijali (bħal produzzjoni ta’ splussivi) kif ukoll użat għal skopijiet agrikoli. Iż-żewġ tipi għandhom l-istess karatteristiċi kimiċi u tekniċi, li jistgħu faċilment ikunu interkambjabbli u huma kkunsidrati bħala l-prodott ikkonċernat.

(47)

Wara d-divulgazzjoni, ir-rappreżentanti tal-awtoritajiet Russi sostnew li l-estensjoni tal-ambitu tal-prodott li saret fl-2005 hija inkonsistenti mal-Ftehim Antidumping ta[l-Organizzazzjoni Dinjija tal-Kummerċ (WTO)] minħabba li ma setgħet saret l-ebda determinazzjoni ta’ dumping, ħsara u rabta kawżali fir-rigward tal-prodotti addizzjonali koperti mill-estensjoni tal-2005.

(48)

Dan l-ilment huwa infondat għar-raġunijiet diġà msemmija fil-premessa 22 u għalhekk hu miċħud.”

8

Skont l-Artikolu 1(1) ta’ dan ir-regolament ta’ implimentazzjoni, “[d]azju antidumping definittiv hawnhekk huwa impost fuq l-importazzjoni ta’ fertilizzanti solidi b’kontenut tan-nitrat tal-ammonju li jaqbeż it-80 % fil-piż, li bħalissa jaqgħu taħt il-kodiċi NM […] ex31052010 […] u li joriġinaw mir-Russja.”

9

Skont l-Artikolu 1(2)(ċ) tal-imsemmi regolament ta’ implimentazzjoni, l-ammont fiss tad-dazju (f’ewro għal kull tunnellata) għall-oġġetti kollha prodotti mill-impriżi l-oħra minbarra dawk imsemmija fl-Artikolu 1(2)(a) u (b) (kodiċi addizzjonali TARIC A999) jammonta għal EUR 42.83 għal kull tunnellata għall-fertilizzanti solidi b’kontenut ta’ nitrat tal-ammonju li jeċċedi 80 % tal-piż, u b’kontenut ta’ fosfru evalwat bħal P2O5 u/jew kontenut ta’ potassju evalwat bħal K2O ta’ 6 % tal-piż jew iktar, iżda ta’ inqas minn 9 % tal-piż (kodiċi NC 31052010, kodiċi TARIC 50).

Ir-Regolament Nru 945/2005

10

Il-premessi 4, 6, 7, 16, 20 sa 23, 28, 35 u 37 tar-Regolament Nru 945/2005 jipprevedu:

“(4)

Fil-15 ta’ Marzu 2004, il-Kummissjoni rċeviet talba in segwitu għall-Artikolu 11(3) tar-[Regolament tal-Kunsill (KE) Nru 384/96 tat-22 ta’ Diċembru 1995 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Komunità Ewropea (ĠU Edizzjoni Speċjali bil-Malti, Kapitolu 11, Vol. 10, p. 45)], biex teżamina l-firxa ta’ applikazzjoni ta’ miżuri eżistenti bil-għan li tinkludi tipi ġodda tal-prodott.

[…]

(6)

It-talba għamlet referenza għal tipi ġodda tal-prodott iddefiniti bħala fertilizzanti tan-nitrat ta’ l-ammonju li għandhom kontenut ta’ Nitroġenu (‘N’) ta’ aktar minn 28 % sa massimu ta’ 33 % fil-piż, li magħhom ġew miżjuda, magħġuna, imħallta jew ipproċessati 5 % ta’ l-ekwivalenti tal-P2O5 (nutrijent tal-fosforu ‘P’), u/jew sa 5 % (inklużiv) ta’ ekwivalenti tal-K2O (nutrijent tal-Potassju ‘K’). Minn hawn ’il quddiem dawn il-prodotti jissejħu ‘tipi ġodda tal-prodott imsemmija fit-talba’.

(7)

Ġie argumentat li t-tipi ġodda tal-prodott imsemmija f’din it-talba kellhom essenzjalment l-istess karatteristiċi fiżiċi u kimiċi bażiċi bħall-prodott ikkonċernat u kienu mibjugħa mill-istess sors ta’ bejgħ lill-istess utenti għall-istess finijiet. Apparti dan, issemma’ li t-tipi ġodda tal-prodott, meta importati fil-Komunità, kienu elenkati taħt il-kodiċi NM li ġejjin: 31051000, 31052010, 31052090, 31055100, 31055900 u 31059091.

[…]

B. PRODOTT IKKONĊERNAT LI JAQA’ TAĦT IR-REGOLAMENTI ORIĠINALI

(16)

Il-prodott ikkonċernat huwa n-nitrat ta’ l-ammonju li joriġina mir-Russja u l-Ukraina, li jaqa’ taħt il-kodiċi NM 31023090 (nitrat ta’ l-ammonju għajr f’soluzzjonijiet fl-ilma u sustanzi inorganiċi oħra mhux fertilizzanti, b’kontenut ta’ N li jaqbeż it-28 % fil-piż). In-nitrat ta’ l-ammonju huwa fertilizzant solidu tan-nitroġenu użat ta’ spiss fl-agrikoltura. Huwa mmanifiatturat mill-ammonja u aċidu nitriku, u l-kontenut ta’ N tiegħu jaqbeż it-28 % fil-piż fil-forma tonda jew granulari.

[…]

Ċ. IR-RIŻULTATI TA’ L-INVESTIGAZZJONI

[…]

1. Karatteristiċi kimiċi u fiżiċi u użu finali tal-prodott ikkonċernat u tat-tipi ġodda tal-prodott imsemmija fit-talba

(20)

Il-prodott ikkonċernat huwa magħmul minn ammonja (NH3) u aċidu ċitriku (HNO3), li t-taħlita tagħhom toħloq in-nitrat ta’ l-ammonju (NH4NO3, minn hawn ‘il quddiem ‘AN’). Il-kontenut N tal-prodott ikkonċernat jaqbeż it-28 % fil-piż (normalment ivarja bejn 33 % u 34 %). Il-proporzjon (ratio) bejn il-kontenut AN u kontenut N, li jiddependi fuq il-piż atomiku ta’ l-elementi, huwa ta’ 2.86. Konsegwentement, peress li l-prodott ikkonċernat kellu aktar minn 28 % f’termini ta’ piż ta’ N, hu kellu awtomatikament aktar minn 80 % f’termini ta’ piż ta’ AN (li huma normalment bejn 94 % u 97 %). Kif intqal fil-premessa 17, il-prodott ikkonċernat ukoll jinkorpora sustanzi marġinali u/jew nutrijenti, li l-kontenut totali tagħhom ma jista’ qatt jaqbeż l-20 % f’termini ta’ piż, bil-kondizzjoni li ta’ l-inqas 80 % tal-prodott ikkonċernat hu rrapreżentat mill-AN.

(21)

Żewġ fatturi ewlenin jikkaratterizzaw il-kompożizzjoni kimika tal-prodott ikkonċernat: l-espressjoni tal-kontenut N u l-livell totali tal-kontenut N u AN. N huwa espress bħala nitroġenu nitriku (jone (ion) tan-nitrat NO3-) u bħala nitroġenu ammonijaku (jone (ion) ta’ l-ammonju NH4+), u l-proporzjon bejn it-tnejn huwa 1:1. Il-livell tal-kontenut N dejjem jaqbeż it‑28 % fil-piż u, bħala riżultat, kif deher hawn fuq, il-livell ta’ AN dejjem jaqbeż it‑80 % fil-piż.

(22)

Fir-rigward tat-tipi ġodda tal-prodott imsemmija fit-talba, instab li dawn kienu wkoll manifatturati mill-ammonja u l-aċidu nitriku, il-kontenut N qabeż it-28 % fil-piż u, bħala riżultat, il-kontenut AN qabeż it-80 % fil-piż. Apparti AN, dawn it-tipi l-ġodda ta’ prodott setgħu wkoll inkorporaw sustanzi marġinali u/jew nutrijenti. F’dawn il-prodotti N kien espress ukoll bħala nitroġenu nitriku u nitroġenu ammonijakali u l-proporzjon bejn it-tnejn kien approssimament ta’ 1:1 ukoll.

(23)

Madankollu, it-tipi ġodda tal-prodott imsemmija fit-talba għaddew minn proċess ulterjuri bil-għan li apparti N jiżdiedu nutrijenti primarji […] oħra magħhom i.e. P u/jew K, li l-preżenza tagħhom bidlet il-prodott ġo fertilizzant kompost […]. Dan il-fertilizzant kompost jista’ jinkiseb kimikament jew permezz ta’ taħlit. Minkejja din iż-żjieda ta’ nutrijenti primarji oħra u indipendentement mit-tip ta’ trasformazzjoni (kimika jew permezz ta’ taħlit), instab li dan il-proċess ma affettwa ebda fattur kimiku prinċipali tal-kontenut AN li jinsab fih, jiġifieri l-espressjoni tal-kontenut N u l-livell totali ta’ N u AN, li qabeż, rispettivament, it‑28 % u t‑80 % fil-piż.

[…]

(28)

Għalhekk kien konkluż li, minn perspettiva kimika u fiżika/agronomika, it-tipi ġodda tal-prodott imsemmija fit-talba ma setgħux jiġu kkunsidrati bħall-prodott ikkonċernat minħabba l-preżenza ta’ nutrijenti primarji apparti n-Nitroġenu, speċifikament P u/jew K. Madankollu, il-prodott ikkonċernat u t-tipi ġodda tal-prodott imsemmija fit-talba kienu identiċi fir-rigward tal-kontenut AN tagħhom - sakemm jaqbeż it-80 % fil-piż -, is-sustanzi marġinali u n-nutrijenti li seta’ kien fihom, kif ukoll l-użu finali bażiku tagħhom. Għalhekk, il-kontenut AN u s-sustanzi marġinali u n-nutrijenti tat-tipi ġodda tal-prodott imsemmija fit-talba għandhom ikunu kkunsidrati wkoll bħala l-prodott ikkonċernat.

[…]

3. Konklużjonijiet

(35)

Fid-dawl tas-sejbiet ta’ hawn fuq, huwa konkluż li t-tipi ġodda tal-prodott kollha għandhom jitqiesu bħala l-prodott ikkonċernat b’mod esklussiv fir-rigward tal-kontenut tagħhom ta’ AN - sakemm dan ma jaqbiżx it-80 % fil-piż - flimkien mas-sostanzi u n-nutrijenti marġinali, iżda mhux fejn jidħlu n-nutrijenti primarji P u K. Bħala riżultat, sabiex jiġu applikati biss il-miżuri eżistenti għal prodott ikkonċernat li huwa inkorporat fit-tipi ġodda tal-prodott kollha, l-applikazzjoni b’mod proporzjonali tal-miżuri eżistenti tidher li hija garantita.

[…]

(37)

Fl-aħħar nett, huwa konkluż li d-deskrizzjoni tal-prodott ikkonċernat mogħtija fil-parti operativa tar-Regolamenti oriġinali teħtieġ li tiġi ċċarata: il-kliem ‘nitrat ta’ l-ammonju’ għandu jinbidel b’ ‘fertilizzanti b’kontenut ta’ nitrat ta’ l-ammonju li jaqbeż it-80 % fil-piż’, sabiex jirrikonoxxi li bosta fertilizzanti għandhom kontenut ta’ AN li jaqbeż it-80 % fil-piż, u għandhom kontenut N espress bħala nitroġenu nitriku u nitroġenu ammonijaku li jaqbeż it-28 % fil-piż, u sabiex tiġi evitata konfużjoni bejn il-prodott ikkonċernat u l-kontenut ewlieni tiegħu (AN).”

11

Taħt il-premessa 20 ta’ dan ir-regolament tinsab in-nota ta’ qiegħ il-paġna li ġejja:

“Il-piż atomiku ta’ N huwa 14.0067, ta’ H – idroġenu – huwa 1.00794 u ta’ l-O – ossiġnu – 15.9994. Il-piż totali ta’ AN għalhekk huwa ta’ 80.04, li minnu 28.01 huwa rrapreżentat minn N. Il-proporzjon bejn AN u N huwa ta’ 2.86.”

12

L-Artikolu 1(1) tal-imsemmi regolament jipprovdi:

“L-Artikolu 1(1) tar-Regolament (KE) Nru 658/2002 għandu jinbidel b’dan li ġej:

‘1.   Dazju anti-dumping definittiv huwa hawnhekk impost fuq l-importazzjoni ta’ fertilizzanti solidi b’kontenut tan-nitrat ta’ l-ammonju li jaqbeż it-80 % fil-piż, li jaqgħu taħt il-kodiċi NM […] ex31052010, […]u li joriġinaw mir-Russja.’”

In-Nomenklatura Magħquda

13

In-Nomenklatura Magħquda (iktar ’il quddiem in-“NM”) tinsab fl-Anness I tar-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), kif emendat suċċessivament, fir-rigward tal-perijodu inkwistjoni fil-kawża prinċipali, bir-Regolament ta’ Implimentazzjoni tal-Kummissjoni (UE) 2015/1754 tas-6 ta’ Ottubru 2015 (ĠU 2015, L 285, p. 1), u bir-Regolament ta’ Implimentazzjoni tal-Kummissjoni (UE) 2016/1821 tas-6 ta’ Ottubru 2016 (ĠU 2016, L 294, p. 1).

14

It-Taqsima VI, intitolata “Prodotti tal-industrija kimika jew dawk relatati magħha”, tat-tieni parti tan-NM, dwar l-“[is]keda ta’ dazji”, tinkludi, b’mod partikolari, il-Kapitolu 31 tan-NM, li huwa stess huwa intitolat “Fertilizzanti”, u li fih tinsab tabella fformulata, f’dak li jirrigwarda b’mod iktar partikolari l-intestatura 3105 u s-subintestaturi tagħha, kif ġej:

3105

Fertilizzanti minerali jew kimiċi li jkun fihom tnejn jew tlieta mill-elementi fertilizzanti nitroġenu, fosfru u potassju; fertilizzanti oħrajn; oġġetti ta’ dan il-kapitlu f’għamla ta’ bċejjeċ jew forom simili jew f’pakki ta’ piż gross mhux aktar minn 10 kg

[…]

[…]

3105 20

‐ Fertilizzanti minerali jew kimiċi li fihom it-tliet elementi fertilizzanti nitroġenu, fosfru u potassju

3105 20 10;

‐ ‐ B’kontenut ta’ nitroġenu aktar minn 10 % tal-piż tal-prodott xott anidriku

3105 20 90;

‐ ‐ Oħrajn

[…]

[…]

It-tariffa integrata tal-Komunitajiet Ewropej

15

L-Artikolu 2 tar-Regolament Nru 2658/87, kif emendat, iċcitat fil-punt 13 ta’ din is-sentenza, jipprevedi:

“Tariffa Integrata tal-Komunitajiet Ewropej, min issa ’l quddiem imsejħa ‘Taric’, li tħaddan fiha l-ħtiġiet kollha ta’ Tariffa Doganali Komuni, l-statistiċi esterni tal-kummerċ, il-linji politiċi kummerċjali, agrikoli u linji politiċi oħra tal-Komunità rigward l-importazzjoni u l-esportazzjoni ta’ oġġetti, għandha tiġi stabbilita mill-Kummissjoni.

It-Tariffa għandha tkun ibbażata fuq in-[NM] u jkun fiha:

(a)

il-miżuri li jinsabu f’dawn ir-Regolamenti;

(b)

is-suddiviżjonijiet Komunitarji addizzjonali, msejħa ‘Subartikoli tat-TARIC’, li huma meħtieġa għall-implimetazzjoni ta’ miżuri Komunitarji speċifiċi mniżżla fl-Anness II;

[…]”

16

Il-kodiċi TARIC 3105201050 huwa redatt kif ġej: “Fertilizzanti solidi b’kontenut ta’ nitrat ta’ l-ammonju li jaqbeż 80 % f’termini ta’ piż, u kontenut ta’ fosforu identifikat bħala P2O5 u kontenut tal-potassju identifikat bħala K2O ta’ 6 % f’termini ta’ piż jew aktar iżda anqas minn 9 % f’termini ta’ piż”.

17

Il-kodiċi TARIC 3105201090 huwa ddefinit kif ġej: “Oħrajn”.

Il-kawża prinċipali u d-domandi preliminari

18

Matul il-perijodu bejn l-1 ta’ Jannar 2016 u l-31 ta’ Diċembru 2017, Linas Agro, kumpannija stabbilita fil-Litwanja, importat fit-territorju Litwan fertilizzant NPK 30‑4‑4, abbażi ta’ nitrat tal-ammonju, b’kontenut ta’ piż ta’ 30 % ta’ nitroġenu, ta’ 4 % ta’ fosfru u ta’ 4 % ta’ potassju, prodott mill-impriża Russa PAO “Dorogobuzh”. Fid-dikjarazzjonijiet ta’ importazzjoni tagħha, Linas Agro indikat li l-merkanzija importata taqa’ taħt il-Kodiċi TARIC 3105209000 (“fertilizzanti oħra minerali jew kimiċi li jinkludu t-tliet elementi fertilizzanti: nitroġenu, fosfru u potassju”) [traduzzjoni mhux uffiċjali] jew taħt il-Kodiċi TARIC 3105201090 (“fertilizzanti oħra minerali jew kimiċi b’kontenut ta’ nitroġenu li jeċċedi 10 % tal-piż tal-prodott xott anidriku”) [traduzzjoni mhux uffiċjali].

19

Waqt kontroll, il-Kauno teritorinė muitinė (l-Uffiċċju tad-Dwana ta’ Kaunas, il-Litwanja) (iktar ’il quddiem l-“Uffiċċju Doganali”) ikkonstata, abbażi taċ-ċertifikati ta’ kwalità maħruġa mill-produttur, li l-fertilizzant inkwistjoni fil-kawża prinċipali kien fih 30 % tal-piż tiegħu nitroġenu, jiġifieri iktar minn 28 %, u li l-kontenut ta’ fosfru u ta’ potassju kien ta’ 4 % tal-piż għal kull wieħed minn dawn l-elementi. Barra minn hekk, l-Uffiċċju Doganali wettaq eżamijiet fil-laboratorju li kkonfermaw li l-kontenut ta’ nitroġenu tal-fertilizzant kien ta’ iktar minn 28 % tal-piż.

20

Minn dan, l-Uffiċċju Doganali ddeduċa, billi bbaża ruħu fuq il-preżunzjoni stabbilita fil-premessi 21 sa 23 tar-Regolament Nru 945/2005, li l-fertilizzanti inkwistjoni fil-kawża prinċipali neċessarjament kellhom kontenut ta’ nitrat tal-ammonju li jeċċedi 80 % tal-piż u li, fid-dawl tal-preżenza ta’ elementi oħra ta’ fertilizzanti primarji (fosfru u potassju), dan kien jaqa’ taħt il-kodiċi TARIC 3105201050, peress li l-kodiċi addizzjonali TARIC kien A 999.

21

Għaldaqstant, l-Uffiċċju Doganali applika għall-imsemmi fertilizzant id-dazju doganali fuq l-importazzjoni korrispondenti ta’ 6.5 % u dazju antidumping definittiv ta’ EUR 42.83 għal kull tunnellata, u kkonkluda li Linas Agro kienet responsabbli għall-ħlas ta’ somma ta’ EUR 496302 bħala dazji antidumping definittivi kif ukoll somom bħala taxxa fuq il-valur miżjud (VAT), interessi moratorji u multa.

22

L-ilment imressaq minn Linas Agro quddiem l-amministrazzjoni fiskali ċentrali ġie miċħud permezz ta’ deċiżjoni tas‑16 ta’ Novembru 2018.

23

F’dik id-deċiżjoni, l-amministrazzjoni ċentrali tat-taxxa kkonfermat il-pożizzjoni tal-Uffiċċju Doganali. Hija enfasizzat li, skont il-preżunzjoni esposta fil-premessi 21 sa 23 tar-Regolament Nru 945/2005, ma kienx neċessarju li jiġi ddeterminat il-kontenut eżatt tan-nitrat tal-ammonju permezz ta’ analiżi fil-laboratorju għaliex dan kien preżunt. Id-dokumenti pprovduti mill-produttur tal-fertilizzant inkwistjoni fil-kawża prinċipali, li kienu jindikaw l-elementi ta’ fertilizzanti primarji inklużi fil-kompożizzjoni tiegħu kif ukoll il-kontenut tagħhom, kienu suffiċjenti għall-finijiet tal-klassifikazzjoni tariffarja ta’ dan il-fertilizzant u għall-applikazzjoni tad-dazju antidumping korrispondenti.

24

Fit‑12 ta’ Diċembru 2018, Linas Agro ppreżentat rikors kontra din id-deċiżjoni quddiem il-Mokestinių ginčų komisija prie Lietuvos Respublikos Vyriausybės (il-Kummissjoni tat-Tilwim Fiskali fi ħdan il-Gvern tar-Repubblika tal-Litwanja). Għalkemm, insostenn tar-rikors tagħha, Linas Agro ma tikkontestax il-fatt li l-element fertilizzanti primarju, jiġifieri n-nitroġenu, jirrappreżenta 30 % tal-piż tal-fertilizzant inkwistjoni fil-kawża prinċipali, hija ssostni li l-fatt waħdu li l-kontenut ta’ nitroġenu jkun ta’ iktar minn 28 % ma jimplikax neċessarjament li l-kontenut tiegħu ta’ nitrat tal-ammonju jeċċedi 80 % tal-piż u li kien b’mod ġust li dan il-fertilizzant ġie kklassifikat taħt il-kodiċi TARIC 3105201050. Fil-fatt, il-parti ta’ nitrat tal-ammonju fil-fertilizzant ma setgħetx tiġi ddeterminata abbażi tar-relazzjoni bejn il-kontenut tan-nitrat tal-ammonju u l-kontenut tan-nitroġenu, kif indikat fil-premessi tar-Regolament Nru 945/2005. Linas Agro tenfasizza li dawn ma għandhomx valur legali vinkolanti, b’tali mod li l-amministrazzjoni fiskali ċentrali ddeċidiet mingħajr bażi legali, billi bbażat ruħha mhux fuq data fattwali li tirriżulta minn analiżi fil-laboratorju, iżda fuq il-preżunzjonijiet stabbiliti fl-imsemmija premessi dwar il-kontenut tan-nitrat tal-ammonju tal-fertilizzanti komposti bħal dak inkwistjoni fil-kawża prinċipali.

25

Linas Agro tikkontesta wkoll l-interpretazzjoni tal-premessi tar-Regolament Nru 945/2005 magħmula mill-amministrazzjoni ċentrali tat-taxxa, billi tosserva li l-kunċett ta’ “prodott ikkonċernat” imsemmi fil-premessa 17 ma jirreferix għal fertilizzant kompost bħal dak inkwistjoni fil-kawża prinċipali iżda għan-nitrat tal-ammonju. Minn dan isegwi li l-kwantità ta’ nitroġenu għandha titkejjel mhux fir-rigward tal-massa globali tal-fertilizzant kompost iżda biss meta mqabbla ma’ dik tan-nitrat tal-ammonju li dan fih.

26

F’dawn iċ-ċirkustanzi, il-Mokestinių ginčų komisija prie Lietuvos Respublikos Vyriausybės (il-Kummissjoni tal-Kwistjonijiet Fiskali fi ħdan il-Gvern tar-Repubblika tal-Litwanja) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

“1)

Id-dikjarazzjonijiet li jissemmew fil-preambolu tar-Regolament Nru 945/2005, b’mod partikolari fil-premessi 20 sa 23, skont liema ‘peress li l-prodott ikkonċernat kellu aktar minn 28 % f’termini ta’ piż ta’ N, hu kellu awtomatikament aktar minn 80 % f’termini ta’ piż ta’ AN’, għandhom jiġu interpretati bħala li jistabbilixxu preżunzjoni li tippermetti li jiġi konkluż li, jekk il-prodott ikkonċernat, (fertilizzant tan-nitrat tal-ammonju) ikun fih 28 % ta’ nitroġenu (N) jew iktar, allura l-kontenut ta’ nitrat tal-ammonju tiegħu (AN) huwa dejjem iktar minn 80 %?

2)

Din il-preżunzjoni tapplika għal tip ta’ prodotti ġodda li huma ddeterminati fir-Regolament Nru 945/2005, jiġifieri l-fertilizzanti NPK li fihom il-kontenut ta’ nitroġenu (N) jilħaq jew jeċċedi t‑28% tal-piż, il-proporzjon bejn in-nitroġenu nitriku u n-nitroġenu ammonjakali jkun ta’ 1:1 u l-kontenut globali ta’ fosfru (P) u ta’ potassju (K) ma jeċċedix it‑12 % tal-piż, bħal fil-fertilizzanti NPK 30-4-4 li huma inkwistjoni f’din il-kawża?

3)

F’każ ta’ risposta fl-affermattiv għad-domandi preċedenti, din il-preżunzjoni stabbilita fir-Regolament Nru 945/2005 tkun legalment vinkolanti, fis-sens li jkun possibbli li abbażi tagħha l-fertilizzanti NPK imsemmija [fit-tieni domanda] jkunu kklassifikati skont il-Kodiċijiet TARIC u għall-finijiet tal-miżuri fis-seħħ relatti magħhom (id-dritt antidumping), filwaqt li l-Artikolu 1(1) u (3) tar-Regolament Nru 945/2005 [kif ukoll l-Artikolu 1(1) u (2)(c) tar-Regolament Nru 999/2014, fis-seħħ fil-mument tal-importazzjonjiet ikkontestati] jorbot l-applikazzjoni tad-dritt antidumping mhux mal-kontenut tal-prodott li fih l-element kimiku (N), iżda mal-kontenut tiegħu tal-kompost kimiku nitrat tal-ammonja (AN) u mal-kontenut tiegħu ta’ fosfru u ta’ potassju?

4)

Sabiex il-fertilizzant NPK imsemmi [fit-tieni domanda] jiġi kklassifikat skont il-Kodiċijiet TARIC u għall-finijiet tal-miżuri fis-seħħ relatati magħhom (id-dritt antidumping), inkunsiderazzjoni tal-għan imsemmi fil-premessi 35 u 36 tar-Regolament Nru 945/2005, għall-finijiet tal-applikazzjoni tal-miżuri fis-seħħ għal tipi ġodda tal-prodotti skont metodu proporzjonali u sabiex tiġi ssemplifikata l-proċedura doganali u l-applikazzjoni ta’ dazji xierqa li jikkorrispondu għall-kwantità ta’ prodott ikkonċernat inkluż fil-kompost, jista’ wieħed jikkalkula (jiddetermina) l-kontenut ta’ dawn il-fertilizzanti tan-nitrat tal-ammonju billi jibbaża ruħu fuq l-imsemmija preżunzjoni [fl-ewwel domanda]? Fi kliem ieħor, ġaladarba, li l-kontenut ta’ nitroġenu (N) fil-fertilizzanti NPK imsemmija [fit-tieni domanda] jkun ġie ddeterminat (abbażi tad-dokumenti ppreżentati matul ir-rilaxx mid-dwana jew mill-analiżi tal-laboratorju), il-kontenut tagħhom ta’ nitrat ta’ ammonja huwa kkalkolat (iddeterminat) billi jittieħed inkunsiderazzjoni l-proporzjon tal-kontenut ta’ nitrat ta’ ammonju (AN) u tal-kontenut tan-nitroġenu (N) iddefinit fil-premessa 20 tar-Regolament Nru 945/2005, li tiddependi mill-massa atomika tal-elementi u li hija ta’ 2.86, mingħajr ma ssir ebda analiżi addizzjonali fil-laboratorju sabiex jiġi ddeterminat il-kontenut eżatt ta’ nitrat tal-ammonju?”

Fuq id-domandi preliminari

27

Preliminarjament, fl-ewwel lok, għandu jiġi kkonstatat li r-Regolament Nru 945/2005, li l-Qorti tal-Ġustizzja ġiet mistoqsija dwar l-interpretazzjoni tiegħu mill-qorti tar-rinviju, emenda r-Regolament Nru 658/2002 (iktar ’il quddiem ir-“Regolament inizjali”) u pprovda preċiżazzjonijiet dwar id-definizzjoni tal-prodott ikkonċernat mill-miżuri stabbiliti mir-Regolament inizjali. Dawn il-miżuri, sussegwentement, inżammu fis-seħħ suċċessivament permezz tar-Regolament Nru 661/2008 u tar-Regolament ta’ Implimentazzjoni Nru 999/2014, li, invarjabbilment, irriproduċew id-definizzjoni tal-prodott ikkonċernat kif speċifikata mir-Regolament Nru 945/2005. Minn dan isegwi li, għalkemm ir-Regolament ta’ Implimentazzjoni Nru 999/2014 huwa r-regolament antidumping applikabbli ratione temporis għall-kawża prinċipali, ir-Regolament Nru 945/2005 jibqa’ rilevanti għall-finijiet tal-interpretazzjoni tiegħu.

28

Fit-tieni lok, permezz tas-sentenza tal‑10 ta’ Settembru 2008, JSC Kirovo-Chepetsky Khimichesky Kombinat vs Il-Kunsill (T‑348/05, mhux ippubblikata, EU:T:2008:327), kif interpretata fis-sentenza tal-Qorti Ġenerali tad‑9 ta’ Lulju 2009, JSC Kirovo-Chepetsky Khimichesky Kombinat vs Il-Kunsill, (T‑348/05 INTP, mhux ippubblikata, EU:T:2009:261), il-Qorti Ġenerali annullat ir-Regolament Nru 945/2005 sa fejn kien jikkonċerna lil JSC Kirovo-Chepetsky Khimichesky Kombinat, minħabba ksur tal-Artikolu 11(3) tar-Regolament Nru 384/96. Dan ir-regolament sar definittiv fir-rigward ta’ produtturi oħra u esportaturi tal-prodott ikkonċernat, bħal Dorogobuzh, peress li dawn ma talbux l-annullament tiegħu fit-terminu previst fl-Artikolu 230(5) KE.

29

Huwa fid-dawl ta’ dawn il-kunsiderazzjonijiet li d-domandi preliminari mressqa għandhom jiġu eżaminati.

30

Permezz ta’ dawn id-domandi, li għandhom jiġu eżaminati flimkien, il-qorti tar-rinviju tistaqsi, essenzjalment, jekk l-Artikolu 1 tar-Regolament ta’ Implimentazzjoni Nru 999/2014, moqri fid-dawl tal-premessi 20 sa 23 tar-Regolament Nru 945/2005, għandux jiġi interpretat fis-sens li fertilizzant abbażi ta’ nitrat tal-ammonju li l-kontenut ta’ nitroġenu tal-ammonju tiegħu huwa ta’ iktar minn 28 % tal-piż tiegħu, li r-relazzjoni bejn in-nitroġenu nitriku u n-nitroġenu ammonjakali tiegħu hija ta’ madwar 1:1, u li l-kontenut globali tal-fosfru tiegħu ma jaqbiżx it‑12 % tal-piż huwa preżunt li għandu kontenut ta’ nitrat ta’ ammonju ta’ iktar minn 80 % tal-piż għall-finijiet tal-impożizzjoni tad-dritt antidumping definittiv stabbilit minnu, mingħajr ma huwa neċessarju li titwettaq analiżi fil-laboratorju sabiex jiġi ddeterminat il-kontenut eżatt tan-nitrat tal-ammonju tiegħu.

31

L-Artikolu 1 tar-Regolament ta’ Implimentazzjoni Nru 999/2014 impona dazju antidumping definittiv fuq l-importazzjonijiet ta’ fertilizzanti solidi li joriġinaw mir-Russja, b’kontenut ta’ nitrat tal-ammonju li jeċċedi 80 % tal-piż u li jaqa’ taħt il-kodiċijiet NM differenti koperti minnu.

32

Linas Agro ssostni, essenzjalment, li dan ir-regolament ma huwiex applikabbli għall-fertilizzant inkwistjoni fil-kawża prinċipali, sa fejn, minkejja kontenut ta’ nitroġenu f’dan il-fertilizzant li jeċċedi 28 % tal-piż tiegħu, il-kontenut tan-nitrat tal-ammonju tiegħu ma jeċċedix 80 % tal-piż.

33

F’dan ir-rigward, għandu, fl-ewwel lok, jiġi eżaminat jekk il-kontenut ta’ nitrat tal-ammonju ta’ fertilizzant bħal dak inkwistjoni fil-kawża prinċipali jistax jiġi preżunt li jeċċedi 80 % meta l-kontenut tan-nitroġenu tiegħu jeċċedi 28 % tal-piż.

34

Kif jirriżulta mill-premessa 1 tar-Regolament ta’ Implimentazzjoni Nru 999/2014, id-definizzjoni tal-prodotti li għalihom japplika dan ir-regolament tirriżulta b’mod partikolari mill-preċiżazzjonijiet magħmula f’dan ir-rigward mir-Regolament Nru 945/2005. Fil-fatt, kif jirriżulta mill-premessa 16 ta’ dan l-aħħar regolament, il-prodott ikkonċernat mir-Regolament inizjali kien in-nitrat tal-ammonju, fertilizzant tan-nitroġenu solidu użat komunement fl-agrikoltura, miksub mill-ammonja u mill-aċidu nitriku u li l-kontenut tan-nitroġenu tiegħu jaqbeż it‑28 % tal-piż. Il-premessi 4 u 6 tal-imsemmi regolament jesponu wkoll li l-Kummissjoni rċeviet talba, skont l-Artikolu 11(3) tar-Regolament Nru 384/96, intiża sabiex tirrevedi l-kamp ta’ applikazzjoni tal-miżuri eżistenti sabiex tinkludi tipi ġodda tal-prodott. Dawn it-tipi ġodda tal-prodott kienu ddefiniti bħala fertilizzanti tan-nitrat tal-ammonju b’kontenut ta’ nitroġenu ta’ iktar minn 28 % u inqas minn 33 % tal-piż, li fihom sa 5 % ekwivalenti P2O5 u/jew sa 5 % ekwivalenti K2O ġew miżjuda, imħallta jew ipproċessati.

35

Huwa għalhekk li l-premessi 20 sa 23 tar-Regolament Nru 945/2005 ipprovdew ċerti preċiżazzjonijiet dwar il-karatteristiċi kimiċi u fiżiċi kif ukoll dwar l-użu finali kemm tal-prodott ikkonċernat, fis-sens tar-Regolament inizjali, kif ukoll tat-tipi ġodda tal-prodott li huma s-suġġett tal-miżuri antidumping.

36

Dawn il-premessi esponew li l-prodott ikkonċernat, fis-sens tar-Regolament inizjali, huwa ffabbrikat mill-ammonja u mill-aċidu nitriku, li l-kombinazzjoni tiegħu tagħti n-nitrat tal-ammonju. Żewġ elementi essenzjali jikkaratterizzaw il-kompożizzjoni kimika tiegħu: l-espressjoni tal-kontenut ta’ nitroġenu kif ukoll il-livell globali tal-kontenut ta’ nitroġenu u ta’ nitrati tal-ammonju. Minn naħa, in-nitroġenu huwa evalwat bħala nitroġenu nitriku (ion nitrate NO3-) u nitroġenu ammonijaku (ion ammonium NH4+) u l-proporzjon bejn it-tnejn huwa 1:1. Min-naħa l-oħra, il-kontenut ta’ nitroġenu jeċċedi dejjem 28 % tal-piż. Ir-relazzjoni bejn nitrat tal-ammonju u nitroġenu hija ta’ 2.86 u hija spjegata mill-mases atomiċi. Il-massa atomika tan-nitroġenu tammonta għal 14.0067, dik tal-idroġenu għal 1.00794, u dik tal-ossiġnu għal 15.9994. L-importanza ponderali globali tan-nitrat tal-ammonju hija għalhekk ta’ 80.04, li 28.01 minnhom huma rrappreżentati min-nitroġenu. Għalhekk, peress li l-kontenut ta’ nitroġenu fil-prodott ikkonċernat jaqbeż dejjem 28 % tal-piż, il-kontenut ta’ nitrat tal-ammonju dejjem jeċċedi 80 % tal-piż. Il-prodott ikkonċernat, fis-sens tar-Regolament inizjali, jinkludi wkoll materjali u/jew komponenti aċċessorji ta’ fertilizzanti li l-kontenut totali tagħhom qatt ma jista’ jeċċedi l‑20 % tal-piż tagħhom peress li tal-inqas 80 % tal-piż tal-prodott ikkonċernat huwa nitrat tal-ammonju.

37

Fi kliem ieħor, ir-Regolament inizjali kien ibbażat fuq il-premessa li, jekk il-kontenut ta’ nitroġenu tal-prodott ikkonċernat, fis-sens ta’ dan ir-regolament, jeċċedi 28 % tal-piż, jista’ jiġi preżunt li l-livell ta’ nitrat tal-ammonju jeċċedi 80 % tal-piż, peress li n-nitroġenu fi prodott ta’ din in-natura jiġi min-nitrat tal-ammonju.

38

Kif jirriżulta mill-premessa 6 tar-Regolament Nru 945/2005, it-talba għal eżami mill-ġdid kienet tinvoka l-eżistenza ta’ tipi ġodda tal-prodott iddefiniti bħala fertilizzanti tan-nitrat tal-ammonju li għandhom kontenut ta’ nitroġenu ta’ iktar minn 28 % u ta’ inqas minn 33 % tal-piż, li magħhom ġew miżjuda, magħġuna, imħallta jew ipproċessati sa 5 % ta’ ekwivalenti tal-P2O5 (nutrijent fertilizzanti tal-fosfru – P), u/jew sa 5 % ta’ ekwivalenti tal-K2O (nutrijent fertilizzanti tal-Potassju – K).

39

Issa, il-preżunzjoni msemmija fil-punt 37 ta’ din is-sentenza tapplika wkoll għal dawn it-tipi ġodda tal-prodott. Fil-fatt, ġie kkonstatat li l-kontenut ta’ nitroġenu tal-imsemmija tipi ġodda tal-prodott kien iktar minn 28 % tal-piż u li, konsegwentement, il-kontenut ta’ nitrat tal-ammonju tagħhom kien ogħla minn 80 % tal-piż. F’dawn il-prodotti, in-nitroġenu kien espress ukoll bħala nitroġenu nitriku u nitroġenu ammonijaku u l-proporzjon bejn it-tnejn kien approssimattivament ta’ 1:1 ukoll.

40

Minkejja din iż-żieda ta’ nutrijenti fertilizzanti primarji oħra u indipendentement mit-tip ta’ trasformazzjoni (kimika jew permezz ta’ taħlit), ġie kkonstatat li dan il-proċess li ġew issuġġettati għalih it-tipi l-ġodda tal-prodott bl-ebda mod ma affettwa l-karatteristiċi kimiċi essenzjali tan-nitrat tal-ammonju li jinsab f’dawn il-prodotti, jiġifieri l-espressjoni tal-kontenut tan-nitroġenu u l-livell globali ta’ nitroġenu u ta’ nitrat tal-ammonju li eċċeda, rispettivament, it‑28 % u t‑80 % tal-piż.

41

Għaldaqstant, ġie konkluż, fil-premessa 35 tar-Regolament Nru 945/2005, li t-tipi ġodda kollha tal-prodott kellhom jiġu kkunsidrati bħala li jaqgħu taħt id-definizzjoni tal-prodott ikkonċernat, fis-sens tar-Regolament inizjali, biss fir-rigward tal-kontenut ta’ nitrat tal-ammonju tagħhom, bil-kundizzjoni li dan jeċċedi 80 % tal-piż, u, fil-premessa 37 ta’ dan ir-regolament, li d-deskrizzjoni tal-prodott li tinsab fid-dispożittiv tar-Regolament inizjali kellha tiġi kkjarifikata, u dan sabiex jiġi ppreċiżat li diversi fertilizzanti għandhom kontenut ta’ nitrat tal-ammonju li jeċċedi 80 % tal-piż, u kontenut ta’ nitroġenu, evalwat bħala nitroġenu nitriku u nitroġenu ammonijaku li jeċċedi 28 % tal-piż, u sabiex tiġi evitata kull konfużjoni bejn il-prodott ikkonċernat u l-komponent primarju tiegħu, in-nitrat tal-ammonju. B’hekk, skont l-Artikolu 1(1) tar-Regolament inizjali, it-terminu “nitrat tal-ammonju” li jinsab fl-Artikolu 1(1) tar-Regolament inizjali ġie ssostitwit bl-espressjoni “fertilizzanti solidi b’kontenut tan-nitrat tal-ammonju li jaqbeż it-80 % fil-piż”, u din id-definizzjoni tal-prodott ikkonċernat ġiet riprodotta letteralment fir-regolamenti suċċessivi li jistabbilixxu dazju antidumping, b’mod partikolari fir-Regolament ta’ Implimentazzjoni Nru 999/2014.

42

Minn dan jirriżulta li, kuntrarjament għal dak li ssostni Linas Agro, il-preżunzjoni stabbilita fil-premessi 20 sa 23 tar-Regolament Nru 945/2005 tapplika mhux biss għall-prodott ikkonċernat, fis-sens tar-Regolament inizjali, iżda wkoll għat-tipi ġodda tal-prodott, b’tali mod li l-Artikolu 1 tar-Regolament ta’ Implimentazzjoni Nru 999/2014, moqri fid-dawl ta’ dawn il-premessi 20 sa 23, ma jistax jiġi interpretat fis-sens li jipprekludi li l-kontenut ta’ nitrat tal-ammonju ta’ fertilizzant tan-nitrat tal-ammonju jiġi preżunt li jeċċedi 80 % tal-piż għall-finijiet tal-klassifikazzjoni tariffarja tiegħu u tal-impożizzjoni ta’ dazju antidumping skont dan ir-regolament ta’ implimentazzjoni fil-każ li l-kontenut ta’ nitroġenu tiegħu jeċċedi 28% tal-piż.

43

Fit-tieni lok, għandu madankollu jiġi ppreċiżat li tali preżunzjoni hija ta’ natura konfutabbli.

44

Għandu jitfakkar li, skont l-Artikolu 14(1) tar-regolament bażiku, id-dazji antidumping huma imposti permezz ta’ regolament u miġbura mill-Istati Membri skont il-forma, ir-rata u l-elementi l-oħra stabbiliti mir-regolament li jimponihom. Huwa biss f’każ li prodott jiġi kklassifikat taħt l-intestatura NM prevista minn regolament antidumping u kuntestwalment ikollu wkoll il-karatteristiċi kollha tal-prodott ikkonċernat li dan il-prodott ikun jista’ jiġi sottopost għad-dazju (ara, f’dan is-sens, is-sentenza tat‑18 ta’ April 2013, Steinel Vertrieb, C‑595/11, EU:C:2013:251, punti 30 u 31).

45

Issa, mill-kliem ċar tal-Artikolu 1 tar-Regolament ta’ Implimentazzjoni Nru 999/2014 kif ukoll mill-kodiċi TARIC li jinsabu fih jirriżulta li l-kriterju deċiżiv għall-finijiet, minn naħa, tal-klassifikazzjoni tariffarja u, min-naħa l-oħra, tal-impożizzjoni tad-dazju antidumping huwa l-kontenut effettiv ta’ nitrat tal-ammonju tal-fertilizzant importat, u mhux il-kontenut preżunt ta’ nitrat tal-ammonju abbażi tal-kontenut ta’ nitroġenu. Għalhekk, il-preżunzjoni msemmija fil-premessi 20 sa 23 tar-Regolament Nru 945/2005 ma tistax tinżamm jekk tiġi prodotta l-prova li, minkejja kontenut ta’ nitroġenu li jeċċedi 28 % tal-piż, il-fertilizzant ikkonċernat għandu, fir-realtà, kontenut ta’ nitrat tal-ammonju li ma jeċċedix 80 % tal-piż.

46

Kull interpretazzjoni oħra tar-Regolament ta’ Implimentazzjoni Nru 999/2014, fid-dawl tar-Regolament Nru 945/2005, ikollha l-effett li testendi l-applikazzjoni tal-miżuri antidumping għal fertilizzanti li ma jaqgħux taħt id-definizzjoni tal-prodotti koperti mill-ewwel wieħed minn dawn ir-regolamenti. Issa, f’dan ir-rigward, jeħtieġ li jitfakkar li l-fatt li tiġi estiża l-applikazzjoni tad-dazji antidumping għal prodotti differenti minn dak ikkonċernat minn regolament antidumping huwa inkompatibbli mal-għan u mal-istruttura tar-regolamenti bażiċi (ara, b’analoġija, is-sentenza tat‑18 ta’ April 2013, Steinel Vertrieb, C‑595/11, EU:C:2013:251, punt 43).

47

Fit-tielet lok, sabiex tingħata risposta għad-domandi tal-qorti tar-rinviju dwar il-modalitajiet tal-prova sabiex tiġi kkonfutata din il-preżunzjoni, bħal analiżi fil-laboratorju, għandu jitfakkar li, skont ġurisprudenza stabbilita, fl-assenza ta’ leġiżlazzjoni tal-Unjoni f’dan il-qasam, huwa l-ordinament ġuridiku intern ta’ kull Stat Membru li għandu jirregola l-modalitajiet proċedurali tar-rikorsi intiżi sabiex jiżguraw il-ħarsien tad-drittijiet li l-individwi għandhom taħt id-dritt tal-Unjoni, bla ħsara għall-osservanza tal-prinċipji ta’ ekwivalenza u ta’ effettività (ara, f’dan is-sens, is-sentenza tat‑13 ta’ Marzu 2007, Unibet, C‑432/05, EU:C:2007:163, punti 39 u 82).

48

Għaldaqstant, hija l-qorti tar-rinviju li għandha tevalwa, skont ir-regoli proċedurali nazzjonali, jekk il-provi prodotti minn Linas Agro humiex ta’ natura li jikkonfutaw il-preżunzjoni stabbilita fil-premessi 20 sa 23 tar-Regolament Nru 945/2005 u, jekk ikun il-każ, jekk għandhiex issir analiżi fil-laboratorju sabiex jiġi ddeterminat il-kontenut reali ta’ nitrat tal-ammonju tal-fertilizzant inkwistjoni fil-kawża prinċipali.

49

Minn dak kollu li ntqal iktar ’il fuq jirriżulta li l-Artikolu 1 tar-Regolament ta’ Implimentazzjoni Nru 999/2014, moqri fid-dawl tal-premessi 20 sa 23 tar-Regolament Nru 945/2005, għandu jiġi interpretat fis-sens li fertilizzant abbażi ta’ nitrat tal-ammonju li l-kontenut ta’ nitroġenu tiegħu jeċċedi 28 % tal-piż, li r-relazzjoni bejn in-nitroġenu nitriku u n-nitroġenu ammonijaku tiegħu hija ta’ madwar 1:1, u li l-kontenut globali ta’ fosfru u ta’ potassju tiegħu ma jaqbiżx 12 % tal-piż, jista’ jiġi preżunt, bla ħsara għal kull prova kuntrarja, li għandu kontenut ta’ nitrati tal-ammonju ta’ iktar minn 80 % tal-piż għall-finijiet tal-impożizzjoni tad-dazju antidumping definittiv stabbilit minnu, mingħajr ma huwa neċessarju li titwettaq analiżi fil-laboratorju sabiex jiġi ddeterminat dan il-kontenut eżatt tan-nitrat tal-ammonju.

Fuq l-ispejjeż

50

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

 

Għal dawn il-motivi, Il-Qorti tal-Ġustizzja (Id-Disa’ Awla) taqta’ u tiddeċiedi:

 

L-Artikolu 1 tar-Regolament ta’ Implimentazzjoni tal-Kummissjoni (UE) Nru 999/2014 tat-23 ta’ Settembru 2014 li jimponi dazju antidumping definittiv fuq l-importazzjonijiet tan-nitrat tal-ammonju li joriġinaw mir-Russja wara rieżami ta’ skadenza skont l-Artikolu 11(2) tar-Regolament tal-Kunsill (KE) Nru 1225/2009, moqri fid-dawl tal-premessi 20 sa 23 tar-Regolament tal-Kunsill (KE) Nru 945/2005 tal-21 ta’ Ġunju 2005 li jemenda r-Regolament (KE) Nru 658/2002 li jimponi dazju anti-dumping definittiv fuq importazzjoni tan-nitrat ta’ l-ammonju li joriġina mir-Russja u r-Regolament (KE) Nru 132/2001 li jimponi dazju anti-dumping definittiv fuq importazzjoni tan-nitrat ta’ l-ammonju li joriġina, inter alia, mill-Ukraina, wara r-reviżjoni interim parzjali skond l-Artikolu 11(3) tar-Regolament (KE) Nru 384/96, għandu jiġi interpretat fis-sens li fertilizzant abbażi ta’ nitrat tal-ammonju (AN) li l-kontenut ta’ nitroġenu (N) tiegħu jeċċedi 28 % tal-piż, li r-relazzjoni bejn in-nitroġenu nitriku u n-nitroġenu ammonijaku tiegħu hija ta’ madwar 1:1, u li l-kontenut globali ta’ fosfru u ta’ potassju tiegħu ma jaqbiżx 12 % tal-piż, jista’ jiġi preżunt, bla ħsara għal kull prova kuntrarja, li għandu kontenut ta’ nitrati tal-ammonju (AN) ta’ iktar minn 80 % tal-piż għall-finijiet tal-impożizzjoni tad-dazju antidumping definittiv stabbilit minnu, mingħajr ma huwa neċessarju li titwettaq analiżi fil-laboratorju sabiex jiġi ddeterminat dan il-kontenut eżatt tan-nitrat tal-ammonju.

 

Firem


( *1 ) Lingwa tal-kawża: il-Litwan.