European flag

Il-Ġurnal Uffiċjali
tal-Unjoni Ewropea

MT

Is-serje L


2026/1031

18.5.2026

DEĊIŻJONI TAL-KUMMISSJONI (UE) 2026/1031

tat-23 ta’ April 2026

dwar il-konsistenza tal-miri ta’ prestazzjoni inklużi fl-abbozz rivedut tal-pjan ta’ prestazzjoni mressaq mil-Latvja skont ir-Regolament (KE) Nru 549/2004 tal-Parlament Ewropew u tal-Kunsill mal-miri ta’ prestazzjoni għall-Unjoni kollha għar-raba’ perjodu referenzjarju tal-iskema ta’ prestazzjoni u imposti tal-Ajru Uniku Ewropew

(notifikata bid-dokument C(2026) 2558)

(It-test Latvjan biss huwa awtentiku)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 549/2004 tal-Parlament Ewropew u tal-Kunsill tal-10 ta’ Marzu 2004 li jippreskrivi l-qafas għall-ħolqien tal-Ajru Uniku Ewropew (ir-Regolament qafas) (1), u b’mod partikolari l-Artikolu 11(3)(c) tiegħu,

Wara li kkunsidrat ir-Regolament (UE) 2024/2803 tal-Parlament Ewropew u tal-Kunsill tat-23 ta’ Ottubru 2024 dwar l-implimentazzjoni tal-Ajru Uniku Ewropew (2), u b’mod partikolari l-Artikolu 58(3) tiegħu,

Wara li kkunsidrat ir-Regolament ta’ Implimentazzjoni tal-Kummissjoni (UE) 2019/317 tal-11 ta’ Frar 2019 li jistabbilixxi skema ta’ prestazzjoni u imposti fl-Ajru Uniku Ewropew u li jħassar ir-Regolamenti ta’ Implimentazzjoni (UE) Nru 390/2013 u (UE) Nru 391/2013 (3), u b’mod partikolari l-Artikolu 15(1) u (2) tiegħu,

Billi:

KUNSIDERAZZJONIJIET ĠENERALI

(1)

Skont l-Artikolu 11 tar-Regolament (KE) Nru 549/2004, l-Istati Membri jridu jfasslu pjanijiet, fil-livell nazzjonali jew fil-livell tal-blokok ta’ spazju tal-ajru funzjonali (“FABs”), li jinkludu miri ta’ prestazzjoni, għal kull perjodu referenzjarju tal-iskema ta’ prestazzjoni u ta’ imposti għas-servizzi tan-navigazzjoni bl-ajru u għall-funzjonijiet tan-network. Dawk il-pjanijiet iridu jinkludu miri ta’ prestazzjoni lokali li huma konsistenti mal-miri ta’ prestazzjoni għall-Unjoni kollha għall-perjodu referenzjarju kkonċernat.

(2)

Fit-12 ta’ Ġunju 2024, il-Kummissjoni adottat il-miri ta’ prestazzjoni għall-Unjoni kollha għar-raba’ perjodu referenzjarju (“RP4”, 2025–2029). Dawk il-miri ta’ prestazzjoni għall-Unjoni kollha ġew stabbiliti fid-Deċiżjoni ta’ Implimentazzjoni tal-Kummissjoni (UE) 2024/1688 (4).

(3)

Fl-1 ta’ Ottubru 2024, il-Latvja ressqet lill-Kummissjoni abbozz tal-pjan ta’ prestazzjoni għall-RP4. Wara l-verifika tal-kompletezza ta’ dak l-abbozz tal-pjan ta’ prestazzjoni mill-Kummissjoni, il-Latvja ressqet abbozz aġġornat tal-pjan ta’ prestazzjoni (“l-abbozz rivedut tal-pjan ta’ prestazzjoni”) fil-15 ta’ Novembru 2024.

(4)

Il-Kummissjoni sabet li l-miri tal-prestazzjoni tal-kosteffiċjenza stabbiliti mil-Latvja fl-abbozz tal-pjan ta’ prestazzjoni fir-rigward taż-żona tal-imposti en route tagħha ma jissodisfawx il-kriterji ta’ valutazzjoni stabbiliti fil-punt 1.4 tal-Anness IV tar-Regolament ta’ Implimentazzjoni tal-Kummissjoni (UE) 2019/317 u għalhekk mhumiex konsistenti mal-miri ta’ prestazzjoni għall-Unjoni kollha għall-RP4.

(5)

Fis-16 ta’ Mejju 2025, il-Kummissjoni nnotifikat lil-Latvja bis-sejbiet rigward l-inkonsistenza tal-miri ta’ prestazzjoni msemmija fil-premessa (4) permezz tad-Deċiżjoni ta’ Implimentazzjoni tal-Kummissjoni (UE) 2025/1040 (5). F’dik id-Deċiżjoni, il-Kummissjoni ħarġet rakkomandazzjonijiet lil-Latvja bil-ħsieb li tiżgura l-konsistenza tal-miri ta’ prestazzjoni tagħha mal-miri ta’ prestazzjoni għall-Unjoni kollha għall-RP4.

(6)

Fit-18 ta’ Awwissu 2025, il-Latvja ressqet abbozz rivedut tal-pjan ta’ prestazzjoni għall-RP4 għall-valutazzjoni mill-Kummissjoni. Wara l-verifika tal-kompletezza ta’ dak il-pjan, il-Latvja ressqet verżjoni aġġornata tal-abbozz rivedut tal-pjan ta’ prestazzjoni (l-“abbozz rivedut tal-pjan ta’ prestazzjoni”) fit-3 ta’ Ottubru 2025.

(7)

F’konformità mal-Artikolu 15(1) tar-Regolament ta’ Implimentazzjoni (UE) 2019/317, il-Kummissjoni vvalutat il-konsistenza tal-miri tal-prestazzjoni lokali inklużi fl-abbozz rivedut tal-pjan tal-prestazzjoni abbażi tal-kriterji ta’ valutazzjoni stabbiliti fil-punt 1 tal-Anness IV ta’ dak ir-Regolament ta’ Implimentazzjoni, filwaqt li qieset iċ-ċirkostanzi lokali fejn rilevanti.

(8)

Il-Kummissjoni kkumplimentat il-valutazzjoni tagħha tal-abbozz rivedut tal-pjan ta’ prestazzjoni b’rieżami tal-elementi stabbiliti fil-punt 2 tal-Anness IV ta’ dak ir-Regolament ta’ Implimentazzjoni. Madankollu, l-allokazzjoni tal-kostijiet bejn is-servizzi en route u s-servizzi fit-terminal imsemmija fil-punt 2.1(d)(vii) tal-Anness IV tar-Regolament ta’ Implimentazzjoni (UE) 2019/317 hija soġġetta għal rieżami separat mill-Kummissjoni abbażi ta’ informazzjoni addizzjonali li waslet mingħand il-Latvja f’Jannar 2026. Għaldaqstant, f’dan l-istadju, il-Kummissjoni ma waslet għall-ebda konklużjoni rigward il-konformità ta’ dik il-metodoloġija tal-allokazzjoni tal-kostijiet mal-punti (e) u (f) tal-Artikolu 15(2) tar-Regolament (KE) Nru 550/2004 tal-Parlament Ewropew u tal-Kunsill (6) u mal-Artikolu 22(5) tar-Regolament ta’ Implimentazzjoni (UE) 2019/317.

(9)

Il-Bord ta’ Analiżi tal-Prestazzjoni (“PRB”), li jassisti lill-Kummissjoni fl-implimentazzjoni tal-iskemi ta’ prestazzjoni u ta’ imposti skont l-Artikolu 13(2) tar-Regolament (UE) 2024/2803, ressaq lill-Kummissjoni l-opinjoni tiegħu dwar il-miri ta’ prestazzjoni inklużi fl-abbozz rivedut tal-pjan ta’ prestazzjoni fir-rigward tal-konsistenza ta’ dawk il-miri mal-miri ta’ prestazzjoni għall-Unjoni kollha. Is-sejbiet stabbiliti f’din id-Deċiżjoni ġew infurmati mill-valutazzjoni teknika dettaljata stabbilita fl-opinjoni tal-PRB (7).

VALUTAZZJONI TAL-KUMMISSJONI

Valutazzjoni tal-miri tas-sikurezza

(10)

Fir-rigward tal-qasam ewlieni ta’ prestazzjoni tas-sikurezza, il-konsistenza tal-miri inklużi fl-abbozz rivedut tal-pjan ta’ prestazzjoni ġiet ivvalutata f’konformità mal-punt 1.1 tal-Anness IV tar-Regolament ta’ Implimentazzjoni (UE) 2019/317.

(11)

Il-miri ta’ prestazzjoni fil-qasam ewlieni ta’ prestazzjoni tas-sikurezza proposti mil-Latvja rigward l-effettività tal-ġestjoni tas-sikurezza, imqassma skont l-objettiv tal-ġestjoni tas-sikurezza u espressi bħala livell ta’ implimentazzjoni, huma kif ġej:

Il-Latvja

Miri dwar l-effettività tal-ġestjoni tas-sikurezza, espressi bħala livell ta’ implimentazzjoni, li jvarjaw mil-livell A sa D tal-EASA

Fornitur tas-servizzi tan-navigazzjoni bl-ajru

Objettiv tal-ġestjoni tas-sikurezza

2025

2026

2027

2028

2029

LGS

Politika u objettivi tas-sikurezza

C

C

C

C

C

Ġestjoni tar-riskju għas-sikurezza

C

C

C

C

D

Aċċertament tas-sikurezza

C

C

C

C

C

Promozzjoni tas-sikurezza

C

C

C

C

C

Kultura tas-sikurezza

C

C

C

C

C

(12)

Il-Kummissjoni tosserva li l-miri ta’ prestazzjoni tas-sikurezza proposti mil-Latvja għall-fornitur tas-servizzi tan-navigazzjoni bl-ajru “LGS” huma ugwali għall-miri tas-sikurezza għall-Unjoni kollha għal kull sena kalendarja mill-2025 sal-2029, għajr għall-objettiv tal-“ġestjoni tar-riskji għas-sikurezza” li għalih il-livell tal-mira għall-Unjoni kollha huwa ppjanat li jintlaħaq fis-sena 2029.

(13)

Il-Kummissjoni tinnota li l-abbozz rivedut tal-pjan ta’ prestazzjoni jistabbilixxi miżuri għal-LGS biex jintlaħqu l-miri tas-sikurezza lokali, bħas-sorveljanza kontinwa tal-għanijiet tas-sikurezza, ir-rappurtar ċar dwar l-implimentazzjoni tal-miżuri ta’ sikurezza, il-valutazzjoni regolari tar-riskji relatati mal-għeja, mezzi xprunati mid-data għall-identifikazzjoni tar-riskji u għodod avvanzati għall-monitoraġġ tal-perikli.

(14)

Abbażi tas-sejbiet stabbiliti fil-premessi (11), (12) u (13) u meta jitqies li l-miri ta’ prestazzjoni tas-sikurezza għall-Unjoni kollha stabbiliti fid-Deċiżjoni ta’ Implimentazzjoni (UE) 2024/1688 iridu jintlaħqu sal-aħħar sena tal-RP4, jiġifieri l-2029, jenħtieġ li l-miri inklużi fl-abbozz rivedut tal-pjan tal-prestazzjoni jitqiesu konsistenti mal-miri ta’ prestazzjoni għall-Unjoni kollha fil-qasam ewlieni tal-prestazzjoni tas-sikurezza.

Valutazzjoni tal-miri ambjentali

(15)

Fir-rigward tal-qasam ewlieni ta’ prestazzjoni tal-ambjent, il-konsistenza tal-miri inklużi fl-abbozz rivedut tal-pjan ta’ prestazzjoni rigward l-effiċjenza tat-titjir medja orizzontali en route tat-trajettorja reali ġiet ivvalutata abbażi tal-kriterju stabbilit fil-punt 1.2 tal-Anness IV tar-Regolament ta’ Implimentazzjoni (UE) 2019/317. Għaldaqstant, il-miri ambjentali proposti tal-Latvja tqabblu mal-valuri referenzjarji tal-effiċjenza tat-titjir en route orizzontali rilevanti stabbiliti fil-Pjan ta’ Titjib tan-Network Ewropew tar-Rotot (“ERNIP”), imfassal f’konformità mal-Anness I tar-Regolament ta’ Implimentazzjoni tal-Kummissjoni (UE) 2019/123 (8) u disponibbli fiż-żmien tal-adozzjoni tal-miri ta’ prestazzjoni għall-Unjoni kollha għall-RP4, jiġifieri fit-2 ta’ Lulju 2024.

(16)

Il-miri ta’ prestazzjoni ambjentali proposti mil-Latvja għall-RP4 u l-valuri referenzjarji nazzjonali korrispondenti mill-ERNIP, espressi bħala l-effiċjenza tat-titjir medja orizzontali en route tat-trajettorja reali, huma kif ġej:

Il-Latvja

2025

2026

2027

2028

2029

Miri fil-qasam ewlieni ta’ prestazzjoni tal-ambjent, espressi bħala l-effiċjenza tat-titjir medja orizzontali en route tat-trajettorja reali

7,96  %

7,95  %

7,94  %

7,93  %

7,92  %

Valuri referenzjarji

7,96  %

7,95  %

7,94  %

7,93  %

7,92  %

(17)

Il-Kummissjoni tosserva li l-miri ambjentali proposti mil-Latvja huma ugwali għall-valuri referenzjarji nazzjonali korrispondenti għal kull sena kalendarja tal-RP4.

(18)

Il-Kummissjoni tinnota li fl-abbozz rivedut tal-pjan ta’ prestazzjoni, il-Latvja ppreżentat miżuri biex jintlaħqu l-miri tal-ambjent lokali li jinkludu l-implimentazzjoni tal-ispazju tal-ajru transfruntier b’rotot liberi, it-titjib tal-istrutturi taż-żoni ta’ mmanuvrar fit-terminal, l-użu flessibbli tal-ispazju tal-ajru u koordinazzjoni ċivili-militari msaħħa f’kuntest transfruntier.

(19)

Abbażi tas-sejbiet fil-premessi (16), (17) u (18), il-miri fil-qasam ewlieni ta’ prestazzjoni tal-ambjent inklużi fl-abbozz rivedut tal-pjan ta’ prestazzjoni tal-Latvja jenħtieġ li jitqiesu konsistenti mal-miri ta’ prestazzjoni għall-Unjoni kollha għall-RP4.

Valutazzjoni tal-miri tal-kapaċità

(20)

Fir-rigward tal-qasam ewlieni ta’ prestazzjoni tal-kapaċità, il-konsistenza tal-miri inklużi fl-abbozz rivedut tal-pjan ta’ prestazzjoni fir-rigward tad-dewmien medju fil-ġestjoni tal-fluss tat-traffiku tal-ajru (“ATFM”) en route għal kull titjira ġie vvalutat abbażi tal-kriterju stabbilit fil-punt 1.3 tal-Anness IV tar-Regolament ta’ Implimentazzjoni (UE) 2019/317. Għaldaqstant, il-miri tal-kapaċità proposti tal-Latvja tqabblu mal-valuri referenzjarji rilevanti stabbiliti fil-Pjan Operattiv għan-Network, imfassal f’konformità mal-Artikolu 9 tar-Regolament ta’ Implimentazzjoni (UE) 2019/123 u disponibbli fiż-żmien tal-adozzjoni tal-miri ta’ prestazzjoni għall-Unjoni kollha għall-RP4, jiġifieri fit-2 ta’ Lulju 2024.

(21)

Il-miri tal-kapaċità en route proposti mil-Latvja għall-RP4, espressi f’minuti ta’ dewmien tal-ATFM għal kull titjira, u l-valuri referenzjarji korrispondenti mill-Pjan Operattiv għan-Network huma kif ġej:

Il-Latvja

2025

2026

2027

2028

2029

Miri fil-qasam ewlieni ta’ prestazzjoni tal-kapaċità, espressi f’minuti ta’ dewmien en route tal-ATFM għal kull titjira

0,06

0,05

0,03

0,02

0,02

Valuri referenzjarji

0,06

0,05

0,03

0,02

0,02

(22)

Il-Kummissjoni tosserva li l-miri tal-kapaċità proposti mil-Latvja huma ugwali għall-valuri referenzjarji nazzjonali korrispondenti għal kull sena kalendarja tal-RP4.

(23)

Il-Kummissjoni tinnota li fl-abbozz rivedut tal-pjan ta’ prestazzjoni, il-Latvja ppreżentat miżuri biex jintlaħqu l-miri ta’ prestazzjoni tal-kapaċità lokali, bħal rikonfigurazzjoni tal-istrutturi tal-ispazju tal-ajru fi żminijiet tal-ogħla domanda tat-traffiku u r-reklutaġġ u t-taħriġ ta’ kontrolluri tat-traffiku tal-ajru (“ATCOs”) addizzjonali.

(24)

Abbażi tas-sejbiet fil-premessi (21), (22) u (23), il-miri fil-qasam ewlieni ta’ prestazzjoni tal-kapaċità inklużi fl-abbozz rivedut tal-pjan ta’ prestazzjoni tal-Latvja jenħtieġ li jitqiesu konsistenti mal-miri ta’ prestazzjoni għall-Unjoni kollha għall-RP4.

Valutazzjoni tal-miri tal-kosteffiċjenza

(25)

Il-Kummissjoni kkonkludiet fid-Deċiżjoni ta’ Implimentazzjoni (UE) 2025/1040 li l-miri proposti tal-kosteffiċjenza en route inklużi fl-abbozz tal-pjan ta’ prestazzjoni tal-Latvja ma kinux konsistenti mal-miri ta’ prestazzjoni għall-Unjoni kollha. Il-Latvja pproponiet miri riveduti tal-kosteffiċjenza en route fl-abbozz rivedut tal-pjan tal-prestazzjoni tagħha.

(26)

It-tabella ta’ hawn taħt turi l-miri riveduti tal-prestazzjoni li jinsabu fl-abbozz rivedut tal-pjan ta’ prestazzjoni.

Żona tal-imposti en route tal-Latvja

Valur bażi tal-2019

Valur bażi tal-2024

2025

2026

2027

2028

2029

Miri riveduti tal-kosteffiċjenza espressi bħala kost unitarju ddeterminat en route (f’termini reali bil-prezzijiet tal-2022)

28,57 EUR

39,90 EUR

40,80 EUR

44,77 EUR

49,34 EUR

51,27 EUR

51,36 EUR

(27)

Il-Kummissjoni tinnota li l-miri tal-prestazzjoni tal-kosteffiċjenza tal-Latvja ġew riveduti ’l isfel għal kull sena tal-perjodu referenzjarju, li jikkostitwixxi titjib meta mqabbel mal-abbozz tal-pjan ta’ prestazzjoni mressaq fl-2024. Il-Latvja rrevediet ’il fuq is-suppożizzjonijiet tat-traffiku li fuqhom huma bbażati l-miri għall-RP4, f’konformità mat-tbassir bażi ta’ STATFOR tal-Eurocontrol ta’ Frar 2025. Min-naħa l-oħra, il-kostijiet iddeterminati riveduti għall-RP4 huma aktar baxxi mill-kostijiet iddeterminati inizjalment ippreżentati fl-abbozz tal-pjan ta’ prestazzjoni. Għalhekk, kemm ir-reviżjoni taċ-ċifri tat-traffiku kif ukoll tal-kostijiet fl-abbozz rivedut tal-pjan ta’ prestazzjoni kkontribwew għall-kost unitarju ddeterminat annwali (“DUC”) imtejjeb u aktar baxx.

(28)

Il-kostijiet iddeterminati riveduti espressi f’EUR f’termini reali fil-prezzijiet tal-2022 (“EUR2022”) u t-tbassir aġġornat tat-traffiku għaż-żona tal-imposti, kif ippreżentati fl-abbozz rivedut tal-pjan ta’ prestazzjoni, jidhru fit-tabella ta’ hawn taħt:

Żona tal-imposti en route tal-Latvja

2025

2026

2027

2028

2029

Kostijiet iddeterminati riveduti maħsuba f’termini reali fil-prezzijiet tal-2022 (l-abbozz rivedut tal-pjan ta’ prestazzjoni)

26 M EUR

30 M EUR

33 M EUR

35 M EUR

36 M EUR

Tbassir aġġornat tat-traffiku (abbozz rivedut tal-pjan tal-prestazzjoni), espress f’eluf ta’ unitajiet ta’ servizzi en route

633

660

673

688

700

(29)

Il-Kummissjoni vvalutat il-konsistenza tal-miri riveduti tal-kosteffiċjenza għaż-żona tal-imposti en route tal-Latvja abbażi tal-kriterji stabbiliti fil-punti 1.4(a), (b) u (c) tal-Anness IV tar-Regolament ta’ Implimentazzjoni (UE) 2019/317.

(30)

Rigward il-kriterju stabbilit fil-punt 1.4(a) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li x-xejra tad-DUC en route fil-livell taż-żona tal-imposti ta’ +5,2 % matul l-RP4 hija anqas mix-xejra mal-Unjoni kollha ta’ - 1,2 % matul l-istess perjodu.

(31)

Fir-rigward tal-kriterju stabbilit fil-punt 1.4(b) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li x-xejra fit-tul tad-DUC en route fil-livell taż-żona tal-imposti bejn l-2019 u l-2029 ta’ + 6,7 % hija inqas mix-xejra fit-tul mal-Unjoni kollha matul it-tielet perjodu referenzjarju (“RP3”) u l-RP4 ta’ - 1,0 % matul l-istess perjodu.

(32)

Iżda l-Kummissjoni tinnota li minħabba l-gwerra ta’ aggressjoni tar-Russja kontra l-Ukrajna, l-Latvja tilfet sehem sinifikanti mit-titjiriet li jgħaddu minn fuqha li storikament kienet isservi. Tul l-RP4, dak it-tnaqqis fit-traffiku se jissokta jħalli impatt konsiderevoli fuq il-prestazzjoni tal-kosteffiċjenza tal-fornitur tas-servizzi tan-navigazzjoni bl-ajru tal-Latvja u, b’mod partikolari, iħalli effett negattiv fuq ix-xejra fit-tul tad-DUC tal-Latvja kkalkulata tul l-RP3 u l-RP4 f’daqqa.

(33)

Għalhekk huwa meħtieġ u xieraq li jiġi eżaminat, għall-fini tal-kriterju ta’ valutazzjoni msemmi fil-premessa (31), jekk il-Latvja tissodisfax ix-xejra fit-tul tad-DUC għall-Unjoni kollha fl-assenza taċ-ċirkostanzi msemmija fil-premessa (32).

(34)

Għal dan l-għan, il-Kummissjoni kkalkulat mill-ġdid ix-xejra fit-tul tad-DUC fid-dawl tat-telf strutturali stmat tat-traffiku għal-Latvja bħala konsegwenza tal-gwerra fl-Ukrajna, imkejla f’unitajiet ta’ servizz en route. Dak il-kalkolu mill-ġdid jirriżulta f’xejra aġġustata fit-tul tad-DUC għal-Latvja ta’ - 1,1 %, li tisboq ix-xejra fit-tul tad-DUC għall-Unjoni kollha ta’ - 1,0 %. Għalhekk, huwa konkluż li l-Latvja tissodisfa l-kriterju ta’ valutazzjoni msemmi fil-premessi (31) wara li tqis l-effett tat-tnaqqis sinifikanti tat-traffiku li jirriżulta mill-gwerra fl-Ukrajna.

(35)

Fir-rigward tal-kriterju stabbilit fil-punt 1.4(c) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li l-valur bażi għad-DUC ta’ EUR 39,90 tal-Latvja fl-EUR2022 hu 27,3 % inqas mill-valur bażi medju ta’ EUR 54,89 fl-EUR2022 tal-grupp komparatur rilevanti stabbilit fl-Artikolu 7, il-punt (d), tad-Deċiżjoni ta’ Implimentazzjoni (UE) 2024/1688.

(36)

Kif deskritt fil-premessa (35), huwa ċar li l-valur bażi tad-DUC tal-Latvja għall-2024 huwa ferm aktar baxx mill-valur bażi medju tal-grupp komparatur rilevanti. Barra minn hekk, kif jidher fil-premessi (32), (33) u (34), meta teskludi l-impatt negattiv tal-bidliet fit-traffiku li jirriżultaw mill-gwerra ta’ aggressjoni tar-Russja kontra l-Ukrajna, il-Latvja tissodisfa ix-xejra fit-tul tad-DUC għall-Unjoni kollha. Għaldaqstant, il-Kummissjoni tqis li d-devjazzjoni mix-xejra tad-DUC fit-tul għall-Unjoni kollha għall-RP4 msemmija fil-premessa (30) ma tipprekludix il-miri ta’ prestazzjoni tal-kosteffiċjenza tal-Latvja milli jkunu konsistenti mal-miri ta’ prestazzjoni tal-kosteffiċjenza għall-Unjoni kollha.

(37)

Abbażi tas-sejbiet stabbiliti fil-premessi (26) sa (36), il-Kummissjoni tqis li l-Latvja indirizzat b’mod adegwat ir-rakkomandazzjonijiet stabbiliti fl-Artikolu 3 tad-Deċiżjoni ta’ Implimentazzjoni (UE) 2025/1040 fir-rigward tar-reviżjoni tal-miri tal-prestazzjoni tal-kosteffiċjenza lokali tagħha. Għalhekk, il-Kummissjoni tikkonkludi li l-miri riveduti tal-kosteffiċjenza inklużi mil-Latvja fl-abbozz rivedut tal-pjan ta’ prestazzjoni jenħtieġ li jitqiesu konsistenti mal-miri ta’ prestazzjoni għall-Unjoni kollha għall-RP4.

KONKLUŻJONIJIET

(38)

Fid-dawl ta’ dak kollu li ntqal hawn fuq, il-Kummissjoni sabet li l-miri ta’ prestazzjoni inklużi fl-abbozz rivedut tal-pjan ta’ prestazzjoni tal-Latvja huma konsistenti mal-miri ta’ prestazzjoni għall-Unjoni kollha għall-RP4,

ADOTTAT DIN ID-DEĊIŻJONI:

Artikolu 1

Il-miri ta’ prestazzjoni inklużi fl-abbozz tal-pjan ta’ prestazzjoni mressaq mil-Latvja għar-raba’ perjodu referenzjarju (“RP4”), elenkati fl-Anness ta’ din id-Deċiżjoni, huma konsistenti mal-miri ta’ prestazzjoni għall-Unjoni kollha għall-RP4 stabbiliti fid-Deċiżjoni ta’ Implimentazzjoni (UE) 2024/1688.

Artikolu 2

Din id-Deċiżjoni hija indirizzata lir-Repubblika tal-Latvja.

Magħmul fi Brussell, it-23 ta’ April 2026.

Għall-Kummissjoni

Apostolos TZITZIKOSTAS

Membru tal-Kummissjoni


(1)   ĠU L 96, 31.3.2004, p. 1, ELI: http://data.europa.eu/eli/reg/2004/549/oj.

(2)   OJ L, 2024/2803, 11.11.2024, ELI: http://data.europa.eu/eli/reg/2024/2803/oj.

(3)   ĠU L 56, 25.2.2019, p. 1, ELI: http://data.europa.eu/eli/reg_impl/2019/317/oj.

(4)  Id-Deċiżjoni ta’ Implimentazzjoni tal-Kummissjoni (UE) 2024/1688 tat-12 ta’ Ġunju 2024 li tistabbilixxi l-miri ta’ prestazzjoni għall-Unjoni kollha għan-network tal-ġestjoni tat-traffiku tal-ajru għar-raba’ perjodu referenzjarju mill-1 ta’ Jannar 2025 sal-31 ta’ Diċembru 2029 (ĠU L, 2024/1688, 17.6.2024, ELI: http://data.europa.eu/eli/dec_impl/2024/1688/oj).

(5)  Id-Deċiżjoni ta’ Implimentazzjoni tal-Kummissjoni (UE) 2025/1040 tas-16 ta’ Mejju 2025 dwar l-inkonsistenza ta’ ċerti miri tal-prestazzjoni inklużi fl-abbozzi tal-pjanijiet tal-prestazzjoni tal-blokok tal-ispazju tal-ajru nazzjonali u funzjonali ppreżentati mill-Belġju, mid-Danimarka, mill-Ġermanja, mill-Estonja, mill-Irlanda, mill-Greċja, minn Franza, mil-Latvja, mil-Lussemburgu, min-Netherlands u mis-Slovakkja skont ir-Regolament (KE) Nru 549/2004 tal-Parlament Ewropew u tal-Kunsill mal-miri tal-prestazzjoni għall-Unjoni kollha għar-raba’ perjodu referenzjarju tal-iskema ta’ prestazzjoni u ta’ imposti tal-Ajru Uniku Ewropew (ĠU L, 2025/1040, 23.5.2025, ELI: http://data.europa.eu/eli/dec_impl/2025/1040/oj).

(6)  Ir-Regolament (KE) Nru 550/2004 tal-Parlament Ewropew u tal-Kunsill tal-10 ta’ Marzu 2004 dwar il-forniment ta’ servizzi ta’ navigazzjoni tal-ajru fl-ajru uniku Ewropew (ir-Regolament tal-forniment ta’ servizz) (ĠU L 96, 31.3.2004, p. 10, ELI: http://data.europa.eu/eli/reg/2004/550/oj).

(7)  L-Opinjoni Nru 1-2026 tal-PRB dwar il-valutazzjoni tal-abbozzi riveduti tal-pjanijiet ta’ prestazzjoni għar-raba’ perjodu referenzjarju (RP4), it-28 ta’ Jannar 2026.

(8)  Ir-Regolament ta’ Implimentazzjoni tal-Kummissjoni (UE) 2019/123 tal-24 ta’ Jannar 2019 li jistabbilixxi regoli dettaljati għall-implimentazzjoni tal-funzjonijiet tan-network tal-ġestjoni tat-traffiku tal-ajru (ATM) u li jħassar ir-Regolament tal-Kummissjoni (UE) Nru 677/2011 (ĠU L 28, 31.1.2019, p. 1, ELI: http://data.europa.eu/eli/reg_impl/2019/123/oj).


ANNESS

Miri ta’ prestazzjoni inklużi fl-abbozz rivedut tal-pjan ta’ prestazzjoni mressaq mil-Latvja skont ir-Regolament (KE) Nru 549/2004, li nstabu konsistenti mal-miri ta’ prestazzjoni għall-Unjoni kollha għar-raba’ perjodu referenzjarju

QASAM EWLIENI TA’ PRESTAZZJONI TAS-SIKUREZZA

Effettività tal-ġestjoni tas-sikurezza

Il-Latvja

Miri dwar l-effettività tal-ġestjoni tas-sikurezza, espressi bħala livell ta’ implimentazzjoni, li jvarjaw mil-livell A sa D tal-EASA

Fornitur tas-servizzi tan-navigazzjoni bl-ajru kkonċernat

Objettiv tal-ġestjoni tas-sikurezza

2025

2026

2027

2028

2029

LGS

Politika u objettivi tas-sikurezza

C

C

C

C

C

Ġestjoni tar-riskju għas-sikurezza

C

C

C

C

D

Aċċertament tas-sikurezza

C

C

C

C

C

Promozzjoni tas-sikurezza

C

C

C

C

C

Kultura tas-sikurezza

C

C

C

C

C

QASAM EWLIENI TA’ PRESTAZZJONI TAL-AMBJENT

Effiċjenza tat-titjir medja orizzontali en route tat-trajettorja reali

Il-Latvja

2025

2026

2027

2028

2029

Miri fil-qasam ewlieni ta’ prestazzjoni tal-ambjent, espressi bħala l-effiċjenza tat-titjir medja orizzontali en route tat-trajettorja reali

7,96  %

7,95  %

7,94  %

7,93  %

7,92  %

QASAM EWLIENI TA’ PRESTAZZJONI TAL-KAPAĊITÀ

Dewmien medju tal-ATFM en route f’minuti għal kull titjira

Il-Latvja

2025

2026

2027

2028

2029

Miri fil-qasam ewlieni tal-prestazzjoni tal-kapaċità, espressi f’minuti ta’ dewmien tal-ATFM għal kull titjira

0,06

0,05

0,03

0,02

0,02

QASAM EWLIENI TA’ PRESTAZZJONI TAL-KOSTEFFIĊJENZA

Kost unitarju ddeterminat għas-servizzi tan-navigazzjoni bl-ajru en route

Żona tal-imposti en route tal-Latvja

Valur bażi tal-2019

Valur bażi tal-2024

2025

2026

2027

2028

2029

Miri riveduti tal-kosteffiċjenza, espressi bħala kost unitarju ddeterminat en route (f’termini reali bil-prezzijiet tal-2022)

28,57

EUR

39,90

EUR

40,80

EUR

44,77

EUR

49,34

EUR

51,27

EUR

51,36

EUR


ELI: http://data.europa.eu/eli/dec/2026/1031/oj

ISSN 1977-074X (electronic edition)