(1)

L-infezzjoni bil-virus tal-marda tal-infafet fil-ġilda hija marda infettiva li tittieħed b’vettur u li taffettwa lill-annimali bovini. L-okkorrenza tagħha tista’ tħalli impatt gravi fuq il-popolazzjoni tal-annimali kkonċernati u fuq il-profittabbiltà tal-biedja, u tfixkel il-movimenti ta’ dawk l-annimali u tal-prodotti tagħhom fl-Unjoni u fl-esportazzjonijiet lejn pajjiżi terzi. Fil-każ ta’ tifqigħa ta’ infezzjoni bil-virus tal-marda tal-infafet fil-ġilda fl-annimali bovini, hemm riskju serju li dik il-marda tinxtered fi stabbilimenti oħra tal-annimali bovini, b’mod partikolari minħabba l-mod ewlieni tat-trażmissjoni tagħha b’vetturi.

(2)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż l-infezzjoni bil-virus tal-marda tal-infafet fil-ġilda, u ċerti miżuri li jridu jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tkun tinkludi mqar żona ta’ protezzjoni, żona ta’ sorveljanza u, jekk ikun meħtieġ, żoni ristretti ulterjuri madwar jew maġenb iż-żoni ta’ protezzjoni u ta’ sorveljanza.

(3)

Id-Deċiżjoni ta’ Implimentazzjoni tal-Kummissjoni (UE) 2025/1582 (4) tistipula ċerti miżuri ta’ emerġenza relatati mat-tifqigħat tal-infezzjoni bil-virus tal-marda tal-infafet fil-ġilda fl-Italja. L-Artikolu 1 tad-Deċiżjoni ta’ Implimentazzjoni (UE) 2025/1582 jipprevedi l-istabbiliment ta’ żoni ristretti fl-Italja li jinkludu żoni ta’ protezzjoni u żoni ta’ sorveljanza, f’konformità mal-Artikolu 21 tar-Regolament Delegat (UE) 2020/687, kif ukoll l-istabbiliment ta’ żoni tat-tilqim, f’konformità mal-Parti 1 tal-Anness IX tar-Regolament Delegat tal-Kummissjoni (UE) 2023/361 (5). Barra minn hekk, l-Artikolu 1 tad-Deċiżjoni ta’ Implimentazzjoni (UE) 2025/1582 jipprevedi li dawn iż-żoni ta’ protezzjoni u ż-żoni ta’ sorveljanza, kif ukoll iż-żoni ta’ tilqim, iridu jinkludu mqar iż-żoni elenkati fl-Annessi I u II tagħha, u l-miżuri li jridu jiġu applikati f’dawk iż-żoni jridu jiġu applikati mqar sad-dati stabbiliti f’dawk l-Annessi.

(4)

Mill-aħħar emenda tad-Deċiżjoni ta’ Implimentazzjoni (UE) 2025/1582 bid-Deċiżjoni ta’ Implimentazzjoni tal-Kummissjoni (UE) 2026/190 (6), l-Italja nnotifikat lill-Kummissjoni dwar tliet tifqigħat ġodda tal-infezzjoni bil-virus tal-marda tal-infafet fil-ġilda fi stabbilimenti li jżommu l-annimali bovini fil-muniċipalitajiet ta’ Muravera u Villaputzu, fir-reġjun ta’ Sarrabus, Sardinja, li ġew irrapportati fil-15 u s-17 ta’ April 2026. B’reazzjoni għal dawk it-tifqigħat, l-Italja stabbiliet żoni ta’ protezzjoni u żoni ta’ sorveljanza fil-muniċipalitajiet ta’ Muravera u Villaputzu, fir-reġjun ta’ Sarrabus, Sardinja, fejn jiġu applikati l-miżuri ta’ kontroll tal-mard stabbiliti fir-Regolament Delegat (UE) 2020/687.

(5)

Id-daqs taż-żoni indikati bħala żoni ta’ protezzjoni u żoni ta’ sorveljanza fl-Anness I tad-Deċiżjoni ta’ Implimentazzjoni (UE) 2025/1582, kif emendata b’din id-Deċiżjoni, kif ukoll it-tul tal-miżuri li jridu jiġu applikati fihom, huma bbażati fuq il-kriterji stabbiliti fl-Artikolu 64(1) tar-Regolament (UE) 2016/429 u fuq ir-regoli stabbiliti fir-Regolament Delegat (UE) 2020/687. Il-kriterji applikati għall-għażla tad-daqs taż-żoni ta’ protezzjoni u taż-żoni ta’ sorveljanza, kif ukoll tat-tul tal-miżuri li jridu jiġu applikati fihom, ma jqisux biss is-sitwazzjoni epidemjoloġika fir-rigward tal-infezzjoni bil-virus tal-marda tal-infafet fil-ġilda fiż-żoni milquta minn dik il-marda, iżda anki fatturi epidemjoloġiċi oħra, fosthom il-parametri ġeografiċi u r-riskju li l-marda tkompli tinxtered fid-dawl tal-preżenza ta’ vetturi insetti. Fl-għażla tat-tul tal-miżuri previsti f’din id-Deċiżjoni tqiesu wkoll l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (7).

(6)

L-Artikolu 2 tad-Deċiżjoni ta’ Implimentazzjoni (UE) 2025/1582 jipprojbixxi l-movimenti tal-annimali bovini miż-żoni ta’ protezzjoni u ta’ sorveljanza stabbiliti fl-Anness I ta’ dik id-Deċiżjoni ta’ Implimentazzjoni għal destinazzjonijiet barra mill-perimetru estern ta’ dawk iż-żoni fl-Italja jew barra minn dak l-Istat Membru sad-dati elenkati f’dak l-Anness. Fid-dawl taż-żona ristretta eżistenti bħalissa fir-reġjun ta’ Sardinja, dik il-projbizzjoni jenħtieġ li tkompli tapplika fiż-żoni ta’ protezzjoni u ta’ sorveljanza stabbiliti fid-Deċiżjoni ta’ Implimentazzjoni (UE) 2025/1582, kif emendata b’din id-Deċiżjoni.

(7)

Iż-żoni ta’ tilqim stabbiliti fid-Deċiżjoni ta’ Implimentazzjoni (UE) 2025/1582 jibqgħu meħtieġa, u t-tilqim jenħtieġ li jkompli f’konformità mal-pjan uffiċjali tat-tilqim tal-Italja datat l-1 ta’ Lulju 2025, li ġie sottomess skont l-Artikolu 6(4), il-punt (a), tar-Regolament Delegat (UE) 2023/361.

(8)

Għalhekk, l-Annessi tad-Deċiżjoni ta’ Implimentazzjoni (UE) 2025/1582 jenħtieġ li jiġu emendati kif xieraq.

(9)

Fid-dawl tas-sitwazzjoni epidemjoloġika fl-Italja, l-emendi li jridu jsiru fid-Deċiżjoni ta’ Implimentazzjoni (UE) 2025/1582 b’din id-Deċiżjoni jenħtieġ li japplikaw malajr kemm jista’ jkun biex ikun evitat aktar tixrid tal-marda fl-Italja, lejn Stati Membri oħra jew lejn pajjiżi terzi u biex ikun evitat kull tfixkil bla bżonn għall-kummerċ fl-Unjoni jew kwalunkwe ostakli mhux ġustifikati għall-kummerċ ma’ pajjiżi terzi.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,