European flag

Iris Oifigiúil
an Aontais Eorpaigh

GA

Sraith L


2024/2926

26.11.2024

RIALACHÁN TARMLIGTHE (AE) 2024/2926 ÓN gCOIMISIÚN

an 12 Iúil 2024

maidir le cur chun feidhme oibleagáidí idirnáisiúnta an Aontais, dá dtagraítear in Airteagal 15(2) de Rialachán (AE) Uimh. 1380/2013 ó Pharlaimint na hEorpa agus ón gComhairle, faoin gComhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile, a mhéid a bhaineann leis an bhfíogach gobach

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 1380/2013 ó Pharlaimint na hEorpa agus ón gComhairle an 11 Nollaig 2013 maidir leis an gComhbheartas Iascaigh, lena leasaítear Rialacháin (CE) Uimh. 1954/2003 agus (CE) Uimh. 1224/2009 ón gComhairle agus lena n-aisghairtear Rialacháin (CE) Uimh. 2371/2002 agus (CE) Uimh. 639/2004 ón gComhairle agus Cinneadh 2004/585/CE ón gComhairle (1), agus go háirithe Airteagal 15(2) de,

De bharr an mhéid seo a leanas:

(1)

An 29 Aibreán 2021 ghlac an Chomhairle Cinneadh (AE) 2021/689 maidir le tabhairt i gcrích an Chomhaontaithe Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (dá ngairtear ‘an Comhaontú Trádála agus Comhair’ anseo feasta) (2). Tháinig an Comhaontú Trádála agus Comhair i bhfeidhm an 1 Bealtaine 2021.

(2)

Foráiltear le hAirteagal 498(2) den Chomhaontú Trádála agus Comhair go bhfuil na Páirtithe sa Chomhaontú sin le comhairliúchán a thionól gach bliain chun teacht ar chomhaontú, faoin 10 Nollaig gach bliain, maidir leis na gabhálacha iomlána incheadaithe (TACanna) don bhliain dár gcionn le haghaidh na stoc a liostaítear in Iarscríbhinn 35 a ghabhann leis an gComhaontú. Féadfaidh an comhairliúchán sin na hábhair bhreise dá dtagraítear in Airteagal 498(4) den Chomhaontú a chumhdach freisin, lena n-áirítear liosta de na stoic a bhfuil toirmeasc ar iascaireacht a dhéanamh orthu, TAC a chinneadh d’aon stoc nach liostaítear in Iarscríbhinní 35 ná 36 agus sciartha sonracha na bPáirtithe de na stoic sin, chomh maith le bearta maidir le bainistiú iascaigh.

(3)

Déanann an tAontas an comhairliúchán bliantúil i gcomhréir leis na cuspóirí agus na prionsabail a leagtar amach in Airteagail 2, 3, 28 agus 33 de Rialachán (AE) Uimh. 1380/2013, Airteagail 4 agus 5 de Rialachán (AE) 2019/472 (3) agus (AE) 2018/973 ó Pharlaimint na hEorpa agus ón gComhairle (4) (lena mbunaítear na pleananna ilbhliantúla um stoic a ndéantar iascaireacht orthu in Uiscí an Iarthair agus sa Mhuir Thuaidh faoi seach), agus Cinneadh (AE) 2021/1875 ón gComhairle (5).

(4)

Tá seasamh an Aontais le linn an chomhairliúcháin bhliantúil bunaithe ar an gcomhairle eolaíoch is fearr dá bhfuil ar fáil, comhairle arna soláthar go príomha ag an gComhairle Idirnáisiúnta um Thaiscéalaíocht na Mara (ICES) i gcomhréir le hAirteagal 494(3)(c) den Chomhaontú Trádála agus Comhair.

(5)

I gcomhréir leis an oibleagáid a leagtar amach in Airteagal 498(6) den Chomhaontú sin, déanfaidh cinn toscaireachta na bPáirtithe Taifead i Scríbhinn ina ndéanfar doiciméadú ar na socruithe a rinneadh idir na Páirtithe mar thoradh ar an gcomhairliúchán sin a chur ar fáil agus a shíniú.

(6)

An 6 Nollaig 2023 tháinig an tAontas ar chomhaontú leis an Ríocht Aontaithe maidir le líon substaintiúil TACanna a shocrú le haghaidh 2024 le haghaidh na stoc a liostaítear in Iarscríbhinn 35 a ghabhann leis an gComhaontú Trádála agus Comhair. Rinneadh toradh an chomhairliúcháin a dhoiciméadú i dTaifead i Scríbhinn arna shíniú an 6 Nollaig 2023 (6) agus arna fhorlíonadh le haguisín an 8 Nollaig 2023 (7), i gcomhréir le hAirteagal 498(6) den Chomhaontú Trádála agus Comhair agus Cinneadh (AE) 2021/1875.

(7)

Is stoc é an fíogach gobach (Squalus acanthias) a ndéanann an tAontas agus an Ríocht Aontaithe bainistiú comhpháirteach air. Le linn an chomhairliúcháin bhliantúil, chomhaontaigh an tAontas agus an Ríocht Aontaithe na leibhéil TAC ábhartha, arna ndoiciméadú sa Taifead i Scríbhinn agus san aguisín a ghabhann leis, agus arna gcur chun feidhme ina dhiaidh sin i Rialachán (AE) 2024/257 ón gComhairle (8).

(8)

Ina theannta sin, chomhaontaigh an tAontas agus an Ríocht Aontaithe gur iomchuí cosc a chur ar iascaireacht spriocdhírithe ina ndírítear ar chomhbhailiúcháin de bhaineannaigh aibí, chun cuid den stoc sin atá an-leochaileach ó thaobh básmhaireacht iascaireachta de a chosaint. Chuige sin, chomhaontaigh an tAontas agus an Ríocht Aontaithe, go dtí go ndéanfar athbhreithniú ar an mbeart sin faoin gCoiste Speisialaithe um Iascach arna bhunú leis an gComhaontú Trádála agus Comhair, gur cheart uasmhéid gabhála 100 cm le haghaidh fíogaigh ghobacha a urramú.

(9)

Go dtí go nglacfar uasmhéid gabhála den sórt sin i ndlí an Aontais i gcomhréir le hAirteagal 15(2) de Rialachán (AE) Uimh. 1380/2013, bunaíodh an beart a comhaontaíodh leis an Ríocht Aontaithe in Iarscríbhinn IA a ghabhann le Rialachán (AE) 2024/257. Tá nasc feidhmiúil idir an beart sin agus an TAC i gcomhair fíogaigh ghobacha, ós rud é, in éagmais an bhirt sin, nach n-áiritheodh leibhéal an TAC as féin cosaint leordhóthanach do bhaineannaigh sceite, ar cuid an-leochaileach den phobal iad.

(10)

Is é is aidhm don Rialachán seo fíogaigh ghobacha atá os cionn 100 cm a eisiamh ón oibleagáid gabhálacha a thabhairt i dtír, agus ar an gcaoi sin a áirithiú nach ndéanfar dochar do na heiseamail sin agus go scaoilfear ar ais san fharraige iad go pras i gcás ina ngabhtar de thaisme iad.

(11)

Cuireann an Rialachán seo creat dlíthiúil níos cobhsaí ar fáil, i bhfianaise chineál sealadach na mbeart arna nglacadh ag an gComhairle, ar creat é a scoirfidh, i gcomhréir le hAirteagal 59, an tríú mír, pointe (l), de Rialachán (AE) 2024/257 ón gComhairle, d’fheidhm a bheith aige an dáta a thiocfaidh gníomh tarmligthe i bhfeidhm lena dtugtar isteach bearta comhfhreagracha agus lena rialaítear láimhseáil gabhálacha fíogach gobach atá os cionn 100 cm.

(12)

Leis an Rialachán seo, áirithítear go gcomhlíonfaidh an tAontas a oibleagáidí idirnáisiúnta agus cruthaítear deimhneacht dhlíthiúil agus cothrom iomaíochta d’iascairí an Aontais.

(13)

Ós rud é go bhfuil tionchar díreach ag na bearta dá bhforáiltear sa Rialachán seo ar chaomhnú an stoic, ba cheart an Rialachán seo a theacht i bhfeidhm a luaithe is féidir tar éis a fhoilsithe.

(14)

Ós rud é go rachaidh na bearta a comhaontaíodh sa Taifead i Scríbhinn agus ina aguisín in éag an 31 Nollaig 2024, ba cheart an Rialachán seo scor d’fheidhm a bheith aige an dáta sin freisin,

TAR ÉIS AN RIALACHÁN SEO A GHLACADH:

Airteagal 1

Ábhar agus raon feidhme

Bunaítear leis an Rialachán seo maolú ar an oibleagáid gabhálacha a thabhairt i dtír a leagtar amach in Airteagal 15 de Rialachán (AE) Uimh. 1380/2013 chun oibleagáidí idirnáisiúnta an Aontais a chur chun feidhme a mhéid a bhaineann le stoic chomhroinnte atá faoi réir an chomhairliúcháin iascaigh a thionóltar idir an Ríocht Aontaithe agus an tAontas Eorpach faoin gComhaontú Trádála agus Comhair.

Tá feidhm ag an Rialachán seo maidir le gníomhaíochtaí iascaireachta in uiscí an Aontais nó gníomhaíochtaí iascaireachta a dhéanann soithí iascaireachta de chuid an Aontais lasmuigh d’uiscí an Aontais in uiscí nach bhfuil faoi réir ceannasacht ná dlínse tríú tíortha.

Airteagal 2

Maolú a bhaineann leis an bhfíogach gobach (Squalus acanthias)

De mhaolú ar Airteagal 15(1) de Rialachán (AE) Uimh. 1380/2013, beidh toirmeasc ar spriocdhíriú ar fhíogaigh ghobacha atá os cionn 100 cm ar fad, ar iad a choinneáil ar bord nó a thrasloingsiú, a thabhairt i dtír, a iompar, a stóráil, a thaispeáint nó a chur ar díol, a dhíol nó a mhargú.

Ní dhéanfar dochar d’aon fhíogach gobach atá os cionn 100 cm ar fad a ghabhtar de thaisme agus scaoilfear ar ais san fharraige é go pras.

Airteagal 3

Teacht i bhfeidhm agus cur i bhfeidhm

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh feidhm ag an Rialachán seo go dtí an 31 Nollaig 2024.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 12 Iúil 2024.

Thar ceann an Choimisiúin

An tUachtarán

Ursula VON DER LEYEN


(1)   IO L 354, 28.12.2013, lch. 22, ELI: http://data.europa.eu/eli/reg/2013/1380/oj.

(2)  Cinneadh (AE) 2021/689 ón gComhairle an 29 Aibreán 2021 maidir le tabhairt i gcrích, thar ceann an Aontais, an Chomhaontaithe Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile, agus an Chomhaontaithe idir an tAontas Eorpach agus Ríocht Aontaithe na Breataine Móire agus Thuaisceart Éireann a bhaineann le nósanna imeachta slándála le haghaidh malartú agus cosaint faisnéise rúnaicmithe (IO L 149, 30.4.2021, lch. 2, ELI: http://data.europa.eu/eli/dec/2021/689/oj).

(3)  Rialachán (AE) 2019/472 ó Pharlaimint na hEorpa agus ón gComhairle an 19 Márta 2019 lena mbunaítear plean ilbhliantúil do stoic a dhéantar a iascach in Uiscí an Iarthair agus sna huiscí máguaird agus d’iascaigh a shaothraíonn na stoic sin, lena leasaítear Rialacháin (AE) 2016/1139 agus (AE) 2018/973 agus lena n-aisghairtear Rialacháin (CE) Uimh. 811/2004, (CE) Uimh. 2166/2005, (CE) Uimh. 388/2006, (CE) Uimh. 509/2007 agus (CE) Uimh. 1300/2008 ón gComhairle (IO L 83, 25.3.2019, lch. 1, ELI: http://data.europa.eu/eli/reg/2019/472/oj).

(4)  Rialachán (AE) 2018/973 ó Pharlaimint na hEorpa agus ón gComhairle an 4 Iúil 2018 lena mbunaítear plean ilbhliantúil do stoic ghrinnill sa Mhuir Thuaidh agus don iascach a shaothraíonn na stoic sin, lena sonraítear mionsonraí maidir le cur chun feidhme na hoibleagáide gabhálacha a thabhairt i dtír sa Mhuir Thuaidh agus lena n-aisghairtear Rialachán (CE) Uimh. 676/2007 agus Rialachán (CE) Uimh. 1342/2008 ón gComhairle (IO L 179, 16.7.2018, lch. 1, ELI: http://data.europa.eu/eli/reg/2018/973/oj).

(5)  Cinneadh (AE) 2021/1875 ón gComhairle an 22 Deireadh Fómhair 2021 maidir leis an seasamh atá le glacadh thar ceann an Aontais sna comhairliúcháin bhliantúla leis an Ríocht Aontaithe chun teacht ar chomhaontú maidir leis na gabhálacha iomlána incheadaithe (IO L 378, 26.10.2021, lch. 6, ELI: http://data.europa.eu/eli/dec/2021/1875/oj).

(6)  Taifead i Scríbhinn ar an gcomhairliúchán iascaigh idir an Ríocht Aontaithe agus an tAontas Eorpach le haghaidh 2024: https://oceans-and-fisheries.ec.europa.eu/document/download/543b9dc6-6cb1-48c3-b3b5-6d08c00dbe69_en?filename=2024-eu-uk-fisheries-consultations_en.pdf.

(7)  Aguisín a ghabhann leis an Taifead i Scríbhinn ar an gcomhairliúchán iascaigh idir an Ríocht Aontaithe agus an tAontas Eorpach le haghaidh 2024 arna shíniú an 6 Nollaig 2023: https://oceans-and-fisheries.ec.europa.eu/document/download/304f76cc-de72-4dce-9d27-fe8d4869b002_en?filename=2024-eu-uk-fisheries-consultations_addendum-en.pdf.

(8)  Rialachán (AE) 2024/257 ón gComhairle an 10 Eanáir 2024 lena socraítear le haghaidh 2024, 2025 agus 2026 na deiseanna iascaireachta le haghaidh stoic éisc áirithe, is infheidhme in uiscí an Aontais agus, i gcás soithí iascaireachta de chuid an Aontais, in uiscí áirithe nach uiscí de chuid an Aontais iad, agus lena leasaítear Rialachán (AE) 2023/194, (IO L, 2024/257, 11.1.2024, ELI: http://data.europa.eu/eli/reg/2024/257/oj).


ELI: http://data.europa.eu/eli/reg_del/2024/2926/oj

ISSN 1977-0839 (electronic edition)