(1)

Ag éirí as iarraidh ón tSeicia an 7 Lúnasa 2020, dheonaigh an Chomhairle, trí bhíthin Chinneadh Cur Chun Feidhme (AE) 2020/1345 (2), cúnamh airgeadais don tSeicia i bhfoirm iasachta arb ionann é agus uasmhéid EUR 2 000 000 000 le meánaibíocht uasta 15 bliana, agus tréimhse infhaighteachta 18 mí, d’fhonn iarrachtaí náisiúnta na Seice a chomhlánú chun aghaidh a thabhairt ar thionchar ráig COVID-19 agus chun freagairt ariarmhairtí socheacnamaíocha na ráige sin d’oibrithe agus do dhaoine féinfhostaithe.

(2)

Bhí an iasacht le húsáid ag an tSeicia chun scéimeanna oibre gearr-ama agus bearta comhchosúla a mhaoiniú, bearta dá dtagraítear in Airteagal 3 de Chinneadh Cur Chun Feidhme (AE) 2020/1345.

(3)

De dheasca ráig COVID-19 cuireadh bac ar roinnt mhaith den lucht saothair sa tSeicia. Is é a tháinig as sin mórmhéaduithe tobanna leanúnacha ar chaiteachas poiblí sa tSeicia i ndáil leis na bearta dá dtagraítear in Airteagal 3, pointí (a), (c), (d), agus (e) de Chinneadh Cur Chun Feidhme (AE) 2020/1345.

(4)

Maidir le ráig COVID-19 agus na bearta urghnácha a chuir an tSeicia i bhfeidhm in 2020, 2021 agus 2022 chun srian a choinneáil ar an ráig sin agus ar a tionchar socheacnamaíocha agus a tionchar ar chúrsaí sláinte, d’imir siad tionchar ollmhór ar an airgeadas poiblí agus imríonn go fóill. In 2020, bhí easnamh rialtais ginearálta agus ollfhiachas rialtais 5,8 % agus 37,7 % den olltáirgeacht intíre (OTI) faoi seach ag an tSeicia, a leathnaigh ó 5,9 % go 41,9 % faoi seach ag deireadh 2021. Dé réir réamhaisnéis an earraigh 2022 ón gCoimisiún, táthar á thuar go mbeidh easnamh rialtais ghinearálta agus ollfhiachas rialtais 4,3 % agus 42,8 % den olltáirgeacht intíre faoi seach ag an tSeicia faoi dheireadh 2022. De réir réamhaisnéis eatramhach an tsamhraidh 2022 ón gCoimisiún, measfar go dtiocfaidh méadú 2,3 % ar OTI na Seice in 2022.

(5)

An 22 Meán Fómhair 2022, d’iarr an tSeicia cúnamh airgeadais breise ar an Aontas ar mhéid EUR 2 500 000 000 d’fhonn leanúint dá hiarrachtaí náisiúnta ar tugadh fúthu in 2020, 2021 agus 2022 a chomhlánú chun aghaidh a thabhairt ar thionchar ráig COVID-19 agus chun freagairt ar iarmhairtí socheacnamaíocha na ráige d’oibrithe agus do dhaoine féinfhostaithe. Go sonrach, rinne an tSeicia scéimeanna oibre gearr-ama agus bearta comhchosúla a leagtar amach in aithrisí (6) go (9) a leathnú agus a leasú a thuilleadh.

(6)

Ceapadh an scéim oibre ghearr-ama ar a dtugtar an Clár “Frithvíreas”, dá dtagraítear in Airteagal 3, pointe (a), de Chinneadh Cur Chun Feidhme (AE) 2020/1345, chun cúiteamh a dhéanamh ar chostais pá fostóirí príobháideacha ar cuireadh iallach orthu a ngníomhaíocht eacnamaíoch a chur ar fionraí nó a laghdú go mór mar thoradh díreach ar bhearta arna ndéanamh ag na húdaráis (Rogha “A”), nó go hindíreach mar thoradh ar dhrochéifeachtaí eacnamaíocha na paindéime COVID-19 (Rogha “B”). Is é Rún Uimh. 353 an 31 Márta 2020 ón Rialtas, arna leasú, agus Airteagal 120 d’Acht Uimh. 435/2004 Coll (3), maidir le cúrsaí fostaíochta, arna leasú, an bunús dlí atá leis. Cuireadh síneadh leis an gClár agus leathnaíodh é le Rogha “A breise” trí Rún Uimh. 1039 ón Rialtas an 14 Deireadh Fómhair 2020 chun cúiteamh iomlán ar chostais pá a sholáthar d’fhostóirí ar cuireadh iallach orthu a ngníomhaíocht a chur ar fionraí nó a laghdú mar thoradh ar bhearta arna ndéanamh ag na húdaráis. Cuireadh síneadh leis an gClár freisin trí roinnt chinntí ón rialtas, agus bhí Rogha “A” i bhfeidhm ón 12 Márta 2020 go dtí an 28 Feabhra 2022, bhí Rogha “A breise” i bhfeidhm ón 1 Deireadh Fómhair 2020 go dtí an 31 Bealtaine 2021 agus bhí Rogha “B” i bhfeidhm ón 12 Márta 2020 go dtí an 31 Bealtaine 2021 agus ón 1 Samhain 2021 go dtí an 31 Nollaig 2021.

(7)

Leis an gcéad bhónas cúiteach do dhaoine féinfhostaithe, an Clár dá ngairtear “Pětadvacítka”, dá dtagraítear in Airteagal 3, pointe (c), de Chinneadh Cur Chun Feidhme (AE) 2020/1345, a tugadh isteach le “Dlí Uimh. 159/2020 Coll.” (4), soláthraíodh bónas cúiteach CZK 500 in aghaidh an lae féilire in aghaidh an duine do dhaoine féinfhostaithe ar cuireadh iallach orthu a ngníomhaíocht eacnamaíoch a chur ar fionraí nó a laghdú go mór thar ghnáthluaineacht ghnó mar thoradh ar rioscaí sláinte poiblí COVID-19 nó bearta géarchéime arna ndéanamh ag údaráis phoiblí. Bhí “Pětadvacítka” i bhfeidhm ón 12 Márta 2020 go dtí an 8 Meitheamh 2020. Bhí feidhm ag an leasú ina dhiaidh sin air, Clár “bónas cúiteach an fhómhair”, a tugadh isteach le Dlí Uimh. 461/2020 Coll, (5). ón 5 Deireadh Fómhair 2020 go dtí an 15 Feabhra 2021 agus soláthraíodh leis bónas cánach CZK 500 in aghaidh an lae féilire do dhaoine féinfhostaithe ar cuireadh iallach orthu a ngníomhaíocht eacnamaíoch a chur ar fionraí nó a laghdú go mór de dheasca rioscaí sláinte poiblí nó bearta éigeandála arna ndéanamh ag údaráis phoiblí. Le Dlí Uimh. 95/2021 Coll (6). agus le rúin ghaolmhara ón Rialtas (Uimh. 154/2021 (7) agus 188/2021 (8)) tugadh isteach leasú eile, dá ngairtear “an bónas cúiteach nua le haghaidh 2021” a bhí i bhfeidhm ón 1 Feabhra 2021 go dtí an 31 Bealtaine 2021 agus lenar méadaíodh méid an bhónais cánach go CZK 1 000 in aghaidh an lae. Ba é an méid a bhí sa leasú deireanach den bhónas cúiteach sin do dhaoine féinfhostaithe, “an bónas cúiteach le haghaidh 2022”, a tugadh isteach le Dlí Uimh. 519/2021 Coll (9)., 1 000 CZK in aghaidh an lae freisin agus bhí sé i bhfeidhm ón 22 Samhain 2021 go dtí an 31 Eanáir 2022.

(8)

Ba é “Dlí Uimh. 136/2020 Coll.” (10) (le haghaidh slándáil sóisialta) agus “Dlí Uimh. 134/2020 Coll.” (11) (le haghaidh slándáil sláinte) a bhí mar bhunús dlí leis an tarscaoileadh páirteach ar ranníocaíochtaí slándála sóisialta agus ranníocaíochtaí slándála sláinte dá dtagraítear in Airteagal 3, pointe (d), de Chinneadh Cur Chun Feidhme (AE) 2020/1345. Ghlac an Stát air féin íocaíocht na ranníocaíochta comhfhreagraí a bhí dlite gach mí ó mhí an Mhárta go mí Lúnasa 2020 maidir le ranníocaíochtaí slándála sóisialta agus sláinte a bhí dlite ag daoine féinfhostaithe. Cé gur tháinig deireadh leis an gClár i mí Lúnasa 2020, b’éigean méideanna breise a íoc in 2021 mar thoradh ar shocruithe a bhain le réamhíocaíochtaí a d’íoc daoine féinfhostaithe in 2020. Is éard atá sa bheart ioncaim tarscaoilte don Rialtas, ar féidir a mheas, chun críche cur chun feidhme Rialachán (AE) 2020/672, go bhfuil siad coibhéiseach le caiteachas poiblí.

(9)

An “Liúntas cúraim” do dhaoine féinfhostaithe, dá dtagraítear in Airteagal 3, pointe (e) de Chinneadh Cur Chun Feidhme (AE) 2020/1345, ba é a bhí mar bhunús dlí leis na Rúin Uimh. 262 an 19 Márta 2020 (12), Uimh. 311 an 26 Márta 2020, Uimh. 354 an 31 Márta 2020, Uimh. 514 an 4 Bealtaine 2020, Uimh. 552 an 18 Bealtaine 2020, Uimh. 1053 an 16 Deireadh Fómhair 2020, Uimh. 1260 an 30 Samhain 2020 agus Uimh. 446 an 10 Bealtaine 2021 ón Rialtas agus Airteagal 14 d’Acht Uimh. 218/2000 Coll. (13) maidir le rialacha buiséadacha, arna leasú, a bhfuil feidhm aige maidir le daoine féinfhostaithe i dtáirgeadh príomhúil talmhaíochta agus foraoiseachta, agus Airteagal 3 pointe (h) de Dhlí Uimh. 47/2002 Coll (14)., arna leasú, maidir le tacaíocht do FBManna, a bhfuil feidhm aige maidir le gach duine féinfhostaithe eile. Leis an gClár, cúitítear an caillteanas ioncaim arna thabhú ag daoine féinfhostaithe mar thoradh ar an ngá atá ann aire a thabhairt do leanaí nó do dhaoine spléacha de dheasca dúnadh saoráidí cúraim leanaí agus saoráidí cúraim shóisialta. Is éard a bhí sa mhéid laethúil tacaíochta CZK 424 do mhí an Mhárta 2020 agus CZK 500 don tréimhse ó mhí Aibreáin go mí an Mheithimh 2020. Cuireadh síneadh leis an gClár go dtí an tréimhse ó mhí Dheireadh Fómhair 2020 go dtí mí na Bealtaine 2021 nuair a soláthraíodh tacaíocht laethúil CZK 400 leis.

(10)

Comhlíonann an tSeicia na coinníollacha maidir le cúnamh airgeadais a iarraidh a leagtar amach in Airteagal 3 de Rialachán (AE) 2020/672. Chuir an tSeicia fianaise chuí ar fáil don Choimisiún a léiríonn go bhfuil méadú de EUR 5 349 588 352 tagtha ar chaiteachas poiblí iarbhír agus ar chaiteachas poiblí pleanáilte ón 1 Feabhra 2020 amach mar thoradh ar bhearta náisiúnta a glacadh chun aghaidh a thabhairt ar éifeachtaí socheacnamaíocha ráig COVID-19. Is mórmhéadú tobann é sin mar go mbaineann sé freisin le síneadh nó leasú ar bhearta náisiúnta atá ann cheana a bhaineann go díreach leis an scéim oibre gearr-ama agus bearta comhchosúla lena gcumhdaítear cuid mhór gnóthas agus lucht saothair sa tSeicia. Tá sé beartaithe ag an tSeicia EUR 215 333 982 den mhéid méadaithe caiteachais a mhaoiniú trí chistí an Aontais agus EUR 634 254 370 trína maoiniú féin.

(11)

Chuaigh an Coimisiún i gcomhairle leis an Seicia agus d’fhíoraigh sé an mórmhéadú tobann ar an gcaiteachas poiblí iarbhír agus beartaithe a bhaineann go díreach le scéimeanna oibre gearr-ama agus bearta comhchosúla, dá dtagraítear san iarraidh an 22 Meán Fómhair 2022, i gcomhréir le hAirteagal 6 de Rialachán (AE) 2020/672.

(12)

Ba cheart, dá bhrí sin, cúnamh airgeadais a chur ar fáil d’fhonn cuidiú leis an tSeicia aghaidh a thabhairt ar éifeachtaí socheacnamaíocha an tsuaite eacnamaíoch ghéir a tharla de dheasca ráig COVID-19. Ba cheart don Choimisiún na cinntí maidir le haibíochtaí, méid agus scaoileadh tráthchodanna agus tráinsí a dhéanamh i ndlúthchomhar leis na húdaráis náisiúnta.

(13)

Ós rud é go bhfuil an tréimhse infhaighteachta a léirítear i gCinneadh Cur Chun Feidhme (AE) 2020/1345 imithe in éag, tá gá le tréimhse infhaighteachta nua le haghaidh an chúnaimh airgeadais bhreise. Ba cheart síneadh 21 mhí a chur leis an tréimhse infhaighteachta 18 mí arna deonú le Cinneadh Cur Chun Feidhme (AE) 2020/1345 agus, dá thoradh sin, ba cheart an tréimhse infhaighteachta iomlán a bheith 39 mí dar tús an chéad lá tar éis theacht i bhfeidhm Chinneadh Cur Chun Feidhme (AE) 2020/1345.

(14)

Ba cheart don tSeicia agus don Choimisiún an Cinneadh seo a chur san áireamh sa chomhaontú iasachta dá dtagraítear in Airteagal 8(2) de Rialachán (AE) 2020/672.

(15)

Ba cheart don Chinneadh seo a bheith gan dochar do thoradh aon nós imeachta a bhaineann le saobhadh fheidhmiú an mhargaidh inmheánaigh, go háirithe de bhun Airteagail 107 agus 108 den Chonradh. Ní sháraítear an ceanglas atá ar na Ballstáit cásanna státchabhracha féideartha a chur in iúl don Choimisiún faoi Airteagal 108 den Chonradh.

(16)

Ba cheart don tSeicia an Coimisiún a chur ar an eolas ar bhonn rialta maidir le cur chun feidhme an chaiteachais phoiblí atá beartaithe, chun a chumasú don Choimisiún measúnú a dhéanamh ar an méid den chaiteachas sin a chur an tSeicia chun feidhme.

(17)

Rinneadh an cinneadh chun cúnamh airgeadais a sholáthar agus riachtanais reatha agus riachtanais ionchasacha na Seice á gcur san áireamh, chomh maith le hiarrataí ar chúnamh airgeadais de bhun Rialachán (AE) 2020/672 a cuireadh isteach cheana nó atá beartaithe le cur isteach ag Ballstáit eile a mheas, agus prionsabail na córa comhionainne, na dlúthpháirtíochta, na comhréireachta agus na trédhearcachta á gcur i bhfeidhm an tráth céanna,

(1)

Leasaítear Airteagal 2 mar a leanas:

(2)

Cuirtear an méid seo a leanas in ionad Airteagal 3: