European flag

Iris Oifigiúil
an Aontais Eorpaigh

GA

Sraith L


2026/2501

13.11.2026

RIALACHÁN (AE) 2026/2501 ÓN gCOIMISIÚN

an 12 Samhain 2026

lena leasaítear Iarscríbhinn XVII a ghabhann le Rialachán (CE) Uimh. 1907/2006 ó Pharlaimint na hEorpa agus ón gComhairle maidir le Clárú, Meastóireacht, Údarú agus Srianadh Ceimiceán (REACH) a mhéid a bhaineann le luaidhe i dtácla iascaireachta áirithe

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (CE) Uimh. 1907/2006 ó Pharlaimint na hEorpa agus ón gComhairle an 18 Nollaig 2006 maidir le Clárú, Meastóireacht, Údarú agus Srianadh Ceimiceán (REACH), lena mbunaítear Gníomhaireacht Eorpach Ceimiceán, lena leasaítear Treoir 1999/45/CE agus lena n-aisghairtear Rialachán (CEE) Uimh. 793/93 ón gComhairle agus Rialachán (CE) Uimh. 1488/94 ón gCoimisiún, chomh maith le Treoir 76/769/CEE ón gComhairle agus Treoracha 91/155/CEE, 93/67/CEE, 93/105/CE agus 2000/21/CE ón gCoimisiún (1), agus go háirithe Airteagal 68(1) de,

De bharr an mhéid seo a leanas:

(1)

Leagtar síos in Iarscríbhinn XVII a ghabhann le Rialachán (CE) Uimh. 1907/2006 srianta maidir le substaintí, meascáin agus earraí contúirteacha áirithe a mhonarú, a chur ar an margadh agus a úsáid. Tá srianta in iontráil 63 den Iarscríbhinn sin i ndáil le luaidhe (CAS Uimh. 7439-92-1, CE Uimh. 231-100-4) agus comhdhúile luaidhe (‘luaidhe’), lena n-áirítear srian ar luaidhe in urchair ghunna i mbogaigh nó i ngiorracht dóibh, srian a tugadh isteach le Rialachán (AE) 2021/57 ón gCoimisiún (2).

(2)

Aicmítear luaidhe faoi Rialachán (CE) Uimh. 1272/2008 ó Pharlaimint na hEorpa agus ón gComhairle (3) mar rud atá an-tocsaineach don saol uisceach, agus tocsaineach don atáirgeadh, mar gheall ar a héifeachtaí díobhálacha ar thorthúlacht agus ar fhorbairt néarchóras an fhéatais agus an linbh, rud as a n-eascraíonn damáiste buan agus caillteanas sainuimhreach intleachta (IQ). Níor sainaithníodh aon tairseach shábháilte maidir le tiúchan luaidhe nach bhfuil aon drochéifeacht ag luaidhe ar shláinte an duine fúithi. Tá baint ag luaidhe freisin le riosca méadaithe galar cardashoithíoch, galar duáin agus galar lárchóras na néaróg i ndaoine fásta. Thairis sin, má nochtar ainmhithe, go háirithe éin, do luaidhe, is féidir raon éifeachtaí tocsaineolaíocha géara agus ainsealacha a bheith aige sin dóibh, lena n-áirítear bás (4).

(3)

Is Páirtithe Conarthacha iad an tAontas agus a Bhallstáit sa Choinbhinsiún maidir le Caomhnú na Speiceas Imirceach Ainmhithe Fiáine (CSI) (5). D’fhorbair an Mheitheal um Nimhiú a Chosc Treoirlínte chun an Riosca Nimhithe d’Éin Imirceacha a Chosc (‘Treoirlínte’), a glacadh in 2014 le Rún CSI 11.15. Moltar sna Treoirlínte deireadh a chur de réir a chéile le húsáid armlóin luaidhe ar fud na ngnáthóg uile agus deireadh a chur de réir a chéile le húsáid meáchan iascaireachta luaidhe i limistéir inar léiríodh go bhfuil éin imirceacha go háirithe i mbaol nimhiú luaidhe.

(4)

An 16 Iúil 2019, d’iarr an Coimisiún (6) ar an nGníomhaireacht Eorpach Ceimiceán (‘an Ghníomhaireacht’), de bhun Airteagal 69(1) de Rialachán (CE) Uimh. 1907/2006, sainchomhad (‘sainchomhad Iarscríbhinn XV’) a ullmhú chun aghaidh a thabhairt ar na hábhair imní maidir le sláinte an duine agus an comhshaol a bhaineann le luaidhe sna nithe seo a leanas: (i) armlón, lena n-áirítear urchair ghunna a úsáidtear i dtír-raonta seachas bogaigh agus piléir a úsáidtear i mbogaigh agus i dtír-raonta seachas bogaigh araon; agus (ii) tácla iascaireachta. Níor leathnaíodh an sainordú chun úsáidí armlóin le haghaidh lámhach faoi dhíon a chumhdach, ná chun úsáidí ag na póilíní, ag an arm agus ag fórsaí slándála eile a chumhdach.

(5)

An 24 Márta 2021, d’fhoilsigh an Ghníomhaireacht sainchomhad Iarscríbhinn XV (7) inar tháinig sí ar an gconclúid go bhfuil riosca ag baint le luaidhe a bheith in armlón agus i dtácla iascaireachta áirithe don chomhshaol agus do shláinte an duine, go háirithe do phobail leochaileacha amhail leanaí, riosca nach rialaítear go leordhóthanach agus nach mór aghaidh a thabhairt air ar bhonn uile-Aontais. Tháinig an Ghníomhaireacht ar an gconclúid gurb é an toradh a bhíonn ar ionghabháil armlóin luaidhe-bhunaithe, tromán luaidhe-bhunaithe (‘tromáin luaidhe’) agus baoití bréige luaidhe-bhunaithe (‘baoití bréige luaidhe’) ó fhiach, lámhach spóirt agus gníomhaíochtaí iascaireachta ag éin agus ainmhithe eile nimhiú agus bás ainmhithe go minic. Ina theannta sin, fuair sé amach go bhféadfadh carnadh luaidhe ag raonta lámhaigh spóirt a bheith ina chúis le huisce dromchla luaidhe-thruaillithe a láisteadh isteach i sruthchúrsaí áitiúla agus go bhféadfadh sé difear a dhéanamh do screamhuisce, rud a d’fhéadfadh daoine, beostoc agus fiadhúlra a nimhiú. Tháinig an Ghníomhaireacht ar an gconclúid freisin go bhfuil rioscaí ann do shláinte an duine a bhaineann le feoil ainmhithe a mharaítear le harmlón luaidhe a chaitheamh, go háirithe i gcás leanaí 7 mbliana d’aois agus níos óige, nó nuair a bhíonn armlón luaidhe nó tromáin luaidhe nó baoití bréige luaidhe á ndéanamh acu sa bhaile.

(6)

Mheas an Ghníomhaireacht, má leantar de scaoileadh luaidhe ó lámhach agus iascaireacht san Aontas faoi láthair, go scaoilfear thart ar 876 000 tona luaidhe isteach sa chomhshaol sna 20 bliain amach romhainn. Leis sin, déanfar an méid seo a leanas: (i) cuirfear 7 milliún éan ar a laghad i mbaol nimhithe trí thromáin agus baoití bréige a ionghabháil; (ii) cuirfear 135 mhilliún éan ar a laghad i mbaol nimhithe trí urchair ghunna luaidhe a ionghabháil; agus (iii) cuirfear 14 mhilliún éan ar a laghad i mbaol nimhithe trí luaidhe a ionghabháil trí bhia a chaitheamh. Ina theannta sin, mheas an Ghníomhaireacht go mbíonn thart ar 13,8 milliún duine ó theaghlaigh fiagaithe, lena n-áirítear 1,1 milliún leanbh 7 mbliana d’aois nó níos óige, i mbaol nochta luaidhe ó ghéimfheoil gach bliain.

(7)

I bhfianaise an mhéid sin, mhol an Ghníomhaireacht srian ar luaidhe in armlón agus i dtácla iascaireachta áirithe lena n-áirítear, inter alia, srian ar luaidhe a chur ar an margadh agus a úsáid i dtiúchan atá cothrom le 1 % nó níos mó ná sin i dtromáin, i mbaoití bréige, i sreanga iascaireachta agus i dtromáin intiteáin. Thairis sin, mhol an Ghníomhaireacht oibleagáidí faisnéise a fhorchur ar mhiondíoltóirí na dtáirgí sin agus oibleagáidí lipéadaithe a fhorchur ar sholáthróirí armlóin. Bhí sé i gceist leis an srian atá beartaithe astaíochtaí luaidhe a laghdú thart ar 630 000 tona, agus 48 300 tona de sin ó úsáid luaidhe i dtácla iascaireachta a sheachaint, sna 20 bliain tar éis thabhairt isteach an tsriain sin. Laghdú 72 % a bheadh i gceist leis sin i gcomparáid le cás gan an srian atá beartaithe. Chuirfeadh an srian cosc freisin ar chaillteanas IQ i dtuairim is 7 000 leanbh san Aontas in aghaidh na bliana, rud a d’fhágfadh go mbeadh coigilteas leasa thart ar EUR 70 milliún in aghaidh na bliana ann.

(8)

I sainchomhad Iarscríbhinn XV uaithi, shainaithin an Ghníomhaireacht go leor roghanna malartacha ar luaidhe i dtácla iascaireachta (amhail prás, coincréit, púróga, cruach, stán, sinc agus tungstan) ach d’admhaigh sí go ndéanann cuid de na roghanna malartacha sin, go háirithe prás agus sinc, dochar don chomhshaol freisin. Thug an Ghníomhaireacht dá haire go bhfuil roghanna malartacha ar shreanga iascaireachta luaidhe ar fáil go forleathan i siopaí miondíola agus gur féidir teicnící éagsúla a chur in ionad tromán intiteáin, nó tromáin mhalartacha nach bhfuil sé beartaithe iad a scaoileadh le linn úsáide agus, dá bhrí sin, nach mbíonn siad ina gcúis le scaoileadh díreach d’aon ghnó luaidhe isteach sa chomhshaol.

(9)

Mhol an Ghníomhaireacht gur cheart feidhm a bheith ag na srianta ar shreanga iascaireachta agus ar thromáin intiteáin a luaithe is féidir, i bhfianaise na roghanna malartacha atá ar fáil agus an ghá atá le scaoileadh díreach agus d’aon ghnó luaidhe isteach sa chomhshaol a chosc. Chun ligean d’oibreoirí dul in oiriúint do na rialacha nua agus na bearta bainistithe riosca is gá a chur i bhfeidhm, mhol an Ghníomhaireacht cur i bhfeidhm iarchurtha na srianta ar earraí seachas sreanga iascaireachta agus tromáin intiteáin laistigh de raon feidhme shainchomhad Iarscríbhinn XV agus cur i bhfeidhm iarchurtha na n-oibleagáidí faisnéise agus lipéadaithe.

(10)

Bhreithnigh an Ghníomhaireacht maolú maidir le hurchair scoilte a bhfuil meáchan 0,06g nó níos lú iontu agus a chuirtear ar an margadh i bpacáistíocht atá doirtdíonach agus do-oscailte ag leanaí ach chinn sí an srian a choinneáil mar gheall ar an riosca iarmharach d’éin.

(11)

Níl forálacha náisiúnta i bhfeidhm ach ag líon teoranta Ballstát lena gcuirtear toirmeasc ar úsáid luaidhe san iascaireacht chun astaíochtaí luaidhe agus nochtadh do luaidhe a laghdú. Léiríodh i sainchomhad Iarscríbhinn XV go bhfuil gá le gníomhaíocht uile-Aontais chun aghaidh a thabhairt ar an riosca a bhaineann le luaidhe i dtácla iascaireachta áirithe chun leibhéal comhchuibhithe cosanta a áirithiú ar fud an Aontais.

(12)

An 2 Meitheamh 2022, ghlac Coiste um Measúnú Riosca (CMR) na Gníomhaireachta tuairim de bhun Airteagal 70 de Rialachán (CE) Uimh. 1907/2006 maidir le sainchomhad Iarscríbhinn XV. Sa tuairim uaidh, d’aontaigh CMR le conclúid na Gníomhaireachta go mbaineann raon leathan rioscaí do shláinte an duine agus don chomhshaol araon le húsáid luaidhe san iascaireacht. Tháinig CMR ar an gconclúid gurbh í an srian a mhol an Ghníomhaireacht an beart uile-Aontais is iomchuí chun aghaidh a thabhairt ar na rioscaí sainaitheanta.

(13)

Níor thacaigh CMR le maolú le haghaidh urchair scoilte a bhfuil meáchan 0,06g nó níos lú iontu, fiú má chuirtear ar an margadh iad i bpacáistíocht atá doirtdíonach agus do-oscailte ag leanaí, toisc go laghdódh sé sin an leibhéal cosanta comhshaoil a sholáthraítear leis an srian.

(14)

Thacaigh CMR leis na ceanglais lipéadaithe agus faisnéise a mhol an Ghníomhaireacht maidir le luaidhe i dtácla iascaireachta áirithe. Mar sin féin, mhol CMR mearbhall a sheachaint tríd an teorainn tiúchana luaidhe lena spreagfaí cur i bhfeidhm na gceanglas a mhéadú ó 0,3 % go 1 % de réir meáchain, chun í a ailíniú leis an teorainn tiúchana lena spreagtar an toirmeasc ar chur ar an margadh agus ar úsáid.

(15)

An 2 Nollaig 2022, ghlac an Coiste um Anailís Shocheacnamaíoch (CASE) tuairim de bhun Airteagal 71(1) de Rialachán (CE) Uimh. 1907/2006. Tháinig sé ar an gconclúid gurbh é an srian atá beartaithe an beart uile-Aontais is iomchuí chun aghaidh a thabhairt ar na rioscaí sainaitheanta mar a chinn CMR, ar choinníoll go modhnaítear na coinníollacha mar a mhol CASE. Cuirtear san áireamh sa chonclúid sin comhréireacht shochair shocheacnamaíocha an bhirt lena chostais shocheacnamaíocha.

(16)

Níorbh fhéidir le CASE teacht ar chonclúid i dtaobh cé acu a bheadh nó nach mbeadh údar, ar fhorais shocheacnamaíocha, le maolú ar úsáid luaidhe in urchair scoilte a bhfuil meáchan 0,06g nó níos lú iontu. Tharla sé sin mar gheall ar easpa fianaise ar infhaighteacht agus feidhmíocht theicniúil roghanna malartacha agus ar na tionchair shocheacnamaíocha a bhaineann le srian ar an úsáid sin.

(17)

Ní raibh dóthain faisnéise ag CASE chun teacht ar chonclúid i dtaobh an mbeadh údar iomlán leis an gcostas a bhaineann le faisnéis a sholáthar ag an díolphointe (mar a mhol an Ghníomhaireacht agus le tacaíocht ó CMR), nó an bhféadfadh bearta oideachais eile tionchar níos éifeachtaí a imirt ar ghnásaíocht cheannaigh. D’aontaigh CASE le CMR, maidir leis an teorainn tiúchana 1 % de réir meáchain a moladh chun srian a chur le luaidhe a chur ar an margadh agus a úsáid i dtácla iascaireachta áirithe, gur cheart feidhm a bheith aige sin maidir le ceanglais lipéadaithe agus faisnéise freisin chun mearbhall a sheachaint agus chun cuidiú le forfheidhmiú. Thacaigh CASE freisin le togra CMR gan na ceanglais lipéadaithe agus faisnéise a chur i bhfeidhm maidir le roghanna malartacha ina bhfuil copar agus cóimhiotail chopair ach amháin nuair is 3 % de réir meáchain an cion luaidhe nó nuair is mó ná sin é.

(18)

Chuathas i gcomhairle leis an bhFóram um Malartú Faisnéise maidir le Forfheidhmiú (an ‘Fóram’) i gcomhréir le hAirteagal 77(4), pointe (h), de Rialachán (CE) Uimh. 1907/2006. Cuireadh na moltaí uaidh san áireamh.

(19)

An 27 Feabhra 2023, chuir an Ghníomhaireacht tuairim CMR agus CASE (8) faoi bhráid an Choimisiúin.

(20)

Agus sainchomhad Iarscríbhinn XV, tuairim CMR agus CASE, an tionchar socheacnamaíoch agus infhaighteacht roghanna malartacha á gcur san áireamh, measann an Coimisiún go bhfuil riosca do-ghlactha ann don chomhshaol agus do shláinte an duine de thoradh úsáid luaidhe in armlón agus i dtácla iascaireachta áirithe, agus gur cheart aghaidh a thabhairt ar an riosca sin ar bhonn uile-Aontais. Is iomchuí, dá bhrí sin, srian a chur le cur ar an margadh agus úsáid armlóin den sórt sin agus tácla iascaireachta den sórt sin.

(21)

Chun castacht a laghdú agus soiléireacht dhlíthiúil a mhéadú, measann an Coimisiún gur cheart dó an srian ar luaidhe in armlón agus i dtácla iascaireachta áirithe, mar a mholtar i sainchomhad Iarscríbhinn XV, a dtugtar aghaidh air i dtuairim CMR agus CASE, agus a ndearnadh measúnú air sa chomhairle a chuir an Fóram ar fáil, a ghlacadh trí bhíthin dhá Rialachán ar leithligh.

(22)

Ba cheart feidhm a bheith ag an srian maidir le tácla iascaireachta áirithe a chur ar an margadh le haghaidh iascaireacht tráchtála agus iascaireacht áineasa araon. Os a choinne sin, maidir leis an úsáid, ardaíodh san Fhóram go sonrach an tsaincheist go mbeadh sé an-deacair an toirmeasc ar úsáid le haghaidh iascaireacht áineasa a fhorfheidhmiú ós rud é go mbaineann sé le daoine agus tithe príobháideacha. Ina theannta sin, tiocfaidh laghdú le himeacht ama ar úsáid an tácla iascaireachta le haghaidh iascaireacht áineasa ar aon nós mar thoradh ar an srian ar chur ar an margadh. Dá bhrí sin, níor cheart feidhm a bheith ag an srian ar úsáid tácla iascaireachta áirithe ach amháin maidir le hiascaireacht tráchtála, agus níor cheart úsáid luaidhe i dtácla iascaireachta áineasa a chomhchuibhiú leis an Rialachán seo agus, dá bhrí sin, níor cheart cosc a chur ar na Ballstáit leis an Rialachán seo bearta a ghlacadh chun cosaint an chomhshaoil nó shláinte an duine a áirithiú i ndáil leis sin.

(23)

Ba cheart feidhm a bheith ag an srian ar luaidhe i dtácla iascaireachta áirithe maidir le tácla iascaireachta den sórt sin ina bhfuil tiúchan luaidhe 1 % nó níos mó de réir meáchain. Meastar gur leor an teorainn tiúchana 1 % chun aghaidh a thabhairt ar an riosca sainaitheanta agus gur féidir le táirgeoirí roghanna malartacha í a bhaint amach go héasca, ós rud é gur dócha go mbeidh luaidhe mar eisíontas i gcuid de na roghanna malartacha sin.

(24)

Measann an Coimisiún nach bhfuil baol ann go n-ionghabhfaidh éin tromáin a bhfuil meáchan níos mó ná 1 kg iontu agus nár cheart, dá bhrí sin, iad a shrianadh. Measann an Coimisiún freisin gur cheart feidhm a bheith ag an srian ar shreanga iascaireachta agus ar thromáin intiteáin a chur ar an margadh agus a úsáid tar éis tréimhse 6 mhí, chun cosc tapa a chur ar scaoileadh luaidhe isteach sa chomhshaol go díreach agus d’aon ghnó agus an tráth céanna chun dóthain ama a thabhairt d’oibreoirí oiriúnú don srian. Thairis sin, aontaíonn an Coimisiún leis an nGníomhaireacht, le CMR agus le CASE nach gcuireann meáchan atá iniata, leabaithe nó snáithithe i líon iascaireachta nó i líne iascaireachta leis an riosca sainaitheanta d’ainmhithe, go háirithe d’éin. Dá bhrí sin, measann an Coimisiún nár cheart meáchain den sórt sin a chumhdach leis an srian.

(25)

Maidir le baoití bréige iascaireachta ina bhfuil cóimhiotail chopair, tá údar le maolú lena gceadaítear sna baoití bréige sin tiúchan luaidhe níos airde ná 1 % ach níos lú ná 3 % de réir meáchain chun athruithe ar innealra as a n-eascraíonn méaduithe móra ar chostais táirgthe a sheachaint agus táirgeadh leanúnach baoití bréige práis a áirithiú, arb iad na roghanna malartacha is coitianta ar bhaoití bréige luaidhe iad agus a bhfuil luaidhe iontu faoi láthair i dtiúchan idir 1 % agus 3 %. Mar sin féin, ba cheart athbhreithniú a dhéanamh ar an maolú sin tar éis 10 mbliana chun a fhíorú ar forbraíodh cóimhiotail chopair nua ina bhfuil níos lú ná 1 % luaidhe de réir meáchain.

(26)

Aithníonn an Coimisiún na deacrachtaí teicniúla a bhaineann le roghanna malartacha ar luaidhe a aimsiú atá intuargainte go leor agus trom go leor lena n-úsáid in urchair scoilte an-bheaga. Measann sé, dá bhrí sin, go bhfuil údar le maolú maidir le húsáid luaidhe in urchair scoilte a bhfuil meáchan 0,06g nó níos lú iontu má chuirtear na hurchair scoilte ar an margadh i bpacáistíocht atá doirtdíonach agus do-oscailte ag leanaí chun scaoileadh de thaisme isteach sa chomhshaol a íoslaghdú. Measann an Coimisiún freisin gur cheart athbhreithniú a dhéanamh ar an maolú sin tar éis 10 mbliana chun a mheas ar forbraíodh roghanna malartacha nua agus an bhfuil údar fós leis an maolú.

(27)

Aontaíonn an Coimisiún leis an nGníomhaireacht agus le CMR go bhfuil údar le ceanglas ar mhiondíoltóirí faisnéis a thaispeáint ag díolphointí fisiceacha agus ar líne, agus ar phacáistíocht, chun rabhadh a thabhairt d’úsáideoirí maidir leis na rioscaí a bhaineann le húsáid a bhaint as tromáin luaidhe agus baoití bréige luaidhe.

(28)

Chun dramhaíl neamhriachtanach a sheachaint, níor cheart feidhm a bheith ag an srian maidir le húsáid tromán iascaireachta agus baoití bréige iascaireachta áirithe le haghaidh iascaireacht tráchtála a cuireadh ar an margadh san Aontas sular tháinig an srian sin i bhfeidhm.

(29)

Tá forálacha náisiúnta i bhfeidhm ag roinnt Ballstát chun an comhshaol nó sláinte an duine a chosaint, ar forálacha iad lena gcuirtear toirmeasc nó srian ar úsáid luaidhe i mbaoití bréige, i dtromáin nó i sreanga iascaireachta, ar forálacha iad atá níos déine ná na forálacha a leagtar síos sa Rialachán seo. Dá gceanglófaí ar na Ballstáit sin an leibhéal cosanta atá acu cheana ar nochtadh do luaidhe a laghdú chun an Rialachán seo a chomhlíonadh, d’fhéadfaí úsáid níos mó a bhaint as luaidhe sna Ballstáit sin. Ní bheadh an toradh sin ag luí leis an ardleibhéal cosanta a cheanglaítear le hAirteagal 114(3) den Chonradh. Dá bhrí sin, ba cheart cead a bheith ag na Ballstáit forálacha níos déine a choinneáil maidir le húsáid tácla iascaireachta áirithe.

(30)

Ba cheart, dá bhrí sin, Rialachán (CE) Uimh. 1907/2006 a leasú dá réir sin.

(31)

Tá na bearta dá bhforáiltear sa Rialachán seo i gcomhréir leis an tuairim ón gCoiste arna chur ar bun faoi Airteagal 133 de Rialachán (CE) Uimh. 1907/2006,

TAR ÉIS AN RIALACHÁN SEO A GHLACADH:

Airteagal 1

Leasaítear Iarscríbhinn XVII a ghabhann le Rialachán (CE) Uimh. 1907/2006 i gcomhréir leis an Iarscríbhinn a ghabhann leis an Rialachán seo.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 12 Samhain 2026.

Thar ceann an Choimisiúin

An tUachtarán

Ursula VON DER LEYEN


(1)   IO L 396, 30.12.2006, lch. 1, ELI: http://data.europa.eu/eli/reg/2006/1907/oj.

(2)  Rialachán (AE) 2021/57 ón gCoimisiún an 25 Eanáir 2021 lena leasaítear Iarscríbhinn XVII a ghabhann le Rialachán (CE) Uimh. 1907/2006 ó Pharlaimint na hEorpa agus ón gComhairle maidir le Clárú, Meastóireacht, Údarú agus Srianadh Ceimiceán (REACH) i dtaca le luaidhe in urchair ghunna i mbogaigh nó i ngiorracht dóibh (IO L 24, 26.1.2021, lch. 19, ELI: http://data.europa.eu/eli/reg/2021/57/oj).

(3)  Rialachán (CE) Uimh. 1272/2008 ó Pharlaimint na hEorpa agus ón gComhairle an 16 Nollaig 2008 maidir le haicmiú, lipéadú agus pacáistiú substaintí agus meascán, agus lena leasaítear agus lena n-aisghairtear Treoir 67/548/CEE agus Treoir 1999/45/CE, agus lena leasaítear Rialachán (CE) Uimh. 1907/2006 (IO L 353, 31.12.2008, lch. 1, ELI: http://data.europa.eu/eli/reg/2008/1272/oj).

(4)  An Coiste um Measúnú Riosca (CMR) agus an Coiste um Anailís Shocheacnamaíoch (CASE), Background document to the Opinion on the Annex XV dossier proposing restrictions on Lead in shot [Doiciméad cúlra a ghabhann leis an Tuairim maidir le sainchomhad Iarscríbhinn XV ina moltar srianta ar Luaidhe in urchair], lch. 3, https://echa.europa.eu/documents/10162/28acf817-61a6-3ca6-4e85-a71ef0e07740.

(5)   https://www.cms.int/en/convention-text.

(6)   https://echa.europa.eu/documents/10162/17233/rest_lead_ammunition_COM_request_en.pdf.

(7)  An Ghníomhaireacht Eorpach Ceimiceán, Annex XV Restriction Report – Lead in outdoor shooting and fishing [Tuarascáil Srianta Iarscríbhinn XV – Luaidhe i lámhach amuigh faoin aer agus in iascaireacht], 24 Márta 2021, https://echa.europa.eu/documents/10162/da9bf395-e6c3-b48e-396f-afc8dcef0b21.

(8)  An Coiste um Measúnú Riosca (CMR) agus an Coiste um Anailís Shocheacnamaíoch (CASE), Opinion on an Annex XV dossier proposing restrictions on lead and its compounds [Tuairim maidir le sainchomhad Iarscríbhinn XV ina moltar srianta ar luaidhe agus ar a comhdhúile], an 2 Nollaig 2022, https://echa.europa.eu/documents/10162/2c82ef18-ce5d-4b4f-8ff0-002932154acc.


IARSCRÍBHINN

In Iarscríbhinn XVII a ghabhann le Rialachán (CE) Uimh. 1907/2006, cuirtear na míreanna seo a leanas isteach in iontráil 63, colún 2:

 

‘21.

Ní chuirfear ar an margadh iad le haghaidh aon chineál iascaireachta, ná ní úsáidfear iad le haghaidh iascaireacht tráchtála, i dtiúchan luaidhe (arna shloinneadh mar mhiotal) atá cothrom le 1 % de réir meáchain nó atá níos mó ná sin, sna nithe seo a leanas:

(a)

tromáin agus baoití bréige a bhfuil meáchan 50g nó níos lú iontu, agus nach gcumhdaítear le pointe (c) den mhír seo, ón 3 Nollaig 2029;

(b)

tromáin agus baoití bréige a bhfuil meáchan 1kg nó níos lú iontu, ach níos mó ná 50g, agus nach gcumhdaítear le pointe (c) den mhír seo, ón 3 Nollaig 2031;

(c)

i sreanga iascaireachta agus i dtromáin intiteáin, ón 3 Márta 2027.

22.

Ón 3 Márta 2027 amach, déanfaidh miondíoltóirí tromán iascaireachta agus baoití bréige iascaireachta d’aon toise nó meáchan, ina bhfuil luaidhe i dtiúchain atá cothrom le 1 % nó níos mó ná sin de réir meáchain, an fhaisnéis seo a leanas a chur ar taispeáint go soiléir agus go feiceálach ag an díolphointe agus i ndlúthghaireacht do na táirgí a luaitear thuas nó, i gcás ciandíolachán, sa tairiscint ciandíolacháin:

“ FOLÁIREAMH: tá luaidhe sa táirge seo atá an-tocsaineach don chomhshaol agus a d’fhéadfadh damáiste a dhéanamh do thorthúlacht nó don leanbh sa bhroinn. San Aontas, tá srian ar luaidhe a chur ar an margadh agus a úsáid sna cineálacha tácla iascaireachta a liostaítear thíos ó na dátaí seo a leanas amach:

—

ón 3 Nollaig 2029, i gcás tromáin iascaireachta agus baoití bréige iascaireachta a bhfuil meáchan 50g nó níos lú iontu

—

ón 3 Nollaig 2031, i gcás tromáin iascaireachta agus baoití bréige iascaireachta a bhfuil meáchan 1kg nó níos lú iontu, ach níos mó ná 50g.

—

ón 3 Márta 2027, i gcás sreanga iascaireachta agus tromáin intiteáin d’aon mheáchan.

Tá tuilleadh eolais, lena n-áirítear eolas maidir le hinfhaighteacht roghanna malartacha atá saor ó luaidhe, ar fáil ag [www.echa.europa.eu].”

Beidh an fhaisnéis dá dtagraítear sa chéad fhomhír i dteangacha oifigiúla an Bhallstáit ina bhfuil an díolphointe bunaithe nó, i gcás ciandíolachán, i dteangacha oifigiúla an Bhallstáit ina dtairgtear an ciandíolachán, mura bhforálann an Ballstát lena mbaineann a mhalairt maidir leis na teangacha sin.

23.

De mhaolú air sin, ní bheidh feidhm ag míreanna 21 ná 22 maidir leis na nithe seo a leanas:

(a)

baoití bréige atá déanta as cóimhiotail chopair ina bhfuil tiúchan luaidhe (arna shloinneadh mar mhiotal) níos lú ná 3 % de réir meáchain;

(b)

urchair scoilte a bhfuil meáchan 0,06g nó níos lú iontu agus a chuirtear ar an margadh i bpacáistíocht atá doirtdíonach agus do-oscailte ag leanaí.

Déanfaidh an Coimisiún athbhreithniú ar na maoluithe dá dtagraítear i bpointí (a) agus (b), bunaithe ar thuarascáil a chuirfidh an Ghníomhaireacht ar fáil, tar éis an 3 Nollaig 2036.

24.

De mhaolú air sin, ní bheidh feidhm ag mír 21, pointí (a) agus (b), maidir le húsáid tromán iascaireachta agus baoití bréige iascaireachta a chuirtear ar an margadh san Aontas roimh an 3 Nollaig 2029 agus an 3 Nollaig 2031, faoi seach.

25.

Féadfaidh na Ballstáit forálacha náisiúnta maidir le cosaint an chomhshaoil nó shláinte an duine a choinneáil ar bun, ar forálacha iad atá níos déine ná na forálacha dá bhforáiltear i míreanna 21-24, ar choinníoll go gcomhlíonann na bearta sin an dá choinníoll seo a leanas:

(a)

tá siad i bhfeidhm ón 3 Nollaig 2026;

(b)

cuireann siad srian ar úsáid baoití bréige, tromán agus sreang iascaireachta a bhfuil luaidhe iontu, ach ní chuireann siad srian ar na nithe sin a chur ar an margadh.

26.

Cuirfidh na Ballstáit téacs na bhforálacha náisiúnta dá dtagraítear i míreanna 25 in iúl don Choimisiún gan mhoill. Déanfaidh an Coimisiún aon téacs maidir le forálacha náisiúnta den sórt sin a gheobhaidh sé a chur ar fáil go poiblí gan mhoill.

27.

Chun críocha mhíreanna 21 go 26:

(a)

ciallaíonn ‘tromán’ meáchan atá ceangailte, nó a bhfuil sé beartaithe é a cheangal, de líne iascaireachta, de bhaoite bréige iascaireachta nó de líon iascaireachta chun é a choinneáil faoin uisce, nó in áit áirithe, ach nach meáchan é atá iniata, leabaithe nó snáithithe i líon nó líne iascaireachta;

(b)

ciallaíonn ‘baoite bréige’ rud a úsáidtear chun iasc nó ainmhithe eile a mhealladh, ionas gur féidir iad a ghabháil;

(c)

ciallaíonn ‘sreang iascaireachta’ snáithe tanaí miotail atá beartaithe lena ghearradh ina phíosaí gearra agus lena úsáid mar mheáchan chun baoití bréige a choinneáil faoin uisce;

(d)

ciallaíonn ‘tromán intiteáin’ tromán a bheartaítear a scaoileadh d’aon ghnó le linn a úsáide;

(e)

ciallaíonn ‘urchar scoilte’ tromán atá déanta as píosa beag miotail atá fáiscthe timpeall na líne iascaireachta chun meáchan a chur léi;

(f)

ciallaíonn ‘iascaireacht tráchtála’ iascaireacht le haghaidh brabúis seachas chun críoch áineasa;

(g)

ciallaíonn ‘tácla iascaireachta’ trealamh, lena n-áirítear tromáin, baoití bréige agus sreanga iascaireachta, a úsáidtear san iascaireacht tráchtála nó áineasa.’


ELI: http://data.europa.eu/eli/reg/2026/2501/oj

ISSN 1977-0839 (electronic edition)