|
26.11.2021 |
MT |
Il-Ġurnal Uffiċjali tal-Unjoni Ewropea |
L 421/70 |
DEĊIŻJONI TAL-KUNSILL (PESK) 2021/2074
tal-25 ta’ Novembru 2021
li temenda d-Deċiżjoni (PESK) 2017/2370 li tappoġġa l-Kodiċi ta’ Kondotta tal-Aja u n-nonproliferazzjoni tal-missili ballistiċi fil-qafas tal-implimentazzjoni tal-Istrateġija tal-UE kontra l-Proliferazzjoni tal-Armi ta’ Qerda Massiva
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea, u b’mod partikolari l-Artikoli 28(1) u 31(1) tiegħu,
Wara li kkunsidra l-proposta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,
Billi:
|
(1) |
Fit-18 ta’ Diċembru 2017, il-Kunsill adotta d-Deċiżjoni (PESK) 2017/2370 (1), li tinkariga l-implimentazzjoni teknika ta’ ċerti proġetti lill-Fondation pour la recherche stratégique (Fondazzjoni għar-riċerka strateġika) (FRS). |
|
(2) |
Skont l-Artikolu 3(3) tad-Deċiżjoni (PESK) 2017/2370, ftehim ta’ għotja mal-FRS ġie ffirmat fil-21 ta’ Diċembru 2017. Il-ftehim ta’ għotja kellu jiskadi fil-21 ta’ Diċembru 2020. |
|
(3) |
Fis-26 ta’ Mejju 2020, l-FRS talbet estensjoni tal-perijodu ta’ implimentazzjoni għad-Deċiżjoni (PESK) 2017/2370 sal-20 ta’ Diċembru 2021. L-estensjoni intalbet minħabba l-pandemija tal-COVID-19, u b’mod partikolari minħabba l-posponiment ta’ għadd mill-attivitajiet imsemmija fl-Artikolu 1 ta’ dik id-Deċiżjoni u r-riluttanza tal-amministrazzjonijiet nazzjonali fil-pajjiżi fil-mira li jiddiskutu l-organizzazzjoni ta’ tali attivitajiet fid-dawl tal-klima ta’ inċertezza minħabba dik il-pandemija. |
|
(4) |
Fl-20 ta’ Lulju 2020, il-Kunsill adotta d-Deċiżjoni (PESK) 2020/1066 (2), li emendat id-Deċiżjoni (PESK) 2017/2370, li estendiet id-data tal-iskadenza tagħha sal-20 ta’ Diċembru 2021. |
|
(5) |
Fis-27 ta’ Settembru 2021, l-FRS talbet estensjoni addizzjonali tad-Deċiżjoni (PESK) 2017/2370 fid-dawl tal-impatt kontinwu tas-sitwazzjoni tal-pandemija tal-COVID-19 u r-restrizzjonijiet relatati fuq l-ivvjaġġar fuq l-attivitajiet ippjanati tagħha, fejn talbet estensjoni addizzjonali ta’ 13-il xahar sal-21 ta’ Jannar 2023. |
|
(6) |
It-tkomplija tal-attivitajiet imsemmija fl-Artikolu 1 tad-Deċiżjoni (PESK) 2017/2370 ma għandha l-ebda implikazzjoni fir-rigward tar-riżorsi finanzjarji sal-21 ta’ Jannar 2023. |
|
(7) |
Għaldaqstant jenħtieġ li d-Deċiżjoni (PESK) 2017/2370 tiġi emendata skont dan, |
ADOTTA DIN ID-DEĊIŻJONI:
Artikolu 1
Fl-Artikolu 5 tad-Deċiżjoni (PESK) 2017/2370, il-paragrafu 2 huwa sostitwit b’dan li ġej:
“2. Din id-Deċiżjoni għandha tiskadi fil-21 ta’ Jannar 2023.”.
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, il-25 ta’ Novembru 2021.
Għall-Kunsill
Il-President
Z. POČIVALŠEK
(1) Id-Deċiżjoni tal-Kunsill (PESK) 2017/2370 tat-18 ta’ Diċembru 2017 li tappoġġa l-Kodiċi ta’ Kondotta tal-Aja u n-nonproliferazzjoni tal-missili ballistiċi fil-qafas tal-implimentazzjoni tal-Istrateġija tal-UE kontra l-Proliferazzjoni tal-Armi ta’ Qerda Massiva (ĠU L 337, 19.12.2017, p. 28).
(2) Id-Deċiżjoni tal-Kunsill (PESK) 2020/1066 tal-20 ta’ Lulju 2020 li temenda d-Deċiżjoni (PESK) 2017/2370 li tappoġġa l-Kodiċi ta’ Kondotta tal-Aja u n-nonproliferazzjoni tal-missili ballistiċi fil-qafas tal-implimentazzjoni tal-Istrateġija tal-UE kontra l-Proliferazzjoni tal-Armi ta’ Qerda Massiva (ĠU L 234I, 21.7.2020, p. 1).