(1)

Il-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (“il-Ftehim dwar il-Ħruġ”) (1) ġie konkluż mill-Unjoni bid-Deċiżjoni tal-Kunsill (UE) 2020/135 (2) fit-30 ta’ Jannar 2020 u daħal fis-seħħ fl-1 ta’ Frar 2020. Il-Protokoll dwar l-Irlanda u l-Irlanda ta’ Fuq (“il-Protokoll”) jifforma parti integrali minn dak il-Ftehim.

(2)

L-Artikolu 5(4) tal-Protokoll jipprevedi l-applikazzjoni tal-liġi tal-Unjoni kif elenkata fl-Anness 2 tal-Protokoll għar-Renju Unit u fir-Renju Unit fir-rigward tal-Irlanda ta’ Fuq.

(3)

Id-dispożizzjonijiet tal-liġi tal-Unjoni dwar l-ikel elenkati fl-Anness 2 tal-Protokoll jinkludu projbizzjonijiet u restrizzjonijiet fir-rigward tal-importazzjonijiet ta’ ċerti prodotti tal-laħam minn pajjiżi terzi lejn l-Unjoni. Dawn il-projbizzjonijiet u r-restrizzjonijiet japplikaw għall-importazzjonijiet ta’ dawn il-prodotti tal-laħam mill-Gran Brittanja lejn l-Irlanda ta’ Fuq sa minn tmiem il-perjodu ta’ tranżizzjoni.

(4)

Fis-17 ta’ Diċembru 2020, ir-Renju Unit għamel dikjarazzjoni unilaterali imniżżla fil-minuti tal-laqgħa tal-Kumitat Konġunt stabbilit skont il-Ftehim dwar il-Ħruġ, li tistabbilixxi l-prattika li bi ħsiebu jdaħħal fis-seħħ fir-rigward tal-importazzjonijiet ta’ prodotti tal-laħam mill-Gran Brittanja lejn l-Irlanda ta’ Fuq sal-30 ta’ Ġunju 2021. Skont id-dikjarazzjoni tar-Renju Unit, il-prodotti tal-laħam jiġu importati mill-Gran Brittanja lejn l-Irlanda ta’ Fuq taħt il-kundizzjonijiet li ġejjin: (i) huma jkunu soġġetti għal proċedura ta’ gwida applikabbli mill-punt ta’ ħruġ magħżul fil-Gran Brittanja lejn is-supermarkits ta’ destinazzjoni fl-Irlanda ta’ Fuq; (ii) jinbiegħu esklussivament lill-konsumaturi aħħarin fis-supermarkets li jinsabu fl-Irlanda ta’ Fuq, u ma jinbigħux lil operaturi oħra tal-katina alimentari; (iii) ikunu akkumpanjati minn ċertifikati uffiċjali tas-saħħa maħruġa mill-awtoritajiet kompetenti tar-Renju Unit (ibbażati fuq mudelli simili li diġà jeżistu għal-laħam frisk, il-laħam ikkapuljat u l-preparazzjonijiet tal-laħam); u (iv) ikunu ppakkjati u ttikkettati għall-konsumaturi aħħarin, u jkollhom fuqhom tikketta li taqra “'These products from the United Kingdom may not be sold outside Northern Ireland'” (dawn il-prodotti mir-Renju Unit ma jistgħux jinbiegħu barra mill-Irlanda ta’ Fuq). Ir-Renju Unit innota wkoll li matul dan il-perijodu, ir-Renju Unit ser jibqa’ kompletament allinjat mal-liġi tal-Unjoni applikabbli għall-prodotti tal-laħam u elenkata fl-Anness 2 tal-Protokoll. L-Unjoni għamlet dikjarazzjoni unilaterali li tieħu nota tal-prattika stabbilita fid-dikjarazzjoni unilaterali tar-Renju Unit.

(5)

Fis-17 ta’ Ġunju 2021, ir-Renju Unit informa lill-Kummissjoni bl-intenzjoni tiegħu li jkompli japplika approċċ simili għal tliet xhur oħra, jiġifieri sat-30 ta’ Settembru 2021. Fl-ittra tiegħu tas-17 ta’ Ġunju 2021, ir-Renju Unit ippropona “to maintain the existing grace period arrangements that are in place for these movements” (li jinżammu l-arranġamenti eżistenti tal-perjodu ta’ grazzja li huma fis-seħħ għal dawn il-movimenti).

(6)

Ir-Renju Unit ħareġ dikjarazzjoni unilaterali fit-30 ta' Ġunju 2021, li tistabbilixxi l-prattika li biħsiebu jdaħħal fis-seħħ fir-rigward tal-importazzjonijiet ta’ prodotti tal-laħam mill-Gran Brittanja lejn l-Irlanda ta’ Fuq bejn l-1 ta’ Lulju u t-30 ta’ Settembru 2021.

(7)

Għalhekk huwa xieraq li tiġi stabbilita l-pożizzjoni li għandha tiġi espressa mal-kopresident tal-Kumitat Konġunt f’isem l-Unjoni, b’reazzjoni għad-dikjarazzjoni unilaterali mir-Renju Unit,