(1)

Le Rialachán (AE) 2017/625 leagtar síos rialacha maidir le húdaráis inniúla na mBallstát rialuithe oifigiúla agus gníomhaíochtaí oifigiúla eile a dhéanamh chun comhlíonadh reachtaíocht an Aontais a fhíorú i réimse an bhia agus na sábháilteacht bia. Le hAirteagal 109 den Rialachán sin déantar foráil maidir le hoibleagáid ar na Ballstáit a áirithiú gur ar bhonn plean rialaithe ilbhliantúil náisiúnta a dhéanfaidh na húdaráis inniúla na rialuithe oifigiúla. Thairis sin, i Rialachán (AE) 2017/625 sonraítear ábhar ginearálta an phlean rialaithe ilbhliantúil náisiúnta, ceanglaítear ar na Ballstáit rialuithe oifigiúla ar éilleáin i mbia a sholáthar ina bplean rialaithe ilbhliantúil náisiúnta agus, i ndáil leis sin, tugtar de chumhacht don Choimisiún ábhar sonrach breise sa phlean rialaithe ilbhliantúil náisiúnta a leagan síos mar aon le socruithe sonracha breise le haghaidh a ullmhaithe, chomh maith le híosmhinicíocht aonfhoirmeach maidir leis na rialuithe oifigiúla, ag féachaint do na guaiseacha agus na rioscaí a bhaineann le substaintí dá dtagraítear in Airteagal 19(1) den Rialachán sin.

(2)

Le Rialachán (AE) 2017/625 aisghairtear Treoir 96/23/CE ón gComhairle (2), treoir ina ndearnadh foráil maidir le bearta chun faireachán a dhéanamh ar shubstaintí áirithe, lena n-áirítear éilleáin, in ainmhithe beo agus i dtáirgí de bhunadh ainmhíoch agus inar leagadh síos ceanglais shonracha maidir le pleananna faireacháin na mBallstát chun iarmhair nó substaintí a thagann faoina raon feidhme a bhrath. Ní ionchorpraítear i Rialachán (AE) 2017/625, áfach, na bearta uile atá sa Treoir sin nó sna gníomhartha arna nglacadh ag an gCoimisiún ar bhonn an Rialacháin sin. Dá bhrí sin, chun aistriú rianúil a áirithiú, foráladh le Rialachán (AE) 2017/625 go leanfadh na húdaráis inniúla ar aghaidh ag déanamh na rialuithe oifigiúla i gcomhréir leis na hIarscríbhinní a ghabhann le Treoir 96/23/CE go dtí an 14 Nollaig 2022 nó go dtí dáta chur i bhfeidhm na rialacha comhfhreagracha atá le glacadh ag an gCoimisiún. Dá bhrí sin, tá sé d’aidhm ag an Rialachán seo mar aon le Rialachán Tarmligthe (AE) 2022/931 ón gCoimisiún (3), leanúnachas a áirithiú i ndáil le rialacha Threoir 96/23/CE i dtaca le hábhar an phlean rialaithe ilbhliantúil náisiúnta agus i dtaca lena ullmhú, chomh maith le híosmhinicíocht na rialuithe oifigiúla, a mhéid a bhaineann le héilleáin i mbia, faoi chuimsiú Rialachán (AE) 2017/625.

(3)

I bhfianaise na bhforálacha sonracha maidir le rialuithe oifigiúla ar bhia de bhunadh ainmhíoch atá ag teacht isteach san Aontas ó thríú tíortha a leagtar amach in Airteagal 47 de Rialachán (AE) 2017/625, is iomchuí a cheangal ar na Ballstáit dhá phlean éagsúla a áireamh ina bpleananna rialaithe ilbhliantúla náisiúnta chun éilleáin i mbia a rialú, plean amháin maidir leis an mbia sin de bhunadh ainmhíoch atá ag teacht isteach san Aontas agus plean eile maidir le haon bhia eile a chuirtear ar mhargadh an Aontais.

(4)

Na rialuithe oifigiúla ar an mbia sin uile atá sé beartaithe a chur ar mhargadh an Aontais, ba cheart iad a áireamh sa phlean maidir leis an mbia de bhunadh ainmhíoch atá ag teacht isteach san Aontas, ach mar aon leis sin, rialuithe oifigiúla ar tháirgí iascaigh atá le déanamh ar shoithí nuair a thagann siad isteach i gcalafort i mBallstát, ba cheart iad a áireamh freisin, i gcomhréir le hAirteagal 68 de Rialachán Cur Chun Feidhme (AE) 2019/627 ón gCoimisiún (4), ós rud é go meastar go bhfuil na soithí sin cosúil le pointí rialaithe teorann, gan beann ar a mbratach.

(5)

Ba cheart an plean maidir leis an mbia a chuirtear ar mhargadh an Aontais a bheith ag baint le haon bhia eile, is é sin táirgeadh bia intíre gach Ballstáit, bia a thugtar isteach ó Bhallstáit eile, agus bia de bhunadh neamh-ainmhíoch atá ag teacht isteach san Aontas. Ina theannta sin, ba cheart é a bheith ag baint le táirgí ilchodacha de réir bhrí Rialachán Tarmligthe (AE) 2019/625 ón gCoimisiún (5), fiú iad siúd atá ag teacht isteach san Aontas ó thríú tíortha ós rud é nach gá cuid de na táirgí sin a rialú ag pointí rialaithe teorann i gcomhréir le Rialachán (AE) 2017/625.

(6)

De bhreis ar na rialacha maidir le teaglamaí d’éilleáin nó de ghrúpaí éilleán agus de ghrúpaí tráchtearraí sna samplaí atá le glacadh ag na Ballstáit agus an straitéis samplála lena n-áirítear critéir nach mór dóibh a úsáid chun sainiú a dhéanamh ar ábhar a bpleananna agus ar fheidhmiú na rialuithe oifigiúla gaolmhara a leagtar síos i Rialachán Tarmligthe (AE) 2022/931, ba cheart íosmhinicíochtaí na rialuithe a leagan síos sa Rialachán seo le haghaidh gach ceann de na pleananna, chun a áirithiú go ndéanfar na rialuithe ar gach táirge go pointe áirithe ar a laghad ar fud an Aontais. Chun comhréireacht a áirithiú, áfach, ba cheart íosmhinicíochtaí bliantúla sin na rialuithe a shocrú, ag brath ar na táirgí, trí thagairt a dhéanamh do shonraí táirgeachta na mBallstát agus do mhéid dhaonra na mBallstát, ach íosmhéid réasúnta a bheith ann, agus do líon na gcoinsíneachtaí allmhairithe. Ar an gcúis chéanna, agus go háirithe, chun ualach iomarcach agus costais iomarcacha a sheachaint, is iomchuí cead a thabhairt do na Ballstáit gan rialuithe oifigiúla a dhéanamh ar theaglamaí áirithe d’éilleáin agus de thráchtearraí in aghaidh na bliana, ar choinníoll go dtugtar réasúnú leis an rogha sin sa phlean rialaithe ilbhliantúil náisiúnta. Maidir le coinsíneachtaí allmhairithe, go háirithe, táirgí bia arna n-allmhairiú ó thríú tíortha a liostaítear in Iarscríbhinn II a ghabhann le Rialachán Cur Chun Feidhme (AE) 2019/2129 ón gCoimisiún (6), ar tíortha iad a bhfuil comhaontuithe coibhéise tugtha i gcrích ag an Aontas leo i dtaca le seiceálacha fisiceacha, níor cheart iad a áireamh le líon na gcoinsíneachtaí allmhairithe toisc nach mór do na Ballstáit na rialuithe orthu a dhéanamh ar ráta minicíochta dá bhforáiltear sna comhaontuithe sin.

(7)

Chun a áirithiú go mbeidh ábhar cuimsitheach sna pleananna rialaithe ilbhliantúla náisiúnta maidir le láithreacht éilleán i mbia, ba cheart an fhaisnéis a shainiú nach mór do na Ballstáit a áireamh ina bpleananna rialaithe ilbhliantúla náisiúnta maidir leis na roghanna a rinne siad ina gcuid pleananna.

(8)

Chun cur chun feidhme aonfhoirmeach an Rialacháin seo a áirithiú, is iomchuí a cheangal ar na Ballstáit a bpleananna rialaithe a chur faoi bhráid an Choimisiúin le haghaidh meastóireachta ar bhonn bliantúil agus nós imeachta a sholáthar don mheastóireacht sin.

(9)

Sonraí arna mbailiú ag na Ballstáit trí rialuithe oifigiúla ar láithreacht éilleán i mbia, ní mór iad a tharchur freisin chuig an Údarás Eorpach um Shábháilteacht Bia (“EFSA”) i gcomhréir le hAirteagal 33 de Rialachán (CE) Uimh. 178/2002 ó Pharlaimint na hEorpa agus ón gComhairle (7). Chun go mbeifear in ann faireachán a dhéanamh ar shonraí faoi tharluithe a bhí ann le déanaí, ba cheart do na Ballstáit uile sonraí a chur isteach ar bhonn rialta agus faoin dáta céanna.

(10)

Le hAirteagal 150(1) de Rialachán (AE) 2017/625 leagtar síos idirthréimhse lena gcuirtear mar oibleagáid ar na Ballstáit rialuithe oifigiúla a dhéanamh i gcomhréir le Treoir 96/23/CE go dtí an 14 Nollaig 2022. Le hAirteagal 19(1) de Rialachán (AE) 2017/625 foráiltear, i dtaca leis na rialuithe oifigiúla chun comhlíonadh na rialacha maidir le bia agus sábháilteacht bia chomh maith le beatha agus sábháilteacht beatha a fhíorú, go n-áireofar ar na rialuithe sin rialuithe oifigiúla ar shubstaintí ábhartha lena n-áirítear substaintí atá le húsáid in ábhair teagmhála bia, éilleáin, substaintí neamhúdaraithe, substaintí toirmiscthe agus substaintí neamh-inmhianaithe a bhféadfadh iarmhair díobh i mbia nó i mbeatha a bheith mar thoradh ar a n-úsáid nó ar a láithreacht ar bharra nó ar ainmhithe nó chun bia nó beatha a tháirgeadh nó a phróiseáil. Ós rud é, áfach, go mbeidh feidhm ag na pleananna faireacháin deireanacha a ghlacann na Ballstáit faoi Threoir 96/23/CE maidir leis an mbliain 2022, agus dá bhrí sin tar éis an 14 Nollaig 2022, is iomchuí feidhm a bheith ag an Rialachán seo ón 1 Eanáir 2023.

(11)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,