1

Permezz tal-appell tagħhom, Google LLC u Alphabet Inc. jitolbu l-annullament tas-sentenza tal-Qorti Ġenerali tal-Unjoni Ewropea tal‑10 ta’ Novembru 2021, Google u Alphabet vs Il‑Kummissjoni (Google Shopping) (T‑612/17, iktar ’il quddiem is-“sentenza appellata”, EU:T:2021:763), li permezz tagħha annullat l-Artikolu 1 tad-Deċiżjoni tal-Kummissjoni C(2017) 4444 final tas‑27 ta’ Ġunju 2017 dwar proċedura għall-applikazzjoni tal-Artikolu 102 TFUE u tal-Artikolu 54 tal-Ftehim ŻEE (Każ AT.39740 – Mutur ta’ tfittxija Google (Xiri) (iktar ’il quddiem id-“deċiżjoni kontenzjuża”), unikament sa fejn fiha l-Kummissjoni Ewropea kkonstatat ksur ta’ dawn id-dispożizzjonijiet minn Google u minn Alphabet fi tlettax-il suq nazzjonali tat-tiftix ġenerali fi ħdan iż-Żona Ekonomika Ewropea (ŻEE) abbażi tal-eżistenza ta’ effetti antikompetittivi fuq dawn is-swieq, u ċaħdet il-kumplament tar-rikors tagħhom.

I.

Il‑fatti li wasslu għall‑kawża

2

Il-fatti li wasslu għall-kawża, kif ġew esposti fil-punti 1 sa 78 tas-sentenza appellata, jistgħu jitqassru kif ġej:

A.

Il‑kuntest

3

Google hija kumpannija Amerikana speċjalizzata fil-prodotti u fis-servizzi marbuta mal-użu tal-internet. Hija magħrufa prinċipalment għall-mutur ta’ tfittxija tagħha, li jippermetti lill-utenti tal-internet (iktar ’il quddiem imsejħa wkoll, skont il-kuntest, “utenti” jew “konsumaturi”) li jsibu u li jaċċedu, bil-browser li jużaw u permezz ta’ hyperlinks, is-siti internet li jissodisfaw il-bżonnijiet tagħhom. Mit‑2 ta’ Ottubru 2015, Google hija 100 % sussidjarja ta’ Alphabet.

4

Il-mutur ta’ tfittxija ta’ Google jippermetti li jinkisbu riżultati ta’ tiftix ippreżentati fuq paġni li jidhru fuq l-iskrin tal-utenti tal-internet. Dawn ir-riżultati jintgħażlu jew minn dan il-mutur skont kriterji ġenerali u mingħajr ma s-siti li għalihom jirreferu jħallsu lil Google sabiex jidhru (iktar ’il quddiem ir-“riżultati ta’ tiftix ġenerali”), jew jintgħażlu skont loġika speċjalizzata għat-tip partikolari ta’ tiftix imwettaq (iktar ’il quddiem ir-“riżultati ta’ tiftix speċjalizzat”). Ir-riżultati ta’ tiftix speċjalizzat jistgħu, jekk ikun il-każ, jidhru mingħajr intervent partikolari tal-utent tal-internet mar-riżultati ta’ tiftix ġenerali fuq l-istess paġna (iktar ’il quddiem il-“paġna/i tar-riżultati ġenerali”) jew jidhru waħedhom wara talba tal-utent tal-internet magħmula minn paġna speċjalizzata tal-mutur ta’ tfittxija ta’ Google jew wara attivazzjoni ta’ links li jinsabu f’ċerti żoni tal-paġni tar-riżultati ġenerali tagħha. Google żviluppat diversi servizzi ta’ tiftix speċjalizzat, pereżempju għall-attwalità, għal informazzjoni u għal offerti kummerċjali ta’ natura lokali, għall-vjaġġi bl-ajru jew għax-xiri ta’ prodotti. Hija din l-aħħar kategorija li hija inkwistjoni f’din il-kawża.

5

Is-servizzi ta’ tiftix speċjalizzat għax-xiri tal-prodotti (iktar ’il quddiem is-“servizzi ta’ tqabbil tax-xiri” jew “tqabbil tax-xiri”) ma jbigħux prodotti huma stess, iżda jqabblu u jagħżlu offerti ta’ bejjiegħa fuq l-internet li joffru l-prodott imfittex. Bħar-riżultati ta’ tiftix ġenerali, ir-riżultati ta’ tiftix speċjalizzat jistgħu jkunu riżultati, xi drabi kklassifikati bħala “naturali”, li ma humiex koperti bi ħlas mis-siti tal-internet li huma linkjati magħhom, anki jekk dawn ikunu siti ta’ negozju. L-ordni ta’ preżentazzjoni ta’ dawn ir-riżultati naturali fil-paġni tar-riżultati hija wkoll indipendenti minn ħlasijiet.

6

Fil-paġni tar-riżultati ġenerali ta’ Google, bħal f’dawk ta’ muturi ta’ tfittxija oħra, jidhru wkoll riżultati, attwalment imsejħa “reklami”, li għall-kuntrarju huma marbuta ma’ ħlasijiet mis-siti internet li magħhom huma linkjati. Dawn ir-riżultati huma relatati mat-tiftix magħmul mill-utent tal-internet u huma differenti mir-riżultati naturali ta’ tiftix ġenerali jew ta’ tiftix speċjalizzat, pereżempju permezz tal-kliem “reklam” jew “sponsorizzat”.

7

Il-paġni tar-riżultati ġenerali ta’ Google jistgħu jinkludu jew inkludew it-tipi ta’ riżultati kollha msemmija fil-punti 4 sa 6 ta’ din is-sentenza.

8

Muturi ta’ tfittxija oħra minbarra dak ta’ Google joffru jew offrew servizzi ta’ tiftix ġenerali u servizzi ta’ tiftix speċjalizzat. Barra minn hekk jeżistu muturi ta’ tfittxija speċifiċi għat-tqabbil tax-xiri.

9

Google bdiet tipprovdi lill-utenti tal-internet servizz ta’ tqabbil tax-xiri minn tmiem is-sena 2002 fl-Istati Uniti, u sussegwentement, madwar sentejn wara, gradwalment f’ċerti pajjiżi fl-Ewropa. Dawn ir-riżultati ta’ tqabbil tax-xiri (iktar ’il quddiem ir-“riżultati għal prodotti”) l-ewwel ġew ipprovduti permezz ta’ paġna ta’ tiftix speċjalizzat, imsejħa Froogle, li kienet differenti mill-paġna ta’ tiftix ġenerali tal-mutur ta’ tfittxija, sussegwentement, mis-sena 2003 fl-Istati Uniti u mis-sena 2005 f’ċerti pajjiżi fl-Ewropa, ukoll mill-paġna ta’ tiftix ġenerali tal-mutur ta’ tfittxija. F’dan l-aħħar każ, ir-riżultati għal prodotti kienu jidhru miġbura fi ħdan paġni tar-riżultati ġenerali f’dak li kien jissejjaħ Product OneBox (iktar ’il quddiem il-“Product OneBox”), taħt jew b’mod parallel mar-reklamar li kien jidher in-naħa ta’ fuq jew mal-ġenb tal-paġna u fuq ir-riżultati ta’ tiftix ġenerali.

10

Google esponiet li, mis-sena 2007, hija kienet bidlet il-mod li bih telabora r-riżultati għal prodotti. B’mod partikolari, hija ma baqgħetx tuża l-isem Froogle u bdiet tuża Product Search għall-paġni ta’ tiftix u ta’ riżultati speċjalizzati ta’ tqabbil tax-xiri tagħha.

11

Fir-rigward tar-riżultati għal prodotti murija fuq il-paġni tar-riżultati ġenerali, minn naħa, Google żiedet il-kontenut tal-Product OneBox, li sussegwentement ingħata l-isem Product Universal (iktar ’il quddiem il-“Product Universal”), billi fih żiedet ritratti. Google ddiversifikat ukoll ir-riżultati possibbli tal-azzjoni ta’ klikjar fuq link ta’ riżultat li jidher fiha: skont il-każ, l-utent tal-internet bħal qabel kien jintbagħat direttament lejn il-paġna adattata tas-sit tal-internet tal-bejjiegħ tal-prodott imfittex jew ukoll kien jintbagħat lejn il-paġna tar-riżultati speċjalizzata Product Search sabiex isib iktar offerti tal-istess prodott. Min-naħa l-oħra, Google stabbilixxiet mekkaniżmu, imsejjaħ Universal Search, li kien jippermetti li, meta tiġi identifikata tfittxija bl-għan ta’ xiri ta’ prodott, issir klassifikazzjoni, fil-paġna tar-riżultati ġenerali, tal-prodotti koperti bil-Product Onebox, sussegwentement bil-Product Universal, meta mqabbla mar-riżultati ta’ tiftix ġenerali.

12

Fir-rigward tar-riżultati għal prodotti marbuta ma’ ħlasijiet li jidhru fil-paġni tar-riżultati tagħha, minn Settembru 2010, Google introduċiet fl-Ewropa format arrikkit meta mqabbel ma’ reklami komposti unikament minn kliem (iktar ’il quddiem ir-“reklami bil-kliem”) li kienu jidhru sa dakinhar. Minn Novembru 2011 fl-Ewropa, Google ikkompletat dan id-dispożittiv permezz tal-preżentazzjoni diretta, fuq il-paġni tar-riżultati ġenerali tagħha, ta’ gruppi ta’ reklamar ta’ diversi persuni li jirreklamaw, b’rittratti u prezz (iktar ’il quddiem ir-“reklami għal prodotti”), u li kien jinsabu jew fin-naħa tal-lemin, jew fin-naħa ta’ fuq tal-paġna tar-riżultati.

13

Matul is-sena 2013, Google temmet Product Universal fl-Ewropa u temmet ukoll ir-reklami bil-kliem żviluppati fil-paġni tar-riżultati ġenerali tagħha. Għalhekk, sussegwentement, kienu jintwerew biss reklami għal prodotti miġbura, mogħtija l-isem ġdid “Shopping Commercial Units” jew “Shopping Units”, (iktar ’il quddiem ix-“Shopping Units”), reklami bil-kliem u riżultati ta’ tiftix ġenerali. Għalhekk, l-utent tal-internet li kien jikklikja fuq reklam li kien jinsab f’Shopping Unit kien dejjem mibgħut lejn is-sit internet ta’ bejgħ tal-persuna li tirreklama. Mill-paġna tar-riżultati ġenerali huwa kien jaċċedi għall-paġna ta’ tiftix u ta’ riżultati speċjalizzata ta’ tqabbil tax-xiri ta’ Google, li kien ikollha iktar reklami biss jekk kien jikklikja fuq link speċifiku li kien fil-parti ta’ fuq tax-Shopping Unit jew fuq link aċċessibbli mill-menu ta’ navigazzjoni ġenerali (tab “Shopping”). Fl-istess żmien li Google neħħiet il-Product Universal mill-paġna tar-riżultati ġenerali tagħha, hija lanqas ma baqgħet turi riżultati naturali għal prodotti fil-paġna tar-riżultati speċjalizzata tagħha Product Search, li żviluppat f’paġna li kienet tinkludi biss reklami, imsejħa Google Shopping.

B.

Il‑proċedura amministrattiva

14

Fit‑30 ta’ Novembru 2010, il-Kummissjoni bdiet proċedura kontra Google abbażi tal-Artikolu 2(1) tar-Regolament tal-Kunsill (KE) Nru 773/2004 tas‑7 ta’ April 2004 dwar it-tmexxija ta’ proċeduri mill-Kummissjoni skond l-Artikolu [101] sa [102 TFUE] (ĠU Edizzjoni Speċjali bil-Malti, Kapitolu 8, Vol. 3 p. 81).

15

Fit‑13 ta’ Marzu 2013, il-Kummissjoni adottat evalwazzjoni preliminari abbażi tal-Artikolu 9 tar-Regolament tal-Kunsill (KE) Nru 1/2003 tas‑16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli [101] u [102 TFUE] (ĠU Edizzjoni Speċjali bil-Malti, Kapitolu 8, Vol. 2, p. 205), bil-ħsieb tal-eventwali aċċettazzjoni ta’ impenn ta’ Google li tindirizza t-tħassib tagħha.

16

Fl‑4 ta’ Settembru 2014, il-Kummissjoni informat lil Google li hija ma kinitx f’pożizzjoni li tadotta deċiżjoni ta’ aċċettazzjoni ta’ impenn konformement mal-Artikolu 9 tar-Regolament Nru 1/2003.

17

Fil‑15 ta’ April 2015, il-Kummissjoni reġgħet lura għall-proċedura ta’ konstatazzjoni ta’ ksur prevista fl-Artikolu 7(1) tar-Regolament Nru 1/2003 u adottat dikjarazzjoni tal-oġġezzjonijiet indirizzata lil Google, li fiha hija waslet għall-konklużjoni provviżorja li l-prattiki inkwistjoni kienu jikkostitwixxu abbuż minn pożizzjoni dominanti u, għaldaqstant, kisru l-Artikolu 102 TFUE.

18

Fl‑14 ta’ Lulju 2016, il-Kumissjoni bdiet proċedura kontra Alphabet abbażi tal-Artikolu 2(1) tar-Regolament Nru 773/2004 u adottat dikjarazzjoni tal-oġġezzjonijiet addizzjonali indirizzata lil Google u lil Alphabet.

C.

Id‑deċiżjoni kontenzjuża

19

Fis‑27 ta’ Ġunju 2017, il-Kummissjoni adottat id-deċiżjoni kontenzjuża.

20

Fl-ewwel lok, il-Kummissjoni qieset li, fil-kuntest tal-identifikazzjoni ta’ eventwali pożizzjoni dominanti ta’ Google, is-swieq ikkonċernati, ta’ daqs nazzjonali, kienu, minn naħa, is-suq tas-servizzi ta’ tiftix ġenerali fuq l-internet u, min-naħa l-oħra, is-suq tas-servizzi ta’ tqabbil tax-xiri fuq l-internet.

21

Fit-tieni lok, il-Kummissjoni kkonstatat li Google żammet sa mis-sena 2008, pożizzjoni dominanti fis-suq tat-tiftix ġenerali f’kull pajjiż taż-ŻEE, bl-eċċezzjoni tar-Repubblika Ċeka fejn din il-pożizzjoni kienet miżmuma biss mis‑sena 2011. Sabiex tasal għal din il-konstatazzjoni, hija bbażat ruħha b’mod partikolari fuq il-partijiet mis-suq f’volum għoli u stabbli ħafna ta’ Google, osservati f’diversi studji. Barra minn hekk, hija enfasizzat il-partijiet mis-suq żgħar tal-kompetituri ta’ Google, l-eżistenza ta’ barrieri għad-dħul eżistenti f’dan is-suq kif ukoll il-fatt li ftit utenti tal-internet kienu jużaw diversi muturi ta’ tfittxija ġenerali. Hija rrilevat li Google kienet tgawdi minn reputazzjoni qawwija u li l-utenti tal-internet, indipendenti minn xulxin, ma kinux jikkostitwixxu kontrapiż ta’ xerrej.

22

Fit-tielet lok, il-Kummissjoni qieset li Google kienet, b’effett minn żminijiet differenti, li jmorru lura sa mhux iktar minn Jannar 2008, abbużat mill-pożizzjoni dominanti tagħha eżistenti fi tlettax-il suq nazzjonali tat-tiftix ġenerali fi ħdan iż-ŻEE billi naqset it-traffiku provenjenti mill-paġni tar-riżultati ġenerali tagħha lejn is-servizzi kompetituri ta’ tqabbil tax-xiri u billi żiedet dan it-traffiku lejn is-servizz tagħha ta’ tqabbil tax-xiri, u dan seta’ kellu jew probabbilment kellu effetti antikompetittivi fuq it-tlettax-il suq nazzjonali korrispondenti għat-tiftix speċjalizzat għat-tqabbil tax-xiri, iżda wkoll fuq it-tlettax-il suq tat-tiftix ġenerali. Il-pajjiżi kkonċernati kienu l-Belġju, ir-Repubblika Ċeka, id-Danimarka, il-Ġermanja, Spanja, Franza, l-Italja, il-Pajjiżi l-Baxxi, l-Awstrija, il-Polonja, l-Isvezja, ir-Renju Unit u n-Norveġja.

23

F’dan ir-rigward, l-ewwel nett, fit-Taqsima 7.2 tad-deċiżjoni kontenzjuża, il-Kummissjoni indikat li l-abbuż identifikat f’dan il-każ kien jikkonsisti fil-pożizzjonament u fil-preżentazzjoni iktar favorevoli, fil-paġni tar-riżultati ġenerali ta’ Google, tas-servizz tagħha ta’ tqabbil tax-xiri meta pparagunat mas-servizzi kompetituri ta’ tqabbil tax-xiri.

24

B’mod partikolari, l-aġir identifikat mill-Kummissjoni bħala sors tal-abbuż kien, essenzjalment, li Google uriet is-servizz tagħha ta’ tqabbil tax-xiri fuq il-paġni tar-riżultati ġenerali tagħha b’mod prominenti u li jiġbed l-attenzjoni f’“kaxxi” apposta, mingħajr ma kien ġie suġġett għall-algoritmi ta’ aġġustament tagħha użati għat-tiftix ġenerali, fosthom l-algoritmu “Panda”, filwaqt li, fl-istess waqt, is-servizzi kompetituri ta’ tqabbil tax-xiri setgħu jidhru fuq dawn il-paġni biss fil-forma ta’ riżultati ta’ tiftix ġenerali (links blu), u qatt f’format arrikkit, filwaqt li kellhom tendenza li jiġu relegati fil-klassifikazzjoni tar-riżultati ġeneriċi permezz ta’ dawn l-algoritmi ta’ “aġġustament”. Il-Kummissjoni enfasizzat li hija ma kkontestatx, per se, il-kriterji ta’ selezzjoni differenti magħżula minn Google, deskritti bħala kriterji ta’ rilevanza, iżda l-fatt li l-istess kriterji ta’ pożizzjonament u ta’ preżentazzjoni ma kinux applikati kemm għas-servizz tagħha ta’ tqabbil tax-xiri kif ukoll għas-servizzi kompetituri. Bl-istess mod, hija ppreċiżat li ma kinitx tikkontesta, bħala tali, il-preżentazzjoni enfasizzata ta’ riżultati speċjalizzati ta’ tqabbil tax-xiri meqjusa rilevanti minn Google, iżda l-fatt li l-istess preżentazzjoni enfasizzata ma kinitx tapplika kemm għas-servizz tagħha ta’ tqabbil tax-xiri kif ukoll għas-servizzi kompetituri.

25

It-tieni nett, fit-Taqsima 7.2.2 tad-deċiżjoni kontenzjuża, il-Kummissjoni eżaminat il-valur tal-volum tat-traffiku għas-servizzi ta’ tqabbil tax-xiri. F’dan ir-rigward, hija nnotat li l-volum tat-traffiku kien importanti, f’diversi aspetti, sabiex servizz ta’ tqabbil tax-xiri jkun jista’ jikkompeti.

26

It-tielet nett, fit-Taqsima 7.2.3 tad-deċiżjoni kontenzjuża, il-Kummissjoni esponiet li l-prattiki inkwistjoni kienu jnaqqsu t-traffiku mill-paġni tar-riżultati ġenerali ta’ Google lejn is-servizzi kompetituri ta’ tqabbil tax-xiri u kienu jżidu t-traffiku minn dawn il-paġni lejn is-servizz ta’ tqabbil tax-xiri ta’ Google. Hija sostniet din il-konklużjoni permezz ta’ tliet elementi. Qabelxejn, abbażi ta’ analiżi tal-aġir tal-utenti tal-internet, il-Kummissjoni rrilevat li r-riżultati ġeneriċi kienu jiġġeneraw traffiku sinjifikattiv lejn sit internet meta kienu kklassifikati bejn l-ewwel tliet sa ħames riżultati tal-ewwel paġna tar-riżultati ġenerali, peress li l-utenti tal-internet ma jagħtux jew ftit jagħtu attenzjoni għar-riżultati sussegwenti, li ħafna drabi ma kinux jidhru direttament fuq l-iskrin. Sussegwentement, il-Kummissjoni indikat li l-prattiki inkwistjoni kienu wasslu għal tnaqqis tat-traffiku mill-paġni tar-riżultati ġenerali ta’ Google lejn kważi s-servizzi kompetituri ta’ tqabbil tax-xiri kollha, fuq perijodu sinjifikattiv, f’kull wieħed mit-tlettax-il pajjiż taż-ŻEE li fihom dawn il-prattiki kienu ġew implimentati. Fl-aħħar nett, il-Kummissjoni kkonstatat li l-imsemmija prattiki kienu wasslu għal żieda fit-traffiku ta’ Google lejn is-servizz tagħha ta’ tqabbil tax-xiri.

27

Ir-raba’ nett, fit‑Taqsima 7.2.4 tad-deċiżjoni kontenzjuża, il-Kummissjoni sostniet li t-traffiku ddevjat permezz tal-prattiki inkwistjoni kien jammonta għal proporzjon kbir tat-traffiku lejn is-servizzi kompetituri ta’ tqabbil tax-xiri u li dan ma setax jiġi effettivament issostitwit mis-sorsi l-oħra ta’ traffiku attwalment disponibbli għas-servizzi kompetituri ta’ tqabbil tax-xiri, jiġifieri b’mod partikolari l-applikazzjonijiet fuq it-telefon mobbli, it-traffiku dirett, ir-riferimenti minn siti tal-internet imsieħba l-oħra, in-networks soċjali u l-muturi ta’ tfittxija ġenerali l-oħra.

28

Il-ħames nett, fit-Taqsima 7.3 tad-deċiżjoni kontenzjuża, il-Kummissjoni esponiet li l-prattiki inkwistjoni kellhom effetti antikompetittivi potenzjali fuq it-tlettax is-suq nazzjonali ta’ tiftix speċjalizzat għat-tqabbil tax-xiri u fuq it-tlettax il-suq nazzjonali tat-tiftix ġenerali, imsemmija fil-punt 22 ta’ din is-sentenza. Fir-rigward tas-swieq ta’ tiftix speċjalizzat għat-tqabbil tax-xiri, hija kellha l-intenzjoni turi li l-prattiki inkwistjoni setgħu jwasslu sabiex is-servizzi kompetituri ta’ tqabbil tax-xiri jwaqqfu l-attivitajiet tagħhom, li dawn seta’ jkollhom impatt negattiv fuq l-innovazzjoni u li setgħu għalhekk inaqqsu l-possibbiltajiet tal-konsumaturi li jkollhom aċċess għall-iktar servizzi funzjonanti. L-istruttura kompetittiva ta’ dawn is-swieq b’hekk tiġi affettwata. Fir-rigward tas-swieq tat-tiftix ġenerali, l-effetti antikompetittivi tal-prattiki inkwistjoni jirriżultaw mill-fatt li r-riżorsi addizzjonali ġġenerati mis-servizz ta’ tqabbil tax-xiri ta’ Google mill-paġni tar-riżultati ġenerali ta’ din tal-aħħar kienu jippermettulha li ssaħħaħ is-servizz tagħha ta’ tiftix ġenerali.

29

Fit-Taqsima 7.4 tad-deċiżjoni kontenzjuża, il-Kummissjoni rrifjutat l-argumenti mressqa mill-appellanti kontra din l-analiżi, li jgħidu li l-kriterji legali użati ma kinux korretti. Fit-Taqsima 7.5 ta’ din id-deċiżjoni, hija rrifjutat ukoll il-ġustifikazzjonijiet imressqa mill-appellanti sabiex juru li l-prattiki inkwistjoni ma kinux abbużivi, ibbażati fuq il-fatt li dawn kienu oġġettivament neċessarji jew li l-eventwali restrizzjonijiet tal-kompetizzjoni li kienu jġibu magħhom kienu kkumpensati permezz ta’ titjib fl-effiċjenza favur il-konsumatur.

30

Għalhekk, fl-Artikolu 1 tad-deċiżjoni kontenzjuża, il-Kummissjoni ddikjarat li Google u Alphabet, minn meta ħadet il-kontroll ta’ Google, kisru l-Artikolu 102 TFUE u l-Artikolu 54 tal-Ftehim ŻEE fit-tlettax-il pajjiż imsemmi fil-punt 22 ta’ din is-sentenza, minn dati differenti li jikkorrispondu għall-introduzzjoni ta’ riżultati speċjalizzati għal prodotti jew reklami għal prodotti fil-paġna tar-riżultati ġenerali ta’ Google.

31

Il-Kummissjoni ordnat lil Google b’mod partikolari li ttemm il-prattiki inkwistjoni. Hija enfasizzat li, għalkemm Google setgħet tikkonforma ruħha ma’ din l-ordni b’diversi modi, xi prinċipji kellhom jiġu osservati, irrispettivament minn jekk Google tagħżilx jew le li żżomm ix-Shopping Units jew gruppi oħra ta’ riżultati ta’ tiftix ta’ tqabbil tax-xiri fuq il-paġni tar-riżultati ġenerali tagħha. Fost dawn il-prinċipji kien hemm, essenzjalment, dak ta’ trattament nondiskriminatorju bejn is-servizz ta’ tqabbil tax-xiri ta’ Google u s-servizzi kompetituri ta’ tqabbil. Fl-aħħar nett, permezz tal-Artikolu 2 tad-deċiżjoni kontenzjuża, il-Kummissjoni imponiet fuq Google multa għal ammont ta’ EUR 2 424 495 000, li minnu EUR 523 518 000 in solidum ma’ Alphabet.

II.

Ir‑rikors quddiem il‑Qorti Ġenerali u s‑sentenza appellata

32

Permezz ta’ rikors ippreżentat fir-Reġistru tal-Qorti Ġenerali fil‑11 ta’ Settembru 2017, Google ippreżentat rikors intiż għall-annullament tad-deċiżjoni kontenzjuża u, sussidjarjament, għat-tneħħija jew għat-tnaqqis tal-ammont tal-multa imposta.

33

Permezz ta’ digriet tal-President tad-Disa’ Awla tal-Qorti Ġenerali tas‑17 ta’ Diċembru 2018, Computer & Communication Industry Association (iktar ’il quddiem “CCIA”) talbet li tintervjeni insostenn tat-talbiet tal-appellanti. Permezz ta’ digrieti tal-istess jum, ir-Repubblika Federali tal-Ġermanja, l-Awtorità tas-Sorveljanza EFTA, il-Bureau européen des unions de consommateurs (BEUC), Infederation Ltd (iktar ’il quddiem “Foundem”), Kelkoo SAS, Verband Deutscher Zeitschriftenverleger eV (iktar ’il quddiem il-“VDZ”), Ladenzeile GmbH, li kienet Visual Meta GmbH, BDZV – Bundesverband Digitalpublisher und Zeitungsverleger eV, li kienet Bundesverband Deutscher Zeitungsverleger eV (iktar ’il quddiem il-“BDZV”) u Twenga SA tħallew jintervjenu insostenn tat-talbiet tal-Kummissjoni.

34

Permezz ta’ digriet tal-President tad-Disa’ Awla tal-Qorti Ġenerali tal‑11 ta’ April 2019, ingħata trattament kunfidenzjali b’mod partikolari fl-Anness A.1 tar-rikors promotur.

35

Permezz ta’ deċiżjoni tal‑10 ta’ Lulju 2019, il-Qorti Ġenerali rrinvijat il-kawża quddiem kulleġġ ġudikanti estiż.

36

Insostenn tar-rikors tagħha, Google qajmet sitt motivi, li hija ppreżentat bil-mod segwenti:

37

Permezz tas-sentenza appellata, il-Qorti Ġenerali essenzjalment ċaħdet ir-rikors billi vvalidat l-analiżi tal-Kummissjoni fir-rigward tas-suq ta’ tiftix speċjalizzat għat-tqabbil tax-xiri.

38

Qabelxejn il-Qorti Ġenerali enfasizzat li Google ma kkontestatx li kienet f’pożizzjoni dominanti fit-tlettax-il suq nazzjonali ta’ tiftix ġenerali li jikkorrispondu mal-pajjiżi li fihom il-Kummissjoni qieset li kienet abbużat minn tali pożizzjoni. Hija ppreċiżat li din l-informazzjoni kienet tikkostitwixxi premessa tal-analiżijiet sussegwenti kollha.

39

Fl-ewwel lok, il-Qorti Ġenerali eżaminat il-ħames motiv u l-ewwel parti tal-ewwel motiv, ibbażati fuq il-konformità tal-prattiki inkwistjoni mal-kompetizzjoni abbażi tal-mertu L-ewwel nett, hija ċaħdet l-argument tal-appellanti li dawn il-prattiki kienu jikkostitwixxu titjib kwalitattiv li jaqa’ taħt il-kompetizzjoni abbażi tal-mertu u ma setgħux jiġu kklassifikati bħala abbużivi. It-tieni nett, hija ċaħdet l-argument tal-appellanti li jgħid li l-Kummissjoni kienet eżiġiet minn Google li hija tipprovdi lis-servizzi kompetituri ta’ tqabbil tax-xiri aċċess għas-servizzi mtejba tagħha mingħajr ma jiġu ssodisfatti l-kundizzjonijiet stabbiliti fis-sentenza tas‑26 ta’ Novembru 1998, Bronner (C‑7/97, EU:C:1998:569). It-tielet nett, hija ċaħdet l-argument tal-appellanti li l-fatti kienu ġew ippreżentati mill-Kummissjoni b’mod żbaljat peress li Google kienet introduċiet il-gruppi ta’ riżultati għal prodotti sabiex ittejjeb il-kwalità tas-servizz tagħha u mhux sabiex tidderieġi t-traffiku lejn is-servizz tagħha stess ta’ tqabbil tax-xiri.

40

Fit-tieni lok, il-Qorti Ġenerali eżaminat it-tieni parti tal-ewwel motiv u l-ewwel, it-tieni u, parzjalment, it-tielet parti tat-tieni motiv, ibbażati fuq in-natura nondiskriminatorja tal-prattiki inkwistjoni. F’dan ir-rigward, hija ċaħdet l-ilmenti tal-appellanti bbażati fuq il-fatt li l-Kummissjoni kienet ikkonkludiet b’mod żbaljat li Google kienet iffavorixxiet is-servizz tagħha ta’ tqabbil tax-xiri permezz tad-dehra tal-Product Universals u tax-Shopping Units kif ukoll l-ilmenti bbażati fuq li s-servizzi kompetituri ta’ tqabbil tax-xiri kienu diġà ġew inklużi fix-Shopping Units, b’tali mod li ma setax ikun hemm trattament preferenzjali.

41

Fit-tielet lok, il-Qorti Ġenerali eżaminat it-tielet u r-raba’ motiv, ibbażati fuq li l-prattiki inkwistjoni ma kellhomx effetti antikompetittivi. L-ewwel nett, hija ċaħdet l-argument tal-appellanti li jgħid li l-Kummissjoni ma kinitx stabbilixxiet li l-prattiki inkwistjoni kienu wasslu, minn naħa, għal tnaqqis tat-traffiku mill-paġni tar-riżultati ġenerali ta’ Google lejn is-servizzi kompetituri ta’ tqabbil tax-xiri u, min-naħa l-oħra, għal żieda tat-traffiku mill-paġni tar-riżultati ġenerali ta’ Google lejn is-servizz tagħha ta’ tqabbil tax-xiri. It-tieni nett, hija qieset li l-argument tal-appellanti li l-Kummissjoni kienet spekulat fuq l-effetti antikompetittivi tal-prattiki inkwistjoni kellu jiġi miċħud f’dak li jirrigwarda s-swieq tas-servizzi ta’ tqabbil tax-xiri u kellu jintlaqa’ f’dak li jirrigwarda s-swieq nazzjonali ta’ tiftix ġenerali. It-tielet nett, hija ċaħdet l-argument tal-appellanti li r-rwol tal-pjattaformi merkantili ma kienx ittieħed inkunsiderazzjoni fl-analiżi tal-effetti tal-prattiki inkwistjoni. Ir-raba’ nett, hija ċaħdet l-argument tal-appellanti li jgħid li l-Kummissjoni ma kinitx uriet l-eżistenza ta’ effetti antikompetittivi dovuti għall-prattiki inkwistjoni fis-swieq nazzjonali tas-servizzi ta’ tqabbil tax-xiri.

42

Fir-raba’ lok, il-Qorti Ġenerali ċaħdet it-tielet parti tal-ewwel motiv u, parzjalment, it-tielet parti tat-tieni motiv, ibbażati fuq l-eżistenza ta’ ġustifikazzjonijiet oġġettivi dwar id-dehra tal-Product Universals u tax-Shopping Units.

43

Min-naħa l-oħra, fir-rigward tas-swieq nazzjonali ta’ tiftix ġenerali, il-Qorti Ġenerali kkunsidrat li l-Kummissjoni kienet ibbażat ruħha fuq kunsiderazzjonijiet wisq impreċiżi sabiex tiġġustifika l-eżistenza ta’ effetti antikompetittivi, anki potenzjali, b’tali mod li l-ewwel parti tar-raba’ motiv tal-appellanti, ibbażata fuq in-natura purament spekulattiva tal-analiżi tal-effetti antikompetittivi tal-prattiki inkwistjoni, intlaqgħet fir-rigward ta’ dawn is-swieq.

44

Għalhekk, il-Qorti Ġenerali annullat id-deċiżjoni kontenzjuża biss sa fejn fiha l-Kummissjoni kienet ikkonstatat ksur ta’ Google u ta’ Alphabet tal-Artikolu 102 TFUE u tal-Artikolu 54 tal-Ftehim ŻEE fi tlettax-il suq nazzjonali tat-tiftix ġenerali fi ħdan iż-ŻEE abbażi tal-eżistenza ta’ effetti antikompetittivi f’dawn is-swieq, u ċaħdet il-kumplament tar-rikors. Skont il-ġurisdizzjoni sħiħa tagħha, hija żammet il-multa kollha imposta mill-Kummissjoni fuq l-appellanti.

III.

Il‑proċedura quddiem il‑Qorti tal‑Ġustizzja

45

Permezz ta’ digriet tal-President tal-Qorti tal-Ġustizzja tat‑22 ta’ Marzu 2022, Google u Alphabet vs Il‑Kummissjoni (C‑48/22 P, EU:C:2022:207), ġie rriżervat trattament kunfidenzjali fir-rigward ta’ CCIA, tar-Repubblika Federali tal-Ġermanja, tal-Awtorità tas-Sorveljanza EFTA, tal-BEUC, ta’ Foundem, ta’ Kelkoo, tal-VDZ, ta’ Ladenzeile, tal-BDZV u ta’ Twenga, intervenjenti fl-ewwel istanza, fl-Anness 2 tal-appell, ippreżentat fir-Reġistru tal-Qorti tal-Ġustizzja mill-appellanti fit‑2 ta’ Frar 2022, fejn verżjoni waħda biss mhux kunfidenzjali ta’ dan l-anness għandha tiġi nnotifikata lil dawn l-intervenjenti.

46

Permezz ta’ digriet tal-President tal-Qorti tal-Ġustizzja tal‑1 ta’ Settembru 2022, Google u Alphabet vs Il‑Kummissjoni (C‑48/22 P, EU:C:2022:667), PriceRunner International AB (iktar ’il quddiem “PriceRunner”) tħalliet tintervjeni insostenn tat-talbiet tal-Kummissjoni. F’dan id-digriet, ġie rreżervat ukoll trattament kunfidenzjali fir-rigward ta’ PriceRunner fl-Anness 2 tal-appell.

47

Permezz ta’ digriet tal-President tal-Qorti tal-Ġustizzja tal‑1 ta’ Settembru 2022, Google u Alphabet vs Il‑Kummissjoni (C‑48/22 P, EU:C:2022:668), it-talba ta’ FairSearch AISBL sabiex tintervjeni insostenn tat-talbiet tal-Kummissjoni ġiet miċħuda.

IV.

It‑talbiet tal-partijiet fl‑appell

48

Permezz tal-appell tagħhom, l-appellanti jitolbu li l-Qorti tal-Ġustizzja jogħġobha:

–

tannulla s-sentenza appellata;

–

tannulla d-deċiżjoni kontenzjuża jew, sussidjarjament, tibgħat lura l-kawża quddiem il-Qorti Ġenerali;

–

tikkundanna lill-Kummissjoni għall-ispejjeż sostnuti fil-kuntest tal-proċeduri tal-ewwel istanza u tal-appell, u

–

tikkundanna lil PriceRunner tbati l-ispejjeż marbuta mal-intervent tagħha.

49

Il-Kummissjoni titlob li l-Qorti tal-Ġustizzja jogħġobha:

–

tiċħad l-appell u

–

tikkundanna lill-appellanti għall-ispejjeż.

50

PriceRunner titlob li l-Qorti tal-Ġustizzja jogħġobha:

–

tiċħad l-appell u

–

tikkundanna lill-appellanti għall-ispejjeż sostnuti minnha.

51

CCIA titlob li l-Qorti tal-Ġustizzja jogħġobha:

–

tannulla s-sentenza appellata sa fejn ikkonfermat id-deċiżjoni kontenzjuża;

–

tannulla d-deċiżjoni kontenzjuża kollha kemm hi jew, sussidjarjament, tibgħat lura l-kawża quddiem il-Qorti Ġenerali, u

–

tikkundanna lill-Kummissjoni għall-ispejjeż sostnuti minnha.

52

L-Awtorità tas-Sorveljanza EFTA titlob li l-Qorti tal-Ġustizzja jogħġobha:

–

tiċħad l-appell u

–

tikkundanna lill-appellanti għall-ispejjeż.

53

Il-BEUC jitlob li l-Qorti tal-Ġustizzja jogħġobha:

–

tiċħad l-appell u

–

tikkundanna lill-appellanti għall-ispejjeż li huwa sostna fil-kuntest tal-appell.

54

Foundem titlob li l-Qorti tal-Ġustizzja jogħġobha:

–

tiċħad l-appell bħala manifestament inammissibbli jew bħala infondat kollu kemm hu u

–

tikkundanna lill-appellanti għall-ispejjeż sostnuti minnha.

55

Kelkoo titlob li l-Qorti tal-Ġustizzja jogħġobha:

–

tiċħad l-appell bħala inammissibbli sa fejn huwa magħmul kontra konstatazzjonijiet ta’ fatt imwettqa mill-Qorti Ġenerali u bħala infondat għall-kumplament u

–

tikkundanna lill-appellanti għall-ispejjeż sostnuti minnha.

56

Il-VDZ, Ladenzeile u l-BDZV jitolbu li l-Qorti tal-Ġustizzja jogħġobha:

–

tiċħad l-appell kollu kemm hu u

–

tikkundanna lill-appellanti għall-ispejjeż, inklużi dawk sostnuti minnhom.

57

Twenga titlob li l-Qorti tal-Ġustizzja jogħġobha:

–

tiċħad l-aggravji invokati mill-appellanti;

–

tikkonferma s-sentenza appellata;

–

tikkonferma d-deċiżjoni kontenzjuża, u

–

tikkundanna lill-appellanti għall-ispejjeż.

58

Waqt is-seduta tad‑19 ta’ Settembru 2023, bi tweġiba għal mistoqsija magħmula mill-Qorti tal-Ġustizzja, l-appellanti ppreċiżaw li huma talbu l-annullament tas-sentenza appellata biss sa fejn il-Qorti Ġenerali kienet ċaħdet ir-rikors fl-ewwel istanza tagħhom, u ttieħdet nota ta’ dan fil-proċess verbal tas-seduta. Għalhekk, l-appellanti rrinunzjaw għall-appell sa fejn dan kien dirett kontra l-parti tas-sentenza appellata li permezz tagħha l-Qorti Ġenerali kienet laqgħet it-talbiet tagħhom.

V.

Fuq l‑appell

59

Insostenn tal-appell tagħhom, l-appellanti jqajmu erba’ aggravji. L-ewwel aggravju huwa bbażat fuq żball ta’ liġi sa fejn il-Qorti Ġenerali kkonfermat id-deċiżjoni kontenzjuża filwaqt li din ma ssodisfatx il-kriterju legali meħtieġ sabiex tiġi kkonstatata l-eżistenza ta’ obbligu li jiġi pprovdut aċċess għas-servizzi ta’ tqabbil tax-xiri. It-tieni aggravju huwa bbażat fuq żball ta’ liġi sa fejn il-Qorti Ġenerali kkonfermat id-deċiżjoni kontenzjuża filwaqt li ma identifikatx aġir li jmur kontra l-kompetizzjoni abbażi tal-mertu. It-tielet aggravju huwa bbażat fuq żbalji tal-Qorti Ġenerali fl-eżami tagħha tar-rabta kawżali bejn l-abbuż allegat u l-effetti probabbli. Ir-raba’ aggravju huwa bbażat fuq żball tal-Qorti Ġenerali sa fejn ikkunsidrat li l-Kummissjoni ma kellhiex teżamina jekk l-aġir setax jeskludi kompetituri daqstant effiċjenti.

A.

Fuq l‑ammissibbiltà

60

Foundem issostni li l-appell għandu jiġi miċħud bħala manifestament inammissibbli. Hija ssostni, essenzjalment, li l-appellanti, mingħajr ma jikkontestaw bil-miftuħ il-fatti stabbiliti fis-sentenza appellata, jippruvaw jissostitwixxuhom bil-verżjoni tagħhom stess ta’ dawn il-fatti, verżjoni li tmur kontra l-konstatazzjonijiet tal-Qorti Ġenerali. Din il-preżentazzjoni qarrieqa u żnaturata tal-fatti taffettwa kull wieħed mill-erba’ aggravji, peress li l-argumenti legali mressqa insostenn tagħhom huma bbażati fuq ineżattezzi fattwali.

61

F’dan ir-rigward, għandu jitfakkar li, konformement mal-Artikolu 256(1) TFUE u mal-ewwel paragrafu tal-Artikolu 58 tal-Istatut tal-Qorti tal-Ġustizzja tal-Unjoni Ewropea, l-appell għandu jkun limitat għal kwistjonijiet ta’ liġi. Il-Qorti Ġenerali biss għandha ġurisdizzjoni sabiex tikkonstata u tevalwa l-fatti rilevanti kif ukoll sabiex tevalwa l-provi. Għaldaqstant, l-evalwazzjoni ta’ dawn il-fatti u ta’ dawn il-provi ma tikkostitwixxix, bla ħsara għall-każ ta’ żnaturament tagħhom, kwistjoni ta’ liġi suġġetta, bħala tali, għall-istħarriġ tal-Qorti tal-Ġustizzja fil-kuntest ta’ appell (sentenza tat‑12 ta’ Jannar 2023, Lietuvos geležinkeliai vs Il‑Kummissjoni, C‑42/21 P, EU:C:2023:12, punt 60 u l-ġurisprudenza ċċitata).

62

Għaldaqstant, minn naħa, iċ-ċirkustanza li l-appellanti jibbażaw l-argument ġuridiku żviluppat fil-kuntest tal-appell tagħhom fuq preżentazzjoni żnaturata tal-fatti stabbiliti fis-sentenza appellata għandha tiġi evalwata fil-kuntest tal-eżami tal-fondatezza tiegħu. Min-naħa l-oħra, il-kritika ta’ preżentazzjoni qarrieqa tal-fatti stabbiliti fis-sentenza appellata, mingħajr għaldaqstant ma tiġi kkontestata r-realtà ta’ dawn il-fatti, minkejja li hija fondata, ma hijiex ta’ natura li twassal għal-inammissibbiltà tal-appell.

63

Barra minn hekk, f’dan il-każ, l-appell jidentifika bi preċiżjoni suffiċjenti, f’kull wieħed mill-aggravji tiegħu, il-punti kkritikati tas-sentenza appellata u jesponi r-raġunijiet għaliex dawn il-punti huma, skont l-appellanti, ivvizzjati bi żbalji ta’ liġi, u b’konsegwenza jippermetti li l-Qorti tal-Ġustizzja twettaq l-istħarriġ tagħha tal-legalità.

64

Mill-kunsiderazzjonijiet preċedenti jirriżulta li dan l-appell huwa ammissibbli.

B.

Fuq il‑mertu

1.

Fuq l‑ewwel aggravju

a)

L‑argumenti tal‑partijiet

65

Permezz tal-ewwel aggravju, kompost minn żewġ partijiet, l-appellanti, sostnuti minn CCIA, jilmentaw li l-Qorti Ġenerali kkonfermat id-deċiżjoni kontenzjuża filwaqt li l-Kummissjoni ma kinitx uriet li l-kundizzjonijiet meħtieġa sabiex jiġi stabbilit obbligu ta’ provvista, stabbiliti mill-ġurisprudenza u mfakkra fil-punti 213, 215 u 216 tas-sentenza appellata, kienu ssodisfatti.

66

F’dan ir-rigward, l-appellanti jsostnu li Google ġiet ikkritikata, essenzjalment, li ma pprovdietx lis-servizzi kompetituri ta’ tqabbil tax-xiri aċċess għal “kaxxi” ddedikati ppożizzjonati b’mod prominenti fuq il-paġni tar-riżultati tagħha, b’funzjonalitajiet ta’ dehra arrikkiti u li ma setgħux jiġu rrelegati permezz ta’ algoritmi bħal Panda.

67

Permezz tal-ewwel parti tal-ewwel aggravju, l-appellanti jikkritikaw lill-Qorti Ġenerali li, fil-punti 224 sa 228 tas-sentenza appellata, issostitwixxiet, b’mod inammissibbli, l-evalwazzjoni tal-Kummissjoni li tinsab fid-deċiżjoni kontenzjuża bl-evalwazzjoni tagħha stess li tgħid li l-kundizzjonijiet meħtieġa sabiex jiġi stabbilit obbligu ta’ provvista kienu ssodisfatti. Fil-fatt, il-Qorti Ġenerali affermat li l-paġna tar-riżultati ġenerali ta’ Google kellha karatteristiċi li kienu jagħmluha simili ma’ faċilità essenzjali (punt 224), li l-Kummissjoni qieset li t-traffiku ta’ Google kien indispensabbli għas-servizzi kompetituri ta’ tqabbil tax-xiri (punt 227) u li din l-istituzzjoni kkonstatat riskju ta’ eliminazzjoni ta’ kull kompetizzjoni (punt 228). Issa, id-deċiżjoni kontenzjuża ma tifformulax tali konstatazzjonijiet, kif barra minn hekk il-Qorti Ġenerali stess ikkonfermat fil-punt 223 tas-sentenza appellata, meta indikat li l-Kummissjoni ma kinitx irreferiet għall-kriterji tal-obbligu ta’ provvista.

68

Permezz tat-tieni parti tal-ewwel aggravju, l-appellanti jsostnu li l-Qorti Ġenerali wettqet żball ta’ liġi, fil-punti 229 sa 249 tas-sentenza appellata, sa fejn qieset li l-Kummissjoni ma kinitx obbligata, sabiex tiddetermina l-eżistenza tal-abbuż allegat, tapplika t-test stabbilit fil-punt 41 tas-sentenza tas‑26 ta’ Novembru 1998, Bronner (C‑7/97, EU:C:1998:569).

69

F’dan ir-rigward, l-appellanti jsostnu li, fil-punti 220, 229 u 287 tas-sentenza appellata, il-Qorti Ġenerali identifikat l-abbuż allegat bħala essenzjalment ksur minn Google tal-obbligu tagħha li tipprovdi aċċess. Madankollu, fil-punt 229 ta’ din is-sentenza, il-Qorti Ġenerali qieset li l-prattiki kontenzjużi kienu distinti fl-elementi kostituttivi tagħhom mir-rifjut ta’ provvista inkwistjoni fil-kawża li tat lok għas-sentenza tas‑26 ta’ Novembru 1998, Bronner (C‑7/97, EU:C:1998:569).

70

Permezz tal-ewwel ilment, l-appellanti jikkritikaw lill-Qorti Ġenerali li, fil-punti 237 sa 240 tas-sentenza appellata, qieset li din il-kawża kellha tiġi distinta minn kawża dwar rifjut ta’ provvista, peress li din il-kawża kienet tirrigwarda “differenza fit-trattament”. Issa, kawża dwar rifjut ta’ provvista tikkostitwixxi biss tip partikolari ta’ kawżi li jirrigwardaw differenza fit-trattament, peress li din timplika għall-impriża kkonċernata l-fatt li żżomm element ta’ attiv għall-vantaġġ tagħha stess, filwaqt li tirrifjuta li tipprovdih lill-kompetituri tagħha.

71

Skont l-appellanti, il-problema identifikata f’dan il-każ kienet l-eżistenza ta’ faċilità, ikkostitwita minn “kaxxi”, li għaliha s-servizzi kompetituri ta’ tqabbil tax-xiri ma kellhomx aċċess u l-fatt li din il-faċilità kienet iktar attraenti, f’termini ta’ pożizzjonament, ta’ karatteristiċi u ta’ assenza ta’ relegazzjonijiet, mill-faċilità li għaliha dawn is-servizzi ġew effettivament offruti “aċċess”, skont il-kliem użat mill-Qorti Ġenerali fil-punti 219 u 243 tas-sentenza appellata, jiġifieri l-preżentazzjoni tar-riżultati ġeneriċi. Id-deskrizzjoni tal-abbuż allegat bħala kombinazzjoni ta’ diversi prattiki, jiġifieri wiri tar-riżultati tas-servizz ta’ tqabbil tax-xiri ta’ Google f’“kaxxi” prominenti u wiri tar-riżultati tas-servizzi kompetituri ta’ tqabbil tax-xiri f’riżultati ġeneriċi li jistgħu jiġu rrelegati, hija biss mod ieħor sabiex jiġi espress il-fatt li Google ttrattat b’mod differenti r-riżultati tas-servizz ta’ tqabbil tax-xiri tagħha u dawk tas-servizzi kompetituri ta’ tqabbil tax-xiri minħabba li hija ma pprovdietx lil dawn tal-aħħar aċċess għall-“kaxxi”. Għalhekk, kuntrarjament għal dak li l-Qorti Ġenerali affermat fil-punt 232 tas-sentenza appellata, id-differenza fit-trattament inkwistjoni ma hijiex “prattika estrinsika” distinta mill-aċċess.

72

Permezz tat-tieni lment, l-appellanti jallegaw li, fil-punti 177, 219 u 243 tas-sentenza appellata, il-Qorti Ġenerali, b’mod illegali u żbaljat, iddeskriviet id-deċiżjoni kontenzjuża bħala li tirrigwarda l-kundizzjonijiet ta’ provvista minn Google tas-servizz tagħha ta’ tiftix ġenerali permezz tal-aċċess għall-paġni tar-riżultati ġenerali, pjuttost milli fuq obbligu li jiġi pprovdut aċċess għal faċilità distinta.

73

L-ewwel nett, il-Qorti Ġenerali kienet “kitbet mill-ġdid” id-deċiżjoni kontenzjuża, billi kkonstatat fil-punt 219 tas-sentenza appellata li, “kuntrarjament għal dak li ssostni l-Kummissjoni”, huma inkwistjoni, f’din il-kawża, il-kundizzjonijiet tal-provvista minn Google tas-servizz ta’ tiftix ġenerali tagħha permezz tal-aċċess għall-paġni tar-riżultati ġenerali, filwaqt li tali konstatazzjoni ma tinsabx f’din id-deċiżjoni.

74

It-tieni nett, billi ddeskriviet din il-kawża bħala li tirrigwarda kundizzjonijiet ta’ provvista, il-Qorti Ġenerali kienet wettqet klassifikazzjoni ġuridika żbaljata tagħha. Fil-fatt, din il-kawża ma tirrigwardax kundizzjonijiet ta’ provvista, jiġifieri dwar kundizzjonijiet kummerċjali li skont dawn impriża, li tkun għażlet li twettaq provvista lil impriża oħra, sussegwentement tqiegħed għad-dispożizzjoni l-prodotti jew is-servizzi tagħha. Minbarra dan, l-infrastruttura inkwistjoni ma hijiex il-paġna tar-riżultati ġenerali kollha ta’ Google. Għall-kuntrarju, mid-deċiżjoni kontenzjuża jirriżulta li l-“kaxxi” jikkostitwixxu faċilità distinta bl-infrastruttura teknika rispettiva tagħhom u li Google hija kkritikata li ma tatx lis-servizzi kompetituri ta’ tqabbil tax-xiri aċċess għal dawn il-“kaxxi”. Il-fatt li Google pprovdiet lis-servizzi kompetituri ta’ tqabbil tax-xiri aċċess għar-riżultati ġeneriċi tagħha ma jbiddel xejn minn dan. Għaldaqstant, bħal fil-kawżi kollha dwar obbligu ta’ provvista, il-kwistjoni f’dan il-każ tikkonċerna d-dritt ta’ impriża li tagħżel min għandu aċċess għal faċilità partikolari. F’dawn iċ-ċirkustanzi, huwa irrilevanti r-riferiment, fil-punti 234 sa 236 u 239 tas-sentenza appellata, għall-ġurisprudenza dwar il-prattiki ta’ kompressjoni tal-marġni.

75

Permezz tat-tielet ilment, l-appellanti jsostnu li, fil-punti 232 u 233 tas-sentenza appellata, il-Qorti Ġenerali ċaħdet b’mod żbaljat il-kriterju tal-obbligu ta’ provvista minħabba l-assenza ta’ talba għal aċċess espliċita min-naħa tal-kompetitur u ta’ rifjut espliċitu tal-impriża dominanti. L-ewwel nett, il-Qorti Ġenerali wettqet żball ta’ liġi peress li l-ġurisprudenza ma teżiġix l-eżistenza ta’ talba u ta’ rifjut ta’ aċċess espliċitu. It-tieni nett, l-approċċ formalistiku tal-Qorti Ġenerali jmur kontra l-loġika legali u ekonomika tal-obbligu ta’ provvista. Għandu jiġi ddeterminat jekk din il-kawża tissodisfax il-kundizzjonijiet legali meħtieġa għall-impożizzjoni ta’ tali obbligu, li jikkostitwixxi ndħil fil-libertajiet fundamentali u eċċezzjoni għall-kompetizzjoni f’ekonomija tas-suq. Min-naħa l-oħra, l-eżistenza jew le ta’ talba espliċita hija irrilevanti. It-tielet nett, ir-raġunament tal-Qorti Ġenerali jitbiegħed mid-deċiżjoni kontenzjuża, li kienet ikkonstatat l-eżistenza ta’ talba u ta’ rifjut ta’ aċċess għax-Shopping Units.

76

Permezz tar-raba’ lment, l-appellanti jikkritikaw lill-Qorti Ġenerali li, fil-punt 240 tas-sentenza appellata, ċaħdet il-kriterju tal-obbligu ta’ provvista, minħabba li kklassifikat bħala “attiv” l-aġir inkwistjoni, jiġifieri t-trattament differenti rriżervat minn Google għar-riżultati tas-servizz tagħha ta’ tqabbil tax-xiri meta mqabbla mar-riżultati tas-servizzi kompetituri ta’ tqabbil tax-xiri. Issa, id-deċiżjoni kontenzjuża tipprekludi n-nuqqas “passiv” ta’ provvista lis-servizzi ta’ tqabbil tax-xiri l-oħra tal-istess aċċess bħal dak ipprovdut lis-servizz ta’ tqabbil tax-xiri ta’ Google. Skont l-appellanti, il-fatt li l-aġir jiġi kklassifikat bħala “attiv” jew bħala “passiv” huwa irrilevanti sabiex din il-kawża tiġi distinta minn kawżi ta’ rifjut ta’ provvista b’mod ġenerali.

77

Permezz tal-ħames ilment, l-appellanti jikkontestaw il-kunsiderazzjonijiet tal-Qorti Ġenerali, li jinsabu fil-punt 246 tas-sentenza appellata, li permezz tagħhom hija kkonstatat l-assenza ta’ rilevanza tal-miżuri korrettivi tad-deċiżjoni kontenzjuża sabiex tevalwa n-natura tal-abbuż allegat. Il-Kummissjoni identifikat biss żewġ miżuri sabiex jintemm l-abbuż, peress li Google setgħet jew tikkonkludi ftehimiet mas-servizzi kompetituri ta’ tqabbil tax-xiri sabiex tagħtihom l-istess aċċess għall-“kaxxi” tagħha bħal dak li s-servizz tagħha ta’ tqabbil tax-xiri kellu jew tneħħi l-wiri tal-“kaxxi”. Għaldaqstant, id-deċiżjoni kontenzjuża kienet intiża b’mod ċar sabiex tirrimedja t-tħassib li jirriżulta mill-fatt Google rrifjutat li tipprovdi aċċess għal infrastruttura, meta hija kienet obbligata fid-dritt li tipprovdih.

78

Il-Kummissjoni, PriceRunner, l-Awtorità tas-Sorveljanza EFTA, il-BEUC, Foundem, Kelkoo, il-VDZ, Ladenzeile, il-BDZV u Twenga jikkontestaw l-argument tal-appellanti u jsostnu li l-ewwel aggravju għandu jiġi miċħud bħala inammissibbli, ineffettiv jew infondat. B’mod partikolari, dan l-aggravju huwa bbażat fuq il-premessa żbaljata li, fid-deċiżjoni kontenzjuża, kif ikkonfermata mis-sentenza appellata, l-aġir akkużat kien jikkonsisti biss fil-fatt li Google kienet turi b’mod viżibbli r-riżultati tas-servizz tagħha ta’ tqabbil tax-xiri u rrifjutat li tagħti lis-servizzi kompetituri ta’ tqabbil tax-xiri aċċess għal faċilità distinta, allegatament ikkostitwita mill-“kaxxi”, jiġifieri l-Products Universals u sussegwentement ix-Shopping Units.

b)

Il‑kunsiderazzjonijiet tal‑Qorti tal‑Ġustizzja

1)

Fuq it‑tieni parti tal‑ewwel aggravju

79

Permezz tat-tieni parti tal-ewwel aggravju, li għandha tiġi eżaminata fl-ewwel lok, l-appellanti jikkritikaw il-punti 229 sa 249 tas-sentenza appellata, minħabba li l-Qorti Ġenerali, billi rrifjutat li tapplika l-kundizzjonijiet stabbiliti fil-punt 41 tas-sentenza tas‑26 ta’ Novembru 1998, Bronner (C‑7/97, EU:C:1998:569), għal din il-kawża, adottat kriterju ġuridiku żbaljat sabiex tevalwa l-eżistenza ta’ abbuż minn pożizzjoni dominanti.

80

F’dan ir-rigward, il-Qorti Ġenerali kkunsidrat, fil-punt 229 tas-sentenza appellata, li, għalkemm il-prattiki inkwistjoni ma humiex estranei għal kwistjoni ta’ aċċess, dawn madankollu huma, fl-elementi kostituttivi tagħhom, differenti mir-rifjut ta’ provvista inkwistjoni fil-kawża li tat lok għas-sentenza tas‑26 ta’ Novembru 1998, Bronner (C‑7/97, EU:C:1998:569), li jiġġustifika d-deċiżjoni tal-Kummissjoni li tikkunsidrahom mill-perspettiva ta’ kundizzjonijiet differenti minn dawk li jaqgħu taħt din is-sentenza.

81

Fil-punti 230 u 231 tas-sentenza appellata, il-Qorti Ġenerali ppreċiżat li, fil-fatt, kull kwistjoni totali jew parzjali ta’ aċċess, bħal dik f’dan il-każ, ma timplikax neċessarjament l-applikazzjoni tal-kundizzjonijiet stabbiliti f’din is-sentenza, b’mod partikolari, kif il-Kummissjoni fid-deċiżjoni kontenzjuża indikat, meta l-prattika inkwistjoni tikkonsisti f’aġir awtonomu li, filwaqt li jista’ jkollu l-istess effetti ta’ esklużjoni, huwa differenti, fl-elementi kostituttivi tiegħu, minn rifjut ta’ provvista.

82

Fil-punti 232 u 233 tas-sentenza appellata, il-Qorti Ġenerali spjegat, essenzjalment, li rifjut ta’ provvista li jiġġustifika l-applikazzjoni tal-kundizzjonijiet stabbiliti fis-sentenza tas‑26 ta’ Novembru 1998, Bronner (C‑7/97, EU:C:1998:569), jimplika, minn naħa, li jkun espliċitu, jiġifieri li jeżistu talba jew, fi kwalunkwe każ, xewqa li jingħata aċċess u rifjut korrelattiv u, min-naħa l-oħra, li l-aġir akkużat jinsab prinċipalment fir-rifjut inkwantu tali, u mhux f’prattika estrinsika bħal, b’mod partikolari, forma oħra ta’ abbuż permezz tal-effett ta’ lieva. Skont il-Qorti Ġenerali, l-assenza ta’ tali rifjut espliċitu teskludi li jiġu kklassifikati bħala rifjut ta’ provvista prattiki li, għalkemm jista’ jkollhom, in fine, bħala konsegwenza, rifjut impliċitu ta’ aċċess, jikkostitwixxu, fid-dawl tal-elementi kostituttivi tagħhom li, minħabba n-natura tagħhom stess, jitbiegħdu mill-kompetizzjoni abbażi tal-mertu, ksur awtonomu tal-Artikolu 102 TFUE.

83

Fil-punt 234 tas-sentenza appellata, il-Qorti Ġenerali żiedet li, għalkemm kollha jew tal-inqas il-parti l-kbira tal-“prattiki ta’ esklużjoni” jistgħu jikkostitwixxu rifjuti impliċiti ta’ provvista, peress li dawn għandhom it-tendenza li jirrendu iktar diffiċli l-aċċess għal suq, is-sentenza tas‑26 ta’ Novembru 1998, Bronner (C‑7/97, EU:C:1998:569), ma tistax tiġi applikata għal dawn il-prattiki kollha ħlief bi ksur tal-kliem u tal-ispirtu tal-Artikolu 102 TFUE li l-portata tiegħu ma tistax tiġi limitata għall-prattiki abbużivi li jirrigwardaw oġġetti u servizzi “indispensabbli” fis-sens ta’ din is-sentenza.

84

Fil-punt 235 tas-sentenza appellata, il-Qorti Ġenerali osservat li, f’diversi kawżi li qajmu kwistjonijiet ta’ aċċess għal servizz, bħal prattiki ta’ kompressjoni tal-marġni, ma kinitx meħtieġa l-prova tal-kundizzjoni ta’ indispensabbiltà. F’dan ir-rigward, hija kkunsidrat, fil-punt 236 tas-sentenza appellata, li ma jistax jiġi dedott mis-sentenza tas‑26 ta’ Novembru 1998, Bronner (C‑7/97, EU:C:1998:569), li l-kundizzjonijiet meħtieġa sabiex tiġi stabbilita l-eżistenza ta’ rifjut abbużiv ta’ provvista għandhom neċessarjament japplikaw fil-kuntest tal-evalwazzjoni tan-natura abbużiva ta’ aġir li jikkonsisti fl-issuġġettar ta’ provvista ta’ servizzi jew il-bejgħ ta’ prodotti għal kundizzjonijiet żvantaġġużi jew li x-xerrej jista’ ma jkunx interessat fihom, billi tali aġir jista’, fih innifsu, jikkostitwixxi forma ta’ abbuż differenti mir-rifjut ta’ provvista.

85

Fil-punti 237 sa 241 tas-sentenza appellata, il-Qorti Ġenerali qieset, essenzjalment, li f’dan il-każ ma kienx hemm sempliċi rifjut unilaterali min-naħa ta’ Google li tipprovdi lill-impriżi kompetituri servizz neċessarju sabiex jeżerċitaw kompetizzjoni f’suq viċin, iżda differenza fit-trattament li tmur kontra l-Artikolu 102 TFUE. Hija rrilevat li l-prattiki kontenzjużi kienu ta’ natura “attiva” li kienet tirriżulta f’atti pożittivi ta’ diskriminazzjoni bejn is-servizz ta’ tqabbil tax-xiri ta’ Google u s-servizzi kompetituri ta’ tqabbil tax-xiri u li dawn il-prattiki kienu jikkostitwixxu forma awtonoma ta’ abbuż permezz tal-effett ta’ lieva minn suq iddominat, ikkaratterizzat minn barrieri qawwija għad-dħul, jiġifieri s-suq tas-servizzi ta’ tiftix ġenerali. Skont il-Qorti Ġenerali, il-Kummissjoni għaldaqstant ma kinitx obbligata tistabbilixxi li l-kundizzjonijiet stabbiliti fis‑sentenza tas‑26 ta’ Novembru 1998, Bronner (C‑7/97, EU:C:1998:569), kienu ssodisfatti sabiex tiġi kkonstatata l-eżistenza ta’ abbuż minn pożizzjoni dominanti.

86

Fil-punti 242 sa 247 tas-sentenza appellata, il-Qorti Ġenerali ċaħdet, b’mod partikolari, l-argument ta’ Google li d-deċiżjoni kontenzjuża kienet tobbligaha, essenzjalment, li tittrasferixxi assi ta’ valur, jiġifieri l-ispazju allokat għar-riżultati ta’ tiftix. Hija spjegat li l-obbligu għal impriża li topera abbużivament minn pożizzjoni dominanti sabiex tittrasferixxi assi, li tikkonkludi kuntratti jew li tagħti aċċess għas-servizz tagħha f’kundizzjonijiet nondiskriminatorji mhux neċessarjament jimplika l-applikazzjoni tal-kundizzjonijiet stabbiliti fis-sentenza tas‑26 ta’ Novembru 1998, Bronner (C‑7/97, EU:C:1998:569). Fil-fatt, ma jistax ikun hemm rabta awtomatika bejn il-kriterji ta’ klassifikazzjoni ġuridika tal-abbuż u l-miżuri korrettivi li jippermettu li dan jiġi rrimedjat. Il-Qorti Ġenerali żiedet li ċ-ċirkustanza li wieħed mill-modi ta’ kif jintemm aġir abbuż kien jikkonsisti li l-kompetituri jitħallew jidhru fil-“kaxxi” li kienu jidhru fil-parti ta’ fuq tal-paġna tar-riżultati ta’ Google ma kinitx timplika li l-prattiki abbużivi għandhom ikunu limitati għad-dehra tal-imsemmija “kaxxi” u li l-kundizzjonijiet ta’ identifikazzjoni tal-abbuż jiġu ddefiniti fid-dawl ta’ dan l-aspett biss.

87

Sabiex jiġi evalwat jekk, kif jallegaw l-appellanti, dawn il-kunsiderazzjonijiet humiex ivvizzjati bi żball ta’ liġi, għandu jitfakkar li l-Artikolu 102 TFUE jipprojbixxi, sa fejn il-kummerċ bejn Stati Membri jista’ jiġi affettwat, il-fatt li impriża waħda jew iktar joperaw b’mod abbużiv pożizzjoni dominanti fis-suq intern jew f’parti sostanzjali minnu. Dan l-artikolu huwa intiż li jevita li jsir użu ħażin tal-kompetizzjoni għad-detriment tal-interess ġenerali, tal-impriżi individwali u tal-konsumaturi, billi jiġi ssanzjonat l-aġir ta’ impriżi f’pożizzjoni dominanti li jirrestrinġu l-kompetizzjoni abbażi tal-mertu u għalhekk jistgħu jikkawżaw dannu dirett lil dawn tal-aħħar, jew li jostakolaw jew joħolqu distorsjoni ta’ din il-kompetizzjoni u għalhekk jista’ jikkawżalhom dannu indirett (sentenza tal‑21 ta’ Diċembru 2023, European Superleague Company, C‑333/21, EU:C:2023:1011, punt 124 u l-ġurisprudenza ċċitata).

88

Jikkostitwixxi aġir bħal dan dak li, f’suq fejn il-livell ta’ kompetizzjoni huwa diġà mdgħajjef, preċiżament wara l-preżenza ta’ impriża waħda jew iktar f’pożizzjoni dominanti, jostakola, permezz tal-użu ta’ mezzi differenti minn dawk li jirregolaw il-kompetizzjoni abbażi tal-mertu bejn l-impriżi, iż-żamma tal-livell ta’ kompetizzjoni eżistenti fis-suq jew l-iżvilupp ta’ din il-kompetizzjoni (sentenza tal‑21 ta’ Diċembru 2023, European Superleague Company, C‑333/21, EU:C:2023:1011, punt 125 u l-ġurisprudenza ċċitata).

89

Fir-rigward ta’ prattiki li jikkonsistu f’rifjut li jingħata aċċess għal infrastruttura żviluppata minn impriża dominanti għall-bżonnijiet tal-attivitajiet tagħha stess u miżmuma minnha, mill-ġurisprudenza tal-Qorti tal-Ġustizzja jirriżulta li tali rifjut jista’ jikkostitwixxi abbuż minn pożizzjoni dominanti bil-kundizzjoni mhux biss li dan ir-rifjut ikun ta’ natura li jelimina kull kompetizzjoni fis-suq inkwistjoni min-naħa tal-applikant għal aċċess u jkunx jista’ jiġi oġġettivament iġġustifikat, iżda wkoll li l-infrastruttura fiha nnifisha tkun indispensabbli għall-eżerċizzju tal-attività tiegħu, fis-sens li ma teżisti ebda sostituzzjoni reali jew potenzjali għal din l-infrastruttura (ara, f’dan is-sens, is-sentenzi tas‑26 ta’ Novembru 1998, Bronner (C‑7/97, EU:C:1998:569, punt 41, kif ukoll tat‑12 ta’ Jannar 2023, Lietuvos geležinkeliai vs Il‑Kummissjoni, C‑42/21 P, EU:C:2023:12, punt 79 u l-ġurisprudenza ċċitata).

90

L-impożizzjoni ta’ dawn il-kundizzjonijiet, fil-punt 41 tas-sentenza tas‑26 ta’ Novembru 1998, Bronner (C‑7/97, EU:C:1998:569), kienet iġġustifikata miċ-ċirkustanzi proprji ta’ din il-kawża, li kienu jikkonsistu f’rifjut minn impriża dominanti li tagħti aċċess lil kompetitur għal infrastruttura li hija kienet żviluppat għall-bżonnijiet tal-attività tagħha stess, bl-esklużjoni ta’ kull aġir ieħor (sentenzi tal‑25 ta’ Marzu 2021, Deutsche Telekom vs Il‑Kummissjoni, C‑152/19 P, EU:C:2021:238, punt 45, u tat‑12 ta’ Jannar 2023, Lietuvos geležinkeliai vs Il‑Kummissjoni, C‑42/21 P, EU:C:2023:12, punt 80)

91

Fil-fatt, il-konstatazzjoni li impriża dominanti abbużat mill-pożizzjoni tagħha minħabba rifjut li tikkuntratta ma’ kompetitur għandha l-konsegwenza li din l-impriża hija sfurzata li tikkuntratta ma’ dan il-kompetitur. Issa, tali obbligu huwa partikolarment ta’ preġudizzju għal-libertà li jiġi konkluż kuntratt u għad-dritt għall-proprjetà tal-impriża dominanti peress li impriża, anki jekk dominanti, bħala prinċipju tibqa’ libera li tirrifjuta li tikkuntratta u li topera l-infrastruttura li hija żviluppat għall-bżonnijiet tagħha stess (sentenza tal‑25 ta’ Marzu 2021, Deutsche Telekom vs Il‑Kummissjoni, C‑152/19 P, EU:C:2021:238, punt 46).

92

F’dan il-każ, l-appellanti jsostnu li, minkejja l-fatt li identifikat, fil-punti 220, 229 u 287 tas-sentenza appellata, l-abbuż allegat f’termini li juru li fir-realtà l-kwistjoni hija dwar jekk Google hijiex suġġetta għal obbligu li tipprovdi lis-servizzi kompetituri ta’ tqabbil tax-xiri aċċess għal tali infrastruttura, il-Qorti Ġenerali, fil-punti 229 u 240 ta’ din is-sentenza, ikkonkludiet, b’mod żbaljat, li l-prattiki ta’ Google huma distinti fl-elementi tagħhom minn rifjut ta’ aċċess bħal dak inkwistjoni fil-kawża li tat lok għas-sentenza tas‑26 ta’ Novembru 1998, Bronner (C‑7/97, EU:C:1998:569) u li, għaldaqstant, il-kundizzjonijiet stabbiliti minn din is-sentenza ma japplikawx għal dawn il-prattiki.

93

Permezz tal-ewwel u t-tieni lment tagħhom, l-appellanti jikkritikaw b’mod partikolari lill-Qorti Ġenerali talli qieset li din il-kawża kienet tirrigwarda “differenza fit-trattament” fir-rigward tal-kundizzjonijiet ta’ provvista minn Google tas-servizz ta’ tiftix ġenerali tagħha permezz tal-aċċess għall-paġni tar-riżultati ġenerali, pjuttost milli obbligu li tipprovdi aċċess għal faċilità distinta, ikkostitwita mill-“kaxxi” ddedikati ppożizzjonati b’mod prominenti fuq il-paġni tar-riżultati tagħha, mgħammra b’funzjonalitajiet ta’ dehra arrikkiti u li ma setgħux jiġu rrelegati permezz ta’ algoritmi bħal Panda.

94

F’dan ir-rigward, għandu jiġi rrilevat, fl-ewwel lok, li l-appellanti jinterpretaw b’mod żbaljat il-punti 220, 229 u 287 tas-sentenza appellata.

95

Ċertament, il-Qorti Ġenerali rrilevat, fil-punt 220 tas-sentenza appellata, li “Google hija akkużata li ma ħallietx lis-servizzi kompetituri ta’ tqabbil tax-xiri jibbenefikaw minn pożizzjonament u minn dehra simili għal dawk li minnhom kien jibbenefika s-servizz ta’ tqabbil tax-xiri rispettiv tagħha”. Fil-punt 229 ta’ din is-sentenza, hija nnotat li “l-prattiki inkwistjoni, kif issostni Google, ma humiex estranei għall-kwistjoni ta’ aċċess”. Fil-punt 287 tal-imsemmija sentenza, hija kkonstatat li “ir-riżultati tas-servizzi kompetituri ta’ tqabbil, anki jekk ikunu partikolarment rilevanti għall-utent tal-internet, qatt ma jistgħu jibbenefikaw minn trattament simili għal dak tar-riżultati tas-servizz ta’ tqabbil ta’ Google, kemm fil-livell tal-pożizzjonament tagħhom, inkwantu, sa fejn, minħabba l-karatteristiċi rispettivi tagħhom, hemm it-tendenza li dawn jiġu rrelegati permezz tal-algoritmi ta’ aġġustament u sa fejn il-‘kaxxi’ huma rriżervati għar-riżultati tas-servizz ta’ tqabbil ta’ Google, kif ukoll fir-rigward tad-dehra tagħhom, peress li l-karattri arrikkiti u l-istampi huma wkoll irriżervati għas-servizz ta’ tqabbil ta’ Google”.

96

Madankollu, kuntrarjament għal dak li jsostnu l-appellanti, il-Qorti Ġenerali, f’dawn il-punti 220, 229 u 287 tas-sentenza appellata, bl-ebda mod ma identifikat l-abbuż allegat f’termini li juru li b’mod definittiv din hija kwistjoni dwar jekk Google kinitx suġġetta għal obbligu li tipprovdi aċċess għall-“kaxxi”, jiġifieri l-Products Universals u sussegwentement ix-Shopping Units.

97

Fil-fatt, mill-kliem stess ta’ dawn il-punti kif ukoll minn qari tal-imsemmija punti fil-kuntest tagħhom, u b’mod partikolari tal-punti 219 sa 229 u 288 tas-sentenza appellata, jirriżulta li Google ġiet ikkritikata li ma tippermettix lis-servizzi ta’ tqabbil tax-xiri li huma kompetituri tas-servizz tagħha ta’ tqabbil tax-xiri milli jibbenefikaw, fuq il-paġni tar-riżultati ġenerali tagħha, minn viżibbiltà simili għal dik li kien jibbenefika minnha dan tal-aħħar u, għalhekk, li ma tiżgurax ugwaljanza fit-trattament bejn is-servizz tagħha ta’ tqabbil tax-xiri u s-servizzi kompetituri ta’ tqabbil tax-xiri. Iktar preċiżament, l-aġir li bih Google kienet ġiet ikkritikata kien jikkonsisti, kif il-Qorti Ġenerali fakkret ukoll fil-punti 187 u 261 ta’ din is-sentenza, fil-kombinazzjoni ta’ żewġ prattiki, jiġifieri, minn naħa, il-pożizzjonament u l-preżentazzjoni iktar favorevoli tar-riżultati speċjalizzati tagħha stess fil-paġni tar-riżultati ġenerali tagħha kif ukoll dawk tar-riżultati tas-servizzi kompetituri tat-tqabbil tax-xiri u, min-naħa l-oħra, ir-relegazzjoni konkomitanti, permezz ta’ algoritmi ta’ aġġustament, tar-riżultati tas-servizzi kompetituri ta’ tqabbil tax-xiri.

98

Barra minn hekk, peress li l-appellanti jinvokaw ukoll ir-rilevanza tal-miżuri korrettivi previsti fid-deċiżjoni kontenzjuża, huwa biżżejjed li jiġi rrilevat li dawn ma kinux jobbligaw lil Google li tagħti aċċess għall-“kaxxi”. Fil-fatt, mill-punti 71 u 221 tas-sentenza appellata jirriżulta li l-Kummissjoni ordnat lil Google li ttemm l-aġir akkużat, billi enfasizzat li, għalkemm Google setgħet tikkonforma ruħha ma’ din l-ordni b’modi differenti, kull miżura ta’ eżekuzzjoni kellha tiggarantixxi li Google ma tittrattax is-servizzi kompetituri ta’ tqabbil tax-xiri “b’mod inqas favorevoli” mis-servizz tagħha ta’ tqabbil tax-xiri fil-paġni tar-riżultati ġenerali tagħha u li kull miżura ta’ eżekuzzjoni għandha tissuġġetta s-servizz ta’ tqabbil tax-xiri ta’ Google għall-“istess proċessi u metodi” ta’ pożizzjonament u ta’ preżentazzjoni bħal dawk użati għas-servizzi kompetituri ta’ tqabbil tax-xiri.

99

Id-deskrizzjoni tal-aġir inkwistjoni fis-sentenza appellata b’hekk turi li dan l-aġir kien jikkonċerna l-pożizzjonament u l-preżentazzjoni diskriminatorji fuq il-paġni ta’ riżultati ġenerali tas-servizz ta’ tiftix ġenerali ta’ Google u mhux l-aċċess għall-“kaxxi”.

100

Għalhekk, fil-punt 177 tas-sentenza appellata, il-Qorti Ġenerali b’mod partikolari indikat li l-infrastruttura inkwistjoni kienet il-paġni ta’ riżultati ġenerali ta’ Google li kienu jiġġeneraw traffiku lejn is-siti tal-internet l-oħra, b’mod partikolari dawk tas-servizzi kompetituri ta’ tqabbil tax-xiri, u li din l-infrastruttura kienet, bħala prinċipju, miftuħa.

101

Barra minn hekk, fil-punti 219 u 243 tas-sentenza appellata, il-Qorti Ġenerali rrilevat li kienu inkwistjoni l-kundizzjonijiet tal-provvista minn Google tas-servizz ta’ tiftix ġenerali tagħha permezz tal-aċċess għall-paġni tar-riżultati ġenerali mis-servizzi kompetituri ta’ tqabbil tax-xiri.

102

Fl-aħħar nett, wara li ġabret fil-qosor fil-punti 220 u 221 tas-sentenza appellata l-kontenut tal-premessi 662, 699 u 700(c) tad-deċiżjoni kontenzjuża, il-Qorti Ġenerali kkonstatat, fil-punt 222 ta’ din is-sentenza, li din id-deċiżjoni kienet tirrigwarda aċċess ugwali tas-servizz ta’ tqabbil tax-xiri ta’ Google u tas-servizzi kompetituri ta’ tqabbil tax-xiri għall-paġni tar-riżultati ġenerali ta’ Google, irrispettivament mit-tipi ta’ riżultati inkwistjoni – riżultati ġeneriċi, Product Universals jew Shopping Units – u għalhekk kienet intiża sabiex jingħata l-aċċess lis-servizzi kompetituri ta’ tqabbil tax-xiri għall-paġni tar-riżultati ġenerali ta’ Google fi pożizzjonament u fi preżentazzjoni viżibbli daqs dawk tas-servizz tagħha ta’ tqabbil tax-xiri.

103

Huwa għalhekk stabbilit li, meta rrilevat, fil-punt 229 tas-sentenza appellata, li l-prattiki inkwistjoni “ma humiex estranei għall-kwistjoni ta’ aċċess”, il-Qorti Ġenerali ma rreferietx għall-aċċess tas-servizzi kompetituri ta’ tqabbil tax-xiri għall-“kaxxi”, iżda għall-aċċess tagħhom għall-paġni tar-riżultati ġenerali ta’ Google f’kundizzjonijiet nondiskriminatorji.

104

Fit-tieni lok, il-Qorti Ġenerali ma tistax tiġi kkritikata li ssostitwixxiet, fil-punt 219 tas-sentenza appellata, l-evalwazzjoni tagħha għal dik li tinsab fid-deċiżjoni kontenzjuża. Id-deskrizzjoni tal-aġir inkwistjoni, hekk kif magħmula mill-Qorti Ġenerali, fil-fatt tikkostitwixxi biss mod kif tiddeskrivi l-fatt li Google ġiet ikkritikata bil-pożizzjonament u bil-preżentazzjoni iktar favorevoli, fil-paġni tar-riżultati ta’ tiftix ġenerali ta’ Google, tas-servizz tagħha ta’ tqabbil tax-xiri meta mqabbel mas-servizzi kompetituri ta’ tqabbil tax-xiri, li huwa indikat diversi drabi fid-deċiżjoni kontenzjuża u fis-sentenza appellata, b’varjazzjonijiet minimi fil-formulazzjoni użata.

105

Fit-tielet lok, ma jistax jintlaqa’ l-argument tal-appellanti li l-“kaxxi” jikkostitwixxu faċilità distinta mill-paġni tar-riżultati ġenerali ta’ Google, b’tali mod li l-Qorti Ġenerali jmissha qieset f’dan il-każ li din kienet kwistjoni dwar jekk kienx iġġustifikat li Google tiġi obbligata tagħti aċċess għal din il-faċilità lis-servizzi kompetituri ta’ tqabbil tax-xiri. Fil-fatt, kif irrilevat, essenzjalment, l-Avukata Ġenerali fil-punti 114 u 115 tal-konklużjonijiet tagħha, anki jekk dawn huma enfasizzati fuq il-paġna tar-riżultati ġenerali ta’ Google, il-“kaxxi” ma jikkostitwixxux infrastruttura distinta ta’ din il-paġna fis-sens ta’ paġna tar-riżultati awtonoma.

106

Barra minn hekk, huwa paċifiku li s-servizzi ta’ tqabbil tax-xiri li jikkompetu ma’ dak ta’ Google kellhom aċċess għas-servizz ta’ tiftix ġenerali tagħha u għall-paġni tar-riżultati ġenerali. Għalhekk Google bl-ebda mod ma hija kkritikata li rrifjutat dan l-aċċess.

107

Għaldaqstant, l-iżvantaġġ li jirriżulta għas-servizzi kompetituri ta’ tqabbil tax-xiri ta’ Google tal-kombinazzjoni taż-żewġ prattiki inkwistjoni – jiġifieri, minn naħa, il-pożizzjonament u l-preżentazzjoni iktar favorevoli tar-riżultati speċjalizzati tagħha stess fil-paġni tar-riżultati ġenerali tagħha kif ukoll dawk tar-riżultati tas-servizzi kompetituri ta’ tqabbil tax-xiri u, min-naħa l-oħra, ir-relegazzjoni fl-istess ħin, permezz ta’ algoritmi ta’ aġġustament, tar-riżultati tas-servizzi kompetituri ta’ tqabbil tax-xiri – jirrigwarda l-kundizzjonijiet ta’ aċċess għall-paġna tar-riżultati ġenerali ta’ Google, u mhux l-aċċess għal infrastruttura allegatament distinta, ikkostitwita mill-“kaxxi”.

108

Fir-raba’ lok, kif irrilevat essenzjalment il-Qorti Ġenerali fil-punti 223, 237 u 240 tas-sentenza appellata, il-Kummissjoni kkunsidrat fid-deċiżjoni kontenzjuża li, permezz tal-kombinazzjoni ta’ dawn iż-żewġ prattiki u, għalhekk, permezz tad-diskriminazzjoni bejn is-servizz tagħha stess ta’ tqabbil tax-xiri u s-servizzi kompetituri ta’ tqabbil tax-xiri fuq il-paġni tas-servizz ta’ tiftix ġenerali tagħha, Google kienet tagħmel lieva fuq il-pożizzjoni dominanti tagħha fis-suq tat-tiftix ġenerali, ikkaratterizzat minn barrieri qawwija għad-dħul, sabiex tiffavorixxi s-servizz tagħha stess ta’ tqabbil tax-xiri fis-suq tas-servizzi ta’ tqabbil tax-xiri, u li dan l-aġir kien iwassal għal esklużjoni potenzjali jew attwali tal-kompetizzjoni f’dan l-aħħar suq, li jinsab downstream.

109

Fid-dawl ta’ dan il-fatt, il-Qorti Ġenerali kkonstatat, fil-punti 229 u 240 tas-sentenza appellata, li l-Kummissjoni ma kinitx obbligata tistabbilixxi li l-kundizzjonijiet mogħtija fis-sentenza tas‑26 ta’ Novembru 1998, Bronner (C‑7/97, EU:C:1998:569), imfakkra fil-punt 89 ta’ din is-sentenza, kienu ssodisfatti, sabiex tasal għal konstatazzjoni ta’ ksur abbażi tal-prattiki kkonstatati, peress li dawn huma differenti fl-elementi kosituttivi tagħhom minn rifjut ta’ aċċess bħal dak inkwistjoni fil-kawża li tat lok għal din is-sentenza u jikkostitwixxu forma awtonoma ta’ abbuż permezz tal-effett ta’ lieva.

110

Issa, kif tfakkar fil-punt 90 ta’ din is-sentenza, mill-ġurisprudenza li tirriżulta mis-sentenza tas‑26 ta’ Novembru 1998, Bronner (C‑7/97, EU:C:1998:569), jirriżulta li l-impożizzjoni tal-kundizzjonijiet imsemmija fil-punt 41 ta’ din is-sentenza kienet iġġustifikata miċ-ċirkustanzi proprji tal-kawża li tat lok għall-imsemmija sentenza, li kienu jikkonsistu f’rifjut minn impriża dominanti li tagħti aċċess lil kompetitur għal infrastruttura li hija kienet żviluppat għall-bżonnijiet tal-attività tagħha stess, bl-esklużjoni ta’ kull aġir ieħor.

111

Min-naħa l-oħra, meta impriża dominanti tagħti aċċess għall-infrastruttura tagħha iżda tissuġġetta dan l-aċċess, il-provvista ta’ servizzi jew il-bejgħ ta’ prodotti għal kundizzjonijiet inġusti, il-kundizzjonijiet stabbiliti mill-Qorti tal-Ġustizzja fil-punt 41 tas-sentenza tas‑26 ta’ Novembru 1998, Bronner (C‑7/97, EU:C:1998:569), ma japplikawx. Ċertament, meta l-aċċess għal tali infrastruttura, jew saħansitra għal servizz jew għal input, huwa indispensabbli sabiex il-kompetituri tal-impriża dominanti jkunu jistgħu joperaw bi profitt f’suq downstream, ikun iktar u iktar probabbli li prattiki inġusti f’dan is-suq ikollhom effetti antikompetittivi tal-inqas potenzjali u jikkostitwixxu abbuż, fis-sens tal-Artikolu 102 TFUE. Madankollu, fir-rigward ta’ prattiki oħra minbarra rifjut ta’ aċċess, l-assenza ta’ tali natura indispensabbli ma hijiex determinanti fiha nnifisha għall-finijiet tal-eżami ta’ aġir potenzjalment abbużiv min-naħa ta’ impriża dominanti (sentenzi tal‑25 ta’ Marzu 2021, Deutsche Telekom vs Il‑Kummissjoni, C‑152/19 P, EU:C:2021:238, punt 50, kif ukoll tal‑25 ta’ Marzu 2021, Slovak Telekom vs Il‑Kummissjoni, C‑165/19 P, EU:C:2021:239, punt 50, u l-ġurisprudenza ċċitata).

112

Fil-fatt, minkejja li tali aġir jista’ jikkostitwixxi forma ta’ abbuż meta dan stess jista’ joħloq effetti antikompetittivi tal-inqas potenzjali, jew saħansitra effetti ta’ esklużjoni, fis-swieq ikkonċernati, dan ma jistax jiġi assimilat ma’ rifjut pur u sempliċi li kompetitur jitħalla jaċċedi għal infrastruttura, meta l-awtorità tal-kompetizzjoni jew il-qorti nazzjonali kompetenti ma jkollhiex għalfejn iġġiegħel lill-impriża dominanti tagħti aċċess għall-infrastruttura tagħha, peress li dan l-aċċess kien diġà ngħata. Il-miżuri li ser jittieħdu f’tali kuntest huma, għaldaqstant, inqas ta’ preġudizzju għal-libertà ta’ kontrattazzjoni tal-impriża dominanti u għad-dritt għall-proprjetà tagħha milli l-fatt li tiġi obbligata tagħti aċċess għall-infrastruttura tagħha meta hija kienet tirreżervaha għall-bżonnijiet tal-attività tagħha stess (sentenzi tal‑25 ta’ Marzu 2021, Deutsche Telekom vs Il‑Kummissjoni, C‑152/19 P, EU:C:2021:238, punt 51, u tal‑25 ta’ Marzu 2021, Slovak Telekom vs Il-Kummissjoni, C‑165/19 P, EU:C:2021:239, punt 51).

113

Sa fejn, hekk kif ġie rrilevat fil-punti 105 sa 107 ta’ din is-sentenza, Google tagħti lis-servizzi kompetituri ta’ tqabbil tax-xiri aċċess għas-servizz tagħha ta’ tiftix ġenerali u għall-paġni tar-riżultati ġenerali, iżda tissuġġetta dan l-aċċess għal kundizzjonijiet diskriminatorji, il-kundizzjonijiet stabbiliti fil-punt 41 tas-sentenza tas‑26 ta’ Novembru 1998, Bronner (C‑7/97, EU:C:1998:569), ma japplikawx għall-aġir inkwistjoni.

114

Konsegwentement, il-Qorti Ġenerali ġustament ikkunsidrat, fil-punti 229 u 240 tas-sentenza appellata, li l-Kummissjoni ma kinitx wettqet żball ta’ liġi meta naqset milli tevalwa jekk l-aġir inkwistjoni kienx jissodisfa dawn il-kundizzjonijiet.

115

Minn dak kollu li ntqal hawn fuq jirriżulta li l-ewwel u t-tieni lment għandhom jiġu miċħuda.

116

Konsegwentement, it-tielet sal-ħames ilment, li jirrigwardaw il-punti 232, 233, 240 u 246 tas-sentenza appellata, huma ineffettivi.

117

Fil-fatt, permezz ta’ dawn l-ilmenti, l-appellanti jsostnu li l-Qorti Ġenerali ċaħdet b’mod żbaljat l-applikabbiltà tal-imsemmija kundizzjonijiet, fil-punti 232 u 233 tas-sentenza appellata, minħabba l-assenza ta’ talba għal aċċess u rifjut espliċitu, kif ukoll, fil-punt 240 ta’ din is-sentenza, minħabba li l-aġir inkwistjoni, jiġifieri t-trattament differenti rreżervat minn Google għar-riżultati tas-servizz tagħha ta’ tqabbil tax-xiri meta mqabbla mar-riżultati tas-servizzi kompetituri ta’ tqabbil tax-xiri, kien aġir “attiv” u mhux “passiv”. Fil-punt 246 tas-sentenza appellata, il-Qorti Ġenerali kkunsidrat b’mod żbaljat li l-miżuri korrettivi tad-deċiżjoni kontenzjuża ma kinux rilevanti sabiex tiġi evalwata n-natura tal-abbuż allegat.

118

Issa, anki jekk dawn il-kunsiderazzjonijiet tal-Qorti Ġenerali huma vvizzjati bi żbalji ta’ liġi, l-analiżi tagħhom ma hijiex neċessarja, għaliex huwa mingħajr ma wettqet żball ta’ liġi li hija qieset li l-aġir inkwistjoni ma kienx jikkostitwixxi rifjut ta’ aċċess suġġett għall-kundizzjonijiet stabbiliti fil-punt 41 tas-sentenza tas‑26 ta’ Novembru 1998, Bronner (C‑7/97, EU:C:1998:569).

119

Konsegwentement, it-tieni parti tal-ewwel aggravju għandha tiġi miċħuda.

2)

Fuq l‑ewwel parti tal‑ewwel aggravju

120

Permezz tal-ewwel parti tal-ewwel aggravju, l-appellanti jikkritikaw lill-Qorti Ġenerali li, fil-punti 224 sa 228 tas-sentenza appellata, issostitwixxiet b’mod inammissibbli l-evalwazzjoni tal-Kummissjoni li tinsab fid-deċiżjoni kontenzjuża bl-evalwazzjoni tagħha stess li tgħid li l-kundizzjonijiet stabbiliti fil-punt 41 tas-sentenza tas‑26 ta’ Novembru 1998, Bronner (C‑7/97, EU:C:1998:569), kienu ssodisfatti, filwaqt li ebda konklużjoni ta’ din in-natura ma kienet tinsab fid-deċiżjoni kontenzjuża.

121

Madankollu, peress li, kif intqal fil-punt 118 ta’ din is-sentenza, il-Qorti Ġenerali ma wettqitx żball ta’ liġi meta qieset li l-aġir fil-konfront ta’ Google ma kellux jiġi evalwat konformement ma’ dawn il-kundizzjonijiet, din l-ewwel parti tal-ewwel aggravju għandha tiġi miċħuda bħala ineffettiva.

122

Fid-dawl tal-kunsiderazzjonijiet preċedenti, l-ewwel aggravju għandu jiġi miċħud kollu kemm hu.

2.

Fuq it‑tieni aggravju

a)

L‑argumenti tal‑partijiet

123

Permezz tat-tieni aggravju, kompost minn tliet partijiet, l-appellanti, sostnuti minn CCIA, isostnu li, għalkemm l-abbuż allegat ma kienx rifjut ta’ provvista ta’ aċċess, id-deċiżjoni kontenzjuża kellha, sabiex jiġi stabbilit ksur tal-Artikolu 102 TFUE, tidentifika “prattika estrinsika” oħra u turi li din il-prattika kienet titbiegħed mill-kompetizzjoni abbażi tal-mertu. F’dan ir-rigward, hekk kif il-Qorti Ġenerali fakkret b’mod partikolari fil-punti 162 sa 164 tas-sentenza appellata, ma huwiex biżżejjed li tiġi identifikata sempliċi estensjoni permezz tal-effett ta’ lieva ta’ pożizzjoni dominanti f’suq lejn suq viċin, anki jekk din l-estensjoni twassal għall-għajbien jew għall-marġinalizzazzjoni tal-kompetituri.

124

Permezz tal-ewwel parti tat-tieni aggravju, l-appellanti jallegaw li l-Qorti Ġenerali wettqet żball ta’ liġi sa fejn, fil-punti 175 u 197 tas-sentenza appellata, hija qieset li ċirkustanzi relatati mal-effetti probabbli tal-aġir ta’ Google, miġbura fil-qosor fil-punti 169 sa 174 ta’ din is-sentenza, setgħu jiddeterminaw jekk din kinitx tikkompeti abbażi tal-mertu.

125

B’mod iktar preċiż, l-appellanti jirrilevaw li, fil-punti 195 u 196 tas-sentenza appellata, il-Qorti Ġenerali rrikonoxxiet li l-premessa 341 tad-deċiżjoni kontenzjuża ma kinitx suffiċjenti sabiex tiġi evalwata l-fondatezza tal-aġir inkwistjoni, peress li kienet tirrigwarda “biss fuq l-effetti ta’ esklużjoni” tal-aġir ta’ Google, iżda indikat li din il-premessa kellha tinqara flimkien mal-premessa 342 ta’ din id-deċiżjoni, li kienet issemmi tliet ċirkustanzi. Fil-punti 169, 175, 196, 197, 219 u 283 ta’ dik is-sentenza, dawn iċ-ċirkustanzi kienu tqiesu mill-Qorti Ġenerali bħala rilevanti sabiex id-differenza fit-trattament bejn Google u l-kompetituri tagħha tiġi kklassifikata bħala devjazzjoni fir-rigward tal-kompetizzjoni abbażi tal-mertu.

126

Skont l-appellanti, dawn it-tliet ċirkustanzi ma jirrigwardawx in-natura tal-aġir ta’ Google, iżda jirrigwardaw l-importanza kif ukoll is-sorsi tat-traffiku ta’ tiftix u jikkonċernaw l-effetti probabbli allegati ta’ dan l-aġir. Għaldaqstant dawn ma jikkostitwixxux bażi valida sabiex tingħata deċiżjoni dwar il-kwistjoni ta’ jekk Google tbegħditx mill-kompetizzjoni abbażi tal-mertu sa fejn irreżervat trattament differenti minn dak li hija applikat għall-kompetituri tagħha.

127

Fir-replika tagħhom, l-appellanti jippreċiżaw li, għalkemm il-fatturi meħuda inkunsiderazzjoni sabiex tiġi stabbilita devjazzjoni mill-kompetizzjoni abbażi tal-mertu ma għandhomx ikunu relatati biss man-natura tal-aġir inkwistjoni, dawn għandhom madankollu jippermettu li din in-natura tiġi kklassifikata. Għalhekk, kuntrarjament għal dak li ssostni l-Kummissjoni, ma jistgħux ikunu suffiċjenti sempliċi fatturi relatati ma’ dan l-aġir.

128

Permezz tat-tieni parti tat-tieni aggravju, l-appellanti jsostnu li l-Qorti Ġenerali wettqet żball ta’ liġi sa fejn b’mod inammissibbli “kitbet mill-ġdid” id-deċiżjoni kontenzjuża. Fil-fatt, hija ressqet tliet motivi supplimentari, li ma kinux jinsabu f’din id-deċiżjoni, sabiex timla lakuna fil-motivazzjoni tagħha u tispjega kif l-aġir inkwistjoni allegatament tbiegħed mill-kompetizzjoni abbażi tal-mertu. Dawn it-tliet raġunijiet addizzjonali huma, l-ewwel nett, kriterju legali iktar strett għall-impriżi “superdominanti” (punti 180, 182 u 183 tas-sentenza appellata), it-tieni nett, il-fatt li huwa anormali għal Google li tillimita “r-riżultati [tagħha] […] għal dawk [tagħha]” minħabba li Google hija miftuħa għall-wiri ta’ riżultati għall-kontenut kollu (punti 176 sa 184), u, it-tielet nett, id-deskrizzjoni tal-aġir ikkritikat bħala li jaqa’ taħt trattament diskriminatorju (punti 124, 237, 240, 279 u 284 sa 289).

129

Fir-replika tagħhom, fl-ewwel lok, l-appellanti jikkontestaw l-osservazzjoni tal-Kummissjoni li tgħid li l-Qorti Ġenerali ressqet għall-finijiet ta’ kompletezza tnejn biss minn dawn il-motivi, jiġifieri dak dwar l-anormalità tal-aġir ta’ Google (punti 176 sa 179 tas-sentenza appellata), u dak dwar l-applikazzjoni ta’ kriterju legali iktar strett minħabba s-“superdominanza” ta’ Google (punt 180). Fit-tieni lok, l-appellanti jikkonfutaw l-idea li d-dikjarazzjoni tal-Qorti Ġenerali li Google biddlet l-aġir tagħha (punti 181 sa 184) tikkostitwixxi biss, kif issuġġeriet ukoll il-Kummissjoni, “spjegazzjonijiet supplimentari”.

130

Permezz tat-tielet parti tat-tieni aggravju, l-appellanti jsostnu li l-motivi supplimentari mressqa mill-Qorti Ġenerali, kif irrilevati fit-tieni parti tat-tieni aggravju, sabiex jispjegaw kif Google ma wettqitx kompetizzjoni abbażi tal-mertu huma, fi kwalunkwe każ, żbaljati fid-dritt.

131

Permezz tal-ewwel ilment, l-appellanti jallegaw li, fil-punti 180, 182 u 183 tas-sentenza appellata, il-Qorti Ġenerali applikat kriterju legali żbaljat billi bbażat ruħha fuq kunċett ta’ pożizzjoni “superdominanti” sabiex tevalwa l-fondatezza tal-aġir ta’ Google. Issa, l-ewwel nett, il-livell ta’ pożizzjoni dominanti huwa irrilevanti sabiex tiġi stabbilita l-eżistenza ta’ abbuż minn pożizzjoni dominanti, bħala tali, fis-sens tal-Artikolu 102 TFUE. It-tieni nett, il-Qorti Ġenerali qieset b’mod żbaljat li, minħabba l-pożizzjoni “superdominanti” ta’ Google, kellha tittieħed inkunsiderazzjoni fl-evalwazzjoni tal-aġir ta’ Google fir-rigward ta’ dan l-Artikolu 102 TFUE r-regola ta’ ugwaljanza fit-trattament tal-fornituri ta’ aċċess għall-internet, prevista mir-Regolament (UE) 2015/2120 tal-Parlament Ewropew u tal-Kunsill tal‑25 ta’ Novembru 2015 li jistabbilixxi miżuri dwar aċċess għal Internet miftuħ u li jemenda d-Direttiva 2002/22/KE dwar servizz universali u d-drittijiet tal-utenti li jirrelataw ma’ networks u servizzi ta’ komunikazzjonijiet elettroniċi u r-Regolament (UE) Nru 531/2012 dwar roaming fuq netwerks pubbliċi ta’ komunikazzjoni mobbli fi ħdan l-Unjoni (ĠU 2015, L 310, p. 1). Il-fatt li Google tiġi kklassifikata bħala “superdominanti” jew bħala “bieb ta’ aċċess għall-internet” ma jistax jestendi l-applikazzjoni ta’ din ir-regola ta’ ugwaljanza fit-trattament b’mod li jiġu introdotti obbligi iktar estiżi skont l-imsemmi Artikolu 102 TFUE.

132

Permezz tat-tieni lment, l-appellanti jsostnu li, fil-punti 176 sa 179 tas-sentenza appellata, il-Qorti Ġenerali wettqet żball ta’ liġi meta kkunsidrat li kien anormali għal servizz ta’ tiftix li juri biss ir-riżultati tiegħu stess. Huma jikkontestaw ukoll id-dikjarazzjonijiet tal-Qorti Ġenerali, fil-punti 181 sa 184 ta’ din is-sentenza, peress li ma kienx hemm bidla fl-aġir ta’ Google li kienet għaldaqstant tagħmel iktar evidenti devjazzjoni meta mqabbla mal-kompetizzjoni abbażi tal-mertu.

133

Permezz tat-tielet ilment, l-appellanti jsostnu li, fil-punti 71, 124, 237, 240, 279 u 284 sa 288 tas-sentenza appellata, il-Qorti Ġenerali kklassifikat b’mod żbaljat l-aġir ta’ Google bħala diskriminatorju.

134

L-ewwel nett, il-Qorti Ġenerali ma adottatx approċċ koerenti fid-definizzjoni taż-żewġ elementi li ġew ittrattati b’mod diskriminatorju. Fil-punt 285 tas-sentenza appellata, fl-analiżi tagħha tal-allegata diskriminazzjoni, il-Qorti Ġenerali opponiet it-trattament differenti tar-riżultati minn Google skont jekk kinux ġejjin mis-servizz tagħha ta’ tqabbil tax-xiri jew minn servizzi kompetituri ta’ tqabbil tax-xiri. Min-naħa l-oħra, fil-punt 575 tas-sentenza appellata, fl-analiżi tagħha tal-ġustifikazzjoni oġġettiva, hija qieset li t-tħassib tal-Kummissjoni fid-deċiżjoni kontenzjuża kien li tiġi żgurata ugwaljanza fit-trattament bejn żewġ tipi ta’ riżultati ta’ Google, jiġifieri r-riżultati ġeneriċi u r-riżultati speċjalizzati.

135

It-tieni nett, il-Qorti Ġenerali wettqet żball sa fejn ma stabbilixxietx li Google wettqet differenza fit-trattament arbitrarja, peress li s-sempliċi fatt li jiġi applikat trattament differenti ma huwiex suffiċjenti sabiex jiġi konkluż li teżisti diskriminazzjoni. Skont l-appellanti, ma huwiex arbitrarju għal servizz ta’ tiftix li jaġixxi biss bħala produttur tar-riżultati tiegħu stess, ibbażati fuq id-data u fuq l-algoritmi tiegħu. Barra minn hekk, l-inkapaċità ta’ Google li turi riżultati speċjalizzati ta’ terzi li għandhom l-istess affidabbiltà u l-istess kwalità bħar-riżultati tagħha stess hija differenza oġġettiva rilevanti. Għall-istess raġunijiet, il-kritika tal-Qorti Ġenerali, espressa fil-punti 287, 291 u 292 tas-sentenza appellata, li r-riżultati speċjalizzati għal prodotti provenjenti minn terzi ma kinux jibbenefikaw mill-istess trattament bħal dawk ta’ Google, anki jekk kienu partikolarment rilevanti, hija infondata. Bħala produttur ta’ riżultati ta’ tiftix, Google turi l-aħjar riżultati li hija kapaċi tipproduċi. Barra minn hekk, l-appellanti jsostnu li, għalkemm ġew ikkritikati li ttrattaw b’mod differenti żewġ tipi ta’ riżultati ta’ Google, kif dan jirriżulta mill-punt 575 tas-sentenza appellata, din id-differenza kienet ibbażata wkoll fuq kunsiderazzjonijiet oġġettivi u raġonevoli.

136

Fir-replika tagħhom, l-appellanti jippreċiżaw li impriża dominanti titbiegħed mill-kompetizzjoni abbażi tal-mertu jekk hija tippreġudika l-kwalità tas-servizz tagħha u taġixxi kontra l-interess tagħha.

137

Il-Kummissjoni, PriceRunner, il-BEUC, Foundem, Kelkoo, il-VDZ, Ladenzeile, il-BDZV u Twenga jikkontestaw l-argument tal-appellanti u jsostnu li t-tieni aggravju għandu jiġi miċħud bħala parzjalment inammissibbli kif ukoll ineffettiv u, fi kwalunkwe każ, infondat.

b)

Il‑kunsiderazzjonijiet tal‑Qorti tal‑Ġustizzja

138

Permezz tat-tieni aggravju tagħhom, l-appellanti jikkritikaw lill-Qorti Ġenerali talli wettqet żball ta’ liġi meta kkunsidrat li l-Kummissjoni kienet stabbilixxiet li l-aġir inkwistjoni ma kienx jaqa’ taħt il-kompetizzjoni abbażi tal-mertu.

139

F’dan ir-rigward, il-Qorti Ġenerali fakkret, fil-punti 166 u 167 tas-sentenza appellata, li, sabiex tikkonkludi li kien jeżisti ksur tal-Artikolu 102 TFUE, il-Kummissjoni ma kinitx sempliċement irreferiet għal prattiki b’effett ta’ lieva, iżda kienet qieset li, permezz ta’ tali effett, Google kienet ibbażat ruħha fuq il-pożizzjoni dominanti tagħha fis-suq ta’ tiftix ġenerali sabiex tiffavorixxi s-servizz tagħha ta’ tqabbil tax-xiri fis-suq ta’ tiftix speċjalizzat ta’ tqabbil tax-xiri, billi vvalorizzat il-pożizzjonament u l-preżentazzjoni tas-servizz tagħha ta’ tqabbil tax-xiri u tar-riżultati tagħha fil-paġni tar-riżultati ġenerali tagħha, meta mqabbla mas-servizzi kompetituri ta’ tqabbil tax-xiri.

140

Fil-punt 168 tas-sentenza appellata, il-Qorti Ġenerali ppreċiżat li, fil-punt 344 tad-deċiżjoni kontenzjuża, il-Kummissjoni kienet osservat li r-riżultati tas-servizzi kompetituri ta’ tqabbil tax-xiri setgħu jidhru biss bħala riżultati ġeneriċi, jiġifieri sempliċi links blu, li barra minn hekk kienu inklinati li jiġu rrelegati fil-paġni tar-riżultati ġenerali ta’ Google permezz ta’ algoritmi ta’ aġġustament, filwaqt li r-riżultati tas-servizz ta’ tqabbil tax-xiri ta’ Google kienu pożizzjonati b’viżibbiltà tajba il-fuq ta’ dawn il-paġni tar-riżultati ġenerali, ippreżentati f’format arrikkit u li ma setgħux jiġu rrelegati permezz ta’ dawn l-algoritmi. Il-Qorti Ġenerali żiedet li, skont il-Kummissjoni, dawn il-prattiki kienu jwasslu għal differenza fit-trattament fil-forma ta’ trattament preferenzjali minn Google tas-servizz tagħha ta’ tqabbil tax-xiri.

141

Fil-punti 169 sa 173 tas-sentenza appellata, il-Qorti Ġenerali rrilevat li, fit-Taqsimiet 7.2.2 sa 7.2.4 tad-deċiżjoni kontenzjuża, il-Kummissjoni kienet spjegat, b’mod partikolari, li, minħabba li kien hemm flimkien tliet ċirkustanzi speċifiċi, dan it-trattament preferenzjali kien ta’ natura li jwassal sabiex il-kompetizzjoni fis-suq tiddgħajjef. Hija esponiet l-analiżi tal-Kummissjoni dwar dawn it-tliet ċirkustanzi, imsemmija wkoll fil-punt 196 ta’ din is-sentenza, li kienu, l-ewwel nett, l-importanza tat-traffiku ddevjat mill-mutur ta’ tfittxija ġenerali ta’ Google għas-servizzi ta’ tqabbil tax-xiri, it-tieni nett, l-aġir tal-utenti li jwettqu tiftix fuq l-internet u, it-tielet nett, il-fatt li t-traffiku ddevjat li jirriżulta mill-paġni tar-riżultati ġenerali ta’ Google kien jinkludi proporzjon kbir ta’ traffiku lejn is-servizzi kompetituri ta’ tqabbil tax-xiri u ma setax effettivament jiġi ssostitwit minn sorsi oħra.

142

Fil-punt 174 tas-sentenza appellata, il-Qorti Ġenerali qiset li l-Kummissjoni ma wettqitx żball ta’ liġi meta kkunsidrat li l-importanza tat-traffiku ta’ Google li jirriżulta mill-paġni ta’ tiftix ġenerali tagħha u n-natura mhux effettivament sostitwibbli tiegħu kienu jikkostitwixxu, fid-dawl tal-elementi tal-kuntest imfakkra fil-punti 168 sa 173 ta’ din is-sentenza, ċirkustanzi rilevanti li jistgħu jikkaratterizzaw l-eżistenza ta’ prattiki li ma jaqgħux taħt kompetizzjoni bbażata fuq il-mertu.

143

Fil-punt 175 tas-sentenza appellata, il-Qorti Ġenerali kkunsidrat li l-Kummissjoni ma kinitx sempliċement ikkonstatat l-eżistenza ta’ effett ta’ lieva, iżda kienet ikklassifikat legalment il-prattiki ta’ Google li kienu jakkumpanjaw dan l-effett, billi bbażat ruħha fuq kriterji rilevanti. B’hekk hija qieset li, bla ħsara li t-trattament preferenzjali u l-effetti tiegħu, identifikati fid-dawl taċ-ċirkustanzi speċifiċi tas-swieq ikkonċernati, kienu ġew validament ipprovati mill-Kummissjoni, li kien is-suġġett ta’ eżami sussegwenti mill-Qorti Ġenerali, il-Kummissjoni kienet ġustament qieset li dan it-trattament preferenzjali kien jitbiegħed mill-kompetizzjoni abbażi tal-mertu.

144

Fil-punt 189 tas-sentenza appellata, il-Qorti Ġenerali żiedet li din il-konklużjoni ma hijiex invalidata mill-argumenti ta’ CCIA li l-assenza ta’ test legali ċar ifformulat fid-deċiżjoni kontenzjuża kienet tikser il-prinċipju ta’ ċertezza legali. F’dan ir-rigward, hija rrilevat, fil-punt 195 ta’ din is-sentenza, li, ċertament, il-premessa 341 ta’ din id-deċiżjoni esponiet ir-raġunijiet li għalihom il-prattiki inkwistjoni kienu tbiegħdu mill-kompetizzjoni abbażi tal-mertu billi indikat, essenzjalment, li, minn naħa, dawn il-prattiki kienu ddevjaw it-traffiku u, min-naħa l-oħra, dawn setgħu jkollhom effetti antikompettitivi. B’hekk, permezz ta’ din il-premessa, moqrija waħedha, il-Kummissjoni kienet tidher li ddeduċiet in-natura devjanti ta’ dawn il-prattiki fir-rigward tal-kompetizzjoni abbażi tal-mertu mill-eżistenza ta’ effetti ta’ esklużjoni li jirriżultaw minnhom.

145

Fil-punt 196 tas-sentenza appellata, il-Qorti Ġenerali kienet madankollu kkunsidrat li din il-premessa 341 kellha tinqara flimkien mal-premessa 342 tad-deċiżjoni kontenzjuża li fiha l-Kummissjoni kienet esponiet,“sabiex turi għaliex l-imġiba hija abbużiva u ma taqax fil-kamp tal-kompetizzjoni abbażi tal-mertu” [traduzzjoni mhux uffiċjali], li l-prattiki inkwistjoni kienu jikkonsistu fil-fatt li Google tagħti trattament preferenzjali lis-servizz tagħha ta’ tqabbil tax-xiri għad-detriment tas-servizzi kompetituri ta’ tqabbil tax-xiri u li dan it-trattament preferenzjali seħħ f’kuntest partikolari. Din l-aħħar premessa tistabbilixxi d-diversi elementi meħuda inkunsiderazzjoni mill-Kummissjoni sabiex tistabbilixxi għalfejn il-prattika inkwistjoni tbiegħdet mill-kompetizzjoni abbażi tal-mertu u, b’mod partikolari, it-tliet ċirkustanzi speċifiċi esposti fit-Taqsimiet 7.2.2 sa 7.2.4 tad-deċiżjoni kontenzjuża u mfakkra fil-punti 170 sa 173 ta’ din is-sentenza.

146

Fil-punt 197 tas-sentenza appellata, il-Qorti Ġenerali b’hekk ikkunsidrat li l-analiżi tal-Kummissjoni li wasslet għal konstatazzjoni ta’ abbuż permezz tal-effett ta’ lieva kienet tippermetti li jiġi konkluż li jeżisti ksur billi bbażat ruħha, minn naħa, fuq elementi suspettużi fir-rigward tad-dritt tal-kompetizzjoni li kienu assenti fil-każ ta’ rifjut ta’ aċċess, b’mod partikolari differenza fit-trattament mhux iġġustifikata, u, min-naħa l-oħra, fuq ċirkustanzi speċifiċi, relatati man-natura tal-infrastruttura li wasslet għal din id-differenza fit-trattament, f’dan il-każ l-importanza tat-traffiku ta’ Google li jirriżulta mill-paġni ta’ tiftix ġenerali tagħha u n-natura mhux effettivament sostitwibbli tiegħu.

1)

Fuq l‑ewwel parti tat‑tieni aggravju

147

Permezz tal-ewwel parti tat-tieni aggravju, l-appellanti jikkritikaw, essenzjalment, lill-Qorti Ġenerali li wettqet żball ta’ liġi, fil-punti 175 u 197 tas-sentenza appellata, meta qieset li t-tliet ċirkustanzi speċifiċi msemmija fil-punti 169 sa 174 u 196 ta’ din is-sentenza kienu rilevanti sabiex jiġi stabbilit jekk l-aġir inkwistjoni kienx jaqa’ taħt il-kompetizzjoni abbażi tal-mertu.

i)

Fuq l‑ammissibbiltà

148

Il-Kummissjoni ssostni li l-ewwel parti tat-tieni aggravju hija inammissibbli. Fil-fatt, l-appellanti ma jistgħux isostnu għall-ewwel darba quddiem il-Qorti tal-Ġustizzja li dawn it-tliet ċirkustanzi, esposti fit-Taqsima 7.2 tad-deċiżjoni kontenzjuża, kienu jikkonċernaw il-possibbiltà li l-aġir inkwistjoni jista’ jirrestrinġi l-kompetizzjoni, u mhux li dan ma jaqax taħt il-kompetizzjoni abbażi tal-mertu.

149

Sabiex tingħata deċiżjoni dwar l-eċċezzjoni ta’ inammissibbiltà mqajma mill-Kummissjoni, għandu jiġi rrilevat li, permezz ta’ din l-ewwel parti tat-tieni aggravju, l-appellanti jikkontestaw parti mit-tweġiba tal-Qorti Ġenerali għall-ħames motiv tar-rikors fl-ewwel istanza, esposta fil-punti 169 sa 175 u 197 tas-sentenza appellata.

150

Skont is-sunt li jinsab fil-punt 136 ta’ din is-sentenza, permezz tal-ewwel parti ta’ dan il-ħames motiv, l-appellanti sostnew li d-deċiżjoni kontenzjuża ma kinitx identifikat, fl-aġir ta’ Google li kien ikkonsista fl-implimentazzjoni ta’ titjib kwalitattiv tas-servizz tagħha ta’ tiftix fuq l-internet, elementi li kienu jitbiegħdu mill-kompetizzjoni abbażi tal-mertu.

151

Permezz tal-ewwel parti tat-tieni aggravju, l-appellanti jikkontestaw l-interpretazzjoni u l-applikazzjoni tad-dritt tal-Unjoni magħmula mill-Qorti Ġenerali, li wassluha sabiex tikkonstata, fil-punti 175 u 197 tas-sentenza appellata, li l-Kummissjoni ma kinitx ibbażat ruħha biss fuq l-eżistenza ta’ effetti ta’ esklużjoni li rriżultaw mill-prattiki inkwistjoni sabiex tikkonkludi li dawn kienu tbiegħdu minn kompetizzjoni abbażi tal-mertu.

152

F’dan ir-rigward, hemm lok li jitfakkar li, konformement mal-ġurisprudenza tal-Qorti tal-Ġustizzja, li parti titħalla tqajjem għall-ewwel darba quddiemha motiv li hija ma qajmitx quddiem il-Qorti Ġenerali jkun ifisser li din il-parti titħalla tadixxi lill-Qorti tal-Ġustizzja bi kwistjoni li tkun usa’ minn dik li fuqha l-Qorti Ġenerali ħadet konjizzjoni. Fil-kuntest ta’ appell, il-kompetenza tal-Qorti tal-Ġustizzja hija, bħala prinċipju, limitata għall-eżami tal-evalwazzjoni mill-Qorti Ġenerali tal-motivi li jkunu ġew ittrattati quddiemha. Madankollu, argument li ma jkunx tqajjem fl-ewwel istanza ma jikkostitwixxix motiv ġdid li huwa inammissibbli fl-istadju tal-appell jekk dan ikun jikkostitwixxi biss amplifikazzjoni ta’ argument li jkun diġà ġie żviluppat fil-kuntest ta’ motiv imressaq fir-rikors quddiem il-Qorti Ġenerali (sentenza tad‑9 ta’ Diċembru 2020, Groupe Canal + vs Il‑Kummissjoni, C‑132/19 P, EU:C:2020:1007, punt 28 u l-ġurisprudenza ċċitata).

153

Minbarra dan, aggravju għandu, taħt piena ta’ inammissibbiltà, ikun intiż sabiex jinkiseb l-annullament mhux tad-deċiżjoni kontenzjuża fl-ewwel istanza, iżda tas-sentenza tal-Qorti Ġenerali li l-annullament tagħha jkun qiegħed jintalab, billi jinkludi argument intiż speċifikament sabiex jiġi identifikat l-iżball ta’ liġi li dik is-sentenza tkun ivvizzjata bih. Għalhekk, appellant jista’ jippreżenta appell billi jinvoka aggravji li jirriżultaw mis-sentenza appellata nnifisha u li jkunu intiżi li jikkritikaw, fid-dritt, il-fondatezza tagħha (sentenza tal‑25 ta’ Jannar 2022, Il‑Kummissjoni vs European Food et, C‑638/19 P, EU:C:2022:50, punt 77 kif ukoll il-ġurisprudenza ċċitata).

154

F’dan il-każ, kuntrarjament għal dak li ssostni l-Kummissjoni, l-argumenti żviluppati mill-appellanti fil-kuntest tal-ewwel parti tat-tieni aggravju huma marbuta mill-qrib mal-ħames motiv espost fir-rikors fl-ewwel istanza, li jqajjem dubji dwar il-konstatazzjonijiet esposti mill-premessa 341 tad-deċiżjoni kontenzjuża li jgħidu li l-prattiki inkwistjoni ma jaqgħux taħt il-qasam tal-kompetizzjoni abbażi tal-mertu, u, sa fejn dawn huma intiżi li juru li l-Qorti Ġenerali żbaljat meta, fil-punti 175 u 197 tas-sentenza appellata, ikkunsidrat li l-Kummissjoni kienet ikklassifikat fid-dritt il-prattiki inkwistjoni li kienu jakkumpanjaw l-effett ta’ lieva, billi bbażat ruħha fuq kriterji rilevanti, dawn jikkostitwixxu l-amplifikazzjoni ta’ dan il-motiv u mhux motiv ġdid, ippreżentat għall-ewwel darba fil-kuntest tal-appell.

155

Barra minn hekk, l-appellanti ma jillimitawx ruħhom li jirriproduċu l-argumenti invokati fl-ewwel istanza, iżda jallegaw li l-Qorti Ġenerali, bi tweġiba għal dawn l-argumenti, ivvizzjat is-sentenza appellata bi żball ta’ liġi. Konsegwentement, jekk, kif il-Kummissjoni tirrileva, parti mill-argument tal-appellanti jitressaq għall-ewwel darba quddiem il-Qorti tal-Ġustizzja, xorta jibqa’ l-fatt li din inħolqot mis-sentenza appellata nnifisha.

156

B’hekk, din il-parti tat-tieni aggravju hija ammissibbli.

ii)

Fuq il‑mertu

157

Wara li fakkret, fil-punti 164 u 165 tas-sentenza appellata, li l-effetti ta’ lieva pprattikati minn impriża dominanti ma humiex ipprojbiti inkwantu tali mill-Artikolu 102 TFUE u li l-kamp ta’ applikazzjoni ratione materiae tar-responsabbiltà partikolari fuq impriża dominanti għandu jiġi evalwat fid-dawl taċ-ċirkustanzi speċifiċi ta’ kull każ, li juru li l-kompetizzjoni tiddgħajjef, il-Qorti Ġenerali ddeċidiet, fil-punti 166 sa 175 tas-sentenza appellata, li l-Kummissjoni, fid-deċiżjoni kontenzjuża, ma llimitatx ruħha li tikkonstata tali effett ta’ lieva u kienet ikklassifikat fid-dritt il-prattiki ta’ Google li kienu jakkumpanjaw dan l-effett, billi bbażat ruħha fuq kriterji rilevanti, b’tali mod li hija ma wettqitx żball ta’ liġi meta qieset li l-aġir inkwistjoni, li kien jikkonsisti li Google tagħti trattament preferenzjali lis-servizz tagħha ta’ tqabbil tax-xiri, ma kiex jaqa’ taħt il-kompetizzjoni abbażi tal-mertu.

158

Bl-istess mod, fil-punti 195 sa 197 tas-sentenza appellata, il-Qorti Ġenerali ddeċidiet li l-Kummissjoni ma kinitx iddeduċiet l-abbuż permezz tal-effett ta’ lieva mill-eżistenza ta’ effetti ta’ esklużjoni li jirriżultaw minn dawn il-prattiki, iżda kienet ibbażat l-analiżi tagħha billi bbażat ruħha, minn naħa, fuq elementi suspettużi fir-rigward tad-dritt tal-kompetizzjoni, b’mod partikolari differenza fit-trattament mhux iġġustifikata, u, min-naħa l-oħra, fuq ċirkustanzi speċifiċi rilevanti relatati man-natura tal-infrastruttura li wasslet għal din id-differenza fit-trattament, li effettivament ippermettilha tikkonkludi li kien hemm ksur tal-Artikolu 102 TFUE.

159

Fir-rigward taċ-ċirkustanzi speċifiċi kkunsidrati mill-Kummissjoni fid-deċiżjoni kontenzjuża, esposti fil-punti 169 sa 173 tas-sentenza appellata, l-ewwel waħda minn dawn iċ-ċirkustanzi kienet tirrigwarda l-importanza tat-traffiku ġġenerat mill-mutur ta’ tfittxija ġenerali ta’ Google għas-servizzi ta’ tqabbil tax-xiri. Il-Qorti Ġenerali rrilevat, b’mod partikolari, li l-Kummissjoni kienet spjegat li dan it-traffiku kien jippermetti li wieħed jibbenefika minn effetti ta’ network pożittivi, sa fejn iktar ma servizz ta’ tqabbil tax-xiri jirċievi żjarat mill-utenti tal-internet, iktar kien iżid ir-rilevanza u l-utilità tas-servizzi tiegħu u iktar in-negozjanti kienu inklinati li jirreferu għalih. Hija żiedet li t-telf ta’ dan it-traffiku seta’ jwassal għal ċirku vizzjuż u, eventwalment, għal ħruġ mis-suq.

160

It-tieni ċirkustanza kienet l-aġir tal-utenti meta jwettqu tfittxijiet fuq l-internet. Il-Qorti Ġenerali indikat b’mod partikolari li l-Kummissjoni kienet ippreċiżat li dawn l-utenti kienu jikkonċentraw, b’mod ġenerali, fuq l-ewwel tlieta sa ħames riżultati ta’ tiftix, li huma ma kinux jagħtu jew ftit li xejn kienu jagħtu attenzjoni għar-riżultati li jsegwu, u b’mod partikolari għar-riżultati taħt il-parti immedjatament viżibbli tal-iskrin, u li huma kellhom it-tendenza jippreżumu li r-riżultati l-iktar viżibbli kienu l-iktar rilevanti, u dan indipendentement mir-rilevanza effettiva tagħhom.

161

It-tielet ċirkustanza kienet l-impatt tat-traffiku ddevjat. Skont il-Qorti Ġenerali, il-Kummissjoni enfasizzat li dan it-traffiku kien jirrappreżenta proporzjon kbir tat-traffiku lejn is-servizzi kompetituri ta’ tqabbil tax-xiri u ma setax effettivament jiġi ssostitwit minn sorsi oħra, inkluż ir-reklami bil-kliem, l-applikazzjonijiet mobbli, it-traffiku dirett, ir-riferimenti lejn siti msieħba, in-networks soċjali u l-muturi ta’ tfittxija l-oħra.

162

Għalhekk fil-punti 174 u 197 tas-sentenza appellata, il-Qorti Ġenerali qieset li l-Kummissjoni ma wettqitx żball ta’ liġi meta kkunsidrat li l-importanza tat-traffiku ta’ Google li jirriżulta mill-paġni ta’ tiftix ġenerali tagħha u n-natura mhux effettivament sostitwibbli tiegħu kienu jikkostitwixxu, fid-dawl tal-elementi tal-kuntest imfakkra fil-punti 168 sa 173 ta’ din is-sentenza, ċirkustanzi rilevanti li jistgħu jikkaratterizzaw l-eżistenza ta’ prattiki li ma jaqgħux taħt kompetizzjoni bbażata fuq il-mertu.

163

Sabiex jiġi evalwat jekk il-kunsiderazzjonijiet tal-Qorti Ġenerali esposti b’dan il-mod humiex ivvizzjati bi żball ta’ liġi kif jallegaw l-appellanti, għandu jitfakkar li, filwaqt li jpoġġi fuq l-impriżi f’pożizzjoni dominanti r-responsabbiltà partikolari li ma jikkawżawx preġudizzju, bl-aġir tagħhom, lil kompetizzjoni effettiva u mhux distorta fis-suq intern, l-Artikolu 102 TFUE ma jikkundannax l-eżistenza stess ta’ pożizzjoni dominanti, iżda biss l-abbuż tagħha (sentenza tal‑21 ta’ Diċembru 2023, European Superleague Company, C‑333/21, EU:C:2023:1011, punt 128 u l-ġurisprudenza ċċitata).

164

Fil-fatt, l-Artikolu 102 TFUE la huwa intiż li jipprekludi lill-impriżi milli jiksbu, abbażi tal-mertu tagħhom stess, pożizzjoni dominanti f’suq wieħed jew iktar u lanqas li jiżgura li impriżi kompetituri li huma inqas effiċjenti minn dawk li jżommu tali pożizzjoni jibqgħu fis-suq. Għall-kuntrarju, il-kompetizzjoni abbażi tal-mertu tista’, mid-definizzjoni tagħha stess, twassal għall-għajbien jew għall-marġinalizzazzjoni ta’ impriżi kompetituri li huma inqas effiċjenti u għalhekk inqas interessanti għall-konsumaturi f’termini, b’mod partikolari, ta’ prezz, ta’ produzzjoni, ta’ għażla, ta’ kwalità jew ta’ innovazzjoni (sentenza tal‑21 ta’ Diċembru 2023, European Superleague Company, C‑333/21, EU:C:2023:1011, punti 126 u 127 kif ukoll il-ġurisprudenza ċċitata).

165

Sabiex ikun jista’ jitqies, f’każ partikolari, li aġir għandu jiġi kklassifikat bħala “abbuż minn pożizzjoni dominanti” fis-sens tal-Artikolu 102 TFUE, huwa neċessarju, bħala regola ġenerali, li jintwera li, permezz tal-użu ta’ mezzi differenti minn dawk li jirregolaw il-kompetizzjoni abbażi tal-mertu bejn l-impriżi, dan l-aġir għandu l-effett attwali jew potenzjali li jirrestrinġi din il-kompetizzjoni billi jeskludi impriżi kompetituri daqstant effiċjenti mis-suq jew mis-swieq ikkonċernati jew billi jipprekludi l-iżvilupp tagħhom f’dawn is-swieq, minkejja li jista’ jiġi osservat li dawn tal-aħħar jistgħu jkunu kemm dawk fejn il-pożizzjoni dominanti tinżamm kif ukoll dawk, konnessi jew relatati, fejn l-imsemmi aġir jista’ jipproduċi l-effetti attwali jew potenzjali tiegħu (sentenza tal‑21 ta’ Diċembru 2023, European Superleague Company, C‑333/21, EU:C:2023:1011, punt 129 u l-ġurisprudenza ċċitata).

166

Din il-prova, li tista’ timplika l-użu ta’ tabelli ta’ analiżi differenti skont it-tip ta’ aġir li huwa inkwistjoni f’każ partikolari, għandha madankollu tiġi prodotta, fil-każijiet kollha, billi jiġu evalwati ċ-ċirkustanzi fattwali rilevanti kollha, irrispettivament minn jekk dawn jikkonċernawx dan l-aġir innifsu, is-suq jew is-swieq inkwistjoni jew il-funzjonament tal-kompetizzjoni fih jew fihom. Barra minn hekk, l-imsemmija prova għandha tkun intiża sabiex tistabbilixxi, billi tibbaża ruħha fuq elementi ta’ analiżi u provi preċiżi u konkreti, li l-imsemmi aġir għandu, tal-inqas, il-kapaċità li jipproduċi effetti ta’ esklużjoni (sentenza tal‑21 ta’ Diċembru 2023, European Superleague Company, C‑333/21, EU:C:2023:1011, punt 130 u l-ġurisprudenza ċċitata).

167

Lil hinn mis-sempliċi aġir li għandu bħala effett attwali jew potenzjali li jirrestrinġi l-kompetizzjoni abbażi tal-mertu billi jeskludi impriżi kompetituri daqstant effiċjenti mis-suq jew mis-swieq ikkonċernati, jista’ wkoll jiġi kklassifikat bħala “abbuż minn pożizzjoni dominanti” aġir li jintwera li għandu kemm bħala effett attwali jew potenzjali, kif ukoll bħala għan, li jipprekludi fi stadju preliminari, permezz tal-istabbiliment ta’ barrieri għad-dħul jew permezz tal-użu ta’ miżuri oħra ta’ esklużjoni jew ta’ mezzi oħra differenti minn dawk li jirregolaw il-kompetizzjoni abbażi tal-mertu, impriżi potenzjalment kompetituri anki jekk sempliċement sabiex ikollhom aċċess għal dan is-suq jew għal dawn is-swieq u, b’dan il-mod, li jimpedixxi l-iżvilupp tal-kompetizzjoni f’dawn is-swieq għad-detriment tal-konsumaturi, billi jillimita fihom il-produzzjoni, l-iżvilupp ta’ prodotti jew ta’ servizzi alternattivi jew anki l-innovazzjoni (sentenza tal‑21 ta’ Diċembru 2023, European Superleague Company, C‑333/21, EU:C:2023:1011, punt 131 u l-ġurisprudenza ċċitata).

168

Minn din il-ġurisprudenza jirriżulta li fost iċ-ċirkustanzi fattwali rilevanti huma inklużi mhux biss dawk li jikkonċernaw l-aġir stess, iżda wkoll dawk fis-suq jew fis-swieq inkwistjoni jew fuq il-funzjonament tal-kompetizzjoni fih jew fihom. Għalhekk, ċirkustanzi relatati mal-kuntest li fih l-aġir tal-impriża f’pożizzjoni dominanti huwa implimentat, bħal karatteristiċi tas-settur ikkonċernat, għandhom jitqiesu bħala rilevanti.

169

Issa, għandu jiġi kkonstatat li ċ-ċirkustanzi speċifiċi esposti fil-punti 169 sa 173 tas-sentenza appellata kienu jikkostitwixxu elementi tal-kuntest li fih kienu jiffunzjonaw il-mutur ta’ tfittxija ġenerali ta’ Google u s-servizzi ta’ tqabbil tax-xiri, u li fil-qafas tiegħu kien implimentat l-aġir inkwistjoni.

170

B’mod partikolari, kuntrarjament għal dak li jsostnu l-appellanti, dawn iċ-ċirkustanzi ma humiex relatati biss mal-effetti tal-prattiki inkwistjoni jew mal-elementi relatati sempliċement ma’ dawn il-prattiki, iżda jistgħu, kif irrilevat il-Qorti Ġenerali fil-punt 174 tas-sentenza appellata, jikkaratterizzaw l-eżistenza ta’ prattiki li ma jaqgħux taħt il-kompetizzjoni abbażi tal-mertu.

171

Fil-fatt, l-imsemmija ċirkustanzi kienu rilevanti sabiex il-prattiki inkwistjoni jiġu kklassifikati fid-dritt – jiġifieri, minn naħa, il-pożizzjonament u l-preżentazzjoni iktar favorevoli tar-riżultati speċjalizzati ta’ Google stess fil-paġni tar-riżultati ġenerali tagħha kif ukoll dawk tar-riżultati tas-servizzi kompetituri ta’ tqabbil tax-xiri u, min-naħa l-oħra, ir-relegazzjoni konkomitanti, permezz ta’ algoritmi ta’ aġġustament, tar-riżultati tas-servizzi kompetituri ta’ tqabbil tax-xiri – peress li dawn kienu jippermettu li dawn il-prattiki jitqiegħdu fil-kuntest taż-żewġt iswieq ikkonċernati u tal-funzjonament tal-kompetizzjoni f’dawn is-swieq u għalhekk setgħu juru li l-effetti ta’ esklużjoni potenzjali fis-suq downstream, jiġifieri dak ta’ tiftix speċjalizzat għat-tqabbil tax-xiri, u s-suċċess tas-servizz ta’ tqabbil tax-xiri ta’ Google f’dan is-suq sa mill-implimentazzjoni tal-imsemmija prattiki, irrilevati fid-deċiżjoni kontenzjuża, ma kinux dovuti għall-mertu ta’ dan is-servizz, iżda għal dawn l-istess prattiki flimkien maċ-ċirkustanzi speċifiċi rrilevati.

172

Għalhekk, il-Qorti Ġenerali bl-ebda mod ma fixklet l-analiżi tal-aġir inkwistjoni sabiex tiddetermina jekk dan kienx tbiegħed mill-kompetizzjoni abbażi tal-mertu u l-analiżi tal-effetti ta’ dan l-aġir. Għall-kuntrarju, kif l-Avukata Ġenerali rrilevat, essenzjalment, fil-punt 143 tal-konklużjonijiet tagħha, mill-iżviluppi li jinsabu fil-punti 168 sa 175 tas-sentenza appellata jirriżulta li l-Qorti Ġenerali eżaminat bir-reqqa l-kwistjoni dwar jekk, fid-deċiżjoni kontenzjuża, il-Kummissjoni setgħetx tqis mingħajr ma twettaq żball li l-prattiki kontenzjużi, u mhux biss l-effetti tagħhom, setgħu jiġu kklassifikati fid-dritt bħala prattiki li jitbiegħdu mill-kompetizzjoni abbażi tal-mertu.

173

Mill-kunsiderazzjonijiet preċedenti jirriżulta li l-punti 175 u 197 tas-sentenza appellata ma huma vvizjati minn ebda żball ta’ liġi.

174

Konsegwentement, hemm lok li l-ewwel parti tat-tieni aggravju tiġi miċħuda.

2)

Fuq it‑tieni u t‑tielet parti tat‑tieni aggravju

175

Permezz tat-tieni parti tat-tieni aggravju, l-appellanti jikkritikaw lill-Qorti Ġenerali li kkunsidrat, fir-rigward tad-devjazzjoni mill-mezzi ta’ kompetizzjoni abbażi tal-mertu, elementi ta’ motivazzjoni li ma kinux jinsabu fid-deċiżjoni kontenzjuża u li ssostitwixxiet ir-raġunament tagħha stess ma’ dak tal-Kummissjoni, u b’hekk wettqet żball ta’ liġi. Dawn l-elementi ta’ motivazzjoni supplimentari, l-ewwel nett, kienu jikkonċernaw kriterju ta’ evalwazzjoni ġuridika iktar strett għall-impriżi “superdominanti” (punti 180, 182 u 183 tas-sentenza appellata), it-tieni nett, l-evalwazzjoni li, fid-dawl tal-infrastruttura bħala prinċipju miftuħa tal-mutur ta’ tfittxija ta’ Google, il-fatt li ċerti riżultati ta’ tiftix speċjalizzat tagħha stess jirċievu trattament preferenzjali meta mqabbla mar-riżultati ta’ tiftix kompetituri jikkonstitwixxi anormalità (punti 176 sa 184), u, it-tielet nett, l-evalwazzjoni li l-aġir inkwistjoni kien diskriminatorju (punti 71, 124, 237, 240, 279 u 284 sa 289).

176

Permezz tat-tielet parti tat-tieni aggravju, l-appellanti jsostnu li, fi kwalunkwe każ, dawn l-elementi ta’ motivazzjoni supplimentari huma legalment żbaljati.

177

Fl-ewwel lok, għandu jiġi eżaminat l-argument tal-appellanti li permezz tiegħu huma jsostnu, fit-tieni parti tat-tieni aggravju, li l-klassifikazzjoni tal-aġir ikkritikat bħala li jaqa’ taħt trattament diskriminatorju ma tinsabx fid-deċiżjoni kontenzjuża u, fit-tielet parti, li, fi kwalunkwe każ, din il-klassifikazzjoni hija żbaljata.

178

L-ewwel nett, kuntrarjament għall-argumenti tal-appellanti, li jirreferu għall-punti 71, 124, 237, 240, 279, 284 sa 289 u 316 tas-sentenza appellata, minn dawn il-punti ma jirriżultax li l-Qorti Ġenerali żiedet klassifikazzjoni tal-aġir inkwistjoni ma’ dik adottata mill-Kummissjoni.

179

Fil-fatt, minn naħa, fil-punti 71 u 124 tas-sentenza appellata, il-Qorti Ġenerali ma kklassifikatx dan l-aġir. Fl-ewwel wieħed minn dawn il-punti, hija sempliċement ġabret fil-qosor l-ordni ta’ waqfien u ta’ astensjoni fformulata fl-Artikolu 3 tad-dispożittiv tad-deċiżjoni kontenzjuża. Fit-tieni punt, hija ddikjarat il-mod li bih kienet ser teżamina l-argument tal-appellanti, billi indikat li kienet ser teżamina s-sustanza tad-differenza fit-trattament li hija l-bażi tal-klassifikazzjoni bħala trattament preferenzjali adottata mill-Kummissjoni, jiġifieri l-eżistenza jew le ta’ diskriminazzjoni implimentata minn Google għall-benefiċċju tas-servizz tagħha stess ta’ tiftix speċjalizzat.

180

Min-naħa l-oħra, mill-punti 237, 240, 279, 284 sa 289 tas-sentenza appellata jirriżulta li l-Qorti Ġenerali eżaminat il-klassifikazzjoni tal-aġir inkwistjoni adottata mill-Kummissjoni. Għalhekk, fl-imsemmija punti 237 u 240, il-Qorti Ġenerali, essenzjalment, billi bbażat ruħha fuq id-deċiżjoni kontenzjuża, ikkonfermat l-evalwazzjoni tal-Kummissjoni li l-prattiki inkwistjoni, li kienu jirriżultaw f’atti pożittivi ta’ diskriminazzjoni fit-trattament tar-riżultati tas-servizz ta’ tqabbil tax-xiri ta’ Google, kienu forma awtonoma ta’ abbuż permezz tal-effett ta’ lieva minn suq iddominat, ikkaratterizzat minn barrieri qawwija għad-dħul, jiġifieri s-suq tas-servizzi ta’ tiftix ġenerali. Barra minn hekk, fl-imsemmija punti 279 u 284 sa 289, il-Qorti Ġenerali eżaminat id-differenza fit-trattament ikkonstatata mill-Kummissjoni fir-rigward b’mod partikolari tal-pożizzjonament u tal-preżentazzjoni ta’ Product Universals, sabiex tivverifika jekk il-Kummissjoni setgħetx ġustament tikkonkludi li kienet teżisti diskriminazzjoni. Il-punt 316 tas-sentenza appellata jaqa’ taħt il-parti ta’ din is-sentenza ddedikata għal dan l-eżami fir-rigward tax-Shopping Units.

181

Għalhekk jirriżulta b’mod ċar minn dawn il-punti, imsemmija mill-appellanti, li jiċċitawhom billi jiżolawhom mill-punti l-oħra tal-parti tar-raġunament tal-Qorti Ġenerali li jaqgħu taħtha, li l-Qorti Ġenerali bbażat ir-raġunament tagħha fuq id-deċiżjoni kontenzjuża u kkonfermat il-klassifikazzjoni adottata mill-Kummissjoni, mingħajr ma żiedet klassifikazzjoni ġdida li ma hijiex sostnuta f’din id-deċiżjoni.

182

It-tieni nett, għandu jiġi eżaminat jekk, kif isostnu l-appellanti, il-Qorti Ġenerali wettqitx żball ta’ liġi meta kkonstatat l-eżistenza ta’ diskriminazzjoni mingħajr ma stabbilixxiet li Google għamlet differenza fit-trattament arbitrarja.

183

Kif jirriżulta, essenzjalment, mill-punti 168 sa 174, 237, 240, 279 u 284 sa 289 tas-sentenza appellata, il-Qorti Ġenerali, qabelxejn, irrilevat li, skont il-Kummissjoni, l-aġir inkwistjoni kien jikkonsisti f’li jiġu ttrattati b’mod differenti r-riżultati tas-servizzi ta’ tqabbil tax-xiri skont jekk kinux ġejjin mis-servizz ta’ tqabbil tax-xiri ta’ Google jew minn servizzi kompetituri ta’ tqabbil tax-xiri, f’termini ta’ preżentazzjoni u ta’ pożizzjonament fuq il-paġni tar-riżultati ġenerali, u kien iwassal għal differenza fit-trattament fil-forma ta’ trattament preferenzjali mogħti minn Google lis-servizz tagħha ta’ tqabbil tax-xiri.

184

Sussegwentement, il-Qorti Ġenerali enfasizzat li, minħabba l-preżenza tat-tliet ċirkustanzi speċifiċi li hija kienet semmiet, il-Kummissjoni kienet qieset li dan it-trattament preferenzjali kien ta’ natura li jwassal għad-dgħufija tal-kompetizzjoni fis-suq u li seta’ jiġi kklassifikat fid-dritt bħala aġir li ma jaqax taħt il-kompetizzjoni abbażi tal-mertu.

185

Fl-aħħar nett, il-Qorti Ġenerali qieset li l-aġir inkwistjoni kien ġie implimentat permezz tal-użu ta’ effett ta’ lieva, li kien jikkonsisti fil-fatt li Google tisfrutta l-pożizzjoni dominanti tagħha fis-suq upstream tas-servizzi ta’ tiftix ġenerali fuq l-internet, ikkaratterizzata minn barrieri qawwija għad-dħul, sabiex tikseb vantaġġi kompetittivi fis-suq downstream tas-servizzi ta’ tiftix speċjalizzat, li fih hija ma kinitx iżżomm tali pożizzjoni, u dan billi tiffavorixxi s-servizz tagħha stess ta’ tqabbil tax-xiri.

186

Għandu jiġi ppreċiżat li ma jistax jitqies, b’mod ġenerali, li impriża dominanti li tapplika għall-prodotti jew għas-servizzi tagħha trattament iktar favorevoli minn dak li hija tagħti lil dawk mill-kompetituri tagħha tadotta, indipendentement miċ-ċirkustanzi tal-każ, aġir li jitbiegħed mill-kompetizzjoni abbażi tal-mertu.

187

Madankollu, f’dan il-każ, il-Qorti Ġenerali, meta kkonfermat l-analiżi tal-Kummissjoni, ma llimitatx ruħha li tirrileva l-eżistenza ta’ tali trattament iktar favorevoli minn Google tas-servizz tagħha stess ta’ tqabbil tax-xiri, iżda stabbilixxiet li, fid-dawl tal-karatteristiċi tas-suq upstream u taċ-ċirkustanzi speċifiċi rrilevati, l-aġir inkwistjoni, biż-żewġ komponenti tiegħu, jiġifieri l-preżentazzjoni enfasizzata tar-riżultati tagħha stess u r-relegazzjoni ta’ dawk tal-operaturi kompetituri, kienet diskriminatorja u ma kinitx taqa’ taħt il-kompetizzjoni abbażi tal-mertu.

188

Fir-rigward tal-argument tal-appellanti li permezz tiegħu huma jinvokaw, essenzjalment, l-inkapaċità ta’ Google li turi riżultati speċjalizzati ta’ terzi li għandhom l-istess affidabbiltà u l-istess kwalità bħar-riżultati tagħha stess, dan l-argument għandu jiġi miċħud skont il-ġurisprudenza mfakkra fil-punt 61 ta’ din is-sentenza, peress li, permezz tagħha, l-appellanti jikkontestaw l-evalwazzjoni tal-fatti mill-Qorti Ġenerali, mingħajr ma jinvokaw żnaturament.

189

Għandu wkoll jiġi miċħud l-argument tal-appellanti li permezz tiegħu huma jallegaw, billi jirreferu għall-punti 285 u 575 tas-sentenza appellata, li l-Qorti Ġenerali ma adottatx approċċ koerenti fid-definizzjoni taż-żewġ elementi, li ġew ittrattati b’mod diskriminatorju.

190

Il-Qorti Ġenerali rrilevat, b’mod partikolari fil-punt 285 tas-sentenza appellata, li t-trattament differenzjat implimentat minn Google kien isir skont l-oriġini tar-riżultati, jiġifieri skont jekk kinux provenjenti minn servizzi kompetituri ta’ tqabbil tax-xiri jew mis-servizz tagħha ta’ tqabbil tax-xiri, billi Google tiffavorixxi l-aħħar wieħed meta mqabbel ma’ dawk tal-ewwel u mhux riżultat meta mqabbel ma’ ieħor skont il-kontenut tiegħu.

191

Fil-punt 575 tas-sentenza appellata, fl-analiżi tagħha tal-ġustifikazzjoni oġġettiva, il-Qorti Ġenerali ċertament ikkunsidrat li l-Kummissjoni fittxet biss ugwaljanza fit-trattament, f’termini ta’ pożizzjonament u ta’ preżentazzjoni, bejn żewġ tipi ta’ riżultati ta’ Google. Madankollu, mill-parti tar-raġunament tal-Qorti Ġenerali li fiha jinsab dan il-punt, b’mod partikolari mill-punti 574 u 576 ta’ din is-sentenza, jirriżulta li l-Kummissjoni kkritikat lil Google li ma applikatx l-istess trattament għar-riżultati provenjenti minn servizzi kompetituri ta’ tqabbil tax-xiri bħal dawk provenjenti mis-servizz tagħha ta’ tqabbil tax-xiri. Ir-riferiment għal “żewġ tipi ta’ riżultati ta’ Google” imsemmi fil-punt 575 tal-imsemmija sentenza jikkostitwixxi għalhekk żball tal-pinna, peress li l-Qorti Ġenerali barra minn hekk semmiet repetutament li l-aġir ta’ Google kien jikkonsisti f’li jiġu ttrattati b’mod differenti r-riżultati skont l-oriġini tagħhom u mhux skont il-kontenut tagħhom.

192

Konsegwentement, id-definizzjoni tas-suġġett tad-diskriminazzjoni fis-sentenza appellata ma hijiex ivvizzjata b’inkoerenza u l-Qorti Ġenerali ma tistax tiġi kkritikata li wettqet żball ta’ liġi meta qieset li l-aġir inkwistjoni seta’ jiġi kklassifikat bħala diskriminatorju u li ma kienx jaqa’ taħt il-kompetizzjoni abbażi tal-mertu.

193

F’dawn iċ-ċirkustanzi, għandu jiġi miċħud l-argument tal-appellanti li permezz tiegħu huma jsostnu, fit-tieni parti tat-tieni aggravju, li l-klassifikazzjoni tal-aġir ikkritikat bħala trattament diskriminatorju ma kinitx tinsab fid-deċiżjoni kontenzjuża u, fit-tielet parti tat-tieni aggravju, li din il-klassifikazzjoni kienet, fi kwalunkwe każ, żbaljata.

194

Fit-tieni lok, l-appellanti jsostnu, fit-tieni parti tat-tieni aggravju, li, fil-punti 176 sa 184 tas-sentenza appellata, il-Qorti Ġenerali ressqet żewġ kunsiderazzjonijiet addizzjonali oħra li ma kinux jinsabu fid-deċiżjoni kontenzjuża, jiġifieri, minn naħa, kriterju ta’ evalwazzjoni ġuridika iktar strett għall-impriżi “superdominanti” u, min-naħa l-oħra, fid-dawl tal-infrastruttura bħala prinċipju miftuħa tal-mutur ta’ tfittxija ta’ Google, il-fatt li ċerti riżultati ta’ tiftix speċjalizzat ta’ Google kienu ffavoriti meta mqabbla mar-riżultati ta’ tiftix kompetituri kien jikkostitwixxi anormalità. Fit-tielet parti tat-tieni aggravju, l-appellanti jsostnu li, fi kwalunkwe każ, dawn il-kunsiderazzjonijiet ma humiex fondati.

195

F’dan ir-rigward, huwa minnu li, fil-punti 176 sa 184 tas-sentenza appellata, il-Qorti Ġenerali ressqet kunsiderazzjonijiet li ma jirriżultawx mill-motivazzjoni tad-deċiżjoni kontenzjuża. L-istess japplika għal dawk relatati man-anormalità tal-aġir ta’ Google u mas-superdominanza tagħha fis-suq tat-tiftix ġenerali kif ukoll għal dawk li jirrigwardaw l-obbligu ta’ trattament nondiskriminatorju li jirriżulta mid-dispożizzjonijiet tar-Regolament 2015/2120.

196

Madankollu, għalkemm l-uniċi kunsiderazzjonijiet li l-Qorti Ġenerali espliċitament ippreżentat bħala għall-finijiet ta’ kompletezza huma dawk li jinsabu fil-punt 180 tas-sentenza appellata, il-kunsiderazzjonijiet li jinsabu fil-punti 176 sa 179 u 181 sa 184 tas-sentenza appellata ġew ifformulati wkoll għall-finijiet ta’ kompletezza.

197

Fil-fatt, fil-punti 175 u 185 tas-sentenza appellata, il-Qorti Ġenerali essenzjalment qieset li, anki jekk jitqies li t-trattament preferenzjali u l-effetti tiegħu, identifikati fid-dawl taċ-ċirkustanzi speċifiċi tas-swieq ikkonċernati, kienu ġew validament ipprovati mill-Kummissjoni, din l-istituzzjoni ġustament qieset li dan it-trattament preferenzjali kien jitbiegħed mill-kompetizzjoni abbażi tal-mertu. Din il-konklużjoni li tinsab fi tmiem il-punt 185 ta’ din is-sentenza sempliċement tirreferi għall-kunsiderazzjonijiet li jinsabu fil-punti 170 sa 173 tal-imsemmija sentenza, mingħajr ma tirreferi għall-kunsiderazzjonijiet addizzjonali fformulati mill-Qorti Ġenerali fil-punti 176 sa 184 tal-istess sentenza, ikkritikati mill-appellanti.

198

Barra minn hekk, hekk kif jirriżulta mill-punt 192 ta’ din is-sentenza, dawn il-kunsiderazzjonijiet ma kinux neċessarji sabiex tiġi kkonfermata l-evalwazzjoni li l-aġir inkwistjoni seta’ jitqies fid-dritt bħala li ma jaqax taħt il-kompetizzjoni abbażi tal-mertu.

199

Konsegwentement, hemm lok li jiġu miċħuda bħala ineffettivi l-ilmenti tal-appellanti mqajma fit-tieni u fit-tielet parti tat-tieni aggravju, li permezz tagħhom huma jikkritikaw il-punti 176 sa 184 tas-sentenza appellata, u, għaldaqstant, dawn iż-żewġ partijiet għandhom jiġu miċħuda kollha kemm huma.

200

Fid-dawl tal-kunsiderazzjonijiet preċedenti kollha, it-tieni aggravju għandu jiġi miċħud kollu kemm hu.

3.

Fuq it‑tielet aggravju

201

Permezz tat-tielet aggravju, kompost minn tliet partijiet, l-appellanti jsostnu li l-Qorti Ġenerali wettqet żbalji ta’ liġi fl-analiżi tar-rabta kawżali bejn l-abbuż allegat u l-effetti probabbli tiegħu.

202

Permezz tal-ewwel parti tat-tielet aggravju, l-appellanti jallegaw li, f’dan il-każ, il-Qorti Ġenerali wettqet żball ta’ liġi meta qieset, fil-punti 377 sa 379 tas-sentenza appellata, li r-responsabbiltà li titwettaq analiżi kontrofattwali kienet ta’ Google u mhux tal-Kummissjoni. Permezz tat-tieni parti tat-tielet aggravju, huma jsostnu li l-Qorti Ġenerali wettqet żball ta’ liġi meta ddeċidiet, fil-punti 374, 376 u 525 ta’ din is-sentenza, li xenarju kontrofattwali għal abbuż li jikkonsisti fil-kombinazzjoni ta’ żewġ prattiki legali kien jeżiġi t-tneħħija ta’ dawn iż-żewġ prattiki. Permezz tat-tielet parti tat-tielet aggravju, huma jallegaw li l-approċċ żbaljat tal-Qorti Ġenerali fuq dak li jikkostitwixxi xenarju kontrofattwali korrett invalida l-evalwazzjoni tagħha, fil-punt 572 tas-sentenza appellata, tal-ġustifikazzjonijiet oġġettivi u tal-effetti tal-aġir ikkonċernat.

a)

Fuq l‑ammissibbiltà

203

Il-BEUC, il-VDZ, Ladenzeile u l-BDZV isostnu li t-tielet aggravju huwa inammissibbli. Huma jallegaw li, permezz tiegħu, l-appellanti jfittxu li jikkontestaw l-evalwazzjoni mill-Qorti Ġenerali tal-provi, b’mod partikolari taż-żewġ xenarji kontrafattwali li huma kienu ppreżentaw matul il-proċedura amministrattiva, jew sempliċement itennu argumenti diġà esposti quddiem il-Qorti Ġenerali. Min-naħa tagħha, mingħajr ma tinvoka formalment eċċezzjoni ta’ inammissibbiltà, il-Kummissjoni ssostni li l-evalwazzjoni mill-Qorti Ġenerali ta’ dawn ix-xenarji kontrafattwali hija definittivament stabbilita fil-punti 369 sa 376 tas-sentenza appellata, fl-assenza ta’ kwalunkwe allegazzjoni ta’ żnaturament min-naħa tal-appellanti.

204

Fir-replika tagħhom, l-appellanti jsostnu li t-tielet aggravju huwa ammissibbli. Huma jippreċiżaw li l-kritiki li huma jifformulaw fil-kuntest ta’ dan l-aggravju jirrigwardaw l-evalwazzjoni żbaljata magħmula mill-Qorti Ġenerali tal-kunċett ġuridiku tal-analiżi kontrofattwali fil-kuntest partikolari ta’ aġir li jinkludi diversi prattiki li l-effett ikkombinat tagħhom jippreġudika l-kompetizzjoni abbażi tal-mertu, li jikkostitwixxi żball ta’ liġi.

205

Għandu jiġi osservat, fl-ewwel lok, li, kif tfakkar fil-punt 61 ta’ din is-sentenza, il-kompetenza tal-Qorti tal-Ġustizzja li tiddeċiedi dwar appell minn deċiżjoni mogħtija mill-Qorti Ġenerali hija limitata għal kwistjonijiet ta’ liġi, peress li l-evalwazzjoni tal-fatti u tal-provi ma tikkostitwixxix, ħlief fil-każ tal-iżnaturament tagħhom, kwistjoni suġġetta għall-istħarriġ tal-Qorti tal-Ġustizzja.

206

Issa, il-kwistjonijiet dwar, minn naħa, jekk jeżistix obbligu sistematiku għall-Kummissjoni li twettaq analiżi kontrofattwali fil-kawżi li jaqgħu taħt l-Artikolu 102 TFUE u, min-naħa l-oħra, liema kriterji xenarju kontrofattwali għandu jissodisfa sabiex dan ikun jista’ jirrifletti dak li seta’ ġara fl-assenza tal-abbuż allegat fil-każ partikolari ta’ aġir ikkostitwit minn diversi prattiki li l-effett ikkombinat tagħhom jikkostitwixxi preġudizzju għall-kompetizzjoni abbażi tal-mertu huma kwistjonijiet ta’ liġi, li jistgħu jkunu s-suġġett ta’ stħarriġ mill-Qorti tal-Ġustizzja fil-kuntest ta’ appell.

207

Fit-tieni lok, hekk kif jirriżulta mill-ġurisprudenza stabbilita tal-Qorti tal-Ġustizzja, ladarba appellant jikkontesta l-interpretazzjoni jew l-applikazzjoni tad-dritt tal-Unjoni magħmula mill-Qorti Ġenerali, il-punti ta’ liġi eżaminati fl-ewwel istanza jistgħu jiġu diskussi mill-ġdid fl-appell. Fil-fatt, li kieku l-appellant ma jkunx jista’ jibbaża l-appell tiegħu b’dan il-mod fuq motivi u argumenti diġà użati quddiem il-Qorti Ġenerali, il-proċedura tal-appell tkun imċaħda minn parti mis-sens tagħha (ara, f’dan is-sens, is-sentenza tad‑19 ta’ Ottubru 2023, Aquino vs Il‑Parlament, C‑534/22 P, EU:C:2023:802, punti 69 u 70 kif ukoll il-ġurisprudenza ċċitata).

208

Issa, f’dan il-każ, l-appellanti ma jillimitawx ruħhom li jirriproduċu l-argumenti invokati fl-ewwel istanza, iżda jallegaw li l-Qorti Ġenerali, b’tweġiba għal dawn l-argumenti, ivvizzjat is-sentenza appellata bi żbalji ta’ liġi.

209

Isegwi li t-tielet aggravju huwa ammissibbli.

b)

Fuq il‑mertu

1)

Fuq l‑ewwel parti tat‑tielet aggravju

i)

L‑argumenti tal‑partijiet

210

Permezz tal-ewwel parti tat-tielet aggravju, l-appellanti jsostnu li l-Qorti Ġenerali wettqet żball ta’ liġi, fil-punti 377 sa 379 tas-sentenza appellata, meta qieset li l-oneru li titwettaq analiżi kontrofattwali kien jaqa’ fuq Google peress li l-Kummissjoni kienet identifikat effetti antikompetittivi potenzjali u mhux reali. Fl-assenza ta’ analiżi kontrofattwali mwettqa mill-Kummissjoni, l-allegazzjonijiet tagħha dwar l-effetti antikompetittivi tal-aġir allegatament abbużiv jibqgħu astratti, peress li ma teżisti ebda bażi ta’ riferiment li tippermetti li dawn l-effetti jiġu evalwati.

211

Permezz tal-ewwel ilment, l-appellanti jsostnu li l-Qorti Ġenerali illegalment tbiegħdet mid-deċiżjoni kontenzjuża billi jsostnu li hija kienet identifikat effetti antikompetittivi potenzjali u mhux effetti reali. Fil-fatt, fil-premessa 462 ta’ din id-deċiżjoni, il-Kummissjoni ddikjarat li l-abbuż allegat kellu effetti reali u mhux biss potenzjali, peress li l-aġir inkwistjoni kien wassal għal tnaqqis tat-traffiku provenjenti mill-paġni ta’ tiftix ġeneriċi ta’ Google lejn is-servizzi kompetituri ta’ tqabbil tax-xiri. Barra minn hekk, il-Qorti Ġenerali stess ibbażat ruħha wkoll fuq dan l-effett reali fuq it-traffiku meta kkonkludiet, fil-punt 519 tas-sentenza appellata, li l-aġir inkwistjoni kellu l-kapaċità li jirrestrinġi l-kompetizzjoni. Għaldaqstant, fil-preżenza ta’ tali effetti antikompetittivi reali, il-Kummissjoni kellha twettaq analiżi kontrofattwali.

212

Permezz tat-tieni lment, l-appellanti jallegaw li, indipendentement mill-kwistjoni dwar jekk l-effetti tal-aġir inkwistjoni kinux reali jew potenzjali, kull evalwazzjoni tagħhom kienet teħtieġ li l-Kummissjoni twettaq analiżi kontrofattwali, peress li tali analiżi hija inerenti għall-kunċett ta’ kawżalità.

213

F’dan ir-rigward, l-appellanti jsostnu, fl-ewwel lok, li l-qorti tal-Unjoni Ewropea kkonfermat diversi drabi n-neċessità għall-Kummissjoni li twettaq analiżi kontrofattwali fil-kuntest tal-Artikolu 101 TFUE, b’tali mod li ma teżisti ebda bażi raġonevoli għal approċċ differenti fil-kuntest tal-Artikolu 102 TFUE.

214

Fit-tieni lok, l-appellanti jsostnu li l-punt 21 tal-Komunikazzjoni dwar il-Linji Gwida dwar il-prijoritajiet ta’ infurzar tal-Kummissjoni fl-applikazzjoni tal-[102 TFUE] għal imġiba esklużjonarja abbużiva minn impriżi dominanti (ĠU 2009, C 45, p. 7) jikkonferma li l-aġir preżunt abbużiv għandu ġeneralment jiġi evalwat abbażi ta’ xenarju kontrofattwali adegwat.

215

Fit-tielet lok, l-appellanti jallegaw li, kuntrarjament għal dak li jirriżulta mill-punt 377 tas-sentenza appellata, xenarji kontrafattwali bbażati fuq kuntesti reali, jiġifieri l-iżviluppi ta’ swieq simili fl-Istati Membri li fihom il-Kummissjoni ma identifikatx abbuż, kienu jeżistu f’dan il-każ. Barra minn hekk, skont l-appellanti, anki fl-assenza ta’ tali xenarji, il-Kummissjoni ma tistax tiġi eżentata milli twettaq analiżi kontrofattwali sabiex tispjega, b’mod motivat, liema hija s-sitwazzjoni probabbli mingħajr l-abbuż allegat. Għalhekk, f’dan il-każ, l-assenza ta’ “analiżi oġġettiva” ta’ xenarju kontrofattwali kellha tikkostitwixxi motiv suffiċjenti sabiex id-deċiżjoni kontenzjuża tiġi annullata.

216

Fir-replika tagħhom, l-appellanti jikkontestaw in-natura ineffettiva tal-ilmenti tagħhom, invokata mill-Kummissjoni. Bi tweġiba għall-argument ta’ din tal-aħħar, li jirrigwarda, l-ewwel nett, iż-żieda mhux ikkontestata tat-traffiku lejn is-servizz ta’ tqabbil tax-xiri ta’ Google li fuqha hija bbażata wkoll il-konstatazzjoni tal-effetti antikompetittivi tal-aġir inkwistjoni, it-tieni nett, il-finijiet ta’ kompletezza tal-punti 377 u 378 tas-sentenza appellata u, it-tielet nett, in-natura mhux ikkontestata tal-impatt tal-algoritmi ta’ klassifikazzjoni tar-riżultati ġeneriċi ta’ Google fuq it-traffiku, ikkonstatata mill-Qorti Ġenerali fil-punt 393 ta’ din is-sentenza, l-appellanti jsostnu, qabelxejn, li, sa fejn ġie identifikat li l-aġir inkwistjoni wassal kemm għal tnaqqis kif ukoll għal żidiet fit-traffiku, il-kontestazzjoni tat-tnaqqis hija biżżejjed sabiex il-konstatazzjoni taż-żieda tiġi invalidata. Sussegwentement, l-appellanti jikkontestaw li l-motivi esposti mill-Qorti Ġenerali fil-punti 377 sa 379 tal-istess sentenza kienu ġew ifformulati għall-finijiet ta’ kompletezza u jsostnu li dawn il-motivi jinkludu elementi neċessarji għall-motivazzjoni. Fl-aħħar nett, l-appellanti jsostnu li l-punt 393 tas-sentenza appellata jagħmel preċiżament parti mill-iżball irrilevat fl-appell, peress li juri li l-Qorti Ġenerali imputat it-tnaqqis tat-traffiku lejn is-servizzi kompetituri ta’ tqabbil tax-xiri mhux għall-aġir inkwistjoni bħala kombinazzjoni taż-żewġ prattiki iżda biss lejn waħda minn dawn il-prattiki, jiġifieri l-użu tal-algoritmi ta’ klassifikazzjoni tar-riżultati ġeneriċi.

217

Il-Kummissjoni, PriceRunner, l-Awtorità tas-Sorveljanza EFTA, il-BEUC, Kelkoo, il-VDZ, Ladenzeile, il-BDZV u Twenga jikkontestaw l-argument tal-appellanti u jsostnu li l-ewwel parti tat-tielet aggravju hija ineffettiva jew, fi kwalunkwe każ, infondata.

ii)

Il‑kunsiderazzjonijiet tal‑Qorti tal‑Ġustizzja

218

Il-punti 377 sa 379 tas-sentenza appellata, ikkontestati fil-kuntest tal-ewwel parti tat-tielet aggravju, jikkonċernaw l-analiżi tal-Qorti Ġenerali dwar ir-rabta kawżali bejn l-aġir inkwistjoni u t-tnaqqis tat-traffiku mill-paġni tar-riżultati ġenerali ta’ Google lejn is-servizzi kompetituri ta’ tqabbil tax-xiri.

219

Fir-rigward tal-ewwel ilment, hemm lok li jiġi osservat li l-premessa 426 tad-deċiżjoni kontenzjuża tinsab fit-Taqsima 7.2 ta’ din id-deċiżjoni dwar l-aġir inkwistjoni u tirrigwarda l-analiżi tal-impatt ta’ dan l-aġir fuq it-traffiku ġġenerat mill-paġni tar-riżultati ġenerali ta’ Google lejn is-servizzi kompetituri ta’ tqabbil tax-xiri, imwettqa mill-Kummissjoni fit-Taqsima 7.2.3.2 tal-imsemmija deċiżjoni. Il-Kummissjoni kkonstatat hemmhekk tnaqqis f’dan it-traffiku f’kull wieħed mit-tlettax-il pajjiż taż-ŻEE li fihom dawn il-prattiki kienu ġew implimentati.

220

Min-naħa l-oħra, huwa fit-Taqsima 7.3 tad-deċiżjoni kontenzjuża li l-Kummissjoni wettqet analiżi tal-effetti tal-aġir inkwistjoni, li hija kklassifikat bħala effetti antikompetittivi potenzjali, li kapaċi jaffettwaw l-istruttura kompetittiva tas-swieq ikkonċernati. Dawn l-effetti potenzjali kienu jikkonsistu, kif ġie rrilevat fil-punt 451 tas-sentenza appellata, f’riskju li s-servizzi kompetituri ta’ tqabbil tax-xiri jwaqqfu l-attivitajiet tagħhom kif ukoll f’impatt negattiv fuq l-innovazzjoni u fuq il-possibbiltà tal-konsumaturi li jaċċedu għas-servizzi l-iktar effiċjenti.

221

L-elementi li jikkonċernaw il-varjazzjoni tat-traffiku mill-paġni tar-riżultati ġenerali ta’ Google lejn is-servizzi kompetituri ta’ tqabbil tax-xiri kif ukoll lejn is-servizz tagħha ta’ tqabbil tax-xiri ma kinux jikkostitwixxu, għaldaqstant, effetti antikompetittivi reali identifikati mill-Kummissjoni, iżda provi tanġibbli li fuqhom kienet ibbażata l-konstatazzjoni tal-effetti antikompetittivi potenzjali tal-aġir inkwistjoni. Fil-fatt, kif jirriżulta wkoll mill-punti 445 sa 450 u 454 tas-sentenza appellata, il-Qorti Ġenerali kkunsidrat li l-Kummissjoni, wara analiżi f’diversi stadji u fi tmiem motivazzjoni argumentata, kienet iddeduċiet l-eżistenza ta’ effetti antikompetittivi potenzjali fis-swieq tas-servizzi ta’ tqabbil tax-xiri billi bbażat ruħha fuq elementi konkreti li jirrigwardaw l-evoluzzjoni tat-traffiku mill-paġni tar-riżultati ġenerali ta’ Google lejn is-servizzi kompetituri ta’ tqabbil tax-xiri u lejn is-servizz tagħha ta’ tqabbil tax-xiri kif ukoll fuq il-parti rrappreżentata minn dan it-traffiku fit-traffiku kollu tas-servizzi kompetituri ta’ tqabbil tax-xiri. Issa, b’dan il-mod, il-Qorti Ġenerali ma tbegħditx mid-deċiżjoni kontenzjuża, peress li l-effetti antikompetittivi identifikati minn din id-deċiżjoni baqgħu potenzjali filwaqt li ġew dedotti elementi konkreti bbażati fuq l-evoluzzjoni tat-traffiku.

222

Konsegwentement, l-ewwel ilment għandu jiġi miċħud bħala infondat.

223

Permezz tat-tieni lment, l-appellanti għandhom l-intenzjoni juru, essenzjalment, li l-Qorti Ġenerali qalbet l-oneru tal-prova billi kkonfermat id-deċiżjoni kontenzjuża mingħajr ma l-Kummissjoni wettqet analiżi kontrofattwali sabiex tistabbilixxi r-rabta kawżali bejn l-aġir inkwistjoni u l-effetti tiegħu.

224

F’dan ir-rigward, għandu jiġi osservat, qabelxejn, li din ir-rabta kawżali taqa’ taħt elementi kostituttivi essenzjali ta’ ksur tad-dritt tal-kompetizzjoni li hija l-Kummissjoni li għandha tipproduċi l-prova tiegħu, konformement mar-regoli ġenerali tal-produzzjoni tal-provi, imfakkra b’mod partikolari fil-punti 132 sa 134 tas-sentenza appellata. Għalhekk, hija l-Kummissjoni li għandha tistabbilixxi l-provi li jistgħu juru, b’mod suffiċjenti fid-dritt, l-eżistenza tal-fatti li jikkostitwixxu ksur. Min-naħa l-oħra, hija l-impriża li tqajjem motiv ta’ difiża kontra l-konstatazzjoni ta’ tali ksur li għandha tipproduċi l-prova li dan il-motiv ta’ difiża għandu jintlaqa’.

225

Il-punt 382 tas-sentenza appellata, li ma huwiex ikkontestat mill-appellanti, jikkompleta r-raġunament tal-Qorti Ġenerali f’dan ir-rigward billi jistabbilixxi l-kriterji li għandhom jiggwidaw l-eżami tar-relazzjoni kawżali. Huwa għalhekk stabbilit li, sabiex tistabbilixxi l-effetti reali jew potenzjali tal-prattiki eżaminati, il-Kummissjoni tista’ tibbaża ruħha fuq elementi bbażati fuq l-osservazzjoni tal-evoluzzjoni reali tas-suq jew tas-swieq ikkonċernati minn dawn il-prattiki. Jekk tiġi osservata korrelazzjoni bejn l-imsemmija prattiki u l-bidla tas-sitwazzjoni kompetittiva fuq dawn is-swieq, elementi addizzjonali, li jistgħu b’mod partikolari jinkludu evalwazzjonijiet tal-atturi tas-suq, tal-fornituri tagħhom, tal-klijenti tagħhom, ta’ assoċjazzjonijiet professjonali jew ta’ konsumaturi, jistgħu juru r-rabta kawżali bejn l-aġir ikkonċenrat u l-evoluzzjoni tas-suq.

226

Huwa fuq dawn il-kriterji ta’ analiżi li l-Qorti Ġenerali bbażat ruħha fil-punti 383 sa 393 ta’ din is-sentenza sabiex twettaq eżami konkret tar-relazzjoni kawżali bejn l-aġir inkwistjoni u t-tnaqqis tat-traffiku mill-paġni tar-riżultati ġenerali ta’ Google lejn il-maġġoranza tas-servizzi kompetituri ta’ tqabbil tax-xiri, eżami li permezz tiegħu l-Qorti Ġenerali kkonstatat, fil-punt 394 tal-imsemmija sentenza, li l-Kummissjoni kienet uriet li l-prattiki kkonċernati kienu wasslu għal tnaqqis tat-traffiku ta’ tiftix ġeneriku lejn kważi s-servizzi kompetituri kollha ta’ tqabbil tax-xiri.

227

F’dan il-kuntest, il-Qorti Ġenerali ddeċidiet, fil-punt 379 tas-sentenza appellata, li, fil-kuntest tat-tqassim tal-oneru tal-prova, impriża tista’ tinvoka analiżi kontrofattwali sabiex tikkontesta l-evalwazzjoni tal-Kummissjoni tal-effetti potenzjali jew reali tal-aġir ikkonċernat.

228

Issa, billi pproċediet b’dan il-mod, il-Qorti Ġenerali la qalbet l-oneru tal-prova li l-Kummissjoni għandha f’dak li jirrigwarda l-obbligu li turi r-rabta kawżali bejn l-aġir inkwistjoni u l-effetti tiegħu, u lanqas ma eskludiet in-natura utli ta’ analiżi kontrofattwali. Hija kkonstatat biss li l-Kummissjoni tista’ tibbaża ruħha fuq sensiela ta’ elementi probatorji, mingħajr ma tkun obbligata tirrikorri sistematikament għal għodda waħda sabiex tipprova l-eżistenza ta’ tali rabta kawżali.

229

Dan l-approċċ huwa, mill-bqija, konformi mal-ġurisprudenza tal-Qorti tal-Ġustizzja ċċitata fil-punti 165 sa 167 ta’ din is-sentenza.

230

Konsegwentement, sa fejn jirrigwarda r-raġunament tal-Qorti Ġenerali dwar it-tqassim tal-oneru tal-prova u dwar l-utilità tal-analiżi kontrofattwali fil-kuntest tal-provi rilevanti fid-dawl tal-Artikolu 102 TFUE, it-tieni lment għandu jiġi miċħud bħala infondat.

231

Sa fejn dan l-ilment jirrigwarda l-punti 377 u 378 tas-sentenza appellata, għandu jiġi rrilevat li l-Qorti Ġenerali kkunsidrat fihom li l-identifikazzjoni ta’ xenarju kontrofattwali affidabbli sabiex jiġu analizzati l-effetti ta’ prattiki allegatament antikompetittivi fuq suq tista’ tkun, f’sitwazzjoni bħal dik f’dan il-każ, eżerċizzju każwali, jekk mhux impossibbli, u li, sabiex jintwera ksur tal-Artikolu 102 TFUE, b’mod partikolari fir-rigward tal-effetti ta’ prattiki fuq il-kompetizzjoni, il-Kummissjoni ma tistax tkun obbligata tistabbilixxi sistematikament tali xenarju kontrofattwali.

232

Issa, dawn il-punti tas-sentenza appellata huma, kif osservat l-Avukata Ġenerali fil-punt 171 tal-konklużjonijiet tagħha, ta’ natura mhux neċessarja meta mqabbla b’mod partikolari mal-punti 372 sa 376 tas-sentenza appellata, b’tali mod li l-kritika tal-appellanti f’dan ir-rigward għandha tiġi miċħuda bħala ineffettiva.

233

Fl-aħħar nett, fir-rigward tal-kritika tal-appellanti diretta lejn il-punt 393 tas-sentenza appellata, huwa biżżejjed li jiġi kkonstatat li l-Qorti Ġenerali llimitat ruħha li tikkonstata li kienet teżisti rabta kawżali bejn il-viżibbiltà ta’ sit internet fi ħdan riżultati ġeneriċi ta’ Google, li tiddependi mill-algoritmi ta’ klassifikazzjoni ta’ dawn ir-riżultati, u l-importanza tat-traffiku mill-imsemmija riżultati lejn dan is-sit. Issa, tali konstatazzjoni ma tikkontradixxix l-evalwazzjoni tagħha dwar dak li jista’ jikkostitwixxi xenarju kontrofattwali xieraq f’dan il-każ.

234

Konsegwentement, l-ewwel parti tat-tielet aggravju għandha tiġi miċħuda bħala parzjalment infondata u parzjalment ineffettiva.

2)

Fuq it‑tieni u t‑tielet parti tat-tielet aggravju

i)

L‑argumenti tal‑partijiet

235

Permezz tat-tieni parti tat-tielet aggravju, l-appellanti jikkontestaw il-klassifikazzjoni ġuridika, imwettqa fil-punti 374, 376 u 525 tas-sentenza appellata, li tikkostitwixxi, għall-Qorti Ġenerali, xenarju kontrofattwali korrett meta abbuż ikun jinvolvi żewġ prattiki “meħuda flimkien”. Skont l-appellanti, meta ddeċidiet li, f’tali sitwazzjoni, xenarju kontrofattwali għandu jieħu inkunsiderazzjoni l-effetti taż-żewġ prattiki inkwistjoni, jiġifieri kemm l-effetti tal-preżentazzjoni enfasizzata tas-servizz ta’ tqabbil tax-xiri ta’ Google permezz tal-“kaxxi” kif ukoll l-effetti tal-applikazzjoni tal-algoritmi ta’ aġġustament u tar-relegazzjoni tas-servizzi kompetituri ta’ tqabbil tax-xiri fir-riżultati ġeneriċi, il-Qorti Ġenerali wettqet żball ta’ liġi.

236

Permezz tal-ewwel ilment, l-appellanti jallegaw li, sa fejn kull waħda minn dawn iż-żewġ prattiki hija, kif ġie ammess mill-Qorti Ġenerali fil-punt 373 tas-sentenza appellata, legali fiha nnifisha, xenarju kontrofattwali li jneħħi waħda minn dawn il-prattiki, b’mod partikolari d-dehra tal-“kaxxi”, jikkostitwixxi xenarju adegwat, għaliex joħloq sitwazzjoni mingħajr il-kombinazzjoni taż-żewġ prattiki u, konsegwentement, mingħajr l-abbuż allegat. Min-naħa l-oħra, it-tneħħija taż-żewġ prattiki fl-istabbiliment tax-xenarju kontrofattwali, ipprivileġġata mill-Qorti Ġenerali fil-punt 376 ta’ din is-sentenza, tmur lil hinn minn dak li huwa neċessarju sabiex tinħoloq sitwazzjoni mingħajr il-kombinazzjoni allegatament abbużiva u tfixkel l-effetti tal-aġir legali u dawk tal-aġir illegali.

237

Permezz tat-tieni lment, l-appellanti jikkritikaw lill-Qorti Ġenerali talli kkunsidrat xenarju kontrofattwali li ma huwiex “realistiku”, “plawżibbli” u “probabbli”, fis-sens tal-ġurisprudenza tal-Qorti tal-Ġustizzja (sentenza tal‑11 ta’ Settembru 2014, MasterCard et vs Il‑Kummissjoni, C‑382/12 P, EU:C:2014:2201, punti 166 sa 169 u 173). Fil-fatt, dan ix-xenarju ma jillimitax ruħu li jneħħi l-“kaxxi”, u jtemm l-abbuż, kif ikkonfermat il-Kummissjoni fir-risposta tagħha quddiem il-Qorti Ġenerali, iżda jeżiġi wkoll it-tneħħija tal-algoritmi ta’ relegazzjoni ddestinati għat-titjib tal-kwalità tas-servizz ta’ tfittxija. Issa, l-istudji ppreżentati mill-appellanti matul il-proċedura amministrattiva, jiġifieri l-analiżi msejħa “tad-differenzi fid-differenzi” u l-esperjenza msejħa ta’ “ablazzjoni”, urew li t-traffiku lejn is-servizzi kompetituri ta’ tqabbil tax-xiri ma nbidilx b’mod sinjifikattiv fil-każ tat-tneħħija tal-“kaxxi”, li jipprova li t-tnaqqis tat-traffiku kien ġie imputat b’mod żbaljat fuq l-aġir inkwistjoni.

238

Permezz tat-tielet parti tat-tielet aggravju, l-appellanti jallegaw, minn naħa, li l-approċċ żbaljat tal-Qorti Ġenerali fuq ix-xenarju kontrofattwali invalida l-evalwazzjoni tagħha tal-effetti tal-aġir ikkonċernat, peress li dan l-approċċ wassal għall-imputazzjoni fuq l-abbuż allegat ta’ effetti li kienu imputabbli lil prattiki legali. Min-naħa l-oħra, huma jiddikjaraw li l-imsemmi approċċ invalida wkoll l-evalwazzjoni mill-Qorti Ġenerali tal-ġustifikazzjoni oġġettiva mressqa minn Google li kienet tgħid li ma kienx ikun possibbli li jittejjeb is-servizz ta’ tiftix tagħha jekk ir-riżultati tas-servizzi kompetituri ta’ tqabbil tax-xiri kienu inklużi fil-“kaxxi”. Issa, billi ċaħdet din l-ispjegazzjoni, fil-punt 572 tas-sentenza appellata, minħabba li t-titjib ma kienx jipprevali fuq l-effetti antikompetittivi tal-aġir inkwistjoni, il-Qorti Ġenerali vvizzjat din is-sentenza bi żball ta’ liġi.

239

Il-Kummissjoni, PriceRunner, l-Awtorità tas-Sorveljanza EFTA, il-BEUC, Foundem, Kelkoo, il-VDZ, Ladenzeile, il-BDZV u Twenga jikkontestaw l-argument tal-appellanti bħala ineffettiv, jew, fi kwalunkwe każ, infondat.

ii)

Il‑kunsiderazzjonijiet tal‑Qorti tal‑Ġustizzja

240

Il-punti 374, 376 u 525 tas-sentenza appellata, ikkontestati fil-kuntest tat-tieni parti tat-tielet aggravju, jikkonċernaw l-evalwazzjoni magħmula mill-Qorti Ġenerali ta’ x’tikkostitwixxi analiżi kontrofattwali li tista’ tagħraf l-effetti ta’ aġir li jikkonsisti fil-kombinazzjoni taż-żewġ prattiki, fejn kull waħda minnhom hija legali fiha nnifisha.

241

Fil-punti 370 sa 373 tas-sentenza appellata, il-Qorti Ġenerali rrilevat li ebda waħda mill-prattiki inkwistjoni, meqjusa separatament, ma kienet qajmet oġġezzjonijiet fil-qasam tal-kompetizzjoni f’għajnejn il-Kummissjoni iżda li din qajmet dubji dwar il-prattiki meħuda flimkien li, minn naħa, kienu jivvalorizzaw is-servizz ta’ tqabbil tax-xiri ta’ Google u, min-naħa l-oħra, kienu jnaqqsu l-valur tas-servizzi kompetituri ta’ tqabbil tax-xiri fil-paġni tar-riżultati ġenerali ta’ Google. Minn dan il-Qorti Ġenerali ddeduċiet li l-analiżi tal-effetti ta’ dawn il-prattiki meħuda flimkien ma setgħetx issir billi l-effetti ta’ prattika jiġu iżolati minn dawk tal-prattika l-oħra.

242

Huwa abbażi ta’ dawn il-konstatazzjonijiet li, fil-punti 374 u 376 tas-sentenza appellata, il-Qorti Ġenerali qieset li l-analiżi tal-effetti tal-aġir inkwistjoni fuq is-servizzi kompetituri ta’ tqabbil tax-xiri ma setgħetx tkun limitata għall-impatt li setgħet ikollha fuqhom id-dehra tar-riżultati tas-servizz ta’ tqabbil tax-xiri ta’ Google fil-Product Universals u fix-Shopping Units, iżda li kellha tieħu inkunsiderazzjoni wkoll l-impatt tal-algoritmi ta’ aġġustament tar-riżultati ġeneriċi, b’tali mod li l-uniku xenarju kontrofattwali li Google setgħet validament tinvoka kien dak li fih ebda komponent ta’ dan l-aġir ma kien ġie implimentat, ħlief sabiex jiġu jintgħarfu parzjalment biss l-effetti flimkien tal-imsemmi aġir. Din il-konstatazzjoni ġiet essenzjalment intennija fil-punt 525 ta’ din is-sentenza, ikkontestata wkoll mill-appellanti fit-tieni parti tat-tielet aggravju.

243

Issa, dan ir-raġunament tal-Qorti Ġenerali ma huwa vvizzjat minn ebda żball ta’ liġi.

244

Fil-fatt, hekk kif irrilevat l-Avukata Ġenerali fil-punti 179 u 180 tal-konklużjonijiet tagħha, huwa biss b’mod konġunt li ż-żewġ prattiki inkwistjoni kienu influwenzaw l-aġir tal-utenti b’tali mod li t-traffiku provenjenti mill-paġni tar-riżultati ġenerali ta’ Google ġie ddevjat, kif ikkonstatat mill-Kummissjoni, favur is-servizz tagħha ta’ tqabbil tax-xiri u għad-detriment tas-servizzi kompetituri ta’ tqabbil tax-xiri. B’hekk, din id-devjazzjoni tat-traffiku kienet ibbażata kemm fuq il-pożizzjonament u l-preżentazzjoni preferenzjali tar-riżultati ta’ tiftix tas-servizz ta’ tqabbil tax-xiri ta’ Google fil-“kaxxi” kif ukoll fuq ir-relegazzjoni parallela mwettqa mill-algoritmi ta’ aġġustament u fuq il-preżentazzjoni inqas attraenti tar-riżultati ta’ tiftix tas-servizzi kompetituri ta’ tqabbil tax-xiri, u dan kien jeskludi lil dawn tal-aħħar mill-attenzjoni tal-utenti.

245

Għaldaqstant, sa fejn iż-żieda tat-traffiku favur ir-riżultati ta’ tiftix tas-servizz ta’ tqabbil tax-xiri ta’ Google u t-tnaqqis tat-traffiku mill-paġni tar-riżultati ġenerali tagħha lejn is-servizzi kompetituri ta’ tqabbil tax-xiri, li fuqhom huma bbażati l-effetti antikompetittivi potenzjali tal-aġir inkwistjoni, kienu jirriżultaw minn applikazzjoni konġunta taż-żewġ prattiki inkwistjoni, xenarju kontrofattwali xieraq kellu jippermetti wkoll li jiġi eżaminat l-iżvilupp probabbli tas-suq fl-assenza ta’ dawn iż-żewġ prattiki u mhux biss fl-assenza ta’ waħda minnhom.

246

F’dawn iċ-ċirkustanzi, l-argument tal-appellanti li l-Qorti Ġenerali kienet ammettiet, fil-punt 373 tas-sentenza appellata, li, meħuda separatament, ebda waħda minn dawn il-prattiki ma kienet qajmet oġġezzjonijiet fil-qasam tal-kompetizzjoni ma jistax jinvalida r-raġunament tal-Qorti Ġenerali li jinsab fil-punti 374, 376 u 525 tas-sentenza appellata, ikkontestati fil-kuntest tat-tieni parti tat-tielet aggravju.

247

Għaldaqstant, il-Qorti Ġenerali ma wettqitx żball ta’ liġi meta ddeċidiet, fil-punti 374 sa 376 u 525 tas-sentenza appellata, li l-analiżi tal-effetti tal-aġir inkwistjoni kellha tieħu inkunsiderazzjoni l-effetti kemm tal-algoritmi ta’ aġġustament tar-riżultati ġeneriċi kif ukoll il-preżentazzjoni enfasizzata tas-servizz ta’ tqabbil tax-xiri ta’ Google permezz tal-Product Universals u tax-Shopping Units, u li l-istudji ppreżentati minn Google li kienu jirrigwardaw biss l-impatt fuq it-traffiku ta’ din il-preżentazzjoni enfasizzata kienu, waħedhom, insuffiċjenti sabiex jitkejjel l-impatt tal-aġir inkwistjoni fuq is-servizzi kompetituri ta’ tqabbil tax-xiri.

248

Għaldaqstant, it-tieni parti tat-tielet aggravju għandha tiġi miċħuda bħala infondata.

249

It-tielet parti tat-tielet aggravju hija bbażata fuq il-premessa li l-approċċ tal-Qorti Ġenerali dwar dak li jikkostitwixxi xenarju kontrofattwali korrett meta abbuż jinvolvi kombinazzjoni taż-żewġ prattiki huwa żbaljat. Issa, hekk kif jirriżulta mill-eżami tat-tieni parti tat-tielet aggravju, ir-raġunament tal-Qorti Ġenerali f’dan ir-rigward ma huwa vvizzjat minn ebda żball ta’ liġi.

250

Il-kritiki mressqa mill-appellanti insostenn ta’ din il-parti għandhom, għaldaqstant, jiġi miċħuda bħala ineffettivi.

251

Konsegwentement, it-tielet aggravju għandu jiġi miċħud kollu kemm hu.

4.

Fuq ir‑raba’ aggravju

a)

L‑argumenti tal‑partijiet

252

Permezz tar-raba’ aggravju, l-appellanti jsostnu li l-Qorti Ġenerali wettqet żball ta’ liġi, fil-punti 538 sa 541 tas-sentenza appellata, meta kkunsidrat li l-Kummissjoni ma kinitx obbligata teżamina jekk l-aġir inkwistjoni setax jeskludi kompetituri daqstant effiċjenti. Skont l-appellanti, għalkemm id-deċiżjoni kontenzjuża fittxet li turi li dan l-aġir kellu l-kapaċità li jirrestrinġi l-kompetizzjoni, billi rreferiet għad-diffikultà tas-servizzi kompetituri ta’ tqabbil tax-xiri li jattiraw it-traffiku provenjenti minn sorsi oħra minbarra Google, din id-deċiżjoni madankollu ma eżaminatx jekk dawn id-diffikultajiet kinux pjuttost imputabbli għall-effiċjenza relattiva ta’ dawn is-servizzi ta’ tqabbil tax-xiri jew inkella għall-preferenzi tal-utenti għal siti oħra ta’ tqabbil tax-xiri, bħall-pjattaformi merkantili.

253

Insostenn ta’ dan l-aggravju, l-appellanti jallegaw, fl-ewwel lok, li l-Qorti Ġenerali żbaljat meta ddeċidiet, fil-punt 538 tas-sentenza appellata, li l-applikazzjoni tal-kriterju tal-kompetitur daqstant effiċjenti ma hijiex iġġustifikata fil-kawżi li ma humiex dawk li jikkonċernaw prattiki tariffarji. B’dan il-mod, il-Qorti Ġenerali fixklet il-kriterju formali ipprezzar-kost tal-kompetitur daqstant effiċjenti, li l-applikazzjoni tiegħu ma hijiex dejjem neċessarja, mal-prinċipju ġenerali li jirriżulta mill-ġurisprudenza tal-Qorti tal-Ġustizzja, b’mod partikolari mill-punt 21 tas-sentenza tas‑27 ta’ Marzu 2012, Post Danmark (C‑209/10, EU:C:2012:172), u mill-punti 133 u 134 tas-sentenza tas‑6 ta’ Settembru 2017, Intel vs Il‑Kummissjoni (C‑413/14 P, EU:C:2017:632), li jgħid li l-għan tal-Artikolu 102 TFUE ma huwiex li jipproteġi l-impriżi inqas effiċjenti. Issa, l-applikabbiltà ta’ dan il-prinċipju hija indipendenti min-natura tariffarja jew mhux tariffarja tal-abbuż allegat, b’tali mod li jkun dejjem neċessarju li jiġi eżaminat jekk l-aġir ikkonċernat jistax jeskludi kompetituri daqstant effiċjenti, iktar u iktar meta dan l-aġir iwassal għal innovazzjoni tal-prodotti u jwassal għat-titjib tal-għażla u tal-kwalità tal-offerta lill-konsumaturi.

254

Fit-tieni lok, l-appellanti jikkontestaw il-punt 539 tas-sentenza appellata u jikkritikaw lill-Qorti Ġenerali talli kkunsidrat li ma kienx rilevanti li jiġi eżaminat jekk il-kompetituri reali ta’ Google kinux daqstant effiċjenti daqs din tal-aħħar, peress li, fil-ġurisprudenza msemmija fil-punt preċedenti ta’ din is-sentenza, il-Qorti tal-Ġustizzja rreferiet għal kompetitur ipotetiku. Madankollu, skont l-appellanti, il-Kummissjoni ma pprovatx tevalwa l-effiċjenza ta’ servizzi kompetituri ta’ tqabbil tax-xiri, kemm jekk ikunu ipotetiċi jew reali, u llimitat ruħha li tinvoka l-effetti tal-aġir inkwistjoni fuq il-kompetituri reali, mingħajr ma eżaminat l-effiċjenza tagħhom. Il-lakuni fir-raġunament tal-Qorti Ġenerali huma iktar evidenti bil-qari tal-motiv li jinsab fil-punt 391 tas-sentenza appellata, li jipprovdi li l-aħjar kwalità tal-pjattaformi merkantili hija “spjegazzjoni […] possibbli” tat-tnaqqis ta’ dawn is-servizzi ta’ tqabbil tax-xiri.

255

Fit-tielet lok, l-appellanti jikkritikaw il-punti 540 u 541 tas-sentenza appellata kif ukoll il-konstatazzjonijiet tal-Qorti Ġenerali li jinsabu fihom li skont dawn, minn naħa, l-evalwazzjoni tal-effiċjenza tas-servizzi kompetituri ta’ tqabbil tax-xiri tkun oġġettiva biss jekk “ma jkunx hemm distorsjoni tal-kundizzjonijiet ta’ kompetizzjoni minn imġiba antikompetittiva” u, min-naħa l-oħra, il-Kummissjoni setgħet tillimita ruħha li turi effetti ta’ esklużjoni potenzjali, indipendentement mill-kwistjoni dwar jekk Google kinitx iktar effiċjenti mis-servizzi kompetituri ta’ tqabbil tax-xiri.

256

F’dan ir-rigward, l-appellanti jallegaw li, għalkemm huwa possibbli li l-effett ta’ distorsjoni tal-aġir ikkonċernat ikun tali li l-effett tiegħu fuq kompetituri reali daqstant effiċjenti ma jistax jiġi evalwat, tali ipoteżi ma tistax tiġi preżunta. Issa, il-Kummissjoni ma pprevedietx din l-ipoteżi u l-Qorti Ġenerali ssostitwixxiet il-motivazzjoni tagħha stess bl-evalwazzjoni tad-deċiżjoni kontenzjuża. Barra minn hekk, l-appellanti jallegaw li, anki f’tali ipoteżi, il-Kummissjoni ma tistax tiġi eżentata mill-obbligu li turi l-effett probabbli tal-aġir inkwistjoni fuq dawn il-kompetituri. F’dan il-każ, għalkemm l-analiżi tibqa’ neċessarjament fuq livell ipotetiku, din għandha tibbaża ruħha fuq provi reali.

257

Fir-replika tagħhom, l-appellanti jżidu li l-punti 45 u 73 tas-sentenza tat‑12 ta’ Mejju 2022, Servizio Elettrico Nazionale et (C‑377/20, EU:C:2022:379), isostnu l-argument tagħhom dwar l-obbligu tal-Kummissjoni li tevalwa, fil-kuntest tal-Artikolu 102 TFUE, il-kapaċità tal-aġir inkwistjoni li jeskludi kompetituri daqstant effiċjenti.

258

L-appellanti jsostnu wkoll li, f’dan il-każ, il-Kummissjoni kellha tapplika l-istess filtru bħal dak għall-abbużi bbażati fuq il-prezzijiet, peress li, bħal prezz baxx li fih innifsu ma jistax jitqies li joħloq distorsjoni tal-proċess kompetittiv, il-kombinazzjoni taż-żewġ prattiki legali ma setgħetx tippreġudika dan il-proċess, speċjalment għaliex kull waħda minn dawn il-prattiki kienet ittejjeb il-kwalità tas-servizzi offruti lill-konsumaturi u li Google ma kinitx issegwi strateġija antikompetittiva. Għalhekk, bħat-tnaqqis fil-prezzijiet, it-titjib fil-kwalità u fl-innovazzjoni jaqgħu taħt proċess kompetittiv li jiffunzjona korrettament.

259

Il-Kummissjoni, PriceRunner, l-Awtorità tas-Sorveljanza EFTA, il-BEUC, Foundem, Kelkoo, il-VDZ, Ladenzeile, il-BDZV u Twenga jikkontestaw l-argument tal-appellanti u jsostnu li r-raba’ aggravju huwa inammissibbli jew infondat.

b)

Il‑kunsiderazzjonijiet tal‑Qorti tal‑Ġustizzja

260

Permezz tar-raba’ aggravju, l-appellanti jikkontestaw il-punti 538 sa 541 tas-sentenza appellata u jiddikjaraw, essenzjalment, li l-Qorti Ġenerali ddeċidiet b’mod żbaljat li l-Kummissjoni ma kinitx obbligata tanalizza l-effiċjenza tal-kompetituri, reali jew ipotetiċi, ta’ Google, fl-evalwazzjoni tal-kapaċità tal-aġir inkwistjoni li jeskludi l-kompetizzjoni fis-swieq ikkonċernati.

261

F’dan ir-rigward, għandu jiġi osservat, qabelxejn, li l-punti 538 sa 541 tas-sentenza appellata jaqgħu fil-kuntest tal-analiżi tal-effetti antikompetittivi tal-aġir inkwistjoni, li fi tmiemha l-Qorti Ġenerali kkonkludiet, fil-punt 543 ta’ din is-sentenza, li l-Kummissjoni kienet uriet l-eżistenza tal-effetti potenzjali fis-swieq nazzjonali tas-servizzi ta’ tqabbil tax-xiri.

262

L-argumenti tal-appellanti insostenn tar-raba’ aggravju huma intiżi, b’mod partikolari, sabiex juru li l-motivi tas-sentenza appellata dwar l-assenza tal-obbligu tal-Kummissjoni li twettaq l-eżami tal-effiċjenza tas-servizzi kompetituri ta’ tqabbil tax-xiri huma vvizzjati bi żball ta’ liġi. Fil-fatt, minn naħa, il-Kummissjoni kienet obbligata teżamina l-effiċjenza ta’ dawn is-servizzi ta’ tqabbil tax-xiri, kemm jekk ikunu reali jew ipotetiċi, peress li dan l-obbligu jirrifletti prinċipju ġenerali li l-għan tal-Artikolu 102 TFUE ma huwiex li jipproteġi l-impriżi inqas effiċjenti. Min-naħa l-oħra, il-kriterju tal-kompetitur daqstant effiċjenti, karatteristika ta’ sitwazzjonijiet ta’ abbuż tariffarju kellu japplika wkoll f’dan il-każ, peress li l-aġir inkwistjoni kien jikkonsisti f’kombinazzjoni ta’ prattiki legali u kien iwassal għal titjib fl-innovazzjoni.

263

Fir-rigward tal-kwistjoni dwar jekk l-Artikolu 102 TFUE jimplikax obbligu sistematiku fuq il-Kummissjoni li teżamina l-effiċjenza tal-kompetituri reali jew ipotetiċi tal-impriża f’pożizzjoni dominanti, mill-ġurisprudenza tal-Qorti tal-Ġustizzja ċċitata fil-punti 163 sa 167 ta’ din is-sentenza jirriżulta li, ċertament, l-għan ta’ dan l-artikolu ma huwiex li jiżgura li kompetituri inqas effiċjenti mill-impriża li tokkupa pożizzjoni dominanti jibqgħu fis-suq.

264

Madankollu, minn dan ma jirriżultax li kull konstatazzjoni ta’ ksur fir-rigward ta’ din id-dispożizzjoni hija suġġetta għall-prova li l-aġir ikkonċernat jista’ jeskludi kompetitur daqstant effiċjenti.

265

L-evalwazzjoni tal-kapaċità tal-aġir inkwistjoni li jeskludi kompetitur daqstant effiċjenti, invokata minn Google bħala prinċipju li fuqu hija bbażata l-applikazzjoni tal-Artikolu 102 TFUE, tidher, b’mod partikolari, rilevanti, meta l-impriża f’sitwazzjoni dominanti tkun iddikjarat, matul il-proċedura amministrattiva, provi insostenn, li l-aġir tagħha ma kellux il-kapaċità li jirrestrinġi l-kompetizzjoni u, b’mod partikolari, li jipproduċi l-effetti ta’ esklużjoni allegati. F’każ bħal dan, il-Kummissjoni mhux biss hija obbligata tanalizza l-importanza tal-pożizzjoni dominanti tal-impriża fis-suq rilevanti, iżda hija obbligata wkoll tevalwa l-eżistenza eventwali ta’ strateġija intiża sabiex teskludi l-kompetituri li tal-inqas huma daqstant effiċjenti (ara, f’dan is-sens, is-sentenza tas‑6 ta’ Settembru 2017, Intel vs Il‑Kummissjoni, C‑413/14 P, EU:C:2017:632, punti 138 u 139).

266

Barra minn hekk, peress li l-Kummissjoni hija obbligata turi l-ksur tal-Artikolu 102 TFUE, hija għandha tistabbilixxi l-eżistenza ta’ abbuż minn pożizzjoni dominanti fid-dawl ta’ kriterji differenti, billi tapplika, b’mod partikolari, it-test tal-kompetitur daqstant effiċjenti, meta dan ikun rilevanti, peress li l-evalwazzjoni tagħha dwar ir-rilevanza ta’ tali test hija, jekk ikun il-każ, suġġetta għall-istħarriġ tal-qorti tal-Unjoni.

267

F’dan il-każ, għandu jiġi osservat li, hekk kif jirriżulta, b’mod partikolari, mill-punti 54 sa 63 tas-sentenza appellata, l-abbuż identifikat mill-Kummissjoni kkonsista fil-pożizzjonament u fil-preżentazzjoni iktar favorevoli li Google rreżervat, fil-paġni tal-mutur ta’ tfittxija ġenerali tagħha, għas-servizz tagħha ta’ tqabbil tax-xiri meta mqabbel mas-servizzi kompetituri ta’ tqabbil tax-xiri. B’hekk, il-Kummissjoni kkonstatat li, peress li l-kapaċità ta’ servizz ta’ tqabbil tax-xiri li jikkompeti kienet tiddependi mit-traffiku, dan l-aġir diskriminatorju ta’ Google kellu impatt importanti fuq il-kompetizzjoni sa fejn kien ippermetta lil din il-kumpannija li tiddevja, għall-benefiċċju tas-servizz tagħha ta’ tqabbil tax-xiri, proporzjon kbir tat-traffiku li qabel kien jeżisti bejn il-paġni tar-riżultati ġenerali ta’ Google u s-servizzi ta’ tqabbil tax-xiri li jappartjenu lill-kompetituri tagħha, mingħajr ma dawn tal-aħħar jistgħu jikkumpensaw dan it-telf ta’ traffiku bl-użu ta’ sorsi oħra ta’ traffiku, għaliex investiment ikbar f’sorsi alternattivi ma kienx jikkostitwixxi soluzzjoni “ekonomikament vijabbli”.

268

Kien għalhekk ġustament li, fil-punt 540 tas-sentenza appellata, il-Qorti Ġenerali indikat, mingħajr ma din il-konstatazzjoni ġiet invalidata mill-appellanti, li jillimitaw ruħhom għal allegazzjonijiet ta’ prinċipju, li ma kienx ikun possibbli għall-Kummissjoni li tikseb riżultati oġġettivi u affidabbli dwar l-effiċjenza tal-kompetituri ta’ Google fid-dawl tal-kundizzjonijiet speċifiċi tas-suq inkwistjoni.

269

Minn dan jirriżulta li l-Qorti Ġenerali ma wettqitx żball ta’ liġi meta ddeċidiet, minn naħa, li tali test ma kienx ta’ natura imperattiva fil-kuntest tal-implimentazzjoni tal-Artikolu 102 TFUE u, min-naħa l-oħra, li, fiċ-ċirkustanzi ta’ dan il-każ, dan it-test ma kienx rilevanti.

270

Minn dan isegwi li r-raba’ aggravju għandu jiġi miċħud bħala infondat, mingħajr ma huwa neċessarju li tingħata deċiżjoni dwar l-eċċezzjoni ta’ inammissibbiltà mqajma mill-BEUC.

271

Billi l-ebda wieħed mill-aggravji ma ntlaqa’, l-appell għandu jiġi miċħud kollu kemm hu.

VI.

Fuq l‑ispejjeż

272

Skont l-Artikolu 184(2) tar-Regoli tal-Proċedura tal-Qorti tal-Ġustizzja, meta l-appell ma jkunx fondat, il-Qorti tal-Ġustizzja għandha tiddeċiedi fuq l-ispejjeż. Konformement mal-Artikolu 138(1) ta’ dawn ir-Regoli, applikabbli għall-proċedura tal-appell bis-saħħa tal-Artikolu 184(1) tal-imsemmija Regoli, kull parti li titlef għandha tbati l-ispejjeż jekk dawn ikunu ntalbu.

273

Skont l-Artikolu 140(2) tar-Regoli tal-Proċedura, applikabbli għall-proċedura ta’ appell permezz tal-Artikolu 184(1) ta’ dawn ir-Regoli, l-Istati partijiet għall-Ftehim ŻEE, minbarra l-Istati Membri, kif ukoll l-Awtorità tas-Sorveljanza EFTA għandhom ibatu l-ispejjeż rispettivi tagħhom meta jintervjenu fil-kawża.

274

Konformement mal-Artikolu 140(3) tar-Regoli tal-Proċedura, applikabbli għall-proċedura ta’ appell bis-saħħa tal-Artikolu 184(1) ta’ dawn ir-Regoli, il-Qorti tal-Ġustizzja tista’ tiddeċiedi li intervenjenti għandha tbati l-ispejjeż rispettivi tagħha.

275

Konformement mal-Artikolu 184(4) tal-istess Regoli, meta ma tkunx hija stess ippreżentat l-appell, intervenjenti fl-ewwel istanza ma tistax tiġi kkundannata għall-ispejjeż fil-proċedura ta’ appell ħlief jekk tkun ipparteċipat fil-fażi il-miktub jew orali tal-proċedura quddiem il-Qorti tal-Ġustizzja. Meta tali parti tipparteċipa fil-proċedura, il-Qorti tal-Ġustizzja tista’ tiddeċiedi li hija għandha tbati l-ispejjeż rispettivi tagħha.

276

F’dan il-każ, peress li l-Kummissjoni talbet li l-appellanti jiġu kkundannati għall-ispejjeż u peress li dawn tilfu, hemm lok li huma jiġu kkundannati jbatu, minbarra l-ispejjeż rispettivi tagħhom, dawk sostnuti mill-Kummissjoni, bl-eċċezzjoni tal-ispejjeż sostnuti minnha minħabba l-intervent ta’ CCIA, li għandhom jiġu sostnuti minn din tal-aħħar.

277

PriceRunner, CCIA, l-Awtorità tas-Sorveljanza EFTA, il-BEUC, Foundem, Kelkoo, il-VDZ, Ladenzeile, il-BDZV u Twenga għandhom ibatu l-ispejjeż rispettivi tagħhom.

1)

L-appell huwa miċħud.

2)

Google LLC u Alphabet Inc. huma kkundannati jbatu l-ispejjeż rispettivi tagħhom kif ukoll dawk sostnuti mill-Kummissjoni Ewropea bl-eċċezzjoni ta’ dawk sostnuti minnha minħabba l-intervent ta’ Computer & Communications Industry Association.

3)

Computer & Communications Industry Association għandha tbati l-ispejjeż rispettivi tagħha kif ukoll l-ispejjeż sostnuti mill-Kummissjoni minħabba l-intervent tagħha.

4)

PriceRunner International AB, l-Awtorità tas-Sorveljanza EFTA, il-Bureau européen des unions de consommateurs (BEUC), Infederation Ltd, Kelkoo SAS, Verband Deutscher Zeitschriftenverleger eV, Ladenzeile GmbH, BDZV – Bundesverband Digitalpublisher und Zeitungsverleger eV u Twenga SA għandhom ibatu l-ispejjeż rispettivi tagħhom.