I.

Introduzzjoni

1.

F’din il-proċedura għal deċiżjoni preliminari, il-Qorti tal-Ġustizzja hija mitluba mill-ġdid teżamina l-kwistjoni, importanti fil-prattika, dwar meta, fil-kuntest tat-trattament fiskali ta’ ċerti tranżazzjonijiet, għandu jitqies li hemm provvista waħda jew numru ta’ provvisti. F’dan l-aħħar każ, tqum ukoll il-kwistjoni tal-klassifikazzjoni ta’ dawn il-provvisti bħala “provvisti indipendenti”, “provvista kumplessa unika” jew “provvista anċillari għall-provvista prinċipali”  ( 2 ).

2.

F’din il-kawża, impriża Ungeriża biegħet merkanzija differenti lil xerrejja mhux residenti fl-Unjoni Ewropea għall-finijiet tal-esportazzjoni barra mill-Unjoni. Dan il-bejgħ seħħ mill-ħanut tagħha li jinsab fl-Ungerija viċin il-fruntiera mas-Serbja. Dawn it-tranżazzjonijiet kienu, bħala prinċipju, eżenti mit-taxxa fuq il-valur miżjud (VAT) bħala kunsinni ta’ oġġetti mibgħuta jew ittrasportati mix-xerrej mhux stabbilit barra mill-Unjoni. Imbagħad, l-imsemmija impriża ħallset lura lix-xerrejja mhux residenti l-ammonti mħallsa minnhom bħala VAT bil-quddiem li kienu jkunu dovuti fil-każ li l-eżenzjoni inkwistjoni ma kinitx implimentata. Madankollu, fir-rigward tal-ġestjoni tal-fajls relatati għal dawn il-ħlasijiet lura, l-impriża ffatturat kummissjonijiet ta’ ammont li jikkorrispondi għal 15 % tal-ammont imħallas lura. F’dan il-kuntest, tqum il-kwistjoni tat-trattament fiskali ta’ dawn il-kummissjonijiet għall-ġestjoni tal-fajls. L-attivitajiet ta’ ġestjoni tal-fajls jagħtu lok għal provvista awtonoma u taxxabbli jew jikkostitwixxu provvisti anċillari li japplika għalihom l-istess trattament fiskali bħall-provvista prinċipali eżenti, jiġifieri l-kunsinna ta’ oġġetti intiżi għall-esportazzjoni? Jew inkella, huma eżenti abbażi ta’ dispożizzjonijiet oħra?

3.

Din il-kawża toffri lill-Qorti tal-Ġustizzja l-possibbiltà li tippreċiża l-kriterji dwar it-trattament ta’ tali tranżazzjonijiet fir-rigward tal-VAT. Hija tqajjem ukoll, sussidjarjament, kwistjonijiet relatati mal-protezzjoni tal-aspettattivi leġittimi f’sitwazzjoni li fiha l-awtorità tat-taxxa kkontrollat u aċċettat matul diversi snin id-dikjarazzjonijiet tal-VAT li fihom dawn it-tranżazzjonijiet kienu kkunsidrati eżenti, kif ukoll dwar il-bażi tat-taxxa li għandha tittieħed inkunsiderazzjoni f’dan il-każ u l-metodu tal-kalkolu tal-VAT.

II.

Il‑kuntest ġuridiku

A.

Id‑dritt tal‑Unjoni

4.

Id-Direttiva 2006/112/KE tal-Kunsill tat‑28 ta’ Novembru 2006 dwar is-sistema komuni ta’ taxxa fuq il-valur miżjud  ( 3 ) tistabbilixxi l-kuntest tad-dritt tal-Unjoni. L-Artikolu 1(2) ta’ din id-Direttiva jipprovdi:

5.

L-Artikolu 2(1) tad-Direttiva tal-VAT jistabbilixxi:

6.

Skont l-Artikolu 73 tad-Direttiva tal-VAT:

7.

L-Artikolu 78 ta’ din id-direttiva jipprovdi:

8.

L-Artikolu 135(1)(d) tad-Direttiva tal-VAT jipprovdi:

9.

Skont l-Artikolu 146(1) tal-istess direttiva:

B.

Id‑dritt Ungeriż

10.

Il-leġiżlazzjoni nazzjonali fil-qasam tal-VAT rilevanti f’din il-kawża tinsab fl-általános forgalmi adóról CXXVII. törvény (il-Liġi Nru CXXVII, dwar it-Taxxa fuq il-Valur Miżjud), tal-2007 (Magyar Közlöny 2007/155), fil-verżjoni tagħha applikabbli (iktar ’il quddiem il-“Liġi Ungeriża dwar il-VAT”).

11.

L-Artikolu 98(1) tal-Liġi Ungeriża dwar il-VAT jipprovdi:

12.

L-Artikolu 99 ta’ din il-liġi jipprevedi:

13.

Skont l-Artikolu 98(3) taċ-CLI. törvény az adóigazgatási rendtartásról (il-Liġi Nru CLI, dwar il-Proċedura Amministrattiva fil-Qasam Fiskali), tal-2017 (Magyar Közlöny 2017/192), jekk il-persuna taxxabbli tibbenefika minn eżenzjoni tat-taxxa, hija għandha tipprova dan permezz ta’ dokument jew kwalunkwe mezz xieraq ieħor.

14.

L-az általános forgalmi adóról LXXIV. törvény (il-Liġi Nru LXXIV dwar it-Taxxa fuq il-Valur Miżjud) (Magyar Közlöny 1992/128), tal‑1992, fis-seħħ sal‑31 ta’ Diċembru 2007, kienet tinkludi fil-lista ta’ kunsinni ta’ oġġetti u ta’ provvisti eżenti, skont l-Artikolu 30(1) ta’ din il-liġi, moqri flimkien mal-Anness 2 tal-imsemmija liġi, “ir-rimborsi ta’ taxxi mwettqa minn kummerċjant favur vjaġġatur barrani b’applikazzjoni ta’ dispożizzjoni speċjali”.

III.

Il‑fatti li wasslu għall‑kawża

15.

Fl‑2020, il-kumpannija Ungeriża Határ Diszkont Kft. (iktar ’il quddiem “Határ Diszkont”) biegħet diversi merkanzija lil xerrejja mhux residenti fl-Unjoni – b’mod iktar preċiż lil xerrejja li jirrisjedu s-Serbja –, fil-ħanut tagħha ta’ Tompa, li jinsab l-Ungerija viċin il-fruntiera Serbo‑Ungeriża. Dawn ix-xerrejja barranin kienu jesportaw dakinhar stess il-merkanzija mixtrija fl-Ungerija. Il-fatturi ta’ ħlas bi flus kontanti li jirrigwardaw dan il-bejgħ kienu jinkludu l-ktiba “VAT irregolarizzata”.

16.

Matul il-perijodu ta’ wara l-esportazzjoni, Határ Diszkont ħallset lura lill-imsemmija xerrejja l-VAT kollha li kienet miżjuda fil-fattura u ħarġet l-irċevuta tal-iżbors relattiva. Jidher li, sabiex ikun jista’ jikseb il-ħlas lura tal-ammonti mħallsa bħala VAT bil-quddiem, ix-xerrej mhux residenti kellu jirritorna fiżikament fil-ħanut ta’ Határ Diszkont  ( 4 ). Fir-rigward tal-ġestjoni tal-fajls għal dawn il-ħlasijiet lura, Határ Diszkont ħarġet fattura lil dawn il-klijenti barranin tal-kummissjoni għall-ġestjoni tal-fajl korrispondenti għal 15 % tal-VAT irrimborsata.

17.

Il-proċess ta’ ġestjoni tal-fajls kien kompost mill-istadji li ġejjin: a) verifika tad-dokument tal-ivvjaġġar validu tax-xerrej mhux residenti waqt il-bejgħ; b) ħruġ ta’ formola ta’ talba għal ħlas lura tat-taxxa u ta’ fattura lill-imsemmi xerrej; ċ) verifika tad-dokument tal-ivvjaġġar validu tax-xerrej u tal-formola ta’ talba għal ħlas lura tat-taxxa ppreżentata għall-finijiet tar-rimbors tal-VAT; d) modifika, ikkopjar u arkivjar tal-fattura ta’ bejgħ; e) ħlas lura, fi flus kontanti, tal-ammont imħallas bħala VAT bil-quddiem mix-xerrej mhux residenti; f) ħruġ ta’ rċevuta ta’ żbors u ffirmar tagħha mix-xerrej; g) ħruġ ta’ fattura għall-kummissjoni għall-ġestjoni tal-fajl; h) ħruġ ta’ rċevuta ta’ ġbir u ffirmar tagħha mix-xerrej mhux residenti; i) ħlas tal-kummissjoni għall-ġestjoni tal-fajl fi flus kontanti.

18.

Fil-jum tal-ħlas lura tal-VAT bil-quddiem, Határ Diszkont ħarġet fatturi ta’ ħlas fi flus kontanti għall-imsemmija kummissjonijiet għall-ġestjoni tal-fajl, li l-ħlas tagħhom kien iċċertifikat minn irċevuti ta’ ġbir. Fid-dikjarazzjonijiet tal-VAT tagħha, Határ Diszkont inkludiet il-qligħ minn dawn il-kummissjonijiet għall-ġestjoni tal-fajl bħala remunerazzjoni għal provvisti eżenti.

19.

Waqt kontroll tal-awtorità tat-taxxa  ( 5 ) għas-sena 2020 għall-finijiet, b’mod partikolari, tal-VAT, Határ Diszkont iddefendiet il-pożizzjoni li l-attivitajiet ta’ ġestjoni ta’ fajl relatati mal-ħlas lura tal-ammonti mħallsa bħala VAT bil-quddiem kienu provvista ta’ servizzi eżenti mill-VAT.

20.

F’dan il-kuntest, Határ Diszkont irreferiet għal informazzjoni tal-awtorità tat-taxxa stess  ( 6 ), bi tweġiba għal mistoqsija magħmula speċifikament f’dan ir-rigward. Minn din l-informazzjoni kien jirriżulta li peress li l-kummissjonijiet għall-ġestjoni tal-fajl kienu l-korallarju tal-eżenzjoni, dawn kellhom jiġu kkunsidrati bħala spejjeż anċillari għall-kunsinna ta’ oġġetti u għalhekk, kellha tapplika għalihom is-sistema ta’ eżenzjoni mill-VAT applikabbli għat-tranżazzjoni prinċipali.

21.

Matul il-proċedura ta’ kontroll, Határ Diszkont sostniet ukoll li l-provvista ta’ servizz relatata mal-ħlas lura ta’ ammonti mħallsa bħala VAT bil-quddiem kellha tiġi eżentata mit-taxxa skont id-dispożizzjoni nazzjonali li tittrasponi l-eżenzjoni għat-tranżazzjonijiet finanzjarji prevista fl-Artikolu 135(1)(d) tad-Direttiva tal-VAT, u dik li tittrasponi l-eżenzjoni għat-tranżazzjoni marbuta mal-esportazzjoni ta’ oġġetti prevista fl-Artikolu 146(1)(e) ta’ din id-direttiva  ( 7 ).

22.

L-awtorità tat-taxxa ċaħdet l-argumenti ta’ Határ Diszkont. Permezz ta’ deċiżjoni tat‑22 ta’ Lulju 2022, hija kkonstatat, fil-konfront tagħha, arretrati ta’ VAT. Din id-deċiżjoni kienet ikkonfermata bid-deċiżjoni tas‑27 ta’ Ottubru 2022 tal-awtorità tat-taxxa ta’ rimedju  ( 8 ).

23.

Határ Diszkont ippreżentat rikors quddiem il-qorti tar-rinviju, is-Szegedi Törvényszék (il-Qorti ta’ Szegedi, l-Ungerija), sabiex titlob l-annullament ta’ din l-aħħar deċiżjoni.

IV.

Id‑domandi preliminari

24.

Permezz ta’ deċiżjoni tat‑3 ta’ Lulju 2023, is-Szegedi Törvényszék (il-Qorti ta’ Szegedi) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja l-erba’ domandi li ġejjin:

25.

Waqt il-proċedura quddiem il-Qorti tal-Ġustizzja, il-Gvern Ungeriż u l-Kummissjoni Ewropea ppreżentaw osservazzjonijiet bil-miktub u pparteċipaw fis-seduta li nżammet fis‑17 ta’ Ottubru 2024.

V.

Analiżi

A.

Fuq l‑ewwel domanda preliminari

1.

Osservazzjonijiet preliminari

26.

Permezz tal-ewwel domanda preliminari tagħha, il-qorti tar-rinviju tistaqsi essenzjalment jekk l-Artikolu 1(2), l-Artikolu 2(1)(ċ) u l-Artikolu 78 tad-Direttiva tal-VAT għandhomx jiġu interpretati fis-sens li attività ta’ ġestjoni tal-fajls relatati mar-“rimbors tal-VAT”, bħal dik inkwistjoni fil-kawża prinċipali, favur xerrejja li jirrisjedu barra mill-Unjoni, fir-rigward ta’ kunsinni ta’ oġġetti eżenti, tikkostitwixxi provvista ta’ servizz awtonoma u distinta mill-imsemmija kunsinni ta’ oġġetti, u għalhekk hija, bħala tali, suġġetta għall-VAT. Jekk dan huwa l-każ, din il-qorti tistaqsi jekk tali provvista ta’ servizz għandhiex tiġi kkunsidrata bħala eżenti skont l-Artikolu 146(1)(e) tad-Direttiva tal-VAT.

27.

Preliminarjament, għandu jiġi rrilevat li, f’din il-kawża, teknikament ma hemmx “rimbors” tal-VAT. Fil-fatt, huwa stabbilit li f’dan il-każ, il-bejgħ li jirrigwarda l-kunsinni ta’ oġġetti inkwistjoni mwettaq minn Határ Diszkont lix-xerrejja mhux residenti fl-Unjoni huwa eżenti mill-VAT skont l-Artikolu 146(1)(b) tad-Direttiva tal-VAT minħabba l-esportazzjoni ta’ dawn l-oġġetti. Fir-rigward ta’ tranżazzjonijiet eżenti, ebda VAT ma għandha titħallas fir-rigward ta’ dawn it-tranżazzjonijiet. Konsegwentement, lanqas ma jista’ jkun hemm “rimbors” tal-VAT.

28.

F’dan il-każ, fil-mument tax-xiri ta’ oġġetti, ix-xerrejja mhux residenti jħallsu lil Határ Diszkont prezz totali gross (iktar ’il quddiem, il-“prezz gross”) li jinkludi l-ammont korrispondenti għall-VAT li tkun dovuta fil-każ li l-eżenzjoni inkwistjoni ma tkunx implimentata għaliex finalment l-oġġett ma jkunx esportat jew għaliex ix-xerrej ma jipprovdix id-dokumentazzjoni neċessarja sabiex juri li l-kundizzjonijiet sostantivi tal-eżenzjoni huma ssodisfatti. F’dawn iċ-ċirkustanzi, il-ħlasijiet magħmula minn Határ Diszkont lix-xerrejja mhux residenti jikkostitwixxu ħlasijiet lura tal-ammonti li tħallsu bil-quddiem bħala ammonti li kienu eventwalment dovuti bħala VAT (iktar ’il quddiem, l-“ammonti mħallsa bħala VAT bil-quddiem”). Għalhekk, dan ma jirrigwardax “rimborsi” tal-VAT.

29.

Dan iċċarat, peress li tikkostitwixxi biss implimentazzjoni tal-eżenzjoni inkwistjoni, attività ta’ ġestjoni ta’ fajl għall-ħlas lura tal-ammonti mħallsa bħala VAT bil-quddiem, bħal dik inkwistjoni fil-kawża prinċipali, ma tagħtix lok, fil-fehma tiegħi, għal provvista speċifika li hija taxxabbli u suġġetta għall-VAT (ara it-taqsima 2). Sussidjarjament, jekk jiġi kkunsidrat li dan il-każ jirrigwarda fil-fatt provvista taxxabbli, din tkun, fi kwalunkwe każ, provvista anċillari mhux indipendenti mill-provvista prinċipali, jiġifieri l-kunsinna ta’ oġġetti eżenti, li bħala taqa’ taħt is-sistema ta’ eżenzjoni (ara t-taqsima 3). Fl-aħħar nett, fi kwalunkwe każ, l-eżenzjoni prevista fl-Artikolu 146(1)(e) tad-Direttiva tal-VAT ma hijiex rilevanti f’dan il-każ (ara t-taqsima 4).

2.

Fuq l‑assenza ta’ provvista taxxabbli

30.

Skont l-Artikolu 2(1)(ċ) tad-Direttiva tal-VAT, huma suġġetti għall-VAT il-provvisti ta’ servizzi, imwettqa bi ħlas fit-territorju ta’ Stat Membru minn persuna taxxabbli li taġixxi bħala tali.

31.

It-tranżazzjonijiet taxxabbli jippreżupponu l-eżistenza ta’ tranżazzjoni bejn il-partijiet li tistipula prezz jew korrispettiv. B’hekk, provvista ta’ servizzi hija taxxabbli biss jekk teżisti bejn il-fornitur u l-benefiċjarju relazzjoni legali li matulha jsir skambju ta’ servizzi reċiproċi, fejn ir-remunerazzjoni li jirċievi l-fornitur tikkostitwixxi l-korrispettiv effettiv tas-servizz ipprovdut lill-benefiċjarju  ( 9 ).

32.

Għalhekk, l-attivitajiet ta’ ġestjoni ta’ fajls għall-ħlas lura tal-ammonti mħallsa bħala VAT bil-quddiem jikkostitwixxu provvista speċifika taxxabbli biss jekk ikun possibbli li tiġi identifikata tali relazzjoni legali, li tagħti lok għal skambju ta’ provvisti reċiproċi.

33.

F’dan il-każ, ix-xerrejja mhux residenti fl-Unjoni jwettqu mingħand Határ Diszkont xiri ta’ oġġetti li jibbenefikaw mill-eżenzjoni mill-VAT skont l-Artikolu 146(1)(b) tad-Direttiva tal-VAT. Madankollu, sabiex dawn it-tranżazzjonijiet jibbenefikaw minn din l-eżenzjoni, Határ Diszkont, bħala persuna taxxabbli, għandha tipproduċi l-prova lill-awtorità tat-taxxa li r-rekwiżiti sostantivi tal-imsemmija eżenzjoni huma ssodisfatti  ( 10 ). Fil-fatt, in-nuqqas ta’ osservanza ta’ rekwiżit formali jista’ jwassal għar-rifjut tal-eżenzjoni mill-VAT jekk dan in-nuqqas ta’ osservanza jkollu l-effett li jipprekludi l-produzzjoni tal-prova ċerta li r-rekwiżiti sostantivi ġew issodisfatti  ( 11 ).

34.

Sabiex tiġi pprodotta tali prova lill-awtorità tat-taxxa, Határ Diszkont għandu jkollha d-dokumentazzjoni kollha neċessarja li tippermettilha turi li fil-fatt din hija tranżazzjoni eżenti. Din id-dokumentazzjoni, li essenzjalment għandha tiġi pprovduta mix-xerrej, għandha turi, fost oħrajn, l-esportazzjoni effettiva tal-oġġett mixtri. Għalhekk, din ma tistax tiġi pprovduta fil-mument tax-xiri tal-oġġett, iżda biss wara li l-esportazzjoni tal-oġġett tkun seħħet effettivament. Barra minn hekk, dan jirriżulta b’mod ċar mill-Artikolu 99 tal-Liġi Ungeriża dwar il-VAT.

35.

Għalhekk, sabiex tkun f’pożizzjoni li tipprova li l-kundizzjonijiet sostantivi tal-eżenzjoni huma ssodisfatti  ( 12 ), Határ Diszkont għandha tikseb, tamministra u tikkontrolla d-dokumentazzjoni kollha rilevanti għall-finijiet tal-implimentazzjoni tal-eżenzjoni. Barra minn hekk, hija terfa’ r-riskji marbuta ma’ eventwali żbalji jew kwalunkwe tip ta’ problema oħra relatata ma’ din id-dokumentazzjoni.

36.

F’dan il-kuntest, kif jirriżulta mill-punt 17 ta’ dawn il-konklużjonijiet, Határ Diszkont għandha twettaq sensiela ta’ funzjonijiet ta’ natura amministrattiva li jmorru mill-ħruġ tal-formola ta’ talba għal ħlas lura tat-taxxa sal-ħlas lura tal-ammonti korrispondenti, sal-ħlas lura ta’ dawn l-ammonti, ladarba hija jkollha d-dokumenti kollha li juru li l-kundizzjonijiet sostantivi tal-eżenzjoni huma ssodisfatti.

37.

Dawn l-attivitajiet kollha, li mingħajr dubju jwasslu għal spejjeż, huma ffinalizzati sabiex tiġi żgurata l-implimentazzjoni tal-eżenzjoni relatata mal-kunsinni ta’ oġġetti esportati u ma jidhrux li huma l-espressjoni ta’ provvista ta’ servizz speċifika u awtonoma mill-imsemmija kunsinni.

38.

L-iskop ekonomiku tat-tranżazzjonijiet ta’ xiri mwettqa mix-xerrejja mhux residenti fl-Unjoni huwa l-akkwist ta’ oġġetti taħt sistema ta’ eżenzjoni mill-VAT għall-finijiet tal-esportazzjoni. Madankollu, mingħajr it-twettiq tal-attivitajiet ta’ ġestjoni ta’ fajls fuq imsemmija, l-imsemmija tranżazzjonijiet ma jistgħux ikunu eżentati mill-VAT u, mingħajr eżenzjoni, l-akkwisti ma jkunux seħħew realment, kif jirriżulta barra minn hekk b’mod espliċitu mid-deċiżjoni tar-rinviju  ( 13 ). Għalhekk, l-implimentazzjoni tal-eżenzjoni tikkostitwixxi element essenzjali għat-twettiq tal-iskop ekonomiku fuq imsemmi tat-tranżazzjonijiet ta’ xiri.

39.

Minn dan isegwi, mill-perspettiva tal-imsemmi skop ekonomiku, li l-attivitajiet ta’ ġestjoni tal-fajls inkwistjoni jidhru li huma indissoċjabbli minn dawn it-tranżazzjonijiet u indispensabbli għat-twettiq tagħhom.

40.

Fil-fehma tiegħi, f’dawn iċ-ċirkustanzi, is-separazzjoni tal-attività ta’ ġestjoni ta’ fajls għall-ħlas lura tal-ammonti mħallsa bħala VAT bil-quddiem minħabba l-eżenzjoni tal-kunsinni eżenti, tkun ta’ natura artifiċjali  ( 14 ). Fid-dawl taċ-ċirkustanzi kollha li fihom jiżvolġu dawn it-tranżazzjonijiet, din tirrigwarda fil-fatt tranżazzjoni kkostitwita minn provvista waħda fil-livell ekonomiku li ma għandhiex tiġi sseparata b’mod artifiċjali sabiex ma tinbidilx il-funzjonalità tas-sistema tal-VAT  ( 15 ).

41.

F’dan il-kuntest, bla ħsara għall-evalwazzjonijiet fattwali tal-qorti tar-rinviju, l-ammonti miġbura bħala kummissjonijiet għall-ġestjoni tal-fajl jikkostitwixxu għalhekk sempliċement żieda fil-prezz tal-bejgħ ta’ oġġetti, aċċettat mix-xerrejja mhux residenti, sabiex tkopri l-ispejjeż ulterjuri li jirriżultaw minħabba l-implimentazzjoni tal-eżenzjoni relatata mal-akkwist ta’ oġġetti. Għalhekk, bħala eżempju, jekk ir-rata tal-VAT applikata hija ta’ 27 % u l-prezz gross għax-xiri ta’ oġġetti intiż għall-esportazzjoni huwa 127 (100 l-prezz tal-oġġett + 27 bħala ammont mħallas bħala VAT bil-quddiem), jekk l-eżenzjoni tkun implimentata, il-prezz (nett) għall-akkwist tal-oġġett ikun finalment ta’ 104.05  ( 16 ).

42.

Barra minn hekk, kif tirrileva l-qorti tar-rinviju, Határ Diszkont kellha esposta informazzjoni fil-ħanut dwar il-kummissjonijiet għall-ġestjoni tal-fajl u kienet tinforma bihom lix-xerrejja mhux residenti. Għalhekk, meta kienu jixtru l-prodotti għall-finijiet tal-esportazzjoni, huma kien ikollhom għarfien sħiħ dwar dawn il-kummissjonijiet u mingħajr dubju kienu jkunu ħaduhom inkunsiderazzjoni fid-deċiżjoni tagħhom li jixtru oġġetti intiżi għall-esportazzjoni. Minn dan isegwi li dawn ix-xerrejja kellhom neċessarjament jaċċettaw, tal-inqas b’mod impliċitu, dawn il-kundizzjonijiet waqt il-konklużjoni tal-kuntratt ta’ bejgħ tal-oġġetti inkwistjoni. Id-deskrizzjoni tar-relazzjonijiet kuntrattwali bejn Határ Diszkont u x-xerrejja mhux residenti fl-Unjoni li tinsab fit-talba għal deċiżjoni preliminari tikkonferma dawn il-kunsiderazzjonijiet  ( 17 ).

43.

Barra minn hekk, mid-deċiżjoni tar-rinviju jirriżulta li Határ Diszkont tiddikjara, mingħajr ma hija kontradetta, li l-ammont tal-kummissjonijiet għall-ġestjoni tal-fajl, jiġifieri 15 % tal-ammonti mħallsa bħala VAT bil-quddiem sussegwentement imħallsa lura, kien ikkalkolat abbażi tal-ispejjeż sostnuti. Għalhekk, pjuttost milli jikkostitwixxu r-remunerazzjoni li tirrappreżenta l-kunsiderazzjoni effettiva ta’ servizz ipprovdut lil benefiċjarju li jagħti lok għal dħul li jirriżulta minn attività ekonomika differenti minn dik marbuta mal-kunsinni ta’ oġġetti eżenti, l-ammonti miġbura bħala kummissjonijiet għall-ġestjoni tal-fajl għandhom essenzjalment il-funzjoni li jkopru l-ispejjeż ulterjuri sostnuti minn Határ Diszkont li jirriżultaw mill-implimentazzjoni tal-eżenzjoni marbuta mal-kunsinna tal-oġġetti inkwistjoni.

44.

Barra minn hekk, skont ġurisprudenza stabbilita, fil-qasam tal-VAT, il-fornituri jaġixxu bħala kolletturi tat-taxxa f’isem l-Istat u fl-interess tat-Teżor. Dawn il-fornituri huma suġġetti għall-ħlas tal-VAT anki jekk din it-taxxa, bħala taxxa fuq il-konsum, għandha finalment tiġi sostnuta mill-konsumatur finali  ( 18 ). Madankollu, li tiġi imposta l-VAT fuq ir-remunerazzjonijiet ta’ Határ Diszkont li jirriżultaw minn tali attività ta’ ġbir – anki sabiex tiggarantixxi l-implimentazzjoni tal-eżenzjoni billi tnaqqas il-prezz minn 127 għal 104.05 – f’isem l-Istat ikun tal-inqas barrani għas-sistema.

45.

Għal dak li jirrigwarda l-fatt enfasizzat fid-deċiżjoni tal-awtorità tat-taxxa li l-bejgħ tal-oġġetti esportati u l-attivitajiet ta’ ġestjoni tal-fajls ma jseħħux fl-istess żmien  ( 19 ), nirrileva li modifika tal-prezz ta’ kunsinna jew ta’ provvista, bħala prinċipju, qatt ma tkun simultanja għall-bejgħ jew għall-provvista iżda din dejjem isseħħ sussegwentement. Dan il-każ, jirrigwarda fl-aħħar mill-aħħar, kwistjoni ta’ varjazzjoni tal-prezz. Jekk ix-xerrejja mhux residenti riedu jwettqu din it-tranżazzjoni ta’ xiri ta’ oġġetti eżenti mill-ħanut ta’ Határ Diszkont, huma kellhom jaċċettaw varjazzjoni tal-prezz sussegwenti waqt l-implimentazzjoni tal-eżenzjoni. Fil-każ li ma kinux jaqblu, huma kellhom imorru għand ħanut ieħor.

46.

Bħala konklużjoni, mill-kunsiderazzjonijiet kollha preċedenti jirriżulta li, f’dan il-każ, l-attivitajiet ta’ ġestjoni tal-fajls għall-ħlas lura tal-ammonti mħallsa bħala VAT bil-quddiem għall-finijiet tal-eżenzjoni tal-kunsinni ta’ oġġetti inkwistjoni ma jagħtux lok, fil-fehma tiegħi, għal provvista ta’ servizz speċifika u awtonoma mill-imsemmija kunsinni li hija taxxabbli skont l-Artikolu 2(1)(ċ) tad-Direttiva tal-VAT.

3.

Sussidjarjament, fuq in‑natura ta’ provvista anċillari mhux indipendenti

47.

Fil-każ li l-Qorti tal-Ġustizzja tqis li l-attivitajiet ta’ ġestjoni tal-fajls għall-ħlas lura tal-ammonti mħallsa bħala VAT bil-quddiem jagħtu lok għal provvista ta’ servizzi awtonoma, fil-fehma tiegħi, dawn jirrigwardaw, fi kwalunkwe każ, provvista anċillari mhux indipendenti għall-provvista prinċipali, jiġifieri l-kunsinna ta’ oġġetti eżenti, li għaliha japplika l-istess trattament fiskali, jiġifieri s-sistema ta’ eżenzjoni.

48.

Fil-ġurisprudenza stabbilita tagħha, il-Qorti tal-Ġustizzja titlaq mill-prinċipju li, għall-finijiet tal-VAT, kull tranżazzjoni għandha, bħala regola ġenerali, titqies bħala provvista distinta u indipendenti. Madankollu, il-prinċipju ta’ indipendenza ta’ kull provvista ma huwiex assolut. Skont il-ġurisprudenza, tista’ ssir deroga minn dan il-prinċipju meta provvista hija sempliċi provvista anċillari, mhux indipendenti, għal provvista prinċipali  ( 20 ).

49.

Għalhekk, f’ċerti ċirkustanzi, diversi provvisti distinti formalment, li jistgħu jiġu pprovduti separatament u b’hekk jagħtu lok, separatament, għal tassazzjoni jew għal eżenzjoni, għandhom jitqiesu li huma tranżazzjoni unika meta ma jkunux indipendenti. Dan huwa l-każ, b’mod partikolari, meta element wieħed jew iktar ikollhom jitqiesu li jikkostitwixxu l-provvista prinċipali, filwaqt li, għall-kuntrarju, elementi oħra għandhom jitqiesu bħala provvista jew provvisti anċillari li għalihom japplika l-istess trattament fiskali li japplika għall-provvista prinċipali  ( 21 ).

50.

Fil-ġurisprudenza tagħha, il-Qorti tal-Ġustizzja żviluppat ċerti indizji għad-determinazzjoni tal-eżistenza ta’ provvista anċillari mhux indipendenti.

51.

Fl-ewwel lok, tipikament, il-provvisti anċillari mhux indipendenti ma għandhomx interess ekonomiku awtonomu għall-benefiċjarju tal-provvista prinċipali. Minn perspettiva ekonomika, dawn għandhom funzjoni purament awżiljarja, sa fejn huma intiżi biss sabiex jikkomplementaw u bħala suppliment tal-provvista prinċipali u għalhekk dawn normalment iseħħu b’riżultat tagħha  ( 22 ). Mill-perspettiva tal-konsumatur medju, l-għan ekonomiku tagħhom jista’ jintlaħaq biss flimkien mal-provvista prinċipali. Għalhekk, provvista għandha titqies anċillari għal provvista prinċipali meta għall-klijenti ma tkunx tikkostitwixxi għan fiha nnifisha, iżda l-mezz li bih titgawda taħt l-aħjar kundizzjonijiet il-provvista prinċipali  ( 23 ).

52.

Dan il-kriterju huwa ssodisfatt f’din il-kawża. Fil-fatt, kif jirriżulta mill-punti 38 u 39 ta’ dawn il-konklużjonijiet, ix-xerrejja mhux residenti fl-Unjoni għandhom interess ekonomiku fl-attivitajiet ta’ ġestjoni tal-fajl għall-ħlas lura tal-ammonti mħallsa bħala VAT bil-quddiem li ma huwiex awtonomu fir-rigward tal-provvista prinċipali, li tikkonsisti fil-kunsinna ta’ oġġetti intiżi għall-esportazzjoni eżenti mill-VAT. L-eżenzjoni, u, konsegwentement, it-twettiq tal-attivitajiet intiżi għall-implimentazzjoni ta’ din l-eżenzjoni, jiddependu b’mod dirett mill-imsemmija kunsinni. Mingħajr kunsinna, u għalhekk mingħajr eżenzjoni, ma jkunx hemm ġestjoni tal-imsemmija fajls u viċe versa. Għalhekk, l-interessi ekonomiċi fil-kunsinni u fl-attivitajiet ta’ ġestjoni tal-fajls huma interdipendenti.

53.

Fit-tieni lok, il-Qorti tal-Ġustizzja tqis il-valur rispettiv tal-provvisti prinċipali u anċillari, fejn normalment din tal-aħħar ikollha valur negliġibbli meta mqabbel ma’ tal-ewwel  ( 24 ).

54.

F’dan il-każ, l-ammont miġbur minn Határ Diszkont bħala kummissjonijiet għall-ġestjoni tal-fajl huwa ekwivalenti għal 15 % tal-ammonti mħallsa bħala VAT bil-quddiem, li skont kif jirriżulta mid-deċiżjoni tar-rinviju, hija ffissata għal rata ta’ 27 %. Il-valur tal-provvista (jekk għandha wieħed) li jikkonsisti fil-ġestjoni ta’ fajls għall-ħlas lura tal-imsemmija ammonti hu għalhekk ekwivalenti għal 4.05 % tal-prezz tal-kunsinni u jista’ jitqies bħala marġinali meta mqabbel mal-valur tal-provvista prinċipali.

55.

Il-fatt, enfasizzat mill-Kummissjoni fl-osservazzjonijiet tagħha, li t-talba għal ħlas lura tal-ammonti mħallsa bħala VAT bil-quddiem tista’ ssir ukoll eventwalment ma’ aġent li lilu ġiet fdata l-ġestjoni tal-fajls u għalhekk li l-provvista tista’ titwettaq ukoll minn terzi persuni indipendenti mill-operatur ekonomiku li kkonsenja l-oġġetti, dan ma huwiex rilevanti. Fil-fatt, mill-ġurisprudenza jirriżulta li l-fatt li l-provvista anċillari mhux indipendenti tista’ teoretikament tiġi pprovduta wkoll minn terz ma jipprekludix l-eżistenza ta’ provvista anċillari mhux indipendenti  ( 25 ). Barra minn hekk, il-provvista anċillari mhux indipendenti hija pprovduta dejjem mill-istess operatur ekonomiku li jipprovdi l-provvista prinċipali. Dan huwa inerenti għan-natura anċillari tal-provvista inkwistjoni. Li kieku din il-provvista kienet ipprovduta minn terz bħala provvista indipendenti u għalhekk mhux anċillari, hija kienet tkun taxxabbli. Bħala eżempju, wieħed jista’ jsemmi l-ispejjeż tat-trasport; jekk il-bejjiegħ iwettaq huwa stess it-trasport tal-oġġetti (pereżempju, ktieb) din tkun provvista anċillari (taxxabbli b’rata mnaqqsa); min-naħa l-oħra, jekk ix-xerrej jitlob lil terz jittrasporta l-oġġett (il-ktieb), dan ikun imbagħad servizz indipendenti (taxxabbli bir-rata normali).

56.

Fl-aħħar nett, l-eżenzjoni applikabbli għall-kunsinni ta’ oġġetti, jiġifieri dik prevista fl-Artikolu 146(1)(b) tad-Direttiva tal-VAT, hija intiża sabiex tosserva, fil-kuntest tal-kummerċ internazzjonali, il-prinċipju tat-tassazzjoni tal-oġġetti kkonċernati fil-post tad-destinazzjoni tagħhom, u, għalhekk, sabiex tiżgura li t-tranżazzjoni inkwistjoni tkun esklużivament taxxabbli fil-post fejn il-prodotti kkonċernati ser jiġu kkonsmati  ( 26 ). Billi l-VAT hija taxxa fuq il-konsum, li hija imposta fit-territorju fiskali Ungeriż, iżda l-oġġetti esportati ser jiġu kkonsmati barra minn dan, il-VAT ma għandhiex tapplika għall-kunsinna ta’ dawn l-oġġetti. Dan jevita t-taxxa doppja (normalment, huwa l-Istat l-ieħor li jintaxxa l-importazzjoni tal-oġġetti)  ( 27 ) u l-oġġetti prodotti fl-Unjoni u esportati barra minnha ma jsofrux minn żvantaġġ kompetittiv minħabba din it-tassazzjoni doppja.

57.

Issa, interpretazzjoni tad-Direttiva tal-VAT li tippermetti li provvisti intiżi għall-ħlas lura ta’ ammonti mħallsa bħala VAT bil-quddiem b’applikazzjoni tal-eżenzjoni msemmija iktar ’il fuq, jiġu kkunsidrati taxxabbli, tmur kontra dawn l-għanijiet. Fil-fatt, billi timponi l-VAT fuq provvista anċillari, neċessarja sabiex jinkiseb il-ħlas lura tal-imsemmija ammonti b’applikazzjoni tal-imsemmija eżenzjoni, hija tikkomprometti n-newtralità fiskali tal-esportazzjonijiet.

4.

Fuq l‑eżenzjoni skont l‑Artikolu 146(1)(e) tad‑Direttiva tal‑VAT

58.

B’mod iktar sussidjarju, ser nindirizza l-kwistjoni tal-applikazzjoni tal-eżenzjoni prevista fl-Artikolu 146(1)(e) tad-Direttiva tal-VAT, li għaliha tirreferi l-qorti tar-rinviju.

59.

L-Artikolu 146(1)(e) tad-Direttiva tal-VAT, li jinsab fil-Kapitolu 6 tat-Titolu IX ta’ din id-direttiva, jobbliga lill-Istati Membri jeżentaw mill-VAT “il-provvista ta’ servizzi, inkluż trasport u transazzjonijiet anċillari, iżda eskluża l-provvista ta’ servizzi eżentati skond l-Artikoli 132 u 135, fejn dawn huma direttament konnessi ma’ l-esportazzjoni jew l-importazzjoni ta’ merkanzija koperta mill-Artikolu 61 u l-Artikolu 157(1)(a)”.

60.

Mill-formulazzjoni tagħha jirriżulta li, bl-esklużjoni ta’ eżenzjonijiet relatati mal-attivitajiet ta’ interess ġenerali, previsti fl-Artikolu 132 tad-Direttiva tal-VAT, kif ukoll ta’ dawk favur sensiela ta’ attivitajiet varji li jaqgħu taħt l-Artikolu 135 tal-istess direttiva, id-dispożizzjoni inkwistjoni teżenta l-provvisti ta’ servizzi, li jinkludu l-provvisti ta’ trasport u tranżazzjonijiet anċillari li huma direttament marbuta mal-esportazzjoni jew l-importazzjoni ta’ oġġetti, li jaqgħu taħt l-Artikolu 61 jew l-Artikolu 157(1)(a) tad-Direttiva tal-VAT.

61.

L-oġġetti previsti fl-Artikolu 61 tad-Direttiva tal-VAT huma dawk li ma humiex f’ċirkolazzjoni ħielsa iżda li jitqiegħdu f’maħżen doganali jew simili  ( 28 ), jew li huma f’ċirkolazzjoni ħielsa iżda huma koperti mill-arranġament ta’ tranżitu intern tal-Unjoni, jew li jaqgħu taħt l-arranġament għal importazzjoni temporanja b’eżenzjoni totali minn dazju ta’ importazzjoni, jew finalment li jaqgħu taħt l-arranġament ta’ tranżitu estern. Fir-rigward tal-Artikolu 157(1)(a) tal-istess direttiva, dan jirrigwarda l-oġġetti li huma intiżi li jitqiegħdu f’maħżen li ma huwiex doganali jew simili.

62.

Issa, bilfors għandu jiġi kkonstatat li ebda element fil-proċess ma juri li l-oġġetti li kienu s-suġġett tal-esportazzjoni f’dan il-każ kienu jinsabu f’waħda mis-sitwazzjonijiet previsti mill-Artikolu 146(1)(e) tad-Direttiva tal-VAT. Minn dan isegwi li din id-dispożizzjoni ma tapplikax f’dan il-każ  ( 29 ).

5.

Konklużjonijiet intermedjarji

63.

Bħala konklużjoni, nipproponi li l-ewwel domanda preliminari għandha tingħata risposta kif ġej. L-Artikolu 1(2) u l-Artikolu 2(1)(ċ) tad-Direttiva tal-VAT għandhom jiġu interpretati fis-sens li l-attivitajiet ta’ ġestjoni tal-fajls, imwettqa mill-bejjiegħ, għall-ħlas lura ta’ ammonti mħallsa bħala VAT bil-quddiem minn xerrejja mhux residenti fl-Unjoni fil-kuntest ta’ tranżazzjonijiet, eżenti mill-VAT, li jirrigwardaw kunsinni ta’ oġġetti sussegwentement esportati minnhom, ma jagħtux lok għal provvista ta’ servizz speċifika u awtonoma mill-imsemmija kunsinni. Konsegwentement, dawn l-attivitajiet ma humiex taxxabbli skont din id-direttiva peress li jikkostitwixxu sempliċi implimentazzjoni tal-eżenzjoni u ma humiex l-espressjoni tal-eżerċizzju ta’ attività ekonomika speċifika differenti minn dik relatata mal-kunsinna ta’ oġġetti.

B.

Fuq it‑tieni, it‑tielet u r‑raba’ domanda preliminari

64.

B’kunsiderazzjoni tar-risposta li jiena nipproponi li għandha tingħata lill-ewwel domanda preliminari, ma huwiex neċessarju li tingħata risposta lit-tieni, it-tielet u r-raba’ domanda preliminari. Madankollu, ser nesponi fil-qosor, hawn taħt, sussidjarjament, il-kunsiderazzjonijiet tiegħi dwar dawn id-domandi.

1.

Fuq it‑tieni domanda preliminari

65.

Permezz tat-tieni domanda preliminari tagħha, il-qorti tar-rinviju tistaqsi, fil-każ li l-attivitajiet ta’ ġestjoni tal-fajls inkwistjoni jikkostitwixxu provvista ta’ servizz taxxabbli, jekk tali provvista għandhiex titqies bħala eżenti skont l-Artikolu 135(1)(d) tad-Direttiva tal-VAT.

66.

Skont din id-dispożizzjoni, l-Istati Membri għandhom jeżentaw it-tranżazzjonijiet li jikkonċernaw, b’mod partikolari, “kontijiet ta’ depożitu u kontijiet kurrenti, pagamenti, trasferimenti, debiti, ċekkijiet u strumenti oħrajn negozzjabbli”.

67.

Il-qorti tar-rinviju għandha dubji dwar l-applikabbiltà ta’ din id-dispożizzjoni sa fejn ix-xerrejja mhux residenti fl-Unjoni li rċevew il-kunsinna tal-oġġetti jkollhom, skont il-liġi, kreditu ta’ flus fil-konfront ta’ Határ Diszkont għall-ħlas lura ta’ ammonti mħallsa bħala VAT bil-quddiem u li l-kummissjonijiet għall-ġestjoni tal-fajl ikunu marbuta ma’ dan il-kreditu.

68.

Madankollu, ebda tranżazzjoni finanzjarja ma seħħet li tiġġustifika l-applikazzjoni tad-dispożizzjoni inkwistjoni  ( 30 ). B’mod partikolari, Határ Diszkont ma tat ebda kreditu lix-xerrejja mhux residenti. Hija sempliċement żammet l-ammonti ekwivalenti għall-VAT relatati max-xiri inkwistjoni li hija kien ikollha tħallas lit-Teżor kieku l-eżenzjoni ma kinitx ġiet implimentata, u dan waqt li tistenna li x-xerrejja mhux residenti jipprovdu d-dokumentazzjoni li tipprova li l-kundizzjonijiet sostantivi tal-eżenzjoni kienu effettivament issodisfatti. Ladarba d-dokumentazzjoni rilevanti ġiet ipprovduta, peress li ġie ċċarat li l-VAT ma kinitx dovuta għal dawn it-tranżazzjonijiet minħabba l-implimentazzjoni tal-eżenzjoni, hija rritornat l-ammont korrispondenti lix-xerrej mhux residenti.

69.

Minn dan isegwi li, fi kwalunkwe każ, l-eżenzjoni prevista fl-Artikolu 135(1)(d) tad-Direttiva tal-VAT ma hijiex applikabbli f’dan il-każ.

2.

Fuq it‑tielet domanda preliminari

70.

Permezz tat-tielet domanda preliminari, il-qorti tar-rinviju tistaqsi, essenzjalment – u fil-każ ta’ risposta negattiva għall-ewwel u t-tieni domanda –, jekk il-prinċipju ta’ protezzjoni tal-aspettattivi leġittimi jipprekludix li l-awtorità tat-taxxa tissuġġetta għall-VAT ċerti tranżazzjonijiet li jirrigwardaw perijodu li diġà għadda, fi tliet sitwazzjonijiet: l-ewwel nett, fil-każ fejn din l-awtorità kkontrollat u aċċettat matul diversi snin id-dikjarazzjonijiet tal-VAT tal-persuna taxxabbli mingħajr ma kkontestat waqt diversi kontrolli fiskali l-klassifikazzjoni ta’ dawn it-tranżazzjonijiet bħala “tranżazzjonijiet eżenti mill-VAT”; it-tieni nett, fil-każ fejn hija ma informatx lill-persuna taxxabbli bil-bdil li seħħ fil-leġiżlazzjoni nazzjonali fis-seħħ li, fil-verżjoni li tippreċedi l-emenda leġiżlattiva, kienet tiċċita espressament l-imsemmija tranżazzjonijiet fost il-provvisti ta’ servizzi eżenti, u, it-tielet nett, id-deċiżjoni tar-rinviju tirreferi għall-fatt li, matul il-kontroll fiskali tal‑2020 inkwistjoni, Határ Diszkont talbet opinjoni lill-awtorità tat-taxxa  ( 31 ). Határ Diszkont irċeviet tweġiba li l-kummissjonijiet għall-ġestjoni tal-fajls inkwistjoni kellhom jiġu kkunsidrati bħala spejjeż anċillari għal kunsinna ta’ oġġetti eżenti mill-VAT u li, bħala tali, kien japplika għalihom l-istess trattament bħat-tranżazzjoni prinċipali fir-rigward tas-sistema ta’ eżenzjoni mill-VAT.

71.

Skont il-ġurisprudenza tal-Qorti tal-Ġustizzja, il-prinċipju ta’ protezzjoni tal-aspettattivi leġittimi jagħmel parti mill-prinċipji fundamentali tal-Unjoni  ( 32 ). Il-Qorti tal-Ġustizzja ppreċiżat li dan il-prinċipju jestendi għal kull individwu li fir-rigward tiegħu awtorità amministrattiva tkun ħolqot aspettattivi bbażati fuq garanziji preċiżi li hija tkun tatu  ( 33 ). Dan il-prinċipju jippreżupponi li l-atti tal-awtoritajiet amministrattivi ħolqu, f’moħħ operatur ekonomiku prudenti u avżat, aspettattiva raġonevoli u leġittima  ( 34 ).

72.

L-ewwel nett, tqum il-kwistjoni tal-kompatibbiltà mal-prinċipju ta’ protezzjoni tal-aspettattivi leġittimi tan-nuqqas ta’ kontestazzjoni, waqt diversi kontrolli fiskali, tal-klassifikazzjoni tal-attivitajiet ta’ ġestjoni ta’ fajls għall-ħlas lura tal-ammonti mħallsa bħala VAT bil-quddiem bħala “tranżazzjoni eżenti mill-VAT”.

73.

Mill-ġurisprudenza jirriżulta li s-sempliċi aċċettazzjoni, anki matul diversi snin, mill-awtorità tat-taxxa nazzjonali tad-dikjarazzjonijiet tal-VAT, li ma kinux jinkludu ammonti relatati ma’ ċerti tranżazzjonijiet, ma tikkostitwixxix assigurazzjoni preċiża pprovduta minn din l-awtorità fuq in-nuqqas ta’ applikazzjoni tal-VAT għal dawn it-tranżazzjonijiet u ma tistax, għaldaqstant, toħloq aspettattivi leġittimi f’dan ir-rigward  ( 35 ). Bl-istess mod, is-sempliċi aċċettazzjoni matul diversi snin tad-dikjarazzjonijiet tal-VAT ta’ persuna taxxabbli mingħajr kontestazzjoni waqt kontrolli fiskali tal-klassifikazzjoni ta’ dawn it-tranżazzjonijiet bħala “tranżazzjonijiet eżenti mill-VAT” ma tistax, fil-fehma tiegħi, bħala prinċipju, tagħti assigurazzjoni preċiża. Għaldaqstant, sempliċi aċċettazzjoni ma tistax toħloq aspettattiva leġittima fir-rigward ta’ operatur ekonomiku normalment prudenti u avżat, dwar in-natura eżenti ta’ dawn it-tranżazzjonijiet  ( 36 ).

74.

Madankollu, f’dan il-każ, mid-deċiżjoni tar-rinviju jirriżulta li l-proċessi verbali tal-kontrolli fiskali “juru b’mod ċar” li “l-awtorità tat-taxxa kkunsidrat matul is-snin li [Határ Diszkont] kienet toħroġ legalment fatturi eżenti mill-VAT għas-servizz ta’ ġestjoni tal-fajls”. Madankollu, il-qorti tar-rinviju ma tipprovdix preċiżazzjonijiet oħra f’dan ir-rigward. Għalhekk, hija din il-qorti li għandha tivverifika jekk l-imsemmija proċessi verbali kinux jinkludu “assigurazzjonijiet preċiżi” skont il-ġurisprudenza tal-Qorti tal-Ġustizzja msemmija iktar ’il fuq, fir-rigward tat-trattament fiskali tas-servizz ta’ ġestjoni tal-fajls inkwistjoni, jekk tali servizz – quod non – kellu jiġi aċċettat f’dan il-każ  ( 37 ).

75.

It-tieni nett, għal dak li jirrigwarda, l-assenza ta’ informazzjoni fir-rigward tal-bdil li seħħ fil-leġiżlazzjoni nazzjonali fis-seħħ, jiena ma narax kif tali omissjoni eventwali setgħet tikkostitwixxi “assigurazzjoni preċiża” li toħloq aspettattivi fondati fis-sens tal-ġurisprudenza msemmija fil-punt 71 ta’ dawn il-konklużjonijiet. Barra minn hekk, jidhirli li ma jeżistix obbligu fuq l-awtorità tat-taxxa li tinforma lill-persuni taxxabbli bl-emendi għal-leġiżlazzjoni fiskali, li tagħhom operaturi ekonomiċi normalment prudenti u avżati għandu jkollhom għarfien.

76.

It-tielet nett, l-informazzjoni pprovduta mill-awtorità tat-taxxa bħala tweġiba għall-mistoqsija ta’ Határ Diszkont lanqas ma tista’ tiġi kklassifikata, fil-fehma tiegħi, f’dan il-każ, bħala “assigurazzjoni preċiża” li toħloq aspettattivi fondati. Fil-fatt, kif tirrileva l-qorti tar-rinviju stess, din l-opinjoni – li barra minn hekk kienet ta’ natura mhux vinkolanti – ingħatat matul il-kontroll fiskali (u minħabba dan il-kontroll). Għalhekk, tali informazzjoni “ex post” u ta’ natura mhux vinkolanti ma setax ikollha effett fuq it-tranżazzjonijiet diġà mwettqa li kienu s-suġġett tal-kontroll fiskali.

3.

Fuq ir‑raba’ domanda preliminari

77.

Fil-kuntest tar-raba’ domanda preliminari tagħha, il-qorti tar-rinviju għandha dubji dwar l-interpretazzjoni tal-Artikoli 73 u 78 tad-Direttiva tal-VAT għal dak li jirrigwarda l-bażi tat-taxxa li għandha tittieħed inkunsiderazzjoni f’dan il-każ, kif ukoll il-metodu ta’ kalkolu tal-VAT. B’mod partikolari, fid-dawl tal-ġurisprudenza tal-Qorti tal-Ġustizzja, il-qorti tar-rinviju tistaqsi dwar l-approċċ sostnut mill-awtorità tat-taxxa li permezz tiegħu kkunsidrat, f’dan il-każ, il-kummissjonijiet għall-ġestjoni tal-fajl bħala ammont nett u mhux bħala ammont gross li jinkludi l-VAT. Għandha tingħata risposta għal din id-domanda biss jekk, fil-każ ta’ risposta negattiva għall-ewwel tliet domandi, l-imsemmija attivitajiet ta’ ġestjoni ta’ fajls jiġu kkunsidrati bħala provvista ta’ servizz taxxabbli u mhux eżenti.

78.

F’dan ir-rigward, infakkar li, skont l-Artikolu 73 tad-Direttiva tal-VAT, il-bażi tat-taxxa tinkludi “dak kollu li jikkostitwixxi ħlas” li jirċievi, jew li għandu jirċievi, il-fornitur ta’ servizzi. Il-korrispettiv jikkorrispondi għall-prezz miftiehem li d-destinatarju tal-provvista għandu jħallas għas-servizz. Imbagħad, il-punt (a) tal-ewwel paragrafu tal-Artikolu 78 ta’ din id-direttiva, jippreċiża li huma inklużi fil-bażi tat-taxxa wkoll it-taxxi kollha, bl-eċċezzjoni tal-VAT stess. Huwa abbażi ta’ din il-bażi tat-taxxa li għandha mbagħad, tiġi applikata r-rata tal-VAT ad hoc (Artikolu 93 ta’ din id-direttiva). L-Artikolu 1(2) tal-imsemmija direttiva jsemmi b’mod iktar ċar li, għal kull tranżazzjoni, il-VAT dovuta għandha tiġi kkalkolata fuq il-prezz bl-ammont tal-VAT imnaqqas bir-rata applikabbli għal dan l-oġġett jew servizz  ( 38 ).

79.

Minn dan isegwi li, sabiex tiġi ddeterminata l-bażi tat-taxxa, għal kull korrispettiv fis-sens tal-Artikolu 73 tad-Direttiva tal-VAT, għandha tiġi kkalkolata l-VAT b’konformità mal-punt (a) tal-Artikolu 78 ta’ din id-direttiva, kif inhi dovuta skont il-liġi  ( 39 ).

80.

Minn dawn il-kunsiderazzjonijiet kollha jirriżulta li kull prezz (gross) miftiehem jinkludi dejjem il-VAT fl-ammont (korrett) previst fil-liġi, mingħajr ma huwa rilevanti, fir-rigward tat-taxxa dovuta lill-kreditur fiskali, il-kwistjoni dwar jekk il-partijiet fil-kuntratt kinux jafu b’dan l-ammont korrett jew le  ( 40 ).

81.

Huwa għalhekk li l-Qorti tal-Ġustizzja ddeċidiet espliċitament li huwa korallarju tal-punt (a) tal-Artikolu 78 tad-Direttiva tal-VAT il-fatt li l-VAT hija dejjem inkluża, ipso jure, fil-prezz miftiehem, anki fil-każ ta’ żball tal-persuna taxxabbli fid-determinazzjoni tar-rata applikabbli  ( 41 ).

82.

F’dan il-każ, fil-każ li l-attivitajiet ta’ ġestjoni ta’ fajls inkwistjoni jiġu – quod non – ikkunsidrati bħala provvista ta’ servizz taxxabbli u mhux eżenti, il-prezz miftiehem, jiġifieri 15 % tal-ammonti mħallsa bħala VAT bil-quddiem u mbagħad imħallsa lura, għandu jitqies bħala prezz gross li jinkludi diġà l-VAT. Il-bażi tat-taxxa li fuqha mbagħad ikun hemm lok li tiġi applikata r-rata tal-VAT għandha tiġi kkalkolata kif xieraq. Il-fatt li l-persuna taxxabbli kkunsidrat eventwalment b’mod żbaljat it-tranżazzjonijiet inkwistjoni bħala eżenti u li konsegwentement, fil-fehma tagħha, ir-rata tat-taxxa applikabbli għal dawn it-tranżazzjonijiet kellha tkun ekwivalenti għal żero ma jistax ikun rilevanti f’dan ir-rigward.

VI.

Konklużjoni

83.

Fid-dawl tal-kunsiderazzjonijiet kollha preċedenti, nipproponi lill-Qorti tal-Ġustizzja tirrispondi għad-domandi magħmula mis-Szegedi Törvényszék (il-Qorti ta’ Szeged, l-Ungerija) kif ġej: