(1)

I gcomhréir le hAirteagal 14 de Rialachán (AE) 2016/425 ó Pharlaimint na hEorpa agus ón gComhairle (2), trealamh cosanta pearsanta atá i gcomhréir leis na caighdeáin chomhchuibhithe nó codanna díobh, ar foilsíodh na tagairtí dóibh in Iris Oifigiúil an Aontais Eorpaigh„ glactar leis go bhfuil sé i gcomhréir leis na ceanglais riachtanacha sláinte agus sábháilteachta a leagtar amach in Iarscríbhinn II a ghabhann leis an Rialachán sin, ceanglais a chumhdaítear leis na caighdeáin sin nó na codanna sin díobh.

(2)

Le Cinneadh Cur Chun Feidhme C(2020)7924 ón gCoimisiún (3), d’iarr an Coimisiún ar an gCoiste Eorpach um Chaighdeánú (CEN) agus ar Choiste Eorpach na gCaighdeán Leictriteicniúil (Cenelec) athbhreithniú a dhéanamh ar na caighdeáin chomhchuibhithe chun tacú le Rialachán (AE) 2016/425 agus an obair sin a thabhairt chun críche chun a áirithiú go leanfaidh siad de léiriú a thabhairt ar an úrscothacht a nglactar léi i gcoitinne chun na ceanglais riachtanacha sláinte agus sábháilteachta a leagtar amach in Iarscríbhinn II a ghabhann leis an Rialachán sin a chomhlíonadh.

(3)

Leasaíodh Cinneadh Cur Chun Feidhme C(2020)7924 le Cinneadh Cur Chun Feidhme C(2024)2750 ón gCoimisiún (4) chun raon feidhme na hiarrata a oiriúnú trí chaighdeáin áirithe a chur leis agus a bhaint de chun an dul chun cinn teicniúil agus eolaíoch is déanaí a chur san áireamh, chomh maith leis na forbairtí is déanaí ar ghníomhaíochtaí caighdeánaithe ar an leibhéal idirnáisiúnta agus ar an leibhéal Eorpach, agus chun síneadh a chur le sprioc-am na ngníomhaíochtaí caighdeánaithe i ndáil le caighdeáin agus dréachtchaighdeáin áirithe toisc nárbh fhéidir an obair ar chuid díobh a thabhairt chun críche faoi na sprioc-amanna a leagadh síos i gCinneadh Cur Chun Feidhme C(2020) 7924.

(4)

Ar bhonn na hiarrata a leagtar amach i gCinneadh Cur Chun Feidhme C(2020)7924 arna leasú le Cinneadh Chur Chun Feidhme C(2024)2750, rinne CEN athbhreithniú ar na caighdeáin chomhchuibhithe seo a leanas, ar caighdeáin iad ar foilsíodh na tagairtí dóibh in Iris Oifigiúil an Aontais Eorpaigh le Cinneadh Cur Chun Feidhme (AE) 2023/941 ón gCoimisiún (5): EN 352-6:2020 maidir le cosaintí cluas maille le hionchur fuaime a bhaineann leis an tsábháilteacht, EN 352-8:2020 maidir le cosaintí cluas siamsaíochta, EN 352-9:2020 maidir le plugaí cluaise maille le hionchur fuaime a bhaineann leis an tsábháilteacht, EN 352-10:2020 maidir le plugaí cluaise ina seinntear fuaimeanna chun siamsaíochta agus EN 813:2008 maidir le húmacha suite.

(5)

Mar thoradh air sin, ghlac CEN na caighdeáin seo a leanas, mar aon leis na leasuithe orthu: EN 352-6:2020+A1:2024, EN 352-8:2020+A1:2024, EN 352-9:2020+A1:2024, EN 352-10:2020+A1:2024 agus EN 813:2024.

(6)

Maidir leis na caighdeáin agus na leasuithe orthu, rinne an Coimisiún measúnú i gcomhar le CEN féachaint an gcomhlíontar leo an iarraidh a leagtar amach i gCinneadh Cur Chun Feidhme C(2020)7924.

(7)

Leis na caighdeáin chomhchuibhithe seo a leanas agus na leasuithe orthu, comhlíontar na ceanglais riachtanacha sláinte agus sábháilteachta is aidhm dóibh a chumhdach agus a leagtar amach i Rialachán (AE) 2016/425: EN 352-6:2020+A1:2024, EN 352-8:2020+A1:2024, EN 352-9:2020+A1:2024, EN 352-10:2020+A1:2024 agus EN 813:2024. Dá bhrí sin, is iomchuí na tagairtí do na caighdeáin chomhchuibhithe sin agus na leasuithe orthu a fhoilsiú in Iris Oifigiúil an Aontais Eorpaigh.

(8)

In Iarscríbhinn I a ghabhann le Cinneadh Cur Chun Feidhme (AE) 2023/941, soláthraítear na tagairtí do na caighdeáin chomhchuibhithe a fhágann go nglactar leis go bhfuil comhréir ann le Rialachán (AE) 2016/425. Chun a áirithiú gur in aon ghníomh amháin a liostaítear na tagairtí do na caighdeáin chomhchuibhithe a dréachtaíodh chun tacú le Rialachán (AE) 2016/425, ba cheart na tagairtí do na caighdeáin sin agus na leasuithe orthu a áireamh san Iarscríbhinn sin.

(9)

Is gá an tagairt do na caighdeáin chomhchuibhithe EN 352-6:2020, EN 352-8:2020, EN 352-9:2020, EN 352-10:2020 agus EN 813:2008 a tharraingt siar ó Iris Oifigiúil an Aontais Eorpaigh, ós rud é go ndearnadh athbhreithniú ar na caighdeáin sin. Is iomchuí, dá bhrí sin, na tagairtí sin a scriosadh as Iarscríbhinn I a ghabhann le Cinneadh Cur Chun Feidhme (AE) 2023/941.

(10)

Is gá freisin an tagairt do chaighdeán comhchuibhithe EN 175:1997 maidir le trealamh le haghaidh cosaint súl agus aghaidhe le linn táthaithe agus próisis ghaolmhara a tharraingt siar ó Iris Oifigiúil an Aontais Eorpaigh, ós rud é gur tharraing CEN siar an caighdeán sin agus gur cuireadh EN ISO 16321-2:2021 ina ionad, ar caighdeán é a fhoilsítear an tagairt dó le Cinneadh Cur Chun Feidhme (AE) 2023/941.

(11)

Dá bhrí sin, ba cheart Cinneadh Cur Chun Feidhme (AE) 2023/941 a leasú dá réir.

(12)

Chun a dhóthain ama a thabhairt do mhonaróirí ullmhú do chur i bhfeidhm an chaighdeáin athbhreithnithe, is gá tarraingt siar na tagartha do na caighdeáin chomhchuibhithe EN 175:1997, EN 352-6:2020, EN 352-8:2020, EN 352-9:2020, EN 352-10:2020 agus EN 813:2008 a chur siar.

(13)

Ón dáta a fhoilsítear an tagairt do chaighdeán comhchuibhithe in Iris Oifigiúil an Aontais Eorpaigh, tugtar le fios le comhlíonadh an chaighdeáin sin go nglactar leis go bhfuil comhréir ann leis na ceanglais riachtanacha chomhfhreagracha a leagtar amach i reachtaíocht chomhchuibhithe an Aontais. Ba cheart an Cinneadh seo a theacht i bhfeidhm lá a fhoilsithe,