27.9.2022   

GA

Iris Oifigiúil an Aontais Eorpaigh

L 249/47


CINNEADH CUR CHUN FEIDHME (AE) 2022/1655 ÓN gCOIMISIÚN

an 26 Meán Fómhair 2022

lena n-aithnítear an tuarascáil lena n-áirítear faisnéis maidir leis na hastaíochtaí gás ceaptha teasa tipiciúla a thagann ó shaothrú pónairí soighe san Airgintín faoi Airteagal 31(3) agus (4) de Threoir (AE) 2018/2001 ó Pharlaimint na hEorpa agus ón gComhairle

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir (AE) 2018/2001 ó Pharlaimint na hEorpa agus ón gComhairle an 11 Nollaig 2018 maidir le húsáid fuinnimh ó fhoinsí in-athnuaite a chur chun cinn (1), agus go háirithe Airteagal 31(4) di,

De bharr an mhéid seo a leanas:

(1)

Leagtar amach i dTreoir (AE) 2018/2001 nach mór go sábháiltear le bithbhreoslaí, bithleachtanna agus breoslaí bithmhaise líon mór astaíochtaí gás ceaptha teasa i gcomparáid le breoslaí iontaise ionas gur féidir iad a áireamh mar chuid de na spriocanna a leagtar amach sa Treoir sin. Chun na críche sin, in Airteagal 29(10), leagtar síos tairseacha maidir leis an laghdú ar astaíochtaí le haghaidh na mbreoslaí sin, agus le hAirteagal 31, rialaítear an bealach a ríomhtar an laghdú ar astaíochtaí gás ceaptha teasa ó úsáid na mbreoslaí sin. Agus na ríomhanna sin á ndéanamh, is féidir úsáid a bhaint as na luachanna réamhshocraithe a leagtar amach in Iarscríbhinní V agus VI a ghabhann le Treoir (AE) 2018/2001. In ionad luachanna réamhshocraithe na n-astaíochtaí gás ceaptha teasa a thagann ó shaothrú bunábhar talmhaíochta, is féidir úsáid a bhaint as luachanna tipiciúla faoi roinnt coinníollacha. Na luachanna tipiciúla sin, arb éard atá iontu an meánluach i limistéar sonrach, féadfaidh na Ballstáit nó tríú tíortha iad a thuairisciú don Choimisiún. Ní fhéadfar na luachanna tipiciúla a úsáid ach amháin má aithníonn an Coimisiún go bhfuil siad cruinn.

(2)

An 16 Feabhra 2022, sheol an Airgintín an tuarascáil deiridh ina bhfuil na sonraí chuig an gCoimisiún chun na hastaíochtaí gás ceaptha teasa a bhaineann le saothrú pónairí soighe a tháirgtear de ghnáth i réigiúin san Airgintín atá coibhéiseach le réigiúin NUTS 2 (2) an Aontais Eorpaigh a thomhas, tuarascáil inar iarr sí go dtabharfaí aitheantas do chruinneas na sonraí sin i gcomhréir le hAirteagal 31(4) de Threoir (AE) 2018/2001.

(3)

Rinne an Coimisiún measúnú ar an tuarascáil agus chinn sé go soláthraítear léi sonraí cruinne chun na hastaíochtaí gás ceaptha teasa a bhaineann le saothrú pónairí soighe a tháirgtear de ghnáth i réigiúin san Airgintín atá coibhéiseach le réigiúin NUTS 2 an Aontais Eorpaigh a thomhas.

(4)

Na bearta dá bhforáiltear sa Chinneadh seo, tá siad i gcomhréir leis an tuairim ón gCoiste um Inbhuanaitheacht Bithbhreoslaí, Bithleachtanna agus Breoslaí Bithmhaise,

TAR ÉIS AN CINNEADH SEO A GHLACADH:

Airteagal 1

An tuarascáil ar chuir an Airgintín faoi bhráid an Choimisiúin an 16 Feabhra 2022 chun aitheantas a fháil ina leith, soláthraítear léi sonraí cruinne chun na hastaíochtaí gás ceaptha teasa a bhaineann le saothrú pónairí soighe a tháirgtear de ghnáth i réigiúin san Airgintín atá coibhéiseach le réigiúin NUTS 2 an Aontais Eorpaigh a thomhas, de bhun Airteagal 31(4) de Threoir (AE) 2018/2001. Leagtar amach san Iarscríbhinn achoimre ar shonraí na tuarascála.

Airteagal 2

Tá an Cinneadh bailí ar feadh tréimhse 5 bliana tar éis an lae a thiocfaidh sé i bhfeidhm. I gcás ina ndéanfar athrú ar ábhar na tuarascála, mar a cuireadh faoi bhráid an Choimisiúin í san iarraidh ar aitheantas an 16 Feabhra 2022, arb athrú é a d’fhéadfadh difear a dhéanamh do bhunús an Chinnidh seo, cuirfear na hathruithe sin in iúl don Choimisiún láithreach. Déanfaidh an Coimisiún measúnú ar na hathruithe faoina dtugtar fógra chun cinneadh a dhéanamh cé acu a sholáthraítear nó nach soláthraítear sonraí cruinne fós leis an tuarascáil a bhfuil sí aitheanta ina leith.

Airteagal 3

Féadfaidh an Coimisiún an Cinneadh seo a aisghairm má léirítear go soiléir nach soláthraítear leis an tuarascáil a thuilleadh sonraí cruinne chun na hastaíochtaí gás ceaptha teasa a bhaineann le saothrú pónairí soighe a tháirgtear san Airgintín a thomhas.

Airteagal 4

Tiocfaidh an Cinneadh seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Arna dhéanamh sa Bhruiséil, an 26 Meán Fómhair 2022.

Thar ceann an Choimisiúin

An tUachtarán

Ursula VON DER LEYEN


(1)   IO L 328, 21.12.2018, lch. 82.

(2)  Is córas aicmithe é NUTS le haghaidh aonaid chríche an Aontais Eorpaigh maidir le staidreamh.


IARSCRÍBHINN

Astaíochtaí GCT iomlána achoimre a eascraíonn as saothrú pónairí soighe in aghaidh na catagóire i réigiúin na hAirgintíne in kg CO2eq in aghaidh an tonna thirim de phónaire soighe

Cúige

Astaíochtaí GCT ó iarmhar bairr (kgCO2eq/tonna tirim)

Astaíochtaí GCT ó leathadh leasachán (kgCO2eq/tonna tirim)

Astaíochtaí GCT ó úsáid breosla (kgCO2eq/tonna tirim)

Astaíochtaí GCT ó tháirgeadh breosla (kgCO2eq/tonna tirim)

Astaíochtaí GCT ó tháirgeadh agraiceimiceán (kgCO2eq/tonna tirim)

Astaíochtaí GCT ó tháirgeadh leasachán (kgCO2eq/tonna tirim)

Astaíochtaí GCT ó tháirgeadh síolta (kgCO2eq/tonna tirim)

Iomlán (kgCO2eq/tonna tirim)

BUENOS AIRES

95,90

3,94

40,79

3,94

40,64

5,61

0,00

190,81

CHACO

97,41

6,60

53,97

5,21

70,30

6,23

0,00

239,72

CORDOBA

89,04

5,13

36,91

3,56

41,05

4,89

0,00

180,58

ENTRE RIOS

102,53

13,11

51,29

4,95

57,61

15,91

0,00

245,41

LA PAMPA

90,75

3,61

37,07

3,58

36,12

4,08

0,00

175,20

SALTA

94,87

1,08

51,34

4,96

55,72

1,39

0,00

209,36

SANTA FE

88,54

1,86

36,05

3,48

43,95

4,40

0,00

178,28

SANTIAGO DEL ESTERO

93,15

0,41

48,09

4,64

54,91

0,42

0,00

201,62

TUCUMAN

94,87

1,08

51,34

4,96

55,72

1,39

0,00

209,36