|
Iris Oifigiúil |
GA Sraith L |
|
2025/2170 |
30.10.2025 |
CINNEADH CUR CHUN FEIDHME (AE) 2025/2170 ÓN gCOIMISIÚN
an 29 Deireadh Fómhair 2025
lena mbunaítear Cuibhreannas don Bhonneagar Digiteach Eorpach maidir le Coimíneacht Dhigiteach (DC-EDIC)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Chinneadh (AE) 2022/2481 ó Pharlaimint na hEorpa agus ón gComhairle an 14 Nollaig 2022 lena mbunaítear Clár Beartais 2030 don Deacáid Dhigiteach (1), agus go háirithe Airteagal 14(3), pointe (a), de,
De bharr an mhéid seo a leanas:
|
(1) |
An 8 Iúil 2025, chuir an Fhrainc, an Iodáil, an Ghearmáin agus an Ísiltír iarratas faoi bhráid an Choimisiúin i gcomhréir le hAirteagal 14(1) de Chinneadh (AE) 2022/2481 ó Pharlaimint na hEorpa agus ón gComhairle chun an Cuibhreannas don Bhonneagar Digiteach Eorpach maidir le Coimíneacht Dhigiteach (‘DC-EDIC’) a bhunú. I litir dar dáta an 7 Iúil 2025 a cuireadh faoi bhráid an Choimisiúin, chuir an tSlóivéin in iúl go bhfuil sé beartaithe aici dul isteach in DC-EDIC mar bhreathnóir. |
|
(2) |
Mar an Ballstát óstach, sholáthair an Fhrainc dearbhú i gcomhréir le hAirteagal 14(1), pointe (d) de Chinneadh (AE) 2022/2481 inar luaigh sí gur aithin sí DC-EDIC mar chomhlacht idirnáisiúnta de réir bhrí Airteagal 143(1), pointe (g) agus Airteagal 151(1), pointe (b), de Threoir 2006/112/CE ón gComhairle (2) agus mar eagraíocht idirnáisiúnta de réir bhrí Airteagal 11(1), pointe (b), de Threoir (AE) 2020/262 ón gComhairle (3). |
|
(3) |
Rinne an Coimisiún measúnú ar an iarratas de bhun Airteagal 14(2) de Chinneadh (AE) 2022/2481. Chinn an Coimisiún go bhfuil na heilimintí uile a cheanglaítear i gcomhréir le hAirteagal 14(1) den Chinneadh sin ina gcuid den iarratas. Agus cuspóirí ginearálta an Chláir Beartais don Deacáid Dhigiteach á gcur san áireamh, go háirithe rannchuidiú an Chuibhreannais don Bhonneagar Digiteach Eorpach (‘EDIC’) atá beartaithe le héiceachóras cuimsitheach inbhuanaithe de bhonneagair dhigiteacha idir-inoibritheacha a fhorbairt, agus na breithnithe praiticiúla a bhaineann le cur chun feidhme an tionscadail ilnáisiúnta, go háirithe a acmhainneacht theicniúil, airgeadais agus riaracháin, chinn an Coimisiún go gcomhlíonann an EDIC atá beartaithe na ceanglais a leagtar síos in Airteagail 13 go 21 de Chinneadh (AE) 2022/2481. |
|
(4) |
Is é an cúram atá ar DC-EDIC Tionscadal Ilnáisiúnta a bhaineann le Coimíneacht Dhigiteach a chur chun feidhme i réimsí an bhonneagair agus na seirbhísí coiteanna sonraí Eorpacha agus an riaracháin phoiblí nasctha. De bhun an phríomhchúraim sin, ba cheart do DC-EDIC iarrachtaí na mBallstát a chomhcheangal trí acmhainní a chomhthiomsú agus a ngníomhaíochtaí a chomhordú chomh maith le hiarrachtaí pobail chun tacú le coimíneacht dhigiteach a fhorbairt, a choinneáil ar bun agus a scálú agus chun úsáid agus cur i bhfeidhm coimíneachta digití a éascú. |
|
(5) |
I gcomhréir le hAirteagal 14(3) de Chinneadh (AE) 2022/2481, chuathas i gcomhairle leis an gcoiste a bunaíodh faoi Airteagal 23(1) den Chinneadh sin chun a thuairim a fháil maidir le DC-EDIC a chur ar bun agus thug sé tuairim dhearfach uaidh an 9 Deireadh Fómhair 2025. |
|
(6) |
Ionas go bhféadfar na bearta dá bhforáiltear sa Chinneadh seo a chur i bhfeidhm go pras, mar atá tús a chur le hoibriú DC-EDIC, rud is gá go práinneach dá chur chun feidhme ordúil, ba cheart an Cinneadh seo a theacht i bhfeidhm lá a fhoilsithe in Iris Oifigiúil an Aontais Eorpaigh. |
TAR ÉIS AN CINNEADH SEO A GHLACADH:
Airteagal 1
1. Bunaítear leis seo an Cuibhreannas don Bhonneagar Digiteach Eorpach maidir le Coimíneacht Dhigiteach (DC-EDIC).
2. Beidh pearsantacht dhlítheanach ag DC-EDIC agus beidh aige i ngach ceann de na Ballstáit an inniúlacht dhlítheanach is fairsinge a thugtar d’eintitis dhlítheanacha faoi dhlí an Bhallstáit sin. Féadfaidh sé, go háirithe, maoin inchorraithe, réadmhaoin agus maoin intleachtúil a fháil agus a dhiúscairt, féadfaidh sé an mhaoin sin a bheith faoina úinéireacht, agus féadfaidh sé conarthaí a thabhairt i gcrích agus a bheith ina pháirtí in imeachtaí dlíthiúla.
3. Leagtar amach eilimintí fíor-riachtanacha de reachtanna DC-EDIC, mar a chomhaontaigh a chomhaltaí iad, san Iarscríbhinn a ghabhann leis an gCinneadh seo.
Airteagal 2
Tiocfaidh an Cinneadh seo i bhfeidhm lá a fhoilsithe in Iris Oifigiúil an Aontais Eorpaigh.
Arna dhéanamh sa Bhruiséil, an 29 Deireadh Fómhair 2025.
Thar ceann an Choimisiúin
An tUachtarán
Ursula VON DER LEYEN
(1) IO L 323, 19.12.2022, lch. 4, ELI: http://data.europa.eu/eli/dec/2022/2481/oj.
(2) Treoir 2006/112/CE ón gComhairle an 28 Samhain 2006 maidir leis an gcomhchóras cánach breisluacha (IO L 347, 11.12.2006, lch. 1, ELI: http://data.europa.eu/eli/dir/2006/112/oj).
(3) Treoir (AE) 2020/262 ón gComhairle an 19 Nollaig 2019 lena leagtar síos na socruithe ginearálta maidir le dleacht mháil (IO L 58, 27.2.2020, lch. 4, ELI: http://data.europa.eu/eli/dir/2020/262/oj).
IARSCRÍBHINN
EILIMINTÍ FÍOR-RIACHTANACHA DE REACHTANNA DC-EDIC
1.
I gcomhréir le hAirteagal 17(1), pointe (c), de Chinneadh (AE) 2022/2481:Airteagal 2
Ainm, oifig, suíomh agus teanga oibre
[…]
2. Is é ‘EDIC maidir le Coimíneacht Dhigiteach’ ainm an EDIC dá dtagraítear i mír (1), dá ngairtear DC-EDIC anseo feasta.
3. Beidh oifig chláraithe DC-EDIC i bPáras na Fraince.
2.
I gcomhréir le hAirteagal 17(1), pointe (d), de Chinneadh (AE) 2022/2481:Airteagal 31
Fad ama
Beidh ann do DC-EDIC go ceann tréimhse éiginnte go dtí go ndéanfar é a fhoirceannadh i gcomhréir le hAirteagal 32.
Airteagal 32
Foirceannadh
1. Is í Tionól na gComhaltaí a chinnfidh foirceannadh DC-EDIC i gcomhréir le hAirteagal 13.
2. Gan moill mhíchuí agus in aon chás laistigh de 10 lá tar éis ghlacadh an chinnidh DC-EDIC a fhoirceannadh, tabharfaidh DC-EDIC fógra don Choimisiún Eorpach faoin gcinneadh. Tiocfaidh deireadh le DC-EDIC an lá a fhoilseoidh an Coimisiún Eorpach an fógra iomchuí in Iris Oifigiúil an Aontais Eorpaigh.
3. Sócmhainní a bheidh fágtha tar éis fiacha DC-EDIC a íoc, déanfar iad a chionroinnt i measc na gcomhaltaí i gcoibhneas lena ranníocaíocht bhliantúil charntha le DC-EDIC, mar a shonraítear in Airteagal 12, nó aistreofar iad chuig eintiteas dlíthiúil eile, a mhéid a leanann an t-eintiteas sin le gníomhaíochtaí EDIC.
4. Gan moill mhíchuí agus, in aon chás laistigh de 10 lá ó dhúnadh an nós imeachta foirceanta, tabharfaidh DC-EDIC fógra faoi sin don Choimisiún.
3.
I gcomhréir le hAirteagal 17(1), pointe (e), de Chinneadh (AE) 2022/2481:Airteagal 23
Dliteanas agus árachas
1. Tá DC-EDIC faoi dhliteanas i leith a chuid fiach.
2. Tá dliteanas airgeadais na gcomhaltaí i leith fhiacha DC-EDIC teoranta dá ranníocaíochtaí airgeadais féin arna soláthar do DC-EDIC, mar a shonraítear in Iarscríbhinn III.
3. Níl an tAontas faoi dhliteanas i leith fhiacha DC-EDIC.
4. Beidh árachas iomchuí ag DC-EDIC chun na rioscaí a bhaineann lena ghníomhaíochtaí a chumhdach.
4.
I gcomhréir le hAirteagal 17(1), pointe (i), de Chinneadh (AE) 2022/2481:Airteagal 22
Díolúintí ó cháin agus ó dhleacht mháil
1. Díolúintí CBL bunaithe ar Airteagal 143(1)(g) agus Airteagal 151(1)(b) de Threoir 2006/112/CE, beidh siad teoranta do cheannacháin a dhéanfaidh DC-EDIC agus comhaltaí DC-EDIC atá le húsáid go hoifigiúil agus go heisiach ag DC-EDIC ar choinníoll go ndéanfar ceannachán den sórt sin le haghaidh ghníomhaíochtaí neamheacnamaíocha DC-EDIC i gcomhréir lena ghníomhaíochtaí, agus lena n-aghaidh sin amháin.
2. Beidh díolúintí CBL teoranta do cheannacháin ar mó a luach ná EUR 300.
3. Díolúintí ó dhleacht mháil bunaithe ar Airteagal 11(1), pointe (b), de Threoir (AE) 2020/262 ón gComhairle, beidh siad teoranta do cheannacháin a dhéanfaidh DC-EDIC atá le húsáid go hoifigiúil agus go heisiach ag DC-EDIC ar choinníoll go ndéanfar ceannachán den sórt sin le haghaidh ghníomhaíochtaí neamheacnamaíocha DC-EDIC i gcomhréir lena ghníomhaíochtaí, agus lena n-aghaidh sin amháin, agus gur mó luach an cheannacháin ná EUR 300.
ELI: http://data.europa.eu/eli/dec_impl/2025/2170/oj
ISSN 1977-0839 (electronic edition)