(1)

L-Artikolu 10(1) tar-Regolament (UE) 2021/267 jestendi l-limiti taż-żmien għat-tiġdid taċ-ċertifikati tas-sikurezza msemmija fl-Artikolu 10(5) tad-Direttiva 2004/49/KE (2), li kieku skadew jew li kieku jiskadu bejn l-1 ta’ Settembru 2020 u t-30 ta’ Ġunju 2021.

(2)

B’ittra bid-data tas-26 ta’ Mejju 2021, il-Greċja ppreżentat talba motivata għal awtorizzazzjoni biex tapplika estensjoni ta’ xahar għall-perjodu bejn l-1 ta’ Settembru 2020 u t-30 ta’ Ġunju 2021 speċifikat fl-Artikolu 10(1) tar-Regolament (UE) 2021/267. Il-Greċja pprovdiet informazzjoni addizzjonali biex issostni t-talba tagħha fit-8 u fis-17 ta’ Ġunju 2021.

(3)

Skont l-informazzjoni pprovduta mill-Greċja, it-tiġdid taċ-ċertifikati tas-sikurezza msemmi fl-Artikolu 10(5) tad-Direttiva 2004/49/KE x’aktarx jibqa’ imprattikabbli lil hinn mit-30 ta’ Ġunju 2021 minħabba miżuri li ħadet biex tipprevjeni jew trażżan it-tixrid tal-COVID-19.

(4)

Fost dawn il-miżuri, mis-7 ta’ Novembru 2020, il-Greċja imponiet it-telexogħol obbligatorju tal-persunal sa minimu ta’ 50 %, miżuri dwar il-protezzjoni ta’ gruppi vulnerabbli, u l-obbligu ta’ iżolament għal persuni li kienu morda jew li kellhom kuntatti ma’ każijiet ikkonfermati ta’ COVID-19.

(5)

Skont il-Greċja, dawn il-miżuri kkawżaw diversi diffikultajiet u dewmien, b’mod partikolari, lill-korp taċ-ċertifikazzjoni tas-sikurezza kompetenti Grieg, li l-kompiti tiegħu huma eżerċitati mill-Awtorità Regolatorja Ferrovjarja (“RAS”). Din l-awtorità amministrattiva, li skont il-Greċja, diġà kellha nuqqas ta’ persunal minħabba l-miżuri ta’ reklutaġġ, ġiet mgħobbija b’mod sinifikanti bil-piż tal-miżuri nazzjonali dwar it-telexogħol obbligatorju, li kellhom l-effett li jirrestrinġu l-aċċess tal-persunal tagħha għall-fajls amministrattivi rilevanti, u li jestendu ż-żmien tal-eżamijiet amministrattivi tal-każijiet rilevanti.

(6)

Barra minn hekk, sabiex jitkompla t-tiġdid ta’ ċertifikat tas-sikurezza uniku, jeħtieġ li jitwettqu proċeduri bħal spezzjonijiet fuq il-post mill-korp taċ-ċertifikazzjoni tas-sikurezza, sabiex tiġi żgurata l-effettività tal-proċeduri proposti mill-impriża ferrovjarja, u biex jiġi żgurat li jiġu vvalutati l-modifiki ssuġġeriti lil dawk l-impriżi ferrovjarji. Minħabba l-miżuri msemmija hawn fuq, maħsuba biex irażżnu t-tixrid tal-COVID-19, it-tlestija ta’ dawk l-ispezzjonijiet fuq il-post saret iktar diffiċli.

(7)

Barra minn hekk, it-talba għat-tiġdid ta’ ċertifikat tas-sikurezza speċifiku wieħed, li attwalment qed jiġi analizzat mill-korp taċ-ċertifikazzjoni tas-sikurezza, ġiet ippreżentata ftit qabel id-data tal-iskadenza tiegħu. Skont il-Greċja, filwaqt li l-korp taċ-ċertifikazzjoni kompetenti għamel kull sforz biex jissodisfa l-obbligi tiegħu fl-iskadenzi applikabbli, mhuwiex possibbli għal dik l-awtorità li twettaq il-proċeduri meħtieġa għat-tiġdid taċ-ċertifikat tas-sikurezza qabel id-data tal-iskadenza tiegħu, meta wieħed iqis id-diffikultajiet imsemmija hawn fuq ikkawżati mill-miżuri adottati biex jitrażżan it-tixrid tal-COVID-19.

(8)

Il-perjodu ta’ xahar għall-estensjoni mitluba huwa limitat għal dak li huwa meħtieġ biex il-korp taċ-ċertifikazzjoni tas-sikurezza jkun jista’ jwettaq il-formalitajiet amministrattivi meħtieġa għat-tiġdid taċ-ċertifikat tas-sikurezza inkwistjoni.

(9)

Skont l-informazzjoni pprovduta mill-Greċja, l-iktar rapporti reċenti tal-impriża ferrovjarja li applikaw għat-tiġdid taċ-ċertifikat tas-sikurezza msemmi juru li ma ġie rreġistrat l-ebda inċident għall-parti tas-sezzjoni tal-infrastruttura ferrovjarja li fiha topera dik l-impriża, għajr tentattiv ta’ suwiċidju li seħħ fl-2019. Barra minn hekk, l-ebda kwistjoni ta’ riskju jew każ ta’ nuqqas ta’ konformità ma ġew osservati mill-korp taċ-ċertifikazzjoni tas-sikurezza fl-attivitajiet ta’ spezzjoni u ta’ monitoraġġ li twettqu minn meta nħareġ iċ-ċertifikat tas-sikurezza. Għal dawn ir-raġunijiet, u minħabba li l-estensjoni meħtieġa mill-Greċja hija ta’ xahar biss għall-perjodu bejn l-1 ta’ Settembru 2020 u t-30 ta’ Ġunju 2021 stabbilit fl-Artikolu 10(1) tar-Regolament (UE) 2021/267, l-estensjoni mitluba ma għandhiex twassal għal riskji sproporzjonati f’termini ta’ sikurezza u ta’ sigurtà tat-trasport.

(10)

Għalhekk, jenħtieġ li l-Greċja tiġi awtorizzata tapplika estensjoni ta’ xahar għall-perjodu bejn l-1 ta’ Settembru 2020 u t-30 ta’ Ġunju 2021 speċifikat fl-Artikolu 10(1) tar-Regolament (UE) 2021/267.

(11)

Il-Greċja qablet li din id-Deċiżjoni tiġi adottata u nnotifikata bl-Ingliż,