(1)

Ittri bil-posta esperjenzaw tnaqqis annwali ta’ 4,9 % fl-Unjoni mill-2008 ’l hawn, u din it-tendenza ġiet aċċellerata bil-kontrazzjoni tal-ekonomija minħabba l-pandemija tal-COVID-19, li matulha l-volumi tal-ittri bil-posta naqsu bejn 12 % u 26 % bejn l-2019 u l-2020.

(2)

Servizzi tal-konsenja tal-pakketti esperjenzaw żieda annwali ta’ madwar 9 % fl-Unjoni mill-2008, u din it-tendenza ġiet aċċellerata minħabba l-pandemija tal-COVID-19.

(3)

L-ispiża tal-obbligu tas-servizz universali, ibbażata fuq l-iskala tal-ispejjeż, żdiedet minħabba t-tnaqqis qawwi tas-suq tal-ittri bil-posta.

(4)

L-iżvilupp tal-kummerċ elettroniku u d-diġitalizzazzjoni introduċew atturi, prodotti u servizzi ġodda fis-suq tas-servizzi postali.

(5)

F’kull Stat Membru s-servizzi postali universali huma pprovduti fil-pajjiż kollu, filwaqt li l-ħtiġijiet tal-utenti ta’ dawk is-servizzi nbidlu b’mod sinifikanti.

(6)

Il-kunċett ta’ “servizz universali” jeħtieġ li jirrifletti l-ħtiġijiet tal-utenti li qed jinbidlu u li jkun flessibbli u sostenibbli.

(7)

Id-Direttiva 97/67/KE tal-Parlament Ewropew u tal-Kunsill (1) laħqet parzjalment l-għanijiet tagħha. Madankollu, jista’ jkun hemm il-ħtieġa li tiġi riveduta sabiex jiġi żgurat li tibqa’ valida fil-futur u li tindirizza l-isfidi msemmija hawn fuq b’mod sostenibbli.

(8)

Analiżi dettaljata tas-sitwazzjoni tas-suq intern tas-servizz postali tal-Unjoni tiġġustifika l-ħtieġa għal reviżjoni tad-Direttiva 97/67/KE sabiex tirrifletti l-iżviluppi teknoloġiċi u t-tibdil f’dak is-suq u tippermetti l-adozzjoni tad-Direttiva riveduta fi ħdan iċ-ċiklu leġiżlattiv Ewropew ta’ bħalissa,