(1)

Le Treoir 2006/64/CE ón gCoimisiún (2) áirítear tríneicseapac mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

Maidir leis na substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí tríneicseapac, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 15 Nollaig 2024.

(4)

Cuireadh iarratas faoi bhráid na Liotuáine, an Ballstát is rapóirtéir, agus faoi bhráid na Laitvia, an Ballstáit is comhrapóirtéir, chun formheas na substainte gníomhaí tríneicseapac, mar an eistear eitile tríneicseapac-eitil go sonrach, a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) agus laistigh den tréimhse ama dá bhforáiltear san Airteagal sin.

(5)

Chuir an t-iarratasóir na sainchomhaid fhorlíontacha is gá faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’) i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith inghlactha.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 31 Márta 2017. Ina dhréacht-tuarascáil maidir le measúnú ar athnuachan, mhol an Ballstát is rapóirtéir go ndéanfaí an formheas le haghaidh tríneicseapac-eitile a athnuachan.

(7)

Chuir an tÚdarás an sainchomhad achomair forlíontach ar fáil don phobal. Scaip an tÚdarás an dréacht-tuarascáil maidir le measúnú ar athnuachan ar an iarratasóir agus ar na Ballstáit freisin chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

An 16 Márta 2018 chuir an tÚdarás a chonclúid (6) in iúl don Choimisiún i dtaobh an bhféadfaí coinne a bheith leis go gcomhlíonfaidh tríneicseapac-eitil na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(9)

Chuir an Coimisiún dréacht-tuarascáil athnuachana maidir le tríneicseapac-eitil faoi bhráid an Bhuanchoiste um Plandaí, Ainmhithe, Bia agus Beatha an 23 Deireadh Fómhair 2018.

(10)

Sa chonclúid uaidh, tháinig an tÚdarás ar an gconclúid nár comhlíonadh na critéir eatramhacha a leagtar síos i bpointe 3.6.5 d’Iarscríbhinn II a ghabhann le Rialachán (CE) Uimh. 1107/2009, maidir le hairíonna suaiteora inchrínigh a chinneadh. Bhí bearnaí sonraí sainaitheanta aige freisin, áfach, agus dá bhrí sin, ní fhéadfadh sé an measúnú ar airíonna suaiteora inchrínigh a thabhairt chun críche.

(11)

Le Rialachán (AE) 2018/605 ón gCoimisiún (7) leasaíodh Iarscríbhinn II a ghabhann le Rialachán (CE) Uimh. 1107/2009 trí chritéir eolaíocha nua a thabhairt isteach maidir le hairíonna suaiteora inchrínigh a chinneadh. Dá bhrí sin, i gcomhréir le hAirteagal 14(1d), an chéad fhomhír, de Rialachán Cur Chun Feidhme (AE) Uimh. 844/2012, d’iarr an Coimisiún ar an Údarás an measúnú maidir leis na hairíonna suaiteora inchrínigh a thabhairt cothrom le dáta agus faisnéis bhreise a iarraidh ar an iarratasóir más gá.

(12)

An 8 Meitheamh 2023 chuir an tÚdarás a chonclúid (8) nuashonraithe in iúl don Choimisiún i dtaobh an bhféadfaí coinne a bheith leis go gcomhlíonfaidh tríneicseapac-eitil na critéir formheasa dá bhforáiltear in Airteagal 4 de Rialachán (CE) Uimh. 1107/2009. Ina chonclúid, tháinig an tÚdarás ar an gconclúid nach gcomhlíonann tríneicseapac-eitil na critéir lena meastar go bhfuil airíonna suaiteora inchrínigh ag substaint.

(13)

Chuir an Coimisiún dréacht-tuarascáil athnuachana nuashonraithe maidir le tríneicseapac-eitil faoi bhráid an Bhuanchoiste um Plandaí, Ainmhithe, Bia agus Beatha an 12 Iúil 2023.

(14)

D’iarr an Coimisiún ar an iarratasóir a bharúlacha a chur isteach maidir le conclúid an Údaráis agus, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, maidir leis an tuarascáil athnuachana. Chuir an t-iarratasóir a bharúlacha isteach, agus rinneadh scrúdú cúramach orthu.

(15)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil tríneicseapac-eitil, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(16)

Dá bhrí sin, is iomchuí formheas tríneicseapac mar thríneicseapac-eitil a athnuachan.

(17)

Cé go bhfuil an measúnú riosca maidir le formheas tríneicseapac-eitile a athnuachan bunaithe ar líon teoranta úsáidí ionadaíocha, ní chuireann sé sin sriain ar na húsáidí a bhféadfar táirgí cosanta plandaí ina bhfuil tríneicseapac-eitil a údarú ina leith. Dá bhrí sin, is iomchuí deireadh a chur leis an srian maidir le húsáid a bhaint as mar rialaitheoir fáis plandaí amháin.

(18)

I gcomhréir le hAirteagal 14(1) de Rialachán (CE) Uimh. 1107/2009, i gcomhar le hAirteagal 6 de, agus i bhfianaise an eolais eolaíoch reatha agus an eolais theicniúil reatha, is gá, áfach, foráil a dhéanamh maidir le coinníollacha agus srianta áirithe. Ós rud é nach raibh treoraíocht iomchuí ar fáil tráth an iarratais ar athnuachan an fhormheasa, is iomchuí, go háirithe, uasteorainneacha sonracha a shocrú le haghaidh dhá eisíontas atá ábhartha ó thaobh na tocsaineolaíochta de agus faisnéis deimhniúcháin a éileamh maidir leis an tionchar atá ag próisis cóireála uisce ar chineál na n-iarmhar tríneicseapac-eitile agus a mheitibilítí atá in uisce dromchla nuair a asbhaintear uisce dromchla le haghaidh uisce óil.

(19)

Dá bhrí sin, ba cheart Rialachán Cur Chun Feidhme (AE) Uimh. 540/2011 a leasú dá réir.

(20)

Le Rialachán Cur Chun Feidhme (AE) 2023/689 ón gCoimisiún (9), cuireadh síneadh leis an tréimhse formheasa maidir le tríneicseapac go dtí an 15 Nollaig 2024 chun go bhféadfar an próiseas athnuachana a chur i gcrích sula rachaidh tréimhse formheasa na substainte gníomhaí sin in éag. Mar sin féin, ós rud é go ndearnadh cinneadh i dtaobh formheas na substainte gníomhaí sin a athnuachan roimh dhul in éag na tréimhse formheasa sin ar cuireadh síneadh léi, ba cheart feidhm a bheith ag an Rialachán seo tráth is luaithe ná an dáta sin.

(21)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,