(1)

Fit-12 ta’ Jannar 2021, il-Kummissjoni rċeviet applikazzjoni mingħand Roullier għall-approvazzjoni tal-idrossidu tal-manjeżju E528 bħala sustanza bażika biex tintuża fil-protezzjoni tal-pjanti bħala fungiċida fuq id-dwieli tal-għeneb, iż-żebbuġ, il-banana, il-ħafur, is-segala, it-tritikal, il-qamħ, it-tadam, il-brunġiel, il-bżar ħelu, il-bżar aħmar, il-Physalis sp. u l-pepino, il-patata, l-arbuxell tal-ward, il-pjanti ornamentali, il-ħawħ, il-berquq, iċ-ċirasa, l-għanbaqar, in-nuċiprisk, il-mirabella u l-għelejjel tar-ross.

(2)

Wara l-kontrolli tal-ammissibbiltà, l-applikazzjonijiet riveduti waslu f’Mejju 2021, f’April 2022 u f’Jannar 2023. L-applikazzjoni, kif riveduta f’Jannar 2023, kienet akkumpanjata mill-informazzjoni meħtieġa skont it-tieni subparagrafu tal-Artikolu 23(3) tar-Regolament (KE) Nru 1107/2009.

(3)

Il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) għall-assistenza xjentifika skont l-Artikolu 23(4) tar-Regolament (KE) Nru 1107/2009. Fis-6 ta’ Marzu 2023, l-Awtorità pprovdiet rapport tekniku dwar l-idrossidu tal-manjeżju E528 lill-Kummissjoni (2).

(4)

Fit-12 ta’ Ottubru 2023 u l-11 ta’ Diċembru 2023 rispettivament, il-Kummissjoni ppreżentat ir-rapport ta’ rieżami (3) u abbozz ta’ dan ir-Regolament lill-Kumitat Permanenti dwar il-Pjanti, l-Annimali, l-Ikel u l-Għalf.

(5)

L-informazzjoni pprovduta mill-applikant turi li l-idrossidu tal-manjeżju E528 jintuża bħala addittiv tal-ikel u tal-għalf, bħala lassattiv ożmotiku u antaċidu għall-istonku fil-mediċina, bħala deodorant tal-ġisem fil-kożmetiċi, bħala fertilizzant fl-agrikoltura u f’diversi użi industrijali. Barra minn hekk, is-sustanza ma tintużax b’mod predominanti għal skopijiet ta’ protezzjoni tal-pjanti, iżda s-sustanza hija utli għall-protezzjoni tal-pjanti fi prodott magħmul minn din is-sustanza. Abbażi tal-informazzjoni pprovduta fl-applikazzjoni u fir-Rapport Tekniku mill-Awtorità, jista’ jiġi konkluż ukoll li mhijiex sustanza ta’ tħassib; ma għandhiex il-kapaċità inerenti li tikkawża effetti ta’ interferenza endokrinali, newrotossiċità jew effetti immunotossiċi; u ma titqiegħedx fis-suq direttament bħala prodott għall-protezzjoni tal-pjanti. Konsegwentement, l-idrossidu tal-manjeżju E528 jissodisfa l-kundizzjonijiet stabbiliti fl-Artikolu 23(1) tar-Regolament (KE) Nru 1107/2009.

(6)

Huwa disponibbli (4) Regolament tal-Kummissjoni li jistabbilixxi l-ispeċifikazzjonijiet għall-idrossidu tal-manjeżju E528 bħala addittiv tal-ikel approvat. Din l-informazzjoni tqieset mill-Awtorità kif ukoll mill-Kummissjoni fil-qafas tal-Artikolu 23(2) tar-Regolament (KE) Nru 1107/2009.

(7)

Il-Kummissjoni stiednet lill-applikant iressaq il-kummenti tiegħu dwar ir-rapport tekniku tal-Awtorità u dwar l-abbozz tar-rapport ta’ rieżami tal-Kummissjoni. L-applikant ressaq il-kummenti tiegħu, u dawn ġew eżaminati bir-reqqa.

(8)

Wara li ġew eżaminati l-applikazzjoni u d-dokumenti relatati kollha, jista’ jkun mistenni li l-idrossidu tal-manjeżju E528, b’mod ġenerali, jissodisfa r-rekwiżiti stabbiliti fl-Artikolu 23 tar-Regolament (KE) Nru 1107/2009, b’mod partikolari fir-rigward tal-użi li ġew eżaminati u spjegati fir-rapport ta’ rieżami tal-Kummissjoni. Għaldaqstant huwa xieraq li l-idrossidu tal-manjeżju E528 jkun approvat bħala sustanza bażika.

(9)

F’konformità mal-Artikolu 13(2) tar-Regolament (KE) Nru 1107/2009, flimkien mal-Artikolu 6 tiegħu u fid-dawl tal-għarfien xjentifiku u tekniku kurrenti, madanakollu, huwa meħtieġ li jiġu inklużi ċerti kundizzjonijiet għall-approvazzjoni.

(10)

F’konformità mal-Artikolu 13(4) tar-Regolament (KE) Nru 1107/2009, jenħtieġ li l-Anness tar-Regolament ta’ Implimentazzjoni tal-Kummissjoni (UE) Nru 540/2011 (5) jiġi emendat skont dan.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,