(1)

Fl-20 ta’ Diċembru 2023, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet tal-bijodiżil li joriġinaw mir-Repubblika tal-Poplu taċ-Ċina (“il-pajjiż ikkonċernat”, “ir-RPĊ” jew “iċ-Ċina”) fuq il-bażi tal-Artikolu 5 tar-Regolament bażiku. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (2) (“in-Notifika tal-Bidu”).

(2)

Il-Kummissjoni bdiet l-investigazzjoni wara lment imressaq fis-7 ta’ Novembru 2023 mill-Bord Ewropew tal-Bijodiżil (“l-ilmentatur” jew “EBB”, European Biodiesel Board). L-ilment sar f’isem l-industrija tal-Unjoni tal-bijodiżil skont it-tifsira tal-Artikolu 5(4) tar-Regolament bażiku. L-ilment kien fih evidenza ta’ dumping u tad-dannu materjali li jirriżulta li kienet biżżejjed sabiex tiġġustifika l-bidu tal-investigazzjoni.

(3)

L-importazzjonijiet tal-bijodiżil bħalissa huma soġġetti għal miżuri anti-dumping meta joriġinaw mill-Istati Uniti tal-Amerka (“l-Istati Uniti”) (3) u għal miżuri kompensatorji meta joriġinaw mill-Arġentina (4), mill-Indoneżja (5) jew mill-Istati Uniti (6).

(4)

F’konformità mal-Artikolu 19a tar-Regolament bażiku, fid-19 ta’ Lulju 2024, il-Kummissjoni pprovdiet lill-partijiet sommarju tad-dazji proposti u dettalji dwar il-kalkolu tal-marġni tad-dumping u l-marġni adegwati sabiex jitneħħa d-dannu għall-industrija tal-Unjoni. Il-partijiet interessati ġew mistiedna jikkummentaw dwar il-preċiżjoni tal-kalkoli fi żmien 3 ijiem tax-xogħol. Il-produtturi esportaturi kollha fil-kampjun ippreżentaw kummenti dwar il-preċiżjoni tal-kalkoli tal-marġni tad-dumping. Madankollu, dawk il-kummenti kienu jikkonċernaw il-metodoloġija użata mill-Kummissjoni aktar milli żbalji klerikali. Għalhekk, il-Kummissjoni infurmat lill-partijiet li l-kummenti tagħhom se jiġu indirizzati fl-istadju definittiv tal-investigazzjoni. Produttur esportatur wieħed indika żball li jikkonċerna l-formula tal-kostijiet ta’ wara l-importazzjoni. Il-Kummissjoni ċċarat li ma kien hemm l-ebda żball fil-formula iżda f’intestatura ta’ spjegazzjoni.

(5)

Fis-16 ta’ Awwissu 2024, permezz tar-Regolament ta’ Implimentazzjoni tal-Kummissjoni (UE) 2024/2163 (7), il-Kummissjoni imponiet dazji anti-dumping proviżorji fuq l-importazzjonijiet tal-bijodiżil li joriġinaw mir-Repubblika tal-Poplu taċ-Ċina (“ir-Regolament proviżorju”).

(6)

Wara d-divulgazzjoni tal-fatti u l-kunsiderazzjonijiet essenzjali li fuq il-bażi tagħhom ġie impost dazju anti-dumping proviżorju (“divulgazzjoni proviżorja”), l-ilmentatur, il-produttur tal-Unjoni Neste, il-fornitur Ewropew tal-ħżin tal-bijofjuwils Chane, il-kollettur Ewropew taż-żejt tat-tisjir użat (“UCO”, used cooking oil) Quatra N.V., il-Kamra tal-Kummerċ Ċiniża tal-Importaturi u l-Esportaturi ta’ Metalli, Minerali u Kimiki (“CCCMC”, China Chamber of Commerce of Metals, Minerals & Chemicals) (8) u t-tliet produtturi esportaturi Ċiniżi inklużi fil-kampjun ressqu sottomissjonijiet bil-miktub biex jesprimu l-fehmiet tagħhom dwar is-sejbiet proviżorji sal-iskadenza prevista fl-Artikolu 2(1) tar-Regolament proviżorju.

(7)

Il-partijiet li għamlu t-talba biex jinstemgħu, ingħataw din l-opportunità. Saru seduti ta’ smigħ (9) mal-ilmentatur, il-produttur tal-Unjoni Neste, il-produttur esportatur Ċiniż inkluż fil-kampjun EcoCeres, is-CCCMC, importatur relatat (Excellence New Energy B.V.) u l-fornitur Ewropew tal-ħżin tal-bijofjuwils Chane.

(8)

Wara d-divulgazzjoni proviżorja, żewġ produtturi esportaturi li kkooperaw mhux inklużi fil-kampjun infurmaw lill-Kummissjoni dwar żbalji żgħar f’isimhom kif elenkati fl-Anness 1. Il-Kummissjoni eżaminat l-affermazzjonijiet u kkoreġiet l-ismijiet tal-kumpaniji kif xieraq.

(9)

Il-Kummissjoni kompliet tfittex u tivverifika l-informazzjoni kollha li qieset meħtieġa għas-sejbiet definittivi tagħha. Meta waslet għas-sejbiet definittivi tagħha, il-Kummissjoni kkunsidrat il-kummenti ppreżentati mill-partijiet interessati u rrevediet il-konklużjonijiet proviżorji tagħha meta kien xieraq.

(10)

Il-Kummissjoni infurmat lill-partijiet interessati kollha bil-fatti u l-kunsiderazzjonijiet essenzjali li abbażi tagħhom kien beħsiebha timponi dazju anti-dumping definittiv fuq l-importazzjonijiet tal-bijodiżil li joriġinaw miċ-Ċina (“divulgazzjoni finali”). Il-partijiet kollha ngħataw perjodu li fih setgħu jikkummentaw dwar id-divulgazzjoni finali.

(11)

L-ebda parti interessata ma talbet seduta ta’ smigħ mas-servizzi tal-Kummissjoni jew mal-Uffiċjal tas-Seduta.

(12)

L-analiżi ta’ xi kummenti dwar id-divulgazzjoni finali rriżultat f’bidliet fil-kalkoli tad-dumping u fil-marġnijiet tad-dumping. Fis-16 ta’ Diċembru 2024, il-Kummissjoni infurmat lill-partijiet interessati kollha bil-bidliet permezz ta’ divulgazzjoni addizzjonali limitata għall-modifiki li saru. Il-partijiet kollha ngħataw perjodu li fih setgħu jikkummentaw dwar id-divulgazzjoni finali addizzjonali.

(13)

Fin-nuqqas ta’ kummenti dwar il-kampjunar, il-premessi (7) sa (24) tar-Regolament proviżorju ġew ikkonfermati.

(14)

Il-premessa (25) tar-Regolament proviżorju ddikjarat li l-Kummissjoni tiddeċiedi jekk tagħtix eżami individwali mitlub minn produttur esportatur wieħed fl-istadju definittiv tal-investigazzjoni.

(15)

Meta titqies il-kumplessità tal-investigazzjoni, l-istruttura tal-produttur esportatur li kien qed jitlob l-eżami individwali, kif ukoll l-iskadenzi statutorji applikabbli għall-investigazzjoni, il-Kummissjoni kkonkludiet li eżami individwali jkun ta’ piż mhux dovut u jipprevjeni t-tlestija tal-investigazzjoni fi żmien xieraq u ddeċidiet li tirrifjuta t-talba tal-parti għal eżami individwali.

(16)

Fin-nuqqas ta’ kummenti dwar il-perjodu ta’ investigazzjoni u l-perjodu kkunsidrat, il-premessa (29) tar-Regolament proviżorju ġiet ikkonfermata.

(17)

Fl-istadju proviżorju, il-Kummissjoni aċċettat l-esklużjoni tal-SAF mill-ambitu ta’ din l-investigazzjoni, kif iddikjarat fil-premessa (41) tar-Regolament proviżorju.

(18)

Wara d-divulgazzjoni proviżorja, Quatra N.V. u l-EBB innutaw li l-esklużjoni tal-SAF mill-ambitu tal-investigazzjoni tikkontradixxi ċerti miri ta’ sostenibbiltà tal-UE. L-EBB żied li l-esklużjoni tagħti spinta lill-kapaċitajiet fil-futur tal-SAF fiċ-Ċina (li tilħaq aktar minn 200 % tad-domanda tal-Unjoni fl-2025) u tiskoraġġixxi l-investimenti fil-produzzjoni tal-SAF fl-Unjoni. Skont l-EBB, il-produtturi Ċiniżi setgħu faċilment jibdlu l-kapaċità tal-produzzjoni tagħhom taż-żejt veġetali idrotrattat (“HVO”, hydrotreated vegetable oil) fi produzzjoni tal-SAF peress li l-proċessi tal-produzzjoni kienu simili. Barra minn hekk, l-EBB allega li l-esklużjoni tal-SAF tista’ ġġiegħel lill-operaturi jilħqu l-miri ta’ dekarbonizzazzjoni fis-settur tat-toroq permezz tal-SAF Ċiniż, li qed jgħoddu darbtejn għall-miri tal-UE, aktar milli permezz tal-HVO/FAME (11) magħmul fl-Unjoni, u b’hekk jikkawżaw aktar dannu lill-industrija tal-Unjoni. Fil-kummenti tiegħu wara d-divulgazzjoni finali, l-EBB insista fuq il-kummenti tiegħu rigward iż-żieda fil-kapaċitajiet tal-SAF fiċ-Ċina, il-bidla tal-industrija Ċiniża mill-HVO għall-SAF u inqas investimenti fil-produzzjoni tal-SAF fl-Unjoni.

(19)

Neste kkontesta l-esklużjoni tal-SAF mill-ambitu tal-miżuri għar-raġuni li l-SAF huwa interkambjabbli u qiegħed f’kompetizzjoni mal-HVO. Huwa argumenta li kemm l-HVO kif ukoll l-SAF huma bijodiżil ibbażat fuq l-idrokarburi mingħajr kontenut ta’ ossiġenu u l-faċilitajiet tal-HVO jistgħu faċilment jiġu ssettjati għall-produzzjoni tal-HEFA-SPK (12). Kemm l-HVO kif ukoll l-SAF huma, f’livell għoli, tipi ta’ bijodiżils u, għaldaqstant, għandhom l-istess fini fundamentali: biex jintużaw fis-settur tat-trasport mill-utenti finali tal-fjuwils rinnovabbli għat-trasport bit-triq bħala fjuwil awtonomu, jew użati mħallta mad-diżil fossili, bl-istandards EN 590 u EN 15940 li jippermettu l-(HEFA (13))SAF f’taħlitiet. Għal Neste, minn perspettiva teoretika u teknika, l-HEFA-SAF jista’ jitħallat mal-fjuwil għat-trasport bit-triq u jissostitwixxi l-HVO għall-fini tal-fjuwils B7 jew B30, eċċ. mingħajr ebda inkompatibbiltà teknika. Huwa nnota wkoll li, skont il-liġi tad-WTO, mhuwiex meħtieġ li l-prodotti jkunu jistgħu jiġu sostituti perfettament biex ikunu “prodotti simili”.

(20)

Fil-fehma ta’ Neste, l-HVO u l-HEFA-SAF ikunu f’kompetizzjoni sal-punt li d-Direttivi tal-UE dwar l-Enerġija Rinnovabbli (“RED”, Renewable Energy Directives (14)) jipprevedu possibbiltà ta’ inklużjoni fakultattiva għall-Istati Membri biex jużaw l-HEFA-SAF/SAF imħallat biex jissodisfaw il-mandati ta’ taħlit għat-trasport bit-triq.

(21)

Dan ta’ hawn fuq, flimkien mal-esklużjoni tal-SAF mill-miżuri, u l-għażla għall-produtturi Ċiniżi li jużaw 100 % tal-kapaċità tal-produzzjoni tagħhom biex jipproduċu l-HEFA-SAF, allegatament jirriżultaw f’ammont kbir ta’ SAF Ċiniż li jissostitwixxi l-HVO għall-fini tal-mandati ta’ taħlit għat-trasport bit-triq taħt il-kategorija ta’ inklużjoni fakultattiva u tnaqqis sussegwenti fil-produzzjoni tal-FAME, l-HVO u l-HEFA-SAF/SAF imħallat fl-Unjoni. Neste insista fuq il-pjanijiet taċ-Ċina għal investimenti massivi fil-qasam u fuq il-fatt li l-produtturi Ċiniżi tal-HVO li jipproduċu l-HEFA-SAF jistgħu faċilment jimmassimizzaw l-output tal-SAF tagħhom u saħansitra jittrasferixxu l-produzzjoni tagħhom għal din tal-aħħar, peress li ż-żewġ prodotti jiġu mmanifatturati fl-istess faċilità.

(22)

Fil-premessa (40) tar-Regolament proviżorju, il-Kummissjoni rrikonoxxiet il-varjanzi limitati fil-proċess tal-produzzjoni u l-karatteristiċi fiżiċi, kimiċi u tekniċi bażiċi tal-(HEFA)SAF kontra dawk tal-HVO. Madankollu, fid-dawl tal-argumenti ta’ Neste u l-EBB, l-SAF ma jistax realistikament jitqies interkambjabbli mal-bijodiżil bi prezz aktar baxx użat fis-settur tat-trasport bit-triq jew f’kompetizzjoni mal-HVO/FAME. Ta’ min jinnota li Neste stess irrikonoxxa li “bħalissa, il-kanali ta’ distribuzzjoni kummerċjali huma differenti, minħabba l-utenti finali differenti”, li “... bħalissa, l-HEFA-SAF/SAF imħallat huwa prodott għall-użu tal-fjuwil tal-avjazzjoni u l-HVO huwa prodott għall-użu tal-fjuwil għat-trasport bit-triq”, u li l-użu tal-HEFA-SAF għall-fjuwil għat-trasport bit-triq bħalissa ma kienx qed jiġi mfittex b’mod attiv għal raġunijiet kummerċjali. Għalhekk, il-Kummissjoni kkonfermat il-konklużjoni tagħha li bħalissa l-SAF għandu użu differenti u ma jistax jitqies interkambjabbli jew f’kompetizzjoni mal-HVO/FAME u għalhekk jista’ jiġi eskluż mill-ambitu ta’ din l-investigazzjoni.

(23)

Fil-kummenti tiegħu wara d-divulgazzjoni finali, Neste ma qabilx mal-konklużjoni tal-Kummissjoni ta’ hawn fuq. Neste ddikjara wkoll li l-kwotazzjonijiet tad-dikjarazzjonijiet tiegħu fil-premessa (22) hawn fuq amalgamaw elementi li ma kinux jirriflettu l-messaġġ ġenerali tal-parti. Fir-rigward tal-amalgamazzjoni allegata. il-Kummissjoni tenniet il-fehma tagħha li l-parti stess irrikonoxxiet li l-użu tal-HEFA-SAF għal fjuwil għat-trasport bit-triq bħalissa ma kienx qed jiġi imfittex b’mod attiv għal raġunijiet kummerċjali meta Neste kiteb li “filwaqt li l-użu tal-HEFA-SAF għal fjuwil għat-trasport bit-triq bħalissa ma ġiex imfittex b’mod attiv għal raġunijiet kummerċjali, hu irrilevanti għall-fini ta’ din l-analiżi, peress li hu possibbli minn perspettiva teknika.” Il-Kummissjoni qieset il-kwotazzjoni mid-dikjarazzjoni ta’ Neste bħala ugwali għal konferma li bħalissa l-SAF għandu użu differenti mill-HVO/FAME, li jsostni l-konklużjoni ġenerali tal-Kummissjoni fil-premessa (22). Il-Kummissjoni qieset li l-fehmiet diverġenti dwar jekk il-proprjetajiet tekniċi tal-HVO u l-FAME jagħmluhomx adatti jew le għall-użu fl-avjazzjoni (15) ma setgħux ibiddlu l-konklużjoni tagħha.

(24)

Fil-kummenti tiegħu wara d-divulgazzjoni finali, Neste tenna li l-HVO u l-SAF huma oġġetti simili u interkambjabbli għall-finijiet tal-obbligu fir-rigward tat-trasport bit-triq u tenniet il-kummenti miġbura fil-qosor fil-premessi (19)-(21), filwaqt li nnota l-ħtieġa li tiġi protetta l-produzzjoni tal-SAF fl-Unjoni. Neste żied li l-mekkaniżmu ta’ inklużjoni fakultattiva msemmi fil-premessa (20) għamel l-użi finali tal-HVO/FAME u l-SAF de facto l-istess sal-punt li huma biss il-partijiet bl-obbligi fir-rigward tat-trasport bit-triq li jistgħu jitolbu tnaqqis fl-emissjonijiet għall-fini tal-obbligi fir-rigward tat-trasport tat-triq għall-użu tal-SAF. Neste ddikjara li, meta tuża l-SAF, linja tal-ajru setgħet tapplika għal ċertifikat għat-tnaqqis tal-emissjonijiet u tikseb biljetti li mbagħad tbigħ lill-partijiet obbligati bit-triq. Dawn il-partijiet jużaw dawk il-biljetti biex jagħtu prova tat-twettiq tal-obbligu tagħhom ta’ fir-rigward tat-trasport bit-triq. Il-Kummissjoni ma qablitx li din il-prattika tagħmel l-HVO u l-SAF interkambjabbli sal-punt, fil-preżent, li l-SAF fiżiku ma jintużax bħala fjuwil tat-triq, u għalhekk ma jistax jitqies interkambjabbli jew f’kompetizzjoni mal-HVO/FAME. L-SAF huwa kkummerċjalizzat separatament mill-HVO/FAME lil utenti finali differenti, li jsaħħaħ l-applikazzjonijiet differenti tagħhom.

(25)

Fil-kummenti tiegħu wara d-divulgazzjoni finali, Neste allega li l-HVO u l-SAF huma oġġetti simili għar-raġuni li t-tnejn li huma jistgħu jiġu ddikjarati taħt l-istess kodiċi NM, jiġifieri taħt il-kodiċi NM 2710 19 42 il-ġdid għall-fjuwils rinnovabbli. Il-Kummissjoni ċaħdet il-kummenti ta’ Neste peress li l-klassifikazzjoni tal-kodiċi NM ma tbiddilx l-użu distint tal-SAF.

(26)

Fl-istadju proviżorju, il-Kummissjoni ċaħdet l-affermazzjonijiet li l-HVO jenħtieġ li jiġi eskluż mill-ambitu tal-investigazzjoni.

(27)

Wara d-divulgazzjoni proviżorja, EcoCeres tenna li l-HVO jenħtieġ li jiġi eskluż mill-ambitu tal-investigazzjoni billi jirreferi għall-argumenti kkonfutati fir-Regolament proviżorju.

(28)

Wara d-divulgazzjoni proviżorja, is-CCCMC tenniet li l-HVO jenħtieġ li jiġi eskluż mill-ambitu tal-investigazzjoni. Il-parti ddikjarat li l-HVO jirrappreżenta sostitut tad-diżil ta’ kwalità għolja u żvilupp teknoloġiku ġdid (meta mqabbel mal-FAME) u mbagħad tenniet il-kumment fil-premessa (48) tar-Regolament proviżorju li l-HVO għandu karatteristiċi fiżiċi u kimiċi eqreb għad-diżil konvenzjonali minflok l-FAME u l-kumment fil-premessa (53) tar-Regolament proviżorju li l-HVO biss jista’ jintuża f’forma pura fil-magni. Is-CCCMC żiedet li l-FAME ntużaw bħala sostitut tad-diżil teoretikament biss u li l-B100 (16) rari jintuża minflok diżil minħabba l-valur kalorifiku aktar baxx tiegħu (kontenut enerġetiku) u minħabba li, bħala regola, huma meħtieġa modifiki fil-magni għall-B100 (u anke għal taħlitiet b’bijodiżil ogħla minn B7 (17)). Għas-CCCMC, l-użu tal-B100 ikun eċċezzjoni li ma tistax tappoġġja li l-FAME u l-HVO huma interkambjabbli. Dan in-nuqqas ta’ sostituzzjoni jkun appoġġjat aktar mill-fatt li l-feedstocks jinfluwenzaw il-punt limitu tal-filtrabbiltà fil-ksieħ (“CFPP”, cold filter plugging point) tal-FAME iżda mhux is-CFPP tal-HVO. Barra minn hekk, is-CCCMC iddikjarat li l-FAME ma jistgħux jintużaw fl-istaġuni kollha fl-Istati Membri kollha u li l-HVO jenħtieġ li ma jitqabbilx mal-RME (18) (biss), kif sar fir-Regolament proviżorju, iżda wkoll ma’ tipi oħra ta’ bijofjuwils. Is-CCCMC iddikjarat li l-Kummissjoni ma kienet ipprovdiet l-ebda evidenza tad-dikjarazzjoni tagħha li s-suq jirrikonoxxi lill-FAME u l-HVO bħala fjuwils alternattivi sostenibbli għall-magni diżil fis-settur tat-trasport. Is-CCCMC fakkret fil-pożizzjoni tal-Kummissjoni f’tilwima dwar iż-żejt tal-palm mill-Malażja (DS600 (19)) li skontha min iħallat kien mħasseb dwar liema bijofjuwils qed iħallat u mbagħad ikkonkludiet li l-konsumaturi aħħarin kienu mħassba dwar il-feedstocks użati fil-produzzjoni tal-bijofjuwils kif ukoll dwar il-valur tas-CFPP.

(29)

Il-Kummissjoni ċaħdet l-affermazzjonijiet tas-CCCMC hawn fuq. Il-fatt li l-HVO laħaq is-swieq aktar tard mill-FAME huwa irrilevanti. Il-kummenti fil-premessi (48) u (53) tar-Regolament proviżorju ġew indirizzati u miċħuda fl-istess dokument. Fir-rigward tal-allegazzjoni li l-FAME jintużaw b’mod komuni fit-taħlitiet, dan ma jdgħajjifx il-fatt li l-B100 huwa alternattiva reali fis-settur tat-trasport kompatibbli mal-biċċa l-kbira tal-magni EURO VI (20), kif rikonoxxut mill-ispeċjalisti fis-settur tat-trasport infushom. Għall-kuntrarju ta’ dak li nnutat is-CCCMC, mhux dejjem ikunu meħtieġa modifiki fil-magni għal vetturi kompatibbli ma’ kwalunkwe taħlita ogħla minn B7, kif muri pereżempju minn lista twila ta’ vetturi li jistgħu jaħdmu bil-B10 (21) fi Franza. L-FAME huma interkambjabbli mal-HVO peress li l-FAME jistgħu jintużaw fil-forma pura tagħhom u f’taħlitiet fl-istaġuni kollha ladarba s-CFPP tagħhom jiġi kkoreġut b’addittivi u/jew komponenti oħra meta u sa fejn ikun meħtieġ. Anki jekk il-Kummissjoni taqbel li min iħallat huwa mħasseb dwar il-karatteristiċi tal-bijodiżil ittrattat, dan ma jimminax s-sostituzzjoni tal-FAME mal-HVO. Min iħallat jeħtieġlu jiżgura li l-output finali fil-pompa jissodisfa l-istandards u rekwiżiti oħra, iżda xorta jagħraf l-FAME u l-HVO minn kwalunkwe prodott ġeneriku oriġinali (fi proprjetajiet/speċifikazzjonijiet fiżiċi) (22). Il-Kummissjoni nnutat li fit-tilwima DS600, ir-rapport tal-Bord jgħid li l-PME (23), l-RME u l-SBME (jiġifieri l-FAME magħmula miż-żejt tal-palm, miż-żejt tal-lift u miż-żejt tal-fażola tas-sojja, rispettivament), kif ukoll l-HVO magħmul miż-żejt tal-palm, miż-żejt tal-lift u miż-żejt tal-fażola tas-sojja għandhom proprjetajiet u użi finali simili jew l-istess, u huma kkunsidrati sostitwibbli ħafna mill-konsumaturi rilevanti (24). Fir-rigward tal-allegazzjoni li l-konsumaturi aħħarin huma mħassba dwar il-feedstocks u l-valur tas-CFPP, il-Kummissjoni ma qablitx sal-punt li tali informazzjoni ġeneralment ma tkunx disponibbli fl-istazzjonijiet tal-forniment tal-fjuwil.

(30)

Fin-nuqqas ta’ kwalukwe kumment ieħor, il-konklużjonijiet milħuqa fil-premessi (30) sa (57) tar-Regolament proviżorju ġew kkonfermati.

(31)

Fl-14 ta’ Awwissu 2024, il-Kummissjoni infurmat lil Jiaao bl-intenzjoni tagħha li tapplika l-fatti disponibbli skont l-Artikolu 18 tar-Regolament bażiku.

(32)

Fl-ittra dwar l-applikazzjoni tal-Artikolu 18 tar-Regolament bażiku, il-Kummissjoni fakkret li hija kkondividiet ma’ Jiaao r-rapporti ta’ verifika tagħha li jiddeskrivu inter alia l-kwistjonijiet li ltaqgħu magħhom matul il-verifiki fuq il-post. Il-grupp ma esprima l-ebda nuqqas ta’ qbil mal-preżentazzjoni tal-verifiki fuq il-post irreġistrati fir-rapporti ta’ verifika.

(33)

Barra minn hekk, il-Kummissjoni indikat li Jiaao ppreżenta għadd sostanzjali ta’ reviżjonijiet għal diversi tabelli tal-kwestjonarju flimkien mat-tweġiba inizjali għall-kwestjonarju u mat-tweġiba għall-ittra ta’ defiċjenza eżatt qabel il-bidu jew matul il-verifika fuq il-post.

(34)

L-aktar importanti hu li l-Kummissjoni elenkat l-inkonsistenzi li osservat fir-rigward tal-feedstocks irreġistrati fir-rekords kontabilistiċi tal-grupp, li nstabu fid-dokumenti relatati mal-akkwist ta’ dawk il-feedstocks, u rrapportati fit-tweġiba għall-kwestjonarju, b’mod partikolari f’tabelli relatati max-xiri ta’ materja prima, mal-kost tal-produzzjoni u mal-bejgħ tal-prodott lest.

(35)

Is-sottomissjoni tard ta’ informazzjoni riveduta u r-rappurtar inkonsistenti tal-feedstocks fixklu l-investigazzjoni b’mod sinifikanti. Sottomissjoni ta’ informazzjoni riveduta fi stadju tardiv tal-investigazzjoni żammet lill-Kummissjoni milli teżamina kif xieraq id-data sottomessa inkluża analiżi tal-konsistenza interna tal-informazzjoni sottomessa f’diversi partijiet tat-tweġiba għall-kwestjonarju. Il-fatt li l-grupp ma rrappurtax il-feedstocks reali użati fil-produzzjoni tal-bijodiżil, iżda minflok irrapporta fil-biċċa l-kbira dak li deher bħala prodotti semilesti ta’ dik il-produzzjoni għamilha impossibbli għall-Kummissjoni li tagħmel sejbiet dwar jekk il-kodiċijiet għat-tipi ta’ prodotti nħolqux b’mod korrett u konsistenti fit-tabelli użati fil-ħidma tal-valur normali minn naħa waħda u fit-tabella tal-bejgħ min-naħa l-oħra. Barra minn hekk, ma kienx possibbli li jiġi vverifikat jekk il-konsum tal-feedstocks kienx allokat b’mod korrett u konsistenti għal kull tip ta’ prodott. Fl-aħħar nett, għamlet ukoll l-użu tal-kost mingħajr distorsjoni dejjem aktar diffiċli peress li l-kost tal-inputs irrappurtati minn Jiaao kien jikkonsisti fil-kost tal-feedstock u l-kost tal-ipproċessar parzjali f’prodott semilest.

(36)

Fl-aħħar nett, instab li waħda mill-kumpaniji tal-grupp ipprovdiet informazzjoni qarrieqa dwar id-diversi tipi ta’ prodotti mmanifatturati mill-kumpanija. Ċerti prodotti inizjalment ġew irrappurtati bħala prodott taħt investigazzjoni. Madankollu, matul il-verifika fuq il-post, il-kumpanija sostniet li xi wħud mill-prodotti ma setgħux jitqiesu bħala bijodiżil. Kien biss f’dak il-mument li l-Kummissjoni ngħatat stampa sħiħa tal-attivitajiet tal-kumpanija.

(37)

Il-kumpanija kellha l-opportunità li tikkummenta dwar l-intenzjoni tal-Kummissjoni li tapplika l-Artikolu 18 tar-Regolament bażiku.

(38)

Fil-kummenti tiegħu dwar l-ittra tal-Artikolu 18, il-grupp ikkonferma li r-rapport ta’ verifika ddokumenta l-proċess ta’ verifika b’mod leali. Madankollu, sostna li spjega b’mod adegwat ir-raġunijiet għall-inkonsistenzi fir-rappurtar tal-feedstock matul il-verifiki fuq il-post u li ġew aċċettati mit-tim li kien qed jieħu ħsieb il-każ. Jiaao insista li n-nuqqasijiet ma kinux ta’ natura li jikkawżaw diffikultà bla bżonn biex wieħed jasal għal marġnijiet raġonevolment preċiżi tad-dumping u tad-dannu.

(39)

Barra minn hekk, il-grupp fakkar li r-reviżjonijiet ipprovduti eżatt qabel il-bidu tal-verifika fuq il-post ġew sottomessi konformi mal-istruzzjonijiet ta’ qabel il-verifika. Jiaao argumenta wkoll li reviżjonijiet ulterjuri jirriflettu s-sitwazzjoni attwali tal-kumpaniji kif mifhuma mill-Kummissjoni u fuq it-talba tagħha.

(40)

Għalhekk, jenħtieġ li l-Kummissjoni ma tqisx l-informazzjoni riveduta eżatt qabel jew matul il-verifika fuq il-post bħala li tfixkel b’mod sinifikanti l-investigazzjoni.

(41)

Il-Kummissjoni ma qablitx mal-kummenti ta’ Jiaao deskritti fil-premessa (38). Il-grupp tabilħaqq spjega l-modus operandi tiegħu. Madankollu, dan ma rrimedjax l-inkonsistenzi deskritti fil-premessa (35).

(42)

Fir-rigward tal-għoti ta’ informazzjoni riveduta, il-Kummissjoni fakkret li Jiaao ppreżenta 15-il tabella riveduta eżatt qabel il-bidu tal-verifika fuq il-post. Barra minn hekk, anki wara li rċeviet it-tabelli riveduti, il-Kummissjoni kienet obbligata titlob reviżjonijiet ulterjuri minħabba li nstab li l-informazzjoni sottomessa kienet għadha żbaljata. Għalhekk, il-fatt li l-Kummissjoni ġabret l-informazzjoni riveduta u fehmet l-ispjegazzjonijiet ipprovduti mill-grupp ma kienx ifisser li t-tim li kien qed jieħu ħsieb il-każ aċċetta l-informazzjoni sottomessa bħala korretta jew suffiċjenti u ma rrimedjax il-fatt li l-informazzjoni kkoreġuta ġiet sottomessa fi stadju tant tardiv tal-verifika li ma setgħetx tiġi vverifikata u rrikonċiljata aktar mar-rekords tal-grupp kif ukoll mad-data rrappurtata f’partijiet oħra tat-tweġiba għall-kwestjonarju.

(43)

Barra minn hekk, il-marġni tad-dannu jista’ tabilħaqq jiġi kkalkulat peress li t-tipi ta’ prodotti rrappurtati bħala mibjugħa lill-Unjoni nstabu li kienu konsistenti mad-dokumentazzjoni tal-bejgħ sottomessa. Madankollu, dawn kienu parzjalment inkonsistenti mat-tipi ta’ prodotti rrappurtati bħala li ġew prodotti. Il-marġni tad-dumping ġie ddeterminat ukoll għall-grupp. Filwaqt li rrikorriet għad-dispożizzjonijiet tal-Artikolu 18 tar-Regolament bażiku, il-Kummissjoni aġġustat il-kost mingħajr distorsjoni użat biex jissostitwixxi l-kost tal-grupp ta’ feedstocks individwali biex tkopri l-fatt li ġew irrappurtati prodotti semilesti minflok il-feedstocks oriġinali u biex tiġi evitata sottovalutazzjoni tal-valur normali.

(44)

Konsegwentement, il-Kummissjoni qieset li Jiaao ma pprovda l-ebda informazzjoni jew kjarifika addizzjonali li tbiddel il-konklużjonijiet inizjali tal-Kummissjoni dwar l-applikazzjoni tal-fatti disponibbli skont l-Artikolu 18 tar-Regolament bażiku. Il-Kummissjoni kkonfermat l-applikazzjoni tal-fatti disponibbli sa fejn tikkonċerna l-feedstocks irrappurtati minn Jiaao u l-kalkolu tal-kost xieraq mingħajr distorsjoni.

(45)

Il-Kummissjoni rċeviet kummenti dwar id-divulgazzjoni minn qabel u d-divulgazzjoni proviżorja, li kienu jikkonċernaw jew is-sorsi u l-metodoloġija għall-kalkolu tal-kost u tal-profitt mingħajr distorsjoni jew il-kalkoli speċifiċi għall-kumpaniji tal-marġni tad-dumping, mill-produtturi esportaturi kollha inklużi fil-kampjun u mill-ilmentatur. EcoCeres u l-EBB tennew il-kummenti tagħhom f’seduti ta’ smigħ. Barra minn hekk, l-EBB għamel sottomissjoni tard wara li l-iskadenzi kollha għall-kummenti dwar id-divulgazzjoni proviżorja kienu diġà skadew.

(46)

Dawn il-kummenti tal-partijiet interessati, inklużi l-kummenti li waslu tard mill-ilmentatur, ġew indirizzati kif xieraq fit-taqsimiet rispettivi ta’ hawn taħt. Fejn ċerti affermazzjonijiet kienu jikkonċernaw data speċifika għall-kumpanija u ma kinux suxxettibbli għal sommarju mhux kunfidenzjali, tali affermazzjonijiet ġew indirizzati fid-divulgazzjonijiet finali speċifiċi għall-kumpanija.

(47)

Fin-nuqqas ta’ kummenti dwar l-eżistenza ta’ distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku fis-settur tal-bijodiżil, il-Kummissjoni tikkonferma s-sejbiet tagħha f’dan ir-rigward kif elaborat fit-taqsima 3.2.1. tar-Regolament proviżorju.

(48)

Fis-sottomissjoni tiegħu, l-EBB fakkar li huwa ffavorixxa lill-Brażil bħala pajjiż rappreżentattiv, minħabba li s-suq tiegħu ma kienx affettwat minn distorsjonijiet tas-suq. Il-parti tenniet li abbażi tal-għarfien tagħha dwar is-suq, id-dinamika tas-suq Malażjana hija simili għall-Indoneżja b’taxxi fuq l-esportazzjoni imposti tul il-katina tal-valur tal-bijodiżil, prezzijiet fissi tal-bijodiżil domestiku, u s-suq domestiku jiġi allokat permezz ta’ sistema ta’ liċenzji (25). L-EBB akkuża wkoll lil EcoCeres li pprovda informazzjoni qarrieqa lill-Kummissjoni minkejja li kellu għarfien tajjeb tas-suq Malażjan peress li l-produtturi esportaturi għandhom impjant ta’ produzzjoni fil-Malażja.

(49)

L-ilmentatur argumenta li jekk il-Kummissjoni tinsisti fuq il-Malażja bħala pajjiż rappreżentattiv, kien meħtieġ li jiġu aġġustati l-parametri referenzjarji għall-UCO, għall-effluwent mill-mitħna taż-żejt tal-palm (“POME”, palm oil mill effluent), u għall-kostijiet tal-bejgħ, ġenerali u amministrattivi (SG&A, selling, general and administrative) u għall-profitt.

(50)

Il-Kummissjoni rrikonoxxiet li l-ilmentatur iffavorixxa lill-Brażil bħala l-pajjiż rappreżentattiv. L-ewwel nett, il-Kummissjoni diġà indirizzat il-fatt li s-swieq tal-bijodiżil kienu rregolati permezz ta’ miżuri tal-gvernijiet madwar id-dinja, kif ukoll allegazzjonijiet speċifiċi dwar il-Malażja fil-premessi (209) sa (214) tar-Regolament proviżorju. Fir-rigward tal-allegata allokazzjoni tas-suq domestiku lill-produtturi domestiċi permezz ta’ sistema ta’ liċenzji, il-parti ma pprovdiet l-ebda evidenza. Mill-informazzjoni disponibbli għall-Kummissjoni, dawk il-liċenzji ma deherx li kellhom l-għan li s-suq jinqasam bejn għadd limitat ta’ kumpaniji. Dawn kienu pjuttost liċenzji li nħarġu mill-awtoritajiet Malażjani li jawtorizzaw lill-kumpaniji biex iwettqu attivitajiet fil-qasam tal-produzzjoni tal-bijodiżil – sistema mhux differenti mill-awtorizzazzjonijiet li jinħarġu fil-Brażil minn Agência Nacional do Petróleo, Gás Natural e Biocombustíveis (“ANP”) (26).

(51)

It-tieni nett, l-ilmentatur ma ressaq l-ebda evidenza li tissuġġerixxi li l-użu ta’ informazzjoni mill-Brażil jirriżulta f’parametri referenzjarji sostanzjalment differenti għal dawk l-elementi tal-valur normali maħdum li kienu qed jiġu diskussi fid-dettall mill-EBB fid-diversi sottomissjonijiet tiegħu. Pereżempju, il-livell ta’ SG&A u l-profitt tal-produtturi Brażiljani tal-bijodiżil abbażi tal-informazzjoni finanzjarja disponibbli fil-fajl huwa simili għal dak tal-produtturi tal-bijodiżil Malażjani. Bl-istess mod, l-informazzjoni disponibbli għall-pubbliku (27) tindika li l-prezzijiet tal-UCO fil-Brażil matul il-perjodu ta’ investigazzjoni kienu simili għall-parametru referenzjarju użat mill-Kummissjoni fl-istadju proviżorju.

(52)

Il-Kummissjoni sabet li ma kien hemm l-ebda raġuni biex il-Malażja tiġi rrifjutata bħala pajjiż rappreżentattiv. L-affermazzjonijiet tal-EBB speċifiċi għall-parametri referenzjarji individwali ġew indirizzati fit-taqsimiet speċifiċi ta’ hawn taħt.

(53)

Wara d-divulgazzjoni proviżorja, EcoCeres u Zhuoyue ppreżentaw kummenti dwar il-kalkolu tal-kost mingħajr distorsjoni tal-UCO u tal-POME. B’mod partikolari, il-partijiet sostnew li l-esklużjoni tal-importazzjonijiet li joriġinaw mill-Indoneżja ma kinitx ġustifikata.

(54)

F’dan ir-rigward, Zhuoyue argumenta li s-sempliċi eżistenza ta’ taxxa fuq l-esportazzjoni ma ġġeneratx distorsjoni fil-prezz awtomatikament u l-Kummissjoni naqset milli tipprovdi evidenza ta’ tali distorsjoni. Biex jappoġġja dan l-argument, il-grupp ipprovda eżempji ta’ prezzijiet tal-importazzjoni tal-UCO u tal-POME li joriġinaw mill-Indoneżja li huma simili għall-prezzijiet tal-importazzjoni taż-żewġ feedstocks b’oriġini f’xi pajjiżi oħra. Il-grupp tenna din l-affermazzjoni fil-kummenti tiegħu wara d-divulgazzjoni finali.

(55)

EcoCeres indika b’mod simili li s-sempliċi eżistenza ta’ taxxa fuq l-esportazzjoni mhijiex biżżejjed biex jiġi konkluż li kien hemm distorsjoni fil-prezz tal-esportazzjoni Indoneżjan tal-UCO u tal-POME. Barra minn hekk, għamel referenza għal investigazzjonijiet preċedenti (28) fejn il-prezz tal-esportazzjoni taż-żejt tal-palm mhux raffinat (“CPO”, crude palm oil) u taż-żejt tal-lewż tal-palm mhux raffinat (“CPKO”, crude palm kernel oil), li t-tnejn kienu soġġetti għal taxxa fuq l-esportazzjoni fl-Indoneżja, tqies bħala parametru referenzjarju xieraq li jirrifletti l-prezz tas-suq.

(56)

Il-Kummissjoni osservat li normalment l-eżistenza ta’ taxxa fuq l-esportazzjoni taffettwa primarjament il-prezz domestiku tal-oġġetti rispettivi, jiġifieri l-prezz tal-UCO u tal-POME fis-suq domestiku Indoneżjan. Madankollu, wara l-perjodu ta’ investigazzjoni taż-żewġ investigazzjonijiet ikkwotati (Ottubru 2017 – Settembru 2018 għall-investigazzjoni antisussidji li tikkonċerna l-bijodiżil li joriġina mill-Indoneżja, Ottubru 2020 – Settembru 2021 għall-investigazzjoni anti-dumping dwar aċidi grassi li joriġinaw mill-Indoneżja), l-ambjent leġiżlattiv li jikkonċerna ż-żejt tal-palm u d-derivattivi tiegħu fl-Indoneżja nbidel. Jiġifieri, fil-perjodu direttament qabel u li jikkoinċidi parzjalment mal-perjodu ta’ investigazzjoni ta’ dan il-każ, il-Gvern tal-Indoneżja introduċa sensiela ta’ bidliet leġiżlattivi puntwali (eż. projbizzjoni fuq l-esportazzjoni f’April u Mejju 2022 (29) (30), sospensjoni tat-taxxa fuq l-esportazzjoni sa Ottubru 2022 (31) (32), introduzzjoni ta’ mekkaniżmu li jaġġusta l-livell tat-taxxa fuq l-esportazzjoni abbażi tal-evoluzzjoni tal-prezzijiet globali tas-CPO f’Awwissu 2022 (33), tnaqqis tal-limitu li jippermetti żieda fit-taxxa fuq l-esportazzjoni (34)) li potenzjalment affettwa s-suq taż-żejt tal-palm u d-derivattivi tiegħu, inklużi l-POME u l-UCO (35). Ma setax jiġi eskluż li dawn il-bidliet leġiżlattivi frekwenti kkawżaw mill-inqas ċaqliq u/jew distorsjonijiet temporanji li affettwaw kemm il-prezzijiet domestiċi kif ukoll dawk tal-esportazzjoni mill-Indoneżja, u b’hekk dawn il-prezzijiet ma kinux xierqa biex jintużaw bħala parametru referenzjarju f’dawn il-perjodi f’dawn iċ-ċirkostanzi speċifiċi u għall-fini tal-applikazzjoni tal-Artikolu 2(6a) tar-Regolament bażiku.

(57)

Barra minn hekk, ta’ min jinnota li l-parametri referenzjarji użati fiż-żewġ investigazzjonijiet imsemmija minn EcoCeres u f’din l-investigazzjoni jaqdu fini ekonomiku differenti u jaqgħu taħt qafas legali differenti li għandu kuntest u fini differenti. Fl-investigazzjoni antisussidji dwar l-importazzjonijiet tal-bijodiżil li joriġinaw mill-Indoneżja, il-kuntest kien l-istabbiliment ta’ parametru referenzjarju għall-kwantifikazzjoni tal-benefiċċju għall-produtturi. Il-fini tal-parametru referenzjarju kien li jiġi ddeterminat il-prezz li kien ikun prevalenti fl-Indoneżja fin-nuqqas tal-iskemi ta’ sussidju fis-seħħ matul il-perjodu ta’ investigazzjoni ta’ dik l-investigazzjoni li kien Ottubru 2017–Settembru 2018. Għalhekk, it-tip differenti ta’ proċediment (tal-ewwel li jikkonċerna s-sussidji), il-qafas legali u l-kuntest differenti, kif ukoll il-perjodi ta’ żmien rilevanti differenti, jimminaw l-argument li sar mill-parti. Fir-rigward tal-investigazzjoni anti-dumping dwar l-aċidi grassi li joriġinaw mill-Indoneżja, il-Kummissjoni eżaminat jekk il-materja prima soġġetta għal taxxa fuq l-esportazzjoni tissodisfax il-kriterji dwar is-sehem tagħha fuq il-kost tal-produzzjoni skont l-Artikolu 7(2a) tar-Regolament bażiku. Għal darba oħra, il-perjodu ta’ investigazzjoni kien differenti f’dak il-każ (Ottubru 2020–Settembru 2021). Barra minn hekk, f’dik l-investigazzjoni speċifika, il-Kummissjoni serħet ukoll fuq diversi parametri referenzjarji oħra sabiex teżamina li l-kriterji rilevanti li jivverifikaw il-preżenza ta’ distorsjonijiet fil-materja prima skont dik d-dispożizzjoni differenti tar-Regolament bażiku ġew issodisfati. Fl-investigazzjoni inkwistjoni, il-fini tal-eżerċizzju huwa li jiġi ddeterminat prezz mingħajr distorsjoni tal-POME u tal-UCO kif prevalenti f’pajjiż ieħor għajr l-Indoneżja, jiġifieri l-Malażja bħala pajjiż rappreżentattiv xieraq, skont l-Artikolu 2(6a)(a) tar-Regolament bażiku. Il-Kummissjoni nnutat li EcoCeres ma ppreżenta l-ebda evidenza li turi li l-prezzijiet Indoneżjani ma kinux affettwati mid-diversi bidliet leġiżlattivi introdotti mill-Gvern tal-Indoneżja, u li, għaldaqstant kienu, biċ-ċertezza kollha xierqa li jintużaw bħala parametru referenzjarju xieraq skont it-tifsira tal-Artikolu 2(6a)(a) tar-Regolament bażiku.

(58)

Fl-aħħar nett, tqabbil tal-prezz tal-importazzjoni tal-POME u tal-UCO ta’ oriġini Indoneżjana mal-prezzijiet tal-POME u tal-UCO ta’ oriġini ta’ pajjiżi terzi oħra jista’ ma jkunx konklużiv peress li l-prezzijiet huma influwenzati minn ħafna fatturi, bħad-distanza mill-pajjiż ta’ oriġini, il-kwantità ta’ vjeġġi/kuntratti individwali, il-perjodu meta l-oġġetti jiġu kkonsenjati.

(59)

Konsegwentement, il-Kummissjoni ma aċċettatx l-affermazzjonijiet tal-partijiet deskritti fil-premessi (53) sa (55) u kkonfermat l-esklużjoni tal-oriġini Indoneżjana għall-kalkolu tal-kost mingħajr distorsjoni tal-UCO u tal-POME.

(60)

Barra minn hekk, EcoCeres fakkar li pprovda lill-Kummissjoni prezzijiet internazzjonali tal-UCO u l-POME kif miġbura minn Argus Biofuels. Il-parti tenniet li ppreżentat din l-informazzjoni fid-dawl tal-kwantitajiet pjuttost limitati ta’ importazzjoni ta’ dawn iż-żewġ feedstocks importanti fil-pajjiżi rappreżentattivi potenzjali analizzati (bl-eċċezzjoni tal-Malażja), kif ukoll il-fatt li n-nomenklaturi doganali tal-biċċa l-kbira tal-pajjiżi rappreżentattivi potenzjali (bl-eċċezzjoni tal-Malażja) ma ppermettewx li jiġu identifikati oġġetti li jkunu simili għall-feedstocks peress li l-kodiċijiet SA rispettivi koprew varjetà wiesgħa ta’ oġġetti. EcoCeres argumenta li l-fatt li ma kienx possibbli li tiġi vverifikata l-oriġini tal-UCO u tal-POME inklużi fil-prezzijiet internazzjonali minn Argus Biofuels mhuwiex raġuni suffiċjenti biex jiġu rrifjutati l-parametri referenzjarji bħala sors ta’ kost mingħajr distorsjoni. Il-parti rreferiet għal diversi investigazzjonijiet preċedenti (36) fejn il-Kummissjoni użat parametri referenzjarji internazzjonali li jikkwotaw prezz ta’ input kif ikkonsenjat f’port fiċ-Ċina jew fejn il-Kummissjoni ma wettqet l-ebda analiżi biex tiżgura li l-parametru referenzjarju internazzjonali ma kienx jinkludi inputs ta’ oriġini Ċiniża.

(61)

L-ewwel nett, il-Kummissjoni fakkret li r-raġuni primarja għan-nuqqas ta’ użu tal-parametri referenzjarji internazzjonali minn Argus Biofuels kienet li dawn kienu protetti mid-drittijiet tal-awtur u l-parti ma kisbitx permess mis-sid tad-drittijiet tal-awtur biex id-data tintuża fl-investigazzjoni. It-tieni nett, f’dan il-każ, il-Kummissjoni stabbiliet li madwar id-dinja r-RPĊ hija l-fornitur ewlieni tal-UCO u l-Indoneżja hija waħda mill-fornituri ewlenin tal-POME. Għalhekk, il-fatt li l-prezzijiet tal-feedstocks inkwistjoni nstabu li kellhom distorsjoni f’dawk il-pajjiżi ta’ oriġini ma jistax jiġi injorat meta jintgħażel l-aktar sors xieraq ta’ kost mingħajr distorsjoni. Konsegwentement, l-affermazzjoni ma ġietx aċċettata.

(62)

Wara d-divulgazzjoni proviżorja u fis-sottomissjoni tiegħu, l-EBB filwaqt li appoġġja d-deċiżjoni tal-Kummissjoni li teskludi l-UCO u l-POME ta’ oriġini Indoneżjana mill-kalkolu tal-kost mingħajr distorsjoni abbażi tad-data tal-importazzjoni Malażjana tenna s-suġġeriment tiegħu li jintużaw il-prezzijiet tal-importazzjoni lejn l-Istati Uniti bħala s-sors tal-kost mingħajr distorsjoni tal-UCO u tal-POME minflok id-data tal-importazzjoni Malażjana. Biex isostni l-affermazzjoni tiegħu, l-EBB ippreżenta li:

(63)

Il-Kummissjoni spjegat li ma hemm l-ebda limitu preċiż f’termini ta’ kwantità li jagħmel l-importazzjonijiet ta’ ċertu input sors mhux affidabbli ta’ kost mingħajr distorsjoni. Il-konsum tal-produtturi esportaturi jista’ tabilħaqq jitqies bħala indikatur ta’ liema kwantità tista’ tiġi miċħuda bħala mhux rappreżentattiva biżżejjed. F’dan il-każ, il-kwantitajiet totali tal-importazzjonijiet Malażjani tal-UCO u tal-POME wrew li s-suq fil-Malażja uża dawn iż-żewġ feedstocks b’mod estensiv biex jipproduċi l-bijodiżil. Il-kwantitajiet assoluti wara l-esklużjoni tal-oriġini Indoneżjana ma tqisux daqshekk baxxi li jirriżultaw f’distorsjoni fil-prezzijiet unitarji tal-importazzjoni. Peress li s-sehem tal-POME importat fil-Malażja mill-Indoneżja kien sostanzjali, sabiex jiġi żgurat li tali volum ma influwenzax il-prezzijiet tal-importazzjonijiet li jifdal, il-Kummissjoni wettqet tqabbil tal-prezzijiet. It-tqabbil tal-prezzijiet żvela li l-prezzijiet tal-importazzjonijiet li jifdal ma kinux allinjati mal-prezzijiet tal-importazzjonijiet mill-Indoneżja. Tqabbil simili sar għall-importazzjonijiet tal-POME, fejn il-proporzjon tal-importazzjonijiet mill-Indoneżja kien ferm aktar baxx. It-tqabbil tal-prezzijiet bejn l-importazzjonijiet Indoneżjani u oħrajn żvela li l-prezzijiet tal-importazzjonijiet minn oriġini oħra wkoll ma kinux affettwati mill-prezzijiet tal-importazzjonijiet Indoneżjani.

(64)

Għalhekk, ma kienx hemm bżonn ta’ parametru referenzjarju alternattiv. Fi kwalunkwe każ, l-importazzjonijiet lejn l-Istati Uniti ma jkunux sors xieraq ta’ prezzijiet, kostijiet u parametri referenzjarji internazzjonali, b’mod partikolari fir-rigward tal-UCO. L-ewwel nett, il-valuri u l-volumi tal-importazzjoni pprovduti mill-EBB koprew il-kodiċi SA 1518 00 sħiħ. Għalkemm il-parti ppreżentat id-data bħala importazzjonijiet taħt żewġ kodiċijiet tal-merkanzija bi tmien ċifri, il-Kummissjoni sabet li ma kien hemm l-ebda kodiċi ieħor inkluż fin-nomenklatura doganali tal-Istati Uniti taħt il-kodiċi SA 1518 00 . Għalhekk, l-EBB għal darba oħra ppreżenta l-importazzjonijiet ta’ firxa sħiħa ta’ diversi xaħmijiet u żjut tal-annimali u veġetali, inklużi potenzjalment l-importazzjonijiet tal-bijodiżil, bħala sors xieraq ta’ kost mingħajr distorsjoni. Il-Kummissjoni kienet diġà spjegat (fl-Ewwel u t-Tieni Noti dwar is-sorsi għall-kalkolu tal-valur normali, imfakkra fil-premessi (223), (224), (227), (228), (233) u (234) tar-Regolament proviżorju) li tali approċċ mhuwiex aċċettabbli, b’mod partikolari għal input li jirrappreżenta sehem kbir tal-kost tal-produzzjoni tal-bijodiżil u meta teżisti data xierqa aktar preċiża u faċilment disponibbli f’pajjiż rappreżentattiv.

(65)

It-tieni nett, il-ħtieġa li ssir distinzjoni bejn xaħmijiet u żjut li jittieklu u li ma jittiklux ġiet indirizzata wkoll fl-Ewwel u t-Tieni noti dwar is-sorsi għall-kalkolu tal-valur normali, fil-premessi (223), (224), (227), (228), (233) u (234) tar-Regolament proviżorju. Kif innota ġustament l-EBB, l-UCO huwa prodott ta’ skart. Għalhekk, ma jkunx korrett li wieħed jassumi li l-prezz medju tal-importazzjonijiet kollha ta’ xaħmijiet u żjut tal-annimali u veġetali taħt il-kodiċi SA 1518 00 kien jirrifletti l-prezz mingħajr distorsjoni tal-UCO. Il-Kummissjoni qieset li t-tnaqqis fl-għażla tal-kodiċijiet tal-merkanzija għal kodiċijiet bħal dawn li jkopru l-importazzjoni ta’ żjut li jittieklu, jippermetti li jiġi identifikat prezz tal-importazzjoni li jkun eqreb għall-prezz attwali tal-UCO. Il-Kummissjoni ma setgħet tieħu l-ebda pożizzjoni fir-rigward tal-kwantitajiet allegatament suspettużi ta’ UCO importat u esportat peress li ma kienx ċar kif twettqet din l-analiżi.

(66)

Fl-aħħar nett, kif indikat ukoll b’mod korrett minn EcoCeres fis-sottomissjoni ta’ kontroargument tiegħu, id-differenzi fil-kwantitajiet u fil-prezzijiet tal-UCO importat jirriżultaw mill-fatt li filwaqt li d-data dwar l-importazzjoni inkluża fl-Ewwel Nota kopriet diversi pajjiżi rappreżentattivi potenzjali, fit-Tieni Nota u fid-divulgazzjoni minn qabel kienet limitata għall-Malażja bħala l-pajjiż rappreżentattiv magħżul.

(67)

Konsegwentement, il-Kummissjoni ma aċċettatx l-affermazzjonijiet tal-EBB deskritti fil-premessa (62).

(68)

Wara d-divulgazzjoni proviżorja, Zhuoyue tenna li l-Kummissjoni ma kellhiex tinkludi l-kodiċi tal-merkanzija 3823 19 90 fil-kalkolu tal-kost mingħajr distorsjoni tal-grass kannella (“BG”, brown grease), tal-iskart tal-ikel u tal-istokk tas-sapun (38). Il-grupp argumenta li peress li l-kodiċi tal-merkanzija msemmi hawn fuq jirreferi fost l-oħrajn għal “Oħrajn għajr żjut aċidużi mir-raffinar, […]”, dan jenħtieġ li jiġi eskluż mill-kalkolu tal-parametru referenzjarju peress li l-BG, l-iskart tal-ikel u l-istokk tas-sapun huma żjut aċidużi miksuba mir-raffinar tal-fdalijiet tal-iskart. Fl-aħħar nett, Zhuoyue rrimarka li l-valur unitarju tal-importazzjonijiet taħt il-kodiċi tal-merkanzija inkwistjoni huwa ogħla mill-kost mingħajr distorsjoni ddeterminat għall-UCO. Skont il-kumpanija dan juri li l-kodiċi tal-merkanzija 3823 19 90 jenħtieġ li ma jintużax għall-parametru referenzjarju għall-BG, għall-iskart tal-ikel u għall-istokk tas-sapun peress li l-UCO huwa feedstock ta’ kwalità ogħla (kontenut aktar baxx ta’ aċidi grassi ħielsa) u, għaldaqstant, naturalment jenħtieġ li jkun iqum aktar flus.

(69)

Il-Kummissjoni nnutat li l-BG, l-iskart tal-ikel u l-istokk tas-sapun mhux neċessarjament jirrappreżentaw żjut aċidużi raffinati. Dawn huma pjuttost oġġetti ta’ skart, li meta jitqies il-kontenut tagħhom ta’ aċidi grassi ħielsa jixbhu l-aktar oġġetti kklassifikati taħt il-kodiċi SA 3823 19 . Sabiex tidentifika kodiċijiet tal-merkanzija xierqa biex jiddeterminaw il-kost mingħajr distorsjoni tal-BG, tal-iskart tal-ikel, tal-istokk tas-sapun, u tal-SBEO (spent bleaching earth oil) għal dik il-kwistjoni, il-Kummissjoni neħħiet mill-kunsiderazzjoni l-kodiċijiet tal-merkanzija li jaqgħu taħt il-kodiċi SA 3823 19 li jkopru oġġetti bbażati fuq il-palm. Il-kodiċi tal-merkanzija 3823 19 90 huwa kodiċi li jifdal li jinkludi oġġetti li jaqgħu taħt il-kodiċi SA speċifiku iżda mhux ikklassifikati taħt xi wieħed mill-kodiċijiet korrispondenti tal-merkanzija bi tmien ċifri. Fl-istess ħin, jeskludi oġġetti relatati mal-palm.

(70)

Barra minn hekk, il-Kummissjoni ma tikkontestax li meta jitqies il-kontenut aktar baxx tiegħu ta’ aċidi grassi ħielsa, l-UCO huwa feedstock ta’ kwalità ogħla mill-BG, mill-iskart tal-ikel jew mill-istokk tas-sapun. Madankollu, il-grupp qabbel il-prezz unitarju tal-importazzjoni ta’ kodiċi wieħed tal-merkanzija mal-prezz medju tal-importazzjoni tal-kodiċijiet tal-merkanzija kollha użati biex jiġi ddeterminat il-kost mingħajr distorsjoni tal-UCO. Il-valur tal-parametru referenzjarju użat għall-UCO kien madankollu ogħla minn dak użat għall-BG, għall-iskart tal-ikel u għall-istokk tas-sapun. Għaldaqstant, il-parametri referenzjarji użati mill-Kummissjoni fl-istadju proviżorju ma kkontradewx is-suppożizzjoni li l-prezz tal-UCO normalment jenħtieġ li jkun ogħla mill-prezz tal-feedstocks l-oħra msemmija.

(71)

Konsegwentement, il-Kummissjoni ma aċċettatx l-affermazzjoni ta’ Zhuoyue deskritta fil-premessa (68) u kkonfermat is-sejbiet tagħha fil-premessa (240) tar-Regolament proviżorju.

(72)

Wara d-divulgazzjoni proviżorja, EcoCeres argumenta li l-aġġustament għall-kost mingħajr distorsjoni tal-idroġenu kif applikat mill-Kummissjoni fl-istadju proviżorju ma kienx xieraq. L-aġġustament wassal għal żieda fil-valur tal-parametru referenzjarju. Madankollu, is-sors tal-kost tal-Malażja tal-idroġenu kien jikkorrispondi għall-idroġenu ekoloġiku għall-użu tal-fjuwil. Għalhekk, kwalunkwe aġġustament għall-idroġenu (mhux ekoloġiku) għall-użu industrijali jenħtieġ li jnaqqas il-valur tal-parametru referenzjarju. Il-grupp issuġġerixxa bidla fil-metodoloġija applikata mill-Kummissjoni fl-istadju proviżorju.

(73)

Il-Kummissjoni ma kkontestatx il-ħtieġa li l-prezz tal-idroġenu tal-fjuwil jiġi aġġustat għall-prezz tal-idroġenu għall-użu industrijali. Fl-istadju proviżorju, il-Kummissjoni użat l-istatistika miġbura mis-Sħubija għall-Idroġenu Nadif għal tali aġġustament. Wara l-kummenti ta’ EcoCeres, il-Kummissjoni aġġustat parzjalment il-metodoloġija tagħha biex tiddetermina l-aġġustament. Il-metodoloġija ġiet żvelata lill-partijiet interessati fin-Nota riveduta dwar il-metodoloġija għall-kalkolu tal-kostijiet u tal-profitt mingħajr distorsjoni fil-qafas tad-divulgazzjoni finali. Il-kost rivedut mingħajr distorsjoni tal-idroġenu ntuża fil-kalkolu tal-marġni tad-dumping tal-grupp fl-istadju definittiv.

(74)

Wara d-divulgazzjoni finali, EcoCeres laqa’ l-fatt li l-Kummissjoni rrevediet parzjalment il-metodoloġija tagħha biex taġġusta l-prezz tal-idroġenu tal-fjuwil għal-livell tal-prezz tal-idroġenu industrijali. Madankollu, hu argumenta wkoll li l-aġġustament ’l isfel għandu jkun aktar sinifikanti. Biex jappoġġa l-affermazzjoni tiegħu, EcoCeres irrefera għal stħarriġ mill-Amministrazzjoni tal-Informazzjoni dwar l-Enerġija tal-Istati Uniti (“EIA, Energy Information Administration”) (39), li wera li l-prezz tax-xiri tal-idroġenu użat mill-produtturi tas-sustanzi kimiċi kien l-aktar baxx fost is-setturi kollha tal-manifattura eżaminati u ferm aktar baxx mill-ogħla prezz imħallas mill-produtturi tat-tagħmir, tal-apparati u tal-komponenti elettriċi.

(75)

Il-Kummissjoni eżaminat l-affermazzjoni u sabet is-sejbiet tal-EIA mill-inqas inkonklużivi għall-fini tad-determinazzjoni tal-kost mingħajr distorsjoni tal-idroġenu (industrijali). L-artiklu ppubblikat mill-EIA abbażi tad-data miġbura ma jagħmilx distinzjoni bejn il-fjuwil u l-idroġenu industrijali. Fl-istess ħin, id-data sottostanti (40) tikkonċerna l-prezzijiet medji tas-sorsi tal-enerġija mixtrija, u għalhekk x’aktarx tirreferi għall-idroġenu tal-fjuwil. Konsegwentement, il-Kummissjoni ċaħdet l-affermazzjoni.

(76)

Wara d-divulgazzjoni finali, l-EBB sostna li l-Kummissjoni użat il-kost mingħajr distorsjoni deflatat tal-idroġenu bħala riżultat tal-fatt li ma kkalkulatx il-prezz medju tax-xiri mill-istatistika tas-Sħubija għall-Idroġenu Nadif abbażi ta’ medja ponderata.

(77)

Il-Kummissjoni ma qablitx. L-istatistika mis-Sħubija għall-Idroġenu Nadif ma ġietx ippreżentata bħala sett ta’ punti ta’ data individwali, iżda bħala għadd ta’ osservazzjonijiet f’diversi intervalli tal-prezzijiet. Il-Kummissjoni kkalkulat medja ponderata tal-limitu ’l fuq u ’l isfel tal-intervalli, u sussegwentement iddeterminat punt tan-nofs bħala medja sempliċi. Il-Kummissjoni qieset li dan il-metodu kien l-aktar xieraq fir-rigward tas-sett ta’ data disponibbli. Konsegwentement, il-Kummissjoni ċaħdet l-affermazzjoni.

(78)

Wara d-divulgazzjoni proviżorja, l-EBB indika li l-prezzijiet tal-elettriku u tal-gass naturali użati mill-Kummissjoni ġew implimentati fil-Malażja fl-2014 u fl-2021 rispettivament. Il-parti fakkret li f’investigazzjoni preċedenti (41) fejn il-Kummissjoni użat l-istess sorsi ta’ kostijiet mingħajr distorsjoni tal-elettriku u tal-gass naturali fil-Malażja bħala pajjiż rappreżentattiv, hija aġġustat il-prezzijiet għall-inflazzjoni.

(79)

Il-Kummissjoni eżaminat l-affermazzjoni u kkonkludiet li tabilħaqq b’mod involontarju ħalliet barra l-aġġustament tal-inflazzjoni f’dan il-każ. Il-Kummissjoni użat l-indiċi tal-prezzijiet tal-produtturi (“PPI”, producer price index) biex tikkalkula l-kost rivedut mingħajr distorsjoni tal-elettriku u tal-gass naturali. Peress li l-kost mingħajr distorsjoni tal-fwar ġie kkalkulat abbażi tal-kost mingħajr distorsjoni tal-gass naturali, il-parametru referenzjarju tiegħu ġie rivedut ukoll wara r-reviżjoni li tikkonċerna l-gass naturali.

(80)

Wara d-divulgazzjoni finali, EcoCeres argumenta li l-Kummissjoni ma kellhiex tuża l-PPI għall-aġġustament tal-inflazzjoni peress li kien ġenerali żżejjed meta wieħed iqis li indiċi tal-prezzijiet speċifiku għall-enerġija kien disponibbli fil-bażi tad-data tal-Bank Dinji (42) użata mill-Kummissjoni. Barra minn hekk, l-aġġustament tal-inflazzjoni ma ġiex ikkalkulat speċifikament għall-perjodu ta’ investigazzjoni, li kien mifrux fuq sentejn, peress li l-PPI użat mill-Kummissjoni kopra snin kalendarji sħaħ. EcoCeres indika li l-indiċi tal-prezzijiet tal-enerġija kellu data disponibbli għal kull xahar u b’hekk kien possibbli li jiġi ddeterminat l-aġġustament speċifikament għall-perjodu ta’ investigazzjoni.

(81)

Il-Kummissjoni eżaminat l-affermazzjoni u sabet li tabilħaqq, il-bażi tad-data tal-Bank Dinji dwar l-inflazzjoni kien fiha indiċi tal-prezzijiet tal-enerġija għall-Malażja u għall-perjodu meħtieġ għall-aġġustament tal-inflazzjoni. Madankollu, l-indiċi tal-prezzijiet tal-enerġija għall-Malażja kien ibbażat fuq il-prezzijiet stmati. Għalhekk, f’dan il-każ ma kienx neċessarjament sors ta’ informazzjoni aktar affidabbli jew xieraq dwar l-inflazzjoni fil-Malażja. Konsegwentement, il-Kummissjoni ċaħdet l-affermazzjoni.

(82)

Madankollu, il-Kummissjoni qieset il-fatt li l-aġġustament tal-inflazzjoni mwettaq fid-divulgazzjoni finali ma kienx imfassal speċifikament għall-perjodu ta’ investigazzjoni, b’mod partikolari peress li l-PPI kien disponibbli wkoll fuq bażi trimestrali. Il-kost mingħajr distorsjoni tal-elettriku, tal-gass naturali u tal-fwar ġie rivedut aktar bl-użu ta’ aġġustament rivedut tal-inflazzjoni wara l-kummenti ta’ EcoCeres dwar id-divulgazzjoni finali. Ecoceres u l-partijiet interessati ġew infurmati bl-aġġustament rivedut tal-inflazzjoni f’divulgazzjoni addizzjonali u ngħataw l-opportunità li jikkummentaw.

(83)

Wara d-divulgazzjoni finali addizzjonali, EcoCeres tenna li l-Kummissjoni kellha tuża l-indiċi tal-prezzijiet tal-enerġija minflok il-PPI. Barra minn hekk, fil-kalkolu tal-aġġustament tal-inflazzjoni għall-gass naturali, il-Kummissjoni kellha tuża r-raba’ trimestru tal-2021 bħala l-punt tat-tluq minflok is-sena sħiħa tal-2021 peress li l-prezz tal-gass naturali użat bħala parametru referenzjarju kien applikabbli fil-Malażja f’dak it-trimestru.

(84)

Il-Kummissjoni ċaħdet l-affermazzjonijiet. L-ewwel nett, EcoCeres ma pprovda l-ebda ġustifikazzjoni jew raġunament addizzjonali għall-użu tal-indiċi tal-prezzijiet tal-enerġija fuq il-PPI. It-tieni nett, il-Kummissjoni sabet li l-użu tal-PPI għas-sena sħiħa 2021 kien aktar xieraq. Il-perjodu ta’ investigazzjoni kopra sena sħiħa u għalhekk, l-aġġustament tal-inflazzjoni ġie kkalkulat billi tqabbel l-indiċi tal-prezzijiet għal perjodu ta’ erba’ trimestri ma’ perjodu preċedenti tal-istess tul.

(85)

Fil-kummenti tiegħu dwar id-divulgazzjoni minn qabel, EcoCeres ippreżenta tliet affermazzjonijiet dwar il-kost lavorattiv mingħajr distorsjoni. Il-grupp tenna l-affermazzjonijiet tiegħu wara d-divulgazzjoni proviżorja:

(86)

L-ewwel nett, abbażi tal-informazzjoni li nġabret matul il-verifiki fuq il-post, il-Kummissjoni stabbilixxiet li l-biċċa l-kbira tal-persunal li jaħdem fil-produzzjoni (eż. kmamar ta’ kontroll, laboratorji) kellu edukazzjoni tal-kulleġġ, li tikkorrispondi għal edukazzjoni terzjarja mingħajr lawrja universitarja, jiġifieri taħt il-livell ta’ lawrja ta’ baċellerat. Skont il-Klassifika Standard tal-Impjiegi tal-Malażja (43), l-impjiegi li jeħtieġu, inter alia, edukazzjoni terzjarja li twassal għal ċertifikat mhux ekwivalenti għall-ewwel grad (jiġifieri lawrja ta’ baċellerat) huma kklassifikati fil-grupp ta’ “tekniċi u professjonisti assoċjati”. Għalhekk, il-Kummissjoni qieset li kien xieraq li tuża d-data għat-tekniċi u għall-professjonisti assoċjati fil-Malażja bħala l-kost lavorattiv mingħajr distorsjoni.

(87)

It-tieni nett, is-sit web tal-ILMIA jipprovdi informazzjoni dwar l-Indiċjar Nazzjonali tal-Pagi sa Settembru 2018 biss. Madankollu, il-kost lavorattiv kellu jiġi aġġustat għall-inflazzjoni għall-perjodu tal-2016 – 2023. Għalhekk, il-Kummissjoni kkonfermat li kien xieraq li jintuża l-indiċi tal-prezzijiet tal-produtturi għall-fini tal-aġġustament tal-inflazzjoni.

(88)

Fl-aħħar nett, il-Kummissjoni qieset li l-kalkolu tal-kost lavorattiv fis-siegħa fil-Malażja kien preċiż biżżejjed meta jitqies il-fatt li l-manodopera kkontribwiet għall-kost totali tal-produzzjoni b’inqas minn 1,7 % u li kalkolu mill-ġdid tal-parametru referenzjarju bbażat fuq is-suġġeriment tal-gruppi deskritt fil-punt (c) tal-premessa (85) ikollu impatt negliġibbli fuq il-valur normali maħdum.

(89)

Meta jitqiesu r-raġunijiet elaborati fil-premessi (86) sa (88), il-Kummissjoni ma aċċettatx l-affermazzjonijiet ta’ EcoCeres deskritti fil-premessa (85) u kkonfermat is-sejbiet fil-premessa (270) tar-Regolament proviżorju.

(90)

Wara d-divulgazzjoni finali, EcoCeres tenna li l-kost lavorattiv mingħajr distorsjoni użat fil-kalkolu tad-dumping jenħtieġ li jiġi applikat b’mod proporzjonali abbażi tal-livell ta’ edukazzjoni u/jew ta’ ħiliet tal-persunal li jirrifletti l-affermazzjoni deskritta fil-premessa (85)(a).

(91)

Barra minn hekk, EcoCeres indika li l-kost lavorattiv mingħajr distorsjoni fil-Malażja użat mill-Kummissjoni fid-divulgazzjoni finali ma kienx affidabbli peress li kien ibbażat (a) fuq informazzjoni skaduta li kienet teħtieġ aġġustament għall-inflazzjoni, (b) fuq sors li jipprovdi informazzjoni dwar il-kost lavorattiv b’mod ġenerali żżejjed mingħajr ma ssir distinzjoni skont is-settur industrijali u l-attività ekonomika. Barra minn hekk, l-aġġustament tal-inflazzjoni ma ġiex determinat għal perjodu li jikkorrispondi preċiżament għall-perjodu ta’ investigazzjoni. Fl-aħħar nett, il-kumpanija argumentat li l-użu ta’ żewġ sorsi differenti għall-kost lavorattiv (l-Istitut Malażjan tal-Informazzjoni u l-Analiżi tas-Suq tax-Xogħol (“ILMIA”) u għas-sigħat maħduma (l-Organizzazzjoni Internazzjonali tax-Xogħol (“ILO” - International Labour Organization)) kompla jnaqqas l-affidabbiltà tal-parametru referenzjarju.

(92)

F’dan ir-rigward, EcoCeres innota li f’investigazzjoni preċedenti (44), il-Kummissjoni bbażat fuq data mid-Dipartiment tal-Istatistika tal-Malażja (“DOSM”) fir-rigward tal-pagi u s-sigħat maħduma. Il-kumpanija pprovdiet ukoll kalkolu tal-kost lavorattiv mingħajr distorsjoni bbażat fuq (a) data mid-DOSM għall-paga fis-siegħa u (b) informazzjoni minn diversi sorsi pubbliċi dwar il-kost lavorattiv addizzjonali, b’mod partikolari diversi tipi ta’ kontribuzzjonijiet soċjali.

(93)

Il-Kummissjoni eżaminat l-affermazzjoni. Meta jitqies li d-data mid-DOSM kienet disponibbli għall-perjodu ta’ investigazzjoni u speċifikament għas-settur industrijali li għalih tappartjeni l-produzzjoni tal-bijodiżil, u l-fatt li l-informazzjoni dwar il-kost lavorattiv addizzjonali kienet disponibbli wkoll, kien tabilħaqq aktar xieraq li jintużaw is-sorsi proposti minn EcoCeres għad-determinazzjoni tal-kost lavorattiv mingħajr distorsjoni. Din l-informazzjoni addizzjonali pprovduta mill-kumpanija kien fiha l-elementi kollha meħtieġa biex jinbena l-kost lavorattiv fis-siegħa mingħajr distorsjoni, bħall-pagi, is-sigħat maħduma, il-kontribuzzjonijiet soċjali u kostijiet lavorattivi oħra mġarrba mill-impjegatur. Konsegwentement, il-Kummissjoni rrevediet il-kost lavorattiv mingħajr distorsjoni.

(94)

Meta jitqiesu l-konklużjonijiet tal-Kummissjoni dwar l-affermazzjoni ta’ EcoCeres deskritti fil-premessi (91) u (92), l-affermazzjoni tal-kumpanija deskritta fil-premessa (90) saret irrilevanti. Il-parametru referenzjarju rivedut iqis is-settur industrijali, iżda mhux il-livell tal-edukazzjoni u tal-ħiliet tal-impjegati. Ecoceres u l-partijiet interessati ġew infurmati bil-parametru referenzjarju rivedut permezz ta’ divulgazzjoni addizzjonali u ngħataw l-opportunità li jikkummentaw.

(95)

Wara d-divulgazzjoni finali addizzjonali, EcoCeres ikkummenta dwar il-kalkolu rivedut tal-kost lavorattiv. Wieħed mill-elementi li ttieħdu inkunsiderazzjoni kien il-pagament ta’ terminazzjoni tal-impjieg, li għalih huwa intitolat impjegat jekk kien impjegat għal 12-il xahar jew aktar u l-paga ta’ kull xahar tiegħu kienet sa 4 000 MYR. Skont it-tul ta’ żmien tal-impjieg, l-impjegat kien intitolat għal 10, 15 jew 20 jum ta’ ħlas ta’ terminazzjoni tal-impjieg. Peress li s-salarju fix-xahar ikkalkulat kien kemxejn ogħla minn 4 000 MYR, il-parti sostniet li l-Kummissjoni jenħtieġ li tuża approċċ konservattiv u tinkludi kost ta’ pagament ta’ terminazzjoni ta’ 10 jum fil-kalkolu tal-valur referenzjarju.

(96)

Il-Kummissjoni kkonfermat il-metodoloġija użata wara d-divulgazzjoni finali. Il-Kummissjoni adottat approċċ ibbilanċjat u inkludiet pagament ta’ terminazzjoni ta’ 15-il jum fil-kalkolu tal-punt ta’ riferiment. Il-paga medja fix-xahar ma għamlitx differenza bejn diversi impjiegi (produzzjoni, amministrazzjoni, ġestjoni) fl-industrija tal-kimika. Il-Kummissjoni qieset li kien probabbli ħafna li l-maġġoranza tal-impjegati rċevew paga ta’ inqas minn 4 000 MYR u għalhekk ikunu intitolati għal ħlas ta’ terminazzjoni tal-impjieg bil-liġi.

(97)

Wara l-kummenti dwar id-divulgazzjoni proviżorja u dik finali deskritti u indirizzati fil-premessi (48) sa (94), il-Kummissjoni rrevediet il-kost mingħajr distorsjoni ta’ ċerti fatturi ta’ produzzjoni kif ġej:

Tabella 1

Kost rivedut mingħajr distorsjoni ta’ ċerti fatturi ta’ produzzjoni

(98)

Wara d-divulgazzjoni proviżorja, EcoCeres u Zhuoyue ppreżentaw kummenti dwar il-kalkolu tal-kostijiet SG&A u tal-profitt mingħajr distorsjoni, b’mod partikolari l-inklużjoni ta’ tliet kumpaniji addizzjonali Malażjani li joperaw fis-settur tas-sustanzi kimiċi organiċi fil-ġabra ta’ kumpaniji użati biex jiġu ddeterminati l-kostijiet SG&A u l-profitt mingħajr distorsjoni.

(99)

Iż-żewġ partijiet indikaw li t-tliet produtturi ta’ sustanzi kimiċi organiċi mmanifatturaw prodotti li kienu diversi wisq biex jirriflettu d-data finanzjarja ta’ produttur tal-bijodiżil. Barra minn hekk, ma kienx ċar kif id-data finanzjarja tagħhom kienet tirrappreżenta l-proċess ta’ produzzjoni nieqes, jiġifieri l-produzzjoni tal-bijodiżil permezz tal-idroġenizzazzjoni, peress li l-ebda waħda mill-kumpaniji miżjuda ma pproduċiet il-bijodiżil.

(100)

Barra minn hekk, EcoCeres argumenta li l-Kummissjoni naqset milli tispjega għaliex il-proċess tal-produzzjoni kellu impatt sinifikanti fuq il-kostijiet SG&A u l-profitt.

(101)

EcoCeres ppreżenta wkoll li bl-użu tad-data finanzjarja tal-produtturi ta’ sustanzi kimiċi organiċi Malażjani mill-bażi tad-data Orbis, il-Kummissjoni kkontradixxiet ir-raġunament preċedenti tagħha f’din l-investigazzjoni fejn ma ġietx aċċettata informazzjoni finanzjarja li ma kinitx dettaljata biżżejjed biex tidentifika, pereżempju, ir-riżultati finanzjarji ta’ kumpanija f’segment direttament relatat mal-produzzjoni tal-bijodiżil. Il-grupp innota li d-data finanzjarja minn Orbis lanqas ma pprovdiet informazzjoni dettaljata dwar is-segment.

(102)

Barra minn hekk, EcoCeres għamel referenza għal investigazzjonijiet preċedenti (45) fejn il-Kummissjoni użat informazzjoni finanzjarja relatata ma’ prodotti għajr il-prodott taħt investigazzjoni biss fejn ma kien hemm l-ebda data finanzjarja disponibbli tal-produtturi tal-prodott taħt investigazzjoni.

(103)

EcoCeres sostna ukoll li jekk il-Kummissjoni tinsisti li testendi l-ġabra ta’ kumpaniji użata biex jiġu ddeterminati l-SG&A u l-profitt mingħajr distorsjoni, jenħtieġ li ssegwi waħda mill-għażliet ta’ hawn taħt (fl-ordni ta’ preferenza):

(104)

Fl-aħħar nett, wara d-divulgazzjoni minn qabel, EcoCeres ippreżenta rapporti finanzjarji aġġornati ta’ erba’ produtturi tal-bijodiżil fil-Malażja li jkopru s-sena finanzjarja 2023 (qabel kienet tipprovdi informazzjoni li kienet tkopri s-sena finanzjarja 2022). Ir-rapporti finanzjarji nkisbu mill-grupp mir-reġistru lokali Malażjan.

(105)

Il-Kummissjoni kkonfermat li kien tabilħaqq meħtieġ li tiġi estiża l-ġabra ta’ kumpaniji li d-data finanzjarja tagħhom intużat biex jiġu ddeterminati l-kostijiet SG&A u l-profitt mingħajr distorsjoni biex jiġu riflessi d-differenzi fost id-diversi proċessi ta’ produzzjoni, b’mod partikolari fir-rigward tal-profittabbiltà tagħhom. Tabilħaqq, il-marġni tal-bejgħ ta’ Neste, il-produttur tal-Unjoni tal-bijodiżil permezz tal-idrotrattament taż-żjut veġetali, laħaq bejn EUR 730 u EUR 880/tunnellata matul il-perjodu ta’ investigazzjoni (49) filwaqt li l-profitt fil-mira tal-bijodiżil prodott permezz tat-transesterifikazzjoni (idealment miksub f’sitwazzjoni ta’ ebda dannu għall-produtturi tal-Unjoni) kif żvelat fl-istadju provviżorju kien ferm aktar baxx (madwar EUR 200/tunnellata). Għalhekk, il-Kummissjoni tenniet is-sejbiet tagħha fil-premessa (282) tar-Regolament proviżorju, li jeħtieġ li tistabbilixxi ammonti mingħajr distorsjoni u raġonevoli tal-kostijiet SG&A u għall-profitt fil-Malażja li jirriflettu t-tipi differenti ta’ proċessi tal-produzzjoni. Meta jitqiesu d-differenzi fil-kostijiet u fil-profittabbiltà assoċjati maż-żewġ metodi ta’ produzzjoni, sabiex jitqiesu bħala raġonevoli skont it-tifsira tal-Artikolu 2(6a)(a) tar-Regolament bażiku, l-ammonti għall-kostijiet SG&A u għall-profitt użati fl-istabbiliment tal-valur normali kellhom ikunu taħlita ta’: (i) SG&A u l-profitt relatati mal-bijodiżil prodott permezz tat-transesterifikazzjoni u; (ii) SG&A u l-profitt relatati mal-bijodiżil prodott permezz tal-idrotrattament taż-żjut veġetali. Meta wieħed iqis tal-ewwel, kif spjegat fil-premessa (279) tar-Regolament proviżorju, il-Kummissjoni setgħet issib data faċilment disponibbli relatata mal-produtturi rilevanti tal-bijodiżil permezz tal-perkors ta’ transesterifikazzjoni. Meta titqies il-produzzjoni permezz tal-idrotrattament taż-żjut veġetali, l-ebda data bħal din relatata mal-produtturi tal-bijodiżil fil-Malażja ma kienet faċilment disponibbli. Din hija r-raġuni għaliex il-Kummissjoni qieset il-kostijiet SG&A u l-profitt iġġenerati mill-produtturi Malażjani fis-settur simili bħall-produtturi tal-bijodiżil permezz tal-idrotrattament taż-żjut veġetali.

(106)

Il-Kummissjoni ma qablitx ma’ EcoCeres dwar il-kodiċi NACE, li huwa xieraq biex jidentifika kumpaniji f’settur simili, jiġifieri settur li għalih tappartjeni l-produzzjoni tal-bijodiżil. Il-kodiċi NACE 10.41 jaqa’ taħt id-Diviżjoni 10 – Manifattura ta’ prodotti tal-ikel. Għalhekk, ma setax jitqies xieraq li jirrifletti l-kostijiet SG&A u l-profitt tas-settur simili għall-produzzjoni tal-bijodiżil.

(107)

Konsegwentement, il-Kummissjoni kkonfermat l-approċċ tagħha kif deskritt fil-premessi (279) sa (284) tar-Regolament proviżorju, jiġifieri d-data finanzjarja tal-produtturi tal-bijodiżil Malażjani għandha tiġi kkomplementata mid-data finanzjarja tal-produtturi ta’ sustanzi kimiċi organiċi fil-Malażja.

(108)

Madankollu, il-Kummissjoni qieset id-dikjarazzjonijiet finanzjarji addizzjonali sottomessi minn EcoCeres għall-produtturi Malażjani tal-bijodiżil u għall-produtturi Malażjani ta’ sustanzi kimiċi organiċi.

(109)

F’dan ir-rigward, il-bażi tad-data Orbis ipprovdiet data finanzjarja għal aktar minn 80 kumpanija kklassifikati taħt il-kodiċi NACE 20.14 fil-Malażja. EcoCeres ipprovda biss rapporti finanzjarji ta’ sitt kumpaniji bħal dawn. L-ewwel nett, il-Kummissjoni osservat li l-informazzjoni finanzjarja li tinsab fid-dikjarazzjonijiet finanzjarji kienet tikkorrispondi għaċ-ċifri li jinsabu fil-bażi tad-data Orbis. It-tieni nett, peress li l-kumpaniji kklassifikati taħt il-kodiċi NACE 20.14 mhux neċessarjament jipproduċu bijodiżil iżda pjuttost jipprovdu indikatur għall-kostijiet SG&A u għall-profitt f’settur usa’, ma hemmx bżonn ta’ analiżi dettaljata ulterjuri, bħall-identifikazzjoni tas-segment relatat direttament mal-prodott li qed jiġi investigat. It-tielet nett, fid-dawl tal-għadd kbir ta’ produtturi ta’ sustanzi kimiċi organiċi fil-Malażja, ma jistax jiġi eskluż li l-parti pprovdiet biss rapporti finanzjarji li jirriżultaw f’SG&A u profitt mingħajr distorsjoni favorevoli għall-parti. Għalhekk, il-Kummissjoni ddeċidiet li tuża l-informazzjoni finanzjarja kollha disponibbli faċilment ta’ hawn fuq: dikjarazzjonijiet finanzjarji tal-produtturi tal-bijodiżil, dikjarazzjonijiet finanzjarji tal-produtturi ta’ sustanzi kimiċi organiċi, u informazzjoni finanzjarja mill-bażi tad-data Orbis tal-produtturi ta’ sustanzi kimiċi organiċi fil-Malażja.

(110)

Barra minn hekk, il-Kummissjoni tixtieq tiċċara li l-informazzjoni finanzjarja mill-bażi tad-data Orbis mhijiex inadegwata. Fil-proċess tal-għażla ta’ pajjiż rappreżentattiv, id-disponibbiltà ta’ rapporti finanzjarji aktar dettaljati tista’ tkun raġuni għall-għażla ta’ pajjiż wieħed minflok ieħor. Madankollu, dan ma jfissirx li l-informazzjoni finanzjarja mill-bażi tad-data Orbis mhijiex aċċettabbli għall-kalkolu tal-kostijiet SG&A u tal-profitt mingħajr distorsjoni.

(111)

Il-Kummissjoni rrieżaminat ir-riċerka tagħha dwar il-produtturi tas-sustanzi kimiċi organiċi fil-Malażja fil-bażi tad-data Orbis. Il-Kummissjoni sabet li bi żball użat mhux biss il-kodiċi NACE 20.14 iżda wkoll kodiċijiet simili taħt klassifikazzjonijiet oħra tal-industrija disponibbli f’Orbis.

(112)

Sabiex tissimplifika l-kalkolu tal-kostijiet SG&A u tal-profitt mingħajr distorsjoni, b’mod partikolari l-ġabra ta’ produtturi ta’ sustanzi kimiċi organiċi fil-Malażja, il-Kummissjoni rrevediet it-tfittxija tagħha f’Orbis. Fl-istadju definittiv, il-Kummissjoni qieset biss il-kumpaniji li użaw il-kodiċi NACE 20.14 bħala wieħed mill-kodiċijiet primarji tagħhom taħt din il-klassifikazzjoni tal-industrija u għażlu wkoll kumpaniji b’rapporti finanzjarji mhux konsolidati disponibbli għall-2022 jew għall-2023 bl-informazzjoni finanzjarja li ġejja disponibbli: il-fatturat, il-kost tal-oġġetti mibjugħa, u l-profitt. Meta din it-tfittxija rriżultat kumpanija, li għaliha EcoCeres ippreżenta rapporti finanzjarji mir-reġistru lokali Malażjan, ir-rapporti finanzjarji ntużaw minflok id-data mill-bażi tad-data Orbis. F’dan ir-rigward, wieħed mill-allegati produtturi ta’ sustanzi kimiċi organiċi b’dikjarazzjonijiet finanzjarji sottomessi minn EcoCeres (Pacific Oleochemicals Sdn Bhd) instab li ma kienx ikklassifikat taħt il-kodiċi NACE 20.14 f’Orbis. Din il-kumpanija ġiet injorata mill-kalkolu tal-SG&A u l-profitt mingħajr distorsjoni.

(113)

Il-Kummissjoni ma aċċettatx l-affermazzjoni minn EcoCeres biex taġġusta l-piż tal-produtturi ta’ sustanzi kimiċi organiċi fil-kalkolu tal-kostijiet SG&A u tal-profitt medji ponderati. Il-valur totali tal-kost tal-oġġetti mibjugħa ta’ produtturi ta’ sustanzi kimiċi organiċi kien tabilħaqq ogħla mill-valur totali tal-oġġetti li nbiegħu tal-produtturi tal-bijodiżil. Madankollu, il-Kummissjoni qieset li l-produtturi tal-bijodiżil kienu rappreżentati biżżejjed fil-kalkolu tal-medja ponderata peress li individwalment kienu kumpaniji ħafna akbar mill-produtturi ta’ sustanzi kimiċi organiċi.

(114)

Il-Kummissjoni, madankollu, aġġustat il-piż tal-kumpaniji individwali fil-kalkolu tal-SG&A u tal-profitt medji ponderati. Għal kumpaniji li għalihom kienet disponibbli informazzjoni finanzjarja għas-sentejn finanzjarji (2022 u 2023), il-Kummissjoni użat il-medja tas-sentejn minflok sempliċement żiedet iċ-ċifri għas-sentejn biex tevita sitwazzjoni fejn id-data finanzjarja ta’ kumpanija tgħodd id-doppju fil-medja ponderata.

(115)

Wara d-divulgazzjoni proviżorja u fis-sottomissjoni tiegħu, l-EBB laqa’ l-inklużjoni tal-produtturi ta’ sustanzi kimiċi organiċi fil-kalkolu tal-SG&A u tal-profitt mingħajr distorsjoni u argumenta li l-Kummissjoni jenħtieġ li toqgħod biss fuq id-data finanzjarja tagħhom. F’dan ir-rigward, l-ilmentatur tenna li kien hemm distorsjoni fil-kostijiet SG&A u l-profitt tal-bijodiżil Malażjan permezz tal-Mekkaniżmu tal-Ipprezzar Awtomatiku (“APM”, Automatic Pricing Mechanism) applikabbli għall-fjuwil diżil mibjugħ fil-livell tal-bejgħ bl-imnut u billi l-prezz tal-bijodiżil ġie ffissat mill-Gvern.

(116)

Fir-rigward tal-APM, l-EBB għamel referenza għal rapport tal-Istitut Internazzjonali għall-Iżvilupp Sostenibbli (“IISD”, International Institute for Sustainable Development) (50), li allegatament indika li l-APM mhux biss kellu impatt fuq il-prezz bl-imnut iżda fuq il-katina kollha tal-produzzjoni. L-ilmentatur akkuża lil EcoCeres li rrappreżenta ħażin il-funzjonament tal-APM fis-sottomissjonijiet tiegħu, b’mod partikolari peress li sostna li l-APM jiffissa biss il-prezz tal-fjuwil fil-livell tal-bejgħ bl-imnut u li l-prezzijiet fissi tal-fjuwil huma disponibbli biss għall-konsumaturi u għal ċerti setturi tal-ekonomija.

(117)

Fir-rigward tal-prezz fiss tal-bijodiżil, l-EBB għamel referenza għall-informazzjoni li ġejja:

(118)

Fir-rigward tal-APM, il-Kummissjoni qieset li l-EBB ma pprovda l-ebda evidenza li s-sussidju kien qed jitqassam tul il-katina tal-valur kollha. L-ewwel nett, ir-rapport tal-IISD sempliċement jiddikjara li l-APM mhux biss jiddetermina l-prezz tal-fjuwil għall-klijent iżda jirregola wkoll il-profitti u l-utilitajiet fuq in-naħa tal-produzzjoni (jiġifieri għall-bejjiegħ bl-imnut permezz tal-formula APM applikata għall-bini tal-prezz bl-imnut). It-tieni nett, l-istudju mill-UTM ikkalkula kif il-prezz tal-bijodiżil, li kien ogħla mill-prezz tal-fjuwil fossili, ikkontribwixxa għaż-żieda fis-sussidju meħtieġ biex ikopri d-differenza bejn il-prezz bl-imnut fiss tal-fjuwil u l-kost reali ta’ bejjiegħ bl-imnut. Anki jekk il-Kummissjoni rrikonoxxiet li s-sussidju mħallas lill-bejjiegħ bl-imnut jipprovdi ċerta garanzija ta’ prezz tal-bejgħ favorevoli lil produttur tal-bijodiżil, irid jitqies li l-finanzjament tat-taħlita B10 stmat għal USD 9.7 miljun għall-2023 jammonta għal sussidju ta’ 0,005 MYR għal kull litru ta’ taħlita bħal din (56). Għaldaqstant, l-effett fuq il-produttur tal-bijodiżil huwa insinifikanti.

(119)

Fir-rigward tal-allegat prezz fiss tal-bijodiżil, il-Kummissjoni nnutat li l-EBB ma pprovdiex biżżejjed evidenza. Is-sorsi kkwotati mill-parti huma mis-snin 2015 u 2017, jiġifieri ħafna qabel il-perjodu ta’ investigazzjoni tal-investigazzjoni preżenti. Barra minn hekk, il-Kummissjoni ma setgħet taċċerta l-ebda sors uffiċjali kontemporanju li jikkonferma l-eżistenza ta’ mekkaniżmu tal-ipprezzar għall-bijodiżil irregolat mill-Gvern tal-Malażja.

(120)

Konsegwentement, il-Kummissjoni ma aċċettatx l-affermazzjonijiet tal-EBB deskritti fil-premessi (115) sa (117).

(121)

Wara d-divulgazzjoni finali, EcoCeres tenna li l-kategorija ta’ sustanzi kimiċi organiċi kienet wiesgħa wisq. Għalkemm il-produzzjoni tal-bijodiżil permezz tal-idrotrattament kienet aktar profittabbli milli permezz tat-transesterifikazzjoni, EcoCeres argumenta li l-Kummissjoni naqset milli tispjega kif il-kategorija wiesgħa ta’ produtturi ta’ sustanzi kimiċi organiċi kienet aktar rappreżentattiva tal-idrotrattament mill-produzzjoni ta’ prodott simili (bijodiżil permezz ta’ transesterifikazzjoni). F’dan ir-rigward EcoCeres sostniet li jekk il-Kummissjoni tinsisti fuq it-twessigħ tal-kamp ta’ applikazzjoni lil hinn mill-produtturi tal-bijodiżil, jenħtieġ li tuża l-kodiċi 10.14 tan-NACE, li jinkludi direttament l-idrotrattament taż-żjut veġetali.

(122)

Il-Kummissjoni fakkret li kif spjegat fil-premessa (105), il-produtturi kollha tal-bijodiżil, li għalihom kien hemm informazzjoni finanzjarja disponibbli mmanifatturaw il-bijodiżil permezz tat-transesterifikazzjoni. Barra minn hekk, l-informazzjoni fil-fajl tal-investigazzjoni wriet b’mod ċar livelli differenti ta’ profittabbiltà li nkisbu mill-produtturi wara l-perkors tal-produzzjoni tal-idrotrattament meta mqabbel ma’ dak tal-produtturi li segwew il-perkors tal-produzzjoni tat-transesterifikazzjoni. Għalhekk, l-inklużjoni ta’ kumpaniji addizzjonali kienet meħtieġa sabiex jiġi stabbilit b’mod preċiż ammont korrispondenti, mingħajr distorsjoni u raġonevoli għall-SG&A u l-profitt li huwa rappreżentattiv tal-industrija kollha tal-bijodiżil irrispettivament mill-proċess ta’ produzzjoni użat. Il-Kummissjoni ma taqbilx ma’ EcoCeres fir-rigward tal-kodiċi NACE propost mill-kumpanija. Kif spjegat fil-premessa (106), il-kodiċi NACE 10.14 jirreferi għall-idroġenazzjoni taż-żjut veġetali fl-industrija tal-ikel. Għalhekk, il-profittabbiltà tal-kumpaniji tal-ikel ma tistax tintuża bħala indikatur għall-profittabbiltà tal-kumpaniji li jipproduċu l-fjuwil. F’din is-sitwazzjoni, ir-riżultati finanzjarji tal-kumpaniji li joperaw fl-istess settur tal-industrija (il-produzzjoni ta’ sustanzi kimiċi organiċi) bħall-produtturi tal-bijodiżil huma b’mod ċar l-aktar indikatur xieraq għall-kost SG&A u l-profitt tal-produtturi li jużaw il-metodu tal-idrotrattament.

(123)

Konsegwentement, il-Kummissjoni ċaħdet l-affermazzjoni.

(124)

Wara d-divulgazzjoni finali, EcoCeres tenna l-affermazzjoni tiegħu dwar il-piż tal-produtturi tas-sustanzi kimiċi organiċi fid-determinazzjoni tal-kost SG&A u tal-profitt mingħajr distorsjoni (ara l-premessa (103)(d)). B’mod partikolari, il-kumpanija indikat l-għadd ta’ produtturi ta’ sustanzi kimiċi organiċi (93 kumpanija) meta mqabbel mal-produtturi tal-bijodiżil (7) fis-sett tad-data.

(125)

Il-Kummissjoni ċaħdet l-affermazzjoni u kkonfermat il-konklużjonijiet tagħha tal-premessa (113). B’mod partikolari, hija qieset li n-numru ta’ kumpanniji kien irrilevanti. Kien pjuttost il-piż tal-kost tal-oġġetti mibjugħa mill-produtturi tal-bijodiżil fil-kalkolu li ddetermina r-rappreżentattività.

(126)

Fl-aħħar nett, fil-kummenti tiegħu dwar id-divulgazzjoni finali, EcoCeres għamel il-kummenti li ġejjin speċifiċi għall-kumpaniji inklużi fid-determinazzjoni tal-kost SG&A u l-profitt mingħajr distorsjoni:

(127)

Il-Kummissjoni eżaminat il-kummenti u fejn xieraq, irrevediet id-determinazzjoni tal-kost SG&A u tal-profitt mingħajr distorsjoni kif ġej:

(128)

Ecoceres u l-partijiet interessati ġew infurmati bit-tibdil t’hawn fuq f’divulgazzjoni addizzjonali u ngħataw l-opportunità li jikkummentaw.

(129)

Il-Kummissjoni ċaħdet it-talba biex Pacific Oleochemicals Sdn Bhd tiġi inkluża fil-kalkolu tal-kost SG&A u tal-profitt mingħajr distorsjoni. Tabilħaqq, il-kumpanija ġiet ikklassifikata taħt kodiċi ta’ klassifikazzjoni industrijali differenti u l-Kummissjoni ma kellha l-ebda evidenza fil-fajl li turi b’ċertezza li l-attivitajiet primarji tal-kumpanija jenħtieġ li jiġu kklassifikati taħt il-kodiċi NACE 20.14, jiġifieri l-manifattura ta’ sustanzi kimiċi bażiċi organiċi oħra.

(130)

Wara d-divulgazzjoni proviżorja, EcoCeres tenna l-affermazzjoni tiegħu dwar il-kost relatat mat-trasport inkluż fl-SG&A mingħajr distorsjoni użat mill-Kummissjoni. F’dan ir-rigward, huwa għamel referenza għall-fatt li l-paragun tal-valur normali u l-prezz tal-esportazzjoni sar fil-livell mill-fabbrika u għad-deċiżjoni tal-Qorti Ġenerali f’Sinopec Chongqing SVW Chemical (57) fejn il-Qorti kkonfermat li l-Kummissjoni jeħtiġilha tiżgura li l-kost tat-trasport tnaqqas mill-SG&A tal-kumpaniji użat għall-kalkolu tal-parametru referenzjarju.

(131)

Il-Kummissjoni użat taħlita ta’ rapporti finanzjarji mir-reġistru lokali u data finanzjarja mill-bażi tad-data Orbis. Il-fatt li “spejjeż tal-bejgħ” fir-rapporti finanzjarji jew “spejjeż operatorji oħra” f’Orbis jistgħu jinkludu kost relatat mat-trasport ma jfissirx neċessarjament li l-kumpaniji inkwistjoni ġarrbu tali kost. Fil-fatt, minn 19-il sett ta’ rapporti finanzjarji li kienu faċilment disponibbli fl-investigazzjoni preżenti, kumpanija waħda biss irrappurtat fin-Noti għar-rapporti finanzjarji tagħha li kienet ġarrbet kost tat-trasport. Kif diġà ġie spjegat fil-premessa (280) tar-Regolament proviżorju, fil-każ ta’ din il-kumpanija, il-Kummissjoni naqqset il-kost relatat mat-trasport mill-SG&A tal-kumpanija użat fil-kalkolu tal-SG&A mingħajr distorsjoni.

(132)

Barra minn hekk, kif spjegat fil-premessa (295) tar-Regolament proviżorju, il-Kummissjoni għażlet li tqabbel il-prezz tal-esportazzjoni u l-valur normali fil-livell ta’ kummerċ mill-fabbrika. Kif spjegat fil-premessi (291) u (296) tar-Regolament proviżorju, il-valur normali ġie stabbilit fil-livell ta’ kummerċ mill-fabbrika bl-użu tal-kostijiet tal-produzzjoni flimkien mal-ammonti għall-SG&A u għall-profitt, li tqiesu bħala raġonevoli għal dak il-livell ta’ kummerċ. Għalhekk, ma kien meħtieġ l-ebda aġġustament biex il-valur normali jmur lura għal-livell mill-fabbrika.

(133)

Fis-sentenza tagħha fis-CCCME, li kienet sussegwenti għas-Sentenza f’Sinopec, il-Qorti Ġenerali l-ewwel fakkret li f’konformità mal-ġurisprudenza, jekk parti titlob aġġustamenti skont l-Artikolu 2(10) tar-Regolament bażiku sabiex tagħmel il-valur normali u l-prezz tal-esportazzjoni komparabbli għall-fini tad-determinazzjoni tal-marġni tad-dumping, dik il-parti jeħtiġilha tagħti prova li t-talba tagħha hija ġustifikata. L-oneru li jiġi ppruvat li għandhom isiru l-aġġustamenti speċifiċi elenkati fl-Artikolu 2(10)(a) sa (k) tar-Regolament bażiku jaqa’ fuq dawk li jixtiequ jagħmlu użu minnhom. (58) Minn dan isegwi li, f’dan il-każ, bħal f’din l-investigazzjoni, kienu l-partijiet interessati, f’konformità ma’ din il-ġurisprudenza, li għandhom juru l-ħtieġa għall-aġġustament mitlub b’sostenn tal-provi li huma pproduċew matul l-investigazzjoni. (59)

(134)

Il-Qorti Ġenerali mbagħad ippreċiżat li jenħtieġ li jiġi nnutat li għalkemm il-prattika li jsiru aġġustamenti tista’ tkun meħtieġa, skont l-Artikolu 2(10) tar-Regolament bażiku, biex jitqiesu d-differenzi bejn il-prezz tal-esportazzjoni u l-valur normali li jaffettwaw il-komparabbiltà tagħhom, tali tnaqqis ma jistax isir fir-rigward ta’ valur li nħadem u li, għalhekk, ma huwiex ġenwin. Dan il-valur ma huwiex ġeneralment affettwat minn fatturi li jistgħu jippreġudikaw il-komparabbiltà tiegħu, peress li ġie stabbilit artifiċjalment. (60) Barra minn hekk, bħal fil-każ tas-CCCME, f’dan il-każ, il-bini tal-valur normali għal kull tip ta’ prodott fuq bażi “mill-fabbrika” kien jinkludi ammont raġonevoli għall-kostijiet SG&A u ma kien hemm l-ebda informazzjoni disponibbli li turi li l-kostijiet SG&A tal-kumpaniji Malażjani kkonċernati kienu jinkludu spejjeż tat-trasport għall-konsenja lill-klijenti. Kif spjegat fil-premessa (131), kull meta ġiet ippreżentata tali evidenza, id-data ġiet aġġustata kif xieraq. Konsegwentement, fid-dawl tad-diskrezzjoni tal-Kummissjoni fl-applikazzjoni tal-Artikolu 2(10) tar-Regolament bażiku (61), l-approċċ tal-Kummissjoni aderixxa mal-aktar ġurisprudenza reċenti dwar l-affermazzjonijiet mhux sostanzjati li l-ammonti għall-kostijiet SG&A użati fil-kostruzzjoni tal-valur normali skont l-Artikolu 2(6a)(a), li jitqiesu mill-Kummissjoni bħala raġonevoli għal-livell tal-kummerċ mill-fabbrika, jinkludu l-kostijiet tat-trasport. Għalhekk, l-affermazzjoni ma ġietx aċċettata.

(135)

Meta jitqiesu l-kummenti dwar id-divulgazzjoni proviżorja indirizzati fil-premessi (98) sa (134), l-SG&A u l-profitt riveduti mingħajr distorsjoni ammontaw għal 5,88 % u 11,78 % rispettivament. Il-Kummissjoni qieset l-ammonti għall-SG&A u għall-profitt ibbażati fuq dawn ir-rati bħala raġonevoli għal-livell ta’ kummerċ mill-fabbrika.

(136)

Fl-istadju proviżorju, il-Kummissjoni aċċettat ċerti talbiet tal-produtturi esportaturi inklużi fil-kampjun biex jużaw il-kost tagħhom stess biex jinħadem il-valur normali fejn il-kumpaniji setgħu jagħtu prova li ċerti inputs inxtraw skont il-kundizzjonijiet tas-suq, bħal li dawk l-inputs ġew importati minn pajjiż terz direttament, mingħajr l-involviment ta’ intermedjarju Ċiniż, il-fornituri ma kinux relatati mal-produtturi esportaturi, il-prezzijiet ġew innegozjati u mħallsa f’munita barranija.

(137)

Madankollu, il-Kummissjoni ma aċċettatx il-kost tal-UCO u tal-POME li joriġinaw fl-Indoneżja f’konformità mal-konklużjonijiet tagħha dwar il-kalkolu tal-kost mingħajr distorsjoni tal-UCO u tal-POME diskussi fil-premessi (232), (238) u (263) tar-Regolament proviżorju.

(138)

Wara d-divulgazzjoni proviżorja, il-produtturi esportaturi fil-kampjun tennew li tali approċċ ma kienx ġustifikat. Peress li r-raġunament dettaljat kien jikkonċerna informazzjoni speċifika għall-kumpanija, il-Kummissjoni indirizzat il-kummenti fid-divulgazzjonijiet finali speċifiċi għall-kumpanija rispettivi.

(139)

Filwaqt li qieset il-kunsiderazzjonijiet deskritti fil-premessi (56) sa (59) dwar il-kalkolu tal-kost mingħajr distorsjoni tal-UCO u tal-POME, il-Kummissjoni ċaħdet l-affermazzjonijiet imsemmija fil-premessa (138).

(140)

Wara d-divulgazzjoni proviżorja, Jiaao kkummenta dwar il-metodoloġija li l-Kummissjoni applikat meta ssostitwixxet il-kost tat-tipi diversi ta’ feedstocks użati mill-grupp b’kost mingħajr distorsjoni. Il-grupp għamel suġġerimenti dwar liema parametru referenzjarju jenħtieġ li jiġi applikat biex jirrifletti l-kost mingħajr distorsjoni ta’ dawk il-feedstocks. Fl-istess ħin, il-grupp iddeskriva dawk il-feedstocks bħala tipi diversi ta’ UCO.

(141)

Il-Kummissjoni ma aċċettatx l-affermazzjoni peress li fil-perjodu ta’ investigazzjoni, il-grupp biegħ bijodiżil lill-Unjoni li kien magħmul minn diversi feedstocks. Dan kien appoġġjat mid-dokumentazzjoni tal-bejgħ korrispondenti kif ukoll miċ-ċertifikazzjoni tas-sostenibbiltà li nkisbu minn Jiaao (62). Għalhekk, ma kienx xieraq li jintuża parametru referenzjarju uniku għat-tipi kollha ta’ feedstocks. Kif spjegat fit-taqsima 3.1, il-Kummissjoni osservat inkonsistenzi fil-feedstocks irreġistrati fil-kontijiet tal-grupp, fuq id-dokumenti tax-xiri rispettivi, u rrappurtati fl-informazzjoni pprovduta fil-qafas ta’ din l-investigazzjoni. Il-Kummissjoni użat il-fatti disponibbli u applikat il-kost mingħajr distorsjoni mill-pajjiż rappreżentattiv b’tali mod li tneħħi r-riskju ta’ sottovalutazzjoni tal-valur normali.

(142)

Id-dettalji tal-affermazzjoni ta’ Jiaao deskritti fil-premessa (140) ġew sottomessi biss fil-verżjoni sensittiva tal-kummenti tal-grupp dwar id-divulgazzjoni proviżorja. Għalhekk, il-Kummissjoni indirizzat il-kummenti fid-dettall fid-divulgazzjoni finali speċifika għall-kumpanija.

(143)

Wara d-divulgazzjoni proviżorja, EcoCeres argumenta li l-approċċ meħud mill-Kummissjoni fil-każ speċifiku tal-grupp wassal għal għadd doppju tal-kostijiet SG&A u tal-profitt. Id-dettalji tal-affermazzjoni ġew ipprovduti biss fil-verżjoni sensittiva tas-sottomissjoni tal-grupp. Għalhekk, l-affermazzjoni ġiet indirizzata fid-dettall fid-divulgazzjoni finali speċifika għall-kumpanija.

(144)

F’dan ir-rigward, il-Kummissjoni kkonkludiet li dan kien jirrifletti bis-sħiħ l-elementi kollha tal-kostijiet rilevanti għal-livell ta’ kummerċ mill-fabbrika li fih inħadem il-valur normali, u l-profitt fil-bini tal-valur normali mingħajr ebda għadd doppju ta’ tali elementi tal-kostijiet u tal-profitt. Konsegwentement, il-Kummissjoni ma aċċettatx l-affermazzjoni tal-parti deskritta fil-premessa (143).

(145)

Wara d-divulgazzjoni proviżorja, xi produtturi esportaturi kkummentaw ukoll dwar il-metodoloġija applikata mill-Kummissjoni biex tiddetermina l-valur tal-kost mingħajr distorsjoni fuq l-għatba ta’ fabbrika fil-pajjiż rappreżentattiv, sa fejn jikkonċerna l-kost tat-trasport ta’ ċerti inputs mill-fruntiera sal-bieb tal-fabbrika.

(146)

Fejn ġustifikat, il-Kummissjoni qieset dawk il-kummenti u rrevediet il-kalkolu tal-kost tat-trasport. Meta titqies in-natura sensittiva u speċifika tal-kumpanija ta’ din l-informazzjoni, id-dettalji ġew żvelati lill-produtturi esportaturi affettwati fid-divulgazzjonijiet finali speċifiċi għall-kumpanija.

(147)

Meta stabbilixxiet il-valur normali fl-istadju proviżorju, il-Kummissjoni aġġustat il-valur normali għal valur mingħajr distorsjoni ta’ prodotti sekondarji fejn xieraq. F’dan il-każ, il-prodotti sekondarji kienu ta’ tali natura li ma kinux użati mill-ġdid fil-produzzjoni tal-bijodiżil iżda mibjugħa lil partijiet terzi. Għalhekk, il-valur mingħajr distorsjoni tal-prodotti sekondarji tnaqqas mill-valur normali, mhux mill-valur mingħajr distorsjoni tal-materjali użati fil-produzzjoni tal-bijodiżil.

(148)

Fil-kummenti tiegħu dwar id-divulgazzjoni minn qabel u d-divulgazzjoni proviżorja, Jiaao sostna li:

(149)

L-ewwel nett, il-Kummissjoni tixtieq tindika l-inkonsistenza fir-raġunament ta’ Jiaao fejn il-grupp iddikjara minn naħa waħda li l-konsum tal-inputs huwa irrilevanti għall-bejgħ tal-prodott sekondarju peress li l-inputs jintużaw simultanjament fil-produzzjoni tal-bijodiżil. Min-naħa l-oħra, il-grupp argumenta li l-Kummissjoni missha naqqset il-kwantità ta’ inputs ikkunsmati fil-produzzjoni ta’ prodotti sekondarji mill-kwantità totali kkunsmata rrappurtata.

(150)

Fi kwalunkwe każ, il-Kummissjoni segwiet il-prattika stabbilita tagħha meta applikat l-aġġustament tal-prodott sekondarju. Meta prodott sekondarju jinbiegħ lil partijiet terzi, kemm jekk relatati kif ukoll jekk mhux relatati, il-valur mingħajr distorsjoni tiegħu minn pajjiż rappreżentattiv jirrappreżenta l-valur tal-bejgħ tal-prodott sekondarju, mhux il-kost tiegħu. Tali valur tal-bejgħ mingħajr distorsjoni huwa magħmul mill-kost tal-produzzjoni, mill-SG&A u mill-profitt tal-produttur ta’ tali prodott sekondarju. Għalhekk, il-valur mingħajr distorsjoni ta’ tali prodott sekondarju jrid jitnaqqas mill-valur totali ta’ valur normali maħdum.

(151)

Konsegwentement, il-Kummissjoni ma aċċettatx l-affermazzjonijiet ta’ Jiaao dwar l-aġġustament tal-prodott sekondarju.

(152)

Kif deskritt fil-premessi (48) sa (151), wara l-affermazzjonijiet mill-partijiet interessati, il-Kummissjoni rrevediet il-marġnijiet tad-dumping.

(153)

Il-marġnijiet tad-dumping definittivi espressi bħala perċentwal tal-prezz tal-kost, tal-assigurazzjoni u tan-nol (“CIF”, cost, insurance and freight) fil-fruntiera tal-Unjoni, bid-dazju mhux imħallas, huma kif ġej:

(154)

Wara d-divulgazzjoni proviżorja, EcoCeres innota bidliet fid-data makro tal-EBB (jiġifieri tnaqqis drammatiku fil-volumi ta’ bejgħ) u allega li, bl-estrapolazzjoni taċ-ċifri makroekonomiċi bbażati biss fuq id-data tal-membri tal-EBB u/jew il-klijenti tar-rappreżentanti legali tal-EBB, id-data makro ma kinitx rappreżentattiva tal-industrija tal-Unjoni kollha kemm hi u kienet ippreġudikata.

(155)

Il-Kummissjoni nnutat li l-EBB kien aġġorna d-data makro bħala riżultat tal-iżbalji identifikati matul iż-żjara ta’ verifika. Il-Kummissjoni kkonkludiet li din id-data makro kienet rappreżentattiva għall-industrija tal-Unjoni. L-ewwel nett, EcoCeres ma poġġiex f’dubju l-premessa (2) tar-Regolament proviżorju dwar ir-rappreżentattività tal-EBB fir-rigward tal-industrija tal-bijodiżil tal-Unjoni. It-tieni nett, fir-rigward tal-estrapolazzjonijiet tal-EBB, dawn kienu bbażati fuq kampjun ta’ kumpaniji li jirrappreżentaw aktar minn 40 % tal-produzzjoni tal-Unjoni u kienu jikkonċernaw biss żewġ indikaturi. Dawk l-indikaturi kienu indikaturi li għalihom l-EBB ma sab l-ebda data alternattiva, jiġifieri l-volum tal-impjiegi u ta’ bejgħ fl-Unjoni (63).

(156)

Wara d-divulgazzjoni proviżorja, is-CCCMC ma qablitx li t-tweġiba tal-EBB għall-kwestjonarju makro kienet evidenza pożittiva konformi mad-WTO. Il-parti allegat li l-każ preżenti kien analogu għal EU – Biodiesel (l-Arġentina) (DS473 (64)) u li xejn ma ssuġġerixxa li l-Kummissjoni eżerċitat “attenzjoni speċjali” fl-iżgurar li d-data tal-EBB kienet preċiża. Is-CCCMC ikkritikat id-dikjarazzjoni tal-Kummissjoni fil-premessa (308) tar-Regolament proviżorju li l-ebda parti ma kienet għamlet kummenti dwar iċ-ċifra tal-EBB dwar il-produzzjoni tal-Unjoni minħabba li l-aħħar verżjoni ġiet ippreżentata ħafna wara l-iskadenza għas-sottomissjoni ta’ informazzjoni rilevanti għall-istadju proviżorju (u għaldaqstant, li s-CCCMC ma kellha l-ebda assigurazzjoni li l-Kummissjoni kienet se tikkunsidra kummenti għall-fini tar-Regolament proviżorju). Is-CCCMC ikkritikat in-nuqqas ta’ dettalji dwar l-istimi tal-Kummissjoni għall-SAF u dwar kif il-fornitur tal-informazzjoni dwar is-suq Stratas ġabar id-data, jiġifieri meta wieħed iżomm f’moħħu d-distakk bejn il-konsum totali tal-Unjoni stabbilit minn Stratas (disponibbli f’t24.004736) u l-Kummissjoni (ara t-tabella 2 tar-Regolament proviżorju).

(157)

Il-Kummissjoni nnutat li l-premessa (308) tar-Regolament proviżorju tqis il-fatt u li, tabilħaqq, l-ebda parti ma kienet għamlet kummenti dwar iċ-ċifra tal-EBB dwar il-produzzjoni tal-Unjoni fl-ebda stadju tal-proċediment. Is-CCCMC qatt ma pproponiet ċifri (alternattivi) għall-produzzjoni tal-bijodiżil tal-Unjoni. Minflok, is-CCCMC serħet fuq dawk imressqa mill-Kummissjoni, kif muri fil-kummenti tas-CCCMC dwar id-divulgazzjoni proviżorja (65). Il-Kummissjoni wettqet kontroverifika tad-data kollha dwar il-produzzjoni tal-Unjoni disponibbli fil-fajl fl-istadju definittiv u kkonfermat li l-produzzjoni totali tal-Unjoni matul il-perjodu ta’ investigazzjoni kienet tammonta għal 14 775 455 tunnellata.

(158)

Id-dettalji dwar l-istimi tal-Kummissjoni għall-SAF huma pprovduti fit-Taqsima 4.5.2.1.

(159)

Fin-nuqqas ta’ kummenti oħra, il-kunsiderazzjonijiet fil-premessi (305) sa (309) tar-Regolament proviżorju ġew ikkonfermati.

(160)

Wara d-divulgazzjoni proviżorja, EcoCeres għamel dikjarazzjoni ġenerali li ma qabilx mar-rifjut tal-Kummissjoni li twettaq analiżi segmentata li tiddistingwi lill-FAME u l-HVO u fakkar fil-kummenti tiegħu f’dan ir-rigward tat-2 ta’ Jannar 2024 (66).

(161)

Wara d-divulgazzjoni proviżorja, is-CCCMC tenniet it-talba tagħha li, jekk l-HVO ma jiġix eskluż mill-ambitu tal-investigazzjoni, jenħtieġ li l-HVO u l-FAME jiġu eżaminati separatament. Skont is-CCCMC, il-Kummissjoni kisret il-liġi tad-WTO sal-punt li r-Regolament proviżorju rraġuna jew spjega b’mod inadegwat ir-raġunijiet għar-rifjut li titwettaq analiżi segmentata tad-dannu. Barra minn hekk, is-CCCMC argumentat li n-nuqqas ta’ analiżi segmentata wassal biex is-sejbiet ta’ dannu kienu inkonsistenti mal-obbligu tal-Kummissjoni skont il-liġi tad-WTO li twettaq eżami oġġettiv ibbażat fuq evidenza pożittiva.

(162)

Il-Kummissjoni fakkret li r-Regolament proviżorju eżamina kundizzjoni b’kundizzjoni jekk analiżi segmentata tad-dannu tkunx ġustifikata f’dan il-każ. L-allegazzjonijiet ta’ Ecoceres u tas-CCCMC huma ta’ natura ġenerali u ma jistgħux jirribattu l-argumenti dettaljati skont kull kundizzjoni analizzata fir-Regolament proviżorju. Iċ-ċirkustanzi fl-investigazzjoni mill-awtoritajiet tar-Renju Unit TD0004 (67), li għamel referenza għaliha EcoCeres, ma jistgħux jiġu estrapolati għall-każ inkwistjoni, peress li ma kien hemm l-ebda produzzjoni tal-HVO fir-Renju Unit. Għalhekk, il-Kummissjoni ċaħdet it-talba għal analiżi segmentata tad-dannu tal-FAME u tal-HVO u kkonfermat il-kunsiderazzjonijiet fir-Regolament proviżorju li skonthom ma hemm l-ebda raġuni għaliex analiżi segmentata tad-dannu tkun ġustifikata f’dan il-każ.

(163)

Fin-nuqqas ta’ kummenti oħra, il-kunsiderazzjonijiet fil-premessi (310) sa (317) tar-Regolament proviżorju ġew ikkonfermati.

(164)

Il-korrezzjoni tat-tabella 6 msemmija fit-taqsima 4.5.2.2 hawn taħt kellha impatt żgħir fuq it-tabella 2 tar-Regolament proviżorju. It-tabella definittiva 2 hija kif ġej:

Tabella 2

Konsum tal-Unjoni (tunnellati)

(165)

Wara d-divulgazzjoni proviżorja, is-CCCMC iddikjarat li l-konsum jenħtieġ li jiġi kkalkulat billi jingħaddu flimkien il-bejgħ totali tal-industrija tal-Unjoni, flimkien mal-importazzjonijiet fl-Unjoni mingħajr l-esportazzjonijiet totali tal-Unjoni tal-bijodiżil. Il-Kummissjoni ċaħdet il-proposta minħabba li xejn ma qajjem dubji dwar l-affidabbiltà tal-metodoloġija deskritta fil-premessa (318) tar-Regolament proviżorju.

(166)

Il-korrezzjoni tat-tabella 6 msemmija fit-taqsima 4.5.2.2 hawn taħt kellha impatt minuri fuq is-sehem mis-suq matul il-perjodu ta’ investigazzjoni ppubblikat fit-tabella 3 tar-Regolament proviżorju. It-tabella definittiva 3 hija kif ġej:

Tabella 3

Volum tal-importazzjonijiet (tunnellati) u sehem mis-suq

(167)

F’sottomissjoni datata s-26 ta’ Jannar 2024 (68), is-CCCMC kienet talbet lill-Kummissjoni tagħmel disponibbli għall-parti u fil-fajl mhux kunfidenzjali d-data ta’ monitoraġġ dwar l-importazzjoni li tikkonċerna l-perjodu ta’ investigazzjoni kollu. Fil-fehma tal-parti, l-għoti tad-data annwali dwar l-importazzjoni fir-Regolament proviżorju ma setax jammonta għal (i) disponibbiltà fil-pront ta’/aċċess f’waqtu għall-informazzjoni mitluba fi stadju bikri tal-proċediment jew (ii) opportunità xierqa għall-partijiet interessati biex jużaw l-informazzjoni fil-preżentazzjoni tal-każijiet tagħhom. Wara d-divulgazzjoni proviżorja, is-CCCMC tenniet it-talba tagħha li jenħtieġ li l-Kummissjoni tagħmel id-data dwar l-importazzjoni ta’ kull xahar disponibbli fil-fajl mhux kunfidenzjali. Il-Kummissjoni pprovdiet volumi tal-importazzjoni ta’ kull xahar tal-bijodiżil Ċiniż lis-CCCMC fl-1 ta’ Ottubru 2024.

(168)

Fin-nuqqas ta’ kummenti oħra u meta wieħed iżomm f’moħħu t-tabella definittiva 2, il-kunsiderazzjonijiet fil-premessi (321) sa (325) tar-Regolament proviżorju ġew ikkonfermati.

(169)

Skont is-CCCMC, il-Kummissjoni kisret il-liġi tad-WTO minħabba li r-Regolament proviżorju rraġuna jew spjega b’mod inadegwat ir-raġunijiet għar-rifjut tat-talba tas-CCCMC biex ma tiffokax l-analiżi tal-effetti fuq il-prezz/it-twaqqigħ tal-prezz fuq sena waħda tal-perjodu taħt kunsiderazzjoni. Is-CCCMC żiedet li l-Kummissjoni għandha l-obbligu affermattiv li twettaq valutazzjoni dinamika tax-xejriet fir-relazzjoni bejn il-prezzijiet tal-importazzjonijiet oġġett ta’ dumping u l-prodotti simili domestiċi (b’hekk is-CCCMC ma tridx tiġġustifika talba għal xejriet ta’ twaqqigħ tal-prezz matul il-perjodu kollu taħt kunsiderazzjoni) u l-ġurisprudenza tad-WTO, jiġifieri li l-awtorità investigattiva Marokkina kienet difettuża meta ġabret data għal 4 snin għall-fini tal-valutazzjoni tad-dannu iżda llimitat it-twaqqigħ tal-prezz għall-aħħar 12-il xahar (DS578 (69)). Is-CCCMC argumentat li l-partijiet interessati mhumiex mistennija jinvolvu ruħhom f’kalkoli retroattivi, allegatament li ma jistgħux jikkummentaw b’mod sinifikanti dwar l-analiżi tat-twaqqigħ tal-prezz u talbet verżjoni mhux kunfidenzjali dettaljata li turi li t-twaqqigħ tal-prezz instab għal 100 % tal-volumi importati mill-kumpaniji inklużi fil-kampjun. F’dan ir-rigward, is-CCCMC allegat diskrepanza fil-ġabriet ta’ importazzjonijiet u prodotti simili tal-Unjoni msemmija fil-premessa (329) tar-Regolament proviżorju u għall-fatt li l-prezzijiet tal-importazzjoni Ċiniżi fit-tabella 4 kienu ogħla mill-prezzijiet tal-bejgħ mill-produtturi tal-Unjoni fit-tabella 8 tar-Regolament proviżorju.

(170)

Il-Kummissjoni ċaħdet l-affermazzjonijiet tas-CCCMC. Il-Kummissjoni nnutat li d-data li nġabret matul l-investigazzjoni ppermettiet kalkoli dettaljati tat-twaqqigħ tal-prezz għall-perjodu ta’ investigazzjoni biss. Dan il-fatt ma waqqafx lill-Kummissjoni milli tivvaluta x-xejriet fir-relazzjoni bejn il-prezzijiet tal-importazzjonijiet oġġett ta’ dumping u l-prodotti simili domestiċi matul il-perjodu kollu taħt kunsiderazzjoni sal-punt li l-Kummissjoni ġabret data mill-kumpaniji inklużi fil-kampjun għall-perjodu kollu taħt kunsiderazzjoni u ppreżentat u spjegat it-tabelli 4 u 8 fir-Regolament proviżorju. It-taħlita tal-prodotti u l-volumi ta’ bejgħ relattivi tal-produtturi tal-Unjoni inklużi fil-kampjun kienu konsistenti matul il-perjodu taħt kunsiderazzjoni u ma hemm l-ebda indikazzjoni fil-fajl li t-taħlita tal-prodotti tal-importazzjonijiet Ċiniżi kienet soġġetta għal bidla sinifikanti f’dak il-perjodu. Filwaqt li t-taħlitiet tal-prodotti rispettivi tal-produtturi tal-Unjoni u tal-produtturi-esportaturi Ċiniżi kienu differenti minn xulxin matul il-perjodu ta’ investigazzjoni u b’hekk ma jistgħux jitqabblu direttament, tqabbil bejn il-prezzijiet tal-bejgħ imsemmija fit-tabelli 4 u 8 juri li d-differenza bejn il-prezzijiet medji tal-bejgħ Ċiniżi u Ewropej tvarja bejn EUR 170/tunnellata u EUR 200/tunnellata, bl-eċċezzjoni tal-2022, meta dik id-differenza kienet ħafna iżgħar. Huwa importanti li wieħed jinnota li l-prezz unitarju medju tal-industrija tal-Unjoni fit-tabella 8 kien jinkludi t-tipi kollha ta’ prodotti mibjugħa mill-industrija tal-Unjoni fis-suq tal-Unjoni matul il-perjodu ta’ investigazzjoni. Mhux dawn it-tipi kollha ta’ prodotti kienu direttament komparabbli ma’ dawk mibjugħa mill-produtturi esportaturi Ċiniżi u kienu kkunsidrati biss tipi ta’ prodotti direttament komparabbli fil-kalkolu tat-twaqqigħ tal-prezz. Meta sar it-tqabbil fil-livell tat-tip ta’ prodott għal prodotti direttament komparabbli, ġie osservat livell medju ta’ twaqqigħ tal-prezz ta’ 10,1 %.

(171)

Minħabba li t-taħlitiet tal-prodotti kemm għall-industrija tal-Unjoni kif ukoll għall-produtturi esportaturi baqgħu relattivament stabbli matul il-perjodu taħt kunsiderazzjoni, x’aktarx li differenza simili jew iżgħar fil-prezz favur l-industrija tal-Unjoni (meta l-prezz unitarju medju huwa bbażat fuq it-tipi kollha ta’ prodotti mibjugħa fis-suq tal-Unjoni) minn dik osservata fil-perjodu ta’ investigazzjoni, xorta waħda tirriżulta fi twaqqigħ tal-prezz mill-produtturi esportaturi Ċiniżi meta jitqiesu biss it-tipi ta’ prodotti direttament komparabbli. Fuq dik il-bażi, it-twaqqigħ tal-prezz x’aktarx li seħħ ukoll fit-3 snin ta’ qabel il-perjodu ta’ investigazzjoni, f’livelli komparabbli fl-2020 u l-2021 u probabbilment f’livell ferm ogħla fl-2022. Minn dan isegwi li, għall-kuntrarju tal-affermazzjoni, il-Kummissjoni wettqet valutazzjoni dinamika tal-effetti fuq il-prezz matul il-perjodu kollu taħt kunsiderazzjoni. Madankollu, meta jitqies li d-data għall-perjodu ta’ investigazzjoni hija ferm aktar granulari mid-data għas-snin preċedenti, dik il-valutazzjoni għas-snin ta’ qabel il-perjodu ta’ investigazzjoni kienet ibbażata fuq estrapolazzjonijiet raġonevoli, abbażi tad-data u l-informazzjoni disponibbli għall-Kummissjoni fiż-żmien tal-investigazzjoni.

(172)

Fir-rigward tad-divulgazzjoni tal-kalkoli dettaljati tat-twaqqigħ tal-prezz, il-Kummissjoni żvelathom lil dawk il-partijiet li setgħu jikkummentaw b’mod sinifikanti dwar l-output (peress li l-marġni tat-twaqqigħ tal-prezz huwa r-riżultat ta’ konsolidazzjoni tad-data sottomessa biss b’mod kunfidenzjali lill-Kummissjoni). Il-Kummissjoni kkonfermat li, kif iddikjarat fil-premessa (332) tar-Regolament proviżorju, instab twaqqigħ tal-prezz għal 100 % tal-volumi importati minn kumpaniji fil-kampjun li ma jfissirx li 100 % tal-prodotti simili magħmula mill-industrija tal-Unjoni ġew imqabbla. Il-kalkoli dettaljati tat-twaqqigħ tal-prezz urew li, matul il-perjodu ta’ investigazzjoni, il-prezz medju tal-bejgħ tal-bijodiżil magħmul fl-Unjoni li kien ġie mqabbel mal-importazzjonijiet Ċiniżi kien ferm ogħla mill-prezz tal-bejgħ fit-tabella 8 tar-Regolament proviżorju, jiġifieri fil-medda ta’ EUR 1 590–2 400/tunnellata.

(173)

Il-grupp Jiaao argumenta li l-kostijiet ta’ wara l-importazzjoni użati mill-Kummissjoni kienu skaduti u wkoll aktar baxxi milli fi tliet investigazzjonijiet anti-dumping preċedenti (70). Jekk il-Kummissjoni tinsisti li tirrikorri għall-kostijiet ta’ wara l-importazzjoni ddeterminati f’investigazzjonijiet anti-dumping preċedenti tal-bijodiżil, il-parti pproponiet il-proporzjon tal-kostijiet ta’ wara l-importazzjoni għall-prezz CIF, jiġifieri EUR 14,08/tunnellata (71) bħala parametru referenzjarju aktar xieraq.

(174)

Il-Kummissjoni qieset il-livell tal-kostijiet ta’ wara l-importazzjoni bħala speċifiku għall-każ u għall-prodott. Fin-nuqqas ta’ data verifikata affidabbli fil-kuntest tal-proċediment preżenti, il-Kummissjoni kkonfermat l-adegwatezza li wieħed jirrikorri għall-kostijiet ta’ wara l-importazzjoni minn investigazzjoni preċedenti dwar il-bijodiżil (72). L-affermazzjonijiet ta’ Jiaao Group ġew miċħuda.

(175)

Wara d-divulgazzjoni proviżorja, il-grupp EcoCeres talab aġġustament tal-kostijiet ta’ wara l-importazzjoni minn EUR 8,5/tunnellata għal mill-inqas EUR 10/tunnellata sabiex jirrifletti l-inflazzjoni li seħħet fiż-żona tal-euro mill-2018. Fin-nuqqas ta’ prova li l-bidliet fil-prezzijiet għall-unitajiet domestiċi kellhom impatt fuq il-kostijiet mhux domestiċi bħall-kostijiet ta’ wara l-importazzjoni u sa liema punt, il-Kummissjoni ċaħdet l-affermazzjoni ta’ EcoCeres.

(176)

Barra minn hekk, minbarra li stabbilixxiet it-twaqqigħ tal-prezz, il-Kummissjoni ddeterminat ukoll fil-premessa (365) tar-Regolament proviżorju li l-importazzjonijiet Ċiniżi jeżerċitaw trażżin tal-prezz għall-prezzijiet tal-industrija tal-Unjoni u b’hekk iġiegħlu lill-industrija tal-Unjoni tbigħ biss ftit ogħla mill-kostijiet u, b’riżultat ta’ dan, ma tiksibx profitt tajjeb. Is-sejbiet ta’ trażżin tal-prezz fil-livell makro ġew ikkonfermati wkoll mis-sejbiet ta’ bejgħ bil-prezz imwaqqa’ b’mod sinifikanti fir-rigward ta’ kull produttur esportatur fil-kampjun matul il-perjodu ta’ investigazzjoni. Kif stabbilit fil-premessa (232), il-marġnijiet tal-bejgħ bil-prezz imwaqqa’ varjaw minn 16,4 % sa 44,3 %. Konsegwentement, minħabba t-trażżin tal-prezz, l-industrija tal-Unjoni biegħet bi prezzijiet li lanqas biss koprew il-kost tal-produzzjoni tagħha, u wisq inqas marġni ta’ profitt normali. Għalhekk, is-sejbiet ta’ trażżin tal-prezz tal-importazzjonijiet oġġett ta’ dumping mill-pajjiżi kkonċernati ġew ikkonfermati fl-istadju definittiv.

(177)

Fin-nuqqas ta’ kummenti oħra, il-kunsiderazzjonijiet fil-premessi (326) sa (332) tar-Regolament proviżorju ġew ikkonfermati.

(178)

Fin-nuqqas ta’ kummenti oħra, il-kunsiderazzjonijiet fil-premessi (333) sa (337) tar-Regolament proviżorju ġew ikkonfermati.

(179)

Wara d-divulgazzjoni proviżorja, is-CCCMC allegat li l-Kummissjoni kienet kisret l-impenji tagħha tad-WTO (73) minħabba li r-Regolament proviżorju rraġuna jew spjega b’mod inadegwat il-bażi għall-kalkolu tal-kwantità tal-produzzjoni u l-kapaċità tal-produzzjoni tal-Unjoni għall-SAF imsemmija fin-nota f’qiegħ il-paġna 167 tar-Regolament proviżorju. Għal finijiet ta’ ċarezza, il-Kummissjoni fakkret fit-test ta’ dik in-nota f’qiegħ il-paġna, li huwa kif ġej: “Kif innutat fil-premessa (57), l-SAF ġie eskluż mill-ambitu tal-prodotti u l-volumi tal-SAF esklużi. Għaldaqstant, mir-rispons makro tal-EBB, il-Kummissjoni naqqset il-produzzjoni stmata tal-SAF (jiġifieri 75 000 tunnellata fl-2022 u 150 000 tunnellata fil-perjodu ta’ investigazzjoni) u l-kapaċità stmata għall-SAF.” Il-Kummissjoni sabet li l-affermazzjoni tas-CCCMC ma kinitx ġustifikata. Il-metodoloġija tal-Kummissjoni kienet tikkonsisti fit-tnaqqis ta’ ammont raġonevoli (jiġifieri 150 000 tunnellata) mir-rispons makro tal-EBB li juri volum tal-produzzjoni ta’ 14 925 455 tunnellata fil-perjodu ta’ investigazzjoni, b’riżultat ta’ 14 775 455 tunnellata, jiġifieri ċ-ċifra rilevanti fit-tabella 5 tar-Regolament proviżorju. L-ammonti mnaqqsa kienu bbażati fuq l-aħjar informazzjoni disponibbli lill-Kummissjoni dwar il-produzzjoni tal-SAF fl-Unjoni, inkluż l-informazzjoni dwar is-suq, id-data mill-produtturi tal-Unjoni, l-istimi minn EcoCeres (74) u l-għarfien komuni li l-produzzjoni tal-SAF żdiedet aktar qrib il-bidu tal-mandat tal-2025. Ta’ min jinnota li la s-CCCMC u lanqas partijiet oħra ma pproponew metodoloġija alternattiva biex jiġu stabbiliti l-volumi tal-SAF li għandhom jiġu esklużi mid-data makro tal-EBB.

(180)

Skont is-CCCMC, l-affermazzjoni fir-Regolament proviżorju li l-volumi tal-produzzjoni “naqsu b’mod sinifikanti” fil-perjodu ta’ investigazzjoni ma kinitx appoġġjata minn evidenza. Is-CCCMC argumentat ukoll li, fi kwalunkwe każ, it-tnaqqis ma setax jiġi imputat lill-importazzjonijiet miċ-Ċina. Il-Kummissjoni nnutat li t-tnaqqis fil-produzzjoni bejn l-2022 u l-perjodu ta’ investigazzjoni kien evidenti (-3 %) u definittivament imur kontra ż-żieda fil-konsum. Il-kawża tat-tnaqqis ġiet analizzata fit-taqsima 5 tar-Regolament proviżorju.

(181)

Fin-nuqqas ta’ kummenti oħra dwar din it-taqsima, il-konklużjonijiet fil-premessi (338) sa (339) tar-Regolament proviżorju ġew ikkonfermati.

(182)

Wara l-pubblikazzjoni tar-Regolament proviżorju, il-Kummissjoni identifikat żbalji klerikali fit-tabella 6. It-tabella 6 hija kkoreġuta kif ġej:

Tabella 6

Volum tal-bejgħ u sehem mis-suq

(183)

Fil-kummenti tagħha wara d-divulgazzjoni proviżorja, is-CCCMC innutat li l-importazzjonijiet Ċiniżi fl-2022 kienu fil-livell tal-2020 u żiedet li l-livell tal-bejgħ mill-produtturi tal-Unjoni beda jonqos meta l-importazzjonijiet Ċiniżi kienu baxxi daqs fl-2020. Billi ffukat biss fuq is-snin 2022 u 2020, is-CCCMC irrappreżentat ħażin il-korrelazzjoni bejn l-evoluzzjoni tal-importazzjonijiet mill-pajjiż ikkonċernat u l-livell tal-bejgħ mill-industrija tal-Unjoni. Meta jitqies l-iżvilupp ta’ dawk iż-żewġ indikaturi tad-dannu matul il-perjodu taħt kunsiderazzjoni, huwa evidenti li l-livell tal-bejgħ mill-produtturi tal-Unjoni naqas meta l-importazzjonijiet Ċiniżi żdiedu (pereżempju + 52 % bejn l-2022 u l-perjodu ta’ investigazzjoni). Għalhekk, il-Kummissjoni ċaħdet l-affermazzjoni.

(184)

Fil-kummenti tagħha wara d-divulgazzjoni proviżorja, is-CCCMC allegat li l-produtturi tal-Unjoni tilfu l-biċċa l-kbira tas-sehem mis-suq tagħhom meta l-importazzjonijiet Ċiniżi kellhom sehem mis-suq baxx daqs 2,8 %. Il-Kummissjoni ċaħdet l-affermazzjoni minħabba li s-sehem mis-suq tal-produtturi tal-Unjoni naqas l-aktar bejn l-2021 u l-2022, meta l-importazzjonijiet Ċiniżi bdew jiżdiedu b’mod sinifikanti (+ 96 % bejn l-2021 u l-2022).

(185)

Fin-nuqqas ta’ kummenti oħra dwar din it-taqsima u meta wieħed iżomm f’moħħu l-verżjoni kkoreġuta tat-tabella 6, il-konklużjonijiet fil-premessi (340) sa (341) tar-Regolament proviżorju ġew ikkonfermati.

(186)

Fil-kummenti tagħha wara d-divulgazzjoni proviżorja, is-CCCMC ikkontestat il-konklużjoni tal-Kummissjoni ta’ ebda tkabbir minħabba li t-tabella 11 tar-Regolament proviżorju turi żieda ġenerali fl-investimenti ta’ + 14 % u li l-informazzjoni disponibbli għall-pubbliku wriet riżultati ġeneralment tajbin għall-produtturi kollha tal-Unjoni inklużi fil-kampjun flimkien mal-produttur tal-Unjoni Astra Bioplant. Il-Kummissjoni nnutat li l-informazzjoni disponibbli għall-pubbliku pprovduta mill-parti kienet tinkludi stqarrija għall-istampa ppubblikata wara l-perjodu ta’ investigazzjoni u r-Rapporti Annwali tal-2023 għall-grupp Eni kollu u għal Chevron Corporation (75), u, għaldaqstant. ma setgħetx tkun rappreżentattiva tas-sitwazzjoni tal-produzzjoni tal-Unjoni tal-bijodiżil matul il-perjodu ta’ investigazzjoni. Il-Kummissjoni ċaħdet l-affermazzjonijiet tas-CCCMC.

(187)

Fin-nuqqas ta’ kummenti oħra dwar din it-taqsima, il-konklużjonijiet fil-premessa (342) tar-Regolament proviżorju ġew ikkonfermati.

(188)

Fil-kummenti tagħha wara d-divulgazzjoni proviżorja, is-CCCMC allegat li l-Kummissjoni kienet kisret l-impenji tagħha tad-WTO (76) peress li naqset milli tiġġustifika li minkejja n-nuqqasijiet, l-għadd stmat ta’ impjegati ppreżentat fit-tabella 7 tar-Regolament provviżorju kien raġonevolment preċiż u adegwat għall-fini ta’ din l-investigazzjoni. Il-Kummissjoni ma qablitx mas-CCCMC. It-tabella 7 tar-Regolament proviżorju tirrifletti d-data dwar l-impjiegi kif irrappurtata minn 31 produttur tal-bijodiżil lill-ilmentatur, flimkien ma’ estrapolazzjoni għal dawk li ma wiġbux abbażi taċ-ċifri tal-impjiegi pprovduti minn dawk li ma wieġbu. Ir-Regolament proviżorju nnota li mhux il-produtturi kollha tal-Unjoni rrappurtaw data dwar l-impjiegi lill-EBB bl-istess approċċ u li xi stimi kienu meħtieġa għal kumpaniji li ma rrappurtawx. Il-Kummissjoni ma qisitx li din is-sitwazzjoni kienet twassal biex iċ-ċifri tal-impjiegi sottomessi mill-EBB ma jitqisux validi, b’mod partikolari peress li l-Kummissjoni nnifisha wettqet kontroverifika ta’ parti sinifikanti matul iż-żjarat ta’ verifika lill-produtturi tal-Unjoni inklużi fil-kampjun u mill-ilmentatur. L-ebda parti interessata ma pprovdiet settijiet oħra ta’ data li setgħu jqajmu dubji jew jissostitwixxu ċ-ċifri tal-impjiegi sottomessi mill-EBB u jbiddlu l-konklużjonijiet tal-Kummissjoni.

(189)

Wara d-divulgazzjoni proviżorja, is-CCCMC tenniet li żieda fl-impjiegi kienet sinjal ċar ta’ industrija b’saħħitha u mbagħad ikkontestat il-kunsiderazzjonijiet tal-Kummissjoni fil-premessa (345) tar-Regolament proviżorju fir-rigward tar-raġunament tas-CCCMC dwar it-tnaqqis fil-produttività. Is-CCCMC argumentat li t-tnaqqis fil-produttività ma setax jiġi attribwit għall-importazzjonijiet Ċiniżi peress li l-produttività naqset l-aktar (b’5 %) fl-2021, jiġifieri s-sena meta l-importazzjonijiet Ċiniżi kienu l-aktar baxxi fil-perjodu taħt kunsiderazzjoni. Il-Kummissjoni nnutat il-korrelazzjoni ċara bejn il-produttività aktar baxxa fit-tieni parti tal-perjodu taħt kunsiderazzjoni u ż-żieda fl-importazzjonijiet miċ-Ċina bejn l-2022 u l-perjodu ta’ investigazzjoni (+ 55 %) u ċaħdet l-affermazzjonijiet tas-CCCMC.

(190)

Fin-nuqqas ta’ kummenti oħra dwar din it-taqsima, il-konklużjonijiet fil-premessi (343) sa (345) tar-Regolament proviżorju ġew ikkonfermati.

(191)

Fin-nuqqas ta’ kummenti dwar din it-taqsima, il-konklużjonijiet fil-premessi (346) sa (348) tar-Regolament proviżorju ġew ikkonfermati.

(192)

Wara d-divulgazzjoni proviżorja, is-CCCMC iddikjarat li s-sejbiet tal-Kummissjoni ma setgħux jeżistu mingħajr analiżi segmentata tad-dannu u mbagħad indikat iż-żieda sinifikanti fil-prezzijiet tal-bejgħ tal-produtturi tal-Unjoni (+ 69 %) b’mod ġenerali minkejja ż-żieda fl-importazzjonijiet miċ-Ċina. Barra minn hekk, is-CCCMC iddikjarat li l-importazzjonijiet Ċiniżi ma setgħux jiġu kkritikati għad-diskrepanza li tvarja bejn il-prezzijiet tal-bejgħ u l-kost unitarju tal-produzzjoni fit-tabella 8 tar-Regolament proviżorju. Is-CCCMC allegat ukoll valutazzjoni insuffiċjenti tal-fatturi li jaffettwaw il-prezzijiet, bħall-kapaċità li l-kostijiet jgħaddu għall-konsumaturi u l-kostijiet fissi għoljin minħabba l-kapaċità żejda u l-livell għoli ta’ impjieg.

(193)

Il-Kummissjoni nnutat li, anki jekk il-prezzijiet tal-Unjoni żdiedu u d-distakk bejn il-prezzijiet medji tal-bejgħ tal-Unjoni u l-kost unitarju medju tal-produzzjoni varja, fil-perjodu ta’ investigazzjoni, meta l-livell tal-importazzjonijiet Ċiniżi kif ukoll il-konsum tal-Unjoni kienu l-ogħla, il-prezzijiet medji tal-bejgħ tal-industrija tal-Unjoni kienu biss EUR 2 (jew 0,1 %) ogħla mill-kostijiet, li mhuwiex sostenibbli. F’kuntest ta’ domanda għolja u suq speċjali marbut b’miri ta’ sostenibbiltà u dekarbonizzazzjoni, il-Kummissjoni ma qablitx li l-klijenti ma jaċċettawx li l-kostijiet jgħaddu lihom mill-produtturi. Il-Kummissjoni qablet li l-kostijiet fissi jiżdiedu b’volum tal-produzzjoni aktar baxx, madankollu, dan il-volum tal-produzzjoni aktar baxx ma kienx għażla iżda rispons meħtieġ mill-produtturi tal-Unjoni għall-influss ta’ importazzjonijiet bi prezz baxx miċ-Ċina li kienu jgħoddu darbtejn għal ċerti miri tal-enerġija rinnovabbli tal-UE, kif spjegat fil-premessa (329) tar-Regolament proviżorju.

(194)

Fin-nuqqas ta’ kummenti oħra dwar din it-taqsima, il-konklużjonijiet fil-premessi (349) sa (351) tar-Regolament proviżorju ġew ikkonfermati.

(195)

Fin-nuqqas ta’ kummenti dwar din it-taqsima, il-konklużjonijiet fil-premessi (352) sa (353) tar-Regolament proviżorju ġew ikkonfermati.

(196)

Fin-nuqqas ta’ kummenti ġodda dwar din it-taqsima, il-konklużjonijiet fil-premessi (354) sa (355) tar-Regolament proviżorju ġew ikkonfermati.

(197)

Wara d-divulgazzjoni proviżorja, is-CCCMC innutat nuqqas ta’ valutazzjoni tal-kapaċità tal-ħila tal-Unjoni għall-akkwist tal-kapital. Is-CCCMC allegat ukoll nuqqas ta’ korrelazzjoni bejn l-importazzjonijiet Ċiniżi u d-dannu mġarrab mill-produtturi tal-Unjoni peress li, meta l-importazzjonijiet Ċiniżi naqsu fl-2021, il-profittabbiltà tal-produtturi tal-Unjoni u indikaturi oħra naqsu wkoll, u, meta l-importazzjonijiet Ċiniżi żdiedu fl-2022, il-produtturi tal-Unjoni marru aħjar. Barra minn hekk, il-parti argumentat li l-Kummissjoni kienet naqset milli tikkunsidra fatturi ta’ dannu fil-kuntest u b’rabta ma’ xulxin, bħal li investimenti addizzjonali kien ikollhom impatt negattiv fuq il-profittabbiltà tal-industrija tal-Unjoni, u li l-Kummissjoni kienet naqset milli tqis evidenza li dehret li kienet f’kunflitt mal-ipoteżijiet tal-Kummissjoni.

(198)

Fir-rigward tal-kapaċità tal-industrija tal-Unjoni li tiġbor il-kapital, il-Kummissjoni nnutat li dan kien imfixkel mill-flussi ta’ flus negattivi ħafna mill-2021.

(199)

L-allegat nuqqas ta’ korrelazzjoni bejn l-importazzjonijiet Ċiniżi u d-dannu mġarrab mill-produtturi tal-Unjoni ma kienx fondat. Il-Kummissjoni fakkret li l-akbar tnaqqis drammatiku fil-profittabbiltà kien bejn l-2022 u l-perjodu ta’ investigazzjoni, jiġifieri meta l-importazzjonijiet Ċiniżi laħqu l-ogħla livell tagħhom. F’dak il-mument, il-profittabbiltà tal-industrija tal-Unjoni saret baxxa daqs 0,1 %, li hija ferm inqas minn kwalunkwe profitt fil-mira raġonevoli.

(200)

Il-Kummissjoni kkontestat li injorat il-provi li jikkontradixxu l-analiżi tagħha. Il-Kummissjoni ma setgħetx taqbel li l-elementi miġjuba mis-CCCMC kienu rilevanti għall-investigazzjoni, b’mod partikolari l-estrapolazzjoni mis-CCCMC tar-riżultati tal-2023 ta’ Chevron Corporation, korporazzjoni multinazzjonali Amerikana tal-enerġija speċjalizzata fiż-żejt u fil-gass u attiva f’aktar minn 180 pajjiż, għall-attivitajiet tal-bijodiżil tal-produttur tal-Unjoni inkluż fil-kampjun Chevron; jew l-estrapolazzjoni mis-CCCMC tar-riżultati tal-2023 tal-korporazzjoni tal-enerġija multinazzjonali Taljana Eni, speċjalizzata fiż-żejt u attiva f’aktar minn 60 pajjiż, għall-attivitajiet tal-bijodiżil tal-produttur tal-Unjoni fil-kampjun (Bio)Raffineria di Gela. Il-Kummissjoni qieset il-fatturi tad-dannu fil-kuntest u b’rabta ma’ xulxin u, f’dan ir-rigward, ma setgħetx tikkonkludi li l-investimenti addizzjonali kellhom effett negattiv fuq il-profittabbiltà tal-industrija tal-Unjoni sal-punt li l-investimenti l-ġodda fit-tul kellhom impatt fuq il-karta bilanċjali u l-kostijiet ta’ deprezzament peress li dawk l-investimenti inizjalment kienu baxxi.

(201)

Fin-nuqqas ta’ kummenti oħra dwar din it-taqsima, il-konklużjonijiet fil-premessi (356) sa (360) tar-Regolament proviżorju ġew ikkonfermati.

(202)

Fil-konklużjoni tagħha għall-kummenti dwar id-divulgazzjoni proviżorja, is-CCCMC ma tikkontestax li ċerti indikaturi tad-dannu li jikkonċernaw l-industrija tal-Unjoni dehru li marru għall-agħar matul il-perjodu taħt kunsiderazzjoni.

(203)

Fin-nuqqas ta’ kummenti oħra dwar din it-taqsima, il-Kummissjoni kkonfermat il-konklużjoni tagħha fil-premessi (361) sa (362) tar-Regolament proviżorju u kkonkludiet b’mod definittiv li l-industrija tal-Unjoni ġarrbet dannu materjali skont it-tifsira tal-Artikolu 3(5) tar-Regolament bażiku.

(204)

L-importatur relatat Excellence New Energy B.V. allega li l-prezzijiet għall-FAME kienu qed jonqsu wara l-impożizzjoni ta’ miżuri proviżorji mhux minħabba l-bijodiżil Ċiniż iżda minħabba diversi raġunijiet oħra bħal ċaqliq ta’ ċiklu kbir fis-suq tal-prodotti taż-żejt, bidliet ġeopolitiċi li jkomplu jinfluwenzaw il-provvista/id-domanda, tnaqqis fiż-żejt veġetali u ż-żieda fis-suq tal-HVO. Il-Kummissjoni nnutat li l-avvenimenti wara l-perjodu ta’ investigazzjoni ma setgħux jimminaw il-konklużjoni li l-importazzjonijiet oġġett ta’ dumping miċ-Ċina kkawżaw dannu materjali lill-industrija tal-Unjoni matul il-perjodu ta’ investigazzjoni, u b’hekk l-impożizzjoni ta’ miżuri anti-dumping kienet ġustifikata.

(205)

Fil-kummenti tagħha wara d-divulgazzjoni proviżorja, is-CCCMC iddikjarat li l-Kummissjoni kellha tiżgura li l-importazzjonijiet Ċiniżi u l-prodotti domestiċi simili (l-aktar l-FAME bbażat fuq l-għelejjel u l-għalf) kienu sostitwibbli biżżejjed qabel ma ġiet stabbilita relazzjoni kawżali bejn l-importazzjonijiet Ċiniżi u d-dannu materjali mġarrab mill-produtturi tal-Unjoni. Il-Kummissjoni għamlet referenza għat-taqsimiet 2.3 u 2.4 tar-Regolament proviżorju, li kkonfermaw li l-importazzjonijiet Ċiniżi u l-prodotti domestiċi kienu prodotti simili u sostitwibbli.

(206)

Minkejja l-konklużjoni tal-Kummissjoni msemmija fit-taqsima 4.5.4 tar-Regolament proviżorju, is-CCCMC argumentat li l-importazzjonijiet Ċiniżi tal-bijodiżil ma kellhom l-ebda forza ta’ spjegazzjoni fir-rigward tax-xejriet negattivi murija minn ċerti indikaturi tad-dannu. Is-CCCMC iddikjarat li t-test tal-attribuzzjoni pożittiva ma ġiex issodisfat peress li l-Kummissjoni naqset milli tispjega għaliex it-tnaqqis drammatiku fis-sehem mis-suq tal-industrija tal-Unjoni seta’ jiġi attribwit għall-importazzjonijiet Ċiniżi, li s-sehem mis-suq tagħhom kien baxx u kien jiswa aktar flus minn importazzjonijiet oħra. Is-CCCMC argumentat li l-Kummissjoni kienet kisret il-liġi tad-WTO (77) minħabba li r-Regolament proviżorju ma kien fih l-ebda valutazzjoni indipendenti u l-ebda raġunament (suffiċjenti) li l-prezzijiet allegatament “baxxi” tal-importazzjonijiet Ċiniżi “rriżultaw f’trażżin tal-prezz fis-suq tal-Unjoni, u b’riżultat ta’ dan l-industrija tal-Unjoni ma setgħetx tagħmel profitti tajbin”. Is-CCCMC argumentat li ma tistax tiġi preżunta sejba ta’ trażżin tal-prezz u li l-prezzijiet tal-bejgħ, il-prezzijiet tal-importazzjoni, il-volumi u diversi xejriet murija fir-Regolament proviżorju wrew li l-importazzjonijiet Ċiniżi qatt ma setgħu kkawżaw twaqqigħ tal-prezz jew trażżin tal-prezz minħabba li l-prezzijiet tal-importazzjonijiet Ċiniżi tal-bijodiżil baqgħu ogħla mill-prezzijiet tal-Unjoni u żdiedu b’53 % matul il-perjodu taħt kunsiderazzjoni. Skont is-CCCMC, minħabba li l-prezzijiet medji tal-importazzjoni miċ-Ċina kienu ħafna ogħla mill-prezzijiet medji tal-bejgħ mill-produtturi tal-Unjoni inklużi fil-kampjun, ma kienx ċar kif l-importazzjonijiet “waqqgħu”, “rażżnu”, jew ma ħallewx il-prezzijiet unitarji domestiċi medji jiżdiedu.

(207)

Il-Kummissjoni ma aċċettatx l-affermazzjonijiet tas-CCCMC hawn fuq. L-importazzjonijiet fit-tabelli 4 u 8 tar-Regolament proviżorju kienu jikkonċernaw diversi taħlitiet ta’ prodotti (78), kif enfasizzat fil-premessa (370) tar-Regolament proviżorju. Tabilħaqq, matul il-perjodu ta’ investigazzjoni, il-prezz medju tal-bejgħ tal-bijodiżil magħmul fl-Unjoni li fl-aħħar mill-aħħar tqabbel mal-importazzjonijiet Ċiniżi kien ogħla mill-prezz tal-bejgħ fit-tabella 8 tar-Regolament proviżorju, jiġifieri fil-medda ta’ EUR 1 590 – 2 400/tunnellata, definittivament ogħla mill-importazzjonijiet miċ-Ċina. Minkejja dan il-fatt, meta qieset it-taħlita tal-prodotti mibjugħa mill-produtturi esportaturi u l-produtturi tal-Unjoni inklużi fil-kampjun, il-Kummissjoni stabbilixxiet kemm it-twaqqigħ tal-prezz kif ukoll it-trażżin tal-prezz. Barra minn hekk, kif spjegat fil-premessa (171) hawn fuq, huwa probabbli li t-twaqqigħ tal-prezz seħħ matul il-perjodu kkunsidrat peress li ma kien hemm l-ebda evidenza fil-fajl li t-taħlita tal-prodotti tal-importazzjonijiet u l-bejgħ tal-industrija tal-Unjoni nbidlu matul dak il-perjodu. Fil-perjodu ta’ investigazzjoni, għal tipi ta’ prodotti komparabbli, il-prezzijiet tal-importazzjonijiet Ċiniżi waqqgħu l-prezzijiet tal-industrija tal-Unjoni b’5,3 % sa 13,8 % filwaqt li l-prezzijiet tal-bejgħ tal-industrija tal-Unjoni ma setgħux jiżdiedu għal-livelli suffiċjenti biex jagħmlu profitti tajbin. Għall-identifikazzjoni tat-trażżin tal-prezz, il-Kummissjoni bdiet minn sitwazzjoni fattwali osservabbli (il-kalkoli fuq bażi ta’ tip b’tip stabbilixxew li l-prezzijiet tal-industrija tal-Unjoni kienu orħos mill-prezzijiet tal-bijodiżil Ċiniż), innutat li l-prezzijiet medji ġenerali tal-industrija tal-Unjoni kienu biss ftit ogħla mill-kost medju tal-produzzjoni tagħha u kkonkludiet li kieku ma kien hemm l-ebda trażżin tal-prezz Ċiniż, il-prezzijiet tal-produtturi tal-Unjoni kienu jiżdiedu b’mod naturali aktar milli għamlu. F’kuntest ta’ domanda b’saħħitha u żieda fid-domanda, il-Kummissjoni stenniet li l-firxa bejn il-prezz medju tal-bejgħ tal-Unjoni u l-kost tal-produzzjoni tiżdied, madankollu, il-firxa naqset minn EUR 26/tunnellata fl-2022 għal EUR 2/tunnellata fil-perjodu ta’ investigazzjoni. Il-Kummissjoni nnutat li l-livell ta’ twaqqigħ tal-prezz ġie kkonfermat fl-istadju definittiv tal-proċediment, livell meqjus bħala sostanzjali fil-kuntest ta’ prodott bażiku. Barra minn hekk, kif spjegat fil-premessa (176) hawn fuq, is-sejbiet tat-trażżin tal-prezz ġew ikkorroborati mill-marġnijiet tal-bejgħ bil-prezz imwaqqa’ stabbiliti għal kull produttur esportatur fil-kampjun.

(208)

Minbarra dan ta’ hawn fuq, il-Kummissjoni nnutat li l-istampa murija fit-tabella 3 hawn fuq ma tirriflettix li l-bijodiżil Ċiniż naqqas id-domanda fiżika għal tipi oħra ta’ bijodiżil, b’mod partikolari bijodiżil ibbażat fuq l-għelejjel fl-Unjoni, bid-doppju tal-ammonti fit-tabella 3 bħala riżultat tal-“għadd doppju” tal-bijodiżil Ċiniż li huwa spjegat aktar fit-taqsima li jmiss.

(209)

Fin-nuqqas ta’ kummenti oħra dwar din it-taqsima, il-konklużjonijiet fil-premessi (364) sa (367) tar-Regolament proviżorju ġew ikkonfermati.

(210)

Il-korrezzjoni tat-tabella 6 msemmija fit-taqsima 4.5.2.2 hawn fuq kellha impatt żgħir fuq uħud mill-ishma mis-suq ippubblikati fit-tabella 12 tar-Regolament proviżorju. It-tabella definittiva 12 hija kif ġej:

Tabella 12

Importazzjonijiet minn pajjiżi terzi

(211)

Fil-kummenti tagħha wara d-divulgazzjoni proviżorja, is-CCCMC insistiet li l-produtturi tal-Unjoni tilfu l-biċċa l-kbira tas-sehem mis-suq tagħhom meta żdiedu l-importazzjonijiet minn pajjiżi terzi. Is-CCCMC argumentat li filwaqt li s-sehem mis-suq tal-industrija tal-Unjoni naqas bi kważi 10 punti perċentwali matul il-perjodu taħt kunsiderazzjoni, is-sehem mis-suq Ċiniż żdied b’2,6 punti perċentwali, u b’hekk ħafna inqas mill-importazzjonijiet minn pajjiżi terzi. Is-CCCMC ilmentat li, fin-nuqqas ta’ informazzjoni dwar il-feedstocks tal-importazzjonijiet minn pajjiżi terzi, il-Kummissjoni naqset milli tagħmel konklużjoni sinifikanti dwar l-impatt ta’ dawk l-importazzjonijiet u li l-Kummissjoni għamlet suppożizzjonijiet li baqgħu mhux spjegati li skonthom l-importazzjonijiet minn pajjiżi terzi tipikament ma jattirawx prezzijiet ogħla fis-suq.

(212)

Il-Kummissjoni kkonfermat li, fid-dawl tal-informazzjoni disponibbli, sehem kbir tal-importazzjonijiet minn pajjiżi terzi għajr iċ-Ċina kien ibbażat fuq l-għelejjel, kif ikkonfermat minn, fost l-oħrajn, ir-Rapport Statistiku tal-EBB tal-2023 (81), ir-rapporti tal-GAIN dwar iċ-Ċina (82) u l-Unjoni Ewropea (83), l-informazzjoni dwar is-suq (84) u sensiela ta’ investigazzjonijiet għad-difiża tal-kummerċ li saru mill-Kummissjoni (85). Fir-rigward tal-importazzjonijiet minn Singapore, il-Kummissjoni ġabret evidenza li tindika li l-prezzijiet ta’ tali importazzjonijiet ma kinux jirriflettu l-kundizzjonijiet reali tas-suq. Fir-rigward tal-importazzjonijiet fl-Unjoni li joriġinaw mir-Renju Unit (86), dawn kienu fil-biċċa l-kbira prodotti kkumerċjalizzati (87), possibbilment bi bbilanċjar tal-pożizzjoni ta’ produtturi transfruntiera tar-Renju Unit (88)/tal-UE bi prezzijiet tat-trasferiment, li l-Kummissjoni ma setgħetx tkompli tittraċċa. Barra minn hekk, hemm indikazzjonijiet ta’ prattiki kummerċjali anormali fis-settur fir-Renju Unit matul il-perjodu taħt kunsiderazzjoni (89). It-tielet nett, l-awtoritajiet rilevanti tar-Renju Unit kienu qed jagħtu awtorizzazzjonijiet ta’ proċessar attiv lill-kumpaniji taż-żejt għal importazzjonijiet tal-bijodiżil, li ffaċilitaw il-kummerċ ta’ bijodiżil ta’ oriġini mhux mir-Renju Unit lejn l-Unjoni permezz tar-Renju Unit, u b’hekk ma tibqax tidher ċara l-istatistika. Dawn il-prattiki ntemmu biss reċentement (90) (91).

(213)

Il-Kummissjoni kkonfermat li, matul il-perjodu ta’ investigazzjoni, il-bijodiżil Ċiniż ibbażat fuq l-UCO/l-iskart iffaċilita t-twettiq aktar rapidu ta’ ċerti mandati nazzjonali permezz ta’ volumi fiżiċi aktar baxxi ta’ bijodiżil u attira primjum fis-suq tal-Unjoni. Skont id-Direttivi dwar l-Enerġija Rinnovabbli, l-Istati Membri jeħtiġilhom jilħqu sehem ta’ sorsi ta’ enerġija rinnovabbli fil-konsum tal-enerġija tagħhom. Biex jilħqu s-sehem fil-mira ġenerali tagħhom, l-Istati Membri għandhom miri/sottomandati differenti. Fis-settur tat-trasport, il-bijofjuwils avvanzati, b’mod partikolari l-bijodiżil magħmul mill-UCO u ċerti grassi tal-iskart, jistgħu jingħaddu darbtejn għall-miri nazzjonali. Dan l-għadd doppju jillimita l-effett li jiżdiedu l-mandati fuq il-volumi ta’ taħlit fiżiku peress li inqas (jiġifieri nofs) bijofjuwil huwa meħtieġ biex jiġi ssodisfat il-mandat.

(214)

Il-Kummissjoni nnutat li l-operaturi ma setgħux jilħqu l-mira tagħhom daqshekk malajr (bħal fil-każ tal-bijodiżil Ċiniż) permezz tal-biċċa l-kbira tal-importazzjonijiet minn pajjiżi terzi oħra minħabba li kienu bbażati fuq l-għelejjel. Għaldaqstant, il-Kummissjoni kkonkludiet li tqabbil sinifikanti tal-prezzijiet tal-bijodiżil, tal-volumi u tal-ishma mis-suq minn oriġini differenti seta’ jsir biss meta tiġi rikonoxxuta t-taħlita tal-prodotti involuta. L-importazzjonijiet ta’ bijodiżil ibbażat fuq l-għelejjel minn pajjiżi terzi oħra ma fixklux il-bijodiżil tal-Unjoni sal-punt (doppju) tal-bijodiżil Ċiniż u ma setgħux ikkawżaw dannu sal-punt li tittaffa’ r-rabta ta’ kawżalità bejn l-importazzjonijiet Ċiniżi oġġett ta’ dumping u s-sitwazzjoni dannuża tal-produtturi tal-Unjoni.

(215)

Fin-nuqqas ta’ kummenti oħra dwar din it-taqsima, il-konklużjonijiet fil-premessi (368) sa (372) tar-Regolament proviżorju ġew ikkonfermati meta wieħed iżomm f’moħħu t-tabella definittiva 12 hawn fuq.

(216)

Fin-nuqqas ta’ kummenti dwar din it-taqsima, il-konklużjonijiet fil-premessi (373) sa (376) tar-Regolament proviżorju ġew ikkonfermati.

(217)

Wara d-divulgazzjoni proviżorja, is-CCCMC sostniet li ż-żieda fil-kost tal-produzzjoni u fil-kostijiet lavorattivi u t-tnaqqis fil-produttività kienu kawża potenzjali ta’ dannu għall-industrija tal-Unjoni. Il-Kummissjoni ma aċċettatx l-affermazzjonijiet tas-CCCMC minħabba li kienet il-pressjoni fuq il-prezzijiet eżerċitata mill-bijodiżil Ċiniż li impediet lill-industrija tal-Unjoni milli tirrifletti ż-żidiet fil-kostijiet fil-prezzijiet. Għalhekk, iż-żieda fil-kost ma naqqsitx ir-rabta ta’ kawżalità li nstabet.

(218)

Fin-nuqqas ta’ kummenti oħra dwar din it-taqsima, il-konklużjonijiet fil-premessa (377) tar-Regolament proviżorju ġew ikkonfermati.

(219)

Is-CCCMC argumentat dannu li l-produtturi tal-Unjoni kkawżaw lilhom infushom fid-dawl tan-nuqqas ta’ kapaċità tagħhom li jipproduċu l-bijodiżil li jattira primjum tal-għadd doppju.

(220)

Il-Kummissjoni ma qablitx li l-produtturi tal-Unjoni ma setgħux jipproduċu l-bijodiżil li jattira primjum tal-għadd doppju. Il-Kummissjoni fakkret fil-premessa (57) tar-Regolament proviżorju u li l-kalkolu tat-twaqqigħ tal-prezz spjegat fit-taqsima 4.4.2 tar-Regolament proviżorju sar fuq bażi ta’ tip b’tip u li l-bijodiżil Ċiniż tqabbel ma’ bijodiżil magħmul fl-Unjoni magħmul mill-istess feedstocks li jattira l-istess tip ta’ primjum (tal-għadd doppju).

(221)

Is-CCCMC argumentat dannu li l-produtturi tal-Unjoni kkawżaw lilhom infushom minħabba investimenti kbar li rriżultaw fi dħul ta’ flus negattiv u fi tnaqqis fir-redditu fuq l-investiment.

(222)

Il-punt dwar ir-rabta bejn il-profittabbiltà mnaqqsa u l-investimenti mill-produtturi tal-Unjoni ġie indirizzat fil-premessi (197) sa (201) hawn fuq. Il-Kummissjoni fakkret li l-importazzjonijiet Ċiniżi naqqsu l-profittabbiltà tal-produtturi tal-Unjoni. Kif muri fil-kwestjonarji vojta maħsuba għall-produtturi tal-Unjoni, il-profittabbiltà hija l-mutur ewlieni fil-formula użata biex jiġu stabbiliti l-flussi tal-flus u ċ-ċifri tar-redditu tal-investiment. Il-premessa (359) tar-Regolament proviżorju nnutat li l-investimenti sinifikanti fl-aħħar parti tal-perjodu kkunsidrat kienu proġetti previsti għal żmien twil u kienu jikkonċernaw biss żewġ kumpaniji.

(223)

Excellence New Energy B.V. argumentat li, bi prezz fil-mira ta’ EUR 1 900 – 2 200/tunnellata li huwa ħafna ogħla mill-prezzijiet tal-importazzjoni, l-industrija tal-Unjoni ma setgħet tikkompeti mal-ebda importazzjoni. Il-Kummissjoni ċċarat li l-prezz fil-mira ta’ EUR 1 900 – 2 200/tunnellata kien jirrifletti biss taħlita ta’ prodotti speċifika ħafna li magħha tqabblu l-mudelli Ċiniżi u, għaldaqstant, ma setax iqajjem dubji dwar il-kompetittività tal-industrija tal-Unjoni. L-importazzjonijiet fit-tabella 12 tar-Regolament proviżorju kienu jikkonċernaw diversi taħlitiet ta’ prodotti, kif enfasizzat fil-premessa (370) tar-Regolament proviżorju.

(224)

Fin-nuqqas ta’ kummenti oħra dwar din it-taqsima, il-konklużjonijiet fil-premessi (378) sa (380) tar-Regolament proviżorju ġew ikkonfermati.

(225)

Kif previst mill-Artikolu 9(4), it-tielet subparagafu, tar-Regolament bażiku, u minħabba li l-Kummissjoni ma rreġistratx l-importazzjonijiet matul il-perjodu ta’ qabel id-divulgazzjoni, hija analizzat l-iżvilupp tal-volumi tal-importazzjoni biex tistabbilixxi jekk kienx hemm żieda sostanzjali ulterjuri fl-importazzjonijiet soġġetti għall-investigazzjoni matul il-perjodu ta’ qabel id-divulgazzjoni deskritt fil-premessa (4) u, għalhekk, jekk din tirriflettix id-dannu addizzjonali li jirriżulta minn tali żieda fil-kalkolu tal-marġni tad-dannu.

(226)

Abbażi tad-data mill-bażi tad-data Surveillance 2, il-volumi tal-importazzjonijiet miċ-Ċina matul il-perjodu ta’ 4 ġimgħat ta’ qabel id-divulgazzjoni kienu 58 % inqas mill-volumi medji tal-importazzjoni fil-perjodu ta’ investigazzjoni fuq bażi ta’ 4 ġimgħat. Fuq dik il-bażi, il-Kummissjoni kkonkludiet li ma kienx hemm żieda sostanzjali fl-importazzjonijiet soġġetti għall-investigazzjoni matul il-perjodu ta’ qabel id-divulgazzjoni.

(227)

Għalhekk, il-Kummissjoni ma aġġustatx il-livell ta’ tneħħija ta’ dannu f’dan ir-rigward.

(228)

Diversi partijiet Ċiniżi kkontestaw il-profitt fil-mira ta’ 11 % użat għall-kalkolu tal-marġni tad-dannu fuq il-bażi li tali marġni ta’ profitt ma kienx realistiku u/jew ma kienx jagħmel sens wara l-iżviluppi tas-suq u elementi oħra (eż. bidliet regolatorji, kwistjonijiet ta’ kostijiet) mill-2013, jiġifieri s-sena meta finalment ġie stabbilit il-11 %. Il-partijiet talbu lill-Kummissjoni tfittex profitt fil-mira aktar reċenti/sinifikanti, filwaqt li s-CCCMC argumentat li l-profitt jenħtieġ li jkun jista’ jinkiseb għall-industrija tal-Unjoni. Il-grupp Jiaao stenna profitt fil-mira ta’ inqas minn 11 % peress li, fil-fehma tiegħu, il-marġnijiet ta’ profitt jonqsu maż-żmien fil-biċċa l-kbira tas-setturi industrijali minħabba l-kompetizzjoni tas-suq u l-progress teknoloġiku. Għall-grupp Zhuoyue, jenħtieġ li jinstab profitt fil-mira ġdid wara t-tmiem tal-investigazzjonijiet anti-dumping kontra l-Arġentina u l-Indoneżja fl-2018 minħabba li tali terminazzjonijiet kienu jfissru li l-industrija tal-Unjoni ma kinitx għadha ġġarrab dannu. Fil-kummenti tiegħu għad-divulgazzjoni finali, il-grupp Zhuoyue tenna dawn il-kummenti għar-raġuni li kien qed jistenna li l-livell ta’ profittabbiltà f’dawn l-aħħar snin ikun taħt kundizzjonijiet normali ta’ kompetizzjoni.

(229)

Kif innutat fil-premessa (384) tar-Regolament proviżorju, il-Kummissjoni ma setgħetx tistabbilixxi marġni ta’ profitt abbażi tas-snin ta’ qabel iż-żieda fl-importazzjonijiet miċ-Ċina, peress li l-industrija tal-Unjoni ġarrbet influss ta’ importazzjonijiet oġġett ta’ dumping/sussidjati għal snin sħaħ, u għalhekk l-ebda perjodu ta’ żmien ma seta’ jikkwalifika bħala li jirreferi għal sitwazzjoni kompetittiva normali fis-suq tal-Unjoni. Konsegwentement, il-Kummissjoni rrikorriet għall-profitt stabbilit għal dan it-tip ta’ industrija f’investigazzjonijiet preċedenti, inkluża investigazzjoni konkluża fl-2019. Il-profitt bażiku ġie stabbilit għal 11 %. (92) L-affermazzjoni tal-grupp Jiaao li l-marġnijiet tal-profitt jonqsu maż-żmien minħabba l-kompetizzjoni tas-suq u l-progress teknoloġiku ma kinitx sostanzjata, jiġifieri sa fejn huwa kkonċernat is-settur tal-bijodiżil. Minbarra s-6 % stabbiliti bl-Artikolu 7(2c) tar-Regolament bażiku, issuġġerit minn Jiaao, l-ebda parti ma pproponiet profitt bażiku (aktar) raġonevoli fil-fehma tagħha. L-affermazzjonijiet li 11 % kien profitt fil-mira mhux xieraq ġew miċħuda.

(230)

Parti Ċiniża sostniet li l-prezz li ma jikkawża l-ebda dannu kkalkulat fil-premessa (387) tar-Regolament proviżorju jenħtieġ li ma jkunx ibbażat fuq il-kost tal-produzzjoni fit-tabella 8 tar-Regolament proviżorju, fejn ix-xejra tqieset mhux normali, u appellat għal aġġustament għall-fini tal-kalkolu tal-prezz li ma jikkawża l-ebda dannu (għalkemm ma spjegatx kif jew b’kemm) sabiex allegatament jiġu kkoreġuti anomaliji bħal prezzijiet għoljin tal-enerġija minħabba l-gwerra. Il-Kummissjoni ma aċċettatx l-affermazzjonijiet u fakkret li t-tabella 8 tar-Regolament proviżorju tippreżenta kost tal-produzzjoni għal taħlita usa’ mill-prodotti li magħhom fl-aħħar mill-aħħar ġew imqabbla l-importazzjonijiet.

(231)

L-importatur relatat Excellence New Energy B.V. qajjem dubji dwar il-prezz fil-mira milħuq mill-Kummissjoni għar-raġuni li ż-żieda ta’ profitt fil-mira ta’ 11 % flimkien mal-kostijiet tal-konformità mal-kost tal-produzzjoni fit-tabella 8 tar-Regolament proviżorju rriżultat fi kważi EUR 1 508/tunnellata. Il-Kummissjoni ċċarat li l-kost tal-produzzjoni fit-tabella 8 tar-Regolament proviżorju jirrifletti taħlita usa’ mill-kost tal-produzzjoni li miegħu tqabblu l-mudelli Ċiniżi.

(232)

Fin-nuqqas ta’ kummenti, il-premessa (389) tar-Regolament proviżorju hija kkonfermata. Il-livell finali ta’ tneħħija ta’ dannu għall-produtturi esportaturi li kkooperaw u għall-kumpaniji l-oħra kollha huwa kif ġej:

(233)

Wara l-valutazzjoni ta’ hawn fuq, id-dazji anti-dumping definittivi jenħtieġ li jiġu stabbiliti kif ġej f’konformità mal-Artikolu 7(2) tar-Regolament bażiku:

(234)

L-EBB (f’isem il-membri tiegħu) u Neste qiesu l-miżuri fl-interess tal-industrija tal-Unjoni.

(235)

Is-CCCMC argumentat li l-kunsiderazzjonijiet tal-Kummissjoni skont din it-taqsima tar-Regolament proviżorju ma kinux konvinċenti peress li se jibqa’ jkun hemm il-kompetizzjoni mal-importazzjonijiet minn pajjiżi terzi u l-feedstocks għall-produzzjoni tal-bijodiżil se jiġi importati wkoll. Il-Kummissjoni nnutat li l-kompetizzjoni b’saħħitha fis-suq intlaqgħet tajjeb u ċaħdet l-affermazzjonijiet tas-CCCMC.

(236)

Fin-nuqqas ta’ kummenti oħra dwar din it-taqsima, il-kunsiderazzjonijiet fil-premessi (392) sa (394) tar-Regolament proviżorju ġew ikkonfermati.

(237)

Fin-nuqqas ta’ kummenti dwar din it-taqsima, il-kunsiderazzjonijiet fil-premessi (395) sa (398) tar-Regolament proviżorju ġew ikkonfermati.

(238)

Quatra, kollettur tal-UCO, allega li l-esklużjoni tal-SAF u l-UCO mill-miżuri tiskatta l-importazzjonijiet ta’ tali merkanzija fl-Unjoni u taffettwa b’mod negattiv l-isforzi ta’ sostenibbiltà tal-Unjoni billi tiskoraġġixxi l-akkwist domestiku tal-UCO/materja prima. Il-Kummissjoni ċaħdet l-affermazzjonijiet peress li l-UCO ma kienx fl-ambitu tal-investigazzjoni.

(239)

Chane, fornitur kbir tal-ħżin tal-bijofjuwils fl-Ewropa li kien qed jipproċessa wkoll l-SAF, iddikjara li l-miżuri jheddu l-ambizzjonijiet ta’ sostenibbiltà tiegħu u joħolqu sfidi għad-dinamika tal-katina tal-provvista, u potenzjalment jaffettwaw id-disponibbiltà u l-aċċessibbiltà tas-sorsi tal-enerġija rinnovabbli. Chane beża’ mit-tfixkil, mill-ineffiċjenza tal-faċilitajiet ta’ ħżin, min-nuqqas ta’ użu potenzjali, u l-implikazzjonijiet finanzjarji negattivi. Il-Kummissjoni nnutat li, filwaqt li l-miżuri jistgħu jaffettwaw ċerti flussi fil-katina tal-provvista, ingħatat id-disponibbiltà tal-bijodiżil minħabba l-kapaċità tal-produzzjoni tal-produtturi tal-Unjoni u l-għadd kbir ta’ importazzjonijiet. Il-miżuri mhumiex maħsuba biex jipprevjenu l-importazzjonijiet iżda biex jerġgħu jġibu kundizzjonijiet ta’ kompetizzjoni ġusta fis-suq tal-bijodiżil fl-Unjoni.

(240)

Fin-nuqqas ta’ kummenti oħra dwar din it-taqsima, il-kunsiderazzjonijiet fil-premessi (399) sa (400) tar-Regolament proviżorju ġew ikkonfermati.

(241)

Is-CCCMC ikkontestat id-dikjarazzjoni tal-Kummissjoni fir-Regolament proviżorju skont din it-taqsima li l-industrija tal-Unjoni kellha biżżejjed kapaċità biex tissodisfa d-domanda fuq il-bażi li l-industrija tal-Unjoni ma kinitx qed tmur tajjeb fil-perjodu ta’ investigazzjoni u tal-prospetti ħżiena fil-produzzjoni tal-lift. Il-Kummissjoni ma qablitx meta wieħed iqis is-sejbiet tagħha dwar il-kapaċità ta’ riżerva fil-livell tal-produtturi tal-Unjoni inklużi fil-kampjun, is-sejbiet ġenerali tagħha rigward l-industrija tal-Unjoni u l-bosta feedstocks li jista’ jsir minnhom il-bijodiżil.

(242)

Is-CCCMC ikkontestat id-dikjarazzjoni tal-Kummissjoni fil-premessa (402) tar-Regolament proviżorju li l-impożizzjoni ta’ miżuri jkollha effett pożittiv fuq is-sostenibbiltà u l-emissjonijiet (93) ta’ gassijiet serra. Il-Kummissjoni nnutat ir-rwol li l-prattiki agrikoli tajbin mressqa minn xi produtturi tal-Unjoni għandhom fis-sekwestru tal-karbonju fil-ħamrija (94) u ċaħdet l-affermazzjonijiet tas-CCCMC.

(243)

Wara d-divulgazzjoni proviżorja, l-importatur relatat Excellence New Energy B.V. ikkontesta li d-dazji projbittivi huma kontroproduttivi għal għanijiet usa’ ta’ dekarbonizzazzjoni u, bħas-CCCMC, staqsa jekk il-miżuri anti-dumping kinux xierqa f’kuntest usa’ ta’ azzjoni internazzjonali kontra t-tibdil fil-klima. Is-CCCMC żiedet li l-inċertezza tal-politika ambjentali fixklet l-investimenti ekoloġiċi korporattivi u l-innovazzjoni ekoloġika u li l-miżuri jaffettwaw il-bijodiżil ta’ tip li l-leġiżlatur tal-UE jiffavorixxa l-aktar.

(244)

Il-Kummissjoni nnutat li l-livell tad-dazji ma kienx projbittiv u li l-miżuri mhumiex maħsubin biex jipprevjenu l-importazzjonijiet iżda biex jerġgħu jġibu kundizzjonijiet ta’ kompetizzjoni ġusta fis-suq tal-bijodiżil fl-Unjoni. L-impenn tal-Kummissjoni li tiġġieled kontra t-tibdil fil-klima ma jistax jitqiegħed f’dubju bl-impożizzjoni ta’ miżuri anti-dumping meta dawn ikunu legalment ġustifikati. Is-sejbiet kienu ċari dwar il-ħtieġa ġustifikata li jerġgħu jiġu stabbiliti kundizzjonijiet ekwi fl-Unjoni. Ġie nnutat li l-għeluq tal-manifatturi tal-bijodiżil tal-Unjoni jżid id-dipendenza fuq il-bijodiżil minn pajjiżi terzi f’postijiet imbiegħda, li huwa kontroproduttiv f’termini tat-tnaqqis tal-impronta tal-karbonju tal-Unjoni. Il-Kummissjoni ċaħdet l-affermazzjonijiet ta’ Excellence New Energy B.V. u tas-CCCMC.

(245)

Excellence New Energy B.V. allegat tfixkil fit-terminals u fil-portijiet jekk jiġu imposti l-miżuri. L-affermazzjoni, mhux sostanzjata, ma ġietx aċċettata.

(246)

Fin-nuqqas ta’ kummenti oħra dwar l-interess tal-Unjoni, il-konklużjoni fil-premessi (404) sa (405) tar-Regolament proviżorju ġiet ikkonfermata.

(247)

Fid-dawl tal-konklużjonijiet li ntlaħqu fir-rigward tad-dumping, tad-dannu, tal-kawżalità, tal-livell tal-miżuri u tal-interess tal-Unjoni, u f’konformità mal-Artikolu 9(4) tar-Regolament bażiku, jenħtieġ li jiġu imposti miżuri anti-dumping definittivi sabiex ma jiġix ikkawżat dannu ulterjuri lill-industrija tal-Unjoni mill-importazzjonijiet oġġett ta’ dumping tal-prodott ikkonċernat.

(248)

Abbażi ta’ dak li ntqal hawn fuq, ir-rati tad-dazju anti-dumping definittivi, espressi skont il-prezz CIF fil-fruntiera tal-Unjoni, bid-dazju doganali mhux imħallas, jenħtieġ li jkunu kif ġej:

(249)

L-EBB iddikjara li l-użu tas-sistema ta’ bilanċ tal-massa tal-RED minn xi operaturi kien jammonta għal ċirkomvenzjoni tad-dazji anti-dumping fuq il-bijodiżil Ċiniż. L-EBB innota li l-kummerċjanti jistgħu jbiddlu ċ-ċertifikati ta’ “prova tas-sostenibbiltà” bejn il-prodotti tal-UE u dawk mhux tal-UE billi jittrasportaw f’T1 (jiġifieri qabel l-iżdoganar tal-merkanzija) bijodiżil mhux tal-UE li għandu “prova tas-sostenibbiltà” jiġi mibjugħ fl-Unjoni (jiġifieri għal materjali li jgħoddu darbtejn lejn il-miri rinnovabbli tal-UE), u jibagħtu l-bijodiżil fiżiku barra mill-Unjoni. Il-Kummissjoni ma qablitx li dawk l-attivitajiet jistgħu jitqiesu bħala prattiki ta’ ċirkomvenzjoni li għandhom jiġu indirizzati fil-qafas ta’ din l-investigazzjoni.

(250)

Neste u l-EBB iddikjaraw li l-esklużjoni tal-HEFA-SPK/SAF imħallat mill-miżuri żżid ir-riskju ta’ ċirkomvenzjoni tal-miżuri anti-dumping fuq il-bijodiżil Ċiniż u timmina l-effett rimedjali tal-miżuri. F’dan ir-rigward, Neste indika n-nuqqas ta’ kodiċijiet NM separati ddedikati għall-biċċa l-kbira tal-fjuwils rinnovabbli u l-fatt li l-HEFA-SPK u l-HVO jistgħu jaqgħu taħt l-istess kodiċi tal-prodott bażiku meta jissodisfaw l-istess speċifikazzjonijiet tad-distillazzjoni. L-EBB argumenta li d-distinzjoni bejn l-SAF u l-HVO fil-fruntiera kienet diffiċli.

(251)

Fil-kummenti tagħhom wara d-divulgazzjoni finali, Neste u EBB tennew il-qalba tal-kummenti miġbura fil-qosor fil-premessa hawn fuq. L-EBB allega li l-industrija Ċiniża malajr taqleb mill-HVO għall-SAF, u b’hekk tevita l-ħlas ta’ dazji anti-dumping fuq l-HVO. Il-grupp EcoCeres ma qabilx li l-konverżjoni għall-SAF tista’ ssir malajr. L-EBB talab lill-Kummissjoni tadotta approċċ proattiv fir-rigward ta’ mekkaniżmu ġdid tat-taxxa fuq l-esportazzjoni fuq l-UCO Ċiniż, li allegatament huwa tip ta’ appoġġ biex jassorbi d-dazji anti-dumping kif ukoll sussidju kumpensabbli li jnaqqas il-prezzijiet tal-esportazzjoni Ċiniżi tal-FAME, l-HVO u l-SAF lejn l-Unjoni fil-futur qrib. L-EBB talab speċifikament għall-ħolqien ta’ kodiċijiet TARIC ġodda speċifiċi għall-SAF għall-finijiet ta’ monitoraġġ, għal monitoraġġ bir-reqqa tal-prezz tal-importazzjoni tal-bijodiżil fl-Unjoni kif ukoll għal investigazzjoni ex officio biex jiġu rieżaminati l-marġnijiet tad-dumping ta’ din l-investigazzjoni. Il-grupp EcoCeres fakkar fl-għodod diġà fis-seħħ għall-monitoraġġ tal-movimenti tal-bijofjuwils, jiġifieri l-Bażi tad-Data tal-Unjoni għall-Bijofjuwils tal-Kummissjoni, li ilha topera mill-2024.

(252)

Il-Kummissjoni ħadet nota tal-kwistjonijiet indikati mill-partijiet u impenjat ruħha li timmonitorja l-flussi tal-bijodiżil u tal-SAF wara l-impożizzjoni ta’ miżuri anti-dumping fuq il-bijodiżil Ċiniż, kif definit fl-Artikolu 1 ta’ dan ir-Regolament. Għalhekk, ġew stabbiliti kodiċijiet TARIC separati għall-fjuwils tal-avjazzjoni sostenibbli kif definiti fl-Artikolu 1 ta’ dan ir-Regolament u li joriġinaw mir-Repubblika tal-Poplu taċ-Ċina għall-fini ta’ monitoraġġ.

(253)

Is-CCCMC ikkontestat il-forma tal-miżuri. Il-Kummissjoni ċaħdet l-affermazzjoni tas-CCCMC, li ma kinitx sostanzjata.

(254)

Ir-rati tad-dazju anti-dumping tal-kumpaniji individwali speċifikati f’dan ir-Regolament ġew stabbiliti abbażi tas-sejbiet ta’ din l-investigazzjoni. Għalhekk, dawn jirriflettu s-sitwazzjoni kif instabet matul din l-investigazzjoni fir-rigward ta’ dawn il-kumpaniji. Għaldaqstant, dawn ir-rati tad-dazju huma applikabbli esklużivament għall-importazzjonijiet tal-prodott taħt investigazzjoni li joriġinaw mill-pajjiż ikkonċernat u mmanifatturat mill-entitajiet legali msemmija. L-importazzjonijiet tal-prodott ikkonċernat mmanifatturat minn kwalunkwe kumpanija oħra mhux imsemmija speċifikament fil-parti operattiva ta’ dan ir-Regolament, inkluż l-entitajiet relatati ma’ dawk imsemmija speċifikament, ma jistgħux jibbenefikaw minn dawn ir-rati u jenħtieġ li jkunu soġġetti għar-rata tad-dazju applikabbli għall-“importazzjonijiet l-oħrajn kollha li joriġinaw mir-Repubblika tal-Poplu taċ-Ċina”.

(255)

Kumpanija tista’ titlob l-applikazzjoni ta’ dawn ir-rati tad-dazju anti-dumping individwali jekk sussegwentement tibdel l-isem tal-entità tagħha. It-talba trid tkun indirizzata lill-Kummissjoni (95). It-talba jrid ikun fiha l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, jiġi ppubblikat regolament dwar il-bidla fl-isem f’Il-Ġurnal Uffiċjali tal-Unjoni Ewropea.

(256)

Sabiex jiġu mminimizzati r-riskji ta’ ċirkomvenzjoni minħabba d-differenza fir-rati tad-dazju, huma meħtieġa miżuri speċjali biex tiġi żgurata l-applikazzjoni xierqa tad-dazji anti-dumping individwali. L-applikazzjoni tad-dazji anti-dumping individwali hija applikabbli biss mal-preżentazzjoni ta’ fattura kummerċjali valida lill-awtoritajiet doganali tal-Istati Membri. Il-fattura trid tikkonforma mar-rekwiżiti stipulati fl-Artikolu 1(3) ta’ dan ir-Regolament. Sakemm tiġi ppreżentata tali fattura, l-importazzjonijiet jenħtieġ li jkunu soġġetti għad-dazju anti-dumping applikabbli għall-“importazzjonijiet l-oħra kollha li joriġinaw mir-Repubblika tal-Poplu taċ-Ċina”.

(257)

Filwaqt li l-preżentazzjoni ta’ din il-fattura hija meħtieġa biex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, din mhijiex l-uniku element li għandu jitqies mill-awtoritajiet doganali. Tabilħaqq, anke jekk jiġu preżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jenħtieġ li jwettqu l-kontrolli tas-soltu tagħhom u jistgħu, bħal fil-każijiet l-oħrajn kollha, jirrikjedu dokumenti addizzjonali (dokumenti dwar it-trasport fuq l-ilma, eċċ.) sabiex ikunu jistgħu jivverifikaw l-akkuratezza tad-dettalji li jkun hemm fid-dikjarazzjoni u biex jiżguraw li l-applikazzjoni sussegwenti tar-rata tad-dazju tkun ġustifikata, f’konformità mal-liġi doganali.

(258)

Jekk l-esportazzjonijiet minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum, b’mod partikolari wara l-impożizzjoni tal-miżuri kkonċernati, din iż-żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 13(1) tar-Regolament bażiku. F’ċirkostanzi bħal dawn, tista’ tinbeda investigazzjoni antiċirkomvenzjoni, dment li jiġu ssodisfati l-kundizzjonijiet biex isir dan. Din l-investigazzjoni tista’, fost l-oħrajn, teżamina l-bżonn tat-tneħħija tar-rati tad-dazju individwali u l-impożizzjoni konsegwenti ta’ dazju applikabbli għall-pajjiż kollu.

(259)

Sabiex jiġi żgurat infurzar xieraq tad-dazji anti-dumping, id-dazju anti-dumping għall-importazzjonijiet l-oħrajn kollha li joriġinaw miċ-Ċina jenħtieġ li japplika mhux biss għall-produtturi esportaturi li ma kkooperawx f’din l-investigazzjoni, iżda wkoll għall-produtturi li ma kellhomx esportazzjonijiet lejn l-Unjoni matul il-perjodu ta’ investigazzjoni.

(260)

Jenħtieġ li l-produtturi esportaturi li ma esportawx il-prodott ikkonċernat lejn l-Unjoni matul il-perjodu ta’ investigazzjoni jkunu jistgħu jitolbu lill-Kummissjoni sabiex ikunu soġġetti għar-rata tad-dazju anti-dumping għall-kumpaniji li kkooperaw mhux inklużi fil-kampjun. Jenħtieġ li l-Kummissjoni tilqa’ talba bħal din dment li jiġu ssodisfati tliet kundizzjonijiet. Il-produttur esportatur il-ġdid ikollu juri li: (i) ma esportax il-prodott ikkonċernat lejn l-Unjoni matul il-perjodu ta’ investigazzjoni; (ii) mhuwiex relatat ma’ produttur esportatur li għamel dan; u (iii) esporta l-prodott ikkonċernat wara dan jew daħal f’obbligu kuntrattwali irrevokabbli sabiex jagħmel dan fi kwantitajiet sostanzjali.

(261)

Fid-dawl tal-marġnijiet tad-dumping li nstabu u minħabba l-livell tad-dannu kkawżat lill-industrija tal-Unjoni, l-ammonti garantiti permezz tad-dazji anti-dumping proviżorji imposti mir-Regolament proviżorju, jenħtieġ li jinġabru b’mod definittiv fil-livelli stabbiliti fir-Regolament proviżorju u sal-livell stabbilit skont dan ir-Regolament.

(262)

Fid-dawl tal-Artikolu 109 tar-Regolament (UE, Euratom) 2024/2509 tal-Parlament Ewropew u tal-Kunsill (96), meta ammont jiġi rimborżat wara sentenza tal-Qorti tal-Ġustizzja tal-Unjoni Ewropea, l-imgħax li jrid jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea, fl-ewwel jum kalendarju ta’ kull xahar.

(263)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036,