|
9.6.2010 |
MT |
Il-Ġurnal Uffiċjali tal-Unjoni Ewropea |
L 141/10 |
DEĊIŻJONI TAL-KUMMISSJONI
tat-8 ta’ Ġunju 2010
li tirrevoka d-Deċiżjoni 2006/601/KE dwar il-miżuri ta’ emerġenza rigward l-organiżmu ġenetikament modifikat mhux awtorizzat “LL RICE 601” fi prodotti tar-ross, u li tipprovdi għal testijiet każwali għan-nuqqas ta’ dak l-organiżmu fi prodotti tar-ross
(notifikata bid-dokument numru C(2010) 3527)
(Test b’relevanza għaż-ŻEE)
(2010/315/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 178/2002 tal-Parlament Ewropew u tal-Kunsill tat-28 ta’ Jannar 2002 li jistabilixxi l-prinċipji ġenerali u l-ħtiġijiet tal-liġi dwar l-ikel, li jistabilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta’ sigurtà tal-ikel (1), u b’mod partikolari l-Artikolu 53(2) tiegħu,
Billi:
|
(1) |
Id-Deċiżjoni tal-Kummissjoni 2006/601/KE (2) tistipula li kunsinni ta’ prodotti tar-ross li joriġinaw mill-Istati Uniti tal-Amerika u li x’aktarx ikunu mħallta jistgħu jitqiegħdu fis-suq biss jekk ikunu akkumpanjati b’ċerti dokumenti li juru li l-prodotti kkonċernati ma fihomx l-organiżmu ġenetikament modifikat “LL RICE 601”. Barra minn hekk, id-Deċiżjoni tipprovdi għal ċerti miżuri oħra ta’ kontroll. |
|
(2) |
Id-Dipartiment għall-Agrikultura tal-Istati Uniti (USDA) ppubblika r-riżultati tal-investigazzjoni tiegħu dwar, b’mod partikolari, il-preżenza ta’ “LL RICE 601” fir-ross kummerċjali tal-Istati Uniti. Filwaqt li l-mekkaniżmi preċiżi tat-taħlit ma setgħux jiġu stabbiliti, is-sejbiet indikaw li s-sors tat-taħlit ma’ “LL RICE 601” kien limitat. |
|
(3) |
Barra dan, il-Federazzjoni tar-Ross tal-Istati Uniti adottat pjan bl-għan li jitneħħa l-“LL RICE 601” mill-kanali tal-esportazzjoni tal-Istati Uniti. Dan il-pjan inkluda l-ittestjar taż-żrieragħ qabel ma jitħawlu, kif ukoll kontrolli dokumentarji u analitiċi fil-postijiet fejn issir il-kunsinna tal-ħsad. |
|
(4) |
Wara l-aħħar emenda fid-Deċiżjoni 2006/601/KE, bid-Deċiżjoni tal-Kummissjoni 2008/162/KE (3), ir-riżultati tat-testijiet li saru fuq iż-żrieragħ fl-2008 għall-ħames Stati li jkabbru r-ross, Arkansas, Mississippi, Louisiana, Texas u Missouri, ipprovduti fil-qafas ta’ dak il-pjan, ittestjaw kollha negattivi għall-preżenza ta’ “LL RICE 601”. |
|
(5) |
Is-sejbiet u l-konklużjonijiet tar-rapport tal-Uffiċċju Veterinarju u tal-Ikel li sar fl-2008 u li kien dwar il-valutazzjoni ta’ attivitajiet ta’ kontroll li saru fl-Istati Uniti rigward miżuri ta’ emerġenza għal esportazzjonijiet tar-ross għall-UE [United States 2008-7857] juru li kien hemm stabbilita sistema aċċettabbli fir-rigward tal-miżuri stipulati fid-Deċiżjoni 2006/601/KE. |
|
(6) |
L-ittestjar mill-Federazzjoni tar-Ross tal-Istati Uniti għall-ħsad tar-ross fl-2009, magħruf ukoll bħala r-ross aħdar, ma sabx lott li kien fiha “LL Rice 601”. Barra minn hekk, l-industrija tal-Istati Uniti indikat li hi kienet se tkompli tapplika l-pjan tagħha għall-ħsad tal-2010 u li tipprovdi testijiet u ċertifikazzjoni qabel l-esportazzjoni anki jekk titneħħa l-miżura, kemm-il darba l-interessi tas-suq jkunu jeħtieġu li l-miżuri jitkomplew. |
|
(7) |
Konsegwentament, ir-raġunijiet li jiġġustifikaw id-Deċiżjoni 2006/601/KE m’għadhomx jeżistu. Għalhekk dik id-Deċiżjoni għandha titneħħa. |
|
(8) |
Minkejja dan, l-Istati Membri għandhom ikomplu jissorveljaw f’livell xieraq ta’ ttestjar każwali, biex jivverifikaw in-nuqqas ta’ prodotti tar-ross mħalltin ma’ “LL RICE 601” fis-suq. Ir-riżultati ta’ din is-sorveljanza għandhom jiġu kkomunikati b’mod mgħaġġel permezz ta’ RASFF lill-Kummissjoni li se tivvaluta jekk teħtieġ li tittieħed aktar azzjoni. |
|
(9) |
Il-miżuri stipulati f’din id-Deċiżjoni huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali, |
ADOTTAT DIN ID-DEĊIŻJONI:
Artikolu 1
Id-Deċiżjoni 2006/601/KE hija revokata.
Artikolu 2
L-Istati Membri għandhom jiżguraw ruħhom li jkun hemm livell xieraq ta’ tesijiet każwali biex jivverifikaw li fis-suq ma jkunx hemm prodotti tar-ross li fihom, jew huma prodotti minn “LL RICE 601”, b’konformità mar-Regolament (KE) Nru 178/2002.
Artikolu 3
Din id-Deċiżjoni hija indirizzata lill-Istati Membri.
Magħmul fi Brussell, it-8 ta’ Ġunju 2010.
Għall-Kummissjoni
John DALLI
Membru tal-Kummissjoni