|
Iris Oifigiúil |
GA Sraith C |
|
C/2026/4922 |
19.9.2026 |
Ráiteas ón gCoimisiún maidir le láimhseáil bhuiséadach na táille láimhseála
(C/2026/4922)
Nuair a bhunófar táille láimhseála an Aontais i gCód Custaim an Aontais, is éard a bheidh inti acmhainn dhílis thraidisiúnta (ADT) de réir bhrí Airteagal 2(1)(a) de Chinneadh (AE, Euratom) 2020/2053 ón gComhairle an 14 Nollaig 2020 maidir le córas acmhainní dílse an Aontais Eorpaigh, [arb é atá ann cinneadh reatha maidir le hacmhainní dílse], toisc go bhfuil méid na táille le bunú ag institiúidí an Aontais i ndáil le trádáil le tríú tíortha.
Dá réir sin, faoin gCinneadh reatha maidir le hAcmhainní Dílse, coinníonn na Ballstáit 25 % de ADT ach ioncam ó bhuiséad an Aontais atá sa chuid eile.
Mar sin féin, le hAirteagal 13(9) den Togra ón gCoimisiún le haghaidh an Chinnidh nua maidir le hAcmhainní Dílse (1), tugtar isteach beart idirthréimhseach lena sonraítear nach gcuirfear an táille láimhseála ar fáil do bhuiséad an Aontais go dtí deireadh an CAI seo (2), Dá gcomhaontófaí an fhoráil sin, chiallódh sé go mbeadh na Ballstáit ina dtairbhithe den ioncam a ghinfí leis an táille go dtí deireadh 2027.
Leagfar síos na mionsonraí maidir le comhaontú den sórt sin a chur chun feidhme sa togra le haghaidh Rialachán maidir le Cur ar Fáil.
Go dtí go gcomhaontóidh na Ballstáit an fhoráil sin agus go dtiocfaidh sí i bhfeidhm, beidh feidhm ag forálacha an Chinnidh maidir le hAcmhainní Dílse atá i bhfeidhm faoi láthair. Dá bhrí sin, is léir gur ar mhaithe leis na Ballstáit a bheidh sé teacht ar chomhaontú maidir leis an gCinneadh nua maidir le hAcmhainní Dílse a luaithe is féidir.
(1) Togra le haghaidh Cinneadh ón gComhairle maidir le córas acmhainní dílse an Aontais Eorpaigh agus lena n-aisghairtear Cinneadh (AE, Euratom) 2020/2053 (COM/2025/574 final).
(2) Airteagal 13(9): ‘Le linn na tréimhse idir an [1 Samhain 2026] agus an 31 Nollaig 2027, de mhaolú ar mhír 3 d’Airteagal 9 agus na rialacha arna nglacadh de bhun phointe (b) d’Airteagal 10 de Chinneadh (AE, Euratom) 2020/2053, na méideanna acmhainní dílse traidisiúnta a bhaineann le láimhseáil scaoileadh i saorchúrsaíocht na n-earraí a dhíoltar i gciandíolacháin, ní chuirfear na méideanna sin ar fáil agus ní bheidh feidhm ag na rialacha a bhaineann le rialuithe, maoirseacht agus tuairisciú maidir leis na méideanna sin’.
ELI: http://data.europa.eu/eli/C/2026/4922/oj
ISSN 1977-107X (electronic edition)