(1)

Il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra (1) (il-“Ftehim”) daħal fis-seħħ fl-1 ta’ Settembru 2017.

(2)

Skont l-Artikolu 301(3) tal-Ftehim, il-Partijiet iridu jaqblu dwar lista ta’ mill-inqas 15-il persuna b’għarfien espert dwar il-kwistjonijiet koperti mill-Kapitolu 13 tat-Titolu IV tal-Ftehim (“Kapitolu 13”) li jistgħu jintgħażlu bħala membri tal-Grupp ta’ Esperti biex jeżaminaw kwalunkwe kwistjoni li taqa’ taħt il-Kapitolu 13 li ma tkunx ġiet indirizzata b’mod sodisfaċenti permezz ta’ konsultazzjonijiet governamentali.

(3)

L-Unjoni ppreżentat l-ismijiet ta’ ħames esperti, filwaqt li l-Ukranja pprovdiet l-isemijiet ta’ tliet esperti. L-Ukrajna impenjat ruħha li tipprovdi l-ismijiet taż żewġ esperti oħra sal-31 ta’ Diċembru 2021. Il-Partijiet qablu dwar ħames esperti li ma għandhom in-nazzjonalità tal-ebda waħda mill-Parijiet u li jistgħu jservu bħala President tal-Grupp ta’ Esperti skont l-Artikolu 301 tal-Ftehim.

(4)

Sabiex tiġi żgurata l-effettività tad-dispożizzjonijiet tal-Kapitolu 13, huwa xieraq li tiġi stabbilita l-pożizzjoni li għandha tittieħed f’isem l-Unjoni fi ħdan is-Sottokumitat tal-Kummerċ u l-Iżvilupp Sostenibbli bejn l-UE u l-Ukrajna fir-rigward tal-istabbiliment tal-lista ta’ esperti li jistgħu jintgħażlu bħala membri tal-Grupp ta’ Esperti skont l-Artikolu 301 tal-Ftehim,