27.10.2022   

MT

Il-Ġurnal Uffiċjali tal-Unjoni Ewropea

L 277/195


DEĊIŻJONI TA’ IMPLIMENTAZZJONI TAL-KUMMISSJONI (UE) 2022/2069

tat-30 ta’ Settembru 2022

dwar l-għoti ta’ deroga mitluba min-Netherlands skont id-Direttiva tal-Kunsill 91/676/KEE dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli

(notifikata bid-dokument C(2022) 6859)

(Il-verżjoni bl-Olandiż biss hija awtentika)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 91/676/KEE tat-12 ta’ Diċembru 1991 dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli (1), u b’mod partikolari l-paragrafu 2, it-tielet subparagrafu, tal-Anness III tagħha,

Billi:

(1)

Id-Direttiva 91/676/KEE tistipula r-regoli dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli.

(2)

Il-paragrafu 2 tal-Anness III tad-Direttiva 91/676/KEE jistabbilixxi li l-Istati Membri li beħsiebhom japplikaw aktar demel tal-bhejjem minn 170 kg ta’ nitroġenu għal kull ettaru (ha) jridu jiffissaw l-ammonti b’mod li ma jippreġudikawx l-ilħuq tal-objettivi speċifikati fl-Artikolu 1 ta’ dik id-Direttiva. Jekk Stat Membru jippermetti ammont differenti taħt il-punt (b) tat-tieni subparagrafu, dan għandu jgħarraf lill-Kummissjoni li għandha teżamina l-ġustifikazzjoni f’konformità mal-proċedura regolatorja msemmija fl-Artikolu 9(2).

(3)

Bid-Deċiżjoni 2005/880/KE (2), il-Kummissjoni tat deroga mitluba min-Netherlands skont id-Direttiva 91/676/KEE bl-iskop li tippermetti l-applikazzjoni tat-tidmil bid-demel tal-bhejjem li jirgħu sa limitu ta’ 250 kg ta’ nitroġenu għal kull ettaru fis-sena f’azjendi agrikoli b’tal-anqas 70 % ta’ bwar.

(4)

Bid-Deċiżjoni 2010/65/UE (3), li temenda d-Deċiżjoni 2005/880/KE, il-Kummissjoni tat deroga mitluba min-Netherlands skont id-Direttiva 91/676/KEE bl-iskop li tippermetti l-applikazzjoni tat-tidmil bid-demel tal-bhejjem li jirgħu sa limitu ta’ 250 kg ta’ nitroġenu għal kull ettaru fis-sena f’azjendi agrikoli b’tal-anqas 70 % ta’ bwar sal-31 ta’ Diċembru 2013.

(5)

Bid-Deċiżjoni ta’ Implimentazzjoni tal-Kummissjoni 2014/291/UE (4), li ma baqgħetx tapplika fil-31 ta’ Diċembru 2017, in-Netherlands ingħataw deroga skont id-Direttiva 91/676/KEE li tippermetti l-applikazzjoni tat-tidmil bid-demel tal-bhejjem li jirgħu f’azjendi agrikoli b’tal-anqas 80 % ta’ art bil-ħaxix sa limitu ta’ 230 kg ta’ nitroġenu għal kull ettaru fis-sena għall-azjendi agrikoli li jinsabu fuq il-ħamrija ramlija tan-Nofsinhar u taċ-ċentru u fuq il-ħamrija loess u sa limitu ta’ 250 kg ta’ nitroġenu għal kull ettaru fis-sena għall-azjendi agrikoli li jinsabu fuq tip ta’ ħamrija oħra. Din id-deroga kienet tirrigwarda 19 564 azjenda agrikola fl-2016, li kienu jikkorrispondu għal 47 % taż-żona agrikola netta totali tan-Netherlands.

(6)

Bid-Deċiżjoni ta’ Implimentazzjoni tal-Kummissjoni (UE) 2018/820 (5), li ma baqgħetx tapplika fl-1 ta’ Jannar 2020, in-Netherlands ingħataw deroga skont id-Direttiva 91/676/KEE li tippermetti l-applikazzjoni tat-tidmil bid-demel tal-bhejjem li jirgħu f’azjendi agrikoli b’tal-anqas 80 % ta’ bwar sa limitu ta’ 230 kg ta’ nitroġenu għal kull ettaru fis-sena għall-azjendi agrikoli li jinsabu fuq il-ħamrija ramlija tan-Nofsinhar u taċ-ċentru u fuq il-ħamrija “loess” u sa limitu ta’ 250 kg ta’ nitroġenu għal kull ettaru fis-sena għall-azjendi agrikoli li jinsabu fuq tip ta’ ħamrija oħra. Id-deroga kienet tirrigwarda 18 818-il azjenda agrikola fl-2019, li kienu jikkorrispondu għal 44,7 % taż-żona agrikola netta totali tan-Netherlands.

(7)

Bid-Deċiżjoni ta’ Implimentazzjoni tal-Kummissjoni (UE) 2020/1073 (6), li ma baqgħetx tapplika fil-31 ta’ Diċembru 2021, in-Netherlands ingħataw deroga li tippermetti l-applikazzjoni tat-tidmil bid-demel tal-bhejjem li jirgħu f’azjendi agrikoli b’tal-anqas 80 % ta’ bwar sa limitu ta’ 230 kg ta’ nitroġenu għal kull ettaru fis-sena għall-azjendi agrikoli li jinsabu fuq il-ħamrija ramlija tan-Nofsinhar u taċ-ċentru u fuq il-ħamrija “loess” u sa limitu ta’ 250 kg ta’ nitroġenu għal kull ettaru fis-sena għall-azjendi agrikoli li jinsabu fuq tip ta’ ħamrija oħra. Id-durata ta’ dik id-Deċiżjoni ta’ Implimentazzjoni kienet limitata għal sentejn sabiex in-Netherlands ikunu jistgħu jimplimentaw bis-sħiħ strateġija ta’ infurzar imsaħħa biex jipprevjenu l-frodi fl-implimentazzjoni tal-politika tagħhom dwar id-demel. Barra minn hekk, ġew inklużi kundizzjonijiet addizzjonali biex jiġi żgurat li l-ammont ta’ bhejjem ma jiżdiedx u biex jitnaqqsu l-emissjonijiet tal-ammonijaka fl-applikazzjoni tad-demel.

(8)

Fil-25 ta’ Frar 2022, in-Netherlands talbu deroga ġdida skont id-Direttiva 91/676/KEE il-pragrafu 2, it-tielet subparagrafu, tal-Anness III,

(9)

In-Netherlands irrapportaw data (7) skont l-Artikolu 10 tad-Direttiva 91/676/KEE li wriet li għall-perjodu mill-2016 sal-2019, madwar 14 % tal-istazzjonijiet ta’ monitoraġġ tal-ilma ta’ taħt l-art fin-Netherlands kellhom konċentrazzjonijiet medji ta’ nitrati ogħla minn 50 mg/l, 5 % bejn l-40 u l-50 mg/l, u 73 % inqas minn 25 mg/l. Id-data wriet wkoll li, fil-perjodu bejn l-2016 u l-2019, 99 % mill-istazzjonijiet tal-monitoraġġ tal-ilma tal-wiċċ fin-Netherlands kellhom konċentrazzjonijiet medji tan-nitrati ta’ inqas minn 50 mg/l u li 96 % minn dawk l-istazzjonijiet tal-monitoraġġ kellhom konċentrazzjonijiet medji tan-nitrati ta’ inqas minn 25 mg/l. Madankollu, fil-perjodu ta’ rapportar mill-2016 sal-2019, 58 % tal-ilma ħelu kien ewtrofiku u 10 % seta’ jsir ewtrofiku jekk ma tittieħed l-ebda miżura.

(10)

Din id-data kif ippubblikata fir-Rapport dwar l-Artikolu 10 tad-Direttiva 91/676/KEE (8) uriet ukoll varjazzjonijiet sinifikanti bejn il-provinċji Netherlandiżi u li l-hotspots tat-tniġġis għall-konċentrazzjonijiet tan-nitrati fl-ilma ta’ taħt l-art u l-ewtrofikazzjoni jinsabu f’għadd ta’ provinċji Netherlandiżi. F’Limburg, 36 % tal-istazzjonijiet tal-ilma ta’ taħt l-art urew konċentrazzjonijiet medji ta’ nitrati ta’ aktar minn 50 mg/l u 22 % urew xejriet negattivi, filwaqt li 74 % tal-ilmijiet tal-wiċċ kienu ewtrofiċi u 16 % f’riskju li jsiru ewtrofiċi jekk ma tittieħed l-ebda miżura. F’Noord-Brabant, 26 % tal-istazzjonijiet tal-ilma ta’ taħt l-art urew medja ta’ konċentrazzjonijiet ta’ nitrati ogħla minn 50 mg/l u 20 % urew xejriet negattivi, filwaqt li 68 % tal-ilmijiet tal-wiċċ kienu ewtrofiċi u 7 % f’riskju li jsiru ewtrofiċi jekk ma tkun tittieħed l-ebda miżura. F’Zeeland, 14 % tal-istazzjonijiet tal-ilma ta’ taħt l-art urew konċentrazzjonijiet medji tan-nitrati ta’ aktar minn 50 mg/l u 47 % urew xejriet negattivi, filwaqt li 80 % tal-ilmijiet tal-wiċċ kienu ewtrofiċi u 11 % f’riskju li jsiru ewtrofiċi jekk ma tittieħed l-ebda miżura. F’Zuid-Holland, 54 % tal-ilmijiet tal-wiċċ kienu ewtrofiċi u 17 % f’riskju li jsiru ewtrofiċi jekk ma tittieħed l-ebda miżura. F’Noord-Holland, 61 % tal-ilmijiet tal-wiċċ kienu ewtrofiċi u 19 % f’riskju li jsiru ewtrofiċi jekk ma tittieħed l-ebda miżura. F’Utrecht, 24 % tal-istazzjonijiet tal-ilma ta’ taħt l-art urew xejriet negattivi fil-konċentrazzjonijiet ta’ nitrat, filwaqt li 43 % tal-ilmijiet tal-wiċċ kienu ewtrofiċi u 10 % f’riskju li jsiru ewtrofiċi jekk ma tittieħed l-ebda miżura. F’Gelderland, 10 % tal-istazzjonijiet tal-ilma ta’ taħt l-art urew konċentrazzjonijiet medji ta’ nitrati ogħla minn 50 mg/l u 15 % urew xejriet negattivi. F’Overijssel, 18 % tal-istazzjonijiet tal-ilma ta’ taħt l-art urew konċentrazzjonijiet medji ta’ nitrati ta’ aktar minn 50 mg/l u 19 % urew xejriet negattivi, filwaqt li 67 % tal-ilmijiet tal-wiċċ kienu ewtrofiċi u 4 % f’riskju li jsiru ewtrofiċi jekk ma tittieħed l-ebda miżura. Fi Drenthe, 15 % tal-istazzjonijiet tal-ilma ta’ taħt l-art urew konċentrazzjonijiet medji ta’ nitrati ta’ aktar minn 50 mg/l, filwaqt li 65 % tal-ilmijiet tal-wiċċ kienu ewtrofiċi u 9 % f’riskju li jsiru ewtrofiċi jekk ma tittieħed l-ebda miżura. Fi Friesland, 23 % tal-istazzjonijiet tal-ilma ta’ taħt l-art urew xejriet negattivi fil-konċentrazzjonijiet ta’ nitrati, filwaqt li 85 % tal-ilmijiet tal-wiċċ kienu ewtrofiċi. Fi Groningen, 52 % tal-ilmijiet tal-wiċċ kienu ewtrofiċi u 11 % f’riskju li jsiru ewtrofiċi jekk ma tittieħed l-ebda miżura. Fi Flevoland, 33 % tal-ilmijiet tal-wiċċ kienu ewtrofiċi.

(11)

Id-data rrapportata min-Netherlands fl-2020 u fl-2021 fil-kuntest tar-rapporti skont id-Deċiżjoni ta’ Implimentazzjoni (UE) 2020/1073 uriet żidiet fil-konċentrazzjonijiet ta’ nitrati fl-ilma ta’ taħt l-art f’żoni b’ħamrija “loess”, ramlija u taflija. Fin-Nofsinhar u fil-Lvant tar-reġjun ta’ ħamrija ramlija, il-konċentrazzjoni medja ta’ nitrati fil-metru ta’ fuq tal-ilma ta’ taħt l-art kienet ta’ 67 mg/l fl-2021. Dan jaqbeż il-valur ta’ limitu tal-Unjoni ta’ 50 mg/l. Mill-2017, il-konċentrazzjoni ta’ nitrat irdoppjat f’din il-parti tar-reġjun ta’ ħamrija ramlija. Il-konċentrazzjoni medja fit-Tramuntana tar-reġjun ta’ ħamrija ramlija baqgħet aktar baxxa mill-valur ta’ limitu tal-Unjoni, iżda żdiedet għal 37 mg/l fl-2021. Fir-reġjun ta’ ħamrija loess, il-konċentrazzjoni medja naqset bi ftit għal 57 mg/l fl-2020, iżda għadha ogħla mill-valur ta’ limitu tal-Unjoni. Fir-reġjun ta’ ħamrija taflija, il-konċentrazzjonijiet tan-nitrati baqgħu taħt il-valur ta’ limitu b’mod konsistenti, iżda madankollu żdiedu. Fir-reġjun tal-ħamrija tal-pit, l-aktar konċentrazzjonijiet baxxi ġew imkejla f’konċentrazzjoni medja ta’ 14-il mg/l fl-2021. Id-data wriet ukoll li l-ilma taż-żona tal-għeruq mill-azjendi agrikoli fin-network ta’ monitoraġġ tad-deroga spiss qabeż in-normi ta’ konċentrazzjoni tan-nitrati anki jekk il-valur medju baqa’ taħt il-50 mg/l.

(12)

F’konformità mal-Artikolu 3(5) tad-Direttiva 91/676/KEE, in-Netherlands japplikaw programm ta’ azzjoni fit-territorju kollu tagħhom. Fis-26 ta’ Diċembru 2021, in-Netherlands adottaw programm ta’ azzjoni ġdid għall-perjodu 2022-2025 (9) (is-Seba’ Programm ta’ Azzjoni dwar in-Nitrati), li jinkludi miżuri addizzjonali biex jitnaqqas it-telf tan-nutrijenti (in-nitroġenu u l-fosforu) fl-ambjent u huwa bbażat fuq approċċ reġjonali differenzjat skont il-livell tat-tniġġis tan-nutrijenti u fuq it-tip ta’ ħamrija. Madankollu, il-valutazzjoni tal-impatt fuq l-ambjent, imwettqa bi tħejjija għas-Seba’ Programm ta’ Azzjoni dwar in-Nitrati mill-kummissjoni xjentifika konsultattiva għall-awtoritajiet Netherlandiżi (Commissie van Deskundigen Meststoffenwet), sabet li l-effetti potenzjali tal-programm ta’ azzjoni ma jkunux biżżejjed biex jintlaħqu l-objettivi dwar il-kwalità tal-ilma. Fil-25 ta’ Frar 2022, in-Netherlands adottaw Addendum (10) għas-Seba’ Programm ta’ Azzjoni dwar in-Nitrati li jirreferi għall-Programm Nazzjonali għaż-Żoni Rurali (11) li jistabbilixxi approċċ integrali għan-natura, l-ilma u l-klima, inklużi l-emissjonijiet tan-nitroġenu, biex jiġu ssodisfati r-rekwiżiti ambjentali u klimatiċi tal-Unjoni. Permezz tal-Addendum, il-Gvern Netherlandiż ifittex li jsarraf l-ambizzjonijiet tiegħu f’miżuri konkreti li għandhom l-għan li jilħqu l-miri tal-kwalità tal-ilma għan-nutrijenti minn sorsi agrikoli.

(13)

Is-Seba’ Programm ta’ Azzjoni dwar in-Nitrati 2022-2025 u l-Addendum tiegħu jistabbilixxu l-isforzi meħtieġa għal kull reġjun biex jintlaħqu l-objettivi tal-kwalità tal-ilma rigward in-nitrati u l-fosforu minn sorsi agrikoli kif speċifikat mid-Direttiva 91/676/KEE u l-pjan Netherlandiż ta’ ġestjoni tal-baċir tax-xmara adottat fil-kuntest tad-Direttiva 2000/60/KE tal-Parlament Ewropew u tal-Kunsill (12). Għall-konċentrazzjonijiet tan-nitrati fl-ilma ta’ taħt l-art, ir-reġjuni ta’ Zand Noord, Zand Oost, Westelijk Noord-Brabant, Centraal zeeklei, Zuidwestelijk zeekleigebied, Westelijk zandgebied jeħtieġu xi sforz biex jilħqu l-miri, filwaqt li r-reġjuni ta’ Gelderse Vallei, Oostelijk Noord-Brabant en Limburg Zand, Lössgebied jeħtieġu sforz sinifikanti biex jilħquhom. Għall-konċentrazzjonijiet tal-fosforu fl-ilma tal-wiċċ (ewtrofikazzjoni), ir-reġjuni ta’ Zand Noord, Zand Oost, Westelijk Noord-Brabant, Oostelijk Noord-Brabant en Limburg Zand, Noordelijk zeekleigebied, Centraal zeeklei Zuidwestelijk zeekleigebied jeħtieġu xi sforz biex jilħqu l-miri, filwaqt li r-reġjuni ta’ Gelderse Vallei, Lössgebied, Westelijk Zeeklei, Westelijk veengebied, Westelijk zandgebied jeħtieġu sforz sinifikanti biex jilħquhom. Dan huwa konsistenti mad-data rrapportata min-Netherlands skont l-Artikolu 10 tad-Direttiva 91/676/KEE.

(14)

In-Netherlands se jadottaw deżinjazzjoni ġdida ta’ żoni mniġġsa min-nitrati u l-fosforu minn sorsi agrikoli (żoni mniġġsa bin-nutrijenti), li jenħtieġ li jinkludu ż-żoni kollha ta’ qbid għall-punti ta’ monitoraġġ għall-ilma ta’ taħt l-art u għall-ilma tal-wiċċ li juru tniġġis medju tan-nitrati jew avvenimenti okkażjonali ta’ tniġġis tan-nitrati, li jkunu f’riskju li jiġu mniġġsa u li jiżdiedu x-xejriet, kif ukoll il-monitoraġġ ta’ punti li juru ewtrofikazzjoni jew li jkunu f’riskju li jsiru ewtrofiċi. Id-deżinjazzjoni jenħtieġ li tqis ukoll il-ġurisprudenza rilevanti tal-Qorti tal-Ġustizzja tal-Unjoni Ewropea, b’mod partikolari, id-deċiżjonijiet fil-kawżi C-221/03 (13) u C-543/16 (14). Jekk ma jkun hemm l-ebda deżinjazzjoni ġdida fis-seħħ fl-1 ta’ Jannar 2024, iż-żoni kollha fejn ikunu meħtieġa xi sforzi jew sforzi sinifikanti se jiġu ddeżinjati bħala żoni mniġġsa bin-nutrijenti.

(15)

Din it-talba għal deroga jenħtieġ li titqies fil-kuntest usa’ tal-politika tal-UE fir-rigward ta’ kwistjonijiet ta’ ġestjoni tan-nutrijenti, b’mod partikolari, l-objettivi u l-miri tad-Direttivi 2000/60/KE, 2006/118/KE (15) u 2008/56/KE (16) tal-Parlament Ewropew u tal-Kunsill, l-ambizzjoni dejjem akbar tar-Regolament dwar il-Kondiviżjoni tal-Isforzi (17) u l-Pjan Strateġiku tal-PAK għan-Netherlands (18), kif ukoll l-objettivi tal-Patt Ekoloġiku Ewropew dwar it-tniġġis tan-nutrijenti. Il-Patt Ekoloġiku Ewropew jistabbilixxi objettivi għall-Unjoni biex tnaqqas it-telf tan-nutrijenti, u biex tillimita l-gassijiet serra mhux tas-CO2, jiġifieri l-metan u l-ossidu nitruż, li l-fertilizzazzjoni u l-bhejjem huma sors ewlieni tagħhom. B’mod partikolari, l-Unjoni impenjat ruħha, fl-Istrateġija “mill-Għalqa sal-Platt (19)” u fil-Pjan ta’ Azzjoni għal Tniġġis Żero (20), li tnaqqas it-telf tan-nutrijenti b’50 % fl-2030, li jwassal għal tnaqqis ta’ 20 % fil-fertilizzanti, u jippreżerva l-fertilità tal-ħamrija, u li tnaqqas b’25 % iż-żoni tal-ekosistemi tal-UE, imkejla bħala żoni ’l fuq minn “tagħbijiet kritiċi” tad-depożizzjoni tan-nitroġenu, fejn it-tniġġis tal-arja jhedded il-bijodiversità.

(16)

Fil-“proposta inizjali għall-Programm Nazzjonali għaż-żoni Rurali” tal-10 ta’ Ġunju 2022 (21), il-Gvern Netherlandiż jinnota li “Fiż-żoni tat-torbiera, iż-żoni ta’ Natura 2000, iż-żoni ta’ protezzjoni tal-ilma ta’ taħt l-art, il-korsiji tal-ilma vulnerabbli, u ż-żoni ta’ lqugħ madwar is-siti ta’ Natura 2000 huma l-akbar sfidi. F’dawk iż-żoni, il-bdiewa jkollhom aktar restrizzjonijiet fuq in-negozju jew anqas opportunitajiet ta’ żvilupp. L-estensifikazzjoni tal-agrikoltura hija mbagħad l-aktar rotta xierqa”. Hemm ukoll “impenn biex jinħolqu żoni tranżizzjonali madwar is-siti ta’ Natura 2000”. “Żoni tranżizzjonali (żoni ta’ lqugħ) madwar iż-żoni ta’ Natura 2000 huma żoni maġenb is-siti ta’ Natura 2000 li jikkontribwixxu għar-restawr tas-sistema biex tinżamm u tiġi restawrata l-bijodiversità fis-sit ta’ Natura 2000 ikkonċernat”.

(17)

Il-Kummissjoni eżaminat it-talba Olandiża għal deroga filwaqt li qieset ir-rekwiżiti u l-objettivi tad-Direttiva 91/676/KEE u l-esperjenza mid-deċiżjonijiet preċedenti ta’ deroga u fid-dawl tas-Seba’ Programm ta’ Azzjoni dwar in-Nitrati u l-Addendum tiegħu. Hija eżaminat ukoll ix-xejriet fil-kwalità tal-ilma u qieset l-objettivi tal-Patt Ekoloġiku Ewropew. Abbażi ta’ dan ta’ hawn fuq, il-Kummissjoni tqis li huwa meħtieġ li jiġi żgurat perjodu ta’ deroga tranżizzjonali prevedibbli ta’ massimu ta’ 4 snin għall-bdiewa tal-bwar sakemm ir-riformi ppjanati kif stabbiliti fl-Addendum jiġu kompletament inkorporati fil-liġi Netherlandiża u li jakkumpanja l-implimentazzjoni gradwali tar-riformi l-ġodda. Il-Kummissjoni tqis ukoll li l-ilħuq tal-objettivi tad-Direttiva 91/676/KEE jirrikjedi li n-Netherlands jissodisfaw kundizzjonijiet addizzjonali stretti, b’mod partikolari, iżda mhux biss, fiż-żoni mniġġsa bin-nutrijenti. Id-deroga mitluba jenħtieġ li tappoġġa l-perkors ta’ riforma definit fl-Addendum u fil-Programm Nazzjonali għaż-Żoni Rurali.

(18)

Id-deroga mogħtija b’din id-Deċiżjoni hija mingħajr preġudizzju għall-obbligi tan-Netherlands li japplikaw id-Direttiva tal-Kunsill 92/43/KEE (22) u s-sentenza tal-Qorti tal-Ġustizzja tal-Unjoni Ewropea fil-Kawża C-293/17 (23), b’mod partikolari dwar l-interpretazzjoni tal-Artikolu 6(3) ta’ dik id-Direttiva; u li japplikaw id-Direttiva 2000/60/KE u d-Direttiva 2008/56/KE u ma teskludix li jistgħu jkunu meħtieġa miżuri addizzjonali biex jiġu ssodisfati l-obbligi derivati minn dawn id-Direttivi.

(19)

Huwa essenzjali li jiġi żgurat li l-awtorizzazzjoni ta’ ammonti addizzjonali ta’ demel għal kull ettaru fis-sena ma ddewwimx jew tqiegħed f’riskju r-rekwiżiti ta’ leġiżlazzjoni oħra tal-Unjoni li għaliha t-tniġġis tan-nitroġenu u tal-fosforu jista’ jkun ostaklu biex jintlaħqu l-objettivi tagħha. Għalhekk, jenħtieġ li l-awtorizzazzjonijiet nazzjonali għal derogi għal bdiewa individwali ma jkunux permessi f’żoni ta’ protezzjoni tal-ilma ta’ taħt l-art u f’żoni ta’ Natura 2000, jew fi ħdan iż-żoni ta’ lqugħ madwar iż-żoni Natura 2000 kif definiti fil-Programm Nazzjonali Netherlandiż għaż-Żoni Rurali, u li d-daqs tagħhom se jiġi speċifikat fl-2023.

(20)

Id-densità tal-bhejjem fin-Netherlands għadha għolja ħafna; fl-2016, kienet l-ogħla fl-Unjoni, kważi ħames darbiet ogħla mill-medja tal-Unjoni. Skont id-data pprovduta min-Netherlands, fil-perjodu mill-2019 sal-2021 il-bhejjem totali naqsu bi 2,5 %, filwaqt li l-għadd ta’ baqar żdied.

(21)

Il-produzzjoni kumplessiva tad-demel tal-2020 jenħtieġ li ma tinqabiżx. Dan il-limitu tal-produzzjoni massima tad-demel se jkun inkorporat fil-leġiżlazzjoni nazzjonali fl-1 ta’ Jannar 2024. Barra minn hekk, l-implimentazzjoni tar-riformi ppjanati skont il-Programm Nazzjonali għaż-Żoni Rurali jenħtieġ li twassal għal tnaqqis gradwali tal-produzzjoni tad-demel sa tmiem il-validità tad-Deċiżjoni attwali.

(22)

B’mod partikolari, f’żoni mniġġsa bin-nutrijenti, huwa meħtieġ li s-Seba’ Programm ta’ Azzjoni dwar in-Nitrati u l-Addendum tiegħu jiġu kkomplementati b’miżuri speċifiċi rikonoxxuti għall-effettività tagħhom fil-ġestjoni sostenibbli tan-nutrijenti fil-livell tal-azjenda agrikola u fit-tnaqqis tat-telf tan-nutrijenti fl-ilma ta’ taħt l-art u fl-ilma ħelu.

(23)

In-Netherlands stabbilew strateġija msaħħa ta’ infurzar biex iżidu l-prevenzjoni tal-frodi fl-implimentazzjoni tal-politika tagħhom dwar id-demel. Dik l-istrateġija ġiet implimentata fis-snin 2020-2021, iżda ġarrbet xi dewmien ukoll minħabba l-pandemija tal-COVID. L-implimentazzjoni tal-istrateġija tul l-assi ewlenin ta’ azzjoni tagħha jeħtieġ li tiġi segwita b’mod effettiv u estiża għal reġjuni oħra fejn il-valutazzjoni indipendenti turi riskju sinifikanti ta’ nuqqas ta’ konformità intenzjonat mar-regoli dwar il-ġestjoni tad-demel. Il-perjodu ta’ tranżizzjoni għar-riformi agrikoli ppjanati jista’ jwassal ukoll għal żieda fil-frodi, u għalhekk il-kontrolli jenħtieġ li jiġu intensifikati.

(24)

L-awtorizzazzjonijiet lill-bdiewa individwali huma soġġetti għal ċerti kundizzjonijiet li għandhom l-għan li jiżguraw li l-fertilizzazzjoni fil-livell tal-azjenda agrikola tkun ibbażata fuq il-ħtiġijiet tal-għelejjel u biex jipprevjenu t-telf ta’ nitroġenu u fosfat fl-ilma. Il-miżuri stabbiliti f’din id-Deċiżjoni jenħtieġ li jkunu addizzjonali għall-miżuri li diġà qed jiġu applikati permezz tas-Seba’ Programm ta’ Azzjoni dwar in-Nitrati u l-Addendum tiegħu.

(25)

In-Netherlands huma meħtieġa jimplimentaw il-miżuri kollha stabbiliti fl-Anness III tad-Direttiva (UE) 2016/2284 tal-Parlament Ewropew u tal-Kunsill (24) għat-tnaqqis tal-emissjonijiet tal-ammonijaka. Ir-rapport dwar l-impatt tad-Direttiva 91/676/KEE fuq l-emissjonijiet gassużi tan-nitroġenu (25) ikkonkluda li f’xi reġjuni b’densità għolja ta’ bhejjem, id-deroga tista’ tirriżulta f’emissjonijiet gassużi ogħla. Għalhekk, jenħtieġ li jittieħdu miżuri xierqa biex jitnaqqsu l-emissjonijiet tal-ammonijaka, inklużi tekniki ta’ tixrid b’emissjonijiet baxxi, fejn meħtieġ flimkien ma’ temperatura massima li fiha jista’ jiġi applikat id-demel u obbligu strett ta’ inkorporazzjoni immedjata fil-ħamrija tad-demel/tad-demel likwidu meta jiġi applikat fuq l-għelieqi.

(26)

Il-kundizzjonijiet stabbiliti fl-Artikolu 4 ta’ din id-Deċiżjoni huma kkunsidrati bħala l-verżjoni tar-Rekwiżiti Statutorji ta’ Ġestjoni stabbiliti fil-liġi nazzjonali skont it-tifsira tal-Artikolu 12 u 13 tar-Regolament (UE) 2021/2115 tal-Parlament Ewropew u tal-Kunsill (26), u l-kundizzjonijiet stabbiliti fl-Artikoli 5 sa 9 ta’ din id-Deċiżjoni huma kkunsidrati għall-entitajiet li jibbenefikaw minn derogi bħala l-verżjoni tar-Rekwiżiti Statutorji ta’ Ġestjoni stabbiliti fil-liġi nazzjonali skont it-tifsira tal-Artikolu 12 u 13 tar-Regolament (UE) 2021/2115.

(27)

In-Netherlands iridu jikkonformaw mal-objettivi dwar l-emissjonijiet u l-assorbimenti ta’ gassijiet serra minn użu tal-art, tibdil fl-użu tal-art u l-forestrija fil-qafas ta’ politika għall-klima u l-enerġija għall-2030. Konverżjoni tal-użu tal-art minn art bil-ħaxix għal raba’ li jinħadem twassal għal żieda fl-emissjonijiet tal-karbonju fil-ħamrija u xxekkel il-konformità mal-Artikolu 4 tar-Regolament (UE) 2018/841 tal-Parlament Ewropew u tal-Kunsill (27).

(28)

Id-Direttiva 2007/2/KE tal-Parlament Ewropew u tal-Kunsill (28) tistabbilixxi r-regoli ġenerali maħsuba għall-istabbiliment tal-Infrastruttura għall-Informazzjoni Ġeografika fl-Unjoni għall-finijiet tal-politiki ambjentali tal-Unjoni u tal-politiki jew l-attivitajiet tal-Unjoni li jaf iħallu impatt fuq l-ambjent. Meta applikabbli, jenħtieġ li l-informazzjoni ġeografika miġbura fil-kuntest ta’ din id-Deċiżjoni tkun konformi mad-dispożizzjonijiet stabbiliti f’dik id-Direttiva. Barra minn hekk, sabiex inaqqsu l-piż amministrattiv u jżidu l-koerenza tad-data, jenħtieġ li n-Netherlands, huma u jiġbru d-data neċessarja skont din id-Deċiżjoni, fejn xieraq, jużaw l-informazzjoni ġġenerata bis-sistema integrata ta’ amministrazzjoni u kontroll stabbilita min-Netherlands skont l-Artikolu 67(1) tar-Regolament (UE) Nru 1306/2013 tal-Parlament Ewropew u tal-Kunsill (29).

(29)

Din id-Deċiżjoni tieqaf tapplika fil-31 ta’ Diċembru 2025.

(30)

Il-miżuri previsti f’din id-Deċiżjoni huma f’konformità mal-opinjoni tal-Kumitat dwar in-Nitrati stabbilit skont l-Artikolu tad-Direttiva 91/676/KEE,

ADOTTAT DIN ID-DEĊIŻJONI:

Artikolu 1

Deroga

Id-deroga mitluba min-Netherlands permezz tal-ittra tal-25 ta’ Frar 2022, bil-għan li tippermetti l-applikazzjoni fl-art ta’ ammont ogħla ta’ nitroġenu mid-demel tal-bhejjem li jirgħu minn dak previst fil-paragrafu 2, it-tieni subpargrafu, l-ewwel sentenza tad-Direttiva 91/676/KEE tingħata bħala miżura tranżizzjonali biex takkumpanja r-riformi tas-settur tal-agrikoltura u tal-bhejjem fin-Netherlands sabiex jiġu ssodisfati r-rekwiżiti ambjentali u klimatiċi tal-UE fir-rigward tal-emissjonijiet tan-nitroġenu (inkluża l-ammonijaka) u n-nutrijenti fl-ilma (inkluża d-Direttiva 91/676/KEE), u soġġett għall-kundizzjonijiet stabbiliti f’din id-Deċiżjoni.

Artikolu 2

Ambitu tad-deroga

Id-deroga tapplika għall-azjendi tal-bwar li għalihom ingħatat awtorizzazzjoni f’konformità mal-Artikolu 6.

Artikolu 3

Definizzjonijiet

Għall-finijiet ta’ din id-Deċiżjoni, għandhom japplikaw id-definizzjonijiet li ġejjin:

(1)

“azjenda tal-bwar” tfisser kull azjenda fejn mill-inqas 80 % mir-raba’ li jista’ jiddemmel ikun ħaxix;

(2)

“bhejjem li jirgħu” tfisser bhejjem tal-ifrat (għajr għall-għoġġiela tas-simna), nagħaġ, mogħoż, żwiemel, ħmir, ċriev u bufli tal-ilma;

(3)

“raba’” tfisser l-erja li tkun proprjetà tal-bidwi, jew mikrija jew ġestita minnu abbażi ta’ kuntratt individwali bil-miktub, li fiha l-bidwi jkollu r-responsabbiltà diretta tal-ġestjoni;

(4)

“bur” tfisser bur permanenti jew temporanju li ilu inqas minn ħames snin;

(5)

“pjan tal-fertilizzazzjoni” tfisser kalkolu tal-użu ppjanat u tad-disponibbiltà tan-nutrijenti;

(6)

“kont tal-fertilizzazzjoni” tfisser il-bilanċ tan-nutrijenti abbażi tal-użu reali u l-assorbiment tan-nutrijenti;

(7)

“reġistru tal-fertilizzazzjoni” tfisser sistema elettronika li permezz tagħha l-bdiewa jirrapportaw dwar l-użi reali tan-nutrijenti u l-ġestjoni tad-demel;

(8)

“ħamrija ramlija tan-Nofsinhar u taċ-ċentru” tfisser ħamrija indikata bħala ħamrija ramlija tan-Nofsinhar u ħamrija ramlija taċ-ċentru skont il-leġiżlazzjoni Netherlandiża, l-Artikolu 1 il-paragrafu 1 tar-Regolament ta’ Implimentazzjoni dwar l-Att dwar il-Fertilizzanti (30);

(9)

“ħamrija loess” tfisser ħamrija indikata bħala ħamrija loess skont il-leġiżlazzjoni Netherlandiża l-Artikolu 1 il-paragrafu 1 tar-Regolament ta’ Implimentazzjoni dwar l-Att dwar il-Fertilizzanti;

(10)

“nutrijenti” tirreferi għan-nitroġenu u għall-fosfat.

Artikolu 4

Kundizzjonijiet ġenerali tad-deroga

Id-deroga qed tingħata bil-kundizzjonijiet li ġejjin:

1.

In-Netherlands għandhom jiżviluppaw deżinjazzjoni ġdida u mappa ġdida taż-żoni mniġġsa min-nitrati u l-fosforu minn sorsi agrikoli (żoni mniġġsa bin-nutrijenti) sa mhux aktar tard mill-1 ta’ Jannar 2024, li tinkludi ż-żoni kollha ta’ qbid għall-punti ta’ monitoraġġ għall-ilma ta’ taħt l-art u għall-ilma tal-wiċċ li juru tniġġis medju tan-nitrati jew avvenimenti okkażjonali ta’ tniġġis tan-nitrati, f’riskju li jkunu kkontaminati u li jiżdiedu x-xejriet, kif ukoll punti ta’ monitoraġġ li juru ewtrofikazzjoni jew li huma f’riskju li jsiru ewtrofiċi.

Bħala miżura tranżizzjonali u sakemm id-deżinjazzjoni l-ġdida tkun fis-seħħ sa mhux aktar tard mill-1 ta’ Jannar 2024, iż-żoni mniġġsa bin-nutrijenti se jkopru l-ħamrija ramlija tan-Nofsinhar u taċ-ċentru u ż-żoni tal-ħamrija loess, kif ukoll, mill-1 ta’ Jannar 2023, iż-żoni ta’ qbid iddefiniti mill-korpi tal-ilma reġjonali u kkwalifikati bħala żoni inadegwati tan-nutrijenti (ħżiena, foqra u moderati) fl-analiżi nazzjonali tal-kwalità tal-ilma (2020) (31) mill-Aġenzija għall-Valutazzjoni Ambjentali tan-Netherlands (PBL).

Mill-1 ta’ Jannar 2024, għandhom ikunu fis-seħħ deżinjazzjoni finali u mappa taż-żoni mniġġsa bin-nutrijenti u għandhom jinkludu mill-inqas iż-żoni ddeżinjati fl-2023 kif ukoll kwalunkwe żona addizzjonali oħra fejn il-kontribut mill-agrikoltura għat-tniġġis bin-nutrijenti huwa sinifikanti, jiġifieri aktar minn 19 % tat-tagħbija totali tan-nutrijenti.

Jekk id-deżinjazzjoni finali u l-mappa taż-żoni mniġġsa bin-nutrijenti ma jkunux fis-seħħ fl-1 ta’ Jannar 2024, għandha tintuża d-deżinjazzjoni pprovduta fis-Seba’ Programm ta’ Azzjoni dwar in-Nitrati u fl-Addendum tiegħu, li tinkludi ż-żoni kollha fejn huma meħtieġa xi sforzi jew sforzi sinifikanti biex jintlaħqu l-objettivi tal-kwalità tal-ilma rigward il-konċentrazzjonijiet tan-nitrati u tal-fosforu kif speċifikati mid-Direttiva 91/676/KEE u l-pjan Netherlandiż ta’ ġestjoni tal-baċir tax-xmara adottat fil-kuntest tad-Direttiva 2000/60/KE.

2.

In-Netherlands għandhom jimmonitorjaw l-ammont ta’ demel prodott u jiżguraw li l-produzzjoni tad-demel fil-livell nazzjonali, kemm f’termini ta’ nitroġenu kif ukoll ta’ fosfat, ma taqbiżx 489,4 miljun kg ta’ nitroġenu u 150,7 miljun kg ta’ fosfat (l-ammont prodott fl-2020), u li, bħala riżultat tar-riformi stabbiliti fl-Addendum li qed jiġi implimentat, l-ammont ta’ demel prodott jonqos gradwalment, u fl-2025 ma jaqbiżx 440 miljun kg ta’ nitroġenu u 135 miljun kg ta’ fosfat.

3.

Mill-1 ta’ Jannar 2023, in-Netherlands ma għandhomx jagħtu awtorizzazzjonijiet għal derogi kif imsemmi fl-Artikolu 5 ta’ din id-Deċiżjoni fi ħdan is-siti ta’ Natura 2000 stabbiliti f’konformità mad-Direttiva 2009/147/KE tal-Parlament Ewropew u tal-Kunsill (32) u d-Direttiva 92/43/KEE, u, mill-1 ta’ Jannar 2024, f’żoni ta’ lqugħ qrib is-siti ta’ Natura 2000 kif speċifikat mill-Programm Nazzjonali għaż-Żoni Rurali, li għalihom tinqabeż it-tagħbija kritika tan-nitroġenu għad-depożizzjoni tan-nitroġenu.

4.

Mill-1 ta’ Jannar 2023, in-Netherlands ma għandhomx jagħtu awtorizzazzjonijiet għal derogi kif imsemmi fl-Artikolu 5 ta’ din id-Deċiżjoni fiż-żoni ta’ protezzjoni tal-ilma ta’ taħt l-art. F’żoni fejn l-ilma ta’ taħt l-art ikun imniġġes bin-nitrati, għandu jiġi applikat pakkett ta’ miżuri obbligatorji biex jitnaqqsu t-tagħbijiet tan-nutrijenti fiż-żoni ta’ protezzjoni tal-ilma ta’ taħt l-art sal-1 ta’ Jannar 2024.

5.

In-Netherlands għandhom jistabbilixxu l-miżuri li ġejjin:

(a)

minn Jannar 2023, l-azjendi agrikoli kollha għandhom ifasslu pjan annwali ta’ fertilizzazzjoni qabel l-istaġun tat-tkabbir. Il-pjan tal-fertilizzazzjoni għandu jiddeskrivi n-newba tal-għelejjel tar-raba’, kif ukoll l-applikazzjoni ppjanata tat-tidmil u ta’ fertilizzanti oħra tan-nitroġenu u tal-fosfati.

(b)

għandu jkun hemm reġistru elettroniku tal-fertilizzanti fis-seħħ mill-1 ta’ Jannar 2024 li jirreġistra l-applikazzjoni ta’ fertilizzanti minerali u l-produzzjoni u l-applikazzjoni tad-demel fuq l-art. Sal-1 ta’ Jannar 2025, l-azjendi agrikoli kollha għandhom jużaw ir-reġistru elettroniku. L-awtoritajiet Netherlandiżi għandhom jimmonitorjaw u janalizzaw ir-rati ta’ applikazzjoni tal-fertilizzanti u jipprovdu pariri lill-bdiewa dwar metodi biex jitnaqqsu r-rati ġenerali ta’ applikazzjoni.

(c)

biċċiet ta’ art ta’ lqugħ fuq art agrikola tul il-mogħdijiet tal-ilma li fuqhom hija pprojbita l-fertilizzazzjoni. Dan japplika mill-1 ta’ Jannar 2023 għall-mogħdijiet kollha tal-ilma fuq biċċiet tar-raba’ li jinsabu fin-Netherlands. Il-biċċiet ta’ art ta’ lqugħ għandhom jiġu stabbiliti kif ġej:

(i)

biċċiet ta’ art ta’ lqugħ b’wisa’ minima ta’ 5 metri tul nixxigħat u korpi tal-ilma tal-wiċċ vulnerabbli ekoloġiċi kif iddefiniti skont id-Direttiva 2000/60/KE;

(ii)

biċċa art ta’ lqugħ b’wisa’ minima ta’ 3 metri tul il-mogħdijiet tal-ilma l-oħra kollha f’żoni agrikoli, inkluż għall-gandotti.

Dawn il-wisgħat minimi jistgħu jiġu aġġustati f’żoni b’gandotti tat-tneħħija tal-ilma u tal-irrigazzjoni sinifikanti bil-mod li ġej:

—

biċċa art ta’ lqugħ b’wisa’ ta’ 3 metri tul il-korpi tal-ilma tal-wiċċ kif definita skont id-Direttiva 2000/60/KE fejn l-erja totali fil-livell tal-irqajja’ ta’ biċċa art ta’ lqugħ b’wisa’ ta’ 5 metri tkun tinkludi aktar minn 4 % tal-biċċa raba’. Meta l-erja totali fil-livell tal-irqajja’ ta’ biċċa art ta’ lqugħ b’wisa’ ta’ 3 metri tul korpi tal-ilma tal-wiċċ kif definiti fid-Direttiva 2000/60/KE li ma jkunux akbar minn 10 metri tkun tinkludi aktar minn 4 % tal-biċċa raba’, il-biċċa art ta’ lqugħ tista’ titnaqqas għal metru.

—

biċċa art ta’ lqugħ b’wisa’ ta’ metru tul il-mogħdijiet l-oħra kollha tal-ilma f’żoni agrikoli fejn l-erja totali fil-livell tal-irqajja’ ta’ biċċa art ta’ lqugħ b’wisa’ ta’ 3 metri tkun tinkludi aktar minn 4 % tal-biċċa raba’. Meta l-erja totali fil-livell tal-irqajja’ ta’ biċċa art ta’ lqugħ b’wisa’ ta’ metru tkun tinkludi aktar minn 4 % tal-biċċa raba’, il-biċċa art ta’ lqugħ tista’ titnaqqas għal 0,5 metri.

(iii)

biċċa art ta’ lqugħ b’wisa’ minima ta’ metru tul il-mogħdijiet tal-ilma li jinxfu fis-sajf (dawk il-mogħdijiet tal-ilma jkunu xotti mill-inqas matul il-perjodu mill-1 ta’ April sal-1 ta’ Ottubru).

(d)

F’żoni mniġġsa bin-nutrijenti, għandha tapplika l-kundizzjoni li ġejja: ir-rata ġenerali ta’ fertilizzazzjoni minn fertilizzanti organiċi u kimiċi għandha titnaqqas gradwalment sabiex ir-rati jkunu 20 % inqas mill-1 ta’ Jannar 2025 meta mqabbla mar-rati ppubblikati fl-Anness tas-Seba’ Programm ta’ Azzjoni dwar in-Nitrati. Jekk ir-reviżjoni ppjanata tan-normi ta’ fertilizzazzjoni tistabbilixxi valuri aktar baxxi, din tal-aħħar għandha tipprevali.

6.

In-Netherlands għandhom isegwu l-implimentazzjoni tal-istrateġija tal-infurzar imsaħħa, filwaqt li jibnu fuq l-esperjenza skont l-implimentazzjoni tal-Artikolu 4(3) tad-Deċiżjoni ta’ Implimentazzjoni (UE) 2020/1073. L-istrateġija tal-infurzar imsaħħa għandha tinkludi, bħala minimu, l-elementi li ġejjin:

(a)

valutazzjoni tar-riskju indipendenti kontinwa ta’ każijiet ta’ frodi u identifikazzjoni ta’ żoni u atturi tal-immaniġġar u l-ġestjoni tad-demel b’riskju ogħla ta’ nuqqas ta’ konformità intenzjonata mar-regoli nazzjonali dwar id-demel, speċifikati mir-Regolament ta’ Implimentazzjoni dwar l-Att dwar il-Fertilizzanti (33), id-Digriet dwar l-użu tal-fertilizzanti (34), u d-Digriet dwar l-Attivitajiet ta’ Ġestjoni Ambjentali (35) sa fejn jikkonċerna żoni ħielsa mill-għelejjel, jew skonthom;

(b)

l-implimentazzjoni kontinwa ta’ infurzar imsaħħaħ f’De Peel, Gelderse Vallei u Twente, identifikati bħala żoni ta’ riskju għoli ta’ nuqqas ta’ konformità intenzjonat mar-regoli nazzjonali dwar id-demel; l-istrateġija msaħħa tal-infurzar għandha tiġi estiża progressivament qabel tmiem l-2025 għar-reġjuni l-oħrajn kollha fejn il-valutazzjoni turi li jinsabu f’żona ta’ riskju għoli, filwaqt li jitqiesu l-esperjenza u l-aħjar prattiki miksuba;

(c)

fokus speċifiku tal-istrateġija tal-infurzar fuq l-atturi b’riskju għoli fil-katina tal-valur tad-demel, inklużi l-intermedjarji u l-kodiġesturi fir-reġjuni kollha;

(d)

is-sistema awtomatizzata għar-responsabbiltà f’ħin reali tat-trasport tad-demel li tibda fl-1 ta’ Jannar 2023;

(e)

tisħiħ kontinwu tal-kapaċità għall-ispezzjonijiet u għall-kontrolli, li għandha tkun tal-inqas daqs 40 % mill-kapaċità meħtieġa għall-ispezzjonijiet fuq il-post tal-azjendi tal-bwar koperti minn awtorizzazzjoni kif imsemmi fl-Artikolu 11(2), inklużi l-kontrolli aleatorji, u mmirar aħjar ta’ dik il-kapaċità lejn l-oqsma ta’ riskju fl-amministrazzjoni u fil-ġestjoni tad-demel;

(f)

spezzjoni individwali ta’ mill-inqas 5,5 % tat-trobbija tal-ħnieżer kull sena.

Artikolu 5

Applikazzjonijiet għall-awtorizzazzjoni

1.   Il-bdiewa tal-bwar jistgħu jippreżentaw lill-awtorità kompetenti applikazzjoni għal awtorizzazzjoni annwali biex jiġi applikat ammont ogħla ta’ demel tal-bhejjem li jirgħu, inkluż demel imneħħi mill-annimali nfushom, biex ikun l-ammont ta’ demel għal kull ettaru fis-sena li jkun fih:

(a)

għall-2022, sa 230 kg ta’ nitroġenu għal kull ettaru u għal kull sena f’żoni mniġġsa bin-nutrijenti u sa 250 kg ta’ nitroġenu għal kull ettaru u fis-sena f’żoni oħra;

(b)

għall-2023, sa 220 kg ta’ nitroġenu għal kull ettaru u għal kull sena f’żoni mniġġsa bin-nutrijenti u sa 240 kg ta’ nitroġenu għal kull ettaru f’żoni oħra;

(c)

għall-2024, sa 210 kg ta’ nitroġenu għal kull ettaru u għal kull sena f’żoni mniġġsa bin-nutrijenti u sa 230 kg ta’ nitroġenu għal kull ettaru f’żoni oħra;

(d)

għall-2025, sa 190 kg ta’ nitroġenu għal kull ettaru u għal kull sena f’żoni mniġġsa bin-nutrijenti u sa 200 kg ta’ nitroġenu għal kull ettaru f’żoni oħra;

(e)

wara l-31 ta’ Diċembru 2025, sa 170 kg ta’ nitroġenu għal kull ettaru u kull sena fiż-żoni kollha.

2.   Flimkien mal-applikazzjoni msemmija fil-paragrafu 1, l-applikanti għandhom jippreżentaw dikjarazzjoni bil-miktub li huma jissodisfaw il-kundizzjonijiet stabbiliti fl-Artikoli 7, 8 u 9 u li huma jaċċettaw li l-applikazzjoni, kif ukoll il-pjan tal-fertilizzazzjoni u l-kont tal-fertilizzazzjoni msemmija fl-Artikolu 7, jistgħu jkunu soġġetti għall-ispezzjonijiet kif imsemmi fl-Artikolu 11 ta’ din id-Deċiżjoni.

Artikolu 6

L-għoti ta’ awtorizzazzjonijiet

L-awtorizzazzjonijiet lill-azjendi tal-bwar biex japplikaw ammont ogħla ta’ demel tal-bhejjem li jirgħu fl-azjendi tal-bwar, inkluż id-demel imneħħi mill-annimali nfushom, għandhom jingħataw soġġetti għall-kundizzjonijiet stabbiliti fl-Artikoli 7, 8 u 9.

Artikolu 7

Kundizzjonijiet rigward l-applikazzjoni tad-demel u ta’ fertilizzanti oħra f’azjendi tal-bwar li jibbenefikaw minn deroga

1.   L-ammont ta’ demel mill-bhejjem li jirgħu applikat fuq l-art kull sena f’azjendi tal-bwar, inkluż demel imneħħi mill-annimali nfushom, ma għandux jaqbeż l-ammonti speċifikati fl-Artikolu 5.

2.   Il-fosfat minn fertilizzanti kimiċi ma għandux jintuża fl-azjenda tal-bwar.

3.   L-azjenda tal-bwar għandha tagħmel pjan ta’ fertilizzazzjoni sa mhux aktar tard mit-28 ta’ Frar. Il-pjan għandu jinkludi mill-inqas l-elementi elenkati fl-Artikolu 7(4) tad-Deċiżjoni ta’ Implimentazzjoni (UE) 2020/1073. Il-pjan ta’ fertilizzazzjoni għandu jiġi rivedut mhux aktar tard minn sebat ijiem wara kwalunkwe bidla fil-prattiki agrikoli fl-azjenda tal-bwar.

4.   L-azjenda tal-bwar għandha żżomm kont ta’ fertilizzazzjoni għal kull sena kalendarja. Dan għandu jiġi ppreżentat lill-awtorità kompetenti sal-31 ta’ Marzu tas-sena kalendarja sussegwenti. Il-kont tal-fertilizzazzjoni għandu jinkludi l-elementi li ġejjin:

(a)

l-erjas bl-għelejjel;

(b)

l-għadd u t-tip ta’ bhejjem;

(c)

il-produzzjoni tad-demel għal kull annimal;

(d)

l-ammont ta’ fertilizzanti impurtati mill-azjenda tal-bwar;

(e)

l-ammont ta’ demel li jingħata lill-kuntratturi u li għalhekk ma jintużax fl-azjenda tal-bwar u l-isem ta’ dawk il-kuntratturi.

5.   L-azjenda tal-bwar għandha twettaq analiżi tan-nitroġenu u tal-fosforu fil-ħamrija mill-inqas kull 4 snin għal kull żona omoġenja tal-azjenda agrikola, fir-rigward tan-newba tal-għelejjel u l-karatteristiċi tal-ħamrija. Bħala minimu għandu jkun hemm analiżi waħda għal kull ħames ettari ta’ art. Abbażi ta’ dik l-analiżi, għandhom jiġu applikati l-pjan ta’ fertilizzazzjoni tal-azjenda agrikola u l-miżuri korrettivi.

6.   Meta l-bwar jinħarat għat-tiġdid tal-bwar, l-istandard tal-applikazzjoni tan-nitroġenu għandu jitnaqqas b’50 kg ta’ nitroġenu għal kull ettaru wara l-31 ta’ Mejju ta’ kull sena kalendarja. Meta l-bwar jinħarat għall-kultivazzjoni tal-qamħirrum, l-istandard tal-applikazzjoni tan-nitroġenu għall-qamħirrum għandu jitnaqqas b’65 kg ta’ nitroġenu għal kull ettaru.

7.   Meta n-newba tal-għelejjel tkun tinkludi l-pjanti leguminużi jew pjanti oħrajn li jassorbu in-nitroġenu atmosferiku, iż-żieda tal-fertilizzant għandha titnaqqas kif xieraq.

8.   Ma għandux jingħata d-demel fil-ħarifa qabel il-kultivazzjoni tal-ħaxix.

Artikolu 8

Kundizzjonijiet rigward il-ġestjoni tal-art f’azjendi tal-bwar li jibbenefikaw minn deroga

1.   Fiż-żoni mniġġsa bin-nutrijenti, wara l-qamħirrum għandu jiġi kkultivat il-ħaxix jew għelejjel oħra li jiżguraw il-kopertura tal-ħamrija fix-xitwa.

2.   L-għelejjel tat-titwiq ma għandhomx jinħartu qabel l-1 ta’ Frar.

3.   Fiż-żoni mniġġsa bin-nutrijenti, il-ħaxix għandu jinħarat biss fir-rebbiegħa, ħlief:

(a)

għat-tiġdid tal-bwar, li jista’ jsir sa mhux aktar tard mill-31 ta’ Awwissu;

(b)

għat-tħawwil tal-basal tal-fjuri, li jista’ jsir fil-ħarifa.

4.   Il-ħrit tal-ħaxix f’kull tip ta’ ħamrija għandu jkun segwit minnufih b’għelejjel b’domanda għolja għan-nitroġenu u l-fertilizzazzjoni għandha tkun ibbażata fuq analiżi tal-ħamrija fir-rigward tan-nitroġenu minerali u fuq parametri oħra li jipprovdu referenzi għall-istimi tar-rilaxx tan-nitroġenu mill-mineralizzazzjoni tal-materja organika fil-ħamrija.

Artikolu 9

Kundizzjonijiet fir-rigward tat-tnaqqis tal-emissjonijiet tal-ammonijaka biex jitnaqqsu d-depożiti tan-nutrijenti fl-ilma wkoll

1.   Fl-azjendi tal-bwar li jibbenefikaw minn awtorizzazzjoni skont l-Artikolu 6 għandhom japplikaw il-kundizzjonijiet li ġejjin:

(a)

id-demel likwidu għandu jiġi applikat fil-bwar b’ħamrija ramlija u b’ħamrija “loess” b’injezzjoni baxxa;

(b)

id-demel likwidu għandu jiġi applikat fil-bwar b’ħamrija taflija u bil-pit b’injezzjoni baxxa, b’applikatur tad-demel likwidu bit-trailing shoe, b’dilwizzjoni ta’ 2:1 tad-demel likwidu bl-ilma jew b’injettur ta’ impuls intraċċat;

(c)

id-demel likwidu ma għandux jiġi applikat b’applikatur tat-trailing shoe meta t-temperatura ta’ barra tkun ta’ 20 °C jew ogħla;

(d)

id-demel likwidu għandu jiġi applikat fuq raba’ li jinħadem b’injezzjoni jew jiddaħħal fir-raba’ immedjatament wara li jiġi applikat f’pass wieħed;

(e)

id-demel solidu għandu jiddaħħal fir-raba’ immedjatament wara li jiġi applikat f’mhux aktar minn żewġ passi.

2.   In-Netherlands għandhom jipprovdu taħriġ dwar il-miżuri għat-tnaqqis tal-emissjonijiet tal-ammonijaka lill-bdiewa kollha tal-bwar li jibbenefikaw minn awtorizzazzjoni. L-ewwel taħriġ għandu jiġi pprovdut qabel il-31 ta’ Diċembru 2023.

Artikolu 10

Monitoraġġ

1.   L-awtoritajiet kompetenti għandhom jiżguraw li jitfasslu mapep li jindikaw il-perċentwali ta’ dan li ġej:

(a)

l-azjendi tal-bwar f’kull muniċipalità li huma koperti minn awtorizzazzjonijiet;

(b)

il-bhejjem f’kull muniċipalità li huma koperti minn awtorizzazzjonijiet;

(c)

l-art agrikola f’kull muniċipalità li hija koperta minn awtorizzazzjonijiet.

Dawk il-mapep għandhom jiġu aġġornati kull sena.

2.   L-awtoritajiet kompetenti għandhom jistabbilixxu u jżommu network ta’ monitoraġġ għat-teħid tal-kampjuni tal-ilma tal-ħamrija, tan-nixxigħat, tal-ilma ta’ taħt l-art li jkun qrib il-wiċċ u tal-ilma tad-drenaġġ fis-siti tal-monitoraġġ fl-azjendi tal-bwar koperti minn awtorizzazzjoni. Dak in-network ta’ monitoraġġ għandu jipprovdi d-data dwar il-konċentrazzjoni tan-nitrati u tal-fosfat fl-ilma li jħalli l-parti tal-ħamrija fiż-żona tal-għeruq u li jidħol fis-sistema tal-ilma ta’ taħt l-art u tal-wiċċ.

3.   In-network ta’ monitoraġġ għandu jinkludi mill-inqas 300 azjenda agrikola koperti mill-awtorizzazzjonijiet u għandu jkun jirrappreżenta kull tip ta’ ħamrija (il-ħamrija taflija, il-pit, il-ħamrija ramlija u l-ħamrija “loess” ramlija) u l-livell ta’ tniġġis, il-prattiki tal-fertilizzazzjoni u n-newba tal-għelejjel. Il-kompożizzjoni tan-network ta’ monitoraġġ ma għandhiex tiġi mmodifikata matul iż-żmien li fih tkun applikabbli din id-Deċiżjoni.

4.   L-awtoritajiet kompetenti għandhom jimmonitorjaw dan li ġej:

(a)

l-ilma fil-parti tal-ħamrija fiż-żona tal-għeruq, l-ilma tal-wiċċ u l-ilma ta’ taħt l-art;

(b)

il-progress lejn l-objettivi tal-kwalità tal-ilma rigward il-konċentrazzjonijiet tan-nitrati tal-fosfat kif speċifikat mid-Direttiva 91/676/KEE u l-pjan Netherlandiż ta’ ġestjoni tal-baċir tax-xmara adottat fil-kuntest tad-Direttiva 2000/60/KE f’żoni mniġġsa bin-nutrijenti.

5.   In-Netherlands għandhom jipprovdu lill-Kummissjoni b’data dwar il-konċentrazzjonijiet tan-nitrati fl-ilma tal-wiċċ u fl-ilma ta’ taħt l-art, u dwar il-konċentrazzjoni tal-fosfat u l-istat trofiku għall-ilma tal-wiċċ, kemm taħt kundizzjonijiet ta’ deroga kif ukoll mhux ta’ deroga.

Artikolu 11

Kontrolli u spezzjonijiet

1.   L-awtoritajiet kompetenti għandhom iwettqu kontrolli amministrattivi fuq l-applikazzjonijiet kollha għall-awtorizzazzjoni, bil-għan li jivvalutaw il-konformità mal-kundizzjonijiet fl-Artikoli 7, 8 u 9. Jekk jintwera li l-kundizzjonijiet ma humiex issodisfati, l-awtoritajiet kompetenti għandhom jiċħdu l-applikazzjoni u l-applikant jiġi mgħarraf bir-raġunijiet għar-rifjut.

L-awtoritajiet kompetenti għandhom iwettqu kontrolli amministrattivi għal mill-inqas 5 % mill-azjendi tal-bwar koperti mill-awtorizzazzjonijiet fir-rigward tal-użu tal-art, tal-għadd ta’ bhejjem u tal-produzzjoni tad-demel.

2.   L-awtoritajiet kompetenti għandhom jistabbilixxu programm għall-ispezzjonijiet fuq il-post tal-azjendi tal-bwar koperti minn awtorizzazzjonijiet fuq bażi ta’ analiżi tar-riskju u bi frekwenza xierqa. Il-programm għandu jqis ir-riżultati tal-kontrolli tas-snin preċedenti, ir-riżultati tal-kontrolli aleatorji ġenerali tal-leġiżlazzjoni li tittrasponi d-Direttiva 91/676/KEE u kwalunkwe informazzjoni oħra li tista’ tindika nuqqas ta’ konformità mal-kundizzjonijiet stabbiliti fl-Artikoli 7, 8 u 9 ta’ din id-Deċiżjoni.

L-ispezzjonijiet fuq il-post għandhom isiru f’mill-anqas 5 % mill-azjendi tal-bwar koperti mill-awtorizzazzjonijiet biex tiġi vvalutata l-konformità mal-kundizzjonijiet fl-Artikoli 7, 8 u 9. Dawk l-ispezzjonijiet għandhom jiġu ssupplimentati mill-ispezzjonijiet u l-kontrolli msemmija fl-Artikolu 4(6).

3.   Meta jiġi stabbilit fi kwalunkwe sena li azjenda tal-bwar koperta minn awtorizzazzjoni ma ssodisfatx il-kundizzjonijiet fl-Artikoli 7, 8 u 9, id-detentur tal-awtorizzazzjoni għandu jiġi ssanzjonat f’konformità mar-regoli nazzjonali u ma għandux ikun eliġibbli għal awtorizzazzjoni s-sena ta’ wara.

4.   L-awtoritajiet kompetenti għandhom jingħataw is-setgħat u l-mezzi meħtieġa biex jivverifikaw il-konformità mal-kundizzjonijiet għal awtorizzazzjoni mogħtija skont din id-Deċiżjoni.

Artikolu 12

Rapportar

1.   Sa mhux aktar tard mit-30 ta’ Ġunju ta’ kull sena, l-awtoritajiet kompetenti għandhom iressqu rapport lill-Kummissjoni li jkun fih l-informazzjoni li ġejja:

(a)

id-data marbuta mal-fertilizzazzjoni fl-azjendi tal-bwar kollha li huma koperti mill-awtorizzazzjonijiet skont l-Artikolu 6, inkluża l-informazzjoni dwar ir-rendimenti u t-tipi ta’ ħamrija;

(b)

ix-xejriet fl-għadd ta’ bhejjem għal kull kategorija ta’ bhejjem fin-Netherlands u fl-azjendi tal-bwar koperti minn awtorizzazzjoni;

(c)

ix-xejriet fil-produzzjoni nazzjonali tad-demel f’dak li għandu x’jaqsam man-nitroġenu u mal-fosfat fid-demel;

(d)

l-implimentazzjoni tal-kundizzjonijiet ġenerali stabbiliti fl-Artikolu 4;

(e)

il-mapep li jissemmew fl-Artikolu 10(1);

(f)

ir-riżultati tal-monitoraġġ tal-ilma ta’ taħt l-art u tal-wiċċ, rigward il-konċentrazzjonijiet tan-nitrati u tal-fosfat u l-ewtrofikazzjoni, inkluża informazzjoni dwar ix-xejriet fil-kwalità tal-ilma għall-ilma ta’ taħt l-art u tal-wiċċ, kemm bil-kundizzjonijiet tad-deroga kif ukoll bla deroga, flimkien mal-impatt tad-derogi fuq il-kwalità tal-ilma, kif imsemmi fl-Artikolu 10(4) u (5);

(g)

evalwazzjoni, abbażi tal-kontrolli mwettqa fil-livell tal-azjenda agrikola, ta’ kif qed jiġu implimentati l-kundizzjonijiet għall-awtorizzazzjonijiet stabbiliti fl-Artikoli 7, 8 u 9, u informazzjoni dwar azjendi agrikoli mhux konformi, abbażi tar-riżultati tal-kontrolli u l-ispezzjonijiet amministrattivi msemmija fl-Artikolu 11;

(h)

l-implimentazzjoni tal-istrateġija tal-infurzar imsaħħa msemmija fl-Artikolu 4, b’rapportar speċifiku dwar kull wieħed mill-elementi msemmija fl-Artikolu 4(6).

2.   Id-data ġeografika fir-rapport imsemmi fil-paragrafu 1 għandha tikkonforma, fejn applikabbli, mad-Direttiva 2007/2/KE. Huma u jiġbru d-data meħtieġa, in-Netherlands għandhom jużaw, meta jkun xieraq, l-informazzjoni ġġenerata bis-sistema integrata ta’ amministrazzjoni u kontroll stabbilita f’konformità mal-Artikolu 67(1) tar-Regolament (UE) Nru 1306/2013.

Artikolu 13

Perjodu tal-applikazzjoni

Din id-Deċiżjoni għandha tapplika sal-31 ta’ Diċembru 2025.

Artikolu 14

Destinatarju

Din id-Deċiżjoni hija indirizzata lir-Renju tan-Netherlands.

Magħmul fi Brussell, it-30 ta’ Settembru 2022.

Għall-Kummissjoni

Virginijus SINKEVIČIUS

Membru tal-Kummissjoni


(1)   ĠU L 375, 31.12.1991, p. 1.

(2)  Id-Deċiżjoni tal-Kummissjoni 2005/880/KE tat-8 ta’ Diċembru 2005 li tagħti deroga mitluba min-Netherlands skont id-Direttiva tal-Kunsill 91/676/KEE dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli (ĠU L 324, 10.12.2005, p. 89).

(3)  Id-Deċiżjoni tal-Kummissjoni 2010/65/UE tal-5 ta’ Frar 2010 li temenda d-Deċiżjoni 2005/880/KE li tagħti deroga mitluba mill-Olanda skont id-Direttiva tal-Kunsill 91/676/KEE dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli (ĠU L 35, 6.2.2010, p. 18).

(4)  Id-Deċiżjoni ta’ Implimentazzjoni tal-Kummissjoni 2014/291/UE tas-16 ta’ Mejju 2014 li tagħti deroga mitluba mill-Pajjiżi l-Baxxi skont id-Direttiva tal-Kunsill 91/676/KEE dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli (ĠU L 148, 20.5.2014, p. 88).

(5)  Id-Deċiżjoni ta’ Implimentazzjoni tal-Kummissjoni (UE) 2018/820 tal-31 ta’ Mejju 2018 li tagħti deroga mitluba min-Netherlands skont id-Direttiva tal-Kunsill 91/676/KEE dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli (ĠU L 137, 4.6.2018, p. 27).

(6)  Id-Deċiżjoni ta’ Implimentazzjoni tal-Kummissjoni (UE) 2020/1073 tas-17 ta’ Lulju 2020 li tagħti deroga mitluba min-Netherlands skont id-Direttiva tal-Kunsill 91/676/KEE dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli (ĠU L 234, 21.7.2020, p. 20).

(7)  COM(2021) 1000 u SWD(2021) 1001 il-parti 28.

(8)  COM(2021) 1000 u SWD(2021) 1001 il-parti 28.

(9)  It-titolu oriġinali “7e Nederlandse actieprogramma betreffende de Nitraatrichtlijn (2022-2025)”.

(10)  It-titolu oriġinali “Addendum op het 7e actieprogramma Nitraatrichtlijn”.

(11)  Nationaal Programma Landelijk Gebied.

(12)  Id-Direttiva 2000/60/KE tal-Parlament Ewropew u tal-Kunsill tat-23 ta’ Ottubru 2000 li tistabbilixxi qafas għal azzjoni Komunitarja fil-qasam tal-politika tal-ilma (ĠU L 327, 22.12.2000, p. 1).

(13)  Is-sentenza tal-Qorti tal-Ġustizzja tat-22 ta’ Settembru 2005, C 221/03, il-Kummissjoni tal-Komunitajiet Ewropej vs ir-Renju tal-Belġju, ECLI:EU:C:2005:573.

(14)  Is-Sentenza tal-Qorti tal-21 ta’ Ġunju 2018, il-Kummissjoni Ewropea vs ir-Repubblika Federali tal-Ġermanja, C-543/16, ECLI:EU:C:2018:481.

(15)  Id-Direttiva 2006/118/KE tal-Parlament Ewropew u tal-Kunsill tat-12 ta’ Diċembru 2006 dwar il-protezzjoni tal-ilma ta’ taħt l-art kontra t-tniġġis u d-deterjorament (ĠU L 372, 27.12.2006, p. 19).

(16)  Id-Direttiva 2008/56/KE tal-Parlament Ewropew u tal-Kunsill tas-17 ta’ Ġunju 2008 li tistabbilixxi qafas għal azzjoni komunitarja fil-qasam tal-politika tal-ambjent marin (Id-Direttiva Kwadru dwar l-Istrateġija Marina) (ĠU L 164, 25.6.2008, p. 19).

(17)  Ir-Regolament (UE) 2018/842 tal-Parlament Ewropew u tal-Kunsill tat-30 ta’ Mejju 2018 dwar it-tnaqqis annwali vinkolanti tal-emissjonijiet ta’ gassijiet serra mill-Istati Membri mill-2021 sal-2030 li jikkontribwixxi għall-azzjoni klimatika biex jiġu onorati l-impenji li saru fil-Ftehim ta’ Pariġi, u li jemenda r-Regolament (UE) Nru 525/2013 (ĠU L 156, 19.6.2018, p. 26).

(18)  SWD(2020) 93 final - Analiżi tar-rabtiet bejn ir-Riforma tal-PAK u l-Patt Ekoloġiku; SWD(2020) 388 final - Ir-rakkomandazzjonijiet tal-Kummissjoni għall-pjan strateġiku tal-PAK tan-Netherlands. SWD(2020) 388 final.

(19)  Strateġija “Mill-Għalqa sal-Platt” għal sistema tal-ikel ġusta, tajba għas-saħħa u favur l-ambjent. COM(2020) 381 final.

(20)  COM(2021) 400 final

(21)  It-titolu oriġinali “Startnotitie Nationaal Programma Landelijk Gebied – 10 Juni 2022 ”.

(22)  Id-Direttiva tal-Kunsill 92/43/KEE tal-21 ta’ Mejju 1992 dwar il-konservazzjoni tal-habitat naturali u tal-fawna u l-flora selvaġġa (ĠU L 206, 22.7.1992, p. 7).

(23)  Il-Kawża C-293/17 Coöperatie Mobilisation for the Environment and Vereniging Leefmilieu (ECLI:EU:C:2018:882).

(24)  Id-Direttiva (UE) 2016/2284 tal-Parlament Ewropew u tal-Kunsill tal-14 ta’ Diċembru 2016 dwar it-tnaqqis tal-emissjonijiet nazzjonali ta’ ċerti inkwinanti atmosferiċi, li temenda d-Direttiva 2003/35/KE u li tħassar id-Direttiva 2001/81/KE (ĠU L 344, 17.12.2016, p. 1).

(25)  The impact of the Nitrates Directive on gaseous N emissions, Effects of measures in nitrates action programme on gaseous N emissions, Contract ENV.B.1/ETU/2010/0009.

(26)  Ir-Regolament (UE) 2021/2115 tal-Parlament Ewropew u tal-Kunsill tat-2 ta’ Diċembru 2021 li jistabbilixxi regoli dwar l-appoġġ għall-pjanijiet strateġiċi li għandhom jitfasslu mill-Istati Membri skont il-politika agrikola komuni (Pjanijiet Strateġiċi tal-PAK) u ffinanzjati mill-Fond Agrikolu Ewropew ta’ Garanzija (FAEG) u mill-Fond Agrikolu Ewropew għall-Iżvilupp Rurali (FAEŻR) u li jħassar ir-Regolamenti (UE) Nru 1305/2013 u (UE) Nru 1307/2013 (ĠU L 435, 6.12.2021, p. 1).

(27)  Ir-Regolament (UE) 2018/841 tal-Parlament Ewropew u tal-Kunsill tat-30 ta’ Mejju 2018 dwar l-inklużjoni tal-emissjonijiet u l-assorbimenti ta’ gassijiet serra minn użu tal-art, tibdil fl-użu tal-art u l-forestrija fil-qafas ta’ politika għall-klima u l-enerġija għall-2030 u li jemenda r-Regolament (UE) Nru 525/2013 u d-Deċiżjoni Nru 529/2013/UE (ĠU L 156, 19.6.2018, p. 1).

(28)  Id-Direttiva 2007/2/KE tal-Parlament Ewropew u tal-Kunsill tal-14 ta’ Marzu 2007 li tistabbilixxi Infrastruttura għall-Informazzjoni Ġeografika fil-Komunità Ewropea (INSPIRE) (ĠU L 108, 25.4.2007, p. 1).

(29)  Ir-Regolament (UE) Nru 1306/2013 tal-Parlament Ewropew u tal-Kunsill tas-17 ta’ Diċembru 2013 dwar il-finanzjament, il-ġestjoni u l-monitoraġġ tal-politika agrikola komuni u li jħassar ir-Regolamenti tal-Kunsill (KEE) Nru 352/78, (KE) Nru 165/94, (KE) Nru 2799/98, (KE) Nru 814/2000, (KE) Nru 1290/2005 u (KE) Nru 485/2008 (ĠU L 347, 20.12.2013, p. 549).

(30)  It-titolu oriġinali “Uitvoeringsregeling Meststoffenwet”.

(31)  https://www.pbl.nl/sites/default/files/downloads/pbl-2020-nationale-analyse-waterkwaliteit-4002_0.pdf.

(32)  Id-Direttiva 2009/147/KE tal-Parlament Ewropew u tal-Kunsill tat-30 ta’ Novembru 2009 dwar il-konservazzjoni tal-għasafar selvaġġi (ĠU L 20, 26.1.2010, p. 7).

(33)  It-titolu oriġinali “Uitvoeringsregeling Meststoffenwet”.

(34)  It-titolu oriġinali “Besluit gebruik meststoffen”

(35)  It-titolu oriġinali “Activiteitenbesluit milieubeheer”