(1)

Fl-4 ta’ Ottubru 2011, il-Kummissjoni adottat ir-Regolament ta’ Implimentazzjoni (UE) Nru 988/2011 (2) li jistabbilixxi għall-ewwel darba deroga mill-Artikolu 13(1), l-ewwel subparagrafu tar-Regolament (KE) Nru 1967/2006 sal-31 ta’ Marzu 2014 fir-rigward tad-distanza minima mill-kosta u l-fond minimu tal-baħar għas-sajd bit-tartaruni għall-makku (Aphia minuta) f’ċerti ibħra territorjali tal-Italja (it-Toskana u l-Liguria). Ingħataw diversi estensjonijiet (3), bl-aħħar waħda mogħtija bir-Regolament ta’ Implimentazzjoni tal-Kummissjoni (UE) 2022/1386 (4) li skada fil-31 ta’ Marzu 2024.

(2)

Fit-18 ta’ Ġunju 2024, il-Kummissjoni rċeviet talba mill-Italja għall-estensjoni tal-aħħar deroga, għas-sajd bit-tartaruni għall-makku (Aphia minuta), f’ċerti ibħra territorjali tal-Italja (it-Toskana u l-Liguria).

(3)

L-Italja tat ġustifikazzjonijiet xjentifiċi u tekniċi aġġornati għad-deroga.

(4)

Fis-17 ta’ Ottubru 2024, l-Italja adottat il-pjan ta’ ġestjoni b’Digriet (5), f’konformità mal-Artikolu 19(2) tar-Regolament (KE) Nru 1967/2006 (“il-pjan ta’ ġestjoni Taljan”).

(5)

It-talba tikkonċerna attivitajiet tas-sajd diġà awtorizzati mill-Italja u tkopri bastimenti li għandhom rekord ta’ aktar minn 5 snin fis-sajd u li joperaw skont il-pjan ta’ ġestjoni Taljan adottat f’konformità mal-Artikolu 19(2) tar-Regolament (KE) Nru 1967/2006.

(6)

It-talba tkopri 116-il bastiment (75 bastiment fil-Liguria u 41 fit-Toskana), b’tul b’kollox ta’ anqas minn 14-il metru u bi sforz totali ta’ 5 694,9 kW għall-bastimenti, u l-pjan ta’ ġestjoni jiggarantixxi li ’l quddiem mhux se jiżdied l-isforz tas-sajd, kif meħtieġ mill-Artikolu 13(9) tar-Regolament (KE) Nru 1967/2006.

(7)

Dawk il-bastimenti huma inklużi f’lista li ntbagħtet lill-Kummissjoni skont l-Artikolu 13(9) tar-Regolament (KE) Nru 1967/2006.

(8)

Il-Kumitat Xjentifiku, Tekniku u Ekonomiku għas-Sajd (“STECF”, Scientific, Technical and Economic Committee for Fisheries) ivvaluta l-estensjoni tad-deroga li talbet l-Italja u l-abbozz relatat tal-pjan ta’ ġestjoni Taljan fis-sessjoni plenarja tiegħu li saret mit-8 sat-12 ta’ Lulju 2024 (6).

(9)

Il-valutazzjoni ġenerali mill-STECF hija pożittiva u l-abbozz tal-pjan ta’ ġestjoni fih l-elementi meħtieġa li jappoġġaw it-talba. L-STECF ikkonkluda li l-pjan ta’ ġestjoni għat-tartaruni li għandhom fil-mira l-makku fl-ibħra tat-Toskana u tal-Liguria fih elementi adegwati mil-lat tad-deskrizzjoni tas-sajd, l-objettivi, is-salvagwardji u l-miżuri tekniċi/ta’ konservazzjoni kif ukoll l-indikaturi kwantifikabbli għall-monitoraġġ u l-valutazzjonijiet perjodiċi. L-STECF innota wkoll li l-pjan ta’ ġestjoni jissodisfa l-kundizzjonijiet stabbiliti mill-Artikolu 13 tar-Regolament (KE) Nru 1967/2006 għad-derogi dwar id-distanza mill-kosta u l-Artikolu 9 ta’ dak ir-Regolament fir-rigward tar-deroga mid-daqs minimu tal-malji.

(10)

Id-deroga li talbet l-Italja taffettwa għadd limitat ta’ bastimenti u hemm limitazzjonijiet ġeografiċi speċifiċi, minħabba d-daqs limitat tal-blata kontinentali kif ukoll minħabba d-distribuzzjoni spazjali tal-ispeċijiet fil-mira li jillimitaw il-postijiet għas-sajd.

(11)

Is-sajd ma jistax isir bi rkaptu ieħor, peress li t-tartaruni biss għandhom il-karatteristiċi tekniċi meħtieġa biex jitwettaq dan it-tip ta’ sajd.

(12)

L-attivitajiet tas-sajd ikkonċernati jissodisfaw ir-rekwiżiti tal-Artikolu 4 tar-Regolament (KE) Nru 1967/2006 u ma jtellfux irkapti oħra għajr ix-xbieki tat-tkarkir, it-tartaruni jew xbieki rmunkati simili.

(13)

Barra minn hekk, is-sajd ma għandu l-ebda impatt sinifikanti fuq l-ambjent tal-baħar, peress li t-tartaruni huma rkapti selettivi ħafna u la jmissu ma’ qiegħ il-baħar u lanqas ma għandhom fil-mira ċ-ċefalopodi.

(14)

Ir-rekwiżiti tal-Artikolu 8(1), il-punt (h) tar-Regolament (KE) Nru 1967/2006, kif sostitwiti bl-Artikolu 8(1) u bl-Anness IX, il-Parti B, it-Taqsima I, tar-Regolament (UE) 2019/1241 tal-Parlament Ewropew u tal-Kunsill (7), mhumiex applikabbli għaliex huma relatati mal-bastimenti tat-tkarkir.

(15)

L-Italja awtorizzat deroga mid-daqs minimu tal-malji stabbilit fl-Artikolu 9 tar-Regolament (KE) Nru 1967/2006 abbażi tal-issodisfar tar-rekwiżiti tal-Artikolu 9(7) ta’ dak ir-Regolament minħabba n-natura selettiva ħafna tas-sajd ikkonċernat, l-effett negliġibbli tiegħu fuq l-ambjent tal-baħar u minħabba li mhuwiex affettwat mid-dispożizzjonijiet fl-Artikolu 4(5) tar-Regolament (KE) Nru 1967/2006.

(16)

Għalkemm l-Artikolu 9 tar-Regolament (KE) Nru 1967/2006 tħassar bir-Regolament (UE) 2019/1241, l-Anness IX, il-Parti B, il-punt 4 ta’ dak ir-Regolament jippermetti li jkomplu japplikaw derogi mid-daqsijiet minimi tal-malji abbażi ta’ ċerti kundizzjonijiet imsemmija fl-Artikolu 15(5) tar-Regolament (UE) 2019/1241. Tali derogi li kellhom ikunu fis-seħħ fl-14 ta’ Awwissu 2019, ma jwasslux għal deterjorament tal-istandards ta’ selettività, b’mod partikolari mil-lat ta’ żieda fil-qabdiet tal-frieħ tal-ħut, u għandhom l-għan li jiksbu l-objettivi u l-miri stabbiliti fl-Artikoli 3 u 4 ta’ dak ir-Regolament. L-estensjoni mitluba tikkonforma mal-kundizzjonijiet imsemmija.

(17)

L-attivitajiet tas-sajd ikkonċernati jitwettqu f’distanza qasira mill-kosta f’ilmijiet baxxi fl-istrixxa tat-tliet mili nawtiċi u għaldaqstant ma jtellfux l-attivitajiet ta’ bastimenti oħra.

(18)

Il-pjan ta’ ġestjoni jirregola l-attività tat-tartaruni biex jiġi żgurat li l-qabdiet tal-ispeċijiet imsemmija fl-Anness IX tar-Regolament (UE) 2019/1241 ikunu minimi. Barra minn hekk, skont il-paragrafu 6 tal-pjan ta’ ġestjoni Taljan, is-sajd għall-Aphia minuta jista’ jsir biss fl-istaġun tas-sajd bejn l-1 ta’ Novembru u l-31 ta’ Marzu ta’ kull sena u mhux aktar minn 60 jum għal kull dgħajsa f’kull staġun tas-sajd.

(19)

Il-pjan ta’ ġestjoni fih miżuri għall-monitoraġġ tal-attivitajiet tas-sajd, kif previst fl-Artikolu 13(9), it-tielet subparagrafu, tar-Regolament (KE) Nru 1967/2006.

(20)

L-attivitajiet tas-sajd ikkonċernati jissodisfaw ir-rekwiżiti tal-Artikolu 14 tar-Regolament tal-Kunsill (KE) Nru 1224/2009 (8).

(21)

Għalhekk, il-Kummissjoni tqis li l-estensjoni tad-deroga li talbet l-Italja tikkonforma mal-kundizzjonijiet stabbiliti fl-Artikolu 13(5) u (9) tar-Regolament (KE) Nru 1967/2006. Għaldaqstant jenħtieġ li l-estensjoni tad-deroga tingħata.

(22)

Jenħtieġ li l-Italja tibgħat rapport lill-Kummissjoni fiż-żmien dovut u f’konformità mal-pjan ta’ monitoraġġ previst fil-pjan ta’ ġestjoni Taljan.

(23)

Jenħtieġ li tiġi introdotta limitazzjoni fit-tul taż-żmien tad-deroga biex ikunu jistgħu jittieħdu fil-pront il-miżuri ta’ ġestjoni korrettivi f’każ li r-rapport lill-Kummissjoni juri status ħażin fil-konservazzjoni tal-istokk sfruttat, filwaqt li jkun hemm l-opportunità biex tittejjeb il-bażi xjentifika għal pjan ta’ ġestjoni aħjar.

(24)

Meta wieħed iqis li l-istaġun tas-sajd jibda fl-1 ta’ Novembru, dan ir-Regolament jenħtieġ li japplika mill-1 ta’ Novembru 2024 għal raġunijiet ta’ ċertezza legali. Barra minn hekk, jenħtieġ li dan ir-Regolament jidħol fis seħħ b’urġenza.

(25)

Il-miżuri previsti f’dan ir-Regolament huma f’konformità mal-opinjoni tal-Kumitat għas-Sajd u l-Akkwakultura,

(a)

ikunu rreġistrati fid-Direttorati Marittimi (“Direzione Marittima”) ta’ Genova u ta’ Livorno rispettivament;

(b)

ikollhom rekord ta’ aktar minn 5 snin fis-sajd u mhux se jiżdidilhom aktar l-isforz tas-sajd użat; kif ukoll

(c)

ikollhom awtorizzazzjoni tas-sajd u joperaw skont il-pjan ta’ ġestjoni li adottat l-Italja f’konformità mal-Artikolu 19 tar-Regolament (KE) Nru 1967/2006.