(1)

An 4 Deireadh Fómhair 2011 ghlac an Coimisiún Rialachán Cur Chun Feidhme (AE) Uimh. 988/2011 (2) lena mbunaítear den chéad uair maolú ar Airteagal 13(1), an chéad fhomhír, de Rialachán (CE) Uimh. 1967/2006 go dtí an 31 Márta 2014 a mhéid a bhaineann leis an bhfad íosta ón gcósta agus doimhneacht íosta na mara maidir le saighní báid lena ndéantar iascaireacht ar an mac siobháin trédhearcach (Aphia minuta) in uiscí teorann áirithe de chuid na hIodáile (an Tuscáin agus Liguria). Deonaíodh roinnt síntí (3), agus deonaíodh an síneadh deiridh le Rialachán Cur Chun Feidhme (AE) 2022/1386 (4), a chuaigh in éag an 31 Márta 2024.

(2)

An 18 Meitheamh 2024 fuair an Coimisiún iarraidh ón Iodáil chun síneadh a chur leis an maolú deireanach maidir leis na saighní báid lena ndéantar iascaireacht ar an mac siobháin trédhearcach (Aphia minuta) in uiscí teorann áirithe de chuid na hIodáile (an Tuscáin agus Liguria).

(3)

Sholáthar an Iodáil faisnéis réasúnaithe theicniúil agus eolaíochta a bhí cothrom le dáta le haghaidh an mhaolaithe.

(4)

Ghlac an Iodáil an plean bainistithe le Foraithne (5) i gcomhréir le hAirteagal 19(2) de Rialachán (CE) Uimh. 1967/2006 (‘Plean bainistithe na hIodáile’) an 17 Deireadh Fómhair 2024.

(5)

Baineann an iarraidh le gníomhaíochtaí iascaireachta atá údaraithe cheana ag an Iodáil agus cumhdaítear léi soithí a bhfuil cuntas teiste acu san iascach ar feadh tréimhse níos faide ná 5 bliana agus a fheidhmíonn faoi phlean bainistíochta na hIodáile a glacadh i gcomhréir le hAirteagal 19(2) de Rialachán (CE) Uimh. 1967/2006.

(6)

Cumhdaítear leis an iarraidh 116 shoitheach (75 bhád in Liguria agus 41 bhád sa Tuscáin), atá níos giorra ná 14 m ar fad san iomlán agus ag a bhfuil iarracht iomlán de 5 694,9 kW le haghaidh soithí, agus ráthaítear sa phlean bainistíochta nach dtiocfaidh méadú ar an iarracht iascaireachta amach anseo, de réir mar a cheanglaítear le hAirteagal 13(9) de Rialachán (CE) Uimh. 1967/2006.

(7)

Cuimsítear na soithí sin ar an liosta a cuireadh in iúl don Choimisiún i gcomhréir le hAirteagal 13(9) de Rialachán (CE) Uimh. 1967/2006.

(8)

Rinne an Coiste Eolaíoch, Teicniúil agus Eacnamaíoch um Iascach (‘CETEI’) measúnú ar an síneadh leis an maolú a d’iarr an Iodáil agus ar dhréachtphlean bainistíochta na hIodáile a bhaineann leis an maolú sin ag an seisiún iomlánach a bhí aige ón 8 go dtí an 12 Iúil 2024 (6).

(9)

Tá an measúnú foriomlán a rinne CETEI dearfach agus tá na gnéithe is gá a thacaíonn leis an iarraidh sa phlean bainistíochta. Tháinig CETEI ar an gconclúid go bhfuil eilimintí leordhóthanacha sa phlean bainistíochta maidir le saighní báid lena ndírítear ar an mac siobháin trédhearcach in uiscí na Tuscáine agus Liguria i dtéarmaí na tuairisce ar na hiascaigh, na gcuspóirí, na gcoimircí agus na mbeart caomhnúcháin/teicniúil agus na dtáscairí inchainníochtaithe le haghaidh faireachán agus measúnú tréimhsiúil. Thug CETEI dá aire freisin go gcomhlíonann an plean bainistíochta na coinníollacha a bunaíodh le hAirteagal 13 de Rialachán (CE) Uimh. 1967/2006 maidir leis na maoluithe ar an bhfad ón gcósta agus le hAirteagal 9 den Rialachán sin maidir leis an maolú ar an mogallmhéid íosta.

(10)

An síneadh leis an maolú a d’iarr an Iodáil, déanann sé difear do líon teoranta soitheach agus tá srianta sonracha tíreolaíochta ann, i bhfianaise mhéid teoranta na scairbhe ilchríochaí agus dháileadh spásúil an spriocspeicis araon, rudaí a chuireann teorainn leis na meánna.

(11)

Ní féidir tabhairt faoin iascach le trealaimh eile ós rud é nach bhfuil na saintréithe teicniúla is gá chun an cineál sin iascaigh a dhéanamh ach ag saighní báid.

(12)

Comhlíonann na gníomhaíochtaí iascaireachta lena mbaineann ceanglais Airteagal 4 de Rialachán (CE) Uimh. 1967/2006 agus ní chuireann siad isteach ar threalaimh eile seachas tráil, saighní nó líonta tarraingthe dá samhail.

(13)

Thairis sin, níl aon tionchar mór ag an iascach ar an muirthimpeallacht, ós rud é gur trealaimh an-roghnaíoch iad na saighní báid agus nach mbíonn siad i dteagmháil le grinneall na farraige, ná nach ndíríonn siad ar cheifileapóid.

(14)

Níl feidhm ag ceanglais Airteagal 8(1), pointe (h), de Rialachán (CE) Uimh. 1967/2006, arna ionadú le hAirteagal 8(1) de Rialachán (AE) 2019/1241 ó Pharlaimint na hEorpa agus ón gComhairle (7) agus le hIarscríbhinn IX, Cuid B, roinn I, a ghabhann leis, ós rud é go mbaineann siad le trálaeir.

(15)

D’údaraigh an Iodáil maolú ar an mogallmhéid íosta a bunaíodh in Airteagal 9 de Rialachán (CE) Uimh. 1967/2006 ar bhonn chomhlíonadh cheanglais Airteagal 9(7) den Rialachán sin i bhfianaise chineál an-roghnaíoch na n-iascach lena mbaineann, i bhfianaise na héifeachta diomaibhsí atá aige sin ar an muirthimpeallacht agus i bhfianaise nach ndéanann forálacha Airteagal 4(5) de Rialachán (CE) 1967/2006 difear dó.

(16)

Cé gur scriosadh Airteagal 9 de Rialachán (CE) Uimh. 1967/2006 le Rialachán (AE) 2019/1241, ceadaítear le hIarscríbhinn IX, Cuid B, pointe 4 a ghabhann leis an Rialachán sin gur féidir le maoluithe ar mhogallmhéideanna íosta leanúint d’fheidhm a bheith acu ar bhonn coinníollacha áirithe dá dtagraítear in Airteagal 15(5) de Rialachán (AE) 2019/1241. Maidir leis na maoluithe sin, ba cheart iad a bheith i bhfeidhm an 14 Lúnasa 2019, ní bhíonn meath ar na caighdeáin roghnaíochta mar thoradh orthu, go háirithe i dtéarmaí méadú ar ghabhálacha iasc óg, agus dírítear leo ar na cuspóirí agus na spriocanna a leagtar amach in Airteagail 3 agus 4 den Rialachán sin a bhaint amach. Comhlíonann an síneadh a iarradh na coinníollacha dá dtagraítear.

(17)

Bíonn na gníomhaíochtaí iascaireachta lena mbaineann ar siúl ag fad gearr ón gcósta in uiscí éadomhain laistigh de líne 3 mhuirmhíle agus, dá bhrí sin, ní chuireann siad isteach ar ghníomhaíochtaí soithí eile.

(18)

Déantar gníomhaíocht na saighní báid a rialú sa phlean bainistíochta lena áirithiú gur fíorbheag iad gabhálacha na speiceas a luaitear in Iarscríbhinn IX a ghabhann le Rialachán (AE) 2019/1241. Thairis sin, de réir mhír 6 de phlean bainistíochta na hIodáile, tá an iascaireacht ar Aphia minuta teoranta do shéasúr iascaireachta ón 1 Samhain go dtí an 31 Márta gach bliain agus tá gach séasúr iascaireachta teoranta do 60 lá ar a mhéad in aghaidh an bháid.

(19)

Leis an bplean bainistíochta, cuimsítear bearta maidir le faireachán a dhéanamh ar ghníomhaíochtaí iascaireachta, de réir mar a fhoráiltear in Airteagal 13(9), an tríú fomhír, de Rialachán (CE) Uimh. 1967/2006.

(20)

Comhlíonann na gníomhaíochtaí iascaireachta lena mbaineann ceanglais Airteagal 14 de Rialachán (CE) Uimh. 1224/2009 ón gComhairle (8).

(21)

Dá bhrí sin, measann an Coimisiún go gcomhlíonann an síneadh leis an maolú a d’iarr an Iodáil na coinníollacha a leagtar síos in Airteagal 13(5) agus (9) de Rialachán (CE) Uimh. 1967/2006. Dá bhrí sin, ba cheart an síneadh leis an maolú a iarradh a dheonú.

(22)

Ba cheart don Iodáil tuairisciú don Choimisiún in am trátha agus i gcomhréir leis an bplean faireacháin dá bhforáiltear i bplean bainistíochta na hIodáile.

(23)

Ba cheart teorannú a thabhairt isteach maidir le fad an mhaolaithe chun go mbeifear in ann bearta bainistíochta ceartaitheacha tapa a dhéanamh ina dhiaidh sin i gcás ina léireofaí drochstádas caomhantais maidir leis an stoc saothraithe sa tuarascáil chuig an gCoimisiún, agus raon feidhme á sholáthar chun feabhas a chur ar an mbunús eolaíoch le plean bainistíochta feabhsaithe.

(24)

Ós rud é go gcuirtear tús leis an séasúr iascaireachta an 1 Samhain, ba cheart feidhm a bheith ag an Rialachán seo ón 1 Samhain 2024 ar chúiseanna deimhneachta dlíthiúla. Ina theannta sin, ba cheart an Rialachán seo a theacht i bhfeidhm mar ábhar práinne.

(25)

Tá na bearta dá bhforáiltear sa Rialachán seo i gcomhréir le tuairim an Choiste um Iascach agus Dobharshaothrú,

(a)

go bhfuil na soithí sin cláraithe i Stiúrthóireachtaí muirí (Direzione Marittima) Genova agus Livorno faoi seach;

(b)

go bhfuil cuntas teiste san iascach ag na soithí ar feadh tréimhse níos faide ná 5 bliana agus nach mbaineann aon mhéadú leo ar an iarracht iascaireachta a dhéantar mar gheall orthu; agus

(c)

go bhfuil údarú iascaireachta ag na soithí agus go bhfeidhmíonn siad faoin bplean bainistíochta a ghlac an Iodáil i gcomhréir le hAirteagal 19 de Rialachán (CE) Uimh. 1967/2006.