|
16.9.2009 |
MT |
Il-Ġurnal Uffiċjali tal-Unjoni Ewropea |
L 244/21 |
DEĊIŻJONI TAL-KUMMISSJONI
tal-14 ta’ Settembru 2009
li tistabbilixxi Grupp Konsultattiv Ewropew għall-Konsumaturi
(2009/705/KE)
Il-KUMMISSJONI TAL- KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Billi:
|
(1) |
Ġewwa l-qafas tal-protezzjoni tal-konsumatur kif stipulat fl-Artikolu 153 tat-Trattat huwa xieraq għall-Kummissjoni li tikkonsulta lill-konsumaturi dwar il-problemi li jikkonċernaw il-ħarsien tal-interessi tagħhom fil-livell Komunitarju. |
|
(2) |
Mill-1973 il-Kummissjoni kienet megħjuna minn grupp konsultattiv maħluq għal dan l-għan b'Deċiżjonijiet konsekuttivi, bl-aħħar waħda tkun id-Deċiżjoni tal-Kummissjoni 2003/709/KE tad-9 ta' Ottubru 2003 li tistabbilixxi Grupp Konsultattiv Ewropew għall-Konsumaturi (1). |
|
(3) |
Il-ħidma tal-Grupp fuq perjodu estensiv uriet il-ħtieġa li tittejjeb l-effiċjenza, ir-rappreżentanza u t-trasparenza tal-grupp. Għalhekk, id-dispożizzjonijiet relatati mal-ħolqien ta’ sottogruppi u mal-adozzjoni tal-opinjonijiet tal-Grupp għandhom jiġu ċċarati u għandhom jinkorporaw l-aħjar prattika żviluppata tul l-aħħar snin. |
|
(4) |
F’dan ir-rigward, ikun ukoll xieraq li tiġi riveduta l-proċedura għall-ħatra ta’ membri tal-Grupp li jirrappreżentaw l-organizzazzjonijiet nazzjonali tal-konsumaturi u li jiġu introdotti obbligi ta’ rappurtar addizzjonali dwar il-membri tal-Grupp biex ikunu jistgħu jiġu involuti dejjem aktar l-organizzazzjonijiet nazzjonali tal-konsumaturi fil-ħidma tal-Grupp. |
|
(5) |
Huwa importanti li jkun żgurat li l-Grupp u l-membri tiegħu jieħdu sehem b’mod attiv u li tinħoloq effettivament perspettiva tal-konsumaturi fid-dibattiti wiesa’ tal-partijiet interessati li jirrappreżentaw in-norma għall-konsultazzjoni fl-Ewropa llum. |
|
(6) |
Għar-raġunijiet ta’ protezzjoni tad-dejta, huwa meħtieġ li l-ipproċessar tad-dejta personali relatata mal-membri tal-Grupp ikun suġġett għal-leġiżlazzjoni Komunitarja dwar il-ħarsien tal-individwi fir-rigward tal-ipproċessar tad-dejta personali mill-istituzzjonijiet u l-entitajiet tal-Komunità. |
IDDEĊIDIET KIF ĠEJ:
Artikolu 1
Il-Grupp Konsultattiv Ewropew għall-Konsumaturi
B’dan, qed jiġi stabbilit Grupp Konsultattiv Ewropew għall-Konsumaturi, minn hawn ’il quddiem imsejjaħ “il-Grupp”.
Artikolu 2
Ħidma
(1) Il-Grupp jista' jiġi kkonsultat mill-Kummissjoni dwar il-kwistjonijiet kollha li għandhom x'jaqsmu mal-interessi tal-konsumaturi fil-livell Komunitarju.
(2) Il-Grupp:
|
(a) |
huwa magħmul minn grupp għal diskussjoniiet ġenerali dwar kwistjonijiet relatati mal-interessi tal-konsumaturi; |
|
(b) |
iħejji l-produzzjoni tal-konsumaturi f’fora oħra u jieħu sehem skont il-ħtieġa, fi gruppi waqt li jagħti pariri lill-Kummissjoni dwar kwistjonijiet rilevanti għall-politika tal-konsumaturi fl-UE; |
|
(c) |
jagħti pariri lill-Kummissjoni meta tfassal il-linji politiċi u l-attivitajiet li jkollhom effett fuq il-konsumaturi; |
|
(d) |
jista’ jagħti opinjoni dwar kwistjonijiet Komunitarji li jaffettwaw lill-konsumaturi; |
|
(e) |
jgħarraf lill-Kummissjoni bi żviluppi fil-politika tal-konsumaturi fl-Istati Membri; |
|
(f) |
jaġixxi bħala għajn ta’ tagħrif u pubbliċità fir-rigward tal-azzjoni Komunitarja għall-organizzazzjonijiet nazzjonali. |
Artikolu 3
Sħubija
(1) Il-Grupp għandu jkun magħmul minn:
|
(a) |
membru wieħed li jirrappreżenta l-organizzazzjonijiet nazzjonali tal-konsumaturi għal kull Stat Membru; |
|
(b) |
membru wieħed minn kull organizzazzjoni Ewropea tal-konsumaturi. |
(2) L-organizzazzjonijet nazzjonali tal-konsumaturi msemmija fil-paragrafu 1(a) għandhom ikunu rappreżentattivi, konformi mar-regoli jew mal-prattika nazzjonali tal-konsumaturi u attivi f’livell nazzjonali.
(3) L-organizzazzjonijiet Ewropej tal-konsumaturi msemmija fil-paragrafu 1(b) għandhom jissodisfaw waħda miż-żewġ sensieli ta' kriterji li ġejjin:
|
(a) |
iridu jkunu mhux governattivi, ma jagħmlux qligħ, indipendenti minn interessi industrijali, kummerċjali u ta' negozju jew minn kunflitti ta' interess oħrajn; u
jew |
|
(b) |
iridu jkunu mhux governattivi, ma jagħmlux qligħ, indipendenti minn interessi industrijali, kummerċjali u ta' negozju jew minn kunflitti ta' interessi oħrajn; u
|
(4) Lista indikattiva ta’ organizzazzjonijiet li attwalment jilħqu l-kriterji stipulati fil-paragrafu 3 tinsab imniżżla fl-Anness.
Artikolu 4
Ħatra
(1) Il-membri tal-Grupp li jirrappreżentaw l-organizzazzjonijiet nazzjonali tal-konsumaturi għandhom jinħatru skont il-paragrafi 2 u 3.
(2) Kull Stat Membru għandu jipproponi lista ta’ tliet kandidati, minn entitajiet nazzjonali li jirrappreżentaw l-organizzazzjonijiet tal-konsumaturi stabbiliti minn dak l-Istat Membru, fejn jeżistu, jew mill-awtoritajiet nazzjonali kompetenti. Il-kandidati għandhom ikunu parti mill-organizzazzjonijiet nazzjonali tal-konsumaturi l-iżjed rappreżentattivi skont ir-regoli u l-prattika nazzjonali.
(3) Il-Kummissjoni għandha taħtar membru wieħed u persuna alternattiva għal kull Stat Membru skont il-kriterji li ġejjin:
|
(a) |
il-kandidati għandu jkollhom kompetenza wiesgħa u esperjenza vasta fl-affarijiet tal-konsumaturi tal-UE; |
|
(b) |
kandidati li qabel ma kinux membri ta’ dan il-Grupp għandhom jingħataw prijorità; |
|
(c) |
bilanċ bejn is-sessi. |
(4) Il-membri tal-grupp li jirrappreżentaw l-organizzazzjonijiet Ewropej tal-konsumaturi flimkien ma’ persuna alterattiva għal kull membru għandhom jinħatru mill-Kummissjoni fuq proposta mill-organizzazzjonijiet Ewropej tal-konsumaturi.
(5) Il-persuni alternattivi għandhom awtomatikament jieħdu post il-membri assenti.
(6) Il-Kummissjoni għandha tippubblika l-lista tal-membri u tal-persuni alternattivi fuq is-sit tal-Internet tad-Direttorat Ġenerali tas-Saħħa u l-Konsumaturi u fis-serje C ta' Il-Ġurnal Uffiċjali tal-Unjoni Ewropea. L-ismijiet tal-membri u tal-persuni alternattivi għandhom jinġabru, jiġu pproċessati u ppubblikati skont ir-Regolament (KE) Nru 45/2001 tal-Parlament Ewropew u tal-Kunsill (2).
Artikolu 5
Mandat ta' kariga
(1) Il-mandat ta’ kariga tal-membri u tal-persuni alternattivi għandu jkun ta’ tliet snin u għandu jkun jista’ jiġġedded skont il-proċedura stipulata fl-Artikolu 4.
(2) Wara t-tmiem ta’ perjodu ta' tliet snin, il-membri u l-persuni alternattivi għandhom jibqgħu fil-kariga tagħhom sakemm jiġu mibdula jew sakemm il-ħatriet tagħhom jiġġeddu.
(3) Il-mandat ta’ kariga tal-membri u tal-persuni alternattivi għandu jiskadi qabel jintemm il-perjodu ta’ tliet snin:
|
(a) |
fl-eventwalità tar-riżenja jew l-irtirar tagħhom jew f’każ ta’ mewt; |
|
(b) |
jekk l-entitajiet nazzjonali jew l-awtoritajiet li ressquhom bħala kandidati jitolbu s-sostituzzjoni tagħhom; |
|
(c) |
jekk il-Kummissjoni titlob is-sostituzzjoni tal-membri jew tal-persuni alternattivi li m’għadhomx jistgħu jikkontribwixxu b’mod effettiv jew li ma jaqdux l-obbligi stipulati fl-Artikolu 7(6). |
(4) Il-membri u l-persuni alternattivi għandhom jiġu sostituti għall-bqija tal-perjodu ta' tliet snin skont il-proċedura stabbilita fl-Artikolu 4. Minkejja l-Artikolu 4(2), jekk membru wieħed biss jew persuna alternattiva waħda li tirrappreżenta l-organizzazzjonijiet nazzjonali tal-konsumaturi jeħtieġ li tiġi sostitwita, l-entitajiet nazzjonali jew l-awtoritajiet għandhom jipproponu żewġ kandidati ġodda li minnhom il-Kummissjoni għandha taħtar wieħed skont l-Artikolu 4(3).
Artikolu 6
Soċji u esperti
(1) Fuq il-proposta tal-Kummissjoni, il-Grupp jista' jistieden ir-rappreżentanti ta' organizzazzjonijiet oħra li jkollhom il-promozzjoni tal-interessi tal-konsumaturi bħala waħda mill-miri prinċipali tagħhom u li jaħdmu b'mod attiv f’ livell Ewropew għal dan l-għan, biex ikunu assoċjati fix-xogħol tiegħu.
(2) Il-Grupp jista' jistieden kwalunkwe persuna li jkollha kompetenza speċjali f’xi punt partikolari fuq l-aġenda biex tieħu sehem bħala espert fix-xogħol tal-grupp.
Artikolu 7
L-operat
(1) Il-Kummissjoni għandha:
|
(a) |
tiddetermina l-forma u l-iskeda ta’ ħin li skontha l-Grupp għandu jiltaqa’; |
|
(b) |
tippresiedi l-laqgħat tal-Grupp; |
|
(c) |
tipprovdi servizzi segretarjali u torganizza l-ħidma tal-Grupp. |
(2) Jistgħu jitwaqqfu sottogruppi biex jeżaminaw kwistjonijiet speċifiċi skont it-termini ta’ referenza stabbiliti mill-Grupp; Dawn il-gruppi għandhom jiġu xolti hekk kif jintemm il-mandat tagħhom.
(3) Il-Grupp jista’ joħroġ opinjonijiet fuq talba jew tal-Kummissjoni jew ta’ proposta minn membru bil-kunsens tal-Kummissjoni. Meta titlob opinjoni, il-Kummissjoni tista' tiffissa d-data ta’ skadenza sa meta trid tingħata l-opinjoni. Għal kull opinjoni, il-Grupp jista’ jaħtar relatur wieħed jew aktar minn fost il-membri tiegħu. Ir-relatur għandu jerfa’ r-responsabbiltà ġenerali għat-tħejjija tal-opinjoni.
(4) Il-grupp għandu jadotta r-regoli tiegħu ta' proċedura fuq il-bażi ta’ proposta magħmula mill-Kummissjoni.
(5) Il-Kummissjoni għandha tippubblika fuq is-sit tal-Internet tad-Direttorat Ġenerali għas-Saħħa u l-Konsumaturi, bil-lingwa oriġinali tad-dokument ikkonċernat, kwalukwe opinjoni, sinteżi, konklużjoni, jew konklużjoni parzjali jew dokument ta' ħidma tal-grupp.
(6) Il-membri tal-Grupp li jirrappreżentaw l-organizzazzjonijiet nazzjonali tal-konsumaturi għandhom jgħarrfu u jikkonsultaw lill-assoċjazzjonijiiet li jkunu jirrappreżentaw fil-Grupp. Kull membru għandu jistabbilixxi mekkaniżmi effettivi ta’ rappurtaġġ biex jgħarraf b'mod sistematiku lill-organizzazzjonijiet kollha tal-konsumaturi f’livell nazzjonali dwar il-ħidma tal-Grupp u għandu min-naħa tiegħu jwassal fehmiethom.
(7) Kull membru għandu jressaq rapport lill-Kummissjoni sal-1 ta' Marzu dwar il-ħidma mwettqa fis-sena kalendarja ta' qabel bħala segwitu tal-obbligu tiegħu skont il-paragrafu 6. Il-kontenut ta’ dan ir-rapport għandu jiġi mfisser f'aktar dettall fir-regoli tal-proċedura.
Artikolu 8
Kunfidenzjalità
Bla ħsara għall-Artikolu 287 tat-Trattat, il-membri u l-persuni alternattivi tal-Grupp ma għandhom jiżvelaw l-ebda tagħrif miksub mix-xogħol tagħhom fil-Grupp jew fis-sottogruppi meta l-Kummissjoni tgħarrafhom li l-opinjoni mitluba jew il-kwistjoni mqajma huma ta' natura kunfidenzjali.
Artikolu 9
L-ispejjeż tal-laqgħat
(1) Il-Kummissjoni għandha tħallas lura l-ispejjeż tal-vjaġġi u, fejn ikun xieraq, l-ispejjeż tal-għajxien imġarrbin mill-membri marbuta mal-attivitajiet tal-grupp, skont ir-regoli tal-Kummissjoni dwar il-kumpens għall-ispejjeż tal-esperti esterni.
(2) Il-membri ma għandhomx jitħallsu għas-servizzi tagħhom.
(3) L-ispejjeż tal-laqgħat jitħallsu lura fil-limiti tal-baġit annwali allokat għall-grupp mis-servizzi kompetenti tal-Kummissjoni.
Artikolu 10
Revoka
Id-Deċiżjoni 2003/709/KE hija b'dan irrevokata.
Magħmul fi Brussell, l-14 ta’ Settembru 2009.
Għall-Kummissjoni
Meglena KUNEVA
Membru tal-Kummissjoni
ANNESS
L-organizzazzjonijiet li attwalment jissodisfaw il-kriterji stipulati fl-Artikolu 3(3) huma:
|
— |
il-BEUC — Bureau Européen des Unions des Consommateurs (L-Uffiċċju Ewropew tal-Organizzazzjonijiet tal-Konsumaturi), |
|
— |
l-ANEC — European Association for the Co-ordination of Consumer Representation in Standardisation (L-Assoċjazzjoni Ewropea għall-Koordinament tar-Rappreżentanza tal-Konsumaturi fl-Istandardizzar) |