(1)

L-Artikolu 23(1) tar-Regolament (UE) Nru 600/2014 tal-Parlament Ewropew u tal-Kunsill (2) jirrikjedi lid-ditti ta' investiment biex jiżguraw li n-negozjar li jwettqu f'ishma ammessi għan-negozjar fi swieq regolati, jew innegozjati f'ċentri tan-negozjar għandhom isiru fi swieq regolati, faċilitajiet ta' kummerċ multilaterali (MTFs — multilateral trading facilities) jew f'internalizzaturi sistematiċi, jew f'ċentri tan-negozjar ta' pajjiżi terzi vvalutati mill-Kummissjoni bħala ekwivalenti f'konformità mal-Artikolu 25(4)(a) tad-Direttiva 2014/65/UE.

(2)

L-Artikolu 23(1) tar-Regolament (UE) Nru 600/2014 japplika obbligu tan-negozjar fir-rigward ta' ishma biss. Dan l-obbligu tan-negozjar ma jikkompromettix strumenti oħra ta' ekwità, bħal irċevuti tad-depożiti, ETFs, ċertifikati u strumenti finanzjarji simili oħra.

(3)

Il-proċedura ta' ekwivalenza għal ċentri tan-negozjar stabbiliti f'pajjiżi terzi, stabbiliti fl-Artikolu 25(4)(a) tad-Direttiva 2014/65/UE għandha l-għan li tippermetti lid-ditti ta' investiment biex iwettqu negozjar f'ishma li huma soġġetti għall-obbligu ta' negozjar fl-Unjoni, fuq ċentri tan-negozjar ta' pajjiżi terzi rikonoxxuti bħala ekwivalenti. Il-Kummissjoni għandha tivvaluta jekk il-qafas legali u superviżorju ta' pajjiż terz jiżgurax li ċentru tan-negozjar awtorizzat f'dak il-pajjiż terz huwiex konformi mar-rekwiżiti legalment vinkolanti li huma ekwivalenti għar-rekwiżiti li jirriżultaw mir-Regolament (UE) Nru 596/2014 tal-Parlament Ewropew u tal-Kunsill (3), mit-Titolu III tad-Direttiva 2014/65/UE, mit-Titolu II tar-Regolament (UE) Nru 600/2014 u mid-Direttiva 2004/109/KE tal-Parlament Ewropew u tal-Kunsill (4), li huma soġġetti għal superviżjoni u infurzar effettivi f'dak il-pajjiż terz. Dan għandu jiġi interpretat fid-dawl tal-għanijiet imfittxija minn dak il-att, b'mod partikolari għall-kontribuzzjoni tiegħu għall-istabbiliment u l-funzjonament tas-suq intern, l-integrità tas-suq, il-protezzjoni tal-investitur u fl-aħħar nett imma mhux inqas importanti, l-istabbiltà finanzjarja.

(4)

F'konformità mar-raba' subparagrafu tal-Artikolu 25(4)(a) tad-Direttiva 2014/65/UE, qafas ġuridiku u superviżorju ta' pajjiż terz jista' jitqies bħala ekwivalenti fejn dak il-qafas jissodisfa tal-anqas il-kundizzjonijiet li (a) is-swieq huma soġġetti għal awtorizzazzjoni u għal superviżjoni u infurzar effettivi fuq bażi kontinwa (b) is-swieq ikollhom regoli ċari u trasparenti fir-rigward tal-ammissjoni ta' titoli għan-negozjar sabiex dawn it-titoli jkunu jistgħu jiġu nnegozjati b'mod ġust, effiċjenti u b'ordni, u jkunu negozjabbli liberament, (c) l-emittenti ta' titoli għandhom ikunu soġġetti għal rekwiżiti ta' informazzjoni perjodika u kontinwa sabiex tiġi żgurata livell għoli ta' protezzjoni għall-investitur, u (d) it-trasparenza u l-integrità tas-suq jiġu żgurati permezz tal-prevenzjoni ta' abbuż tas-suq fil-forma ta' abbuż minn informazzjoni privileġġata u manipulazzjoni tas-suq.

(5)

L-għan ta' din il-valutazzjoni ta' ekwivalenza huwa li jiġi evalwat inter alia jekk rekwiżiti li huma legalment vinkolanti li huma applikabbli fl-Iżvizzera għall-boroż nazzjonali stabbiliti u li huma reġistrati ma' u taħt is-superviżjoni tal-Awtorità Superviżjorja tas-Suq Finanzjarju Żvizzeru (“FINMA”) humiex ekwivalenti għar-rekwiżiti li jirriżultaw mir-Regolament (UE) Nru 596/2014, mit-Titolu III tad-Direttiva2014/65/UE, mit-Titolu II tar-Regolament (UE) Nru 600/2014 u mid-Direttiva 2004/109/KE, li huma soġġetti għas-superviżjoni u infurzar effettivi f'dak il-pajjiż terz.

(6)

Fir-rigward tal-kundizzjonijiet li l-boroż huma soġġetti għal awtorizzazzjoni u għal superviżjoni u infurzar effettivi fuq bażi kontinwa, l-Artikolu 26(b) tal-Att Federali dwar l-Infrastrutturi tas-Swieq Finanzjarji u l-Kondotta tas-Swieq fin-Negozjar tat-Titoli u d-Derivattivi (l-Att dwar l-Infrastruttura tas-Suq Finanzjarju Żvizzeru (“FMIA”) jiddefinixxi borża bħala istituzzjoni għan-negozjar ta' titoli multilaterali fejn huma elenkati t-titoli, li l-għan tagħha huwa l-kambju simultanju ta' offerti bejn diversi parteċipanti u l-konklużjoni ta' kuntratti bbażati fuq regoli mhux diskrezzjonali. Borża ma jkollhiex id-diskrezzjoni dwar kif teżegwixxi n-negozjar u mhijiex permessa tagħmel negozjar f'isimha jew twettaq negozjar matched principle. Barra minn hekk, borża għandha tipprovdi lill-parteċipanti b'aċċess imparzjali u mhux diskriminatorju għas-swieq u s-servizzi tagħha. B'dan il-għan, borża għandha jkollha regoli stabbiliti li jippreskrivu l-mezzi li bihom negozjant tat-titoli jew partijiet oħra taħt superviżjoni mill-FINMA, kif ukoll parteċipanti barranin awtorizzati mill-FINMA jistgħu japplikaw biex isiru parteċipanti. B'konformità mal-Artikolu 27(4) tal-FMIA, flimkien mal-Artikolu 25(1) tad-Digriet dwar Infrastrutturi tas-Swieq Finanzjarji u l-Kondotta tas-Swieq fin-Negozjar tat-Titoli u d-Derivattivi (l-Ordinanza dwar l-Infrastruttura tas-Suq Finanzjarju (“FMIO”), il-FINMA tivvaluta u tapprova regolamenti u l-emendi tagħhom dwar id-dħul, id-dmirijiet u l-esklużjoni ta' parteċipanti f'borża. Borża għandha tiċħad l-isħubija għal kull parteċipant li mhuwiex awtorizzat mill-FINMA u tista' tiċħad l-isħubija għal kwalunkwe parteċipant li huwa suġġett għal skwalifika statutorja.

(7)

L-erba' kundizzjonijiet stabbiliti fl-Artikolu 25(4)(a) fis-subparagrafu 4 tad-Direttiva 2014/65/UE għandhom jiġu ssodisfati biex jiddeterminaw li l-arranġamenti legali u superviżorji ta' pajjiż terz fir-rigward taċ-ċentri tan-negozjar awtorizzati hemmhekk huma ekwivalenti għal dawk stipulati fid-Direttiva 2014/65/UE.

(8)

Skont l-ewwel kundizzjoni, ċentri tan-negozjar f'pajjiżi terzi għandhom ikunu soġġetti għall-awtorizzazzjoni u s-superviżjoni u l-infurzar effettivi fuq bażi kontinwa.

(9)

Borża għandha tkun irreġistrata mill-FINRA qabel ma tista' tibda l-operat tagħha. B'konformità għall-Artikoli 4 u 5 tal-FMIA, il-FINMA tagħti awtorizzazzjoni jekk issib li l-kundizzjonijiet u r-rekwiżiti applikabbli fil-konfront tar-rikorrenti huwa ssodisfati. Ir-rekwiżiti ta' awtorizzazzjoni huma stabbiliti fil-FMIA u fl-ordinanzi assoċjati, li għandhom is-saħħa tal-liġi. Il-FMIA tirrikjedi li skambju jkollu stabbiliti arranġamenti biex tindirizza t-tipi kollha ta' kondotta u attività li applikant jixtieq iwettaq. Skont l-Artikolu 27(1) tal-FMIA, taħt is-superviżjoni tal-FMIA, skambju għandu jistabbilixxi l-organizzazzjoni regolatorja u superviżorja tagħha stess, li hija xierqa għall-attività li twettaq. Bl-approvazzjoni tal-FINRA, l-awtoregolamentazzjoni tal-iskambju ssir regolament vinkolanti u infurzabbli. Skont l-Artikolu 27 tal-FMIA, flimkien mal-Artikolu 24(1) tal-FMIO, organizzazzjoni regolatorja u superviżorja xierqa tirrikjedi s-stabbiliment ta' korp li jissodisfa l-kompiti regolatorji, korp superviżorju għan-negozjar, korp responsabbli għall-ammissjoni ta' titoli għan-negozjar u korp ta' appell. Dawn il-korpi għandhom ikunu indipendenti mill-ġestjoni kummerċjali tal-borża mill-aspett organizzattiv kif ukoll fir-rigward tal-persunal. Bħala parti mill-organizzazzjoni awtoregolatorja u superviżorja, il-korp responsabbli rispettiv għandu jimmonitorja u jinforza l-konformità mar-regoli u r-regolamenti tal-borża mill-parteċipanti tal-borża.

(10)

Barra minn hekk, l-Artikolu 18 tal-FMIA jirrikjedi lill-boroż biex jagħtu aċċess miftuħ u mhux diskriminatorju lil parteċipanti u lil ġeneraturi tas-swieq. FINMA tiżgura li r-regoli tal-kambju jikkonformaw ma' dan ir-rekwiżit kemm waqt il-proċess ta' awtorizzazzjoni kif ukoll fuq bażi kontinwa (ara t-taqsimiet 3 sa 5 tal-Ġabra tar-Regoli SSX flimkien mad-Direttiva 1 tal-SSX u t-taqsimiet 3-5 tal-Ġabra tar-Regoli Żvizzeri BX). Iċ-ċaħda mill-aċċess hija permessa biss fuq bażijiet ta' sikurezza u effiċjenza u soġġett għal test strinġenti ta' proporzjonalità (l-Artikolu 18 tal-FMIA, 17 tal-FMIO). Applikanti li ġew miċħuda aċċess jistgħu jressqu appell kontra deċiżjoni ma' bord ta' appell independenti (it-taqsima 8 tal-Ġabra tar-Regoli SSX u t-Taqsima 15 tal-Ġabra tar-Regoli Żvizzeri BX). Konformità tal-iskambji mal-Artikolu 18 tal-FMIA u l-Artikolu 17 tal-FMIO hija soġġetta għas-superviżjoni ta' FINMA. L-adozzjoni tar-regoli u emendi tagħhom jirrikjedu l-approvazzjoni ex ante ta' FINMA, l-implimentazzjoni tagħhom tista' tiġi skrutinizzata mill-persunal, awditi, talbiet għal informazzjoni, jew azzjoni ta' rimedju tal-FINMA skont l-Artikoli 24 ff tal-Att Federali dwar l-Awtorità Superviżorja tas-Swieq Finanzjarji Żvizzeri (“l-Att ta' Superviżjoni dwar is-Swieq Finanzjarji”, “FINMASA”).

(11)

Fir-rigward tas-supervijoni effettiva, il-FINMASA, l-Att Federali dwar Boroż u Negozjar ta' Titoli (“L-Att dwar il-Boroż”, “SESTA”) u l-FMIA jikkostitwixxu s-sorsijiet prinċipali tal-leġiżlazzjoni primarja li tistabbilixxi reġim ġuridikament vinkolanti għan-negozjar ta' titoli fl-Iżvizzera. IL-FINMASA, is-SESTA u l-FMIA jagħtu s-setgħa lill-FINMA b'awtorità wiesgħa dwar l-aspetti kollha tal-industrija tat-titoli, inkluż is-setgħa li jawtorizzaw u jissorveljaw in-negozjanti tat-titoli, il-kontropartijiet ċentrali, id-depożitorji ċentrali tat-titoli, ir-repożitorji tat-tranżazzjonijiet u sistemi ta' ħlas. Il-FMIA u l-FMIO jidentifikaw u jipprojbixxu wkoll ċerti tipi ta' kondotta fis-swieq u jipprovdu lill-FINMA b'setgħat dixxiplinarji fuq entitajiet regolati u persuni assoċjati magħhom. L-Artikolu 29 tal-FINMASA tagħti aċċess komprensiv lill-FINMA għall-informazzjoni rilevanti kollha ta' kwalunkwe persuna jew entità sorveljata, id-ditti tal-awditjar tagħhom u l-awdituri. Taħt il-qafas Żvizzeru, il-boroż huma primarjament responsabbli għat-twaqqif ta' regoli li skonthom il-parteċipanti iwettqu kummerċ u għall-monitoraġġ tal-modi kif il-parteċipanti tagħhom iwettqu l-kummerċ. Il-FINMA tissorvelja r-regolamenti tal-boroż b'mod dirett biex tiżgura li huma konformi mal-qafas legali. Ir-regolamenti kollha u kwalunkwe bidla li ssirilhom għandhom jintbagħtu lill-FINMA għall-approvazzjoni (l-Artikolu 27(4) tal-FMIA). Investigazzjonijiet mill-FINMA jiskattaw minn rapporti ta' ksur potenzjali tal-liġi rrappurtati lill-FINMA mill-boroż jew abbażi tas-suspetti tagħha stess.

(12)

Ladarba tiġi awtorizzata borża, il-FINMA tissorvelja fuq bażi kontinwa jekk din tkomplix tikkonforma mal-kundizzjonijiet u l-obbligi assoċjati mal-awtorizzazzjoni (l-Artikolu 83 tal-FMIA). Borża hija legalment obbligata li tinnotifika lill-FINMA dwar kwalunkwe bidla fiċ-ċirkostanza li fuqha kienet oriġinarjament issejset l-awtorizzazzjoni jew l-approvazzjoni tagħha. Jekk il-bidliet ikunu sostanzjali, l-infrastruttura tas-suq finanzjarju għandha takkwista awtorizzazzjoni jew approvazzjoni minn qabel mingħand il-FINMA biex tkompli bl-attivitajiet tagħha (l-Artikolu 7 tal-FMIA). Rekwiżiti ewlenin huma l-konformità mar-rekwiżiti organizzattivi; l-eżistenza u l-effettività tas-sistema ta' kontroll intern; l-adegwatezzaa tas-sistemi tal-IT; U l-kondotta kummerċjali adegwata. Is-superviżjoni tal-FINMA testendi lill-korpi kollha tal-borża, inkluż lill-funzjonijiet ta' sorveljanza u sanzjonar tagħha fin-negozjar. Skont l-Artikoli 24, 24a tal-FINMASA, il-FINMA tista' twettaq awditi direttament jew indirettament permezz ta' kumpaniji ta' awditjar liċenzjati, kemm fuq il-post kif ukoll mhux fuq il-post. L-Artikoli 27, 30 u 34 tal-FMIA jirrikjedu wkoll li l-boroż awtorizzati kollha jkunu jistgħu jinfurzaw l-konformità mill-emittenti tagħhom, mill-parteċipanti u mill-persuni assoċjati mal-parteċipanti tagħhom mad-dispożizzjonijiet tal-FMIA u l-FMIO, mal-atti u r-regolamenti assoċjati u mar-regoli u r-regolamenti tagħhom stess. Bħala parti mill-obbligu tagħha li tinforza l-konformità mill-membri tagħha, il-borża hija responsabbli għall-investigazzjoni u d-dixxiplinar ta' kwalunkwe ksur tal-liġijiet u r-regoli applikabbli.

(13)

Fir-rigward tal-infurzar effettiv, il-FINMA għandha firxa ta' mekkaniżmi amministrattivi għall-infurzar tas-setgħat u l-awtorità tagħha. Fejn jiġu identifikati ksur fil-liġijiet jew irregularitajiet, il-FINMA tieħu l-miżuri korrettivi meħtieġa li jistgħu jinvolvu proċedimenti ta' infurzar amministrattivi. B'kunsiderazzjoni xierqa lejn il-prinċipju ta' proporzjonalità, il-FINMA timponi l-miżuri li hija tqis bħala l-iktar xierqa biex tiżgura l-konformità mal-liġi. Il-miżuri disponibbli jinkludu twissijiet, istruzzjonijiet speċifiċi biex tiġi restawrata l-konformità mal-liġi, projbizzjonijiet fuq individwi li jipprattikaw il-professjoni tagħhom, projbizzjonijiet fuq negozjanti li jagħmlu negozju u r-revoka ta' liċenzji. Il-FINMA tista' wkoll tikkonfiska profitti ġġenerati b'mod illegali jew it-telf evitat illegalment u tista' tordna l-pubblikazzjoni ta' deċiżjoni finali u vinkolanti. Sabiex terġa' tistabbilixxi l-konformità ta' borża b'dispożizzjonijiet li japplikaw, il-FINMA tista' tuża s-setgħat amministrattivi tagħha għat-tneħħija tal-membri tal-bord jew persunal li l-imġiba kummerċjali impekkabbli tagħhom hija waħda dubjuża. Il-mekkaniżmi amministrattivi tal-FINMA stess huma sostnuti minn sanzjonijiet kriminali fir-rigward tal-offiżi deskritti fil-Kapitolu 4 tal-FINMASA. Proviżjonijiet għal sanzjonijiet kriminali huma inklużi wkoll fl-Artikolu 147 ff. tal-FMIA u l-Artikoli 42a u 43 tas-SESTA. Il-FINMA tgħaddi dawn il-każijiet lill-awtoritajiet kompetenti tal-prosekuzzjoni. Il-FINMA u l-awtorità tal-prosekuzzjoni kompetenti jikkoordinaw l-investigazzjonijiet tagħhom, skont kemm dan huwa prattikabbli u meħtieġ. B'mod ġenerali, id-Dipartiment Federali tas-Servizzi Legali Finanzjarji jħarrek u jiġġudika ksur tad-dispożizzjonijiet kriminali tal-FINMASA u tal-atti tas-swieq finanzjarji. Madankollu, l-Uffiċċju tal-Avukat Ġenerali Federali huwa kompetenti għall-prosekuzzjoni ta' informazzjoni privileġġata u manipulazzjoni tal-prezzijiet taħt il-FMIA.

(14)

Għalhekk jista' jiġi konkluż li l-boroż Żvizzeri huma soġġetti għall-awtorizzazzjoni u s-superviżjoni u l-infurzar effettivi fuq bażi kontinwa.

(15)

Skont it-tieni kundizzjoni, ċentri tan-negozjar ta' pajjiżi terz għandhom ikollhom regoli ċari u trasparenti dwar l-ammissjoni tat-titoli għan-negozjar sabiex tali titoli jkunu jistgħu jiġu kkummerċjalizzati b'mod ġust, ordnat u effiċjenti, u jkunu liberament negozjabbli.

(16)

Il-liġi Żvizzera tirrikjedi li l-boroż joħorġu regolamenti dwar l-ammissjoni tat-titoli għan-negozjar (l-Artikoli 35 u 36 tal-FMIA). Dawn ir-regolamenti jridu jiġu approvati mill-FINMA. Ir-regolamenti se jqisu l-istandards internazzjonali rikonoxxuti u b'mod partikolari, se jkollhom dispożizzjonijiet dwar il-kummerċ ta' titoli; il-pubblikazzjoni ta' informazzjoni li l-investituri jiddependu fuqhom għall-valutazzjoni tal-karatteristiċi ta' titoli u l-kwalità tal-emittent; id-dmirijiet tal-emittent, ir-rappreżentanti tiegħu u terzi partijiet għat-tul ta' żmien kollu tal-elenkar jew l-ammissjoni ta' titoli għan-negozjar; l-obbligu fir-rigward tal-ammissjoni ta' titoli ta' ekwità, biex ikun hemm konformità mal-Artikoli 7 u 81 tal-Atti Federali tas-16 ta' Diċembru 2005 dwar il-Liċenzjar u s-Sorveljanza tal-Awdituri. L-ammissjoni għan-negozjar ta' titoli fuq il-borża u l-kwotazzjoni, formola kkwalifikata ta' ammissjoni għan-negozjar ta' titoli f'boroż hija primarjament iggovernata mir-Regoli ta' Kwotazzjoni u minn Regoli Addizzjonali għall-Kwotazzjoni u l-Ammissjoni għan-Negozjar. Il-borża tivvaluta l-applikazzjoni rreġistrata mill-emittent għal kull titolu u tivverifika li r-rekwiżiti rilevanti kollha huma ssodisfati. Għal kull applikazzjoni, il-borża toħroġ deċiżjoni mil-miktub. L-informazzjoni dwar deċiżjoni ta' ammissjoni hija disponibbli għall-pubbliku. Bil-kwotazzjoni ta' titolu, l-emittent huwa soġġett għal obbligi ta' manteniment fir-rigward ta' obbligi ta' rappurtar perjodiku, bħal, pereżempju, ir-rappurtar finanzjarju u obbligi ta' governanza korporattiva, imma wkoll obbligi ta' rappurtar ibbażati fuq ir-riskju bħall-obbligi ta' rappurtar regolari, l-iżvelar ta' tranżazzjonijiet ta' ġestjoni u pubbliċità ad hoc. Skont l-Artikolu 35(3) tal-FMIA, il-borża tissorvelja l-konformità tal-emittent ma' dawn ir-regoli u timponi s-sanzjonijiet previsti kuntrattwalment f'każ ta' ksur. Skont l-Artikolu 33(1) tal-FMIO, borża għandha tiggarantixxi li t-titoli kollha ammessi għan-negozjar u t-titoli kollha kkwotati jistgħu jiġu nnegozjati b'mod ġust, effiċjenti u ordnat. Fir-rigward ta' titoli ta' ekwità, ir-Regoli tal-Kwotazzjoni jagħtu lok għal rekwiżiti ta' ishma oħra biex jiżguraw li tali titoli jistgħu jiġu nnegozjati b'mod effiċjenti. Il-korpi independenti tal-borża jistgħu temporanjament jissospendu n-negozjar ta' titoli f'ċirkostanzi mhux tas-soltu, u b'mod speċifiku, il-ksur ta' obbligi importanti dwar l-iżvelar mill-emittent jindikaw li tali sospensjoni hija rakkomandabbli. Jistgħu jikkanċellaw il-kwotazzjoni ta' titoli jekk is-solvenza tal-emittent hija dubjuża ħafna, jew jekk proċedimenti ta' insolvenza jew likwidazzjoni diġà bdew. IL-FINMA tista' wkoll tobbliga borża biex tissospendi n-negozjar f'ċertu titolu billi tuża s-setgħat tagħha taħt l-Artikolu 31 tal-FINMASA bil-għan li tiġi restawrata l-konformità mad-dispożizzjonijiet tal-FMIA jew b'reazzjoni għal irregolaritajiet oħra.

(17)

Il-qafas regolatorju Żvizzeru jinkludi rekwiżiti għall-għoti ta' informazzjoni ta' qabel in-negozjar lill-parteċipanti fis-suq. It-trasparenza ta' qabel in-negozjar għandha l-bażi legali tagħha fl-Artikolu 29(1) tal-FMIA li tistipula li l-borża għandha tippubblika l-aħjar ħames offerti u toffri premji għal kull sehem u titoli oħra f'ħin reali, kif ukoll id-daqsijiet ta' pożizzjonijiet ta' negozjar b'dawn il-prezzijiet. L-istess japplika għal indikazzjonijiet ta' interess azzjonabbli (l-Artikolu 27(3) tal-FMIO). Ir-rinunzji huma disponibbli għal sistemi ta' prezz ta' referenza, sistemi li jeżistu biss biex jifformalizzaw it-transzzjonijiet li diġà ġew innegozjati, ordnijiet miżmuma f'faċilità ta' ġestjoni tal-ordnijiet tal-borża li qed tistenna sakemm tiġi żvelata u ordnijiet li jkunu ta' daqs kbir meta mqabbla mad-daqs normali tas-suq. Il-qafas regolatorju Żvizzeru jinkludi wkoll rekwiżiti għall-għoti ta' informazzjoni ta' wara n-negozjar. It-trasparenza ta' wara n-negozjar hija bbażata fuq l-Artikolu 29(2) tal-FMIA li tistipula li l-borża se tippubblika immedjatament informazzjoni dwar it-tranżazzjonijiet imwettqa kambju ġewwa u barra l-borża għat-titoli kollha ammessi għan-negozjar. B'mod partikolari, il-prezz, il-volum u l-ħin tat-tranżazzjonijiet għandhom jiġu ppubblikati. L-eżenzzjonijiet mit-trasparenza ta' wara n-negozjar huma l-istess għat-trasparenza ta' qabel in-negozjar. Informazzjoni dwar ċerti tranżazzjonijiet atipiċi se tiġi ppubblikata wkoll ippubblikata b'dewmien. Is-servizzi ta' dejta tal-borża ta' qabel u ta' wara n-negozjar huma totalment trasparenti u offruti lill-parteċipanti kollha fuq bażi mhux diskriminatorja. Id-dejta ittardjata hija disponibbli għall-utenti kollha mingħajr ħlas.

(18)

Għalhekk jista' jiġi konkluż li ċ-ċentri tan-negozjar Żvizzeri jkollhom regoli ċari u trasparenti dwar l-ammissjoni ta' titoli għan-negozjar sabiex tali titoli jkunu jistgħu jiġu nnegozjati b'mod ġust, ordnat u effiċjenti, u jkunu liberament negozjabbli.

(19)

Skont it-tielet kundizzjoni, emittenti tat-titoli għandhom ikunu soġġetti għal rekwiżiti ta' informazzjoni perjodika u kontinwa u b'hekk jiġi żgurat livell għoli ta' protezzjoni tal-investituri.

(20)

Ir-regolamenti tal-borża dwar l-ammissjoni għan-negozjar għandhom jistabbilixxu informazzjoni li għandha tkun ippubblikata biex jippermettu lill-utenti biex jivvalutaw il-karatteristiċi tat-titoli u l-kwalità tal-emittenti biex jiġi żgurat livell għoli ta' protezzjoni għall-investitur. L-emittenti li t-titoli tagħhom huma ammessi għan-negozjar fuq borża Żvizzera huma meħtieġa jippubblikaw rapporti finanzjarji annwali u interim. L-emittent għandu jagħmel ir-rapporti finanzjarju annwali tiegħu disponibbli fuq is-sit web tiegħu. Titoli ammessi għan-negozjar fuq borża Żvizzera jistgħu jiġu nnegozjati wkoll f'ċentru ieħor. L-obbligu tan-negozjar applikabbli għal emittenti japplika irrispettivament mill-post fejn isir in-negozjar. L-iżvelar ta' informazzjoni komprensiva u f'waqtha dwar l-emittenti tat-titoli jippermetti lill-investituri biex jivvalutaw il-prestazzjoni kummerċjali ta' emittenti u jiżgura t-trasparenza xierqa għall-investituri permezz ta' fluss regolari ta' informazzjoni.

(21)

Għalhekk jista' jiġi konkluż li emittenti li t-titoli tagħhom huma ammessi fuq boroż Żvizzeri huma soġġetti għal rekwiżiti ta' informazzjoni perjodika u kontinwa u b'hekk jiġi żgurat livell għoli ta' protezzjoni tal-investitur.

(22)

Skont ir-raba' kundizzjoni, il-qafas superviżorju u legali ta' pajjiż terz għandu jiżgura t-trasparenza tas-suq u l-integrità billi jipprevjeni l-abbuż tas-suq fil-forma ta' abbuż minn informazzjoni privileġġata u manipulazzjoni tas-suq.

(23)

L-Artikoli 142 u 143 tal-FMIA jipprojbixxu l-abbuż minn informazzjoni privileġġata u manipulazzjoni tas-suq minn kwalunkwe persuna. Barra minn hekk, taħt il-kundizzjonijiet tal-Artikoli 154 u 155 tal-FMIA, l-isfruttament jew tentattiv ta' sfruttament ta' informazzjoni privileġġata u manipulazzjoni tal-prezzijiet jikkostitwixxu reati kriminali. Il-borża għandha toħroġ regolamenti rigward l-iżvelar ta' informazzjoni privileġġata mill-emittenti. Taħt ir-Regoli ta' Kwotazzjoni ta' borża, l-emittent għandu jinforma lis-suq dwar kwalunkwe fatt sensittiv għall-prezz li tqajmu jew li se jitqajmu fl-isfera ta' attività tiegħu malli dan isir jaf b'din l-informazzjoni. Fatti sensittivi għall-prezzijiet huma fatti li jistgħu jiskattu bidla sinifikanti fil-prezzijiet tas-suq. L-iżvelar għandu jsir b'tali mod li jiġi żgurat it-trattament ugwali għall-parteċipanti kollha tas-suq. Barra minn hekk, taħt l-Artikolu 31(1) tal-FMIA, il-boroż Żvizzeri huma meħtieġa jissorveljaw il-formazzjoni tal-prezzijiet u t-tranżazzjonijiet esegwiti dwar il-borża bil-għan li jinkixef l-abbuż minn informazzjoni privileġġata, il-manipulazzjoni tal-prezzijiet u tas-suq u ksur ieħor ta' dispożizzjonijiet statutorji u regolatorji. B'dan il-għan, borża trid tirrevedi wkoll tranżazzjonijiet imwettqa barra miċ-ċentru tan-negozjar u li jkunu rrappurtati lilu jew miġjuba għall-attenzjoni tiegħu b'xi mod ieħor (l-Artikolu 31(1) tal-FMIA). Dan il-kompitu għandu jitwettaq minn korp indipendenti tal-borża. Emittenti għandhom ikunu kapaċi jipprovdu lista ta' persuni b'informazzjoni privileġġata lill-FINMA fuq talba tagħhom, inkluż kwalunkwe informazzjoni addizzjonali u dokumenti li l-FINMA tirrikjedi biex twettaq il-kompiti tagħha (l-Artikolu 29(1) tal-FINMASA flimkien mal-Artikolu 145 tal-FMIA). Borża trid tinnotifika lill-FINMA dwar kull ksur suspettat tal-liġi jew irregolaritajiet oħra. Jekk il-ksur inkwistjoni jinvolvu reat kriminali, għandha tinforma wkoll lill-awtorità ta' prosekuzzjoni kompetenti mingħajr dewmien (l-Artikolu 31(2) tal-FMIA). Il-FINMA tinvestiga l-informazzjoni li tirċievi mill-boroż dwar il-ksur tal-liġi, kif ukoll abbażi tal-monitoraġġ tagħha tas-suq bil-għan li tinfurza d-dispożizzjonijiet tal-liġi superviżorja li jipprojbixxu l-abbuż tas-suq.

(24)

Għalhekk jista' jiġi konkluż li l-qafas superviżorju u legali tal-Iżvizzera jiżgura t-trasparenza tas-suq u l-integrità billi jipprevjeni l-abbuż tas-suq fil-forma ta' abbuż minn informazzjoni privileġġata u manipulazzjoni tas-suq.

(25)

Għalhekk jista' wkoll jiġi konkluż li l-qafas legali u superviżorju li jiggoverna boroż kif stabbilit fl-Anness ta' din id-Deċiżjoni u li jopera fl-Iżvizzera taħt is-superviżjoni tal-FINMA jissodisfa l-erba' kundizzjonijiet għall-arranġamenti legali u superviżorji u għalhekk għandu jitqies biex jipprovdi għal sistema ekwivalenti għar-rekwiżiti għaċ-ċentri tan-negozjar stipulati fid-Direttiva 2014/65/UE, ir-Regolament (UE) Nru 600/2014, ir-Regolament (UE) Nru 596/2014 u d-Direttiva 2004/109/KE.

(26)

Minħabba li għadd sinifikanti ta' ishma maħruġa u ammessi għan-negozjar fl-Iżvizzera huma wkoll innegozjati f'ċentri tan-negozjar fl-UE, huwa neċessarju li jiġu żgurat li d-ditti kollha ta' investiment soġġetti għall-obbligu tan-negozjar, kif stipulat fl-Artikolu 23(1) tar-Regolament (UE) Nru 600/2014 jippreżervu l-abbiltà li jwettqu negozjar f'ishma ammessi għan-negozjar fil-kambji Żvizzeri fejn tinsab il-likwidità primarja tagħhom. Peress li l-likwidità primarja ta' ishma ammessi għan-negozjar tal-iskambji Żvizzeri tinsab f'dawn il-kambji, ir-rikonoxximent tal-qafas legali u superviżorju tal-Iżvizzera jippermetti lid-ditti ta' investiment biex jinnegozjaw l-ishma ammessi għan-negozjar fl-Iżvizzera f'kambji Żvizzeri u biex jissodisfaw l-aħjar obbligi ta' eżekuzzjoni lejn il-klijenti tagħhom.

(27)

Id-deċiżjoni hija bbażata fuq dejta li turi li n-negozjar inġenerali tal-UE f'multitudni ta' ishma ammessi fuq l-iskambji Żvizzeri hija ta' tali frekwenza li ditti tal-MiFID ma setgħux jinqdew bl-eċċezzjoni stipulata fl-Artikolu 23(1) (a) tar-Regolament (UE) Nru 600/2014. Dan jimplika li l-obbligu ta' negozjar stipulat fl-Artikolu 23(1) tar-Regolament (UE) Nru 600/2014 japplika għal għadd sinifikanti ta' ishma ammessi għan-negozjar fl-Iżvizzera.

(28)

Id-deċiżjoni se tkun ikkumplimentata wkoll minn arranġamenti ta' kooperazzjoni biex jiġi żgurat il-kambju effettiv ta' informazzjoni u l-koordinazzjoni tal-attivitajiet superviżorji bejn l-awtoritajiet kompetenti nazzjonali u l-FINMA.

(29)

Din id-Deċiżjoni hija bbażata fuq ir-rekwiżiti legalment vinkolanti applikabbli għal boroż approvati fl-Iżvizzera fiż-żmien tal-adozzjoni ta' din id-Deċiżjoni. Il-Kummissjoni għandha tkompli timmonitorja fuq bażi regolari l-evoluzzjoni tal-arranġamenti legali u superviżorji għall-boroż Żvizzeri approvati u t-twettiq tal-kundizzjonijiet li abbażi tagħhom ittieħdet din id-Deċiżjoni.

(30)

Din id-Deċiżjoni tqis ukoll il-konklużjonijiet tal-Kunsill tat-28 ta' Frar 2017 fejn prekundizzjoni li tiżviluppa iktar l-approċċ settorjali mal-Iżvizzera huwa l-istabbiliment ta' qafas istituzzjonali komuni għal ftehimiet eżistenti u futuri li permezz tagħhom l-Iżvizzera tipparteċipa fis-Suq Uniku tal-Unjoni. Sabiex sabiex tiġi żgurata l-integrità tas-swieq finanzjarji fl-Unjoni, din id-Deċiżjoni għandha tiskadi fil-31 ta' Diċembru 2018, sakemm ma tiġix estiża mill-Kummissjoni qabel dik id-data. Meta wieħed jiddeċiedi jekk għandhiex tiġi estiża l-applikabbiltà ta' din id-deċiżjoni, il-Kummissjoni għandha b'mod partikolari, tikkunsidra l-progress li jkun sar lejn l-iffirmar ta' Ftehim li jistabbilixxi dak il-qafas istituzzjonali komuni.

(31)

Il-Kummissjoni għandha tagħmel reviżjonijiet regolari tal-arranġamenti legali u superviżorji applikabbli għal boroż fl-Iżvizzera. Dawk ir-reviżjonijiet huma mingħajr preġudizzju għall-possibbiltà li l-Kummissjoni twettaq reviżjoni speċifika fi żmien iktar kmieni, fejn dipartimenti rilevanti jagħmluha neċessarja għall-Kummissjoni li tivvaluta mill-ġdid l-ekwivalenza mogħtija b'din id-Deċiżjoni u, b'mod partikolari, il-progress li sar lejn l-istabbiliment ta' qafas istituzzjonali komuni għal ftehimiet eżistenti u futuri li permezz tagħhom l-Iżvizzera tipparteċipa fis-Suq Uniku tal-Unjoni. Kwalunkwe valutazzjoni mill-ġdid tista' twassal għat-tħassir ta' din id-Deċiżjoni.

(32)

Il-miżuri stipulati f'din id-Deċiżjoni huma konformi mal-opinjoni tal-Kumitat Ewropew tat-Titoli,

(33)

Meta wieħed jikkunsidra li r-Regolament (UE) Nru 600/2014 u d-Direttiva 2014/65/UE japplikaw mit-3 ta' Jannar 2018, huwa neċessarju li din id-deċiżjoni tidħol fis-seħħ fil-jum wara l-pubblikazzjoni tagħha fil-Ġurnal Uffiċjali tal-Unjoni Ewropea,