(1)

L-Indiċijiet Armonizzati tal-Prezzijiet għall-Konsumatur (HICP) huma miżuri armonizzati ta’ inflazzjoni mitluba mill-Kummissjoni u l-Bank Ċentrali Ewropew għall-eżekuzzjoni tal-funzjonijiet tagħhom skont l-Artikolu 140 tat-Trattat dwar il-Funzjonament tal-Unjoni Ewropea. L-HICPs huma mfasslin biex jiffaċilitaw tqabbil internazzjonali tal-inflazzjoni tal-prezzijiet għall-konsumatur. Huma jservu bħala indikaturi importanti għall-ġestjoni tal-politika monetarja.

(2)

L-Artikolu 8(3) tar-Regolament (KE) Nru 2494/95 jirrikjedi li l-peżar tal-HICP jiġi aġġornat bi frekwenza biżżejjed biex tissodisfa r-rekwiżiti ta’ tqabbil u ta’ affidabbiltà. Hemm possibbiltà li l-HICPs ibbażati fuq peżar li huwa aġġornat b’frekwenzi differenti ma jissodisfawx ir-rekwiżiti ta’ tqabbil u ta’ affidabbiltà.

(3)

Ir-Regolament tal-Kummissjoni (KE) Nru 2454/97 (2) tal-10 ta’ Diċembru 1997 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 fir-rigward tal-istandards minimi għall-kwalità ta’ peżar HICP stabbilixxa regoli biex jiżgura li l-HICPs jinbnew bl-użu ta’ peżar li huwa affidabbli u rilevanti biżżejjed għall-iskop ta’ tqabbil internazzjonali. Dawn ir-regoli issa għandhom jiġu emendati filwaqt li jitqiesu l-iżviluppi fil-qasam tal-HICP. Għalhekk, il-miżuri stabbiliti f’dan ir-Regolament għandhom jissostitwixxu lil dawk fir-Regolament (KE) Nru 2454/97, li għandhom jiġu revokati.

(4)

L-Artikolu 9 tar-Regolament (KE) Nru 2494/95 jeħtieġ li l-HICPs ikunu l-indiċijiet tal-prezzijiet tat-tip Laspeyres. Meta l-prezzijiet relattivi ta’ oġġetti u servizzi differenti jinbidlu, ix-xejriet tan-nefqa tal-konsumaturi jistgħu jinbidlu b’tali mod li jagħmluha neċessarju li l-piżijiet tal-gruppi ta’ nefqa korrispondenti, u b’mod partikolari l-kwatitajiet sottostanti tagħhom, jiġu aġġornati biex tiġi żgurata r-relevanza tagħhom.

(5)

Skont l-Artikolu 4 tar-Regolament (KE) Nru 1749/96 (3) tad-9 ta’ Settembru 1996 dwar miżuri ta’ implimentazzjoni inizjali għar-Regolament tal-Kunsill (KE) Nru 2494/95 li jikkonċerna indiċi armonizzati tal-prezzijiet tal-konsumatur, l-HICP għandu jiġi kumpilat biex jinkludi l-bidliet fil-prezzijiet ta’ oġġetti jew ta’ servizzi reċentement sinifikanti u n-nefqiet relattivi tagħhom.

(6)

Dan ir-Regolament għandu japplika mingħajr ħsara għall-istandards minimi għat-trattament ta’ piżijiet ta’ assigurazzjoni skont ir-Regolament tal-Kummissjoni (KE) Nru 1617/1999 (4) tat-23 ta’ Lulju 1999 li jistabbilixxi d-dettalji għall-implimentazzjoni tar-Regolament tal-Kunsill (KE) Nru 2494/95 dwar l-istandards minimi għat-trattament tal-assigurazzjoni fl-Indiċi Armonizzati tal-Prezzijiet għall-Konsumatur.

(7)

Il-piżijiet fil-livell ta’ taqsimiet, gruppi u klassijiet COICOP/HICP (5) huma meħtieġa li ma jvarjawx bejn ix-xhur ta’ matul is-sena, sakemm mhux skont id-dispożizzjonijiet tar-Regolament tal-Kummissjoni (KE) Nru 330/2009 (6) tat-22 ta’ April 2009 dwar l-istandards minimi għat-trattament tal-prodotti staġjonali fl-Indiċijiet Armonizzati tal-Prezzijiet għall-Konsumatur (HICP).

(8)

Dan ir-Regolament m’għandux jeħtieġ lill-Istati Membri jwettqu stħarriġ statisiku jew iwettqu stħarriġ dwar il-baġit tal-familja aktar ta’ spiss minn darba kull ħames snin, filwaqt li jitqies li l-Istati Membri huma meħtieġa li jikkompilaw il-kontijiet nazzjonali skont is-Sistema Ewoprea tal-Kontijiet (ESA 1995) (7) u li l-piżijiet tal-pajjiż, li huma neċessarji biex jiġu prodotti l-aggregati tal-HICP taż-żona euro, tal-UE u oħrajn, huma bbażati fuq dejta tal-kontijiet nazzjonali.

(9)

Tqies il-prinċipju ta’ effettività tal-ispejjeż skont l-Artikolu 13 tar-Regolament (KE) Nru 2494/95.

(10)

Il-Bank Ċentrali Ewropew ġie kkonsultat skont l-Artikolu 5(3) tar-Regolament (KE) Nru 2494/95.

(11)

Il-miżuri stipulati f’dan ir-Regolament huma skont l-opinjoni tal-Kumitat tas-Sistema tal-Istatistika Ewropea,

(1)

il-“perjodu ta’ referenza tal-peżar” ta’ HICP huwa l-perjodu ta’ 12-il xahar ta’ konsum jew nefqa li minnu huma stmati l-piżijiet għall-kumpilazzjoni taċ-ċifri tal-indiċi HICP l-aktar reċenti;

(2)

“subindiċijiet” huma s-subindiċijiet stabbiliti fir-Regolament tal-Kummissjoni (KE) Nru 2214/96 (8) tal-20 ta’ Novembru 1996 li jikkonċerna indiċijiet armonizzati tal-prezzijiet għall-konsumatur: trasmissjoni u tixrid ta’ subindiċi tal-HICP.