L_2021214GA.01004101.xml

RIALACHÁN CUR CHUN FEIDHME (AE) 2021/967 ÓN gCOIMISIÚN

an 16 Meitheamh 2021

maidir leis an athnuachan ar údarú crágaigh mangainéise d’analóg hiodrocsa meitiainín mar bhreiseán beathaithe le haghaidh gach speicis ainmhíoch agus lena n-aisghairtear Rialachán (AE) Uimh. 350/2010

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (CE) Uimh. 1831/2003 ó Pharlaimint na hEorpa agus ón gComhairle an 22 Meán Fómhair 2003 maidir le breiseáin lena n-úsáid i gcothú ainmhithe (1), agus go háirithe Airteagal 9(2) de,

De bharr an mhéid seo a leanas:

(1)	Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis an bhforas agus na nósanna imeachta chun an t-údarú sin a dheonú agus a athnuachan.

(2)	Le Rialachán (AE) Uimh. 350/2010 ón gCoimisiún (2) údaraíodh crágach mangainéise d’analóg hiodrocsa meitiainín ar feadh 10 mbliana mar bhreiseán beathaithe le haghaidh gach speicis ainmhíoch.

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh iarratas isteach maidir leis an athnuachan ar údarú crágaigh mangainéise d’analóg hiodrocsa meitiainín mar bhreiseán beathaithe le haghaidh gach speicis ainmhíoch sa chatagóir breiseán dar teideal “breiseáin chothaitheacha”. Bhí na sonraí agus na doiciméid a éilítear faoi Airteagal 14(2) de Rialachán (CE) Uimh. 1831/2003 ag gabháil leis an iarratas sin.

(4)

Bunaithe ar an tuairim ón Údarás Eorpach um Shábháilteacht Bia (“an tÚdarás”) an 30 Meán Fómhair 2020 (3), faoi na coinníollacha úsáide atá beartaithe, níl éifeacht dhíobhálach ag crágach mangainéise d’analóg hiodrocsa meitiainín ar shláinte ainmhithe, ar shábháilteacht tomhaltóirí ná ar an gcomhshaol. Tháinig an tÚdarás ar an gconclúid freisin go bhfuil riosca don úsáideoir trí ionanálú ag baint leis an mbreiseán agus gur íogróir craicinn é. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe maidir le húsáideoirí an bhreiseáin. An cruthúnas maidir le héifeachtúlacht an bhreiseáin ar a raibh an t-údarú tosaigh bunaithe, tá sé fós bailí le haghaidh an nós imeachta athnuachana. Rinne an tÚdarás fíorú freisin ar an tuarascáil faoi mhodh anailíse an bhreiseáin beathaithe agus é i mbeatha arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)	Léirítear leis an measúnú ar chrágach mangainéise d’analóg hiodrocsa meitiainín go gcomhlíontar na coinníollacha maidir le húdarú, dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú an bhreiseáin sin a athnuachan.

(6)	Mar thoradh ar an athnuachan ar údarú crágaigh mangainéise d’analóg hiodrocsa meitiainín mar bhreiseán beathaithe, ba cheart Rialachán (AE) Uimh. 350/2010 a aisghairm.

(7)

Ós rud é, de bharr cúiseanna sábháilteachta, nach gá modhnuithe ar na coinníollacha údaraithe maidir le crágach mangainéise d’analóg hiodrocsa meitiainín a chur i bhfeidhm láithreach, is iomchuí idirthréimhse a cheadú do na páirtithe leasmhara ionas gur féidir leo iad féin a ullmhú chun na ceanglais nua a eascraíonn as an athnuachan ar an údarú a chomhlíonadh.

(8)	Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

TAR ÉIS AN RIALACHÁN SEO A GHLACADH:

Airteagal 1

Maidir le húdarú an bhreiseáin a shonraítear san Iarscríbhinn, breiseán a bhaineann le catagóir na mbreiseán dar teideal “breiseáin chothaitheacha” agus leis an bhfeidhmghrúpa dar teideal “comhdhúile de riandúile”, déantar an t-údarú sin a athnuachan faoi réir na gcoinníollacha a leagtar síos san Iarscríbhinn sin.

Airteagal 2

1. Crágach mangainéise d’analóg hiodrocsa meitiainín agus réamh-mheascáin a bhfuil sé iontu, ar táirgí iad a táirgeadh agus ar cuireadh lipéad orthu roimh an 7 Eanáir 2022 i gcomhréir leis na rialacha is infheidhme roimh an 7 Iúil 2021 féadfar leanúint dá gcur ar an margadh agus dá n-úsáid go dtí go mbeidh na stoic atá ann cheana ídithe.

2. Ábhair bheatha agus beatha chumaisc ina bhfuil crágach mangainéise d’analóg hiodrocsa meitiainín, ar táirgí iad a táirgeadh agus ar cuireadh lipéad orthu roimh an 7 Iúil 2022 i gcomhréir leis na rialacha is infheidhme roimh an 7 Iúil 2021, féadfar leanúint dá gcur ar an margadh agus dá n-úsáid go dtí go mbeidh na stoic atá ann cheana ídithe i gcás ina bhfuil sé beartaithe iad a úsáid le haghaidh bia-ainmhithe.

3. Ábhair bheatha agus beatha chumaisc ina bhfuil crágach mangainéise d’analóg hiodrocsa meitiainín, ar táirgí iad a táirgeadh agus ar cuireadh lipéad orthu roimh an 7 Iúil 2023 i gcomhréir leis na rialacha is infheidhme roimh an 7 Iúil 2021, féadfar leanúint dá gcur ar an margadh agus dá n-úsáid go dtí go mbeidh na stoic atá ann cheana ídithe i gcás ina bhfuil sé beartaithe iad a úsáid le haghaidh ainmhithe nach bia-ainmhithe iad.

Airteagal 3

Aisghairtear Rialachán (AE) Uimh. 350/2010.

Airteagal 4

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 16 Meitheamh 2021.

Thar ceann an Choimisiúin

An tUachtarán

Ursula VON DER LEYEN

(1) IO L 268, 18.10.2003, lch. 29.

(2) Rialachán (AE) Uimh. 350/2010 ón gCoimisiún an 23 Aibreán 2010 maidir le húdarú crágaigh mangainéise d’analóg hiodrocsa meitiainín mar bhreiseán beatha le haghaidh gach speicis ainmhíoch (IO L 104, 24.4.2010, lch. 34).

(3) EFSA Journal 2020;18(11):6281

IARSCRÍBHINN

Uimhir aitheantais an bhreiseáin

Ainm shealbhóir an údaraithe

Breiseán

Comhdhéanamh, foirmle cheimiceach, tuairisc, modh anailíse

Speiceas nó catagóir ainmhí

Uasteorainn aoise

Íoschion

Uaschion

Forálacha eile

Deireadh na tréimhse údaraithe

Cion na heiliminte (Mn) i mg/kg d’ábhar beatha iomlán ina bhfuil cion taise 12 %

Catagóir breiseán cothaitheach. Feidhmghrúpa: comhdhúile de riandúile

3b510

Crágach mangainéise d’analóg hiodrocsa meitiainín

Tréithriú an bhreiseáin:

Crágach mangainéise d’analóg hiodrocsa meitiainín ina bhfuil 14 % mangainéis agus 76 % (2-hiodrocsa-4-meitiltia) aigéad bútánóch.

Uaschion nicile: 170 ppm.

Foirm sholadach.

Modh anailíse (1):

Maidir leis an analóg hiodrocsa meitiainín atá sa bhreiseán beathaithe a chainníochtú:

—	Tíotraiméadracht, toirtmheascadh poitéinsiméadrach tar éis imoibriú dí-ocsaídiúcháin ocsaídiúcháin;

Maidir leis an mangainéis iomlán sa bhreiseán beathaithe agus sna réamh-mheascáin a chainníochtú:

—	Speictriméadracht Ionsú Adamhaigh, ASS (EN ISO 6869); nó

—	Plasma Cúpláilte go hIonduchtach – Speictriméadracht Astaíochta Adamhaí, ICP-AES (EN 15510); nó

—	Plasma Cúpláilte go hIonduchtach – Speictriméadracht Astaíochta Adamhaí tar éis díleá faoi bhrú, ICP-AES (EN 15621);

Maidir leis an mangainéis iomlán in ábhair bheatha agus i mbeatha cumaisc a chainníochtú:

—	Speictriméadracht Ionsú Adamhaigh, ASS (Rialachán (CE) Uimh. 152/2009 ón gCoimisiún, Iarscríbhinn IV-C); nó

—	Speictriméadracht Ionsú Adamhaigh, ASS (EN ISO 6869); nó

—	Plasma Cúpláilte go hIonduchtach – Speictriméadracht Astaíochta Adamhaí, ICP-AES (EN 15510); nó

—	Plasma Cúpláilte go hIonduchtach – Speictriméadracht Astaíochta Adamhaí tar éis díleá faoi bhrú, ICP-AES (EN 15621).

Gach speiceas

Éisc: 100 (Iomlán)

Speicis eile: 150 (Iomlán)

1.	Déanfar an breiseán a ionchorprú in ábhar beatha i bhfoirm réamh-mheascáin.

2.	Féadfar crágach mangainéise d’analóg hiodrocsa meitiainín a chur ar an margadh agus a úsáid mar bhreiseán a bhfuil ullmhóid ann.

Ar mhaithe le húsáideoirí na mbreiseán agus na réamh-mheascán, bunóidh oibreoirí gnólachtaí beathaithe nósanna imeachta oibríochtúla agus bearta eagraíochtúla chun aghaidh a thabhairt ar rioscaí a d’fhéadfadh eascairt as ionanálú, teagmháil dheirmeach nó teagmháil súl, go háirithe i ngeall ar chion na miotal trom lena n-áirítear nicil. I gcás nach féidir na rioscaí sin a laghdú go leibhéal inghlactha leis na nósanna imeachta agus na bearta sin, is le trealamh cosanta pearsanta cuí a úsáidfear an breiseán agus na réamh-mheascáin.

7 Iúil 2031

(1) Tá sonraí faoi na modhanna anailíse ar fáil ag an seoladh seo a leanas sa tSaotharlann Tagartha: https://ec.europa.eu/jrc/en/eurl/feed-additives/evaluation-reports