(1)

Il-ġidri tan-nagħaġ u l-ġidri tal-mogħoż huma marda virali infettiva li taffettwa lill-annimali kaprini u ovini u li jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tat-trobbija tal-annimali, billi tikkawża tfixkil fil-movimenti tal-kunsinni ta’ dawk l-annimali u tal-prodotti tagħhom fl-Unjoni u fl-esportazzjonijiet lejn il-pajjiżi terzi.

(2)

F’każ ta’ tifqigħa tal-ġidri tan-nagħaġ u tal-ġidri tal-mogħoż f’annimali kaprini jew ovini, hemm riskju serju li dik il-marda tinxtered fi stabbilimenti oħra tal-annimali kaprini jew ovini.

(3)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż il-ġidri tan-nagħaġ u l-ġidri tal-mogħoż, kif ukoll ċerti miżuri li jridu jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tinkludi żona ta’ protezzjoni, żona ta’ sorveljanza, u jekk ikun meħtieġ, żona ristretta ulterjuri madwar iż-żoni ta’ protezzjoni u ta’ sorveljanza jew maġenbhom.

(4)

Id-Deċiżjoni ta’ Implimentazzjoni tal-Kummissjoni (UE) 2025/1767 (4) ġiet adottata wara tifqigħat tal-ġidri tan-nagħaġ u tal-ġidri tal-mogħoż fir-Rumanoija, u tistabbilixxi l-miżuri ta’ emerġenza li jrid jieħu dak l-Istat Membru. B’mod aktar partikolari, id-Deċiżjoni ta’ Implimentazzjoni (UE) 2025/1767 tipprevedi li ż-żoni ta’ protezzjoni, u żoni ta’ sorveljanza li jridu jiġu stabbiliti mir-Rumanija, f’konformità mal-Artikolu 21 tar-Regolament Delegat (UE) 2020/687, iridu jinkludu mqar iż-żoni elenkati fl-Anness ta’ dik id-Deċiżjoni ta’ Implimentazzjoni. Id-Deċiżjoni ta’ Implimentazzjoni (UE) 2025/1767 tipprevedi wkoll li l-miżuri meħtieġa li jridu jiġu applikati fiż-żoni ta’ protezzjoni u ta’ sorveljanza jridu jiġu applikati sad-dati elenkati fl-Anness tagħha.

(5)

Mill-adozzjoni tad-Deċiżjoni ta’ Implimentazzjoni (UE) 2025/1767, ir-Rumanija nnotifikat lill-Kummissjoni b’żewġ tifqigħat addizzjonali tal-ġidri tan-nagħaġ u tal-ġidri tal-mogħoż fi stabbilimenti li jżommu annimali ovini u kaprini, li jinsabu fil-kontea ta’ Teleorman, u waħda barra miż-żona ristretta diġà stabbilita - elenkata fl-Anness ta’ dik id-Deċiżjoni ta’ Implimentazzjoni.

(6)

Għalhekk, iż-żona ristretta, li tinkludi żoni ta’ protezzjoni u ta’ sorveljanza fir-Rumanija, stabbilita fl-Anness tad-Deċiżjoni ta’ Implimentazzjoni (UE) 2025/1767 jenħtieġ li tiġi aġġustata, kemm fl-ispazju kif ukoll fiż-żmien, biex ikun evitat aktar tixrid tal-ġidri tan-nagħaġ u tal-ġidri tal-mogħoż fit-territorju tar-Rumanija u fil-bqija tal-Unjoni.

(7)

Barra minn hekk, sabiex jiġi minimizzat ir-riskju ta’ aktar tixrid tal-marda, jeħtieġ ukoll li jiġi estiż it-tul ta’ żmien taż-żoni ta’ protezzjoni u ta’ sorveljanza stabbiliti fl-Anness tad-Deċiżjoni ta’ Implimentazzjoni (UE) 2025/1767.

(8)

Id-daqs taż-żoni ta’ protezzjoni u ta’ sorveljanza, u t-tul taż-żmien tal-miżuri li jridu jiġu applikati fihom, huma bbażati fuq il-kriterji stabbiliti fl-Artikolu 64(1) tar-Regolament (UE) 2016/429, kif ukoll fuq ir-regoli stabbiliti fir-Regolament Delegat (UE) 2020/687. Il-kriterji applikati għall-għażla tad-daqs taż-żoni ta’ protezzjoni u ta’ sorveljanza, kif ukoll it-tul taż-żmien tal-miżuri li jridu jiġu applikati fihom, jinkludu kunsiderazzjoni mhux biss tas-sitwazzjoni epidemjoloġika fir-rigward tal-ġidri tan-nagħaġ u tal-ġidri tal-mogħoż fiż-żoni affettwati minn dik il-marda, iżda anki s-sitwazzjoni epidemjoloġika ġenerali tal-ġidri tan-nagħaġ u tal-ġidri tal-mogħoż fit-territorju kollu tar-Rumanija, kif ukoll il-livell tar-riskju li l-marda tkompli tinxtered. Għad-determinazzjoni tad-durata tal-miżuri, tqiesu wkoll l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (5).

(9)

Minħabba l-urġenza tas-sitwazzjoni epidemjoloġika fl-Unjoni fir-rigward tat-tixrid tal-ġidri tan-nagħaġ u tal-ġidri tal-mogħoż, u l-ħtieġa li l-marda ma tinxteridx mill-istabbilimenti affettwati fir-Rumanija lejn partijiet oħra ta’ dak l-Istat Membru jew lejn Stati Membri oħra, l-emendi li jridu jsiru fid-Deċiżjoni ta’ Implimentazzjoni (UE) 2025/1767 b’din id-Deċiżjoni jenħtieġ li jsiru effettivi malajr kemm jista’ jkun.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf.