(1)

Is galar víreasach tógálach é an bholgach caorach agus an bholgach gabhar a bhíonn ar ainmhithe de chineál caorach nó de chineál gabhair agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha.

(2)

I gcás ráig den bholgach caorach agus den bholgach gabhar in ainmhithe de chineál gabhair nó de chineál caorach, tá riosca tromchúiseach ann go leathfadh an galar sin go bunaíochtaí eile ainmhithe de chineál gabhair nó de chineál caorach.

(3)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil le hAirteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar de chatagóir A, lena n-áirítear an bholgach caorach agus an bholgach gabhar, agus maidir le bearta áirithe a bheidh le cur i bhfeidhm ann. Ina theannta sin, foráiltear le hAirteagal 21(1) den Rialachán Tarmligthe sin go gcuimseofar leis an gcrios srianta crios cosanta, crios faireachais, agus, más gá, crios srianta breise timpeall na gcriosanna cosanta agus faireachais nó cóngarach dóibh.

(4)

Glacadh Cinneadh Cur Chun Feidhme (AE) 2025/1767 ón gCoimisiún (4) tar éis ráigeanna den bholgach caorach agus den bholgach gabhar sa Rómáin, agus leagtar síos leis bearta éigeandála atá le déanamh ag an mBallstát sin. Go sonrach, déantar foráil le Cinneadh Cur Chun Feidhme (AE) 2025/1767, maidir leis na criosanna cosanta agus na criosanna faireachais atá le bunú ag an Rómáin, i gcomhréir le hAirteagal 21 de Rialachán Tarmligthe (AE) 2020/687, go gcuimseoidh na criosanna sin ar a laghad na limistéir a liostaítear san Iarscríbhinn a ghabhann leis an gCinneadh Cur Chun Feidhme sin. Déantar foráil freisin le Cinneadh Cur Chun Feidhme (AE) 2025/1767 go bhfuil na bearta is gá a chur i bhfeidhm sna criosanna cosanta agus faireachais le cur i bhfeidhm go dtí na dátaí a liostaítear san Iarscríbhinn a ghabhann leis.

(5)

Ó glacadh Cinneadh Cur Chun Feidhme (AE) 2025/1767, ta fógra tugtha ag an Rómáin don Choimisiún faoi dhá ráig bhreise d’ionfhabhtú leis an mbolgach caorach agus leis an mbolgach gabhar i mbunaíochtaí inar coimeádadh ainmhithe de chineál caorach agus de chineál gabhair i gcontae Teleorman, agus ceann amháin acu lasmuigh den theorainneacha an chreasa shrianta a bunaíodh cheana agus a liostaítear san Iarscríbhinn a ghabhann leis an gCinneadh sin.

(6)

Dá bhrí sin, maidir leis an gcrios srianta lena gcuimsítear criosanna cosanta agus criosanna faireachais sa Rómáin, a leagtar amach san Iarscríbhinn a ghabhann le Cinneadh Cur Chun Feidhme (AE) 2025/1767, ba cheart an crios sin a choigeartú, ó thaobh spáis de agus ó thaobh ama de, chun leathadh breise na bolgaí caorach agus na bolgaí gabhar i gcríoch na Rómáine agus chuig an gcuid eile den Aontas a chosc.

(7)

Ina theannta sin, chun an riosca go leathfaidh an galar a thuilleadh a íoslaghdú, is gá freisin síneadh a chur le fad tréimhse na gcriosanna cosanta agus faireachais a leagtar amach san Iarscríbhinn a ghabhann le Cinneadh Cur Chun Feidhme (AE) 2025/1767.

(8)

Tá méid na gcriosanna cosanta agus faireachais agus fad tréimhse na mbeart atá le cur i bhfeidhm laistigh de na criosanna sin bunaithe ar na critéir a leagtar amach in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687 freisin. Ar na critéir a chuirtear i bhfeidhm i ndáil le rogha mhéid na gcriosanna cosanta agus faireachais, chomh maith le fad tréimhse na mbeart atá le cur i bhfeidhm laistigh de na criosanna sin, tá breithniú ar an staid eipidéimeolaíoch a mhéid a bhaineann leis an mbolgach caorach agus leis an mbolgach gabhar sna limistéir atá buailte ag an ngalar sin, agus ní hamháin sin ach ar staid eipidéimeolaíoch fhoriomlán na bolgaí caorach agus na bolgaí gabhar ar chríoch iomlán na Rómáine, agus ar an leibhéal riosca atá ann maidir le leathadh breise an ghalair. Cuirtear caighdeáin idirnáisiúnta an Chóid um Shláinte na nAinmhithe Talún ón Eagraíocht Dhomhanda um Shláinte Ainmhithe (5) san áireamh freisin agus fad tréimhse na mbeart á chinneadh.

(9)

I bhfianaise phráinn na staide eipidéimeolaíche san Aontas a mhéid a bhaineann le leathadh na bolgaí caorach agus na bolgaí gabhar agus i bhfianaise an ghá cosc a chur ar leathadh an ghalair sin ó na bunaíochtaí atá buailte sa Rómáin go codanna eile den Bhallstát sin agus go Ballstáit eile, ba cheart go dtiocfaidh na leasuithe atá le déanamh ar Chinneadh Cur Chun Feidhme (AE) 2025/1767 leis an gCinneadh seo i bhfeidhm a luaithe is féidir.

(10)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,