(1)

Ir-Regolament tal-Kunsill (UE) 2020/1706 (1) jiftaħ u jipprevedi l-ġestjoni ta’ kwoti tariffarji awtonomi tal-Unjoni għal ċerti prodotti tas-sajd għall-perjodu 2021-2023. Ġew stabbiliti volumi xierqa għal kull kwota tariffarja sabiex ikun żgurat li l-industrija tal-Unjoni jkollha provvista adegwata għal dak il-perjodu.

(2)

Il-provvisti ta’ ċerti prodotti tas-sajd fl-Unjoni preżentement jiddependu mill-importazzjonijiet minn pajjiżi terzi. F’dawn l-aħħar deċennji, l-Unjoni saret aktar dipendenti mill-importazzjonijiet biex tissodisfa l-konsum tal-prodotti tas-sajd. Sabiex ma tiġix ipperikolata l-produzzjoni tal-prodotti tas-sajd tal-Unjoni, u biex tkun żgurata provvista adegwata għall-industrija tal-ipproċessar tal-Unjoni, jenħtieġ li jiġu sospiżi d-dazji fuq l-importazzjoni tal-klamar ta’ Patagonja, tal-aringi ppreservati fis-salmura, tal-aringi ffriżati, tal-qatgħat u l-ġwienaħ iffriżati tal-aringi, tal-qatgħat ta’ ħut aħmar u ta’ speċijiet diversi ta’ ħut iffriżat fil-medda tal-kwoti tariffarji ta’ volum xieraq.

(3)

Il-Ftehim dwar il-Kummerċ u l-Kooperazzjoni (2) bejn l-UE u r-Renju Unit (TCA) ilu japplika proviżorjament mill-1 ta’ Jannar 2021. It-TCA jipprevedi l-aċċess mingħajr dazju u mingħajr kwoti għall-prodotti tas-sajd oriġinarji. Iżda l-pajjiżi u t-territorji Brittanniċi ekstra-Ewropej (PTEE) ma għadhomx assoċjati mal-Unjoni u ma għadhomx igawdu mit-tnaqqis fit-tariffi fuq l-esportazzjoni ta’ prodotti tas-sajd lejn l-Unjoni.

(4)

Barra minn hekk, il-protokolli addizzjonali mal-Iżlanda (3) u n-Norveġja (4) li jipprevedu l-kwoti għal ċerti ħut u prodotti tas-sajd skadew fit-30 ta’ April 2021. Billi n-negozjati dwar kwoti ġodda Ma kinux konklużi qabel l-iskadenza tal-protokolli addizzjonali, dak jista’ jirriżulta fi skarsezza ta’ prodotti tas-sajd mingħajr dazju għall-ipproċessar fl-Unjoni.

(5)

Għalhekk, jenħtieġ li r-Regolament (UE) 2020/1706 jiġi emendat skont dan.

(6)

Bħala rimedju għall-konsegwenzi tal-ħruġ tar-Renju Unit mill-Unjoni rigward it-telf tal-istatus preferenzjali tal-PTEE u bħala rimedju għall-konsegwenzi tal-iskadenza tal-protokolli addizzjonali man-Norveġja u l-Iżlanda, jenħtieġ li dan ir-Regolament jidħol fis-seħħ b’urġenza u jenħtieġ li japplika retroattivament mill-1 ta’ Jannar 2021,

(1)

il-punt (b) tal-Artikolu 4(4) huwa sostitwit b’dan li ġej:

(2)

l-Anness huwa emendat f’konformità mal-Anness għal dan ir-Regolament.